1. ?Wanem sam poen we yumi stap stadi oltaem long olgeta? ?Wanem gudfala samting we yumi kasem taem yumi stadi long ol poen ya?

TAEM yumi stap rerem Wajtaoa stadi blong yumi, samtaem yumi stap askem se: ‘?I luk olsem se yumi stadi long poen ya finis?’ Sipos yu yu stap joen long ol miting longtaem finis, maet yu luk se i gat sam poen we yumi stadi long olgeta plante taem finis. Plante taem yumi stadi long Kingdom blong God, sakrefaes blong Jisas, wok blong mekem disaepol, mo long ol fasin olsem lav mo bilif. Taem yumi stadi oltaem long ol poen ya, bilif blong yumi i kam strong mo yumi “mekem ol samting we tok ya i talem.”—Jem. 1:22.

2. (1) ?Long Baebol, plante taem “ol tok” i minim wanem? (2) ?Ol tok blong God oli defren olsem wanem long ol tok blong man?

² Long Baebol, plante taem “ol tok” i minim ol loa, ol oda, mo ol rul we God i givim long ol man blong hem. Plante taem, ol man oli mas jenisim sam samting long ol loa we oli putumap finis, no oli mas jenisim fulwan. Be ol loa mo ol rul blong Jehova oli no olsem. Yumi save trastem olgeta oltaem. I tru se God i givim sam loa bifo, we ol man blong hem tede oli no nid blong folem. Be hemia i no from se wan samting i rong long ol loa ya. Man blong raetem Sam i talem se: “Oltaem ol rul we yu yu mekem oli stret nomo.”—Sam 119:144.

3, 4. (1) ?Samtaem i gat wanem long ol tok blong Jehova? (2) ?Sipos ol man Isrel oli obei long Jehova, bambae oli kasem wanem?

³ Samtaem i gat sam woning long ol tok blong Jehova. Ol profet blong God oli talemaot ol woning plante taem long neson blong Isrel. Yu traem tingbaot taem ya we klosap ol man Isrel oli go long Promes Lan. Moses i wonem olgeta se: “Yufala i no mas letem ol narafala man oli pulum yufala i gowe long Hae God, blong go mekem wosip long ol narafala god, mo blong  mekem ol wok blong olgeta. Sipos yufala i mekem olsem, Hae God bambae i kros tumas long yufala.” (Dut. 11:16, 17) Baebol i soemaot se God i givim plante tok long ol man blong hem blong givhan long olgeta.

⁴ Plante taem, Jehova i talem ol tok long ol man Isrel blong oli ona long hem, oli obei long hem, mo oli leftemap nem blong hem. (Dut. 4:29-31; 5:28, 29) Sipos oli obei long ol tok ya, bambae oli kasem plante blesing.—Lev. 26:3-6; Dut. 28:1-4.

5. ?From wanem God i givhan long King Hesekia?

⁵ Oltaem God i mekem samting we hem i promes blong mekem. Taem King Senakerib i go mekem faet long Juda mo i talem se bambae hem i winim King Hesekia, Jehova i sanem wan enjel blong i go givhan long ol man blong hem. Enjel ya i kilim i ded 185,000 soldia blong ol man Asiria long wan naet nomo. Samting ya i mekem se Senakerib i sem we i sem mo i gobak long ples blong hem. (2 Kron. 32:21; 2 King 19:35) ?From wanem God i givhan long King Hesekia? From we Hesekia i holemstrong long hem mo “oltaem nomo i stap obei long hem, mo i stap holemgud ol loa we hem i bin givim.”—2 King 18:1, 5, 6.

6. ?Josaea i mekem wanem blong soemaot se hem i trastem Jehova?

⁶ Wan narafala man we i obei long ol tok blong Jehova, hemia King Josaea. Stat taem hem i smol nomo, hem i “stap mekem ol samting we Hae God i glad long hem.” (2 Kron. 34:1, 2) Josaea i soemaot se hem i trastem Jehova taem hem i spolem olgeta aedol, mo i givhan long ol man blong oli wosipim Jehova bakegen. Ale Jehova i blesem hem mo i blesem ful neson blong Isrel tu.—Ridim 2 Kronikel 34:31-33.

