Yãmb kɩsa sɩd t’a Zeova noyã yaa tõnd nafr yĩng bɩ?
Yãmb kɩsa sɩd t’a Zeova noyã yaa tõnd nafr yĩng bɩ?
“Y noya sẽn kõ-m bãngr ninga la m buud pʋɩɩre.”—YƖƖL 119:111, SEBR SÕNGO.
Y NA N LEOKAME TƖ BÕE?
Bõe yĩng t’a Zeova noyã tũub kõt-d sũ-noogo?
Bõe la d tõe n maan tɩ sõng-d tɩ d maneg n kɩs a Zeova sɩda?
Bõe yĩng tɩ d segd n tʋmd a Zeova tʋʋmdã ne yẽesem?
1. a) Nebã manesem yaa wãn to ne saglsã, la bõe yĩnga? b) B sã n sagl wuk-m-meng soaba, a manesem yaa wãna?
NEBÃ manesem sẽn yaa to-to ne saglsã pa yembr ye. Sãnda sakda ned sẽn yɩɩd-b saglse, tɩ sã n yaool n yaa b rog-taag wall ned sẽn pa ta-b bɩ b pa rat n sak ye. B sã n kõ nina saglga, a sũur sãamdame, wall a tagsdẽ tɩ b paoog-a lame. La kẽer deegda saglsã ne sũ-noogo, n dat n modg n maan sẽn yaa neere. Bõe yĩng tɩ nebã manesem yaa toor-toore? Bũmb a ye sẽn kɩt tɩ yaa woto wã yaa wuk-m-mengã. B sã n sagl wuk-m-meng soaba, a tagsdame tɩ saglgã pa zemse, tɩ kɩt t’a pa reeg ye. Woto, a pa rɩt saglgã yõod ye.—Yel. 16:18.
2. Bõe yĩng tɩ kiris-neb hakɩkã nand sagls nins sẽn tik Wẽnnaam Gomdã zugã?
2 Kiris-neb hakɩkã yẽ nanda saglse, sẽn yɩɩd fãa sã n yaa sagls sẽn tik Wẽnnaam Gomdã zugu. A Zeova saglsã sõngd-d lame tɩ d zãagd d mens ne bũmb nins sẽn tõe n wã-dã. Wala makre, ligd nonglem, yoobo, dorg la rãamã yũ tɩ looge. (Yel. 20:1; 2 Kor. 7:1; 1 Tes. 4:3-5; 1 Tɩm. 6:6-11) Sẽn paase, d sẽn sakd Wẽnnaam saglsã kõt-d-la sũ-noogo.—Ezai 65:14.
3. Yɩɩl-gʋlsdã mak-sõng bʋg la d segd n tũ?
3 D sã n dat n kell n tall zood sõma ne a Zeova, d segd n tũuda sagls nins a sẽn kõt-dã. Yɩta sõma me tɩ d rɩk yɩɩl-gʋlsdã togs-n-taare. A yeela a Zeova woto: “Y noya sẽn kõ-m bãngr ninga la m buud pʋɩɩre. M sũur yaa noogo.” (Yɩɩl 119:111, Sebr Sõngo) Yãmb me sũur nooma ne a Zeova noyã bɩ, bɩ y mi n getame tɩ b tũub yaa toogo? Baa y sã n getẽ tɩ sagls kẽer tũub yaa toog bɩ y ra koms raood ye. Bũmb sãnda n be y sẽn tõe n maan n maneg n kɩs sɩd tɩ Wẽnnaam noyã tũub yaa y meng nafr yĩnga. Bɩ d gom bãmb b tãab yelle.
PƲƲSD-Y WẼNNAAM
4. A Davɩɩd vɩɩmã tõre, bõe la a kell n maane?
4 Rĩm a Davɩɩd vɩɩmã tõre, yaa toog wakat tɩ yaa noog wakat me, a kell n teega a Naandã. A yeela woto: “Zu-soaba, mam geta yãmb ne m sũur fãa. Mam Wẽnnaam, mam dellda yãmba.” (Yɩɩl 25:1, 2) Bõe n sõng a Davɩɩd t’a kɩs a saasẽ Ba wã sɩd woto fãa?
5, 6. A Davɩɩd sẽn da pʋʋsd a Zeova to-to wã wilgdame tɩ b zoodã ra yaa wãn-wãna?
