1. (a) Kɛ nihi peeɔ a ní ngɛ ga womi he ha kɛɛ, nɛ mɛni heje? (b) Ke a wo he nɔ wolɔ ga a, kɛ e peeɔ e ní ha kɛɛ?

E SLO bɔnɛ nɔ tsuaa nɔ peeɔ e ní ngɛ ga womi he ha. Kaa nɔ hyɛmi nɔ́ ɔ, eko ɔ, ke nɔ ko nɛ hɛɛ blɔ nya wo nihi ga a, ni komɛ maa kplɛɛ nɔ, se ke a juamibi aloo nɔ ko nɛ ngɛ a sisi wo mɛ ga a, a be nɔ kplɛɛe. Ni komɛ ngɛ nɛ ke a tsɔse mɛ ɔ, e dɔɔ mɛ, a haoɔ, nɛ zo gbeɔ mɛ. Se ni komɛ lɛɛ ke a tsɔse mɛ ɔ, a bua jɔɔ he, nɛ a suɔ kaa a maa pee tsakemihi ngɛ a si himi mi. Mɛni heje nɛ e slo bɔnɛ nɔ tsuaa nɔ peeɔ e ní ngɛ ga womi he ha a? He nɔ womi ji nɔ́ kake nɛ ha nɛ nihi peeɔ jã. Ke a wo he nɔ wolɔ ga a, e kplɛɛ we nɔ konɛ e ná he se.—Abɛ 16:18.

2. Mɛni heje nɛ anɔkuale Kristofoli a bua jɔɔ ga womi nɛ jeɔ Mawu Munyu ɔ mi ɔ he ɔ?

² Se anɔkuale Kristofoli lɛɛ, a pee we a ní jã. A bua jɔɔ ga womi he, titli ɔ, ke ga womi ɔ je Mawu Munyu ɔ mi. Yehowa mlaa amɛ yeɔ bua wɔ nɛ wa leɔ oslaahi nɛ e sa kaa waa yu wa he ngɛ a he. Kaa nɔ hyɛmi nɔ́ ɔ, e mlaa amɛ yeɔ bua wɔ nɛ wa yuɔ wa he ngɛ ní komɛ nɛ ma nyɛ maa ye wɔ awi kaa helo nya níhi a se dimi, ajuama bɔmi ní peepeehi, tsopa yaya kɛ nítsumihi, kɛ dã demi he. (Abɛ 20:1; 2 Kor. 7:1; 1 Tes. 4:3-5; 1 Tim. 6:6-11) Jehanɛ se hu ɔ, ke wa ye Yehowa mlaa amɛ a nɔ ɔ, ‘wa bua jɔɔ wa he.’—Yes. 65:14.

3. Mɛni su nɛ e sa kaa waa kase ngɛ la polɔ ɔ he?

³ Loko wa ma nyɛ ma ha nɛ huɛ bɔmi kpakpa nɛ ngɛ waa kɛ wa hiɔwe Tsɛ ɔ wa kpɛti ɔ maa hi si daa a, e sa nɛ waa ya nɔ nɛ waa kɛ ga womi kpakpa nɛ Yehowa kɛ haa wɔ ɔ nɛ tsu ní ngɛ wa si himi mi. E sa nɛ waa kase su nɛ la polɔ ɔ je kpo ɔ. E ngma ke: “O mlaa amɛ ji ye weto ní kɛ yaa neneene. O mlaa amɛ haa ye tsui nɔɔ ye mi fuaa.” (La 119:111) Anɛ wɔ hu wa bua jɔɔ Yehowa mlaa amɛ a he, aloo wa nuɔ he kaa a ji tlomi kɛ ha wɔ? Ke be komɛ po e yee ha wɔ kaa wa maa kplɛɛ  ga womi nɔ ɔ, e sɛ nɛ wa kɔni mi nɛ jɔ. Wa ma nyɛ ma ná hɛ kɛ nɔ fɔmi nɛ mi wa kaa Mawu ji ní lelɔ nɛ pe kulaa! Nyɛ ha nɛ wa susu blɔ etɛ nɛ wa maa gu nɔ kɛ pee enɛ ɔ a he nɛ waa hyɛ.

