1. Mang boch ban’en nib ga’ ni ma weliy e pi tapigpig rok Got murung’agen, ma uw rogon ni ma yib angin e pi n’ey ngodad?

 BAY ba ngiyal’ ni ga be fil reb e article ni yira weliy u nap’an e fol Wulyang ko Damit, mag gaar u wan’um, ‘Gathi kan fil murung’agen e re n’ey bayay?’ Faanra ke n’uw nap’am ko ulung ni Kristiano ma dabisiy ni ga manang ni bay boch ban’en ni ke yoor yay ni kan weliy. Boor yay ni kad filed murung’agen Gil’ilungun Got, nge fare biyul, nge fare maruwel ni machib, nge boch e fel’ngin ni bod rogon e t’ufeg nge michan’. Faanra ud sulod u daken e pi n’ey, ma ra ayuwegdad ni ngaud pared nib gel e michan’ rodad ya nge yag nda pared ni gathi kemus ni ngad ‘motoyilgad ko thin rok Got; ya ngad maruwelgad ngay.’​—Jas. 1:22.

2. (a) Mang e be yip’ fan e pi puguran rok Got? (b) Uw rogon nib thil e pi motochiyel rok Got ko pi motochiyel ko girdi’?

² Fare bugithin ni Hebrew ni kan piliyeg ni “puguran” e ba ga’ ni be yip’ fan e pi motochiyel rok Got, ara pi n’en ni ke tay chilen ni ngan rin’, ara pi fonow ni ma pi’ ko pi tapigpig rok. Gubin ngiyal’ nrayog ni nge pagan’uy ko pi motochiyel nge fonow rok Jehovah. Ba thil ko pi motochiyel ni ma fal’eg e girdi’ ni bay yu ngiyal’ ni ma t’uf ni ngan thilyeg boch ban’en riy ara ngan thilyeg ni ga’ngin. Yugu aram rogon ni bay boch e pi motochiyel ara pi fonow nem ni kan pi’ u ba ngiyal’ nib thil ara kan pi’ ni fan nga yugu ban’en, ma dariy ba ngiyal’ ni ma aw nde puluw e thin riy. I yog e en ni yoloy e psalm ni gaar: “Fonow rom e bay i par nib mat’aw ndariy n’umngin nap’an.”​—Ps. 119:144.

3, 4. (a) Mang e ba muun ko pi puguran ni ma pi’ Jehovah? (b) Faan gomanga fol piyu Israel ko pi puguran rok Got, ma mang angin nra yib ngorad?

³ Dabisiy ni kam guy ni pi puguran rok Jehovah e bay yu ngiyal’ nib muun ngay e thin ni be ginangey. Gubin ngiyal’ ni i ginang e pi profet rok Got fare nam nu Israel kakrom. Bod nu m’on ni ngar tawgad nga lan fare Nam ni Kan Micheg, me yog Moses ngorad ni gaar: “Dab mu paged gimed  ngan waliymed nga orel rok Somol ni bochan e gimed be tayfan ma gimed be pigpig ngak yugu boch e got. Ma faani gimed ra yodorom, ma ra damumuw Somol ngomed.” (Deut. 11:16, 17, BT) Be tamilangnag e Bible ni boor ban’en ni i puguran Got ko pi tapigpig rok ni i yib angin ngorad.

⁴ Ku boor yay ni i pi’ Jehovah e athamgil nga laniyan’ piyu Israel ni nge yib madgun u wan’rad, mi yad motoyil ngak, mi yad tayfan fithingan nib thothup. (Deut. 4:29-31; 5:28, 29) Faan gomanga ra folgad ko pi puguran ney ma ba mudugil nra tow’athnagrad.​—Lev. 26:3-6; Deut. 28:1-4.

