1. Eng thute nge Pathian mite’n an sawiho ṭhin a, chûng thute ennawn chu engtin nge kan hlâwkpui?

CHAWLHKAR tâwpa neih tûr Vênnainsâng Zirna atâna i inbuatsaih laiin, ‘He thu hi kan zir tawh a ni lâwm ni?’ tia ngaihtuah châng i nei em? Kristian kohhran chhûnga lo awm rei tawh i nih chuan, thu ṭhenkhat chu zir nawn zêl a ni tih i hria ang. Pathian Ram te, tlanna te, zirtîr siam rawngbâwlna te, leh hmangaihna leh rinna ang chi miziate chungchâng chu kan thlarau lam chawah hian a tel fo ṭhîn a. Hêng thute kan ennawnna aṭangin rinnaa ding nghet tûr leh “ngaithlatute mai ni lovin zâwmtute lo ni zâwk” tûrin ṭanpuina kan dawng a ni.—Jak. 1:22.

2. (a) Pathian thuhriattîrte chu eng nge a nih tlângpui ṭhin? (b) Engtin nge Pathian thuhriattîr chu mihringte dân siam lakah a danglam?

² “Thuhriattîr” tia lehlin Hebrai thu mal chuan Pathianin a mite hnêna a pêk dânte, thupêkte, leh thuruatte a kâwk tlângpui ṭhîn a. Siam danglam ngai ṭhîn mihringte siam chawp dânte ang lo takin, Jehova dânte leh thuruatte chu engtik lai pawhin a rinawm a ni. A ṭhen phei chu eng hun emaw, eng dinhmun emaw bîk atâna pêk mah ni se, dik lo leh tâwk lo a ni ngai lo. Fakna hla phuahtu chuan: “I thuhriattîrte chu kumkhua atân a fel a ni,” a ti a ni.—Sâm 119:144.

3, 4. (a) Jehova thuhriattîrte zîngah chuan eng nge tel thei? (b) Chûng thute zawm chu Israelte’n engtin nge an hlâwkpui ang?

³ Jehova thuhriattîrte zîngah chuan vaukhânna thuchah a tel châng a awm tih i lo hre tawh pawh a ni thei a. Israel hnam chuan Pathian zâwlneite kaltlangin vaukhânna an dawng ziah a ni. Entîr nân, Israel mite Ram Tiama an luh hma lawk khân, Mosia chuan heti hian a vaukhân a ni: “Fîmkhur rawh u khai; chutilochuan in thinlung chu bumin a awm ang a; in pêng ang a, pathian dang rawng te in bâwl ang a, in be mai dah ang e; chuti a nih chuan LALPA thin in chungah a lo thawk ang,” tiin. (Deut. 11:16, 17) Pathianin a mite hnênah thu ṭangkai  tam tak a hriattîr ṭhîn tih Bible chuan a târ lang a ni.

⁴ Jehova chuan Israelte chu amah ṭih tûr, a thu ngaithla tûr, leh a hming tithianghlim tûrin vawi tam tak a fuih a. (Deut. 4:29-31; 5:28, 29) Chûng a thuhriattîrte an ngaihthlâk chuan malsâwmna tam tak an dawng ngei ang.—Lev. 26:3-6; Deut. 28:1-4.

5. Engvângin nge Pathianin Lal Hezekia tâna a beihsak?

⁵ Buainaa khat Israelte chanchin zawng zawngah, Pathian chuan a thutiam chu a hlen zêl a. Entîr nan, Assuria Lal Senakeriba’n Judai ram rûn a, Lal Hezekia paih thlâka a vau khân, vântirhkoh tîrin Jehova chu a inrawlh a ni. Senakeriba chu tlâwm a, zahthlâk taka a kîr leh nân, Pathian vântirhkoh chuan zan khat thil thu-ah Assuria sipai “mi chak huaisen zawng zawngte” chu a tiboral a ni. (2 Chro. 32:21; 2 Lal. 19:35) Engvângin nge Pathianin Lal Hezekia tâna a beihsak? Hezekia chuan “LALPA chu a vuan tlat a, amah a zui chu a bâng duh lo.” Chuvângin Hezekia chu a ṭanpui a ni.—2 Lal. 18:1, 5, 6.