4. Mɛni David ya nɔ nɛ e pee?

⁴ Matsɛ David kɛ si himi kpakpa kɛ si himi yaya tsuo kpe, se e ya nɔ nɛ e kɛ e hɛ fɔ e Bɔlɔ ɔ nɔ. E de ke: ‘Yehowa, mo lɛ i ngɛ kue fae kɛ ngɛ hae. Ye Mawu, i ngɔ ye hɛ kɛ fɔ o nɔ.’ (La 25:1, 2) Mɛni ye bua David nɛ e kɛ e hɛ fɔ e hiɔwe Tsɛ ɔ nɔ jã a?

5, 6. Mɛni Mawu Munyu ɔ deɔ wɔ ngɛ huɛ bɔmi nɛ hi David kɛ Yehowa a kpɛti ɔ he?

⁵ Nihi fuu ngɛ nɛ ja a kɛ haomi kpe loko a sɔleɔ kɛ haa Mawu. Moo ngɔ lɛ kaa o ngɛ huɛ ko nɛ ke e ngɛ sika hlae ngɛ o dɛ aloo e ngɛ hlae nɛ o pee nɔ́ ko ha lɛ pɛ loko e kɛ mo sɛɛɔ ní. Kɛ o maa bu o huɛ nɛ ɔ ha kɛɛ? Eko ɔ, kɛ yaa kɛ yaa a, o ma bi o he ke, ‘Anɛ ye huɛ nɛ ɔ suɔmi niinɛ lo?’ David pee we e ní jã. Ngɛ si himi kpakpahi kɛ si himi yayahi tsuo nɛ David kɛ kpe ɔ mi ɔ, huɛ bɔmi kpakpa nɛ e ha nɛ e hi e kɛ Yehowa a kpɛti ɔ, tsɔɔ kaa e ngɛ hemi kɛ yemi ngɛ Yehowa mi nɛ e suɔ lɛ.—La 40:8.

⁶ Mo kadi bɔnɛ David je Yehowa yi nɛ e na lɛ si ha a. E de ke: ‘Yehowa, wa Nyɔmtsɛ! Hyɛ kaa o biɛ pɛɛ ngɛ je ɔ mi tsuo, nɛ a woɔ o hɛ mi nyami ngɛ hiɔwe lokoo!’ (La 8:1) Anɛ o nɛ kaa munyu nɛ David tu ɔ tsɔɔ kaa huɛ bɔmi gbagbanii hi e kɛ e hiɔwe Tsɛ ɔ a kpɛti lo? David bua jɔ Mawu we agbo jemi kɛ e hɛ mi nyami ɔ he wawɛɛ, enɛ ɔ he ɔ, e jeɔ Yehowa yi “daa.”—La 35:28.

7. Ke wa sɔleɔ kɛ haa Mawu ɔ, mɛni se wa ma ná?

⁷ E sa nɛ waa sɔle ha Yehowa daa konɛ hɛ kɛ nɔ fɔmi nɛ wa ngɛ ngɛ e mi ɔ mi nɛ wa kaa bɔnɛ David pee ɔ. Baiblo ɔ de ke: “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.” (Yak. 4:8) Ke wa sɔleɔ kɛ haa Mawu ɔ, lɔɔ maa ye bua wɔ nɛ huɛ bɔmi gbagbanii maa hi waa kɛ lɛ wa kpɛti. Lɔɔ hu ji nɔ́ titli nɛ ma ha nɛ wa ná mumi klɔuklɔu ɔ.—Kane 1 Yohane 3:22.

8. Mɛni heje nɛ ke wa ngɛ sɔlee ɔ, e sɛ nɛ waa tĩ munyu kake pɛ mi be tsuaa be ɔ?

⁸ Be tsuaa be ke o ngɛ sɔlee ɔ, anɛ o tĩɔ munyu kake pɛ mi lo? Ke o peeɔ jã a, lɛɛ loko o maa sɔle ɔ, moo sɛ hlami nɛ o ngɔ be kpiti ko kɛ susu níhi nɛ o ma de ɔ he. Ke waa kɛ wa huɛ ko loo wa wekuno ko sɛɛɔ ní, nɛ be tsuaa be ɔ, munyu kake too ɔ mi nɛ wa tĩɔ ɔ, anɛ nɔ ɔ bua maa jɔ wa ní sɛɛmi ɔ he lo? Eko ɔ, nɔ ɔ be wɔ tue bue hu. Ngɛ anɔkuale mi ɔ, Yehowa buɔ sɔlemi tsuo nɛ e sɔmɔli anɔkualetsɛmɛ jeɔ a tsui mi kɛ sɔleɔ ɔ tue. Se kɛ̃ ɔ, ke wa ngɛ sɔlee ɔ, e sa nɛ waa bɔ mɔde kaa wa be munyu kake pɛ mi tĩe be tsuaa be.

