1. (a) Eng kawngin nge mite chuan hriattîrna thute chu an chhân lêt a, engvângin nge? (b) Engtin nge chapona chuan zilhna kan thlîr dân a nghawng theih?

MIHRINGTE hian kaihhruaina chu kawng chi hrang hrangin an chhâng lêt ṭhîn a. Thu neitu tuemaw pêk chhuah hriattîrna chu lâwm taka pawm a nih laiin, ṭhiante emaw, kan aia hnuaihnung zâwkte emaw hnên aṭanga dawnte erawh chu ngaihtuah chiang mang lova hnâwl a ni nghâl ṭhîn. Thununna leh zilhna kan chhân lêt dân chu a inang lo hle thei a. Pawi tihna, lungngaihna, leh zahna a thlen theih rualin, chêttîrna, inrin tâwkna, leh ṭha lehzuala tih duhna a neihtîr thei bawk a ni. Engvângin nge chhân lêt dân chi hrang hrang a awm? A chhan pakhat chu chapona vâng a ni a. Chapona chuan mi chu thu tlûkna fing lo a siamtîr thei a, zilhna hnâwltîrin, chuta awm kaihhruaina hlu tak chu a hmaihtîr thei a ni.—Thuf. 16:18.

2. Engvângin nge Kristian dikte chuan Pathian Thu aṭanga pêk thurâwn chu an ngaihhlut?

² Kawng lehlamah chuan Kristian dikte chuan thurâwn ṭangkai takte, a bîk takin Pathian Thu ṭanchhana pêkte chu an ngaihlu hle a. Jehova thuhriattîrte chuan thil hmuh tlang thiamna min pe a, tlûkna thlen thei hausak âtchilhna te, nungchang bawlhhlawhna te, leh drug leh zu ngawlveina te pumpelh tûrin min zirtîr a, min ṭanpui bawk a ni. (Thuf. 20:1; 2 Kor. 7:1; 1 Thes. 4:3-5; 1 Tim. 6:6-11) Chu bâkah, Pathian thuhriattîrte âwihna aṭanga lo awm ‘thinlunga lâwmna’ avângin kan hlim a ni.—Is. 65:14.

3. Kan entawn atâna ṭha fakna hla phuatu rilru put hmang chu eng nge ni?

³ Kan Pa, vâna mi nêna kan inlaichînna hlu tak nei reng tûr chuan, Jehova kaihhruaina finthlâk takte chu kan nunpui zêl tûr a ni. Kan rilru put hmang chu: “I thuhriattîrte chu kumkhuaa rochunah ka la a; ka thinlung  tihlimtu a ni si a,” tia ziaktu fakna hla phuahtu rilru put hmang ang a nih chuan a va ṭha dâwn êm! (Sâm 119:111) Jehova thupêkte chu chutiang takin kan hlimpui nge ni a, a châng chuan khirh kan ti zâwk? Zilhna thu kan dawnte chu hnâwl châng kan nei a nih pawhin, kan mangan lutuk a ngai lo. Pathian finna chungchuang tak rin ngheh dân kan zir thei si a! Chutianga kan zir theih dân kawng thum i lo en ang u.

4. Davida nunah eng nge inthlâk danglam ngai lo?

⁴ Lal Davida chuan a nunah hun khirh leh hun hlimawm tam tak tawng mah se, thil pakhatah a inthlâk danglam ngai lo—amah Siamtu a rin ngheh tlatnaah chuan. Heti hian a sawi a ni: “Aw LALPA, ka rilru hi i hnênah ka dah tlat ṭhîn. Aw ka Pathian, nang ka ring chia,” tiin. (Sâm 25:1, 2) Engin nge Davida chu chuti taka a Pa, vâna mi ring tûra ṭanpui?

5, 6. Pathian Thu chuan Davida neih Jehova nêna inlaichînna chungchângah eng nge min hrilh?