5 Ne neb wʋsgo, yaa b sẽn wat n tar zu-loees bal la b pʋʋsd Wẽnnaam. Yãmb sã n tar zoa tɩ yaa a sẽn wat n dat tɩ y kõ-a ligdi, wall y sõng-a n maan bũmb bal la a wat yãmb nengẽ, y sũur na yɩ noog ne-a sɩda? A sã n minim n maand woto, tõe tɩ y na n tagsame t’a pa nong-y ye. La a Davɩɩd ra pa maand woto ne a Zeova ye. Ra yaa sũ-noog wakat tɩ yaa toog wakat me, a sẽn da pʋʋsd to-to wã wilgdame t’a nonga a Zeova, la t’a teeg-a lame.—Yɩɩl 40:9.
6 Daar a yembre, a pẽga a Zeova n yeel woto: “Zu-soaba, tõnd Soaala, yãmb yʋʋr yaa kãseng dũniyã tɛk fãa. Dẽ yĩng n kɩt tɩ yãmb kɩt tɩ y waoogr loog saase.” (Yɩɩl 8:2) Gom-kãensã pa wilgd t’a Davɩɩd ne a Zeova zoodã ra tara pãng sɩda? A sẽn da mi t’a Zeova pãngã la a ziirã yaa kãsengã kɩtame t’a pẽgd-a “daar fãa.”—Yɩɩl 35:28.
7. D sã n pʋʋsd a Zeova wakat fãa, wãn to la nafd tõndo?
7 D sã n pʋʋsd a Zeova wakat fãa wa rĩm a Davɩɩde, d na n maneg n kɩs-a-la sɩda. Biiblã yeela woto: “Bɩ y kolg Wẽnnaam, la bãmb na kolg yãmba.” (Zak 4:8) D sã n pʋʋsd a Zeova, paasda d zoodã pãnga. Yaa ne pʋʋsgã maasem me la d tõe n paam vʋʋsem sõngã.—Karm-y 1 Zã 3:22.
8. D sã n pʋʋsdẽ, bõe yĩng tɩ d pa segd n togsd gom-yɛng n yɩlemdẽ?
8 Yãmb sã n pʋʋsdẽ, y wae n togsda goam kẽer wakat fãa bɩ? Sã n yaa woto, nand tɩ y pʋʋs bɩ y reng n tags bilf n ges y sẽn na n yeel bũmb ningã. Mams-y yãmb sẽn na n tar zoa, tɩ yãmb sã n seg taab fãa bɩ y togsd-a gom-yɛng n yɩlemdẽ. A sũur na yɩ noog sɩda? Tõe t’a pa na n le wa rat n sõs ne yãmb yɛs ye. Yaa sɩd t’a Zeova kelgda neb nins fãa sẽn pʋʋsd-a ne pʋ-peelmã, la yɩta sõma tɩ d ra wae n togsd gom-yɛng ye.
9, 10. a) D sã n wa pʋʋsd Wẽnnaam, bõe la d tõe n yeele? b) Bõe la d tõe n maan tɩ sõng-d tɩ d maneg n pelgd d pʋg n pʋʋsd a Zeova?
9 D sã n pʋʋsd Wẽnnaam yĩngr-yĩngr bala, na n yɩɩ toog tɩ d paam a zoodo. D sã n pelgd d pʋg n pʋʋsd a Zeova, d zoodã pãng na n paasdame, tɩ d maneg n kɩs-a sɩda. La d sã n wa pʋʋsd Wẽnnaam, bõe la d tõe n yeele? Wẽnnaam Gomdã yeta woto: “Bũmba fãa pʋga, pʋʋs-y Wẽnnaam n kose la y pʋʋs barka la y wilg Wẽnnaam bũmb nins yãmb sẽn datã.” (Fil. 4:6, Kãab-paalgã Koe-noogo) Sɩd me, sẽn wa n yaa bũmb ning fãa n pak-do, wall n dat n sãam tõnd ne a Zeova zoodã, d tõe n pʋʋs-a lame n kos sõngre.
10 Biiblã pʋgẽ, b wilgda rap la pagb sẽn yɩ wẽn-sakdb sẽn pʋʋs Wẽnnaam, tɩ d sã n bʋgs b sẽn yeel bũmb ninsã zug bɩ na n nafd-do. (1 Sãm. 1:10, 11; Tʋʋ. 4:24-31) Makre, Yɩɩll Sõamyã sebrã pida ne yɩɩl la pʋʋsg neb sẽn gʋls n wilg b sũ-sãamse, la b sũ-noogo. D sã n karemd gom-kãens n bao n wʋm b võore, na n sõng-d lame tɩ d maneg n pelgd d pʋg n pʋʋsd a Zeova.