5. Mang fan ni ke cham Jehovah ni pa’ Hezekiah ni Pilung?

⁵ Gubin ngiyal’ ni i lebguy Got e tin ni i micheg ngak piyu Israel kakrom. Bod nnap’an ni yan Sennacherib ni Pilung nu Assyria ni nge cham ko fare nam nu Judah me yog nra gel ngak Hezekiah ni Pilung, machane me l’og Jehovah e engel rok ni nge ayuweg e girdi’ rok. Mu lan taareb e nep’ me thang fare engel e fan rok urngin e “salthaw nge tolang ko fa raba’ i salthaw nu Assyria,” ma aram me sul Sennacherib nga tafen ni ke tamra’. (2 Kron. 32:21, BT; 2 Ki. 19:35) Mang fan ni ke cham Got ni pa’ Hezekiah ni Pilung? Ya bochan ni i par Hezekiah ni “ba yul’yul’ ngak Somol ma dariy ba ngiyal’ nde fol rok, ya ri i ayuweg urngin e tin ke tay Somol chilen.”​—2 Ki. 18:1, 5, 6, BT.

6. Uw rogon ni ke dag Josiah ni be pagan’ ngak Jehovah?

⁶ Josiah ni Pilung e ku ir be’ ni i fol ko pi motochiyel rok Jehovah. Nap’an ni gaman meruk e duw yangaren, me tabab ni nge “rin’ e tin nib m’agan’ Somol ngay . . . Ri i fol u gubin e motochiyel rok Got.” (2 Kron. 34:1, 2, BT) Ke dag ni be pagan’ ngak Jehovah u nap’an ni gothey gubin e pi liyos ni immoy u lan fare binaw me sulweg e bin riyul’ e liyor nga rogon. Bochan e re n’ey ma kan tow’athnag Josiah nge fare nam nu Israel ni ga’ngin.​—Mu beeg e 2 Kronicles 34:31-33.

7. Mang wenegan ni yib ngak piyu Israel ni bochan e da kur folgad ko pi puguran rok Jehovah?

⁷ Machane, gathi gubin ngiyal’ ni i pagan’ piyu Israel ko pi puguran rok Jehovah. Boor yay nda ur folgad rok. Nap’an ni war e michan’ rorad mi yad bod e piin ni ke weliy apostal Paul murung’agrad ni ‘be fekrad e nifeng i yan ni gubin yay nra n’ag e nifeng gil’, ni aram e machib rok e girdi’ ni yad be bannag e girdi’.’ (Efe. 4:13, 14) Nap’an nde pagan’rad ko pi puguran rok Got, mi i yib wenegan nib kireb ngorad ni bod rogon ni ka nog ngorad u m’on riy.​—Lev. 26:23-25; Jer. 5:23-25.

8. Mang e gad ra fil ko n’en ni buch rok piyu Israel?

⁸ Mang e gad ra fil ko n’en ni buch rok piyu Israel? Ngiyal’ ney e ku yima fonownag e pi tapigpig  rok Got ni bod rogon piyu Israel kakrom. (2 Peter 1:12) Thin rok Got ni kan thagthagnag u Bible ni gad ma beeg ni gubin ngiyal’ e rayog ni nge mang ba puguran ngodad. Bochan ni kan pi’ e puf rogon ngodad, ma rayog ni ngad mel’eged ko ngad folgad ko pi fonow rok Jehovah fa ngad folgad ko pi n’en ni gad be lemnag nib puluw. (Prov. 14:12) Chiney e ngad weliyed boch i fan nib fel’ ni nge pagan’dad ko pi puguran rok Jehovah nge angin nra yib ngodad ni faan gad ra fol riy.

9. Nap’an ni immoy piyu Israel u daken e ted, ma uw rogon ni i dag Jehovah ni be ayuwegrad?

⁹ Nap’an ni i yan piyu Israel u daken e ted “nib ga’ yang” u lan 40 e duw, ma de weliy Jehovah ngorad u m’on riy rogon nra pow’iyrad ma be ayuwegrad. Yugu aram rogon, ma ke dag ngorad nrayog ni nge pagan’rad ngak nge pi fonow rok. Ra rran me fanay Jehovah bangi manileng me nep’ me fanay e nifiy ni nge pow’iyrad, ma re n’ey e i puguran ngak piyu Israel nra i ayuwegrad u nap’an ni be pow’iyrad ko milekag ni yad be tay. (Deut. 1:​19; Ex. 40:​36-​38) Ku i pi’ e tin nib t’uf rorad. I “par e mad rorad ni de wod, ma rifrif u ayrad e de thow nge amith.” Arrogon, ‘urngin ban’en ni . . . i pi’ ngorad.’​​—Neh. 9:​19-​21.

