Mu Itusise Mulutelo wa ku Bapanyanga Lika

Kana ha mu lumeli kuli Jesu ki yena Muluti yo mutuna ka ku fitisisa ya kile a pila fa lifasi? Mwendi se mu likile ku likanyisa milutelo ye miñwi ya Jesu, inge cwalo mwa naa itusisezanga lipuzo ni liswanisezo. Kana mwa ziba kuli Jesu naa itusisanga mulutelo wa ku bapanya lika?

Batu ba bañata ba bapanyanga lika ha ba bulela. Ni mina fokuñwi mwa kona ku bulela ka ku bapanya lika mu sa lemuhi. Mu kana mwa bulela kuli, “Ne ba bulela kuli litolwana kaufela li buzwize; kono ze zona ha li si ka buzwa.” Kamba mu kana mwa bulela kuli, “Musizana yo naa na ni maswabi ha naa sa li mwanana, kono cwale fa ki kale a lukuluha.”

Ku bulela ka ku bapanya lika ku ama ku bulela pili taba ya niti kamba taba ye ñwi, mi hamulaho ni ku bulela taba ye shutana ni yona ka ku itusisa manzwi a cwale ka kono, nihakulicwalo, kamba ka mubulelelo o muñwi. Kamba mwa kona ku bapanya lika ka ku bulela litaba ze ñwi hape kamba ka ku koñomeka muhupulo. Ha mu bulela ka nzila ye cwalo, ze mu bulela li ka utwahala mi batu ba ka utwisisa.

Nihaike kuli ku bulela ka ku bapanya lika ha ku si ka ata hahulu mwa lipuo ze ñwi ni mwa lizo ze ñwi, lu swanela ku hupula kuli ku bapanya lika ki kwa butokwa. Kabakalañi? Kakuli mwa Linzwi le li ñozwi ka susumezo ya Moya wa Mulimu, lu fumana litaba ze ñata ze ñozwi ka ku bapanyiwa. Hañata Jesu naa bulelanga ka ku bapanya lika. Ka mutala, Jesu naa bulezi kuli: “Batu ba tukisanga lambi ni ku i toma fa ñandaleza, isiñi mwa sizuma.” “Ni tezi ku to taleleza [Mulao], isi ku yundisa.” “Mu utwile kuli ne ku bulezwi kuli: ‘U si ke wa buka.’ Kono na, na mi bulelela ni li, mutu kaufela ya swalelela ku talima musali . . . ” “Ne ku bulezwi kuli: ‘Liito ka liito ni liino ka liino.’ Kono na, ni mi bulelela kuli: U si ke wa kutiseza mutu ya maswe, kono ufi kamba ufi ya ku bakula kwa lilama la hao la bulyo, u mu sikamiseze ni la nzohoto.”—Mat. 5:15, 17, 27, 28, 38, 39.

Mwa libuka ze ñwi za Bibele ku na ni mibulelelo ya ku bapanya lika. Mibulelelo yeo, ya kona ku mi tusa ku utwisisa sisupo kamba ku mi tusa ku koñomeka hande taba ye ñwi. Haiba mu bashemi, mu nahanisise manzwi a, a ñozwi ka ku bapanyiwa: “Bo ndate-bana, mu si ke mwa halifisa bana ba mina, kono mu zwelepili ku ba hulisa ka kalimelo ni kelezo ya Jehova.” (Maef. 6:4) Kambe muapositola Paulusi naa ñozi feela kuli bo ndate-bana (kamba bo maa-bana) ba swanela ku hulisa bana ba bona ka ku ba lemusa za Mulimu, kelezo yeo ne i ka ba ye nde mi ne i ka ba ya niti. Kono cwale lu utwisisa hande hahulu kelezo ya hae kakuli Paulusi naa ize, ‘mu si ke mwa ba halifisa, kono mu ba hulise ka kelezo ya Jehova.’

Hasamulaho, Paulusi hape naa ñozi kuli: “Lu na ni ndwa, isi ya ku lwana ni mali ni nama, kono ya ku lwana ni . . . mioya ye maswe ye mwa libaka za lihalimu.” (Maef. 6:12) Linzwi la kono le li itusisizwe mwa timana yeo, li mi tusa ku utwisisa kuli mu swanela ku lwana ndwa ye tuna. Ndwa yeo haki ya ku lwana ni batu kono ki ya ku lwana ni mioya ye maswe.

 MU TUSIWE KI KU BAPANYANGA LIKA

Mwa buka ye swana yeo, ya Maefese, mu ka fumana litaba ze ñwi ze ñata za naa ñozi Paulusi ka ku bapanya. Ku nahanisisa litaba zeo kwa kona ku lu tusa ku utwisisa za naa talusa Paulusi, mwendi mane ni ku lu tusa ku utwisisa hande mo lu kona ku sebeliseza litaba zeo mwa bupilo bwa luna.

Mwa kona ku ikola ni ku tusiwa haiba mu nyakisisa chati ye zamaelela ni taba ye, ili mo ku fumaneha litaba ze ñwi ze ñozwi ka ku bapanywa ili ze fumaneha kwa liñolo la Maefese kauhanyo 4 ni 5. Ha mu nze mu bala taba ni taba ye bapanyizwe fa chati yeo, mu nahanisise ka za bupilo bwa mina. Mu ipuze kuli: ‘Ni na ni mubonelo o cwañi fa taba ye? Ni kona ku eza cwañi ha ni ipumana mwa muinelo o bulezwi mwa taba ye? Batu ba kona ku nga kuli ni wela kai?’ Haiba mu lemuha kuli taba ye ñwi ye bulezwi fa chati yeo i tahisa kuli mu zibe mo mu fokola, mu sebelise ze mu itutile, mi haike mu tusiwe ka ku eza cwalo.

