Nove kuvhura o yi kwatese ko asi Jesus kwa kere Murongi gomunene ogu ga parukire pevhu ndi? Nampo wa hetekera ko kuhonena nonkedi dimwe omu nga rongo, ngwendi kuruganesa mapuro noyifanekeso. Wa gazadara ko asi pamwe age nga ruganesa malisigo mondongeseso zendi ndi?

Vantu wovanzi kuruganesa malisigo apa ava uyunga. Pamwe ove kuruganesa malisigo mombuuyungiso zoge wa hana kuyidivira. Kuvhura o uyunge ngwendi asi: “Awo kuna uyunga asi manyango nagenye gana pi, nye eli simpe kapi lina kudofa-dofa.” Ndi asi: “Age kwa kere nonomuga, nye ngesi ana manguruka.”

Momaukaro ngwendi gaga, pomuhowo to gava egano, makura ntani no tumbura elisigo pokuruganesa nonkango ngwendi nye, nampili ngoso, ano ndi nsene asi. Ndi pokugwederera ko mauzera gamwe. Nsene o uyunga monkedi zangoso, eyi ngo uyunga ngayi zuvhika ntani wopeke ngava kwata egano eyi ono tamba.

Nampili ngomu momaraka ndi monompo dimwe ava dili kuruganesa malisigo, twa yi diva asi ago mulyo. Morwasinke? Morwa ose kugagwana moNonkango daKarunga. Jesus rorunzi nga ruganesa malisigo. Koneka omu ga ga ruganesere. Pasihonena age kwa tente asi: “Mwa zuvha sa omu va tanta asi, ‘Walye o hondere.’ Nye ame tani mu tantere asi, nkenyogu a tara mukadi . . .” “One mwa zuvha sa omu va tanta asi, ‘Yeho neho, yezego nezego.’ Nye ame tani mu tantere asi, walye omu lihokwa moyininke ya hana kuhungama. Nye nsene ana ku toona muntu ketama lyoge lyorulyo, mu pirwira nekwawo.”—Mat. 5:27, 28, 38, 39.

Monobuke dimwe domoBibeli namo mwa kara malisigo gangoso. Nago kuvhura ga ku vatere o kwate egano sininke ndi o nkondopeke egano. Nsene ove mukurona, gazadara ko komalisigo aga asi: “Nsene o dira kupisura munoge, kapi wa mu hara. Nsene asi wa mu hara, ngo mu pukurura.” (Yis. 13:24) Saromo ngano ga tjenge tupu asi vaguhya ndi vazinya va hepa kupisura vana vawo, ayo ngano ya gwanene po. Nye egano lya zera unene pokugweda ko elisigo asi: ‘Ogu a dili kupisura munwendi, kapi ga mu hara. Nsene asi ga mu hara, nga mu pukurura.’

Mupositoli Paurusa kwa tjanga asi: ‘Kapisi vantu atu rwanesa, nani nye . . . nompepo donondona dekeguru-guru.’ (Efe. 6:12) Yosili elisigo olyo kukuvatera o kwate egano asi wa kara nerwano lyenene. Kapisi novantu, nye nonompepo donondona.

Mobuke ezi zoBibeli zoVaefeso, mwa kara yihonena yimwe omu Paurusa ga ruganesa malisigo. Kugazadara ko kweyi kuvhura kuvatera nkenye gumwe gwetu a kwate nawa egano eyi twa hepa kurugana.

Mafano aga va tura mosirongwa esi aga ga zogera Vaefeso egaununo 4 ntani 5 ngaga ku vatera. Ngomu ono kuresa nkenye elisigo, gazadara ko kuhamena eparu lyoge. Lipura asi: ‘Ame ngapi nkareso zange? Nkareso musinke ani likida moukaro ou? Malisigo musinke aga wopeke nava gazara gana kusingonona kuhamena nkareso zange?’ Nsene no dimburura asi elisigo kuna kuhorora nkareso ezi wa hepa kurundurura, hetekera ko kutura po marunduruko gangoso. Malisigo ogo ngano ga ku vatere.

Ndi kuvhura o ruganese mafano gelisigo poukareli weni wepata. Pomuhowo, nkenye gumwe gemepata kuvhura a rese malisigo ogo. Makura gumwe kuvhura a tumbure elisigo limwe, ano vemepata va heteke kudiworoka ruha rwauvali rwelisigo olyo. Oyo ngayi twaredesa konzogera zongwa moukareli wepata omu nomu sikisa mo ruha rwauvali rwelisigo. Kukonakona malisigo monkedi zangoso ngayi vatera vadinkantu novakondi va likide nkareso zoSikriste mepata ntani nankenye oku.

Ngomu ngo diva unene mulyo gomalisigo, ngayi ku rerupira kugadimburura moBibeli ntani ngo yi dimburura asi ago mulyo moyirugana yokuzuvhisa. Pasihonena, moyirugana yokuzuvhisa kuvhura o uyunge asi: “Vantu wovanzi kuuyunga asi nkenye muntu ga kara nomwenyo gwa ha fu, nye tareni eyi adi uyunga ko Nonkango daKarunga.” Ndi pokulironga nomurongwa goBibeli kuvhura o pure asi: “Vantu wovanzi momukunda kwa pura asi Karunga naJesus muntu gumwe, nye yisinke tuna dimburura azi uyunga Bibeli? Nye yipi no pura po?”

Yimo, moMatjangwa kwa kara mo malisigo gomanzi aga naga tu vatera tu gende monzira zaKarunga. Ntani kuvhura tu ruganese malisigo mokuvatera wopeke va dive usili woBibeli.