1. (a) Kiebhi o athu kiene mu tambuijila o itendelesu, ni mukonda diahi? (b) Kiebhi ki divua o muthu mukuá luímbi kioso kia mu bhana itendelesu?

O ATHU ene mu tambuijila o itendelesu mu maukexilu avulu. O itendelesu ia muthu uala ni ungana a i xikina ni vondadi ioso, maji nange a dituna ni lusolo o itendelesu ia muthu ala mu kitala kimoxi, mba muthu ua tolo o ungana. Saí athu kioso kia a bhana itendelesu, nange ene a luuala, a kala ni kikote ku muxima, mba a kala ni jisonhi. Mukonda diahi o athu a tambuijila o itendelesu mu ukexilu ki u difu? Saí bhabha o kima kia a bhangesa o ku kala ni ukexilu iú, o luímbi. Kioso o muthu kia mu bhana o itendelesu, muéne u xinganeka kuila o milongi íii ki i mu tokala, mu kiki muéne u dituna o itendelesu, ka katula mbote mu itendelesu ia mu bhana ieji mu bhanga kiambote.—Jisa. 16:18.

2. Mukonda diahi o Jikidistá a uabhela o itendelesu ia Mak’â Nzambi?

² Maji o Jikidistá ja kidi a uabhela o itendelesu, bhenge-bhenge se o itendelesu i tunda mu Mak’â Nzambi. O itendelesu ia Jihova i tu bhana unjimu, i tu fidisa ku tu kuata mu ibhetu, ia kuzola kiavulu o jimbongo, ni kuzola o undumbu ni uhôlua uavulu. (Jisa. 20:1; 2 Kol. 7:1; 1 Tes. 4:3-5; 1 Tim. 6:6-11) Tuala ué ni ‘mixima ia sanguluka,’ mukonda dia ku belesela o itendelesu ia Nzambi.—Iza. 65:14.

3. Ukexilu uahi ua mukuá jisálamu, u tua tokala o ku kaiela?

³ Phala ku langa o ukamba uetu ni tata ietu ia diulu, tua tokala ku kolokota mu ku belesela o itendelesu ia Jihova ku muenhu uetu. Kima kiambote kioso ki tu londekesa mu ukexilu uetu o isoneku ia mukuá jisálamu: ‘O itendelesu iê nga i tambula kuma undundu uami sé dizubhilu, mukonda i sangulukisa o muxima uami!’  (Jisá. 119:111) O kuila tu sanguluka ué ni itendelesu ia Jihova, anga tu i mona kála kima kia neme? Né muéne se saí ithangana, ki tu bhonza ku xikina o itendelesu, ki tu tokala ku luuala. Etu tu tena ku kala ni kidielelu kia kolo kua Nzambi, o njimu ia beta-kota! Tu di longe maukexilu atatu.

4. Mu ima ioso ia bhitile ku muenhu ua Davidi, kima kiahi ki ki lunguluka?

⁴ O sobha Davidi ua kexile ni ithangana ia ku sanguluka ni ithangana ia ku luuala, maji saí kima, ki ki lunguluka ku muenhu uê—o kidielelu kiê ku Mubhangi uê. Muéne uambe: “Jihova Tata, eie muene, u Nzambi iami; “Ko kué Ngana, u Jihova, ku nga bhetukila. Nzambi iami nga ku dielela.” (Jisá. 25:1, 2) Ihi ia kuatekesa Davidi ku kala ni kidielelu kioso’kio kua Tata iê ia diulu?

5, 6. Ihi i tu longa o Mak’â Nzambi ia lungu ni ukamba ua Davidi ni Jihova?

⁵ Athu avulu a samba ngó kua Nzambi, kioso kia mu bhita mu maka a bhonzo. Xinganeka kuila kamba diê, mba ndandu iê, u mu mona ngó se ua mesena kitadi mba ua bhindamena ku mu bhana kima? Mu ku bhita kithangana eie ua-nda tena kuijiia se mukonda diahi, muéne ua mu ku sota. Maji ki kiene kia kexile Davidi. O ukamba ué ni Jihova, ua kexile mu ulondekesa mu kixikanu kiê ni henda iê kua Nzambi, ku muenhu ué uoso, ki kale mu ithangana iambote mba mu ithangana ia bhonzele.—Jisá. 40:8.

