Sigurado nga mauyon ka nga hi Jesus an pinakabantogan nga Magturutdo nga nabuhi ha tuna. Bangin nangangalimbasog ka pagsubad han pipira han iya mga paagi han pagtutdo, sugad han iya paggamit hin mga pakiana ngan ilustrasyon. Kondi naobserbaran mo ba nga ha iya pagtutdo agsob niya gamiton an pagpakita han kaibahan han duha nga butang?

Damu nga tawo an nagamit han pagpakita han kaibahan kon nakikiistorya hira. Bangin agsob mo liwat ito buhaton nga diri ngani ginhuhunahuna. Bangin sumiring ka hin sugad hini, “Siring nira nga hinog na ini ngatanan nga prutas, pero matig-a pa man ini hinduro.” O, “Hadto ini nga bata awdanon hinduro, pero yana makisangkayon na gud hiya.”

Ha sugad hini nga mga kahimtang, nag-uunabi ka anay hin tinuod nga impormasyon o hin ideya, katapos iginpapakita mo an kaibahan pinaagi ha paggamit han mga pulong sugad han kondi, pero, lugod, o ha luyo nga bahin. O bangin iginpapakita mo an kaibahan pinaagi ha pagdugang hin impormasyon o pagpabug-at han ideya. Kon ito an imo paagi han pagyakan, natural ito pamation ngan makakabulig ha iba nga masabtan an imo karuyag sidngon.

Bisan kon ha iba nga yinaknan o kultura diri kasagaran nga ginagamit an pagpakita han kaibahan, maopay nga hibaroan naton an kapulsanan hito. Kay ano? Kay damu hito an aton mababasa ha Pulong han Dios. Hi Jesus agsob magpakita han kaibahan han duha nga butang. Pananglitan, hiya nagsiring: “Kon an mga tawo nagdadagkot hin lampara, diri ito gintatakloban hin taraksan nga basket, kondi iginbubutang ha burutangan han lampara.” “Kinanhi ako, diri ha pagbungkag [han Balaud], kondi ha pagtuman.” “Hinbatian niyo an ginsiring: ‘Diri ka mag-adulteryo.’ Pero nasiring ako ha iyo nga an bisan hin-o nga padayon nga nagkikinita ha usa nga babaye . . . ” “Hinbatian niyo an ginsiring: ‘Mata ha mata ngan ngipon ha ngipon.’ Pero ginsisidngan ko kamo: Ayaw pakig-away ha maraot nga tawo, ngan kon may magtampalo han imo too nga bayhon, iatubang liwat ha iya an imo wala.”—Mat. 5:15, 17, 27, 28, 38, 39.

Mababasa liwat ha iba nga libro han Biblia an puropariho hito nga pagpakita han kaibahan. Makakabulig ito ha imo nga masabtan an usa nga punto o pabug-atan an mas maopay nga paagi han pagbuhat han usa nga butang. Kon usa ka nga kag-anak, hunahunaa ini nga pagpakita han kaibahan: “Mga amay, ayaw niyo pag-aringita an iyo mga anak, lugod atamana hira uyon ha disiplina ngan sagdon ni Jehova.” (Efe. 6:4) Kon hi Pablo nagsiring la nga sadang atamanon han usa nga tatay (o nanay) an iya anak uyon ha disiplina han Dios, maaramon man ito ngan tinuod. Pero mas nagin matin-aw an punto tungod han pagpakita han kaibahan, nga ‘diri hira pag-aringiton, lugod atamanon hira uyon ha sagdon ni Jehova.’

Ha urhi nga bahin hito nga kapitulo, hi Pablo nagsurat: “Nakikig-away kita, diri kontra ha dugo ngan unod, kondi kontra ha . . . magraot nga espiritu ha langitnon nga mga lugar.” (Efe. 6:12) Ito nga pagpakita han kaibahan posible nga nabulig ha imo nga masabtan nga makuri gud an imo  pakig-away. Nakikig-away ka, diri ha mga tawo la kondi ha magraot nga espiritu.

Ha libro han Efeso, damu pa nga teksto an imo mababasa diin naggamit hi Pablo hin pagpakita han kaibahan. An paghunahuna hini makakabulig ha aton nga hibaroan an karuyag sidngon ni Pablo ngan mas masabtan kon ano an sadang naton buhaton.

Bangin magin makaruruyag ngan mapulsanon ha imo an pag-usisa han iginlakip nga tsart nga nag-uunabi han pipira nga pagpakita han kaibahan nga imo mababasa ha Efeso kapitulo 4 ngan 5. Samtang ginbabasa mo an tagsa hito, hunahunaa an imo kinabuhi. Pakianhi an imo kalugaringon: ‘Ha tinuod la, ano an akon disposisyon? Ano an akon reaksyon hini o ha puropariho hini nga kahimtang? Ha panhunahuna han iba, hain hinin duha nga magkaiba nga ideya an nagtutudlok ha akon?’ Kon imo masantop nga iginpapakita han usa hito nga may kinahanglan ka pauswagon, pangalimbasugi nga buhaton ito. Hito nga paagi, ito nga pagpakita han kaibahan makakabulig ha imo.

Puydi mo liwat gamiton an tsart ha iyo pagsingba han pamilya. Siyahan, mahimo basahon han bug-os nga pamilya an mga pagpakita han kaibahan nga gin-unabi ha tsart. Katapos, an usa ha iyo puydi mag-unabi han siyahan nga bahin, ngan an iba nga membro han pamilya mangangalimbasog nga hinumdoman an punto nga ginpapabug-atan ha ikaduha nga bahin. Mahimo ito magresulta hin makalilipay nga paghisgot kon paonan-o niyo mas maiaaplikar an ikaduha nga bahin. Oo, an pag-usisa han mga pagpakita han kaibahan ha sugad hito nga paagi makakabulig ha mga batan-on ngan edaran nga padayon nga ipakita an Kristiano nga paggawi ha pamilya ngan ha bisan diin.

Samtang mas nahibabaroan mo an kapulsanan han mga pagpakita han kaibahan, mas masayon mo ito makita ha Biblia, ngan maoobserbaran mo nga makakabulig gud ito ha imo ministeryo. Pananglitan, mahimo ka sumiring ha usa nga tagbalay: “Damu an nasiring nga an tagsa nga tawo may imortal nga kalag, kondi tagda an ginsisiring dinhi han Pulong han Dios.” O mahimo ka magpakiana ha imo gindudumarahan hin pag-aram ha Biblia: “Kadam-an nga tawo hini nga lugar an natoo nga an Dios ngan hi Jesus usa la nga persona. Kondi sumala ha aton gin-adman, ano an ginsisiring han Biblia? Ngan ano an imo gintotoohan?”

Oo, ha Kasuratan damu an aton mababasa nga mapulsanon nga mga pagpakita han kaibahan, nga makakabulig ha aton nga maglakat ha dalan han Dios. Ngan magagamit naton an mga pagpakita han kaibahan ha pagbulig ha iba nga mahibaro han kamatuoran ha Biblia.