1. (a) Cua ta algun manera cu hende ta reacciona riba instruccion y conseho, y dicon? (b) Con orguyo por afecta un persona su punto di bista di conseho?

 HENDE ta reacciona na maneranan hopi distinto ora nan haya instruccion. Tin hende ta acepta un ordo di un persona cu tin autoridad sin protesta, pero e sugerencianan di un hende di nan mes edad of cu tin menos autoridad nan ta rechasa mesora. Tin hende ta sinti tristeza, berguensa of ta bira preocupa ora nan haya disciplina of conseho, pero otronan ta sinti nan motiva, sigur di nan mes y cu e deseo di haci mihor. Kico ta causa e diferencianan ey? Un factor ta orguyo. Ora un persona arogante haya conseho, e ta pensa cu esey no ta conta p’e. Kico e ta haci? E ta rechasa e conseho y no ta beneficia di instruccion valioso cu e por a haya.—Prov. 16:18.

2. Dicon cristiannan berdadero ta aprecia conseho for di e Palabra di Dios?

² Di otro banda, cristiannan berdadero si ta aprecia bon conseho, vooral ora e ta basa riba e Palabra di Dios. Dicon? Wel, e recordatorionan di Jehova ta haci nos sabi, pasobra nan ta siña nos con pa evita e trampanan di materialismo, inmoralidad sexual, droga y mal uzo di alcohol. (Prov. 20:1; 2 Cor. 7:1; 1 Tes. 4:3-5; 1 Tim. 6:6-11) Ademas, nos ta disfruta di un “curason contento” pasobra nos ta obedece e recordatorionan di Dios.—Isa. 65:14.

3. Ki actitud di e escritor di un salmo nos lo kier imita?

³ Pa nos conserva e amistad valioso cu nos tin cu nos Tata celestial, Jehova, nos tin cu sigui practica su consehonan sabi den nos bida. Nos mester imita e bon actitud di e escritor di un salmo cu a skirbi: “Mi a hereda bo testimonionan [of, recordatorionan] pa semper,  pasobra nan ta e goso di mi curason.” (Sal. 119:111) Nos tambe ta contento cu e mandamentonan di Jehova? Of tin biaha nos ta haya nan mucho pisa pa cumpli cu ne? Hasta si de bes en cuando ta dificil pa nos acepta cierto conseho, nos no mester desanima. Un cos cu nos por haci ta fortalece nos confianza den e echo cu e instruccionnan di Jehova semper ta pa nos bon. Ban wak tres manera cu nos por haci esey.

4. Kico ta un cos cu no a cambia nunca den David su bida?

⁴ Rey David tabatin hopi ups and downs den su bida, pero un cos no a cambia nunca: su confianza absoluto den su Creador. El a bisa: “Na bo, o SEÑOR, mi ta halsa mi alma. O mi Dios, den bo mi ta confia.” (Sal. 25:1, 2) Kico a yuda David cultiva asina un confianza den su Tata celestial?

5, 6. Kico e Palabra di Dios ta revela tocante e amistad cu David tabatin cu Jehova?

⁵ Hopi hende ta resa na Dios solamente ora nan tin problema. Imagina cu bo tin un amigo cu ta ora e tin mester di placa, of ora e kier pa bo hacie un fabor, so bo ta tende di dje. Cu tempo, bo ta cuminsa cuestiona e motibo pakico e ta bo amigo. Pero David su amistad cu Jehova no tabata asina. Durante henter su bida, tanto den tempo bon como den tempo malo, el a demostra cu e tabata stima Jehova y a confi’e.—Sal. 40:8.

⁶ Tuma nota di e palabranan di alabanza y gratitud cu David a expresa na Jehova: “O SEÑOR, nos Señor, ki mahestuoso bo nomber ta riba henter mundo, abo cu a pone bo splendor mas ariba di e cielonan!” (Sal. 8:1) Bo a ripara for di e palabranan di David con intimo su amistad cu su Tata celestial tabata? David tabata asina impresiona cu Jehova su gloria y grandeza cu e kier a alab’e “henter dia.”—Sal. 35:28.