7. ?Taem ol man Isrel oli no trastem ol tok blong Jehova, wanem i kamaot?

⁷ Sore tumas, be i no oltaem we ol man Isrel oli trastem ol tok blong Jehova. Taem ol yia oli pas, plante taem oli no moa obei long Jehova. Taem bilif blong olgeta i kam slak, i isi nomo blong ol narafala oli pulum olgeta blong oli wosipim ol giaman god. (Efes. 4:13, 14) Ale, oli kasem trabol olsem we Jehova i talem.—Lev. 26:23-25; Jer. 5:23-25.

8. ?Olsem wanem yumi tede yumi sem mak long ol man Isrel bifo?

⁸ ?Olsem wanem yumi tede yumi sem mak long ol man Isrel bifo? Yumi tu yumi stap kasem ol advaes mo ol tok blong stretem yumi. (2 Pita 1:12) Evritaem we yumi  ridim Baebol, i olsem we God i stap toktok long yumi bakegen mo bakegen. Mo Jehova i letem yumi jusum se bambae yumi obei long loa blong hem, no yumi gohed blong folem rod we yumi ting se i moagud. (Prov. 14:12) Bambae yumi tokbaot from wanem yumi mas obei long ol tok blong Jehova, mo olsem wanem fasin ya i save givhan long yumi.

9. Taem ol man Isrel oli stap long draeples, ?olsem wanem Jehova i mekem oli tingbaot se hem i givhan long olgeta?

⁹ Taem ol man Isrel oli rere blong wokbaot long draeples blong 40 yia, Jehova i no eksplenem long olgeta se bambae hem i lidim olgeta olsem wanem, mo bambae i lukaot long olgeta olsem wanem. Be hem i mekem plante samting blong soemaot long olgeta se sipos oli trastem hem mo oli obei long ol tok blong hem, bambae oli kasem blesing. Long dei, hem i lidim olgeta wetem wan klaod mo long naet wetem faea. Long rod ya, hem i mekem ol man Isrel oli tingbaot se hem i stap givhan long olgeta. (Dut. 1:19; Eks. 40:36-38) Mo hem i givim evri samting we oli nidim. “Oli no sot long wan samting nating. Klos blong olgeta i no brobrok, mo leg blong olgeta i no soa, i no solap.”—Neh. 9:19-21.

10. ?Tede, olsem wanem Jehova i stap lidim ol man blong hem?

¹⁰ Klosap nao ol man blong God bambae oli stap long niufala wol. ?Olsem wanem? ?Yumi trastem Jehova blong i givim ol samting we yumi nidim, blong yumi save laef long “bigfala trabol” ya we i stap kam? (Mat. 24:21, 22; Sam 119:40, 41) I tru se Jehova i no yusum klaod mo faea blong lidim yumi i go long niufala wol. Be hem i yusum ogenaesesen blong hem blong givim ol tok blong hem long yumi. Yu traem tingbaot, yumi harem oltaem se yumi mas ridim Baebol blong bilif blong yumi i strong, yumi mas holem wan naet blong Famle Wosip, mo yumi mas joen oltaem long ol miting mo long wok blong prij. ?Yumi jenisim sam samting long laef blong yumi, blong yumi folem ol tok ya? Sipos yumi mekem olsem, yumi stap mekem bilif blong yumi i strong, blong yumi save stap laef go kasem niufala wol.

11. ?Wanem sam advaes we oli soemaot se God i wantem we yumi stap sefgud mo yumi glad?

¹¹ Ogenaesesen blong Jehova i givhan long yumi blong mekem ol gudfala desisen. Yumi lanem se sipos yumi no wantem wari tumas, yumi mas gat stret tingting long ol sas samting, mo yumi mekem laef blong yumi i no fasfas. Yumi kasem ol advaes tu long saed blong edukesen, klos mo hea blong yumi, mo ol samting we i gud blong mekem no wajem, taem yumi spel. Mo yumi tingbaot ol advaes we oli givhan long yumi blong mekem se haos, trak, mo Haos Kingdom blong yumi oli sef. Mo ol advaes long samting we yumi mas mekem rere long taem blong disasta. Ol advaes olsem oli soemaot se God i wantem we yumi stap sefgud mo yumi glad.