BƲGSD-Y WẼNNAAM SAGLSÃ ZUGU
11. Bõe yĩng tɩ d segd n bʋgsd Wẽnnaam saglsã zugu?
11 A Davɩɩd yeela woto: “Zu-soabã tõog zemsa zãnga. . . . A kõta zɩɩlem soab yam.” (Yɩɩl 19:8) Rẽnd baa d sã n yaa zɩɩlem soaba, d sã n tũud Wẽnnaam noyã, d lebgda yam soaba. La sagls kẽer n be Biiblã pʋgẽ tɩ d sã n dat n dɩ b yõod sõma bɩ d segd n bʋgs b zugu. Wala makre, d sã n bʋgsd Biiblã noy zugu, na n sõng-d lame tɩ baa d karen-bi-taas wall d tʋmd-n-taas sã n wa rat tɩ d maan sẽn pa segd bɩ d kell n sak Wẽnnaam. Na n sõng-d lame me tɩ d lak d mens ne zɩɩmã, n da kẽes d toog dũniyã yɛl pʋsẽ, la d tũud Biiblã noy futã la mengã manegr wɛɛngẽ. D sã n minim n bʋgsd Wẽnnaam saglsã zugu, na n sõng-d lame tɩ d segl d mense, tɩ zu-loɛɛg sã n wa bɩ d bãng d sẽn na n maan to-to. Rẽ, d na n tõog n gila sũ-sãamse.—Yel. 15:28.
12. Sogs-bʋs la d tõe n sok d mens tɩ sõng-d tɩ d tũ Wẽnnaam saglsã?
12 D ket n gũuda Wẽnnaam pʋlemsã pidsgu. La rẽ yĩnga d manesmã wilgdame tɩ d kɩsa sɩd tɩ b na n pidsame, la tɩ yaa Wẽnnaam daabã maaneg n pak tõnd n yɩɩd bɩ? D kɩsa sɩd tɩ Babilon-kãsengã na n sɩd sãama ka la bilf bɩ? D ket n tẽeda ne d sũur fãa tɩ tẽngã na n wa lebga arzãn tɩ d paam n vɩɩmd a zugu, la tɩ kũum na n vʋʋgame bɩ? D ket n moonda koɛɛgã ne yẽesem bɩ, bɩ yaa d mengã raab la d lʋɩɩsd taoore? A Zeova yʋʋrã waoogr la a naamã teelg n ket n pak tõnd n yɩɩd bɩ? D sã n bʋgsd sogs a woto buud zugu, d na n tõog n dɩka yɩɩl-gʋlsdã togs-n-taare, n kɩt tɩ Wẽnnaam noyã yɩ d “pʋɩɩr wakat sẽn ka sɛta.”—Yɩɩl 119:111.
13. Bõe yĩng t’a Zezi karen-biisã ra pa wʋmd bũmb kẽer võore? Kõ-y makre.
13 Bũmb kẽer n be Biiblã pʋgẽ tɩ d pa wʋmd b võor sõma ye. Bala wakat ning a Zeova sẽn yãk n na n vẽneg tõnd tɩ d wʋm b võorã nan pa ta ye. Yɩɩ woto ne a Zezi tʋm-tʋmdbã. A yeel-b-la naoor wʋsg tɩ b na n namsa yẽ la b kʋ-a. (Karm-y Matɩe 12:40; 16:21.) La tʋm-tʋmdbã pa wʋm a gomdã võor ye. Yɩ a Zezi sẽn wa n ki n lebs n vʋʋgã poor la a vẽneg a meng ne-ba, n sõng-b tɩ b wʋm bãngr-goam nins sẽn gomd Kiristã yellã võore. (Luk 24:44-46; Tʋʋ. 1:3) Sẽn paase, yɩ a Zezi karen-biisã sẽn wa n paam vʋʋsem sõngã zaeeb yʋʋmd 33 Pãntekotã tɛk la b bãng tɩ Wẽnnaam Rĩungã na n dɩɩ naam saasẽ.—Tʋʋ. 1:6-8.