7. Ki beneficio nos ta saca ora nos ta comunica regularmente cu Jehova?

⁷ Mescos cu David, nos tin cu comunica cu Jehova cu regularidad pa nos por fortalece nos confianza den dje. Bijbel ta bisa: “Hala cerca Dios, y lo e hala cerca boso.” (Sant. 4:8) Oracion ta hala nos cerca Dios y ta un manera importante pa haya su spirito santo.—Lesa 1 Juan 3:22.

8. Dicon nos mester evita di keda ripiti e mesun cosnan den oracion?

⁸ Kico di bo oracionnan? Bo tin e tendencia di keda ripiti cierto frase of uza tur biaha e mesun palabranan? Si ta asina, tuma un par di minuut prome cu bo haci oracion pa pensa riba loke bo kier bisa. Un ehempel: Si tur biaha cu bo topa un amigo, bo ta bis’e e mesun cosnan bes tras bes, lo e gusta esey? Despues di tempo, casi sigur lo e no kier scucha bo mas. Claro cu Jehova nunca lo rechasa oracion sincero di un di su sirbidornan leal, pero lo ta bon pa nos evita di haci oracionnan repetitivo.

9, 10. (a) Tocante kico nos por haci oracion? (b) Kico por yuda nos haci oracionnan mas significativo?

⁹ Si nos ta desea di hala mas cerca Jehova, ta claro cu nos no por papia cu ne tocante cosnan general of superficial so. Mas nos conta Jehova nos pensamento- y sintimentonan di mas profundo, mas cerca dje nos lo hala y mas nos lo confia den dje. Kico asina nos por inclui den nos oracionnan? E Palabra di Dios ta contesta: “Den tur cos, pa medio di oracion y suplica hunto cu gradicimento, laga Dios sa kico ta boso peticionnan.” (Flp. 4:6) En realidad, nos por papia cu Jehova tocante cualkier cos cu ta influencia nos bida of nos amistad cu ne.

¹⁰ Nos por siña hopi for di e oracionnan di sirbidornan fiel cu tin para skirbi den Bijbel. (1 Sam. 1:10, 11; Echo. 4:24-31) E buki di Salmonan tin cantidad di oracion y cantica dirigi na Jehova. Den nan nos ta  haya tur emocion humano: for di agonia te na gran alegria. Si nos studia e palabranan ey cu sirbidornan leal a expresa, nan por yuda nos haci oracionnan mas significativo na Jehova.

11. Dicon nos tin cu medita riba e consehonan di Dios?

¹¹ David a declara: “E testimonio [of, recordatorio] di SEÑOR ta fiel, e ta haci hende simpel bira sabi.” (Sal. 19:7) Pues, aunke nos no tin dje hopi experencia ey, nos por bira sabi si nos obedece e mandamentonan di Dios. Pero tin algun conseho den Bijbel cu nos tin cu medita ariba si nos kier keda fiel den tur situacion. Por ehempel, ora nos medita riba principionan biblico, esey por yuda nos resisti presion of tentacion na scol y na trabou. Tambe esaki por yuda nos respeta Dios su ley tocante sanger, keda neutral den asuntonan politico y aplica principionan biblico ora di scoge kico pa bisti. Pues, meditacion ta prepara nos pa situacionnan dificil cu por surgi. Ora nos ta compronde kico Dios ta pensa tocante e asuntonan ey, nos por anticipa cierto problema y dicidi den nos curason kico nos lo haci prome cu e situacion presenta. E tipo di meditacion y preparacion ey por yuda nos evita hopi dolor di curason.—Prov. 15:28.

12. Riba cua preguntanan nos mester medita pa obedece e recordatorionan di Dios?

¹² Con nos ta hiba nos bida? Nos ta demostra cu nos ta confia den Jehova y ta keda lanta den sentido spiritual mientras cu nos ta warda p’e cumpli cu su promesanan? Por ehempel, di berdad bo ta kere cu denter di poco Babilonia e Grandi lo ser destrui? E bendicionnan cu ta na caminda—manera bida eterno den Paradijs riba tera y e resureccion—ta mesun real ainda pa bo cu tempo bo a conoce e berdad? Bo a keda cu bo entusiasmo pa sirbishi, of mas bien bo a laga asuntonan personal bay na prome luga den bo bida? E speransa di resureccion, e santificacion di e nomber di Jehova y vindicacion di su soberania ainda ta importante pa bo? Ora nos medita riba e preguntanan aki, esey por yuda nos cumpli cu e recordatorionan di Dios y considera nan como un herencia “pa semper.”—Sal. 119:111.

