1. (a) I yo mapat pat mene ma dano gijolo kwede lok me poyo wic, ki dok pingo? (b) Cwiny me awaka twero weko ngat moni neno tira nining?

 DANO gijolo tira i yo mapat pat. Lok me poyo wic mua ki bot ngat ma tye ki twero kiromo jolone maber, ento ka lawotwa nyo ngat ma tye i te locwa ominiwa tira kitwero kwerone woko lajwac. Kit ma wawinyo kwede ki i cwinywa i nge nongo pwod nyo tira bene pe rom. Ngat moni twero bedo ki cwercwiny, turcwiny, nyo lewic ento ki bot jo mukene, tira cuko cwinygi dok minigi gen me timo jami mabeco. Pingo apokapoka man tye? Tyen lok acel aye obedo cwiny me awaka. Ki lok ada, cwiny me awaka weko ngat moni bedo ki niango manok, ma weko en kwero tira dok keng pwony ma pire tek.​—Car. 16:18.

2. Pingo Lukricitayo me ada gijolo tira ma a ki i Lok pa Lubanga?

² Ki tungcel, Lukricitayo me ada gijolo tira tutwalle ka jenge i Lok pa Lubanga. Lok me poyo wic ma a ki bot Jehovah miniwa niango matut, pwonyowa dok konyowa me gwokke ki i peko me yenyo jami me kom, tim tarwang, ki dong tic ki yadi nyo makato kongo i yo maraco. (Car. 20:1; 2 Kor. 7:1; 1 Tec. 4:3-5; 1 Tem. 6:6-11) Ento, wabedo ki “yomcwiny” ma bino macalo adwogi me lubo lok me poyo wic ma a ki bot Lubanga.​—Ic. 65:14.

3. Cwiny ango ma laco jabuli obedo kwede ma myero wanen ni walubu?

³ Me gwoko wat ma pire tek ma watye kwede ki Wonwa me polo, omyero wamedde ki lubo pwony me ryeko ma a ki bot Jehovah. Pud dong ber adada me nyuto cwiny ma laco jabuli obedo kwede, ma ocoyo ni: ‘Lok me poyo wic ma a ki boti aye ginaleyana ma ri nakanaka; ada, gin aye gimiyo abedo ki  yomcwiny.’ (Jab. 119:111) Tika wan bene wabedo ki yomcwiny me lubo cik pa Jehovah, nyo kece i kine mukene wanongo lubone tek? Kadi bed kicel kicel wanongo jolo tira ma kiminiwa tek, omyero pe wawek cwinywa otur. Watwero dongo genwa matek liking i kom ryeko ma lamal ma Lubanga tye kwede! Kong wanenu yo adek ma waromo timone kwede.

4. Gin ango ma pe olokke ki i kwo pa Daudi?

⁴ Kadi bed ni i kine mogo Kabaka Daudi obedo ki kwo mayot nyo matek, ento gin acel ma pe olokke ki bote aye genne i kom Lacwecce. En owacci: “Atingo kwona amiyo boti, ai Rwot [Jehovah]. Ageno in, ai Lubangana.” (Jab. 25:1, 2) Ngo ma okonyo Daudi me dongo gen ma kit meno i kom Wonne me polo?

5, 6. Gin ango ma Baibul wacciwa ma lubbe ki wat ma obedo i kin Daudi gin ki Jehovah?

⁵ Dano mapol gilego bot Lubanga ka ce peko odiyogi. Ket kong ni lawoti nyo watti mo loko kwedi keken ka en mito cente nyo kony ki boti. Lacen, iromo cako penye kekeni ka ce ada en mari. Ento, meno aye pe gin ma Daudi otimo. Pi kare me kwone, wat i kin en ki Jehovah onongo nyuto niyene kacel ki marre pi Lubangane​—kadi i kare ma kwo yot nyo tek.​—Jab. 40:8.

⁶ Nen kong kit ma Daudi opako dok omiyo kwede ki pwoc bot Jehovah: “Ai Rwot [Jehovah], in i Rwotwa, dit me nyingi nen i wi lobo ducu! Pak ma gikori kwede o malo i polo.” (Jab. 8:1) Tyeng man nyuto ka maleng wat macok ma onongo tye i kin Daudi gin ki Wonne me polo. Pwoc ma Daudi obedo kwede pi dit kacel ki deyo pa Lubanga omiyo en opako Jehovah “dyeceng jwi.”​—Jab. 35:28.

