Nga kukwikilanga ko vo Yesu i Nlongi osundidi onene wazinga kala ova nza? Nanga ovavanga tanginina e mpila kalongelanga, nze mpila ina kasadilanga yuvu ye yingana. Kansi, nga omonanga e mpila kasadilanga e mvovo minswaswanesanga mambu muna malongi mandi?

Wantu ayingi besadilanga e mvovo miswaswanesanga mambu vava bevovanga. Ngeye mpe olenda mio sadila nkumbu miayingi lembi wo zaya. Olenda vova diambu nze edi: “Bavovele vo e bundu yawonso yabwaka; kansi, eyayi yakinu ya nse.” Yovo “Nsoni zayingi kamonanga muna kileke, kansi owau ke monanga diaka nsoni ko.”

Muna mambu ma mpila yayi, entete osonganga e ziku kia diambu yovo e ngindu, i bosi oyikanga e nswaswani muna sadila e mvovo nze kansi, muna kuma kiaki, kana una vo i wau yovo kuna diak’e sambu. Yovo olenda songa e nswaswani muna kudikilanga e mambu. O sadila e mvovo miami, disadisanga akaka mu toma bakula dina ozolele vova.

Kanele vo e mvovo miswaswanesanga mambu ke mitoma sadilwanga ko muna ndinga zakaka, diambote twazayanga e mfunu mina. Ekuma? E kuma kadi, mitoma sadilwanga muna Diambu dia Nzambi diavumunwinwa. Yesu nkumbu miayingi kasadila e nswaswani zazi. Sungamena e mvovo emi: ‘O wantu ke bekwikanga mini ko, yo sia kio kunansi a mbangu, kansi vana zangikilwa.’ ‘Kizidi bangula [Nsiku] ko, kansi lunganisa.’ “Nwawidi wo wavovwa vo, Ke nute zumba ko: kansi omono inusamunwini vo, Konso on’otungununa nkento. . . ” “Wavovwa vo, Disu mu disu, ye dinu mu dinu: kansi omono inusamunwini vo, ke nufidisa mbi e mpaka ko: konso on’okumwanda mbata van’ebundi dialunene, umvilulwilà mpe ediaka.”—Mat. 5:15, 17, 27, 28, 38, 39.

Muna nkanda miakaka mia Nkand’a Nzambi muna mpe ye mvovo miswaswanesanga mambu. E mvovo miami milenda kusadisa mu bakula e diambu yovo kusonga mpila yambote ya vangila e diambu. Avo u se, badika e nswaswani ezi: ‘Amase, ke nufungisa wan’eno makasi ko: kansi, nubatongonona muna ndonga yo lusansu lua Mfumu.’ (Ef. 6:4) Paulu wa ntumwa nga wafwana kwandi vova kaka vo mase bafwete longela wan’au muna ndonga za Nzambi. Ediadi diangangu ye dialudi. Kansi, e ngindu zandi zitoma bakulwanga wau kasonga e nswaswani yo vova vo ‘ke nubafungisa makasi ko, kansi nubatongonona muna ndonga yo lusansu lua Yave.’

Muna kapu kiaki kaka, Paulu wasoneka diaka vo: “Ndwan’eto ke ya nitu yo menga ko, kansi . . . ye vu ya umwanda ya bi muna mwezulu.” (Ef. 6:12) E nswaswani yayi ilenda kusadisa mu bakula vo mvita yangolo kikilu onwananga. Ke wantu ko onwananga yau, kansi ye mianda miambi.

Muna nkanda wau kaka wa Efeso, olenda mo wana sono yayingi ina Paulu kasadila e mvovo misonganga e nswaswani. O badika e sono yayi dilenda kutusadisa mu toma bakula e ngindu za sina za Paulu ye dina tufwete vanga.

Olenda yangalela yo vwa nluta muna fimpa e babu kisonganga ezaka nswaswani ziyikwanga muna nkand’a Efeso kapu kia 4 ye kia 5. Ekolo otanganga e nswaswani zazi, yindula e kiwuntu kiaku. Ukiyuvula: ‘Nkia fu ikalanga kiau? Adieyi yadi vanga avo ediadi dimbwididi? Nki’esambu akaka bekungindulwilanga?’ Avo e nswaswani isadisi mu bakula vo vena ye diambu ofwete singika, sadila dina olongokele. Yambula vo e nswaswani zazi zasadisa.

Nulenda mpe sadila e babu kiaki muna nsambil’eno ya esi nzo. Entete, esi nzo awonso balenda tanga e mvovo misonganga e nswaswani. I bosi, mosi mu yeno olenda yika e tini kiantete, yo yambula vo akaka esi nzo bavava sungamena e diambu diasina dina muna tini kiazole. Ediadi, dilenda kunufila mu kala ye mbokena zambote y’esi nzo yo zaya una nulenda sadila una ufwene e tini kiazole. Kieleka, o fimpa e nswaswani zazi, dilenda sadisa aleke y’ambuta mu tatidila e nkal’ambote ya Kikristu muna nzo ye mu fulu yakaka.

Avo otomene bakula o mfunu a nswaswani zazi, otoma zo sungamena muna Nkand’a Nzambi yo zaya vo mfunu kikilu zina muna salu kiaku kia Kikristu. Kasikil’owu, olenda vova kwa muntu muna salu kia umbangi vo: “Wantu ayingi bevovanga vo muntu moyo ulembi fwanga kena wau, kansi tala dina Nkand’a Nzambi uvovanga.” Yovo vava olongokanga Nkand’a Nzambi yo muntu, olenda yuvula vo: “Wantu ayingi mu zunga kiaki bekwikilanga vo Nzambi yo Yesu muntu mosi kwandi, kansi adieyi Nkand’a Nzambi uvovanga? Ongeye adieyi okwikilanga?”

Kieleka, Nkand’a Nzambi usadilanga nswaswani zayingi zilenda kutusadisa mu kangalela muna nzil’a Nzambi. Tulenda sadila e nswaswani zazi mu sadisa akaka bazay’e ludi kia Nkand’a Nzambi.