Yanukishu Yayehova Yalala

‘Yanukishu Yehova yakashinshi, yalejaña wakadi maana.’—MAS. 19:7.

MUKWAKULA NENUDI?

Yanukishu yamuchidinyi yahanañayi Yehova muNsona?

Indi yanukishu yaYehova yinateli kukwasha ñahi akwaKristu makonu?

Muloñadi chitwatela kukuhwelela yanukishu yaYehova?

1. Nsañwinyi yadizañawu kakavulu antu jaNzambi, nawa twahetelañamu ñahi hakuhituluka muniyi nsañu?

 HAMPINJI yimunakuloñesha Kaposhi Kakutalila Kakudizamu kumbidi, komana mwahoshahu dehi nenu, ‘Iyi nsañu chidi neyi twayidizahu dehi.’ Neyi munashimbuli muchipompelu chawakwaKristu, hadaha munamoni nenu nyitu yikwawu twayidizañahu mapampa kakavulu. Kudiza haWanta waNzambi, hefutu damuloña, hamudimu wakwilisha atumbanji, niyililu yidi neyi kukeña nichikuhwelelu hiyakudya yakuspiritu yitwadyaña mpinji yejima. Kuhitila mukuhituluka muniyi nsañu, chatukwashaña kutwalekahu kwikala nachikuhwelelu chakola nikwikala “akwakwila mwaya mazu, bayi akwakukumina dakutiya hohu[ku].”—Yak. 1:22.

2. (a) Kakavulu yanukishu yaNzambi yatalishaña kuyumanyi? (b) Indi yanukishu yaNzambi yambuka ñahi nanshimbi jawantu?

² Izu dachiHeberu dakwila nawu ‘chanukishu’ kakavulu datalishaña kunshimbi niyidika yenkañayi Nzambi antu jindi. Kwambukaku nanshimbi jawantu, jahimpaña kakavulu, nshimbi jaYehova niyidika yindi mpinji yejima jekala jalala. Hela chakwila nshimbi jimu ajihanini kumpinji yakunyima ilaña makonu antu jindi hiyatela kujilondelaku. Ichi hichatalisha mukwila nawu iji nshimbi jadiña jaheñaku. Ñimbi yamasamu wahosheli nindi: ‘Yanukishu yeyi yaloña haya nyaka.’—Mas. 119:144.

3, 4. (a) Yanukishu yaYehova yinateli kubombelamu yumanyi? (b) Indi aIsarela adi kuhetelamu ñahi neyi ovwahilili yanukishu?

³ Hadana mwamona nenu yanukishu yaYehova mpinji yikwawu yabombelañamu ninsañu yakusoñamisha. Munza waIsarela mpinji yejima watambwilileña kusoñamisha kuhitila mudi atuprofwetu twaNzambi. Chakutalilahu, chelili aIsarela ashiki kukamwihi nakwiñila Mwituña daChikaninu, Mosi wayisoñamishili nindi: “Babalenu kuchina nyichima yenu kuyidimba, himukusenuka hambadi nakupesha akishi, himukudifukula kudi wena; niYehova hakayizuwila.” (Kuhit. 11:16, 17) Bayibolu yashimunaña  nawu Nzambi wenkeli antu jindi yanukishu yayivulu yayikwashileña.

⁴ Kakavulu, Yehova wayikonkomweneneña aIsarela kumutiya woma, kutiyilila izu dindi, nikujilika ijina dindi. (Kuhit. 4:29-31; 5:28, 29) Neyi ovwahilili iyi yanukishu, dikwila nawu adi kutambwila nkisu jajivulu.—Lev. 26:3-6; Kuhit. 28:1-4.