13. Dicon e cristiannan di prome siglo tabatin problema pa compronde algun cos? Duna un ehempel.

¹³ Kisas nos ta lesa algun cos den Bijbel cu nos no ta compronde completamente pasobra ainda no a yega e momento pa Jehova clarifica nan. Hesus a bisa su apostelnan bes tras bes cu lo e tabatin cu sufri y muri. (Lesa Mateo 12:40; 16:21.) Pero e apostelnan no a compronde kico e tabata kiermen. Ta te despues cu Hesus a resucita y aparece na e discipelnan y “a habri nan mente completamente pa nan capta nificacion di e Scritura”, nan a bin compronde su palabranan. (Luc. 24:44-46; Echo. 1:3) Di igual manera, e siguidornan di Cristo no a compronde cu e Reino di Dios lo a ser estableci den cielo, sino te ora cu nan a ricibi spirito santo na Pentecoste di aña 33.—Echo. 1:6-8.

14. Ki bon ehempel nos rumannan na principio di siglo 20 a pone pa nos?

¹⁴ Algo similar a pasa na principio di siglo 20. E cristiannan berdadero tabatin varios idea robes tocante kico lo tuma luga durante “e ultimo dianan.” (2 Tim. 3:1) Por ehempel, na aña 1914, algun di nan a pensa cu denter di poco Dios lo a hiba nan cielo. Ora loke nan a spera no a sosode, nan a bolbe haci un estudio profundo di e Scritura y a bin realisa cu un gran campaña di predicacion mester a tuma luga prome. (Mar. 13:10) Ta pesey na aña 1922, Joseph  F. Rutherford, kende e tempo ey tabata dirigi e trabou di predica, a bisa esnan presente na e asamblea internacional na Cedar Point, Ohio (Merca): “Tende! E Rey ta reina! Boso ta su agentenan di publicidad. Pesey, anuncia, anuncia, anuncia e Rey y su reino.” Di e dia ey padilanti, predicacion di “e bon noticia di Reino” a bira e marca di identificacion di e sirbidornan di Jehova di e tempo aki.—Mat. 4:23; 24:14.

15. Dicon ta bon pa nos medita riba loke Jehova a haci pa su pueblo?

¹⁵ Ta bon pa nos medita riba tur loke Jehova a haci pa su pueblo, tanto den pasado como awor. Esaki ta fortalece nos confianza cu e por cumpli cu su boluntad y proposito den futuro. Ademas, e recordatorionan di Dios ta yuda nos keda den expectativa di su profecianan cu tin cu cumpli ainda. Nos por tin sigur cu esaki ta yuda nos confia plenamente den su promesanan.

16. Cua ta algun bendicion cu nos ta haya debi cu nos ta participa activamente den sirbishi?

¹⁶ Nos Dios, Jehova, ta un Dios dinamico, un Dios cu ta actua. E salmista a puntra: “Ken ta manera bo, o SEÑOR poderoso?” Y el a agrega: “Bo tin un brasa fuerte; bo man ta poderoso, bo man drechi ta halsa.” (Sal. 89:8, 13) Como cu Jehova ta un Dios di accion, e ta aprecia e esfuerso cu nos ta haci den sirbishi y ta bendiciona nos pa esey. E ta mira cu tur su sirbidornan—homber y muher di tur edad—no ta sinta man crusa ni ta “come pan di flohedad.” (Prov. 31:27) Mas bien, nos ta imita nos Creador y ta hopi ocupa cu actividadnan teocratico. Ademas, ora nos ta sirbi Jehova di henter nos curason, nos ta sinti un gran satisfaccion, y pa Jehova ta un placer pa bendiciona nos sirbishi.—Lesa Salmo 62:12.

17, 18. Dicon nos por bisa cu obranan di fe ta fortalece nos confianza den Jehova? Duna un ehempel.

