1. a) Imatapash mandajpica ¿imatata huaquingunaca ruran? ¿Imamandata shina ruran? b) Consejota cujpica ¿imatata orgulloso gentecunaca ruran?

HUAQUINGUNACA autoridadta charij gentecuna imatapash mandajpica ratomi cazun. Cutin, jovenllacuna o na ashtaca autoridadta charijcuna mandajpica na cazungapaj munanllu. Imapash consejota cujpica llaquirin, pinganayachinmi. Cutin huaquingunaca cazungapami munan. Gentecunaca ¿imamandata shina can? Huaquinbica orgullosocuna caimandami shina can. Orgullosocunaca ali consejota cujpipash na cazungapaj munanllu, ñucaca chai consejotaca na minishtinichu ninmi (Prov. 16:18).

2. Bibliahuan consejota cujpica ¿imamamanda Jesusta catijcunaca cushijunchi?

² Jesusta catijcunaca Bibliahuan consejocunata cujpica cushijushpami chasquinchi. Jehová Diospa yarichishcacunami ama culquipilla ansiarichun, jarihuan huarmihuan ama juchapi urmachun, ama machachun, ama drogarichun ayudan (Prov. 20:1; 2 Cor. 7:1; 1 Tes. 4:​3-5; 1 Tim. 6:​6-11). Ashtahuangarin, Jehová Diospa mandashcacunata cazunami ‘tucui shunguhuan ninanda cushijuchun’ ayudan (Is. 65:14).

3. Salmo librota escribijmandaca ¿imatata yachajupanchi?

³ Jehová Diospa ñaupajpi ali ricurishpa catingapaca, paipa consejocunata cazushpami catina canchi. Salmo librota escribinshnami ñucanchipash cushijushpa cashna nina canchi: “Imashna causanata can yachachishcataca, tucui causaipi ñucapaj cachunmi japircani. Chai shimicunami, ñuca shungutaca cushichin” nishpa (Sal. 119:111). Huaquinbica Taita Diosta cazunaca shinllimi  can. Shinapash na desanimarinachu capanchi. Shinlli cajpipash Jehovata cazushpalla ali causanatami tucui shunguhuan confiana capanchi. Shinaca quimsa ayudacunata ricupashun.

4. Davidca ¿imatata paipa tucui causaipi rurarca?

⁴ Rey Davidca cushilla cashpapash llaquilla cashpapash paipa tucui causaipimi Jehová Diospi confiarca. Jehová Diospi confiashpami nirca: “Mandaj Dioslla, candami tucui ñuca almahuan mañasha. Ñuca Dioslla, candami yariashpa causani” nishpa (Sal. 25:​1, 2). Davidtaca ¿imata ayudarca Jehová Diospi tucui shunguhuan confiachun?

5, 6. ¿Imatata Salmo 8:1​ca Jehová Diosmanda rey Davidmandapash ricuchin?

⁵ Ashtaca gentecunaca problemacunata charishpallami Taita Diostaca ayudahuai nishpa mañan. Pensaripashunchi. Quiquinba amigo culquita minishtishpalla o imapash favorta minishtishpalla quiquinda cayajpica ¿imashinata sintiripanguiman? ¿Nachu favorta minishtimandallami cayajun yanguiman? Rey Davidca Taita Diosta tucui shunguhuan juyaimanda, Taita Diospi confiaimandami ali cashpapash o llaquipi cashpapash siempre Taita Diosta yarishpa causan carca (Sal. 40:8).

⁶ Rey Davidca Taita Diosta ninanda alicachishpa, agradicishpami nirca: ‘Mandaj Dioslla, ñucanchi Jatun Dioslla, canba shutica tucui cai pachapi ninanda alicachi tucushcami. Can punchapamba cajtaca jahua pachapimi churashcangui’ nishpa (Sal. 8:1). ¿Nachu cai shimicunata liishpaca ricunchi Rey Davidca Jehová Dioshuan alipacha llevarij cashcata? Jehová Dios punchapamba cajpi, Jatun Dios cajpimi Rey Davidca ‘tucui punllacuna’ Jehová Diosta alabarca (Sal. 35:28).

7. Mañashpaca ¿ima bendiciondata charipanchi?

⁷ Ñucanchicunapash Jehová Diospi ashtahuan confiangapaca rey Davidpa ejemplota catishpami Jehová Diostaca mañariajunalla canchi. Bibliaca ninmi: “Taita Diospajman quimirichi. Shina quimirijpica, paipash cangunapajman quimiringami” nishpa (Sant. 4:8). Mañashpami Taita Diospaman quimirinchi, paipa espíritu santotapash chasquinchi (1 Juan 3:​22, liingui).

8. ¿Imamandata na chai shimicunatallata nishpa Taita Diostaca mañana capanchi?