⁶ Xinganeka kiebhi Davidi kia ximana Jihova: “U Jihova, Ngana ietu, dijina dié kujinga kuahi mu ngongo ioso!” (Jisá. 8:1) O kuila eie u tena ku mona o ukamba ua kexile nau Davidi ni Tata iê ia diulu? O kisakidilu kia Davidi ku ungana ua Jihova, kia mu bhangesa ku bhana kijingu kua Jihova, “kumbi dioso dia kambamba.”—Jisá. 35:28.

7. Kiebhi ki tu tena ku katula mbote mu ku zukama kua Nzambi mu musambu?

⁷ Etu tua tokala kuzuela ni Jihova phala ku kolesa o ukamba uetu, kála kia bhangele Davidi. O Bibidia izuela: ‘Zukamenu kua Nzambi, muéne a mi zukama uê.’ (Tiia. 4:8) O ku zukama kua Nzambi bhu kaxi ka musambu, ukexilu ua beta-o-kota ua ku tambula o nzumbi ikôla.—Tanga 1 Nzuá 3:22.

8. Mukonda diahi ki tu tokala ku bhitulula o izuelu imoxi mu musambu?

⁸ Kioso ki u samba uene mu bhitulula o izuelu mu veji javulu? Se kiene, ande dia kusamba, xinganeka hanji bhofele o ima i ua mesena o ku bhinga. Se tu bhitulula o izuelu imoxi ku ndandu ietu mba dikamba ithangana ioso kioso ki tu zuela né, kiebhi kieji divua? Nange muéne keji mesena dingi ku tuívua. Tuejiia kuila Jihova ka ditunu o misambu ia jiselevende jê ja fiiele. Maji kima kiambote, se tueha ku bhitulula o izuelu imoxi mu ithangana ioso, kioso ki tu samba.

9, 10. (a) Ihi i tua tokala ku bhinga ué mu misambu ietu? (b) Ihi ia-nda tu kuatekesa ku bhanga misambu ia kidi?

⁹ Mu kidi, ki tu tokala ku bhuabhuala mu misambu, se tua mesena ku zukama kua Nzambi. Kioso ki tu tangela kua Jihova o maka metu moso u tu kala nau ku muxima, tu mu zukama dingi. Ihi i tua tokala ué ku bhinga mu misambu ietu? O Mak’â Nzambi a tambuijila: “Maji ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena.” (Fil. 4:6) Mu kidi kima kioso-kioso ki tena ku fidisa o ukamba uetu ni Nzambi, mba ki bhindamesa o muenhu uetu, tua tokala ku ki tumbula mu musambu.

¹⁰ O ku xinganeka mu misambu ia athu a a tange mu Bibidia, ku tena ku tu longa. (1 Sam. 1:10, 11; Ika. 4:24-31) Mu divulu dia Jisálamu, tu sanga-mu mimbu ni misambu ia kidi, ia bhangele kua Jihova. O ku  di longa o misambu íii ia bhangele o jiselevende jê, i tu kuatekesa ku bhanga misambu ia kidi kua Jihova.