10. Uw rogon ni be pow’iy Jehovah e girdi’ rok e ngiyal’ ney?

¹⁰ Pi tapigpig rok Got e ngiyal’ ney e ke chugur ni ngar tawgad nga lan e bin beech e fayleng. Ere gur, be pagan’dad ngak Jehovah nrayog ni nge pi’ e tin nib t’uf rodad ya nge yag nda mageygad ni gad ba fas u tomuren fare “gafgow” nib ga’? (Matt. 24:21, 22; Ps. 119:40, 41) Riyul’ ndawori pi’ Jehovah e manileng ara nifiy ni nge pow’iydad nga lan fare fayleng nib beech. Machane, be fanay e ulung rok ni nge ayuwegdad ni ngad pared nib gel e michan’ rodad. Bod ni yibe pi’ e athamgil nga lanin’dad ni ngaud beeged e Bible ni gubin e rran, ma gad be tay e Fol Bible ni Tabinaw, ma gad be un ko muulung nge machib ni gubin ngiyal’. Ere, gad be guy rogon ni ngad folgad ko pi fonow ney, fa? Faan gad ra rin’ ni aray rogon ma rayog ni nge par e michan’ rodad nib gel me ayuwegdad ni ngad thapgad nga lan e bin nib beech e fayleng.

11. Mang boch e kanawo’ ni be m’ug riy ni ma lemnagdad Got?

¹¹ Pi fonow ni yima pi’ ngodad e gathi kemus ni ma gelnag e michan’ rodad, ya ku ma ayuwegdad ko pi n’en ni gad ma rin’ ni gubin e rran. Boch ko pi fonow ney e ba muun ngay rogon ni nge puluw rogon ni gad ma lemnag murung’agen e chugum, nge rogon ni ngad lichnaged pa’ nga puluwdad ya nge war e magafan’ rodad. Ku yima fonownagdad u rogon e munmad rodad, nge rogon ni gad ma fal’eg yaadad, nge rogon ni gad ma mel’eg e pi n’en ni yima chuweg e chalban ngay, nge rogon ni ngad mel’eged tolngin e skul ni ngad uned ngay. Kum lemnag e pi n’en ni yima puguran ngodad nra ayuweg e tabinaw nge karrow rodad, nge Kingdom Hall rodad ni nge par ndariy e riya’ riy, nge rogon ni ngad fal’eged rogodad u m’on ni nge buch ban’en nib tomgin. Pi fonow ney e be m’ug riy ni ma lemnagdad Got.

12. (a) Mang e boor yay ni i sul Jesus u daken nga i weliy ngak pi gachalpen? (b) Mang e n’en ni buch nde chuw u wan’ Peter, ma mang angin ngodad?

¹² Nap’an e bin som’on e chibog ma gubin ngiyal’ ni i puguran Got boch ban’en ko pi tapigpig rok. Boor yay ni i yog Jesus ngak pi gachalpen feni ga’ fan ni ngaur daged e sobut’an’. Machane, gathi kemus ni i weliy ngorad murung’agen e sobut’an’ ya ki dag ko ngongol rok. Nap’an e bin tomur e rran ko yafas rok Jesus u fayleng, me kunuy pi gachalpen nga taabang ni ngar madnomnaged fare Paluk’af. Ma nap’an ni yad be abich, me sak’iy Jesus nge lukuy ayrad. Re n’ey ni rin’ e aram e maruwel ko tapigpig u lan e tabinaw. (John 13:1-17) Bay ban’en ni kar filed ko n’en ni rin’ Jesus. Sogonap’an 30 e  duw nga tomuren, me apostal Peter ni ir bagayad e piin ni immoy u nap’an e re abich nem e pi’ e fonow ngak e piin taareb e michan’ rorad u murung’agen e sobut’an’. (1 Pet. 5:5) N’en ni rin’ Jesus e ra pi’ e athamgil nga lanin’dad ni nga i bagadad me ngongol ngak bagadad u fithik’ e sobut’an’.​—Fil. 2:5-8.