⁵ Mi tam tak chu an mangan tâwpkhâwkah chauh Pathian hnênah an ṭawngṭai ṭhîn a. I ṭhian emaw, i chhûngte emawin sum an mamawh hunah leh ṭanpui a ngaih hunah chauh be pawp ta che sela engtin nge ni ang? A biak pawh chhan che rinhlelh hun i la nei ngei ang. Mahse, Davida chu chutiang a ni ve lo. Jehova nêna an inlaichînna chuan a dam chhûngin—hun ṭha leh ṭha loah pawh—Pathian a rinna leh a hmangaihna chu a târ lang a ni.—Sâm 40:8.

⁶ Davida’n Jehova a chawimawina leh a hnêna lâwmthu a sawina thute hi chhinchhiah rawh: “Aw LALPA, kan Lalpa, lei chung zawng zawngah hian, i hming chu a va ṭha êm! I ropuina chu vân chungahte khian i dah a,” tih hi. (Sâm 8:1) Davida leh a Pa, vâna mi inkâra awm inlaichînna duhawm tak chu i hre thei em? Pathian mawina leh ropuina a ngaihhlutna chuan Davida chu ‘nilênga’ Jehova chawimawi tûrin a chêttîr a ni.—Sâm 35:28.

7. Ṭawngṭaia Pathian hnaih chu engtin nge kan hlâwkpui?

⁷ Davida angin, Jehova ring tûr chuan amah nêna kan inbiak pawh reng a ngai a. Bible chuan: “Pathian hnaih rawh u, tichuan anin a hnaih ang che u,” a ti a ni. (Jak. 4:8) Ṭawngṭaia Pathian hnaih chu thlarau thianghlim neih theih dân kawng pawimawh tak a ni bawk.—1 Johana 3:22 chhiar rawh.

8. Engvângin nge ṭawngṭai huna thu ngai sawi nawn fo chu kan pumpelh ang?

⁸ I ṭawngṭai hian, ṭawngkam thuhmun emaw, ṭawngkauchheh ngai hlîr emaw i hmang ṭhîn em? I hmang ṭhîn a nih chuan i ṭawngṭai hmain i telh duh thute chu ngaihtuah rawh. Kan ṭhian emaw, kan chhûngkhat emawte kan biak apiangin thu ngai bawk sawi ṭhîn ta ila, chu chu ngaihthlâk nuam a ti ang em? Kan thusawi lamah a beng a chhungawng ṭan mai thei a ni. Jehova chuan a chhiahhlawh rinawmte tih tak zeta ṭawngṭaina chu a hnâwl ngai lo vang. Mahse, amah kan biak pawh hunah ṭawngkam ngai hman reng chu kan pumpelh tûr a ni.

9, 10. (a) Kan ṭawngṭainaah eng thute nge kan telh theih? (b) Engin nge tih tak zeta ṭawngṭai tûrin min ṭanpui thei?

⁹ Pathian hnaih kan duh chuan kan ṭawngkamte hi a pâwnlâng mai a ni thei lo tih chu a chiang reng a. Jehova hnêna kan thinlung kan leihbuak tam poh leh amah nên kan inhnaih sauh vang a, amah kan ring sauh bawk ang. Mahse, kan ṭawngṭainaah hian eng thute nge kan telh ang? Pathian thu chuan: “Engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tiin min chhâng a ni. (Phil. 4:6) A nihna takah chuan Pathian nêna kan inlaichînna leh a chhiahhlawh kan nih anga kan nun nghawngtu thil engpawh chu ṭawngṭainaa telh theih vek a ni.

¹⁰ Bible-a chhinchhiah mi rinawm a hmei a pate ṭawngṭaina thu ngaihtuah chu a  bengvârthlâk hle. (1 Sam. 1:10, 11; Tirh. 4:24-31) Sâm bu hi tih tak zeta ṭawngṭaina leh Jehova fakna hla thlan khâwm a ni a. Hêng ṭawngṭaina thu leh hlaah te hian mihringte rilru veizâwng, thinurna aṭanga hlimna nasa tak thlengin a lang a ni. Chûng mi rinawmte ṭawngṭaina thu zir chianna chuan Jehova hnênah ṭawngṭaina awmze nei tak hlân tûrin min ṭanpui ang.