AISARELA CHATAMBWILILUWU YANUKISHU YANZAMBI

5. Muloñadi Yehova chamuzuñilililiyi Mwanta Hezekiya?

⁵ Nzambi watwalekeluhu nakuyakamena aIsarela hayaaka yejima yahitiluwu muyuma yakala. Chakutalilahu, hampinji Mwanta Senakeribi yalukukiliyi Yuda nikukeña kufumisha Mwanta Hezekiya hawanta, Yehova wamukañesheli kuhitila mukutemesha kañelu. Nawufuku wumu hohu, kañelu kaNzambi kajilumwini “ayilobu akwañovu ejima” adiña hakachi kawamashidika awaAshuri, chakwila Senakeribi wafuntili kwitala iku anamutiyishi nsonyi. (2 Kushi. 32:21; 2 Anya. 19:35) Muloñadi Nzambi chamuzuñilililiyi Mwanta Hezekiya? Muloña “yena [Hezekiya] wamulamatili Yehova, hela kubalumuka aleki kumulonda nehi, saña ahembelayi kuleja [kwindi].”—2 Anya. 18:1, 5, 6.

6. Indi Mwanta Yosiya wamukuhweleleli ñahi Yehova?

⁶ Chakutalilahu chikwawu chamuntu wovwahilili nshimbi yaYehova hiMwanta Yosiya. Kutachika hadiñayi nayaaka yitanu nayisatu yakusemuka, “welilaña chaloña kumesu aYehova . . . Hasenukilumu aya kuchikasa chachidiilu hela kuchimunswaku.” (2 Kushi. 34:1, 2) Yosiya wamwekesheli nawu wamukuhweleleli Yehova kuhitila mukufumisha ankishi nikufuntisha kudifukula kwalala. Kuhitila mukwila mwenimu, Yosiya watambwilili nkisu nimunza wejima.—Tañenu 2 Kushindulula 34:31-33.

7. Hampinji yadiwiluwu aIsarela yanukishu yaYehova, chumanyi chafuminumu?

⁷ Hela chochu, chawushona antu jaNzambi hiyakuhweleleli muyanukishu yaYehova mpinji yejimaku. Hankulakaji yayaaka yahitiluhu, elileña aha ovwahila aha nehi. Chikuhwelelu chawu chichazeyeli, neyi chahosheli Kapostolu Pawulu kakavulu adiña, “nakulelujoka nampepela jakuleja kwawantu jejima.” (Efwes. 4:13, 14) Kwesekeja nachiyashimwineñahu dehi, chakañenyuwu kukuhwelela yanukishu yaNzambi, añwili yuma yatama yafuminumu.—Lev. 26:23-25; Yere. 5:23-25.

8. Tunateli kudizilaku ñahi kuchakutalilahu chawaIsarela?

⁸ Tunateli kuhetelamu ñahi muchakutalilahu chawaIsarela? Neyi cheliluwu ambuña aYehova, makonu atambwilaña kufumba nikuyibabesha. (2 Pet. 1:12) Izu daNzambi donenawu  dinateli kwikala neyi hichanukishu mpinji yejima yitukutañamu. Hakwikala antu akweti wuswa wakudifuukwila, tunateli kufuukulahu kwovwahila wunlomboli waYehova hela tunateli kulondela yuma yitunakumona netu yaloña mumesu etu. (Yish. 14:12) Tushinshikenu hayuma yinateli kuleñela tukuhweleli yanukishu yaYehova nichitunateli kuhetelamu kuhitila mukwovwahila.

MWOVWAHILENU NZAMBI KULONDA MUHANDI

9. Hampinji yadiñawu aIsarela mwisaña, Yehova wamwekesheli ñahi nawu wayikwashileña?

⁹ A Isarela chatachikiluwu lwendu lwendeluwu hadi yaaka 40 lwakuhita ‘mwisaña mwatiyishileña woma nankashi,’ Yehova hayilejeli chadi kuyilombolayi, kuyikiña nikuyakamenaku. Hela chochu, watwalekeluhu nakumwekesha nindi ateleleli kumukuhwelela nikukuhwelela nshimbi jindi. Kuhitila mukuzatisha chishimi chevu namwana nichishimi chakesi nawufuku, Yehova wayanukishileña aIsarela nindi wayikwashileña hampinji yayilombweleñayi hakuhita mwisaña datama. (Kuhit. 1:19; Kwid. 40:36-38) Cheñi nawa wayinkeleña niyakudya yakeñeleñawu. “yuma yawu yakuvwala kukulaña nehi, nyendu yawu kunanaña nehi.” Eñañi, “hiyabulili chumaku.”—Nehe. 9:19-21.