11. Mukonda diahi tua tokala ku xinganeka mu itendelesu ia Nzambi?

¹¹ Davidi uambe: ‘O itendelesu ia Jihova ia kidi, i bhana unjimu ku iá a tobho.’ (Jisá. 19:7) Né muéne se ki tuala ni unjimu maji tu tena ku kala nau, se tu belesela o itumu ia Nzambi. Saí itendelesu ia Bibidia, i bhinga ku i xinganeka se tua mesena ku katula mbote. Mu kifika, o ku xinganeka mu itumu ia Bibidia, ku tena ku tu kuatekesa ku belesela o itumu ia lungu ni kitumu kia manhinga, ni ku kamba ku bhanga mbandu ku mundu, ni ku belesela o itumu ia Bibidia kioso ki tu sola o izuatu. O ku xinganeka mu itendelesu ia Nzambi, ia-nda tu kuatekesa ku kala polondo kioso ki ku moneka maka kála iá. Mu kusuka-ku, etu tua-nda sola ihi i tua tokala o ku bhanga kioso ki ku moneka maka enhá. O ku kala polondo kua-nda tu fidisa ku dita mu ibhidi.—Jisa. 15:28.

12. Ihi i tua tokala o ku xinganeka, i tena o ku tu kuatekesa mu ku kolokota o ku bhaka o itendelesu ia Nzambi?

¹² Kioso ki tua mu kingila o kikanenu kia Nzambi ku di kumbidila, o kuila o ukexilu ua muenhu uetu ulondekesa kuma tua mu di langa? Mu kifika, o kuila tua xikina kuma o Babilonha ia dikota ia zukama phala ku i buikisa? O kuila tua kingila o mabesá a ku tambula o muenhu ua kalelaku mu palaízu mu ixi ni hanji ioso, kála ki tua dianga ku ivua? O kuila tua suína mu sidivisu ia kuboka mu veji dia kuehela kuila o ibhindamu ietu ku muenhu iene i dianga? Ihi i tu zuela ia lungu ni kidielelu kia difukunukinu ni ku zelesa o dijina dia Jihova, ni ku bhana kijingu ku ungana ua Jihova? O kuila tu bhana hanji valolo mu maka enhá? O ku xinganeka mu maka enhá, ku tu kuatekesa ku bhanga ia zuela o mukua jisalamu kioso kiambe kuila, kolokota mu ku bhaka, ‘o itendelesu ia Nzambi i ua tambula kuma undundu uê sé dizubhilu.’—Jisá. 119:111.

13. Mukonda diahi saí ima ia bhonzele ku Jikidistá ku hama ia dianga? Bhana phangu.

¹³ Saí ima ia tange mu Bibidia nange ki tu i tendela kindala mukonda o kithangana kia Jihova kia ku ijimbulula, kiluua ki bhixila. Jezú ua kexile mu zuelela o jipoxolo jê kuila muéne ua tokalele ku tala hadi ni ku mu jibha. (Tanga Matesu 12:40; 16:21.) Maji o jipoxolo ka tendela ia kexile mu zuela. Ene a tendela ngó o izuelu ia Jezú kioso kia mu fukununa, ni kioso kia monekena o maxibulu mê, anga u a “jikula o ilunji, mu kutetulukila o kuívua kiambote o Madivulu a Ngana.” (Luka 24:44-46; Ika. 1:3) Kiene kimoxi ué, ande dia ku a unda ni nzumbi ikôla ku muvu ua 33 mu Pendekoxi, o akaiedi a Jezú, kejidile kuila o Utuminu ua Nzambi eji ku u tumbika ku diulu.—Ika. 1:6-8.

14. Ku dimatekenu dia 20 a hama, phangu iahi ia mbote ia tu xila o jiphange, sumbala ka kexile mu tendela o kikanenu kia izuua isukidila-ku?

¹⁴ Kiene kimoxi ué ku dimatekenu dia 20 a hama, o Jikidistá ja kidi kejidile kiambote ihi ieji bhita “mu izuua isukidila-ku.” (2 Tim. 3:1) Mu kifika, ku muvu ua 1914, saí jiphange ja kexile mu banza kuila eji kuia ku diulu mu kithangana kieniókio. Kioso kia bhiti o kithangana, a tungununa o mikanda ikôla, ia a mono kuila kua bhingile kuboka o njimbu iambote. (Mar. 13:10) Kienhiki tundé ku muvu ua 1922, o phang’etu J. F. Rutherford, ua kexile ku pholo mu sidivisu ia kuboka, uambela o jiphange joso ja kexile mu kiônge, mu mbanza ia Cedar Point, Ohio, Estados Unidos da América kuila: “Ijienu-kiu o sobha ua mu tumina! Enu mu akunj’iê, mu kiki bokenu, bokenu, bokenu, o Sobha ni utuminu uê.” Tundé o kithangana kieniókio, o  jiselevende ja Jihova a ejiia mukonda dia kuboka ‘o Njimbu íii Iambote ia Utuminu ua Nzambi.’—Mat. 4:23; 24:14.