6. Engtin nge Lal Josia chuan Jehova a rinzia a târ lan?

⁶ Jehova thupêkte vawngtu entawn tûr dang chu Lal Josia a ni. Kum riat mi lek a nih aṭangin, “LALPA mithmuhah thil ṭha a ti ṭhîn a, . . . ding lamah emaw vei lamah emaw a pênsan lo.” (2 Chro. 34:1, 2) Josia chuan Jehova a rinzia chu ram chhûng ata milem biaknate paih bo va, biakna dik tungding lehin a târ lang a ni. Chutianga a tih avângin, Josia chuan ama chungah chauh ni lovin, ram chhûng zawng zawngah malsâwmna a thlen a ni.—2 Chronicles 34:31-33 chhiar rawh.

7. Israelte’n Jehova thuhriattîrte an ngaihthah khân eng nge a rah chhuah?

⁷ Mahse, Pathian mite’n Jehova thuhriattîrte an rin pumhlûmzia an lantîr lo hi a lungchhiatthlâk hle. Kum zabi tam tak chhûng chu thu âwihna leh thu âwih lohna inkârah an thle tawn reng a ni. Rinna an hloh hian, Paula sawi angin ‘zirtîrna thli tinrênga lehlam lehlama vawrh leh len lenin’ an awm fo va. (Eph. 4:11-14) Sawi lâwk tawh ang ngeiin, Pathian thuhriattîrte an rin loh hunah chuan a rah chhuah chhe tak chu an seng ṭhîn a ni.—Lev. 26:23-25; Jer. 5:23-25.

8. Engtin nge Israelte entîrna aṭanga kan inzir theih?

⁸ Eng kawngin nge Israelte entîrna chu kan hlâwkpui theih? Anmahni ang bawkin, tûn laia Pathian chhiahhlawhte chuan zirtîrna leh thununna kan dawng ṭhîn a. (2 Pet. 1:12) Pathian thlarauva thâwk khum a Thu  chu kan chhiar apiangin kan tân thuhriattîrtu a ni thei a. Zalên taka duh thlan theihna nei kan nih avângin, Jehova kaihhruaina kan zâwm emaw, dik nia kan hriatte kan ûm emaw thei a ni. (Thuf. 14:12) Jehova thuhriattîrte kan rin theih chhan leh chûng thute zawm kan hlâwkpui theih chhan chu i lo ngaihtuah ang u.

9. Israelte thlalêra an awm lai khân, Jehova chuan a ṭanpuina an dawnzia engtin nge a hriattîr?

⁹ Israelte’n a hnua “thlalêr zau tak leh râpthlâk tak” kal tlanga kum 40 chhûng an zinna tûr zinkawng an ṭan khân, Pathian Jehova chuan anmahni a kaihhruai dân tûr te, a vênhim dân tûr te, leh a enkawl dân tûrte chu chipchiar takin a hriattîr lâwk lo. Chutichung pawhin, amah leh a kaihhruaina chu a rin tlâkzia a lantîr nawn fo a ni. Jehova chuan Israelte chu, chu ram hlauhawm tak paltlanga an zin kawngah chuan chhûna chhûm ding leh zâna meialh ding hmangin anmahni a ṭanpuizia leh a hruaizia a hriattîr a. (Deut. 1:19; Ex. 40:36-38) Tin, an mamawh bulpuite chu a pe bawk a ni. “An silhfênte a hlui lo va, an kête chu a vûng lo va.” Dik takin, “engmah an tlachham lo” a ni.—Neh. 9:19-21.