11. Pathian fuihna min pêkte chu engvângin nge kan chhût ngun a ngaih?

¹¹ Davida chuan: “LALPA thuhriattîr chu a rinawm a, mi mâwl a tifing ṭhîn,” a ti a. (Sâm 19:7) Ni e, thiltawn la nei lo mi mâwl tak pawh ni mah ila, Pathian thupêkte zawmna aṭangin kan lo fing thei a ni. Mahse, chutiang Bible fuihnate hlâwkpui tak zet tûr chuan rilrua chhût ngun a ngai a ni. School emaw, hnathawhna hmun emawa nêksâwrna do tûr te, thisen chungchânga Pathian tehna nunpui tûr te, Kristian tualdâwihna lantîr tûr te, leh silhfên leh inchei dân chungchânga Bible thu bul nunpui tûrte chuan chhût ngun a ngai tak zet a ni. Hêng chungchânga Pathian ngaihtuahna neihna chuan buaina lo thlen hmaa lo inrâlring lâwk tûrin min ṭanpui ang. Chutiang chuan, harsatna dinhmun a lo thlen huna kan tih tûr chu kan lo rêlfel thei dâwn a ni. Chutianga ngaihtuah lâwkna leh inbuatsaih lâwkna chuan a hnua lungngaihna tûr lak ata min chhanchhuak thei a ni.—Thuf. 15:28.

12. Eng ngaihtuahnain nge Pathian thuhriattîrte zâwm tûra min ṭanpui thei?

¹² Pathian thu tiamte thlen famkim hun tûr kan nghah mêk lai hian, kan nun dân chuan thlarau lamah kan harhvâng a ni tih a târ lang em? Entîr nân, Babulon Khaw Ropui chu tihboral a ni thuai dâwn tih kan ring tak zet em? Nakina malsâwmna, lei paradis-a chatuana nunna ang chite chu kan hriat ṭantirh lai angin kan tân a la tak zêl em? Kan nunah hian mi mal thilte ngaih pawimawh zâwk aiin, rawngbâwlna atân ṭhahnem kan la ngai zêl em? A nih loh leh, thawhleh beiseina te, Jehova hming tihthianghlimna te, leh a lalchungnunna thiam chantîrna chungchângte chu eng nge ni? Chûng chu kan la ngai pawimawh zêl em? Hetiang zawhnate chhût ngunna chuan fakna hla phuahtu sawi angin, Pathian ‘thuhriattîrte chu kumkhuaa kan rochun’ nihtîr tûrin min ṭanpui ang.—Sâm 119:111.

13. Engvângin nge kum zabi khatnaa Kristiante khân thil ṭhenkhat chu hriatthiam harsa an tih? Entîrna pe rawh.

¹³ Bible-a kan hmuh thu ṭhenkhatte chu Jehova tihchian hun a la thlen hrih loh avângin kan la hre chiang lo pawh a ni thei a ni. Isua chuan a tirhkohte hnênah hrehawm tuara a thih a ngai dâwn tih a sawi fo ṭhîn a. (Matthaia 12:40; 16:21 chhiar rawh.) Mahse, tirhkohte chuan a thusawi awmzia chu an man lo. A thiha a thawhleh hnu, zirtîr tam tak hnêna mihring taksa pua a inlâr a, ‘Pathian Lehkha Thu hriat nân an thinlung a tihfinsak’ hnuah an man chauh a ni. (Lk. 24:44-46; Tirh. 1:3) Chutiang bawkin, C.E. 33, Pentikost nîa thlarau thianghlim an chunga leih a nih hma chuan, Krista hnungzuitute chuan Pathian Ram chu vâna din tûr a ni tih an hre thiam lo a ni.—Tirh. 1:6-8.

14. Kum zabi 20-na inṭan tirh lamah, ni hnuhnûng chungchânga thil hriat fuh loh an nei chung pawhin unau tam tak chuan entawn tûr ṭha eng nge an siam?