Kamba mwa kona ku nyakisisa chati ye ka nako ye mu ka lapela sina lubasi. Pili, yo muñwi ni yo muñwi wa mwa lubasi a fita-fite mwa litaba ze fa chati. Mi hasamulaho, a li muñwi ku mina wa kona ku bulela manzwi a pili a liñolo le li fa chati yeo, ili ku fa ba bañwi kolo ya kuli ba hupule manzwi a tatama a feleleza muhupulo wa liñolo leo. Ku eza cwalo ku ka tahisa kuli mañi ni mañi mwa lubasi lwa mina a ikole puisano ya mo mu kona ku sebeliseza hande litaba ze mwa kalulo ya mafelelezo ya liñolo ni liñolo le li fa chati yeo. Ku nyakisisa litaba ze swana sina zeo, kwa kona ku tusa ba banca ni ba bahulu ku ba ni muzamao o munde wa Sikreste mwa lubasi kamba ko ba inzi kaufela.

Ha mu nze mu ziba butokwa bwa ku bapanyanga lika, mu ka li fumananga ka bunolo mwa Bibele, mi mu ka fita fa ku lemuha kuli litaba ze cwalo za kona ku mi tusa hahulu ha mu li mwa bukombwa bwa Sikreste. Ka mutala, mwa kona ku bulelela muñaa ndu kuli: “Batu ba bañata ba bulelanga kuli mutu kaufela u na ni moyo o sa shwi, kono ha mu bone ze li bulela Linzwi la Mulimu kwa liñolo le.” Kamba ha mu zamaisa tuto ya Bibele, mwa kona ku buza muituti wa mina kuli: “Batu ba bañata mwa silalanda se, ba lumela kuli Mulimu ni Jesu ki mutu a li muñwi; kono, lu itutile kuli Bibele i bulelañi? Mi mina mu lumelañi mwa taba ye?”

Kaniti, mwa Bibele lu fumana litaba ze ñata ze lu tusa ku zamaya ka nzila ya tabela Mulimu ili ze ñozwi ka ku bapanyiwa. Mi lwa kona ku itusisa litaba zeo kuli lu tuse ba bañwi ku ziba litaba za niti za mwa Bibele.

 [Chati fa likepe 4, 5]

Litaba ze Ñwi Kwa Maefese Kauhanyo 4 ni 5 ze Ñozwi ka ku Bapanywa

 Mu like ku itusisa chati ye ka Nako ya ku Lapela Sina Lubasi!

“Ha lu sa swanela ku . . . kashezwa kwa ni kwani . . . ka bupumi bwa batu, ka mano a mangulungwa.”—4:14.

“Kono ha lu nze lu bulela niti, haike lu hule ka lilato mwa linto kamukana ku yena ya li toho, Kreste.”—4:15.

“Minahano ya [macaba] i mwa lififi, . . . kabakala ku mbumbutela kwa lipilu za bona.”—4:18, 19.

“Kono ne mu si ka ituta kuli Kreste u cwalo, ku cwalo, haiba luli ne mu mu utwile mi ne mu lutilwe ka yena.”—4:20, 21.

“Ya uzwa a si ke a uzwa hape.”—4:28.

“Kono a sebeze ka taata, a eze musebezi o munde.”—4:28.

“Ku si ke kwa zwa linzwi le li bolile mwa mulomo wa mina.”—4:29.

“Kono ku zwe feela manzwi a mande a yahisa.”—4:29.

“Mu zwise ku mina mufuta kaufela wa ze baba, buhali, mabifi, ku tatauka, ni lipulelo ze maswe, ni nto ifi kamba ifi ye holofaza.”—4:31.

“Kono mu ezane ka sishemo, mu be ni mukekecima yo muñwi ku yo muñwi, mu nze mu swalelana ka pilu kaufela.”—4:32.

“Buhule ni mufuta kaufela wa masila kamba mukwañuli, nihaiba feela ku bulelwa li si ke za bulelwa mwahalaa mina.”—5:3.

“Kono ku fitiswe buitumelo.”—5:4.

“Ne mu li lififi sapili.”—5:8.

“Kono cwale se mu li liseli ka swalisano ya mina ni Mulena.”—5:8.

“Mu tuhele ku swalisana ni bona mwa misebezi ye si na tuso ya lififi.”—5:11.

“Kono mu i yanehe fa ngandaleza ka mo i inezi luli.”—5:11.

“Hakulicwalo mu tokomele hahulu mo mu zamaela kuli ha mu zamayi sina likuba.”—5:15.

“Kono sina ba ba butali, mu nze mu itusisa hande nako ya mina.”—5:15, 16.

“Kabakaleo mu tuhele kutokwa kutwisiso.”—5:17.

“Kono mu zwelepili ku lemuha tato ya Jehova kuli ki ifi.”—5:17.

“Mu si ke mwa kolwa waine, ye tahiseza mutu ku eza lika mutakafululele.”—5:18.

“Kono mu zwelepili ku tala moya.”—5:18.

“Kuli [Kreste] a tahise puteho fapilaa hae ka kanya ya yona, i si na koli kamba fo ku kokonyani kamba nto ye swana ni lika zeo.”—5:27.

“Kono kuli i be ye kenile ni ye sa nyazahali.”—5:27.

“Ha ku na mutu ya kile a toya mubili wa hae.”—5:29.

“Kono wa u fepa ni ku u katelwa, sina Kreste mwa ezeza puteho.”—5:29.

[Siswaniso se si fa likepe 6]

Kana mwa hupula kalulo ya mafelelezo ya liñolo leo fa chati?