1. 1) ¿Keniuj tanankiliaj taltikpakneminij keman teisa kinnauatiaj, uan keyej? 2) Komo aksa moueyineki, ¿keniuj tanankilia keman kiyolmajxitiaj?

TALTIKPAKNEMINIJ tataman tanankiliaj keman kinnauatiaj maj kichiuakan teisa. Xa ika miak pakilis kitakamatij akin okachi ueyichiujkej, sayoj ke senkis kiixtopeuaj komo iuampoy oso okachi amo kipia tanauatil ke yejua. No tataman tein kimachiliaj keman kinyolmajxitiaj oso kinmelauaj; sekin motayokoltiaj oso mopinaujmatij, uan oksekin kinolinia maj kiyekchiuakan tein moneki. ¿Keyej tataman tanankiliaj? Se taman porin moueyinekij. Nejon uelis kiuikas aksa maj kinemili ke amo onkaya keyej kiyolmajxitiskej, kiixtopeuas uan mopolouilis nepaleuil tein kimakasnekij (Prov. 16:18).

2. ¿Keyej akin yekmelauj tikchiuaj kemej Cristo tiktasojkamatij tein techyolmajxitia iTajtol Dios?

² Sayoj ke akin yekmelauj tikchiuaj kemej Cristo tiktasojkamatij maj techyolmajxitikan, uan okachiok komo mokixtia itech iTajtol Dios. Tein techelnamiktia Jiova techmaka tamatilis, ta techmachtia uan techpaleuia maj amo techmekaui tominpialis, auilnemilis, maj amo titeltayikan vino nion maj tikuikan drogas (Prov. 20:1; 2 Cor. 7:1; 1 Tes. 4:3-5; 1 Tim. 6:6-11). Uan no, ‘kuali moajsi toyolo’ porin tiktakamatij itanauatiluan Dios (Is. 65:14).

3. ¿Keniuj moneki titanemiliskej ijkon kemej kichiuak akin kijkuiloj Salmo?

³ Komo amo tiknekij tikpoloskej tokuali uikalis iuan toTajtsin tein moajsi iluikak, moneki tiksentokaskej tiktakamatiskej kuali tayolmajxitilis tein kitemaka. Moneki titanemiliskej kemej akin kijkuiloj Salmo: “Tein titechelnamiktia nimoaxkatilia nochipaya, porin semi nechyolpaktia” (Sal. 119:111). ¿Techyolpaktia itanauatiluan Jiova ijkon kemej David, oso kemansa techouijmaka tiktakamatiskej? Komo kemansa  techouijmaka tikseliskej se tayolmajxitilis, maj amo timosenkauakan. Uelis tikchiuaskej maj okachi titakuaujtamatikan ke nochipa techualkuilis tein kuali keman tikchiuaj tein Jiova techtajtania. Maj tikitakan eyi taman keniuj tikchiuaskej.

4. ¿Toni nochipa kinextij David?

⁴ Tekiuaj David kemansa kuali moajsia uan kemansa amo, sayoj ke nochipa senkis takuaujtamatia iuan Jiova itech inemilis. Yejua kijtoj: “Tejua moixpan, Jiova, nimotataujtia ika nochi noyolo. NoDios, mouan nitakuaujtamati” (Sal. 25:1, 2). ¿Toni kipaleuij David maj ijkon takuaujtamati?

5, 6. ¿Keniuj kinextia Biblia kuali uikalis tein kipiaya David iuan Jiova?

⁵ Miakej kitataujtiaj Dios sayoj keman kipiaj kuejmolmej. Xikonnemili ke se motasojikniuj sayoj mitsontemoua keman kineki tomin oso se kualtakayot. Satepan, tionmotajtaniskia keyej mitsontemoua. Sayoj ke David amo ijkon katka. Yejua nochipa kinextij ke kitasojtaya Jiova uan iuan takuaujtamatia keman kuali moajsia uan keman amo (Sal. 40:8).

⁶ Xikonita keniuj David motasojkamatik uan kiueyichiuak Jiova ijkuak kijtoj: “ToTajtsin Jiova, ¡semi ueyi motokay itech nochi taltikpak, tejua akin moueiyo moteixmatiltia okachi ajko ke itech iluikak!” (Sal. 8:1). ¿Tikonita keniuj tel kuali mouikaya iuan iTajtsin akin moajsi iluikak? Kemej kimoujkaitaya iueiyo Jiova, kiolinij maj kiueyichiua “nochi tonal” (Sal. 35:28).

7. ¿Keniuj techpaleuia netataujtil?

⁷ Ijkon kemej David, moneki nochipa timonojnotsaskej iuan Jiova uan ijkon tikiskaltiskej totakuaujtamatilis iuan. Biblia kijtoua: “Ximotokikan iuan Dios uan Yejuatsin no motokis namouan” (Sant. 4:8). Netataujtil techtokia iuan Dios uan no yejua se taman tein okachi techpaleuia maj tikselikan iespíritu (xikonixtajtolti 1 Juan 3:22).