14. Mak-sõng bʋg la tõnd saam-biis nins sẽn vɩɩmd yʋʋmd 1900 soabã sẽnesã bas-yã?
14 Woto me, yʋʋmd 1900 wã poore, kiris-neb hakɩkã ra tẽedame tɩ bũmb kẽer n na n maan ‘yaoolem wakatã,’ tɩ pa yɩ ye. (2 Tɩm. 3:1) Wala makre, yʋʋmd 1914 soabã, kẽer da tagsdame tɩ b na n kẽnga saasẽ. La sẽn pa yɩ wa b sẽn da tagsdã, b kell n zãmsa Biiblã, n bãng tɩ yaa tɩlae tɩ b reng n moon koɛɛgã. (Mark 13:10) Rẽ n so tɩ b maan tigis-kãseng yʋʋmd 1922, Sedaar Põent sẽn be Ohio, Etazĩni soolmẽ wã. Tigsgã sasa, a Joseph Rutherford sẽn da lʋɩt koɛɛgã mooneg taoorã yeela nebã woto: “Rĩmã rɩta naam masã! Yãmb yaa a koe-taasdba. Woto yĩnga, moon-y-yã, moon-y-yã, moon-y Rĩmã la a rĩungã.” Rẽ tɛk n tãag masã, a Zeova nin-buiidã moonda ‘Wẽnnaam soolem koe-noogã,’ tɩ nebã wʋsg mi-b rẽ yĩnga.—Mat. 4:23; 24:14.
15. Bõe yĩng tɩ d sã n bʋgsd a Zeova sẽn ges a nin-buiidã yell to-to wã zug bɩ na n naf-do?
15 A Zeova sẽn ges a nin-buiidã yell to-to pĩnd wẽndẽ wã sɩd bee yamleoogo. A ket n maanda woto me rũndã-rũndã . D sã n bʋgsd rẽ zugu, d na n maneg n kɩsa sɩd t’a tõe n pidsa a raabã. Na n kɩtame me tɩ d ket n tagsd bãngr-goam nins sẽn nan pa pidsã yelle, n kɩs sɩd tɩ b na n pidsame.
TƲMD-Y WẼNNAAM TƲƲMDÃ NE YẼESEM
16. D sã n tʋmd a Zeova tʋʋmdã ne yẽesem, bark bʋs la d paamda?
16 A Zeova sẽn yaa tõnd Wẽnnaamã yaa Wẽnnaam sẽn tʋmde. Yɩɩl-gʋlsdã ra yeela a Zeova woto: “Ãnda n yaa wa yãmba?” A paasame: “Yãmb kang yaa kãn-kãe, yãmb nug tara pãnga, yãmb nug-rɩtg zẽkame.” (Yɩɩl 89:9, 14) A Zeova sẽn yaa Wẽnnaam sẽn tʋmdã, d sã n maand d sẽn tõe fãa n teend a Rĩungã, noom-a lame, t’a ningd-d barka. A neeme t’a Kaset rãmbã fãa, pagb la rapa, kom-bɩɩs la kom-kãsems “ka maand kʋɩɩng ye.” (Yel. 31:27) D sã n tʋmd d Naandã tʋʋmdã ne yẽesem, d rɩkda a togs-n-taare. Woto noogda a Zeova sũuri, la kõt tõnd me sũ-noogo.—Karm-y Yɩɩl Sõamyã 62:13.
17, 18. D sã n tũud a Zeova sor-wilgrã, wãn to la paasd d tẽebã pãnga? Kõ-y makre.
17 D sã n tũud a Zeova sor-wilgrã, paasda d tẽebã pãnga. Tẽeg-y Israyɛll nebã sẽn wa n na n kẽ kãabg tẽngẽ wã. A Zeova yeela maan-kʋʋdb nins sẽn da zãad kãabg koglgã tɩ b lʋɩ nin-buiidã taoor tɩ b kẽn n kẽ Zʋrdẽ kʋɩlgã. La nin-buiidã sẽn ta kʋɩlgã noorã, b mikame tɩ koomã ra pidame n loog a kʋɩl-kogsã, bala ra yaa saas wakate. Bõe la b ra na n maane? B ra na n tilga b fu-rotã kʋɩlgã noor n gũ semen a wãn tɩ koomã boog bɩ? Ayo. B teega a Zeova zãng-zãnga, n tũ a sẽn yeelã. Biiblã yeela woto: “Kuga walsa koglga zɩtba sẽn ta kʋɩlgã, b nao sẽn sɩɩs kooma, ad-y kooma sẽn da zoetã yalsa zĩig pʋgẽ. . . . Kuga walsa koglga zɩtba yalsa soa, kʋɩlga sẽn kʋɩ wã sʋka, tɩ Israyɛl kamb fãa looge.” (Zoz. 3:12-17, Sebr Sõngo) Yaa vẽeneg tɩ Israyɛll nebã sẽn yã tɩ koomã sẽn da zoet wʋsgã yalsame wã, b sũy yɩɩ noogo. B sẽn tũ a Zeova sor-wilgrã, b tẽebã pãng paasame.