15. Kiebhi ki tu katula mbote mu ku xinganeka mu ukexilu ua Nzambi ua ku di bhana ni mundu uê?

¹⁵ O ku xinganeka mu ukexilu ua di bhana nau Jihova ni mundu uê, mu ukulu ni mu izuua ietu, ku tu bhangesa ku dielela mu kutena kuê kua ku kumbidila o vondadi iê ku hádia. O itendelesu ia Nzambi i tu kuatekesa ué ku ta mu kilunji kietu ni ku muxima uetu, o ikanenu ia Nzambi ia kambe o ku kumbidila. Tu tena ku dielela kuila o ku bhanga kiki, kua-nda tu kuatekesa ku kala ni kixikanu mu ikanenu iê.

16. Mabesá ahi ijila mu ku di bhakula mu ukunji?

¹⁶ O Nzambi ietu Jihova, Nzambi ia ku kalakala. O mukuá jisalamu uebhula: ‘Nanhi ukôla kala eie, Ngana?’ Muéne uambe dingi: ‘Lukuaku lué lua suína, o lua kadilu se ua lu sunununa, lu bhanga muene madiuanu.’ (Jisá. 89:8, 13) Mukonda dia ku kala Nzambi u kalakala, muéne u sanguluka kioso ki tu di suínisa mu ku bhanga o sidivisu ia Utuminu, mukonda dia kiki, muéne u tu besoala. Muéne u mona kuila o jiselevende jê—ki kale ahatu mba maiala, minzangala mba adiakimi—ka xikama phala kúdia ‘kudia ku tunda ku umonha.’ (Jisa. 31:27) Kioso ki tu di bhakula mu sidivisu ia utuminu, tua mu kaiela o phangu ia Mubhangi uetu. Kioso ki tu di bhakula mu sidivisu ia Nzambi, tu tambula mabesá avulu, muéne ué u sanguluka kiavulu, u besoala o ukunji uetu.—Tanga Jisálamu 62:12.

17, 18. Mukonda diahi tuamba kuila o ibhangelu ietu ia kixikanu i tena ku tu kuatekesa ku dielela mu itendelesu ia Jihova? Bhana phangu.

¹⁷ Kiebhi o ibhangelu ietu ia kixikanu i  tena ku suínisa o kidielelu kietu kua Jihova bhu kaxi ka ibhangelu ia ubhezelu? Xinganeka izuela o Bibidia, kioso kia bokona akua Izalaiele mu Ixi ia Kanana. Jihova ua tendelesele o mukunji kiebhi kia tokalele kuambata o álaka ia kikutu mu kuenda mu Ngiji ia Njolodá. Maji kioso o mundu ki ua kexile mu zukama, ene akexile mu mona kuila o ngiji, iezalele mukonda dia nvula, ni kuila o menha akexile ni nguzu iavulu. Ihi ia tokalalele ku bhanga akua Izalaiele? O kuila ene a xikamene mu ku kingila hanji katé ki bhobholoka o menha a ngiji? Kana, ene a dielele kua Jihova, akaiele o itendelesu iê. Ihi ia bhitile? O Bibidia izuela: ‘Makànda a akunji kia zubha kudiota mu menha menha oso, emana akunji-phe, anga emana ku mavu a kukuta mu ngiji ia Njolodá, akua Izalaiele oso anga a zaukila ku mavu a kukuta katé kifuxi kioso ku sámbua kuku a bhu-ku.’ (Josu. 3:12-17) Xinganeka kiebhi kia divu akua Izalaiele kioso kia mono kuila o menha a kexile mu kuenda ni nguzu iavulu, emana! Sé phata o kidielelu kiâ kua Jihova kia suínine mukonda ene a dielele ku itendelesu ia Jihova.