 ¹⁷ Den ki manera obranan di fe ta fortalece nos confianza den Jehova? Pensa riba loke e Israelitanan a pasa aden ora tabata tempo pa nan drenta e Tera Priminti. Jehova a duna e sacerdotenan cu tabata carga e arca di pacto e instruccion pa cana drenta Riu Jordan. Pero, ora e pueblo a yega eynan, nan a mira cu yobida di lente a pone cu e nivel di awa tabata halto y e awa di e riu tabata core masha duro. Kico e Israelitanan lo a haci? Nan lo a keda kampeer canto di oriya y warda simannan largo te ora e awa baha? No, nan a pone pleno confianza den Jehova y a sigui su instruccion. Cu ki resultado? Bijbel ta bisa cu asina cu ‘e saserdotenan ku tabata karga e arka a yega kantu di riu i a hinka nan pia den awa di Yordan, e awa ku tabata bini for di ariba a stòp di kore.’ Anto, “e saserdotenan ku tabata karga e arka di aliansa di SEÑOR tabata para ketu sin move den e riu seku. Nan a keda para einan te ora tur hende a yega na e otro banda.” (Jos. 3:12-17, BPK) Lo mester tabata masha emocionante pa nan ora nan a mira e awa bruto stop di core! Nan fe den Jehova a bira mas fuerte pasobra nan a confia den su instruccion.

¹⁸ Ta berdad cu awe Jehova no ta haci e tipo di milagernan ey pa su pueblo, pero si e ta bendiciona nos obranan di fe. Su spirito santo ta duna nos e forsa y curashi cu nos mester pa predica e mensahe di Reino rond mundo. Y Hesucristo, e Testigo principal di Jehova, a sigura su discipelnan cu lo e apoya nan den e obra importante aki. Despues cu Hesus a resucita, el a bisa nan: “Bay, y haci hende di tur nacion mi discipel ... Y wak!, mi ta cu boso tur e dianan, te na conclusion di e era aki.” (Mat. 28:19, 20) Hopi Testigo di Jehova cu kisas ta timido of nervioso pa papia cu otro hende por conta di nan propio experencia con e spirito santo di Dios a duna nan curashi pa papia den sirbishi cu hende cu nan no conoce.—Lesa Salmo 119:46; 2 Corintionan 4:7.

19. Aunke nos no por haci mes hopi cu nos lo kier haci den e sirbishi di Jehova, nos por ta sigur di kico?

¹⁹ Algun ruman, pa motibo di maleza of edad avansa, no por haci mes hopi cu nan lo kier haci den sirbishi di Jehova. Pero nan por ta sigur cu “e Tata di tierno misericordia y Dios di tur consuelo” ta compronde nan situacion. (2 Cor. 1:3) E ta aprecia tur loke nos por haci den su sirbishi. Nos no mester lubida cu nos salbacion ta depende principalmente di nos fe den e sacrificio di rescate di Cristo.—Heb. 10:39.

20, 21. Cua ta algun manera cu nos por demostra confianza den Jehova?

²⁰ Adora Jehova ta encera cu nos ta uza nos tempo, energia y recursonan material mas tanto posibel den su sirbishi. Si, di henter nos curason nos ta desea di “haci e trabou di un predicador di e bon noticia.” (2 Tim. 4:5) Anto nos ta contento cu nos por hacie, ya cu esaki ta yuda otro hende “yega na un conocemento exacto di e berdad.” (1 Tim. 2:4) No tin duda cu ora nos ta honra y alaba Jehova, esey ta haci nos rico den sentido spiritual. (Prov. 10:22) Y esaki ta yuda nos desaroya un confianza inkebrantabel den nos Creador.—Rom. 8:35-39.

²¹ Manera nos a mira, no ta automaticamente nos ta haya confianza den Jehova su consehonan sabi; nos tin cu haci esfuerso pa cultiva esey. Pues, fortalece bo confianza pa medio di oracion. Medita riba e manera cu Jehova a cumpli cu su boluntad den pasado y con lo e bay hacie den futuro. Y sigui cultiva confianza den Jehova pa medio di obranan di fe. No lubida cu e recordatorionan di Jehova ta dura pa semper. Y si abo obedece nan, bo tambe lo biba pa semper!