7. Adwogi maber ango ma wanongo ka wanyikke cok bot Lubanga i lega?

⁷ Calo Daudi, myero wabed ka lok ki Jehovah nino ducu wek wadong genwa i kome. Baibul wacci: “Wunyik cok bot Lubanga, ci en bene binyiko cok botwu.” (Yak. 4:8) Nyikke cok bot Lubanga i lega tye yo acel ma pire tek ma wanongo ki cwiny maleng.​—Kwan 1 Jon 3:22.

8. Pingo omyero wagwokke pe wabed ka nwoyo lega?

⁸ Ka ce itye ka lega, tika ibedo ka nwoyo en lok acel moni-ni nyo itiyo ki dul lok moni-ni teretere? Ka tye kumeno, ci dong ma pud peya ilego, cwal kare manok me lwodo lok i kom gin ma ibilego pire-ni. Ka ce wabedo ka nwoyo lok acel cawa weng ka teke watye ka lok ki laremwa nyo watwa mo, tika cwinye bedo yom? En twero cako poro bedo odinga. Ki lok ada, Jehovah pe twero kwero winyo lega pa laticce ma lagen ka ce olege ki cwinye ducu. Ento omyero pe walok odok kitwa me bedo ka nwoyo en gin acel-li ka watye ka lok kwede.

9, 10. (a) Jami macalo mene ma waromo lega pigi? (b) Ngo ma romo konyowa me lega bot Jehovah ki cwinywa ducu?

⁹ Ngene kene ni, omyero pe waleg wiye wiye ka wamito ni Lubanga owiny legawa. Ka walego bot Jehovah ki cwinywa ducu, ci wanyikke cok bote dok waketo genwa i kome. Ento, jami mene ma myero waleg pigi? Lok pa Lubanga miyo lagamme ni: “I lok ducu wumi Lubanga onge gin ma wumito i lega ki i bako dogwu kacel ki miyo pwoc bene.” (Pil. 4:6) Lok ada tye ni, gin mo keken ma gudo watwa ki Lubanga nyo kwowa macalo luticce obedo gin ma myero waleg pire.

¹⁰ Wanongo pwony ka watamo i kom co kacel ki mon ma lugen ma kicoyo legagi i Baibul. (1 Cam. 1:10, 11; Tic 4:24-31) Jabuli opong ki lega kacel ki wer  ma kiwero bot Jehovah. Peko kacel ki yomcwiny ma dano tye kwede kicoyo i lega ki dong wer magi. Kwano lega kacel ki wer pa jo magi ma lugen-ni romo konyowa me lega ki cwinywa ducu bot Jehovah.

11. Pingo omyero walwod lok i kom cik pa Lubanga?

¹¹ Daudi owaco ni: “Gin ma Rwot [Jehovah] ociko tye me ada, miyo ryeko bot luming.” (Jab. 19:7) Ada, kadi bed wan luming, watwero doko ryek ka walubo cik pa Lubanga. Ento mitte ni omyero walwod lok i kom tira mogo me Ginacoya wek wanong adwogi maber ki iye. Man kwako gwoko gennewa ka watye i lyeto i cukul nyo gang tic, ka watye ka lubo cik pa Lubanga ma lubbe ki remo, ka watye ka bedo ma pe wacwako tung ka mo keken, ki dong ka watye ka keto cik me Baibul i tic ka odok i lok me ruk ki kit ma wanen kwede. Ka waniang tam pa Lubanga i kom jami magi, man bikonyowa me yubbe pi pekki ma romo bino. Ci dong, waromo moko tamwa i kom gin ma myero watim ka ce wakemme ki jami ma waloko i komgi malo-ni. Ka watamo dok wayubbe con, ci man weko pe wabedo ki arem cwiny.​—Car. 15:28.

12. Bedo ka lwodo lok i kom jami mene ma bikonyowa wek wagwok cik pa Lubanga?

¹² Ka watye ka kuro kit ma Lubanga bicobo kwede cikkene, tika kit me kwowa nyuto ni watye ka bedo ma wangwa twolo i yo me cwiny? Me lapore, tika ada waye ni Babilon Madit kibijwerone woko cokcok-ki? Tika genwa i kom mot me kwo ma pe tum kacel ki mukene ma bibedo i paradic pud tek i kare-ni rom aroma ki i kare ma onongo wapwonyo lok me ada apwonya-ni? Tika pud watiyo ticwa me pwony-nyi ki mit kom ma ka keto mitiwa kekenwa bedo mukwongo i kwowa? Tika pud waneno gen me nicer, lonyo nying Jehovah, kacel ki nyuto twero me loc ma Jehovah tye kwede calo jami ma pigi tego botwa? Lwodo lok i kom lapeny magi romo konyowa me gwoko ‘lok me poyo wic ma Lubanga miniwa macalo ginaleyawa ma ri nakanaka.’​—Jab. 119:111.