9, 10. (a) Mɛni ji ní komɛ nɛ wa ma nyɛ maa sɔle ngɛ he? (b) Mɛni ma nyɛ maa ye bua wɔ konɛ waa je wa tsui mi kɛ sɔle?

⁹ E ngɛ heii kaa ke wa maa sɔle ɔ, e sɛ nɛ wa sɔlemi ɔ nɛ pee gbajaa kɛkɛ, mohu ɔ, e sa nɛ waa wo níhi pɔtɛɛ nɛ ngɛ wɔ hiae ɔ a ta. Ke wa jeɔ wa tsui mi nɛ wa sɔleɔ kɛ haa Yehowa a, lɔɔ ma ha nɛ wa maa hɛ wɔ kɛ su e he haa, nɛ hɛ kɛ nɔ fɔmi nɛ wa ngɛ ngɛ e mi ɔ hu mi maa wa. Se mɛni ji ní komɛ nɛ wa ma nyɛ maa sɔle ngɛ he? Mawu Munyu ɔ ha heto ke: “Nɔ́ tsuaa nɔ́ mi ɔ, nyɛɛ kɛ sɔlemi, kɛ pɛɛ kpami, kɛ sina nɛ wo nyɛ hiami ní ɔmɛ a ta ha Mawu.” (Filip. 4:6) Ngɛ anɔkuale mi ɔ, wa ma nyɛ maa sɔle ngɛ nɔ́ tsuaa nɔ́ nɛ ma nyɛ ma puɛ huɛ bɔmi nɛ ngɛ waa kɛ Mawu wa kpɛti, aloo nɔ́ tsuaa nɔ́ nɛ ma nyɛ maa sa wa wami he ɔ he.

¹⁰ Wa ma nyɛ maa kase ní kɛ je sɔlemihi nɛ nyumuhi kɛ yihi anɔkualetsɛmɛ nɛ a hi si blema a sɔle nɛ a ngma kɛ wo Baiblo ɔ mi ɔ mi. (1 Sam. 1:10, 11; Níts. 4:24-31) Kaa nɔ hyɛmi nɔ́ ɔ, a ngma sɔlemihi nɛ  nihi je a tsui mi nɛ a sɔle, kɛ lahi nɛ a la kɛ ha Yehowa a fuu ngɛ La womi ɔ mi. Nihi nɛ a hao wawɛɛ kɛ nihi nɛ a ná bua jɔmi tsuo a sɔlemihi kɛ a lahi piɛɛ he. Ke wa susu sɔlemi nɛ ɔmɛ a he ɔ, lɔɔ maa ye bua wɔ nɛ wa sɔlemi maa nu tso.

11. Mɛni heje nɛ e sa nɛ wa susu ga womi nɛ je Mawu ngɔ ɔ he ɔ?

¹¹ David de ke: ‘Yehowa mlaa a hi kɛ pi si; e haa nɔ náa he wami he. Yehowa mlaa a, anɔkuale sɔuu, e haa nɛ kuasia leɔ ní.’ (La 19:7) Ee, ke wa li nɔ́ ko po nɛ wa bu Mawu mlaa amɛ tue ɔ, e ma ha wa maa le ní. Ke wa suɔ nɛ waa ye anɔkuale ngɛ si himihi tsuo nɛ waa kɛ kpeɔ ɔ a mi ɔ, Ngmami ɔ mi ga womi komɛ ngɛ nɛ e sa nɛ wa susu he. Kaa nɔ hyɛmi nɔ́ ɔ, ke wa susu Baiblo sisi tomi mlaahi a he ɔ, e maa ye bua wɔ nɛ wa maa ye anɔkuale ke nihi nyɛ wa nɔ kaa waa pee nɔ́ ko nɛ e sɛ ngɛ sukuu loo nítsumi he. E ma nyɛ maa ye bua wɔ nɛ waa kɛ Mawu mlaa nɛ e wo kɛ kɔ muɔ, wa he nɛ e sa kaa waa yu ngɛ ma kudɔmi sanehi a he, wa he dlami kɛ tade womi he ɔ, nɛ tsu ní hulɔ. Ga womi nɛ ɔmɛ nɛ je Mawu ngɔ nɛ wa ma susu he ɔ, ma nyɛ maa ye bua wɔ konɛ wa dla wa he kɛ fɔ si loko si himi ko kaa jã nɛ ba ná wɔ. Ke wa pee jã a, lɔɔ ma ha nɛ wa maa le nɔ́ nɛ wa maa pee loko waa kɛ si himi kaa jã maa kpe. Enɛ ɔ maa ye bua wɔ konɛ wa ko pee nɔ́ ko nɛ ma nyɛ maa ye wɔ awi.—Abɛ 15:28.