8. ¿Keyej moneki maj amo tikijtokan sayoj se taman keman tiktataujtiaj Jiova?

⁸ Keman tikontataujtia Dios, ¿nochipa sayoj se taman tikonijtoua? Komo ijkon, achto ke tikonchiuas se netataujtil, xikonnemili tein tikonneki tikonijtos. Komo nochipa tikiluiskiaj sayoj se taman se totasojikniuj oso se tochankauj keman tikitaskiaj, ¿kiuelitaskia? Xa satepan amo kinekiskia techkakis. Sayoj ke Jiova amo keman kiixtopeuaskia se netataujtil tein kichiua ika nochi iyolo se itekitikauj akin amo kikaua, sayoj ke motelneki maj amo tikijtokan nochipa sayoj se taman.

9, 10. 1) ¿Toni uelis tikijtoskej itech tonetataujtiluan? 2) ¿Toni techpaleuis maj tikiluikan Jiova tein kisa itech toyolo keman tiktataujtiaj?

⁹ Komo tiknekij timotokiskej iuan Jiova, amo nochipa tikiluiskej sayoj seki taman. Ijkon kemej tiktapouiskej tein tikpiaj toyolijtik, okachi timotokiskej uan titakuaujtamatiskej iuan. ¿Toni uelis tikijtoskej itech tonetataujtiluan? Biblia kijtoua: “Nachipa ximoteixpantikan iixpantsinko Totajtsin Dios ika namonetatatautilis uan xiktasojkamachilikan [...]. Uan no xiktajtanilikan Dios nochi ten namechpoloa” (Filip. 4:6). Kemej tikitaj, uelis tikiluiskej Jiova nochi tein kijtakoua tokuali uikalis iuan oso tonemilis.

¹⁰ No semi techpaleuia komo tikitaj itech Biblia netataujtilmej tein kichiujkej itekitikauan Dios (1 Sam. 1:10, 11; Hech. 4:24-31). Itech amaix Salmos moajsi miak nekuikatilmej uan netataujtilmej tein kichiujkej iixpan Jiova. Ompa tikajsij miak taman tein kimachilijkej, kemej ueyi tayokol hasta ueyi yolpakilis. Komo timomachtiaj nejon netataujtilmej,  techpaleuis maj tikiluikan Jiova tein kisa itech toyolo.

11. ¿Keyej moneki titanemiliskej itech itayolmajxitilis Dios?

¹¹ David kijtoj: “Tein Jiova techelnamiktia semi takuaujtamach, kichiua tamatkej akin amo kipia tamatilis” (Sal. 19:7). Kemej tikitaj, uelis timochiuaskej titamatinij komo tiktakamatij itanauatiluan Dios. Kemansa monekis titanemiliskej itech itayolmajxitilis Jiova porin sayoj ijkon uelis okachi techpaleuis. ¿Keyej? Porin keman itech titanemiliaj, techpaleuia maj tikmatikan toni tikchiuaskej keman tikpiaskej ouijkayomej. Kemej neskayot, techpaleuis maj tikxikokan tayejyekolis itech kaltamachtiloyan oso kampa titekitij, maj tiktakamatikan tanauatil ika esti, maj amo timokalakikan itech política, maj timotakentikan uan maj timochijchiuakan kemej tayolmajxitia Biblia. Keman tikajsikamatij keniuj kiita Jiova nejon, techolinis maj tikchiuakan tein moneki achto ke tikpiaskej nejon ouijkayomej uan tikixtaliskej toni tikchiuaskej. Keman ijkon tikchiuaj, techpaleuia maj amo tikpiakan kuejmolmej tein kiualkui (Prov. 15:28).

12. ¿Itech katiyejua netajtanilmej moneki titanemiliskej tein techpaleuis maj tikchiuakan kemej Jiova techelnamiktia?

¹² Ijkon kemej tikchiaj maj mochiua tein Dios motenkaua, ¿tiknextiaj ke iuan titakuaujtamatij uan tiksentokaj tiktekitiliaj? Kemej neskayot, ¿yekmelauj tikneltokaj ke Ueyi Babilonia amo uejkaua ixpoliuis? ¿Tiksentokaj tikneltokaj ke tinemiskej itech se xochital nikan taltikpak kemej ijkuak tikixmatkej iTajtol Dios? ¿Titanojnotsaj ika yolpakilis uan amo tikauaj maj nion teyi techtsakuili maj tikchiuakan itekiyo Dios? ¿Tiksentokaj tikitaj ke motelneki neajokuilis, maj mochipaua itokay Jiova uan maj monexti ke sayoj yejuatsin kinamiki maj taixyekana? Titanemiliskej itech nejin netajtanilmej techpaleuis maj ‘timoaxkatilikan nochipaya’ tein techelnamiktia Jiova (Sal. 119:111).