13. Pingo Lukricitayo me cencwari me acel gunongo niang jami mogo tek? Mi labol acel.

¹³ Ka watye ka kuro kit ma Lubanga bicobo kwede cikkene, tika kit me kwowa nyuto ni watye ka bedo ma wangwa twolo i yo me cwiny? Yecu obedo ka nwoyone teretere bot lupwonnyene ni mitte ni omyero ecir can madwong ka dong kineke. (Kwan Matayo 12:40; 16:21.) Ento lupwonnyene pe guniang lok meno. Gin guniang lacen i kare ma en oto, ocer, ka dok onen bot lupwonnyene mapol, dok ‘oyabo tamgi wek guniang ginacoya.’ (Luka 24:44-46; Tic 1:3) I yo acel-lu bene, lulub kor Kricito gucako niang ni kibiketo Ker pa Lubanga i polo i kare ma cwiny maleng obino i komgi i Pentekote mwaka 33.​—Tic 1:6-8.

14. I karewa ni, lanen maber ango ma omegiwa guweko kadi bed ni gubedo ki niango manok ma lubbe ki kare me agikki?

¹⁴ I yo acel-lu bene, i karewa ni Lukricitayo me ada gubedo ki gen ma pe opore ma lubbe ki “kare me agikki.” (2 Tem. 3:1) Me lapore, i mwaka 1914, jo mogo gutamo ni onongo dong gicok cito i polo. I kare ma pe gucito, kwano Ginacoya i yo matut okonyogi me niang ni gin ma pire tek ma pud tye anyim aye tic me tito kwena. (Mar. 13:10) Pi meno, i 1922, J. F. Rutherford, ma onongo tye ka telo wi tic me tito kwena-ni owaco  bot lwak ma gubedo tye i gure madit ma kwako lobbe ducu i Cedar Point, Ohio, i lobo Amerika ni: “Wunen Kabaka dong tye ka loc! Wun aye luwange. Pi meno wutit, wutit, wutit pi Kabaka ki pi Ker-re.” Cakke i kare meno nio wa tin, tito pi “kwena maber me ker pa Lubanga” tye gin ma pire tek ma nyuto lutic pa Jehovah i kare-ni.​—Mat. 4:23; 24:14.

15. Adwogi maber ango ma wanongo ka walwodo lok i kom kit ma Lubanga otero kwede ki jone?

¹⁵ Ka walwodo lok i kom yo mamwonya ma Jehovah otero kwede ki jone i kare mukato angec ki dong i kare-ni, man miyo wabedo ki gen madit ni en bicobo mitine kacel ki yubbe pi anyim. Ki tungcel bene, lok me poyo wic ma a ki bot Lubanga konyowa wek lok pa lunebi ma watye ka kuro cobbegi-ni gubed i wiwa ki dong cwinywa. Ka watimo kumeno, ci bikonyowa me bedo ki gen i kom cikkene.

16. Mot macalo mene ma wanongo ka ce watiyo matek i ticwa me pwony?

¹⁶ Lubangawa Jehovah tek dok en cobo ticce. Laco jabuli openyo ni: “Anga ma tek calo in?” En omedo ni: “Tekki dwong, cingi ma lacuc oille malo.” (Jab. 89:8, 13) Ma lubbe ki lok meno, Jehovah pwoyo dok goyo laa i komwa ka watute me tito pi Kerre. En neno ni luticce gitiyo matek pien pe gubedo ‘luwackom,’ kadi bed co ki mon, lutino nyo ludito. (Car. 31:27) Me nyuto ni walubo lanen pa Lacwecwa, omyero wati matek i ticwa me pwony. Tic pi Lubanga ki cwinywa ducu keliwa adwogi maber, dok bene yomo cwiny Jehovah ma weko en goyo laane i kom ticwa me pwony.​—Kwan Jabuli 62:12.