10. Indi Yehova nakulombola ñahi antu jindi makonu?

¹⁰ Ambuña aNzambi makonu adi kukamwihi nakwiñila mwituña dadiha dakuloña. Komana twamukuhwelela Yehova netu nateli kutukwasha kulonda tukapuluki “lukadi lwasweja” lunakwinza? (Mat. 24:21, 22; Mas. 119:40, 41) Mwamweni, Yehova hatwinka chishimi chevu hela chakesi kulonda chitulomboleña tukeñili mwituña dadihaku. Ilaña nakuzatisha kuloñesha kwindi kulonda yatukwashi tutwalekuhu asoñama. Chakutalilahu, chayinu mpinji anakukonkomwena nankashi hakukolesha wuspiritu wetu kuhitila mukutañaña Bayibolu halwetu, kwikalaña naKudifukula kwaChisaka kwamelela, nikupompaña mpinji yejima nikushimwina mwiha. Komana tunakuhimpa chihandilu chetu kulonda tulondeleña iyi nshimbi? Neyi twila mwenimu chikutukwashaku kwikala nachikuhwelelu chinateli kutukwasha tukapuluki nakwiñila mwituña dadiha.

11. Munjilanyi mwamwekeshelañayi Nzambi nindi watwakamenaña?

¹¹ Kubombela hakutukwasha kulonda twikala atona kuspiritu, wunlomboli wutwatambwilaña watukwashaña mukuhanda kwetu ifuku niifuku. Yakutalilahu yabombelamu kwikala nayitoñojoka yayiwahi kutalisha hamaheta nikwikala nadisu datala mumu kulonda tubuleña kusweja kwakama. Tunahetelumu cheñi muwunlomboli wutwatambwilaña kutalisha hanvwalilu nihammwekenu yetu, kutonda yisela yayiwahi, nikufuukulahu chachiwahi kutalisha hakudiza shikola. Toñojokenu hayanukishu yatulejañawu hakudikiña kuwubanji mumatala etu, nyotoka, Matala aWanta nikwikala adiloñesha kuyuma yamwekanaña mukukasumwisha. Kufumba kwamuchidiwu kwamwekeshaña nawu Nzambi watwakamenaña.

YANUKISHU YAKWASHILI AKWAKRISTU AKUSAMBILA KUTWALEKAHU ASHINSHIKA

12. (a) Nsañwinyi yimu yatañishileñayi Yesu atumbanji twindi mapampa kakavulu? (b) Chumanyi chakoñeliyi chakudizoza chamusañumwini Petulu, nawa chinateli kutuleñela twilidi?

¹² Muyaaka nkulakaji yakusambila, antu jaNzambi atambwilileña yanukishu mpinji yejima. Kakavulu Yesu wayilejeli atumbanji twindi nindi ateleleli kwikala adizoza. Hela chochu, Yesu hakuminini hohu hakuyileja atumbanji twindi mwatalisha kudizozaku, ilaña wayimwekesheleli chakwikala adizoza. Hefuku dindi dakukumishaku neyi muntu hamaseki, Yesu wapompesheli apostolu kulonda adyi Paseka. Hampinji yadileñawu apostolu indi, Yesu wanyamukili kukudya nakuwelesha nyendu yawu, iwu mudimu kakavulu awuzatileña kudi ñamba. (Yow. 13:1-17) Ichi chuma cheliliyi chakumwekesha  kudizoza chayishikili apostolu indi hamuchima. Chimwahitili yaaka 30, kapostolu Petulu wadiñahu hachina chawija, wafumbili akwawu akwakwitiya kutalisha hakudizoza. (1 Pet. 5:5) Chakutalilahu chaYesu chatela kutusañumuna wejima wetu kwikala nayililu yakudizoza kudi wumu namukwawu.—Fwi. 2:5-8.

