E aue ana rai koe no te maata o toou mamae?— * Kare e kore e akapera ana rai tatou pouroa. Tetai au taime ra, penei ka aue tatou no te mea te taitaia ra tatou. Penei ka tuatua kino tetai tangata ia tatou e kare ra oki i te tika. Ka mamae rai tatou me kare?— E mamae ana rai te Atua me tuatua pikikaaia no runga iaia. Ka tuatua ana ra tatou no runga i teia, ka akara e ka akapeea tatou i te akarekareka anga i te Atua.

Akakite te Pipiria e te karanga ra tetai au tangata e te inangaro ra ratou i te Atua, inara ‘te akaongoongo ra ratou iaia.’ Ae, kua akamamae ratou i te Atua! Kare e rauka i tetai tangata kia akamamae i te Atua ko Iehova i te pae kopapa. E Atua mana katoatoa oki aia. Ka akara ana ra tatou e no teaa te Atua e mamae ei me kare tatou e rave i tana e akakite maira.

Kua akatupu nga tangata mua ta Iehova i anga i runga nei te enua, i te mamae maata kiaia. Kua tukuia teia nga tokorua ki roto i te Parataito i te enua nei tei karangaia e ko te “kainga i Edene.” Koai ra teia nga tangata?— Ae, ko Adamu e oti i muri mai, ko Eva. Ka akara tatou e eaa ta raua i rave tei riro ei akamamae ia Iehova.

Muri ake i te tuku anga a Iehova ia raua ki roto i taua kainga ra, akakite aia e kia akono raua i te reira. Kua akakite katoa aia kia raua kia anau tamariki e kia noo ratou i roto i te kainga, e kare ratou e mate. Inara, i mua ake ka anau tamariki ei a Adamu e Eva, kua tupu tetai mea kino tikai. Kua kite koe e eaa taua mea ra?— Kua akavare tetai angera ia Eva e oti ia Adamu, kia meameaau ia Iehova. Ka akara ana tatou e akapeea teia i te tupu anga.

Kua maani te angera kia akara anga e te tuatua ra tetai ovi. Kua reka a Eva i tana e akarongo ra—akakite  te ovi e ka riro mai aia ‘mei te Atua rai te tu.’ I na kua rave aia i ta te ovi i akakite kiaia. Kua kite koe e eaa te reira?—

Kua kai a Eva i te ua o te rakau ta Iehova i akakite kia Adamu e auraka e kai. Mua ake ka anga mai ei a Iehova ia Eva, kua akakite aia kia Admu e: “E kai ua koe i to te au rakau katoa o te kainga nei: Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.”

Kua kite a Eva i taua ture ra. Inara kua akara ua rai aia i te rakau e kite akera aia e “e rakau meitaki ei kai, e te taurekareka no te mata, . . . Kua rave iora aia i te kai no rungao ra, kai iora.” Muri mai kua apai atura aia i te ua kia Adamu e “kua kai katoa iora oki aia.” Toou manako e no teaa aia i akapera ai?— No te mea e maata atu to Adamu inangaro ia Eva, i tona inangaro ia Iehova. Kua iki aia kia akarekareka i tana vaine, eiaa i te Atua. Inara e puapinga maata atu te akarongo ia Iehova i tetai ua atu tangata!

Te maara ra ia koe te ovi tei tuatua atu kia Eva? Mei tetai tangata rai ka rauka iaia i te maani kia akara anga e te tuatua ra tetai puppet, kua rauka rai i tetai apinga i te maani kia akara anga e te tuatua ra te ovi. Noai ra te reo e tuatua ra na roto i te ovi?— Ko te reo tera o ‘taua ovi taito ra ko tei karangaia i te diabolo ra, e ko Satani oki.’

Kua kite koe e akapeea e rauka ai ia koe te akarekareka ia Iehova?— Na roto i te akarongo anga kiaia. Karanga a Satani e ka rauka iaia i te maani i te au tangata ravarai kia rave i tana e inangaro ra ia ratou kia rave. No reira te akamaroiroi maira a Iehova ia tatou e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” Te akakino ra a Satani me kore te aviri maira aia ia Iehova. Karanga aia e ka rauka iaia i te akaariu ke i te au tangata ravarai kia kore e tavini i te Atua. No reira e akarekareka ia Iehova na te akarongo anga kiaia e te tavini anga iaia! Ka tauta pakari ainei koe i te rave i te reira?—