13. Mang e re fel’ngin ni i puguran Jesus ngak pi gachalpen ni ngar maruweliyed?

¹³ Reb e ban’en ni boor yay ni i weliy Jesus murung’agen ngak pi gachalpen e rogon ni nge gel e michan’ rorad. Tomuren nde yag rorad ni ngar tulufed e moonyan’ ni ke yib i ying ngak bochi pagel, me fith pi gachalpen Jesus ni lungurad: “Mang nde yog romad ni nggu tulufed fare moonyan’ nge chuw u fithik’ facha’?” Me fulweg ni gaar: “Bochan e de gaman e michan’ romed ngak Got. Mu ted fanmed i yan ko re bugithin ni baaray! Faanra ba’ e michan’ romed ngak Got ni bod mam’ungun ba awochngin e mustard, . . . Ma demtrug ban’en ma rayog romed!” (Matt. 17:14-20) N’umngin nap’an ni i machib Jesus me fil ngak pi gachalpen feni ga’ fan ni nge michan’rad. (Mu beeg e Matthew 21:18-22.) Ere gur, gad be maruwel ko pi n’en ni kan pi’ ngodad nrayog ni nge gelnag e michan’ rodad ni bod e pi convention rodad, nge assembly, nge pi muulung ko Kristiano? Gathi kemus ni gad ma un ko pi muulung ney ni bochan e ngad felfelan’gad u taabang, ya ku aram e ngiyal’ ni gad ma dag ni be pagan’dad ngak Jehovah.

14. Mang nib ga’ fan ni ngad maruweliyed ni nge yag ngodad e t’ufeg ni i dag Kristus?

¹⁴ Boor yay ni kan puguran ngodad u lan e Pi Babyor ko Bible nni Yoloy Som’on ni Thin ni Greek ni nge bagadad mi i t’ufeg bagadad. I yog Jesus ni bin migid e motochiyel ni kub ga’ fan e aram e “thingari t’uf rom e en ni ir e mmigid ngom ni gowe gur.” (Matt. 22:39) Ki yog James ni walagen Jesus ni t’ufeg e aram e “motochiyel rok fare gagiyeg nu tharmiy.” (Jas. 2:8) I yoloy apostal John ni gaar: “Gimed e pi tafager rog ni gimed ba t’uf rog, re motochiyel ney ni kug yoloy murung’agen ngomed e gathi bbeech; ya ka fare motochiyel ni kakrom ni ka fa binem ni immoy romed ko tabolngin.” (1 John 2:7, 8) Mang e be yip’ John fan u nap’an ni weliy murung’agen e bin “kakrom” e motochiyel? Be weliy murung’agen fare motochiyel ko t’ufeg. Re motochiyel nem e ke “kakrom” ni bochan e ke n’uw nap’an ni ke weliy Jesus murung’agen ni ir e immoy rorad aram ko “tabolngin.” Machane, kub “beech” ni bochan e ra boch nga tomuren ma bay boch ban’en nra buch nthingari dag pi gachalpen Jesus e t’ufeg riy ndariy e lem ni fel’ ngak riy. Ngiyal’ ney e gad ba felfelan’ ya yima fonownagdad u rogon ni nge dab ud rin’ed boch ban’en nra m’ug riy ni goo gadad e gad be lemnaged gadad, machane ngaud golgad ngodad.

15. Mang kenggin e maruwel ni i tay Jesus u fayleng?

 ¹⁵ Ma lemnag Jesus rarogon e girdi’. Ke m’ug e re n’ey u nap’an ni i golnag e m’ar ma be faseg e yam’. Machane, gathi ireray kenggin e maruwel rok Jesus. Machib ni i tay e kub ga’ e ayuw ni i pi’ ko girdi’. Ni uw rogon? Gad manang ni piin ni golnagrad Jesus nge piin ni fasegrad ko yam’ ko bin som’on e chibog e munmun mu kur pilibthir ngar m’ad, ma piin ni kar motoyilgad ko n’en ni i machibnag e ke yag e athap ko yafas ndariy n’umngin nap’an ngorad.​—John 11:25, 26.

16. Uw rogon ni be fol e Pi Mich Rok Jehovah ko n’en ni tay Jesus chilen ni aram e ngan pingeg boch e girdi’ ngar manged pi gachalpen e ngiyal’ ney?