13. Indi Yesu wayanukishili atumbanji twindi nindi atela kwikala nachililwinyi chalema?

¹³ Kakavulu Yesu wahanjekeleña nawatumbanji twindi hakwikala nachikuhwelelu chakola. Kuhiñahu hanyima yakukañanya kufumisha ndemoni mudi kansi weyala wadiña nandemoni, atumbanji amwihwili Yesu nawu: “Etu twakañenyadi kumufumisha?” Yesu wakwili nindi: “Muloña wowu wakukuhwelela kwenu kwantesha; muloña nukuyileja chalala nami, neyi mukweti kukuhwelela kwakweseka nakalubutu kamostadi, . . . kwosi chuma chimwadi kukañanyaku.” (Mat. 17:14-20) Mumudimu windi wejima wakushimwina, Yesu wadizishili atumbanji twindi nindi chikuhwelelu hichililu chalema nankashi. (Tañenu Matewu 21:18-22.) Komana tunakuzatisha kukoleka kwejima kutukweti kulonda tukoleshi chikuhwelelu chetu kuhitila muwunlomboli wutwatambwilaña hakupompa kwankambi, kupompa kwanyanya, nikupompa kwawakwaKristu? Iku hikupompa kwalema nankashi; himpinji yitwamwekeshaña netu twamukuhwelela Yehova.

14. Muloñadi chichalemena kwikala nakukeña neyi kwaKristu makonu?

¹⁴ Munyikanda yawakwaKristu yachiGriki mwenzala yanukishu yatulejaña nawu twatela kudikeña wumu namukwawu. Yesu wahosheli nindi lushimbi lwamuchiyedi lwalema lwakwila nawu “Keñaku mukwenu neyi chiwadikeña eyi aweni.” (Mat. 22:39) Chochimu, Yakoba mana kwaYesu wakuwanamu wateneni kukeña nindi “lushimbi lwawanta.” (Yak. 2:8) Kapostolu Yowanu wasonekeli nindi: “Enu akwetu twakeña hinukuyisonekela lushimbi lwalwihaku, lwolwalukulu lumwadiñi nalu kufumisha kutachi.” (1 Yow. 2:7, 8) Indi Yowanu wateneneña chumanyi hahosheliyi nindi “lushimbi lwalukulu”? Wateneneña lushimbi lwakukeña. Lwadiña lushimbi “lwalukulu” hamuloña wakwila Yesu waluheni dehi kuyaaka yakunyima, “kufumisha kutachi.” Ilaña lwadiña cheñi “lwaluha” muloña lwakeñekeleña kudihana hakumwekesha iku kukeña, kwateleleluwu kumwekesha atumbanji hampinji yamweneñawu yuma yashiyashana. Hakwikala atumbanji twaKristu, komana hitwahamekaña kusoñamisha kwatukwashaña kudikiña kulonda tubuli kwikala nayililu yalwisu yinenzali mukanu kaayi, yinateli kutuleñela tubuli kukeña antuñi netuku?

15. Mudimwinyi wenjililiyi Yesu hanu hamaseki?

¹⁵ Yesu wakeñeli antu. Twamonaña chakeñeliyi antu hampinji yokiliyi antu adiña akata niayifwayi nihampinji yasañwiliyi afu. Hela chochu, Yesu henjilili kuuka antu kumujimbaku.  Mudimu windi wakushimwina nikutañisha wakwashili chikupu mawumi awantu. Munjilanyi? Chakutalilahu, tweluka netu antu okiliyi Yesu niasañwiliyi muyaaka nkulakaji yakusambila, chimwahitili mpinji ashinakajili nawa afwili, ilaña antu atambwilili chachiwahi nsañu yashimwinineñayi ekalili nakukooleka kwakutambwila wumi wahaya nyaka.—Yow. 11:25, 26.

16. Indi mudimu wakushimwina nikwilisha atumbanji anakuwushimwina kumatuña añahi makonu?

¹⁶ Mudimu wakushimwina watachikiliyi Yesu muyaaka nkulakaji yakusambila makonu anakuwushimwina mumatuña amavulu. Eñañi, Yesu wayinkeli atumbanji twindi mudimu nindi: “Dichi yenu mwakelishi atumbanji munyuza yejima.” (Mat. 28:19) AkwaKristu amuyaaka nkulakaji yakusambila atwalekeluhu kuzata mudimu watachikiliyi Yesu, anetu makonu tunakushimwina kudi antu amavulu mumaluña ashiyashana. A Yinsahu jaYehova akubadika hayihita yitanu nayiyedi anakudikita chikupu mumudimu wakushimwina Wanta waNzambi mumatuña akubadika ha 230 nawa aYinsahu mpinji yejima adizishaña yihita yawantu Bayibolu. Iwu mudimu wakushimwina wunakuhana wunsahu wakwila nawu tunakushakama mumafuku akukuminina.