17, 18. Pingo watwero wacci tic ma nyuto niye dongo genwa i kom tira pa Jehovah? Mi labol acel.

 ¹⁷ I yo ango ma tic ma nyuto niye dongo kwede genwa i kom Jehovah? Tam kong i kom gin ma Ginacoya waco i kare ma peya Luicrael gudonyo i Lobo ma Kiciko pire. Jehovah onongo ociko lulamdog ma gutingo canduk me gicikke me donyo i Kulu Jordan. Ento, i kare ma lwak gicok o, gin guneno kit ma kot omiyo kulu opong kwede. Luicrael onongo gubitimo gin ango? Tika onongo gubibedo i dog kulu kun gikuro pi cabit mapol nyo pi kare malac wang ma pii odok piny? Pe, gin guketo gengi ducu i kom Jehovah dok gulubo tirane. Adwogine obedo ningo? Baibul wacciwa ni: “Ka dong ajwagi [lulamdog] ma gutingo canduk me gicikke-ni guo i Jordan, guluto tyengi i pii ma i doge-ni, ci pii ma mol ma a ki tung malo-ni ogut ocung woko, . . . i kare ma jo Icrael ducu gimol gikato ki i lobo mutwo-ni, onongo ajwagi ma gitingo canduk me gicikke pa Rwot-ti gucung i dye Jordan, nio ka rok ducu otyeko kato loka Jordan.” (Yoc. 3:12-17) Go kong kit ma cwinygi obedo yom kwede me neno kit ma pii ma onongo tye ka mol ocung kwede! Ki lok ada, niye pa Luicrael i kom Jehovah ojing pien onongo gigeno tirane.

¹⁸ Ada, Jehovah pe timo tango ma kit meno bot jone i kare-ni, ento goyo laa i kom tic ma nyuto niyegi. Cwiny maleng ma Lubanga miyo minigi teko me tito kwena me Ker-ri i twok lobo lung. Dok Kricito Yecu, ma en aye Lacaden ma pire tek loyo pa Jehovah-ni, ociko lupwonnyene ni ebibedo kwedgi i tic man ma pire tek-ki kun waco ni: “Pi meno dong wuciti wucilok jo me rok ducu gudok jo ma luba . . . atye kwedwu kare ducu, nio i agikki piny.” (Mat. 28:19, 20) Lucaden mapol ma onongo lewic makogi nyo gilwor giromo mokone ni cwiny pa Lubanga ominigi tekcwiny me tito kwena bot dano i ticwa me pwony.​—Kwan Jabuli 119:46; 2 Jo Korint 4:7.

19. Kadi bed watye ki goro, gen ango ma watye kwede?

¹⁹ Omege ki lumege mogo gitye ki goro pienni komgi lit nyo guti woko. Ento, giromo bedo ki gen ni “Won ma lakica, Lubanga ma kweyo cwiny dano ducu” niang kit kwo ma Lakricitayo acel acel tye ka wok ki i iye. (2 Kor. 1:3) En pwoyo jami ducu ma watimo i tito kwena me Ker-ri. Wan ducu myero wange ni niyewa i kom ginkok pa Kricito aye miyo wanongo larre kun watute ki kerowa ducu i ticwa me pwony.​—Ibru 10:39.

20, 21. I yo macalo mene ma waromo nyuto ni wageno Jehovah?

²⁰ Woro Jehovah kwako tic ki cawawa, kerowa, ki dong jamiwa ducu ma watye kwede i tiyo ticce. Ada, wamito ni wati ki cwinywa ducu “tic me tito lok me kwena maber.” (2 Tem. 4:5) Lok ada tye ni cwinywa yom me timo meno, pien konyo jo mukene wek “gunge lok me ada.” (1 Tem. 2:4) Ada, keto deyo i kom Jehovah ki pako en weko walony i yo me cwiny. (Car. 10:22) Dok bene konyowa me keto genwa ducu i kom Lacwecwa.​—Rom. 8:35-39.

²¹ Kit ma dong wanyamo kwede, keto gen i kom Jehovah wek wanong tira me ryeko ma en miyo pe bino pire kene; omyero wati matek me dongone. Pi meno, jenge i kom Jehovah kun ilego bote. Lwod lok i kom kit ma Jehovah ocobo cikkene kwede i kare mukato angec ki kit ma en bitimo i anyim. Dok bene medde ki dongo genni i kom Jehovah kun iwore. Cik pa Jehovah birii nakanaka kadiwa in bene.