12. Mɛni sane bimihi lɛ ke wa pue wa yi mi tɛ ngɛ a he ɔ, e maa ye bua wɔ nɛ waa ye Mawu mlaa amɛ a nɔ?

¹² Be mi nɛ wa ngɛ blɔ hyɛe kaa Mawu si womi ɔmɛ maa ba mi ɔ, anɛ waa kɛ wa ní peepee tsɔɔ kaa wa ngɛ hwɔɔe ngɛ mumi mi lo? Kaa nɔ hyɛmi nɔ́ ɔ, anɛ wa he ye niinɛ kaa e be kɛe kulaa nɛ a ma kpata Babilon Ngua a hɛ mi lo? Benɛ wa kase anɔkuale ɔ kekle ɔ, wa ná hemi kɛ yemi nɛ mi wa kaa hwɔɔ se ɔ, wa maa hi si kɛ ya neneene ngɛ paradeiso mi ngɛ zugba a nɔ. Amlɔ nɛ ɔ, anɛ wa hemi kɛ yemi ɔ mi wa kaa bɔnɛ e ngɛ kekle ɔ lo? Anɛ waa kɛ kã fiɛɛɔ kaa bɔnɛ wa peeɔ sa a, aloo waa kɛ wɔ nitsɛmɛ wa hiami níhi peeɔ nɔ́ titli ngɛ wa si himi mi lo? Nɛ hɛ kɛ nɔ fɔmi nɛ wa ngɛ kaa a ma tle gbogboehi a si ɔ hu nɛɛ? Nɛ Yehowa biɛ ɔ he nɛ a ma tsɔ, kɛ nguɔ nɛ a maa wo Yehowa kaa lɛ nɛ sa kaa e ye je ɔ nɔ ɔ hu nɛɛ? Anɛ loloolo ɔ, ní nɛ ɔmɛ a he hia wɔ lo? Ke wa pue wa yi mi tɛ ngɛ sane bimɛ nɛ ɔmɛ a he ɔ, e maa ye bua wɔ nɛ wa maa ngɔ Yehowa ‘mlaa amɛ kɛ pee wa weto ní kɛ ya neneene’ kaa bɔnɛ la polɔ ɔ pee ɔ.—La 119:111.

13. Mɛni heje nɛ Kristofoli nɛ a hi ngɛ kaseli ɔmɛ a be ɔ mi ɔ nui ní komɛ a sisi ɔ? Mo ha enɛ ɔ he nɔ hyɛmi nɔ́.

¹³ Ní komɛ ngɛ Baiblo ɔ mi nɛ wa nui sisi saminya, ejakaa e sui be nɛ Yehowa ma ha nɛ wa maa nu sisi lolo. Yesu de e bɔfo ɔmɛ si abɔ kaa e sa nɛ e na amanehlu nɛ a gbe lɛ. (Kane Mateo 12:40; 16:21.) Se e bɔfo ɔmɛ nui nɔ́ nɛ e de mɛ ɔ sisi. Benɛ Yesu gbo, nɛ a tle lɛ si, nɛ e je e he kpo kɛ tsɔɔ e bɔfo ɔmɛ kaa adesa, nɛ “e bli a juɛmi nya, konɛ a nu ngmami ɔmɛ a sisi” ɔ, loko a nu nɔ́ nɛ e de mɛ ɔ sisi. (Luka 24:44-46; Níts. 1:3) Jã nɔuu kɛ̃ nɛ benɛ mumi klɔuklɔu ɔ ba Kristo se nyɛɛli ɔmɛ a nɔ ngɛ Pentekoste jeha 33 M.B. ɔ, loko a nu sisi kaa Mawu Matsɛ Yemi ɔ maa ye nɔ kɛ je hiɔwe.—Níts. 1:6-8.