10. Engtin nge Jehova chuan tûn laia a mite a kaihhruai?

¹⁰ Tûn laia Pathian chhiahhlawhte hi khawvêl thar kawtkaiah mai an awm tawh a. Pathian Jehova chuan lo thleng tûr “hrehawm nasa tak” ata kan dam khawchhuah theih nân kan mamawhte min pe dâwn tih kan ring tlat em? (Mt. 24:21, 22; Sâm 119:41) Pathian Jehova chuan khawvêl thara min hruai nân chhûm ding emaw, meialh ding emaw min pe lo ngei mai a. Mahse, a inawpna pâwl chu harhvâng taka awm reng tûra min ṭanpui nân a hmang a ni. Entîr nân, mahnia Bible zirna te, Chhûngkuaa Pathian Biakna neih zân te, leh inkhâwm leh rawngbâwlnate hmanga thlarau lama puitlin lam pan chhoh chu ngaih pawimawh hle a ni a. Hêng kaihhruainate hi zui tûrin kan insiamrem tawh em? Chutianga insiamremna chuan khawvêl thara min dam chhuahpui tûr rinna nei tûrin min ṭanpui ang.

11. Eng kawngtein nge Pathianin min ngaihsakzia a târ lan?

¹¹ Kaihhruaina kan dawnte chuan thlarau lama harhvâng reng tûra min ṭanpui bâkah, kan nî tin nunah pawh min ṭanpui bawk a. Entîr nân, lungkhamna neih tlêm nân khawvêl lam thil thlîr dân inbûk tâwk leh tluangtlam taka nung tûra fuih kan ni. Kan silhfên leh incheina lamah te, intihhlimna ṭha thlannaah te, leh lehkha zir chen tûr âwm tâwk chungchânga thu tlûkna siam kawngahte chuan kaihhruaina kan dawnte chu kan hlâwkpui a ni. Tin, kan in te, lîrthei te, Biak In te, leh rîkrum thil lo thleng theite laka invênhim dân tûr hriattîrnate hi han ngaihtuah teh. Chutiang kaihhruainate chuan Pathianin kan ṭhatna tûr a ngaihtuahzia a târ lang a ni.

12. (a) Isua’n a zirtîrte hnêna a sawi nawn fo thu pakhat chu eng nge ni? (b) Inngaihtlâwmna chungchânga eng thiltih hian nge Petera rilru hneh hle a, chu chuan keini pawh eng angin nge min nghawng ang?

¹² Kum zabi khatnaah khân Pathian mite chuan thuhriattîrna a hun takah an dawng ṭhîn a ni. Isua chuan a zirtîrte chu inngaihtlâwmna neih a ngaihzia a hrilh nawn fo va. Amaherawhchu, inngaihtlâwmna nihna a hrilhfiah mai bâkah, a takin a lantîr a ni. Mihring anga leia a hun hman tâwp nîah pawh Isua chuan tirhkohte chu Kalhlên Kût hmang tûrin a ko khâwm a. A tirhkohte’n an ei laiin, a ding chhuak a, an kê a silsak a ni—chu chu chhiahhlawhte hna a ni. (Joh. 13:1-17) He hna tlâwm tak a thawh hian an thinlung a hneh  hle a. Kum 30 vêl a liam hnuah pawh, chu zânriah einaa tel ve tirhkoh Petera chuan a rinpuite chu inngaihtlâwmna chungchângah thurâwn a pe a ni. (1 Pet. 5:5) Isua entîrna chuan kan indâwr tawnna kawngah inngaitlâwm ṭheuh tûrin min chêttîr tûr a ni.—Phil. 2:5-8.

