Dike Vogbingbọn lọ lẹ Ni Gọalọna We

Be hiẹ ma kẹalọyi dọ Jesu wẹ Mẹplọntọ daho hugan he nọgbẹ̀ pọ́n to aigba ji ya? Hiẹ sọgan ko tẹnpọn nado hodo apajlẹ aliho he mẹ e plọnmẹ te delẹ tọn, taidi lehe e nọ yí apajlẹ po kanbiọ lẹ po zan do. Ṣigba, be hiẹ ko lẹnnupọndo aliho he mẹ e nọ saba do vogbingbọn hia to linlẹn awe ṣẹnṣẹn to mẹpinplọn etọn mẹ te ji ya?

Mẹsusu wẹ nọ do vogbingbọn hia to whenue yé to hodọ. Hiẹ lọsu sọgan ko nọ wàmọ to mayọnẹn mẹ. Hiẹ sọgan dọ nude taidi, “Yé dọ dọ atin-sinsẹ́n lọ lẹpo wẹ bia, ṣogan ehelẹ gbẹ́ pò to agló.” Kavi “Ewọ nọ kuwinyan to whenue e to ovu, ṣigba todin e nọ gbàdo-mẹmẹ taun.”

Eyin hiẹ jlo na do vogbingbọn ehe nkọ hia, a sọgan dọ linlẹn kavi nugbo de, to enẹgodo hiẹ sọgan yí hogbe delẹ zan taidi ṣigba, etomọṣo, kakatimọ, kavi to alọ devo mẹ nado bẹ adà awetọ hodidọ lọ tọn jẹeji. Kavi to whenue hiẹ ko yí hogbe mọnkọtọn de zan godo, a sọgan do vogbingbọn hia gbọn nudọnamẹ nina dogọ dali. Hodidọ to aliho mọnkọtọn lẹ mẹ na hẹn nuhe dọ a te họnwun bosọ gọalọna mẹdevo lẹ nado mọnukunnujẹemẹ.

Nujọnu wẹ e yin nado nọ do vogbingbọn hia dile etlẹ yindọ e ma gbayipe to ogbè kavi aṣa delẹ mẹ. Etẹwutu? Na whlasusu wẹ e yin yiyizan to Ohó gbọdo Jiwheyẹwhe tọn mẹ wutu. Jesu nọ saba do vogbingbọn hia to whenue ewọ to mẹplọn. Apajlẹ delẹ die: “Gbẹtọ lẹ ma nọ tá miyọ́ngbán bo nọ ze e do ohà nujijlẹ tọn glọ gba, ṣigba do miyọ́ngbántin ji.” “Yẹn wá, e ma yin nado và [Osẹ́n lọ] sudo, ṣigba nado hẹndi.” “Mì ko sè bọ e yin didọ dọ, ‘Hiẹ ma dona deayọ.’ Ṣigba yẹn dọna mì dọ mẹdepope he zindonukọn nado to yọnnu de pọ́n . . . ” “E yin didọ dọ, ‘Nukun na nukun podọ adú na adú.’ Ṣigba, yẹn dọna mì dọ: Mì diọavunnukunsọ ewọ he yin mẹylankan blo; ṣigba eyin mẹdepope hò alaka adusiwhé tọn na we, lẹ́ amiyọnwhé tọn na ẹn ga.”—Mat. 5:15, 17, 27, 28, 38, 39.

Vogbingbọn didohia to linlẹn awe ṣẹnṣẹn mọnkọtọn lẹ tin to owe Biblu tọn devo lẹ mẹ. Yé sọgan gọalọna we nado mọnukunnujẹ nude mẹ kavi nado zinnudeji dọ nude pọnte hugan devo. Eyin mẹjitọ de wẹ hiẹ yin, lẹnnupọndo vogbingbọn he yin didohia to wefọ ehe mẹ ji: “Mì otọ́ lẹ emi, mì ma nọ hẹn homẹgblena ovi mìtọn lẹ blo, ṣigba mì nọ to pinpọn yé go whẹ́n to mẹplọnlọ po anademẹ Jehovah tọn po mẹ.” (Efe. 6:4) Eyin apọsteli Paulu ko wlan poun dọ otọ́ (kavi onọ̀) de dona pọ́n ovi etọn go whẹ́n to mẹplọnlọ Jiwheyẹwhe tọn mẹ wẹ, enẹ na ko yin nuyọnẹnnu bosọ sọgbe. Etomọṣo, linlẹn lọ wá họnwun hezeheze to whenue ewọ do vogbingbọn lọ hia dọ, ‘mì ma nọ hẹn homẹgblena yé blo, ṣigba mì nọ pọ́n yé go whẹ́n to anademẹ Jehovah tọn mẹ.’