13. ¿Keyej yekinika imomachtijkauan Jesús amo kiajsikamatiaj seki taman? Xikonijto se neskayot.

¹³ Xa moajsi seki taman itech Biblia tein amo tikyekajsikamatij porin Jiova kiita ke ayamo uelis momatis. Jesús miakpa kiniluij itatitaniluan ke yejua monekia tajyouis uan momikilis (xikonixtajtolti Mateo 12:40 uan 16:21). Sayoj ke yejuan amo kimatiaj toni kijtosnekia. Kiajsikamatkej hasta keman Jesús moajokuik, monextij ininixpan imomachtijkauan, uan “kintamachilistapoj [...]. Uan de ompa yejuan kajsikamatke ya nochi ne nintajkuiloluan den ne tanauatiani” (Luc. 24:44-46; Hech. 1:3). No ijkon, itatojtokakauan Jesús kiajsikamatkej ke iTekiuajyo Dios moajsiskia ne iluikak sayoj ijkuak kiselijkej iespíritu Dios itech Pentecostés xiuit 33 (Hech. 1:6-8).

14. Satepan ke panok xiuit 1900, ¿toni kuali neskayot kikaujkej miakej tokniuan keman amo mochiuak tein kichiayaj kiitaskej itamian tonalmej?

¹⁴ No ijkon, satepan ke panok xiuit 1900, akin yekmelauj kichiuayaj kemej Cristo kineltokayaj ke mochiuaskia seki taman itech ‘itamian tonalmej’ tein amo ijkon yeskia (2 Tim. 3:1). Kemej neskayot, itech xiuit 1914, sekin kinemilijkej ke niman kinuikaskiaj iluikak. Keman amo mochiuak tein kichiayaj, oksepa moyekmachtijkej iTajtol Dios uan kiitakej ke achto monekia kitetapouiskej kuali tanauatilmej noyampa taltikpak (Mar. 13:10). Yejua ika, itech se ueyi nechikol kampa mosentilijkej akin uejuejka kayomej tein mochiuak (Ohio, Estados  Unidos) itech xiuit 1922, Joseph F. Rutherford, akin ijkuak kiixyekanaya tekit, kijtoj: “¡Xikitakan, Tekiuaj taixyekantok! Namejuan nankiteixmatiltiaj. Yejua ika, xikteixmatiltikan, xikteixmatiltikan, xikteixmatiltikan Tekiuaj uan itekiuajyo”. Nejon tonal uan hasta axkan, itekitikauan Jiova moixmatij kemej akin kitetapouiaj “kuali tanauatilmej ika tekiuajyot” (Mat. 4:23; 24:14, TNM).

15. ¿Keniuj techpaleuia komo tiknemiliaj keniuj Jiova kipaleuiani ixolal?

¹⁵ Komo tiknemiliaj keniuj Jiova kipaleuiani ixolal ne uejkauj ijkon kemej axkan, okachi titakuaujtamatiskej ke kichiuas itanejnekilis tein ayamo tikitaj. No ijkon, tein techelnamiktia Dios, techpaleuia maj tiksentokakan tiknekikan tikitaskej maj mochiua tein achtook kijtoj, uan techpaleuis maj titakuaujtamatikan ke yekmelauj kichiuas tein motenkaua.

16. ¿Toni tatiochiualismej tikpiaj ijkuak tiksentokaj titekitij ika yolpakilis itech tanojnotsalis?

¹⁶ ToTajtsin Jiova nochipa kichiujtok tein moneki. Akin kijkuiloj Salmo, tajtanik: “¿Akoni kipia chikaualis kemej tejua, Jah?”. Uan no kinextij: “Momay semi chikauak, uan moyekmay moueyichiua” (Sal. 89:8, 13). Kemej Dios nochipa kichiujtok tein moneki, kitasojkamati uan techtatiochiuia keman tiksentokaj tikpaleuiaj iTekiuajyo. Kiita ke itekitikauan akin tataman xiujmej kipiaj, amo tatsiuij, ta tekitij chikauak (Prov. 31:27). Yejuan kichiuaj kemej toTajtsin uan kisentokaj kichiuaj itekiyo. Semi kinualkuilia yolpakilis keman kitekitiliaj ika nochi ininyolo, uan Jiova kitelyolpaktia kitiochiuas tekit tein kichiuaj (xikonixtajtolti Salmo 62:12).

17, 18. ¿Keniuj totakuaujtamatilis iuan Dios mochikaua keman tikchiuaj tein technauatia? Xikonijto se neskayot.