18 Yaa sɩd tɩ rũndã-rũndã, a Zeova pa maand yel-soalem a woto n sõngd a nin-buiidã ye. La d sã n wilgdẽ tɩ d kɩs-a-la sɩda, a ningd-d-la barka. A kõt-d-la a vʋʋsem sõngã, tɩ d paamd raood n moond Rĩungã koɛɛgã dũniyã gill zugu. Sẽn paase, a Zezi Kirist sẽn yaa a Zeova pipi kaset soabã pʋlma a karen-biisã t’a na n teel-b lame. A yeela woto: “Bɩ y kẽng n maan nebã buud fãa tɩ b yɩ mam karen-biisi. . . . La gese, mam bee ne yãmb wakat fãa hal tɩ ta wakat sɛɛbo.” (Mat. 28:19, 20) A Zeova Kaset rãmb wʋsg sẽn da yaa neb sẽn zoet yãnd wilgame tɩ yaa vʋʋsem sõngã n kõ-b raood tɩ b tõe n moon neb b sẽn pa mi ne yẽesem.—Karm-y Yɩɩl Sõamyã 119:46; 2 Korẽnt dãmb 4:7.
19. Baa bãag wall kʋʋlem sã n kɩt tɩ d pa tõe n tʋm Wẽnnaam tʋʋmdã wʋsgo, d tõe n kɩsa sɩd ne bõe?
19 Bãag wall kʋʋlem yĩnga, d tẽed-n-taas kẽer pa tõe n tʋm Wẽnnaam tʋʋmdã wa b sẽn datã ye. La b tõe n kɩsa sɩd t’a Zeova sẽn yaa ‘nimbãan-zoeer Ba la belsg fãa Wẽnnaamã’ mii tõnd ned kam fãa yɛl sẽn yaa to-to wã. (2 Kor. 1:3) A nanda modgr ning d sẽn maand n teend a Rĩungã. Sẽn paase, d fãa segd n tẽegame tɩ sẽn yɩɩd fãa, yaa d sẽn tẽed Kiristã sẽn ki tɩ yɩ maoongã yĩng la d na n paam fãagre.—Heb. 10:39.
20, 21. Bõe la d tõe n maan n wilg tɩ d kɩsa a Zeova sɩda?
20 A Zeova ratame tɩ d maan d sẽn tõe tɛk a tũudmã pʋgẽ, la d teend a tʋʋmdã ne d paoongo. D rata ne d sũy fãa n “maan koe-moond tʋʋmde.” (2 Tɩm. 4:5) Bala d sã n sõngd neb a taabã tɩ b “bãng sẽn yaa sɩda,” noom-d lame. (1 Tɩm. 2:4) Vẽenega, d sã n pẽgd a Zeova la d waoogd-a, d paamda bark wʋsgo. (Yel. 10:22) Sẽn paase, kɩtdame tɩ sẽn wa n yaa a soab fãa bɩ d kell n teeg d Naandã.—Rom 8:35-39.
21 La wa d sẽn yã wã, yɩl n kɩs sɩd t’a Zeova noyã yaa tõnd nafr yĩngã baooda modgre. Woto wã pʋʋsd-y-yã a Zeova. Bʋgsd-y-yã a sẽn pids a pʋlemsã to-to pĩnd wẽndẽ wã zugu, la y bʋgsd a sẽn na n maan dẽ to-to ka la bilfã me zugu. Kell-y n tʋm-y a tʋʋmdã ne yẽesem me. A Zeova noyã na n paa wakat sẽn ka sɛta. Yãmb sã n sak no-kãense, yãmb me na n vɩɩmda wakat sẽn ka sɛta.
[Zãmsgã sogsgã]
[Foto seb-neng 12]
[Foto seb-neng 15]
Yãmb na n teega a Zeova wa Israyɛll nebã sẽn maan to-to a Zozue wakatẽ wã bɩ? (Ges-y sull 17, 18)