¹⁸ Mu kidi, Jihova ka bhange madiuanu kála iá phala o mundu uê lelu, maji muéne u a besoala kioso kia londekesa o kixikanu ni ku kaiela o itendelesu iê. O nzumbi ikôla ia Nzambi, ia a kuatekesa ku bhanga o kikalakalu kia ku boka o njimbu ia Utuminu ku mundu uoso. O Mbangi ia dikota ia Jihova, Jezú, ua kanena o maxibulu mê kuila ueji ku a kuatekesa ku bhanga o kikalakalu kiki kia dikota: “Enu-phe ndenu, mua ka longe jixibulu ku akua jixi joso . . . eme-muène ngà kala ni enu izuua ioso, katé ku dizubhilu dia mundu.” (Mat. 28:19, 20) Jimbangi javulu ja Jihova, ja kexile ni uôma mba jisonhi ja kuzuela ni athu, lelu amba kuila o nzumbi ikôla ia Nzambi ia a suínisa kuzuela ni athu mu ukunji.—Tanga Jisálamu 119:46; 2 Kolindo 4:7.

19. Né muene se ki tu tena dingi ku kalakala kiavulu mu sidivisu ia Nzambi, ihi i tu tena ku dielela?

¹⁹ Saí jiphange ka tena ku kalakala kiavulu mu sidivisu ia Nzambi mukonda dia uhaxi mba mukonda dia ku kuka. Maji né kiki, ene a tena ku dielela kuila: “Nzambi, Tata ia Ngana ietu Jezú Kristu, Tata ia jihenda, Nzambi ió athu oso kuene mú tambula o dikuatekesu” uejiia o maka a mu bhita nau o Jikidistá ja kidi. (2 Kol. 1:3) Muéne u bhana valolo ku kikalakalu kioso ki tu bhanga mu Kilunga. Etu enioso tua tokala kuijiia kuila tua-nda bhuluka ngó se tu dielela mu sata ia kukula kua Jezú.—Jihe. 10:39.

20, 21. Kiebhi ki tu tena kulondekesa kuila tua dielela kua Jihova?

²⁰ O ubhezelu uetu ua lungu ni ku bhakula o kithangana kietu, ni nguzu ietu, ni jimbongo phala ku bhanga ioso i tua tena mu sidivisu ia Nzambi. Ni muxima uoso, tua mesena ku bhanga o “kikalakalu kia tokala o mukunji ua Njimbu Iambote.’ (2 Tim. 4:5) Mu kidi, tu sanguluka mu ku bhanga o kikalakalu kiki ni ku kuatekesa akuetu phala “eze mu kuijiia o kidi.” (1 Tim. 2:4) Kála ki tua mono, o ku xila ni ku bhana kijingu kua Jihova, ku tu suínisa mu nzumbi. (Jisa. 10:22) Ku tu kuatekesa ku dielela o Mubhangi uetu ni muxima uoso, né muene se tu di bhana ni ibhidi.—Loma 8:35-39.

²¹ Kála ki tua di longo, kua bhingi ku suína phala ku dielela ku itendelesu ia Jihova. Mu kiki, suínisa o kixikanu kiê bhu kaxi ka musambu. Xinganeka kiebhi Jihova kia kumbidila o ikanenu iê mu ukulu, ni kiebhi muéne kia-nda kumbidila o ikanenu iê ku hádia. Kolokota mu ku suínisa o kidielelu kiê kua Jihova, bhu kaxi ka ibhangelu ia ubhezelu. Mu kidi, o itendelesu ia Jihova ia-nda nangenena. Se u kaiela o itendelesu íii, ua-nda kala ni muenhu ua kalela-ku!