Leza Ulakonzya Kucisizyigwa Moyo—Mbotukonzya Kumukkomanisya
AMUBAYIISYE BANA BANU
Leza Ulakonzya Kucisizyigwa Moyo—Mbotukonzya Kumukkomanisya
Sena kuli nomwakacisizyidwe moyo kapati cakuti mwakatalika kulila?— * Ambweni toonse kuli notwakacita oobo. Zimwi ziindi tulalila akaambo kakuti twalimvwa kuusa. Umwi inga watwaamba zyintu zibi izitali zyamasimpe. Eeco inga catucisa, tee kayi?— Awalo Leza cilamucisa ciindi nobamubejekezya. Atubandike makani aaya, akubona mbotukonzya kumukkomanisya Leza kutali kumucisizya moyo.
Bbaibbele lyaamba kuti bantu ibakaamba kuti balamuyanda Leza ‘bakamukataazya’. Inzya, ‘bakamukalazya’ Leza! Masimpe ngakuti, kunyina uunga wacisa mubili wa Jehova Leza. Ngusinguzu zyoonse. Lino atubone kaambo kapa kuti Jehova kacisizyigwa moyo ciindi notutatobeli nzyatwaambila kucita.
Bantu bobilo bakusaanguna Jehova mbaakalenga munyika, bakamucisizya moyo kapati. Aaba bobilo bakabikkwa mu Paradaiso anyika mubusena bwiitwa kuti “muunda wa Edeni.” Ino aaba bantu bobilo bakali bani?— Wakusaanguna wakali Adamu, mpoonya nikwakainda ciindi, Eva. Atubone nzyobakacita izyakapa kuti moyo wa Jehova ucise.
Jehova naakababikka mumuunda, wakabaambila kuti baulanganye. Alimwi wakabaambila kuti balakonzya kuba abana akukkala mumuunda kakunyina kufwa. Pele kabatanaba abana ba Adamu a Eva, kwakacitika cintu cibyaabi. Sena mulicizyi cakacitika?— Mungelo wakoongelezya Eva alimwi a Adamu kuzangila Jehova. Atubone eeci mbocakacitika.
Mungelo wakapa kuti nzoka ilibonye mbuli kuti ilaambaula. Eva wakaciyanda ncaakamvwa—inzoka yakamwaambila kuti uyakuba “mbuli Leza.” Aboobo wakacita ncoyakamwaambila nzoka. Sena mulicizyi ncaakacita?—
Eva wakalya mucelo kuzwa kucisamu Jehova ncakaambila Adamu kuti batalyi. Leza katanamulenga Eva, wakaambila Adamu kuti: “Misamu yoonse yamumuunda ncobeni uyooilya. cita musamu wakuziba bubotu abubi. Toelede kulya kulinguwo pe, nkaambo mubuzuba obo mboyoolya kulinguwo ncobeni uyoofwa.”
Eva wakaluuzyi mulawo ooyo. Aboobo, wakazumanana kulangilila cisamu, mpoonya wakabona kuti “musamu mubotu kukuulya, alimwi ulabotezya meso . . . Nkabela mpawo wakabweza micelo yawo, walya.” Mpoonya wakapa Adamu mucelo, “alakwe wakalya.” Ino muyeeya kuti wakacitila nzi oobo?— Akaambo kakuti Adamu wakayandisya Eva mukaintu wakwe kwiinda Jehova. Wakasala kubotezya mukaintu wakwe kwiinda kubotezya Leza. Pele kumvwida Jehova cilayandika kapati kwiinda kumvwida muntu uuli woonse!
Sena mulaiyeeya nzoka yakaambaula a Eva? Mbubwenya muntu mbwakonzya kupanga cidooli kuboneka mbuli kuti cilaambaula, kuli umwi wakapa kuti nzoka iboneke mbuli kuti ilaambaula. Ino jwi lyakali kuzwa munzoka lyakali lyani?— Lyakali lya “Muzoka ooyo wakaindi, uutegwa Diabolosi a Saatani.”
Sena mulizyi mbomunga mwamukkomanisya Jehova?— Inga mwacita oobo kwiinda mukumumvwida lyoonse. Saatani waamba kuti ulakonzya kupa kuti bantu boonse bacite nzyayanda. Aboobo, Jehova utukulwaizya kuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.” Saatani ulasampaula naa kufwubaazya Jehova. Waamba kuti inga wapa kuti bantu boonse baleke kubelekela Leza. Aboobo atumukkomanisye Jehova kwiinda mukumumvwida alimwi akumubelekela! Sena inga mwabeleka canguzu kutegwa mucite oobo?—
Amubale mu Bbaibbele Lyanu
Matalikilo 1:26-28; 2:15-17; 3:1-6
Ciyubunuzyo 12:9; Tusimpi 27:11
[Bupanduluzi buyungizidwe]
^ munc. 3 Ikuti kamubala amwana, keengo kamuyeezya kuti mweelede kwiima asyoonto akukulwaizya mwanaanu kuti aambe mbwalimvwa.
[Cifwanikiso icili apeeji 14]
[Cifwanikiso icili apeeji 15]
