Kwambula Kunateli Kuyikwasha

Komana himunateli kwiteja nenu Yesu diyi Ntañishi muneni wadiña hanu hamasekiku? Hadaha mwesekaña kwimbujola njila jimu jazatishileñayi hakutañisha, chidi neyi kuzatisha malwihu niyakutalilahu. Komana mweluka nenu, wavulileña kuzatisha kwambula muntañishilu yindi?

Antu amavulu azatishaña kwambula neyi anakuhosha. Kakavulu, ninenu munateli kwila mwenimu chakadi nikutoñojokahu. Munateli kuhosha nenu, “Ahosheli nawu nyikabu yejima yinahi; ilaña, iyi yichidi yayisu.” Hela nenu, “Iwu mwana wumumbanda wadiña wansonyi, ilaña ichi nsonyi yamana chikupu.”

Munsañu jamuchidiwu, mwasambilaña kushimuna chikuma kuhiñahu himukushimuna mazu akwambula nachu adi neyi ilaña, hela chochu, chatela, hela munjila yikwawu. Hadaha munateli kwambula kuhitila mukubombelaku nsañu. Neyi muhosha munjila yamuchidiwu, chatiyakanaña chiwahi nawa chinateli kukwasha antu amakwawu atiyi chikuma chimunakuhosha.

Hela chakwila mumadimi amakwawu hela muyisemwa hiyavula kuzatisha kwambulaku, chikuwaha neyi twiluka kulema kwakuzatisha kwambula. Muloñadi? Muloña twawanaña kwambula kwakuvulu Mwizu daNzambi donenawu. Kakavulu, Yesu wazatishileña kwambula. Munakwanuka awa mazu: “Hela inoñu hiyadibutulaña adisweka mwibañuku, chiña kudisha hamesa.” ‘Hinenzi nakukisañana nshimbuku, ilaña nenzi nakujikolesha.’ “Munatiyi cheliluwu nawu, Kwila wuvumbi chinjila. Ilaña ami nukuyileja nami muntu wukutala mumbanda . . . ” “Cheliluwu nawu, Disu nadisu, iji neji. Ilaña ami nukuyileja nami bayi muleta ñovu nawatamaku, muntu wukukweta kwikidi dachidiilu, mushetumwini nidikwawu.”—Mat. 5:15, 17, 27, 28, 38, 39.

Munyikanda yikwawu yamuBayibolu mwekala mazu amuchidiwu akwambula. Anateli kuyikwasha mutiyishi chikuma hela kukonkomwena hanjila yakwililamu chuma yinabadiki hayatenawu mukwambula kwatachi. Neyi mudi anvwali, toñojokenu haniku kwambula: ‘Ninenu atata yawantu, bayi muvulokaña anyanenu azuwuku; ilaña yilelenuña nakuyibabesha nikuyikonkomwena mudi Yehova.’ (Efwes. 6:4) Neyi chakwila kapostolu Pawulu wasonekeli hohu nindi tata yawantu (hela mama yawantu) watela kulela mwana mukubabesha kwaNzambi, ichi chadi kwikala chachiwahi nawa chalala. Hela chochu, chikuma chinatiyakani chikupu kuhitila mukuzatisha kwambula ‘bayi muyivulokañaku ilaña yilelenuña nakuyikonkomwena mudi Yehova.’

Kuhiñahu munaka kapetulu, Pawulu wasonekeli nindi: “Hitwalwishaña nawantu akweti nyijimba namashuku, ilaña twalwishaña . . . nawaspiritu atama amumawulu.” (Efwes. 6:12) Iku kwambula kwatela kuyikwasha mwiluki nenu mwatela kulwisha chikupu. Bayi neyi hikulwisha nawantu hohuku; ilaña, nawaspiritu atama.

 HETELENUMU MUKWAMBULA

Muniwu mukanda yowumu wamuBayibolu, mukuwana nsona jikwawu jajivulu mwazatishiliyi Pawulu mazu akwambula. Kutoñojoka hanawa mazu akwambula kunateli kutukwasha kwiluka chikuma chahosheleñayi Pawulu hadaha nikwiluka chikupu chuma chitwatela kwila.

Chinateli kuyizañalesha nawa mukuhetelamu neyi mushinshika hachati yinakulumbulula mazu akwambula imwawanaña mumukanda waAefwesesa kapetulu 4 ni 5. Chimukutañaña awa mazu akwambula, toñojokenu hachihandilu chenu. Dihulenu nenu: ‘Kuhosha hohu chalala, indi yililu yami yekala ñahi? Nelaña ñahi neyi nimona yuma yamuchidiwu? Antu amakwawu anateli kutoñojoka nawu kwambula kudihi kunakumwekesha chinekala?’ Neyi kwambula kuyikwasha mwiluki nenu kudi chuma chimwatela kuzatilahu, fwilenu kuzatisha yuma yimwadizili. Kwambula kunateli kuyikwasha.