12. (1) ?Wanem samting we Jisas i talem bakegen mo bakegen long ol disaepol blong hem? (2) ?Pita i neva fogetem wanem? ?Yumi lanem wanem long eksampol blong Jisas?

¹² Ol Kristin bifo oli kasem ol tok blong God oltaem. Jisas i talem bakegen mo bakegen long ol disaepol blong hem se oli mas putum tingting blong olgeta i stap daon. Be hem i no talem nomo, hem i soemaot tu long olgeta olsem wanem blong putum tingting i stap daon. Long laswan naet blong hem long wol, hem i stap wetem ol aposol blong hem blong mekem lafet blong Pasova. Taem ol aposol oli stap kakae, Jisas i girap mo i wasem leg blong olgeta. Hemia wan wok we wan slef nao i mas mekem. (Jon 13:1-17) Ol man blong Jisas oli neva fogetem samting ya.  Samwe 30 yia afta, aposol Pita we i bin stap long kakae ya, i givim advaes long ol narafala Kristin long saed blong tingting daon. (1 Pita 5:5) Eksampol blong Jisas i mas pulum yumi evriwan, blong yumi gat tingting daon taem yumi joen wetem ol narafala.—Fil. 2:5-8.

13. ?Jisas i tijim ol disaepol blong hem se oli mas gat wanem impoten fasin?

¹³ Wan narafala samting we Jisas i tokbaot oltaem long ol disaepol blong hem, hemia se oli mas gat strong bilif. Taem ol disaepol oli no naf blong ronemaot devel long wan boe, oli askem long Jisas se: “?Mifala i no save ronemaot devel ya from wanem?” Jisas i ansa se: “From we bilif blong yufala i no strong. Tru mi talem long yufala, nating sipos bilif blong yufala i smol nomo, be bambae . . . i no gat wan samting we yufala i no save mekem.” (Mat. 17:14-20) Taem Jisas i stap prij long wol, hem i tijim ol disaepol blong hem se i impoten tumas blong oli gat bilif. (Ridim Matiu 21:18-22.) ?Olsem wanem? ?Yumi stap go long olgeta asembli mo Kristin miting, blong mekem bilif blong yumi i strong? Ol miting ya oli no blong mekem yumi glad nomo, be oli givim janis tu long yumi blong soemaot long Jehova se yumi trastem hem.

14. ?Wanem loa i givhan long yumi blong no tingbaot yumi nomo?

¹⁴ Long Grik haf blong Baebol, i gat plante tok we oli mekem yumi tingbaot se yumi mas lavlavem yumi. Jisas i talem se nambatu loa we i hae moa long ol narafala loa, hemia blong ‘lavem ol man raonabaot long yumi, olsem we yumi stap mekem i gud long yumi.’ (Mat. 22:39) Jemes we i haf brata blong Jisas, i talem se lav hem i “stamba blong ol narafala loa.” (Jem. 2:8) Aposol Jon i talem se: “Ol brata mo sista. Loa ya we mi stap raetem i kam long yufala, hem i no wan niufala loa, i wan olfala loa we yufala i harem finis, taem yufala i kasem gud nius ya fastaem. Be i tru, loa ya we mi stap raetem i kam long yufala, hem i wan niufala loa tu.” (1 Jon 2:7, 8) ?Taem Jon i tokbaot “olfala loa,” hem i minim wanem? Loa ya i stap minim loa blong lavem narafala. Hem i “olfala” from we ‘taem [ol man blong Jisas] oli harem gud nius fastaem,’ Jisas i givim loa ya long olgeta. Be hem i “niufala” tu from we lav i mas pulum ol disaepol blong oli no tingbaot olgeta nomo, taem bambae oli fesem sam samting we oli neva fesem bifo. Tede, yumi glad tumas long ol woning we oli givhan long yumi blong yumi no tingbaot yumi nomo, olsem ol man blong wol, be yumi lavem ol man.

15. ?Wanem bigfala risen we i mekem se Jisas i kam long wol?