¹⁴ Chutiang bawkin, kum zabi 20-na tîr lamah, Kristian dikte zîngah chuan ‘ni hnuhnûng’ chungchângah beiseina dik lo eng emaw zât a awm a. (2 Tim. 3:1) Entîr nân, kum 1914 khân ṭhenkhat chu vâna lâk chhoh ni thuai tûrah an inngai a. An beiseinate a thlen nghâl loh khân, Pathian Thu bih chian lehzualna aṭangin thu hrilhna ropui tak neih hmasak a ngai tih an hre ta a ni. (Mk. 13:10) Chuvângin, kum 1922-ah, chutih laia thu hrilhnaa hmahruaitu J. F. Rutherford-a chuan Cedar Point, Ohio,  U.S.A.-a neih international inkhâwmpuia kalkhâwmte hnênah: “Ngai rawh u, Lalin ro a rêl e! Nangni hi a chanchin puangtu tûrte in ni. Chuvângin, Lal leh a lalram chanchin chu puang rawh u, puang rawh u, puang rawh u,” tiin a hrilh a ni. Chuta ṭang chuan, “ram chanchin ṭha” hrilh hi tûn laia Jehova mite chhinchhiahna ber a lo ni ta a ni.—Mt. 4:23; 24:14.

15. Pathianin a mite a dâwr dân ngaihtuahna chu engtin nge kan hlâwkpui?

¹⁵ Hmân lai leh tûn laia Jehova’n a mite mak taka a dâwr dân chungchâng ngaihtuahna aṭangin, nakinah pawh a duhzâwng leh a thiltumte a hlen thei tih kan rinna chu a nghet lehzual a ni. Chutih rual chuan, Pathian thuhriattîrte chuan lo la thleng famkim tûr hrilh lâwknate chu kan rilru leh thinlungah a thara dah reng tûrin min ṭanpui a. Chutianga ngaihtuahna chuan a thutiamte ring tûrin min ṭanpui bawk a ni.

16. Rawngbâwlnaa kan inhmanna aṭangin eng malsâwmnate nge lo awm?

¹⁶ Kan Pathian, Jehova hi thiltihtheihnaa khat Pathian leh thiltitu Pathian a ni a. Fakna hla phuahtu chuan: “Aw JAA, nang anga mi chak tunge awm?” tiin zawhna a siam a. Heti hian a sawi belh a ni: “I kut chu a chak a, i kut ding lam chu chawimawiin a awm,” tiin. (Sâm 89:8, 13) Thiltitu Pathian a nih angin, Jehova chuan Lalram atâna ṭan kan lâknate chu a hlutin, mal a sâwm a. A chhiahhlawh a hmei a pa, a pui a pangte’n ‘dâwngdahna chhang an ei lo’ tih a hmu a ni. (Thuf. 31:27) Min Siamtu entawnin, Pathian rawngbâwlnaah kan buai hle a. Thinlung zawng zawnga Pathian rawngbâwl chu a mi mal tak pawhin kan hlâwkpui a, kan rawngbâwlna mal a sâwmna  aṭangin Jehova chuan hlimna nasa tak a nei bawk a ni.—Sâm 62:12 chhiar rawh.

17, 18. Engvângin nge rinna thiltihte chuan Jehova thurâwnte ring tûrin min ṭanpui kan tih theih? Entîrna pe rawh.

¹⁷ Eng kawngin nge rinna thiltihte chuan Jehova ring tûra min ṭanpui? Bible-a Israel fate Ram Tiama an luh chanchin hi ngaihtuah ta ila. Jehova chuan thuthlung bâwn zâwntu puithiamte chu Jordan Lui pal tlang tûrin a hrilh a ni. Mahse, mite’n lui lam an han hnaih chuan, ruahtui tla hnuhnûng avângin Jordan Lui hi a kuang zawng zawngah a liam tih an va hmu a. Israelte chuan eng nge an tih tâk ang? Lui kamah riahbûk khuarin, tui kâm hun nghah nân chawlhkâr engemaw zât emaw, a aia rei emaw chu an awm mai mai ang em? Nghâk lo ve, Jehova chu ring tlatin, a kaihhruaina ang chu an zui a ni. Eng nge lo thleng ta? Thuziak chu heti hian kan chhiar a ni: “Puithiamte ke chuan vaukam tui a han rah veleh, . . . chhak lam aṭanga tui lo luang thla chu a ding ta a, . . . puithiamte chu Jordan lui laiah, lei chârah an ding reng mai a, tin, mipuiho zawng zawngte chuan Jordan lui . . . an kal kai ta vek a,” tiin. (Jos. 3:12-17) Tui chak taka luang lai a tâwp ta mai hmuh chu a va hlimawm dâwn êm! Jehova kaihhruaina an rin tlat avângin, Israelte’n amah an rinna chu a nghet lehzual sauh a ni.