KUHWELELENU MUDI YEHOVA MAKONU

17. Kufumbanyi kwahanini Pawulu niPetulu?

¹⁷ Eñañi, yanukishu yayikwashili akwaKristu akusambila kutwalekahu kwikala nachikuhwelelu chakola. Toñojokenu chamukolesheluwu Timotewu kudi kapostolu Pawulu wadiña mukaleya muRoma, hamulejeliyi nindi: “Ikalaku namazu akukolesha iwatiyili kudami.” (2 Tim. 1:13) Hanyima yakukolesha akwawu akwaKristu nindi ekali nayililu yidi neyi kuumika, kukeñañana, nikudihemba, kapostolu Petulu wahosheli nindi: “Nakeñi nami niyanukishi yumiyi mafuku ejima, hela mwayiluka, hela mwakola dehi munsañu yalala.”—2 Pet. 1:5-8, 12.

18. Indi akwaKristu amuyaaka nkulakaji yakusambila ayimweneña ñahi yanukishu?

¹⁸ Eñañi, nyikanda yasonekeli Pawulu niPetulu yashimwineña “mazu ahosheluwu dehi atuprofwetu ajila.” (2 Pet. 3:2) Komana amana kwetu amuyaaka nkulakaji yakusambila atiyili kutama hakutambwila wunlomboli wamuchidiwu? Inehi, muloña iwu wunlomboli wamwekesheleña kukeña kwaNzambi, wayikwashili atwalekuhu ‘kukula muluwi nimukumwiluka Mwanta wetu Chamwinu Yesu Kristu.’—2 Pet. 3:18.

19, 20. Muloñadi chitwatela kukuhwelela yanukishu yaYehova, nawa twahetelañamu ñahi neyi twila mwenimu?

¹⁹ Makonu, kudi yuma yayivulu yatuleñelaña tukuhweleli yanukishu yaYehova, yawanikaña Mwizu dindi dalala Bayibolu. (Tañenu Yoshuwa 23:14.) MuBayibolu twatañañamu nsañu yahoshaña hadi Nzambi chazatileñayi nawantu abula kuwanina hadi yaaka yayivulu yinahituhu. Iyi nsañu ayisonekeli kulonda tuhetelumu. (Rom. 15:4; 1 Kor. 10:11) Tunamoni wuprofwetu wamuBayibolu chiwunashikijewi. Wuprofwetu tunateli kuwufwanisha kuyanukishu yashimwineñawu dehi chadimu. Chakutalilahu, yihita yawantu yinakuhwila kukudifukula kwalala kwaYehova, neyi chaprofweteluwu nawu dichakazatika “kunyaka yakukuminina.” (Isa. 2:2, 3) Yuma yatama yinakuswejelaku yinakumwekana mukaayi niyena yashikijaña wuProfwetu wamuBayibolu. Kwesekeja nachitwashimuna, mudimu weneni wakushimwina wunakutwalekahu mukaayi kejima wunakushikija chikupu mazu aYesu.—Mat. 24:14.

²⁰ Hayaaka yayivulu yinahituhu, Nleñi yetu namwekeshi chikupu nindi tunateli kumukuhwelela. Komana tunakuhetelamu muyanukishu yindi? Twatela kukuhwelela muyanukishu yindi. Dicheliliyi Rosellen. Wahosheli nindi: “Chinatachikili kumukuhwelela chikupu Yehova, natachikili kumona chikupu chikasa chindi chinakuñakamena nikunkolesha.” Anetu nawa tuhetelenumu mukulondela yanukishu yaYehova.

[Malwihu aKuzatisha haKudiza]

[Mwevulu wudi hefu 8]

Yanukishu yaYehova yasañumwini Yosiya kuhakwilaku kudifukula kwalala (Talenu parakalafu 6)

[Mwevulu wudi hefu 10]

Kuzatisha yanukishu yaYehova kwatukwashaña kuhemba chiwahi Matala etu aWanta (Talenu parakalafu 11)