¹⁶ Fare maruwel ko machib ni tababnag Jesus u nap’an e bin som’on e chibog e yibe rin’ e chiney, machane ke ga’ yang e gin ni yibe rin’ riy ma ke yoor e girdi’ ni yibe machibnagrad. Arrogon, i tay Jesus chilen ngak pi gachalpen ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg.” (Matt. 28:19) Aram rogon e n’en ni kar rin’ed, maku er rogodad. Ba pag medlip e milyon e Pi Mich Rok Jehovah ni yad be machibnag murung’agen Gil’ilungun Got u boor ko 230 e nam, maku yad be fil e Bible ngak bokum milyon e girdi’. Re maruwel ney ko machib e be micheg ni gad be par ko tin tomuren e rran.

17. Mang fonow e pi’ Paul nge Peter?

¹⁷ Ba tamilang ni pi puguran rok Got e aram e n’en ni ayuweg e pi Kristiano kakrom ni ngar pared nib gel e michan’ rorad. Am lemnag e athamgil ni ke pi’ apostal Paul nga laniyan’ Timothy u nap’an ni immoy Paul u Roma nib kalbus. I yog ngak ni gaar: “Dab mpag fapi thin nib riyul’ ni kug fil ngom.” (2 Tim. 1:13) Tomuren ni pi’ apostal Peter e athamgil nga laniyan’ e pi Kristiano ni ngar maruweliyed e pi fel’ngin ni bod rogon e k’adan’, nge t’ufeg u thilin e walag, nge t’ar laniyan’, me yog ni gaar: “Gubin ngiyal’ ni bay ug puguran ngomed e pi n’ey, ni yugu aram rogon ni kam nanged ma kam pired ni gimed mmudugil u fithik’ e tin ni ir e ba riyul’ ni kam nanged.”​—2 Pet. 1:5-8, 12.

18. Uw rogon u wan’ e pi Kristiano ko bin som’on e chibog e pi puguran rok Got?

¹⁸ Arrogon, pi babyor ni yoloy Paul nge Peter e bay riy “fapi thin ni i yog fapi profet ni kakrom ni yad ba thothup.” (2 Pet. 3:2) Ere, gur ke darifannag e pi walag ko bin som’on e chibog e pi fonow ney? Danga’, ya aram kanawoen ni i dag Got e t’ufeg ngorad, me ayuwegrad ni ngar nanged e ‘Somol rorad i Jesus Kristus ni ir e ke thapegrad ngak Got mi i ayuwegrad nguur m’onoggad i yan ma yad be nang i yan.’​—2 Pet. 3:18.

19, 20. Mang fan nsusun ni nge pagan’dad ko pi puguran rok Jehovah, ma mang angin nra yib ngodad?

¹⁹ Ngiyal’ ney, e boor fan ni nge pagan’dad ko pi n’en ni be puguran Jehovah ngodad u lan e Thin rok, ni aram e Bible. (Mu beeg e Joshua 23:14.) Rayog ni ngad beeged riy rogon ni i ngongol Got ngak e girdi’ ndawor ra flontgad u lan bokum biyu’ e duw. Kan yoloy murung’agen e pi n’ey ya nge ayuwegdad. (Rom. 15:4; 1 Kor. 10:11) Kad guyed rogon ni ke lebug e pi yiiy u lan e Bible. Rayog ni ngan taareb rogonnag e yiiy nga boch ban’en ni yima puguran u m’on ni nge buch. Bod ni bokum milyon e girdi’ ni kar bad ko bin riyul’ e liyor ni bod rogon ni kan yiiynag nra buch u nap’an e “tin ni bay yib e rran.” (Isa. 2:2, 3) Rarogon e re fayleng ney ni be gel e kireb riy e ku be lebguy e pi yiiy u lan e Bible. Ma kud weliyed faram ni rogon e machib ni yibe tay u ga’ngin yang e fayleng e ngiyal’ ney e ku be lebguy e thin rok Jesus.​—Matt. 24:14.

²⁰ En Ke Sunmiydad e boor ban’en ni ke rin’ ni be micheg nrayog ni nge pagan’dad ngak. Be yib angin e pi n’ey ngodad, fa? Ba t’uf ni nge michan’dad ko pi n’en ni be puguran ngodad. Ireray e n’en ni rin’ Rosellen. I yog ni gaar: “Nap’an ni ke pagan’ug ngak Jehovah, ma aram mug guy rogon ni be t’ufegeg ma be ayuwegeg.” Ere, ku er rogodad ni faanra ud folgad ko pi n’en ni be puguran Jehovah ngodad ma rayog ni nga i yib angin ngodad.