Paulu sọ kàn to weta dopolọ mẹ dọmọ: “Ahididi he mí tindo, ma yin sọta ohùn po agbasalan po, ṣigba sọta . . . huhlọn gbigbọ ylankan olọn tọn lẹ.” (Efe. 6:12) Vogbingbọn he yin didohia enẹ sọgan ko gọalọna we nado mọnukunnujẹemẹ dọ avùn sinsinyẹn wẹ mí dona hò. E ma yin gbẹtọ tata lẹ wẹ mí na hoavùn sọta gba, ṣigba sọta gbigbọ ylankan huhlọnnọ lẹ.

 MỌALEYI SỌN VOGBINGBỌN LỌ LẸ MẸ

To wekanhlanmẹ Efesunu lẹ tọn dopolọ mẹ, hiẹ nasọ mọ wefọ susu devo lẹ he mẹ Paulu do vogbingbọn hia te. Nulinlẹnpọn do yé ji sọgan gọalọna mí nado mọnukunnujẹ nuhe dọ Paulu te mẹ, podọ enẹ sọgan hẹn nuhe e jẹ dọ mí ni wà lọ họnwun dogọ.

Apotin he zọnpọ hẹ hosọ ehe bẹ delẹ to vogbingbọn he yin didohia to Efesunu lẹ weta 4 po 5 po mẹ hẹn, enẹwutu nujọnu wẹ e yin nado gbadopọnna ẹn bo mọ ayajẹ sọn mọwiwà mẹ. Dile hiẹ to dogbapọnna vogbingbọn lọ lẹ dopodopo, lẹnnupọndo lehe e gando gbẹzan towe go do ji. Kanse dewe dọ: ‘Na nugbo tọn, etẹwẹ yin ayilinlẹn ṣie? Nawẹ n’nọ yinuwa to ninọmẹ ehe kavi mọnkọtọn de mẹ gbọn? Adà vogbingbọn lọ tọn tẹwẹ mẹdevo lẹ na lẹndọ e gando go e?’ Eyin hiẹ doayi e go dọ vogbingbọn lọ do adà he ji hiẹ dona wazọ́n do de hia, dovivẹnu nado basi vọjlado. Dike vogbingbọn he yin didohia enẹ ni gọalọna we.

Hiẹ sọgan sọ yí apotin lọ zan to sinsẹ̀n-bibasi whẹndo tọn mìtọn whenu. Hagbẹ whẹndo towe tọn lẹpo sọgan hia vogbingbọn he yin didohia lọ lẹ jẹnukọn. Enẹgodo, mẹdopo sọgan dọ adà tintan vogbingbọn he yin didohia de tọn bo dike mẹdevo lẹ ni tẹnpọn nado flin bo dọ nuagokun he yin nùzindeji to adà awetọ etọn mẹ. Enẹ sọgan dekọtọn do hodọdopọ ayajẹ tọn de mẹ to whẹndo lọ mẹ gando lehe mì sọgan yí adà awetọ lọ zan to gigọ́ mẹ do go. Na nugbo tọn, dogbigbapọnna vogbingbọn lọ lẹ to aliho enẹ mẹ sọgan gọalọna yọpọvu po mẹho po nado doafọna walọ Klistiani tọn to whẹndo mẹ podọ to fidevo lẹ.

Dile hiẹ to nuhọakuẹ-yinyin vogbingbọn didohia tọn yọnẹn dogọ, hiẹ sọgan nọ yawu doayi yé go to Biblu mẹ, podọ hiẹ na mọdọ yé na gọalọna we taun to lizọnyizọn lọ mẹ. Di apajlẹ, hiẹ sọgan dọna whétọ de dọmọ: “Mẹsusu nọ dọ dọ, mẹlẹpo wẹ tindo alindọn jọmaku, ṣigba pọ́n nuhe Ohó Jiwheyẹwhe tọn dọ tofi.” Kavi to plọnmẹ Biblu de whenu, hiẹ sọgan kanse dọmọ: “Suhugan gbẹtọ lẹ tọn yise to lẹdo ehe mẹ dọ mẹdopolọ wẹ Jiwheyẹwhe po Jesu po yin; ṣigba, etẹwẹ Biblu dọ? Podọ etẹwẹ hiẹ yise?”

Na nugbo tọn, Owe-wiwe lẹ bẹ vogbingbọn didohia to linlẹn awe ṣẹnṣẹn susu hẹn, ehe sọgan plọnnu mí bo gọalọna mí nado zinzọnlin to aliho Jiwheyẹwhe tọn ji. Podọ, mí sọgan yí yé zan nado gọalọna mẹdevo lẹ nado wá yọ́n nugbo he tin to Biblu mẹ lẹ.

 [Apotin nudọnamẹ tọn to weda 4 po 5 po]

 Vogbingbọn Delẹ He Yin Didohia to Efesunu lẹ Weta 4 po 5 po Mẹ

Mì tẹnpọn nado yí apotin ehe zan to sinsẹ̀n-bibasi whẹndo tọn mìtọn whenu!