14. E ngɛ mi kaa nyɛmimɛ fuu nui ní komɛ nɛ kɔɔ nyagbe ligbi ɔmɛ a he ɔ sisi ngɛ jeha 1900 ɔ sisije ɔ mi mohu lɛɛ, se mɛni nɔ hyɛmi nɔ́ kpakpa nɛ a pee?

¹⁴ Jã kɛ̃ nɛ kɛ je jeha 1900 ɔ sisije ɔ, anɔkuale Kristofoli hyɛ blɔ kaa ní komɛ maa ba ngɛ “nyagbe ligbi ɔmɛ” a mi se e bɛ. (2 Tim. 3:1) Kaa nɔ hyɛmi nɔ́ ɔ, ngɛ jeha 1914 ɔ, nihi fuu susu kaa e be kɛe nɛ a maa ngɔ mɛ kɛ ho hiɔwe ya. Benɛ a hɛ kɛ nɔ fɔmi ɔ bɛ mi ɔ, a hyɛ Ngmami ɔ mi saminya nɛ a na kaa e sa nɛ a fiɛɛ wawɛɛ.  (Mar. 13:10) Enɛ ɔ he ɔ, ngɛ jeha 1922 ɔ mi ɔ, J. F. Rutherford, nɛ e da fiɛɛmi nítsumi ɔ nya jamɛ a be ɔ mi ɔ, de ngɛ mahi a kpɛti kpe ko nɛ a pee ngɛ Cedar Point, Ohio, U.S.A. ɔ sisi ke: “Nyɛɛ hyɛ, Matsɛ ɔ ngɛ nɔ yee! Nyɛ ji e gɔgɔ fiali. Enɛ ɔ he ɔ, nyɛɛ fia, nyɛɛ fia, nyɛɛ fia Matsɛ ɔ kɛ e matsɛ yemi ɔ he gɔgɔ.” Kɛ je jamɛ a be ɔ mi kɛ ma a, matsɛ yemi ɔ he sane kpakpa fiɛɛmi ɔ ji nítsumi titli nɛ Yehowa sɔmɔli nɛ a ngɛ mwɔnɛ ɔ ngɛ tsue.—Mat. 4:23; 24:14.

15. Mɛni se wa náa ke wa susu bɔnɛ Mawu kɛ e webi hiɔ si haa a he?

¹⁵ Ke wa susu bɔnɛ Yehowa gu nyakpɛ blɔ nɔ nɛ e kɛ e sɔmɔli nɛ a hi si blema a hi si ha, kɛ bɔnɛ e kɛ e sɔmɔli nɛ a ngɛ mwɔnɛ ɔ hu ngɛ ha a he ɔ, lɔɔ ma ha nɛ wa ma ná nɔ mi mami nɛ mi wa kaa e ngɛ nyɛmi nɛ e kɛ ma tsu e yi mi tomihi a he ní hwɔɔ se. Jã kɛ̃ nɛ Mawu mlaa amɛ yeɔ bua wɔ, nɛ sihi nɛ e wo nɛ wa ngɛ blɔ hyɛe kaa a maa ba mi ɔ hiɔ wa juɛmi kɛ wa tsui mi be tsuaa be. Wa ngɛ nɔ mi mami kaa jã nɛ wa maa pee ɔ ma ha nɛ wa ma ná hɛ kɛ nɔ fɔmi nɛ mi wa kaa e si womi ɔmɛ maa ba mi.