13. Isua chuan a zirtîrte chu eng mize pawimawh tak nge neih ngai nia a hriattîr?

¹³ Rinna nghet tak neih a pawimawhzia chu Isua’n a zirtîrte a sawipui ṭhin thu dang pakhat a ni a. Mipa naupang kaw chhûnga ramhuai lût an hnawh chhuah theih loh hnuah, zirtîrte chuan Isua hnênah: “Engati nge keinin kan hnawh chhuah theih loh?” tiin an zâwt a. Ani chuan heti hian a chhâng a ni: “In rin tlêm avângin. Tih tak meuhvin ka hrilh a che u, anṭam mu fangkhat ang rin in neih chuan, . . . in tân tih theih loh rêng engmah a awm lo vang,” tiin. (Mt. 17:14-20) A rawngbâwl chhûng zawngin, Isua chuan a zirtîrte hnênah rinna chu mize pawimawh tak a nihzia a zirtîr a ni. (Matthaia 21:18-22 chhiar rawh.) Chuti chu, kan rinna tihngheh theihna tûr hun remchâng kan neihte—inkhâwmpui leh kohhran inkhâwmte—chu kan chhawr ṭangkai em? Chûng hunte chu inhmuh khâwmna hun hlimawm mai a ni lo; Jehova kan rinzia târ lanna hun a ni.

14. Engvângin nge Krista neih ang hmangaihna neih chu tûn laiah a pawimawh?

¹⁴ Kristian Grik Pathian Lehkha Thu hi inhmangaih tawn a pawimawhzia thuin a khat tlat a. Isua chuan thupêk zawng zawnga pawimawh ber dawttu chu ‘mahni inhmangaih anga vêngte hmangaih’ a ni tih a sawi. (Mt. 22:39) Chutiang bawkin, Isua unaupa Jakoba pawhin hmangaihna chu “lal dân” tiin a ko hial a ni. (Jak. 2:8) Tirhkoh Johana chuan: “Duh takte u, thupêk thar zawng in hnênah ka han ziak lo va; thupêk hlui, atîr ata in neih kha ka ziak zâwk a ni,” tiin a ziak bawk a ni. (1 Joh. 2:7, 8) Johana’n “thupêk hlui” a tih chu eng nge ni? Inhmangaih tawn tûra thupêk hi a ni a. A “hlui” a nih chhan chu kum sâwmbi engemaw zât kal ta, “a tîr ata” Isua’n a lo pêk tawh vâng a ni. Mahse, chu chu a “thar” a ni bawk a, zirtîrte’n dinhmun tharte an tawh huna mahni hmasial lo hmangaihna an mamawh a ni. Krista zirtîrte kan nih angin, kan vêngte kan hmangaihna tidai thei he khawvêl mizia mahni hmasialna laka invêng tûra vaukhânna chu kan hlut hle a ni lâwm ni?

15. Leia Isua hnathawh ber chu eng nge ni?

¹⁵ Isua chuan mite chungah mi mal ngaihsakna a lantîr a. Chu chu dam lote a tihdam a, mitthite a kaihthawhna aṭangin kan hre thei a ni. Nimahsela, Isua hnathawh ber chu  tisa lama mite tihdamna a ni lo. A thu hrilh leh zirtîr chuan mite nunah nghawng thui tak a nei zâwk a ni. Engtin nge? Entîr nân, kum zabi khatnaa Isua tihdam leh kaihthawhte chu a tâwpah chuan an tarin an thi a; mahse, a thu hrilh ṭha taka dawngsawngtute chuan chatuana nunna an chang dâwn tih kan hria a ni.—Joh. 11:25, 26.

16. Tûn laia Lalram thu hrilhna leh zirtîr siamna chu eng ang takin nge a darh zau?

¹⁶ Kum zabi khatnaa Isua bul lo ṭan thu hrilhna chu tûn laiah hian zau zâwk leh ropui zâwka thawh a ni a. A chhan chu, Isua’n a zirtîrte hnênah: “Chutichuan kal ula, hnam tina mi zirtîrahte siam ula,” a tih vâng a ni. (Mt. 28:19) Anni chuan a sawi ang chuan an ti a, keini pawhin kan ti ve kan ti thei! Jehova Thuhretu maktaduai sarih aia tamte chuan ram 230 aia tamah Pathian Ram chanchin ṭhahnemngai takin an hril a, mi maktaduai tam takte chu Bible an zirpui bawk. He thu hrilhna hian ni hnuhnûngah kan awm tawh tih a târ lang a ni.