¹⁵ Jisas i rili kea long ol man. Hem i  soemaot samting ya taem hem i mekem ol sikman oli kamgud bakegen mo i mekem ol dedman oli laef bakegen. Be hemia i no risen we i mekem se Jisas i kam long wol. Bigfala risen hemia blong prij mo blong tijim ol man blong givhan long olgeta. ?From wanem? From we olgeta man ya we Jisas i mekem oli kamgud bakegen mo oli laef bakegen, sam yia biaen oli kam olfala mo oli ded bakegen. Be ol man we oli obei long ol tok blong hem, oli gat janis blong kasem laef we i no save finis.—Jon 11:25, 26.

16. ?Ol Witnes blong Jehova oli mekem wanem blong obei long tok blong Jisas?

¹⁶ Jisas i talem long ol disaepol blong hem se: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi.” (Mat. 28:19) Ol fas Kristin oli gohed long wok ya we Jisas i statem. Mo tede, yumi prij long plante moa man long plante ples, i bitim bifo. Bitim 7 milian Witnes blong Jehova oli stap wok strong blong tijim ol narafala long Kingdom blong God long bitim 230 kantri, mo oli mekem Baebol stadi blong plante milian man. Wok ya i soemaot se yumi stap long ol las dei.

17. ?Pol mo Pita tufala i givim wanem advaes?

¹⁷ Ol tok blong God oli mekem bilif blong ol fas Kristin i kam strong. Taem Pol i stap kalabus long Rom, hem i talem long Timoti se: “Yu yu mas holem strong ol tok ya we mi mi tijim yu finis long hem.” (2 Tim. 1:13) I sua se ol tok ya oli givhan bigwan long Timoti. Mo tu, aposol Pita i pulum ol Kristin blong oli mas stanap strong, lavem ol narafala, mo bos long tingting blong olgeta. Biaen hem i talem se: “Nating we . . . yufala i stap stanap strong long ol trutok we yufala i kasem finis, be oltaem mi mi mas talemaotgud ol trutok ya bakegen long yufala.”—2 Pita 1:5-8, 12.

18. ?Ol Kristin bifo oli gat wanem tingting long ol tok blong God?

¹⁸ I tru se ol leta we Pol mo Pita tufala i raetem, oli sem mak long “ol tok we ol tabu profet oli talem bifo.” (2 Pita 3:2) Ol Kristin bifo oli no harem nogud long ol tok ya, from we oli save se God i lavem olgeta mo i wantem se oli holemstrong long hem.—2 Pita 3:18.

19, 20. ?From wanem yumi save trastem ol tok blong Jehova? ?Ol tok blong Jehova oli save givhan long yumi?

¹⁹ Tede, plante samting oli soemaot se taem yumi folem Baebol, hemia i blong mekem i gud long yumi. Ol advaes we oli stap long Baebol oli stret oltaem nomo. (Ridim Josua 23:14.) Baebol i tokbaot fasin we God i mekem long ol man bifo. Ol tok ya oli stap long Baebol blong givhan long yumi. (Rom 15:4; 1 Kor. 10:11) Mo tu, yumi luk ol profet tok oli stap kamtru long taem blong yumi. Ol profet tok ya oli olsem ol tok we yumi kasem plante yia bifo we oli kamtru. Wan profet tok i talem se, “i gat taem i stap kam” we plante milian man bambae oli wosipim Jehova. Profet tok ya i kamtru tede. (Aes. 2:2, 3) Wol ya i stap kam moa nogud. Hemia tu i mekem wan profet tok blong Baebol i kamtru. Mo olsem we yumi tokbaot finis, wok blong prij we i stap goraon long fulwol, i stap mekem tok blong Jisas i kamtru.—Mat. 24:14.

²⁰ Stat bifo i kam, God ya we i mekem yumi, i soemaot klia we yumi save trastem hem. ?Olsem wanem? ?Ol tok blong hem oli save givhan long yumi? Wan sista we nem blong hem Rosellen i talem se: “Taem mi trastem moa Jehova, mi luk klia se hem i givhan long mi, mo i givim paoa long mi.” Yumi tu yumi save kasem gudfala samting, taem yumi obei long ol tok blong Jehova.