16. Mɛni jɔɔmihi wa náa ke waa kɛ kã tsu sɔmɔmi nítsumi ɔ?

¹⁶ Yehowa wa Mawu ɔ ngɛ he wami nɛ e peeɔ níhi. La polɔ ɔ de ke: ‘Mɛnɔ lɛ ngɛ he wami kaa mo Yehowa? He walɔ kpetekpleenyɛ ji mo; o he wami ɔ kle!’ (La 89:8, 13) Akɛnɛ Yehowa ngɛ he wami nɛ e peeɔ níhi heje ɔ, e bua jɔɔ mɔde nɛ wa bɔɔ ngɛ e sɔmɔmi mi ɔ he, nɛ e jɔɔ wɔ. E le kaa e sɔmɔli tsuo, yihi kɛ nyumuhi, nihewi kɛ yihewi, nimowi kɛ yimowi tsuo sume hejɔ. (Abɛ 31:27) Wɔ hu wa kaseɔ wa Bɔlɔ ɔ, enɛ ɔ he ɔ, waa kɛ kã tsuɔ Mawu jami mi nítsumihi. Ke wa je wa tsui  mi nɛ wa sɔmɔ Yehowa a, wa náa bua jɔmi nɛ Yehowa hu bua jɔɔ wa he.—Kane La 62:12.

17, 18. Mɛni heje nɛ ke waa kɛ wa hɛ fɔ Yehowa nɔ ɔ, lɔɔ maa wo wɔ he wami nɛ waa kɛ e blɔ tsɔɔmihi ma tsu ní ɔ? Mo ha enɛ ɔ he nɔ hyɛmi nɔ́.

¹⁷ Mɛni blɔ nɔ anɔkuale nɛ wa yeɔ ɔ haa nɛ hɛ kɛ nɔ fɔmi nɛ wa ngɛ ngɛ Yehowa mi ɔ mi waa ngɛ? Mo susu nɔ́ nɛ ba benɛ e piɛ bɔɔ nɛ Israelbi ɔmɛ maa su Si Womi Zugba a nɔ ɔ he nɛ o hyɛ. Yehowa de osɔfo ɔmɛ nɛ a hɛɛ somi daka a ke a nyɛɛ kɛ sɛ Yordan Pa a mi. Se benɛ ni ɔmɛ su pa a nya a, a na kaa hiɔmi nɛ, nɛ Yordan Pa a ywia nga. Kɛ Israelbi ɔmɛ maa pee a ní ha kɛɛ? Anɛ a maa to si ngɛ pa nya nɛ a maa mlɛ kɛ ya si benɛ pa a maa fã lo? Dɛbi, a ngɛ hɛ kɛ nɔ fɔmi nɛ mi wa ngɛ Yehowa mi, enɛ ɔ he ɔ, a nyɛɛ e blɔ tsɔɔmi ɔ se. Mɛni je mi kɛ ba? Ngmami ɔ de ke: ‘Benɛ osɔfo ɔmɛ nane ma nyu ɔ mi pɛ kɛkɛ nɛ nyu nɛ je yiti je ɔ bua e he nya da si. Osɔfo ɔmɛ nɛ tloo Yehowa somi daka a da si ngɛ Yordan ɔ kpɛti, ngɛ zugba gbigbli nɔ kɛ ya su benɛ Israel ma a tsuo nyɛɛ zugba gbigbli nɔ kɛ po Yordan pa a ta.’ (Yos. 3:12-17) Moo hyɛ bɔnɛ a bua maa jɔ ha benɛ a na kaa nyu babauu ɔ tsuo da si ɔ! Ngɛ anɔkuale mi ɔ, hemi kɛ yemi nɛ Israelbi ɔmɛ ngɛ ngɛ Yehowa mi ɔ mi wa akɛnɛ a ngɔ e blɔ tsɔɔmihi kɛ tsu ní ɔ heje.

¹⁸ E ngɛ mi kaa Yehowa pee we nyakpɛ níhi kɛ ha we e webi mwɔnɛ ɔ mohu lɛɛ, se ke a kɛ e blɔ tsɔɔmi tsu ní ɔ, e jɔɔ mɛ. Mawu mumi klɔuklɔu ɔ woɔ wɔ he wami nɛ wa fiɛɛɔ Matsɛ Yemi sɛ gbi ɔ ngɛ je kɛ wɛ. Nɛ Yesu Kristo nɛ ji Yehowa we Odasefono pe kulaa a wo e kaseli ɔmɛ si kaa e maa ye bua mɛ ngɛ nítsumi nɛ he hia nɛ ɔ mi. E de mɛ ke: ‘Nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli. Hyɛ, i kɛ nyɛ maa hi si daa kɛ yaa su je mi nyagbe.’ (Mat. 28:19, 20) Yehowa Odasefoli fuu nɛ be ko nɛ be ɔ, a gboɔ zo aloo a yeɔ gbeye ɔ, na kaa Mawu mumi klɔuklɔu yeɔ bua mɛ nɛ a nyɛɔ fiɛɛɔ kɛ tsɔɔ nihi po nɛ a li mɛ ngɛ fiɛɛmi tso mi.—Kane La 119:46; 2 Korintobi 4:7.

