Aprann atraver bann kontras

ZWE

Aprann atraver bann kontras

Eski pa ou pou dakor ki Zezi ti sa pli gran Ansenyan ki’n deza viv lo later? Petet ou’n esey imit detrwa fason ki i ti ansennyen, parey lafason ki i ti servi kestyon ek legzanp. Me, eski ou’n deza remarke ki dan son lansennyman i ti souvan servi bann kontras?

Bokou dimoun i servi bann kontras ler zot koze. Petet par ler ou osi ou servi li san realize. Kekfwa ou’n kapab dir en keksoz parey, “Zot in dir ki tou fri in mir; me sa bann i ankor ver.” Oubyen, “I ti timid ler i ti ptipti, par kont konmela i vreman amikal.”

Dan bann ka parey, premyerman ou koz lo en lide, apre ou entrodwir en kontras par servi bann lekspresyon parey me, par kont, plito oubyen de lot kote. Ouswa, ou kapab servi kontras par azout plis lenformasyon. I natirel pour koz dan sa fason parski i ed lezot pour konpran sa ki ou pe dir.

I byen pour rekonnet valer bann kontras, menm si i pa popiler dan serten langaz ouswa kiltir. Akoz? Parski dan Parol enspire Bondye i annan bokou kontras. Souvandfwa Zezi ti servi kontras. Eski ou rapel sa bann? “Mon pa’n vin pour detri me pour akonpli.” “Zot in tande ki i’n ganny dir: ‘Pa komet adilter.’ Me mwan mon dir zot: en dimoun ki get madanm . . .” “I’n ganny dir: ‘Ey pour ey e dan pour dan.’ Me, mwan mon dir zot: pa tir vanzans lo en dimoun ki’n fer ou ditor.”—Mat. 5:17, 27, 28, 38, 39.

Dan lezot liv Labib i annan bann kontras. Zot kapab ed ou pour konpran en pwen oubyen aksantye en pli bon fason pour fer en keksoz. Si ou en paran, reflesir lo sa kontras: “Zot, bann papa, pa eksit lakoler zot zanfan, me okontrer, elve zot dan en ledikasyon ek lenstriksyon Senyer.” (Efe. 6:4) Si zapot Pol ti’n senpleman ekrir ki en papa (oubyen manman) i devret elve son zanfan dapre ledikasyon Bondye, sa ti pou vre e saz. Kantmenm sa, sa lide i vin pli kler kan i fer sa kontras an dizan, ‘pa eksit zot lakoler me okontrer, elve zot dan en ledikasyon ek lenstriksyon Senyer.’

Pli tar dan sa sapit, Pol ti ekrir: “Nou pa pe lit kont dimoun, me kont bann pouvwar move lespri dan ler.” (Efe. 6:12) Sirman sa kontras i ed ou konpran ki ou annan en gran lalit pour fer. Ou pa pe lager avek bann senp dimoun, me plito avek bann move lespri.

BENEFISYE AVEK BANN KONTRAS

I annan bokou plis verse dan Efezyen kot Pol ti servi bann kontras. Si nou reflesir lo zot, sa pou kapab ed nou pour konpran pli klerman sa ki Pol ti oule fer resorti e osi sa ki nou devret fer.

Ou kapab vwar li vo lapenn e enteresan pour egzamin sa latab ki donn serten kontras sorti dan Efezyen sapit 4 ek 5. Anmezir ou lir sak kontras, analiz ou lekor. Demann ou lekor: ‘Fransman, ki latitid mon annan? Ki mannyer mon ti pou reakte dan sa kalite sityasyon? Dan sa kontras, ki bout ki lezot pou vwar i konsern mwan?’ Si en kontras an partikilye i fer ou rekonnet en keksoz ki ou devret sanze, esey fer sa sanzman. Aprann atraver sa kontras.

Ou osi kapab servi sa latab pandan ou ladorasyon fanmir. Premyerman, tou manm fanmir i kapab lir sa bann kontras. Apre, enn parmi zot i kapab dir premye bout sa kontras e les lezot esey rapel sa pwen dan sa dezyenm bout. Sa fason fer i kapab ed zot pour annan en bon diskisyon lo konman pour pli byen aplik sa dezyenm bout. Wi, si ou egzamin sa bann kontras, sa i kapab ed bann zenn ek aze pour annan en bon kondwit dan fanmir e dan lezot sirkonstans osi.