‘Mí ma dona yin yigọyigọ-dona gbọn ayiha gigẹdẹ gbẹtọ lẹ tọn dali podọ gbọn ayikinkan gigẹdẹ oklọ tọn dali ba.’—4:14.

“Ṣigba, to nugbo didọ mẹ, mì gbọ mí ni gbọn owanyi dali whẹ́n to onú lẹpo mẹ to kọndopọ mẹ hẹ mẹhe yin tatọ́ lọ, yèdọ Klisti.”—4:15.

“[Akọta lẹ] to zinvlu aliho nulẹnpọn tọn mẹ, . . . na sinsinyẹn ahun yetọn lẹ tọn wutu.”—4:18, 19.

“Ṣigba, e ma yin nuhe mì plọn gando Klisti go niyẹn, na nugbo tọn, dile etlẹ yindọ mìwlẹ sè ohó etọn bo yin pinplọn gbọn ewọ gblamẹ.”—4:20, 21.

“Mì dona klọ́n gbẹtọ-yinyin hoho lọ dai ehe to kọndopọ mẹ hẹ aliho gbẹzan dai tọn mìtọn.”—4:22.

‘Ṣigba mì dona hẹn huhlọn he nọ whàn ayiha mìtọn jẹ yọyọ, bo dona ze gbẹtọ-yinyin yọyọ lọ do.’—4:20, 21.

Mì dona klọ́n gbẹtọ-yinyin hoho lọ dai ehe to kọndopọ mẹ hẹ aliho gbẹzan dai tọn mìtọn.”—4:22.

‘Ṣigba mì dona hẹn huhlọn he nọ whàn ayiha mìtọn jẹ yọyọ, bo dona ze gbẹtọ-yinyin yọyọ lọ do.’—4:23, 24.

“Mì dike mẹhe nọ fìnnú sọ fìnnú ba blo.”—4:28.

“Ṣigba mì gbọ ewọ ni nọ wazọ́n sinsinyẹn, bo nọ yí alọ etọn lẹ do wà azọ́n dagbe lẹ.”—4:28.

“Mì dike ohó gbigble de tọ́njẹgbonu sọn onù mìtọn mẹ blo.”—4:29.

“Adavo ohó depope he yọ́n na mẹjlọdote.”—4:29.

“Mì gbọ adi sinsinyẹn, homẹgble, adánjijẹ, awhá po mẹzunzun po ni dẹn do mì gọna ylanwiwa lẹpo.”—4:31.

“Ṣigba, mì lẹzun homẹdagbenọ hlan ode awetọ, bo gọ́ na awuvẹmẹ sisosiso, bosọ nọ jona ode awetọ sọn ojlo mẹ wá.”—4:32.

“Mì gbọ galilọ po mawé wunmẹ lẹpo po kavi nukunkẹn ni ma tlẹ yin nùdego to ṣẹnṣẹn mìtọn blo.”—5:3.

“Ṣigba, kakatimọ mì nọ dopẹ́.”—5:4.

“Mì ko yin zinvlu to ojlẹ de mẹ wayi.”—5:8.

“Ṣigba mì ko yin hinhọ́n todin to kọndopọ mẹ hẹ Oklunọ.”—5:8.

“Mì sọ nọ tindo mahẹ to azọ́n mado sinsẹ́n he yin zinvlu tọn lẹ mẹ hẹ yé ba blo.”—5:11.

“Ṣigba, kakatimọ, mì nọ gbẹ́ yé dai.”—5:11.

“Enẹwutu, mì nọ payi tlala dọ lehe mì to zọnlinzin do ni ma yin taidi nulunọ blo.”—5:15.

“Ṣigba taidi nuyọnẹntọ lẹ, mì nọ fli ojlẹ he jẹ lẹ na mìde.”—5:15, 16.

“Na ehe wutu, mì sọ yin nulunọ ba blo.”—5:17.

“Ṣigba mì nọ to ayido nuhe ojlo Jehovah tọn yin go zọnmii.”—5:17.

“Mì sọ nọ nù ovẹn mú ba blo, ehe nọ dekọtọn do walọ he gblezọn mẹ.”—5:18.

“Ṣigba mì nọ gọ́ na gbigbọ.”—5:18.

“Na [Klisti] nido sọgan ze agun lọ donukọnna ede to whanpẹ daho etọn mẹ, matin dihó kavi awugbopo kavi onú mọnkọtọn depope.”—5:27.

“Ṣigba dọ e dona yin wiwe bo ma tindo oblọ.”—5:27.

“Mẹdepope ma nọ gbẹwanna agbasalan edetiti tọn gbede.”—5:29.

“Ṣigba e nọ na ẹn núdùdù bo nọ wlebòna ẹn, dile Klisti nọ wà na agun lọ do ga.”—5:29.

[Yẹdide to weda 6]

Be hiẹ sọgan flin adà awetọ vogbingbọn he yin didohia lọ tọn ya?