19. Ke gbɔjɔmi ko ha nɛ wa nyɛ we nɛ wa tsu babauu ngɛ Mawu sɔmɔmi ɔ mi po ɔ, mɛni nɔ mi mami wa ma nyɛ ma ná?

¹⁹ Nyɛmimɛ komɛ nyɛ we nɛ a tsu babauu ngɛ Mawu sɔmɔmi ɔ mi, ejakaa hiɔ aloo bwɔmi ngɛ nɔ́ dee ha mɛ. Se kɛ̃ ɔ, a ma nyɛ ma ná hɛ kɛ nɔ fɔmi kaa ‘Tsɛ mɔbɔ nalɔ ɔ, nɛ e ji Mawu nɛ woɔ nɔ bua ngɛ nɔ́ tsuaa nɔ́ mi’ ɔ, nuɔ a si himi ɔ sisi. (2 Kor. 1:3) Yehowa bua jɔɔ nɔ́ tsuaa nɔ́ nɛ wa peeɔ ngɛ e sɔmɔmi mi ɔ he. E he hia nɛ wɔ tsuo wa kai kaa loko a ma he wa yi wami ɔ, e sa nɛ wa ná Kristo kpɔmi nɔ́ ɔ mi hemi kɛ yemi.—Heb. 10:39.

20, 21. Mɛni blɔhi a nɔ wa guɔ kɛ tsɔɔ kaa wa ngɛ hɛ kɛ nɔ fɔmi ngɛ Yehowa mi?

²⁰ Jami nɛ waa kɛ haa Mawu ɔ biɔ nɛ waa ngɔ wa be, kɛ wa he wami, kɛ níhi nɛ wa ngɛ ɔ tsuo kɛ sɔmɔ lɛ. Ee, wa suɔ kaa ‘waa bɔ sane kpakpa a fiɛɛmi he mɔde wawɛɛ.’ (2 Tim. 4:5) Niinɛ, ke wa pee jã a, wa bua jɔɔ wawɛɛ nitsɛ, ejakaa wa yeɔ bua ‘nimli tsuo nɛ́ a le anɔkuale ɔ.’ (1 Tim. 2:4) E ngɛ heii kaa Yehowa hɛ mi nyami nɛ wa woɔ kɛ e yi nɛ wa jeɔ ɔ haa nɛ huɛ bɔmi hii waa kɛ lɛ wa kpɛti. (Abɛ 10:22) E yeɔ bua wɔ nɛ wa náa hɛ kɛ nɔ fɔmi nɛ mi wa ngɛ wa Bɔlɔ ɔ mi.—Rom. 8:35-39.

²¹ Kaa bɔnɛ wa susu he kɛ sɛ hlami ɔ, e biɔ mɔde bɔmi loko wa ma ná hɛ kɛ nɔ fɔmi ngɛ Yehowa blɔ tsɔɔmi nɛ nile ngɛ mi ɔ mi. Enɛ ɔ he ɔ, e sa nɛ waa kɛ wa hɛ nɛ fɔ Yehowa nɔ kɛ gu sɔlemi nɛ wa maa sɔle kɛ ha lɛ ɔ nɔ. Mo susu bɔnɛ Yehowa ye e si womihi a nɔ blema be ɔ mi, kɛ bɔnɛ e maa pee jã hwɔɔ se ha a he. Moo ya nɔ nɛ o ha nɛ hɛ kɛ nɔ fɔmi nɛ o ngɛ ngɛ Yehowa mi ɔ mi nɛ wa kɛ gu sɔmɔmi nɛ o ma sɔmɔ lɛ ɔ nɔ. Ngɛ anɔkuale mi ɔ, Yehowa mlaa amɛ maa hi si kɛ ya neneene. Jã kɛ̃ nɛ mo hu o ma nyɛ maa hi si kɛ ya neneene!