¹⁸ Jehova chuan tûn laia a mite tân chutiang thilmak chu a ti tawh lo ngei mai a; mahse, rinnaa an thiltih erawh mal a sâwm a ni. Pathian thlarau chuan khawvêl puma Lalram thuchah hrilh tûra an mawhphurhna hlen chhuak thei tûrin anni chu a tichak a ni. Tin, Jehova Thuhretu chungnung ber, tholeh Krista Isua chuan, he hna pawimawh takah hian a ṭanpui dâwn tih a tiam a ni: “Chutichuan kal ula, hnam tina mi zirtîrahte siam ula, . . . kei kumkhuain, khawvêl tâwp thleng pawhin, in hnênah ka awm zêl ang,” tiin. (Mt. 28:19, 20) Thuhretu zakzum thei tam takte chuan Pathian thlarauvin thlawhhma rawngbâwlnaah mi dangte hnêna thu sawi tûrin huaisenna a pe tih an sawi thei a ni.—Sâm 119:46; 2 Korinth 4:7 chhiar rawh.

19. Kan duh angin thawk tam thei lo mah ila, eng nge kan rin tlat theih?

¹⁹ Unau ṭhenkhat chuan dam loh vâng emaw, kum upat vâng emawin an duh angin rawng an bâwl tam thei lo va. Chutichung pawhin, “khawngaihnate Pa leh thlamuanna zawng zawng Pathian” chuan Kristian dikte dinhmun chu a hriatsak ṭheuh tih an ring tlat thei a ni. (2 Kor. 1:3) Lalram ṭhatna tûra kan thiltih eng pawh chu a ngai hlu a. Kan za hian kan dinhmun azira theih tâwp chhuaha rawng kan bâwl laiin, kan nunna humhimtu bul ber chu Krista tlanna inthawina kan rinna a ni tih kan hre ṭheuh tûr a ni.—Heb. 10:39.

20, 21. Jehova kan rinzia târ lan theihna kawng ṭhenkhat chu engte nge ni?

²⁰ Pathian kan biaknaah chuan kan hun te, tha leh zung te, leh neih sumte chu a tam thei ang bera hman a tel a. A ni, thinlung zawng zawnga “chanchin ṭha hriltu lam hna” thawh chu kan duh a. (2 Tim. 4:5) Hei hi mi dangte’n ‘thutak an hriat’ phahna tûr a nih avânga thawk duh kan ni. (1 Tim. 2:4) Jehova chawimawina leh fakna chuan thlarau lamah min tihausa tih a chiang hle. (Thuf. 10:22) Tin, min Siamtu nêna inzawmna tihchhiat rual loh siam tûrin min ṭanpui bawk.—Rom 8:35-39.

²¹ Kan sawiho tawh angin, kaihhruaina finthlâk min pe tûra Jehova rin chu amahin a lo awm mai lo; chutiang rinna nei tûr chuan kan thawhrim a ngai a ni. Chuvângin, ṭawngṭaiin Jehova chungah innghat tlat rawh. Jehova’n hun kal tawha a duhzâwng a tihpuitlin dân leh nakina a la tihpuitlin dân tûrte chu ngaihtuah ngun rawh. Tin, Pathian biakna thiltih hmangin Jehova i rinna chu tinghet rawh. Jehova thuhriattîrte chuan chatuan a daih dâwn a. Nang pawhin chatuan i daih thei dâwn a ni! (w13-E 09/15)