Anmezir ou konpran pli byen valer bann kontras, ou pou pli kapab rekonnet zot dan Labib e petet ou pou vwar zot vreman itil dan predikasyon. Par egzanp, ou kapab dir en met lakour: “Bokou dimoun i dir ki nou tou nou annan en nanm imortel, pourtan remarke ki Parol Bondye i dir la.” Oubyen, lo en letid Labib ou kapab demande: “Preski tou dimoun dan sa teritwar i krwar ki Bondye ek Zezi i en sel, me ki nou’n konpran dapre Labib? Ki ou krwar ou?”

Wi, dan Labib i annan en kantite kontras enstriktif ki kapab ed nou mars dan semen Bondye. Nou osi kapab servi bann kontras pour ed lezot konn laverite dan Labib.

[Portre lo paz 3]

[Tablo lo paz 4, 5]

Serten kontras dan Efezyen sapit 4 ek 5

Pa i ti a byen pour servi sa latab dan ou ladorasyon fanmir!

“Nou pou nepli . . . ganny trennen par laroul, e pouse partou par . . . bann ki antrenn dimoun dan lerer par tou sort riz ki zot envante.”—4:14.

“Okontrer an proklaman laverite avek lanmour, nou devre grandi dan tou fason an Kris, nou sef.”—4:15.

“[Bann nasyon] i dan fernwanr. . . . Zot refize ekoute.”—4:18, 19.

“[“Me,” NW] pa sa, ki zot in aprann lo size Kris. Zot in byen sir tann koz lo li, e zot in ganny ansennyen dan li dapre laverite ki dan Zezi.”—4:20, 21.

“Zot devre alor debaras zot avek zot vye natir, ki ti zot fason viv lontan.”—4:22.

“[“Me,” NW] fodre . . . zot lespri i konpletman sanze; e zot devre sanze e vin en dimoun konpletman nouvo.”—4:23, 24.

“Sa ki abitye vole fodre i aret vole.”—4:28.

“[“Me,” NW] travay pour ganny son lavi dan en fason onnet.”—4:28.

“Pa les bann move parol sorti dan zot labous.”—4:29.

“Me koz zis bann parol itil ki kapab ed lezot pour progrese dan zot lafwa.”—4:29.

“Debaras zot avek tou move santiman, tou iritasyon, tou lakoler. Fer disparet tou kriye ek lensilt. Evite annan okenn santiman mesanste.”—4:31.

“Okontrer vin bon, ranpli avek lafeksyon pour kanmarad; e pardonn kanmarad.”—4:32.

“Veye ki tou form aktivite seksyel imoral, lavi dezordonnen, ek lanvi pour keksoz ki lezot dimoun i posede, pa menm ganny mansyonnen parmi zot.”—5:3.

“Zot devre plito montre Bondye zot rekonnesans par lapriyer.”—5:4.

“Lontan zot ti viv dan fernwanr.”—5:8.

“Me aprezan, zot in vin lalimyer dan Senyer.”—5:8.

“Pa frekant bann dimoun ki fer bann aksyon initil, ki zot fer zis dan fernwanr.”—5:11.

“Okontrer ekspoz sa bann aksyon dan lalimyer.”—5:11.

“Alor fer byen atansyon ki mannyer zot viv. Pa viv konman bann dimoun inyoran.”—5:15.

“Me konman bann dimoun saz. Servi byen tou bann lokazyon ki prezant devan zot.”—5:15, 16.

“Pour sa rezon pa bezwen viv konman bann enbesil.”—5:17.

“Me fer tou zot posib pour zot konpran konman Senyer i oule zot azir.”—5:17.

“Pa bezwen soul zot avek diven, akoz sa pou zis antrenn zot dan en lavi dezordonnen.”—5:18.

“Okontrer, zot devre ranpli avek Lespri.”—5:18.

“Pour ki [Kris i] i kapab prezant kongregasyon avek li menm dan tou son labote, san okenn tas ouswa en pli, oubyen okenn keksoz parey.”—5:27, NW.

“Me i devret sen e san defo.”—5:27, NW.

“Napa personn ki’n deza ay son prop lekor.”—5:29.

“Okontrer, i nouri li e pran byen swen avek li, parey Kris i fer pour [“kongregasyon,” NW].”—5:29.

[Portre]

[Portre lo paz 6]

Eski ou rapel dezyenm bout sa kontras?

LATOUR VEYER (EDISYON LETID)