17. Paula leh Petera chuan eng fuihna thu nge an sawi?

¹⁷ Thuhriattîrte chuan Kristian hmasate chu rinnaa nghet tlat tûrin a ṭanpui tih a chiang hle. Rom khuaa tâng mêk tirhkoh Paula’n a hnêna: “Thu dik dân ka kaa i hriatte kha nei tlat rawh,” tih a sawi chuan Timothea a tihchak dân tûr chu han ngaihtuah teh. (2 Tim. 1:13) Tirhkoh Petera chuan a unaute chu chhelna te, unaute hmangaihna te, leh insûmtheihna te nei tûra a fuih hnuah: “Chûng thil chu hriain thutak in hnêna awmah chuan in nghet na a, chûng thil chu hriattîr che u ka inpeih fo vang,” tiin a sawi a ni.—2 Pet. 1:5-8, 12.

18. Kum zabi khatnaa Kristiante chuan hriattîrna an dawnte chu engtin nge an thlîr?

¹⁸ Ni e, Paula leh Petera lehkha thawnte chuan “zâwlnei thianghlimte thusawi lâwk” chu a târ lang a. (2 Pet. 3:2) Kum zabi khatnaa kan unaute khân chutiang kaihhruaina an dawng chu lungawi loh nân an hmang em? Hmang lo ve, chûng hriattîrnate chu ‘kan Lalpa leh Chhandamtu Isua Krista khawngaihna leh hriatnaa ṭhang lian’ tûra anmahni ṭanpuitu, Pathian hmangaihna târ lanna a ni si a.—2 Pet. 3:18.

19, 20. Engvângin nge Jehova thuhriattîrte chu kan rinchhan ang a, chu chu engtin nge kan hlâwkpui?

¹⁹ Tûn laiah hian, dik lo thei lo Pathian Thu, Bible-a kan hmuh Jehova thuhriattîrte rin nachhan tûr tam tak kan nei a. (Josua 23:14 chhiar rawh.) Bible-ah chuan, kum sâng tam tak chhûnga Pathianin mi ṭha famkim lote a dâwr dân kan hmu thei a ni. He thilthleng hi kan hlâwkpui atâna ziak a ni a. (Rom 15:4; 1 Kor. 10:11) Bible hrilh lâwkte a thleng famkim tih kan hmu tawh a. Hrilh lâwknate chu hriattîrna sawi lâwk angin kan ngai thei ang. Entîr nân, “ni hnuhnûngahte” thleng tûra a sawi lâwk ang ngeiin, mi maktaduai tam takte chu Jehova biakna thianghlimah an lût tawh a ni. (Is. 2:2, 3) Khawvêl dinhmun chhe zual zêlte pawh hian Bible hrilh lâwkna a tifamkim a. Tin, kan sawi tawh angin, khawvêl puma thu hrilhna nasa tak neih mêk hi Isua thusawi thlen famkimna a ni bawk.—Mt. 24:14.

²⁰ Min Siamtu chuan kan rin theihna tûr khawpin rin a phuzia a lo târ lang tawh a. Chûng chu kan hlâwkpui em? A thuhriattîrte kan rin chu a ngai a ni. Rosellen-i chuan a ring a. Heti hian a sawi a ni: “Jehova ka han rinchhan pumhlûm ṭan chuan, a hmangaihna chuan min châwmin min tichak a ni tih ka hmu fiah ṭan a ni,” tiin. Keini pawhin, amah ang bawkin Jehova thuhriattîrte chu i lâwkpui ṭheuh vang u. (w13-E 09/15)