Munateli cheñi kuzatisha iyi chati hakudifukula kwenu kwachisaka. Chatachi, antu ejima amuchisaka anateli kutañila chadimu iyi nsañu yakwambula. Kuhiñahu wumu hakachi kenu nateli kutena chibalu chatachi chakwambula, kulonda amakwawu muchisaka atweshi kwanuka chikuma chinalumbululuwu muchibalu chikwawu. Ichi chikuleñela mudiluñishi kuhanjeka nachisaka chimunateli kuzatisha chikupu chibalu chamuchiyedi chakwambula. Eñañi, kushinshika hakwambula muniyi njila kunateli kukwasha atwansi niakulumpi kulondela yililu yawakwaKristu muchisaka nikudi kwejima.

Chimukwiluka chikupu kulema kwakwambula, mukukuluka yitembi hakwiluka kwambula kwekala muBayibolu, nawa mukwiluka nenu kwakwashanaña chikupu mumudimu wawakwaKristu wakushimwina. Chakutalilahu, munateli kumuleja mwiniitala nenu: “Antu amavulu ahoshaña nawu muntu wejima wukweti wumi wabulaña kufwa, ilaña talenu chahosha Izu daNzambi.” Hela hampinji yimunakudizisha muntu Bayibolu, munateli kumwihula nenu: “Antu amavulu munu mwiluña akuhwelela nawu Nzambi niYesu ekala muntu wumu; hela chochu, indi Bayibolu yahoshaña nawudi? Nawa enu mwakuhwelela nenudi?”

Eñañi, Nsona yatulejaña yuma yayivulu yakwambula, yinateli kutukwasha kwenda munjila yaNzambi. Tunateli kuzatisha kwambula hakukwasha amakwawu kwiluka nsañu yalala yamuBayibolu.

 [Chati yidi hefu 4, 5]

Kwambula Kukwawu Kwekala muMukanda waAefwesesa Tupetulu 4 ni 5

 Esekenu kuzatisha iyi chati yayiwahi hakudifukula kwenu kwachisaka!

‘Tubuli kwikala cheñi . . . akwakulelujoka . . . namaleñu nimakasu awantu akudimba nachu antu.’—4:14.

“Ilaña tuhoshenu mwalala nakukeña; tukulenu mudi yena muyuma yejima, diyi mutu, diyi Kristu.”—4:15.

‘Maana anyunza eyila dehi kwawu, . . . nansañu yakuyamba kwanyichima yawu yachinchika.’—4:18, 19.

“Ilaña enu kwenu hidimu mumwadizilili Kristuku; neyi munamutiyi chalala, neyi anayileji mudi yena.”—4:20, 21.

“Vuulenu muntu wenu wamukulu wachisemwa chachikulu.”—4:22.

“Ilaña . . . mwikali antu amaha muyitoñojoka yaspiritu yenu. Mudivwiki muntu wamwiha.”—4:23, 24.

“Muntu wadiñi ikombi, kwiya nawa cheñi chinjila.”—4:28.

“Ilaña akalakali mudimu wawuwahi namakasindi.”—4:28.

“Kuhosha mazu atama chinjila.”—4:29.

“Chiña mazu amawahi anatweshi kukolesha antu.”—4:29.

“Lekenu ndulu yejima, nindombu, nikuzuwa, nimapumba, nikutukana, ninkunyi yejima.”—4:31.

‘Ilaña dikokwejenu muntu namukwawu; ikalenu namuchima wawushona; danakenenu muntu namukwawu.’—4:32.

“Hakwila wuvumbi, nawuzondu wamumuchima wejima, hela lwisu, bayi muyitenaña mukachi kenuku.”—5:3.

“Chiña kusakilila hohu.”—5:4.

“Mwadiñilaña mwidima.”—5:8.

“Ilaña kwinza katataka muneli dehi chejeji mudi Mwanta.”—5:8.

“Bayi mukundañana nayuma yelañawu mumwidimaku.”—5:11.

‘Ilaña chiña kuyikonkolola.’—5:11.

“Dichi babalenu mumukwendela. Bayi mwendaña neyi antu abula maanaku.”—5:15.

‘Ilaña endenu neyi akwamaana, kwatilenu mafuku akuhita maana.’—5:15, 16.

“Dichi bayi mubula maanaku.”—5:17.

‘Ilaña shinshikenu mwaya muchima waYehova.’—5:17.

“Bayi musheta walwaku, chaletaña ipumba.”—5:18.

‘Ilaña inzalenu spiritu.’—5:18.

“Kulonda [Kristu] adinki yomweni chipompelu chalubanji, chakadi ihuji, hela nyiku, hela yuma yidi ochu.”—5:27.

‘Ilaña chiikali chajila, chakadi hakuchinkela muloña.’—5:27.

“Hikwekala muntu wakwatahu dehi nkunyi namujimba windi yomwenuku.”—5:29.

‘Ilaña wawudiishaña nikuwuhemba, chochelañayi Kristu nachipompelu nawa.’—5:29.

[Mwevulu wudi hefu 6]

Komana munateli kwanuka chibalu chamuchiyedi chinakuhosha hakwambula?