Bo no ta di akuerdo ku Hesus tabata e mihó Maestro ku a yega di biba riba tera? Kisas bo a yega di purba di imitá e manera ku el a siña hende, por ehèmpel hasiendo uso di pregunta i di ilustrashon. Pero bo tabata sa ku hopi bes Hesus a hasi uso di kontraste?

Hopi hende ta hasi uso di kontraste ora nan ta papia. Por ta abo tambe sa hasi uso di kontraste, asta sin ku bo mes sa. Tal bes bo ta bisa algu manera: “Nan a bisa mi ku tur e frutanan ta hechu, pero esakinan ta duru ainda.” Òf: “Ántes e tabata un mucha masha ketu, pero awor e ta masha mòndu.”

Den kasonan asina, bo ta presentá un echo òf idea promé, i despues bo ta introdusí e kontraste ku un ekspreshon manera pero, ma, sinembargo, mas bien òf di otro banda. Kaba, bo ta agregá informashon pa mustra e kontraste. Ta masha normal pa usa kontraste ora bo ta papia i esaki por yuda hende komprondé loke bo ke men.

Maske uso di kontraste no ta komun den algun idioma òf kultura, ta bon pa rekonosé su balor. Dikon? Pasobra nos ta haña hopi kontraste den e Palabra di Dios. Hesus a hasi bon uso di kontraste. Pensa riba esakinan: “Un hende no ta sende un lampi i tap’é ku un makutu; mas bien, e ta pon’é riba un kándelar.” “Mi no a bini pa kaba ku [Lei], sino pa kumpli [kuné].” “Boso a tende den pasado: ‘No kometé adulterio.’ Pero ami ta bisa boso ku ken ku sigui wak un muhé . . . ” “Boso a tende den pasado: ‘Wowo pa wowo i djente pa djente.’ Ma ami ta bisa boso: No resistí e hende malbado; mas bien, si un hende dal bo un wanta na banda drechi di bo kara, bira e otro banda di kara tambe p’e.”—Mat. 5:15, 17, 27, 28, 38, 39.

Den otro bukinan di Beibel tambe nos ta haña kontraste. Un kontraste por yuda nos komprondé un punto òf e por resaltá e mihó manera pa hasi algu. Si bo ta un mayor, pensa riba e siguiente kontraste: “Tatanan, no iritá boso yunan, ma sigui lanta nan den e disiplina di Yehova i inkulká su manera di pensa den nan.” (Efe. 6:4) Si apòstel Pablo a djis skirbi ku un tata (òf mama) mester lanta su yu den e disiplina di Dios, lo el a duna un konseho sabí i verídiko. No opstante, e idea ta bira mas kla i komprendibel ku e kontraste: ‘No iritá nan, ma inkulká Yehova su manera di pensa den nan.’

Mas despues den e mesun kapítulo ei, Pablo a skirbi: “Nos lucha no ta kontra karni i sanger, sino kontra . . . forsanan spiritual di maldat den lugánan selestial.” (Efe. 6:12) E kontraste ei ta yuda nos komprondé kon difísil nos lucha ta: Nos no tin djis un lucha kontra hende; mas bien, e ta un lucha kontra spiritunan malbado.

Den e mesun buki di Beibel akí, esta Efesionan, lo bo haña hopi otro teksto kaminda Pablo a usa kontraste. Ora nos pensa riba nan, nan por yuda nos komprondé mihó kiko Pablo tabata ke men i kiko nos mester hasi.

Lo bo disfrutá i siña hopi di e tabèl ku tin den e artíkulo akí; e ta menshoná diferente kontraste ku nos ta haña den kapítulo 4 i 5 di Efesionan. Kada bes, ku bo lesa un di e kontrastenan, pensa riba bo mes bida. Puntra bo mes: ‘Kon mi aktitut ta di bèrdè? Kon ami lo a reakshoná den e situashon akí òf den unu similar? Ku kua banda di e kontraste otro hende ta identifiká mi?’ Si un kontraste yuda bo mira ku tin un área ku bo tin ku traha riba dje, hasi esfuerso mesora pa apliká loke bo a siña. Asina bo ta hasi bon uso di e kontrastenan.

Ademas, bo por usa e tabèl pa boso Adorashon Komo Famia. Pa kuminsá, boso por lesa e lista di kontraste huntu. Despues, un di boso por menshoná e promé parti di un kontraste, i e otronan ta purba di kòrda e di dos parti. Anto na un manera plasentero boso por analisá kon boso famia por mehorá den e manera ku boso ta apliká e di dos parti. Sí, ora nos analisá kontrastenan manera esakinan, esaki lo por yuda tantu hóben komo hende di mas edat komportá nan manera un bon kristian, na kas i tur otro kaminda.

Ora bo bira mas konsiente di e balor di kontraste, ta mas fásil pa bo rekonosé nan den Beibel, i lo bo ripará ku nan ta masha útil den sirbishi. Por ehèmpel, bo por bisa e doño di kas lo siguiente: “Hopi hende ta bisa ku tur hende tin un alma inmortal, ma tuma nota di loke e Palabra di Dios ta bisa akinan.” Òf durante un estudio di Beibel, bo por puntra: “Mayoria di hende aki banda ta kere ku Dios i Hesus ta e mesun persona, sinembargo, kiko Beibel ta bisa? Awor, kiko abo ta kere?”

Sí, den Beibel nos ta haña hopi kontraste instruktivo ku por yuda nos sigui kana den e kaminda di Dios i yuda otro hende konosé e bèrdat di Beibel.