 ¹⁷ ¿Keniuj moskaltia totakuaujtamatilis iuan Jiova keman tikchiuaj tein technauatia? Maj tiknemilikan tein kipanokej israelitas keman ajsikej itech Tal tein Dios motenkaujka kinmakas. Jiova kinnauatij tiopixkamej tein kiuikayaj kaxon tein kinelnamiktiaya netenkaualis maj mometskalakianij itech ueyiat Jordán. Sayoj ke kiitakej ke semi ueyi katka porin nejon tonalmej semi kiouataj katka. ¿Toni kichiujkej israelitas? ¿Kinemilijkej mokauaskej ompa atenoj uan kichiaskej maj kaxani at? Amo, ta yejuan takuaujtamatkej iuan Jiova uan kichiujkej tein kinnauatij. ¿Toni mochiuak? Tajkuilol kijtoua: “Niman keman akin kiuikayaj Kaxon ajsikej hasta Jordán uan ininmetsuan tiopixkamej akin kiuikayaj Kaxon apaliujkej atenoj, amej tein ualtemouayaj peuak motsakuiliaj. [...] Uan tiopixkamej akin kiuikayaj Kaxon tein kinelnamiktiaya netenkaualis tein iaxka Jiova ijkatoyaj itech tal uakik, itajkotiampa Jordán, uan nochi Israel panotiaya itech tal uakik, hasta keman nochi xolal kitamipanauij Jordán” (Jos. 3:12-17). Maj timonemilikan keniuj momachilijkej keman kiitakej keniuj ueyiat motsakuilij. ¡Okachi takuaujtamatkej iuan Jiova porin kichiujkej tein kinnauatij!

¹⁸ Semi melauak ke axkan Jiova amo kichiua nejon kemej ne uejkauj, sayoj ke kemaj techtatiochiuia ijkuak titakuaujtamatij uan tiktakamatij. Ika ichikaualis tein tekititok techpaleuia maj titetapouikan iTekiuajyo noyampa taltikpak. Uan Jesucristo, yekinika iTaixpantijkauj Jiova, motenkauak iuan imomachtijkauan ke kinpaleuiskia itech nejin tekit tein motelneki. Satepan ke moajokuik kijtoj: “Xiyakan nochi tech in senmanauak uan xikinnextilikan nochi in taltikpakuani [...]. Uan xikmatikan ke Nejuatsin niyetos nachipa namouan” (Mat. 28:19, 20). Miakej itaixpantijkauan Jiova akin semi kinouijmaka tajtoskej, kiitanij keniuj iespíritu kinpaleuiani maj kinnojnotsakan akin amo kinixmatij (xikonixtajtolti Salmo 119:46 uan 2 Corintios 4:7).

19. ¿Toni uelis tikyekmatiskej maski amo semi ueli tiktekitiliaj Jiova kemej tiknekiskiaj?

¹⁹ Oksekin tokniuan amo semi uelij tekitij porin mokokouaj oso xiuejkejya. Sayoj ke uelis senkis kineltokaskej ke “Dios [akin] nachipa techyoliknelijtinemi” uan techyolseuia, kiajsikamati tein sejsemej kipanouaj (2 Cor. 1:3). Dios kitasojkamati nochi tein tikchiuaj ijkuak tiktekitiliaj. Maj amo tikelkauakan ke tikpiaskej nemakixtilis komo titakuaujtamatij itech nemilis tein Cristo kitemakak, uan tikchiuaj itekiyo Dios nochi tein tiueliskej (Heb. 10:39).

20, 21. ¿Keniuj uelis tiknextiskej ke titakuaujtamatij iuan Jiova?

²⁰ Se kiueyichiuas Dios kijtosneki, tikuiskej nochi tein tiueliskej, totonaluan, tochikaualis uan tein tikpiaj. Ika nochi toyolo tiknekij titanojnotsaskej “ika in Tajtoltsin de Dios” (2 Tim. 4:5). Tiyolpakij porin tikinpaleuiaj oksekin maj “kajsikamatikij in melauak Tajtoltsin de Dios” (1 Tim. 2:4). Keman tikueyitaliaj Jiova akin kipia nochi uelilis, tikpiaj tein okachi kuali iixpan (Prov. 10:22). Uan techpaleuia maj senkis titakuaujtamatikan iuan toTajtsin (Rom. 8:35-39).

²¹ Kemej tikitakejya, moneki tikchiuaskej seki taman tein techpaleuis maj titakuaujtamatikan ke Jiova techyekana ika tamatilis. Tikchikauaj totakuaujtamatilis keman tikchiuaj netataujtil, tiknemiliaj keniuj kichiuak itanejnekilis ne uejkauj uan keniuj no ijkon kichiuas amo uejkaua, uan no tikueyichiuaj. Komo tiktakamatij tein Jiova techelnamiktia, yeski toaxka “nochipaya”, tein kijtosneki ke tinemiskej nochipaya.