⁸ Taita Diosta mañajushpaca ¿chai shimicunatallatachu cutin cutin ninajunchi? Shina cajpica pensaripashunchi shuj rijsi o shuj familia tuparijpi ñucanchicuna siempre chaitallata chaitallata nijpica ¿cushijunmanllu? Taita Diosta mañagrijushpaca siempremi ashaguta pensarina canchi imatata nigrini nishpa. Tucui shunguhuan mañajpica cushijushpami Jehová Diosca uyan. Ñucanchi oraciongunata Jehová Dios uyachun munashpaca na chai shimicunatallata cutin cutin nishpa mañana canchichu.

9, 10. a) ¿Imacunamandata mañana capanchi? b) Taita Diosta aliguta mañangapaca ¿ima ayudacunatata charipanchi?

⁹ Jehová Diosman quimiringapaj munashpaca na yanga cosascunamandallachu Taita Diostaca mañana canchi. Tucui shunguhuan mañashpaca paiman quimirishpami paipi ashtahuan confiashun. Bibliapica ninmi: ‘Taita Diosmanmi, imatapash villashpa ninanda mañana canguichi. Tucui imamandapash pagui nishpa mañaichilla’ nishpa (Filip. 4:6). Ñucanchi causaipi ali cangapaj o Taita Diospa ñaupajpi ali ricuringapaca imagucunamandapash mañanallami canchi.

 ¹⁰ Taita Diosta aliguta mañangapaca ñaupa tiempopi Diosta sirvijcuna imashina mañashcatami Bibliapi ricuna canchi (1 Sam. 1:​10, 11; Hech. 4:​24-31). Shinallata Salmos libropipash, Diosta sirvijcuna jatun llaquipi cashpa, ninanda cushijushca cashpa imashina Taita Diosta mañajushcatami ricuna canchi.

11. ¿Imamandata Taita Diospa consejocunapi aligutapacha pensarina capanchi?

¹¹ Rey Davidca nircami: “Mandaj Dios yachachishca shimicunaca, imatapash pactachij cashpami, yanga runataca, alipacha yachajushcata ruran” nishpa (Sal. 19:7). Nali yachajushcacuna cashpapash Taita Diospa mandashcacunata cazushpami ali yachajushcacuna cuenda canchi. Shinapash, aliguta yachajungapaca Taita Diospa consejocunapimi aligutapacha pensarina canchi. Diospa consejocunapi aliguta pensarishpallami escuelapi o trabajopi tentacionguna ricurijpica shinlli tucushun. Shinallata Taita Diospa mandashcacunapi aliguta pensarishpallami, Taita Dios munashcashna aliguta vistirishun, arreglarishun, yahuarta respetashun, politicacunapipash na chapurishun. Imata ruragrijushpapash Taita Diosca imatashi ninga nishpa pensarishpallami, ima llaquicuna tianata cuenta japishpa llaquicunamandaca caruyai ushashun (Prov. 15:28).

12. Taita Diospa yarichishcacunata cazushpa causangapaca ¿ima tapuicunapita aligutapacha pensarina capanchi?

¹² Taita Diospa shimicuna pactaringacamanga ¿paipi confiashcata, shinallata espiritualmente rijcharia causajushcatachu ricuchinajupanchi? Babilonia shuti jatun pueblo ñalla tucurinataca ¿tucui shunguhuanllu crinchi? ¿Bibliata chaira yachajushca cuendachu Paraisopimi causasha nishpaca ninanda cushijunchi? ¿Ima jarcaicuna ricurijpipash tucui shunguhuanllu villachishpa, Diosta sirvishpa catinchi? ¿Huañushcacuna causarinata crina, Diospa shutita santificana o Jehová Dioslla mandana cashcata ricuchinaca cunangamanllu quiquinbaca importante can? Cai tapuicunapi aligutapacha pensarinami ayudanga Diospa yarichishcacunata ñucanchi “tucui causaipi” yaria causachun (Sal. 119:111).

13. Jesuspa catijcunaca ¿imamandata huaquin cosascunataca na intindi usharca? Shuj ejemplota nipangui.

¹³ Jehová Diospa intindichina tiempo nara chayajpimi Bibliapi huaquin cosascunata liishpaca huaquinbica nali intindi ushanchi. Apostolcunapa ejemplota ricupashun. Jesusca cutin cutinmi paipa apostolcunataca ñucaca sufrishpami huañuna cani nirca (Mateo 12:40; 16:​21, liingui). Shinapash paicunaca na intindi usharcachu. Jesús causarishpa paicunaman ricurishpa, ‘Dios escribichishca Shimicunata yachai ushachun paicunapa yuyaita pascajpillami’ paicunaca Jesuspa shimicunataca intindirca (Luc. 24:​44-46; Hech. 1:3). Shinallata Jesuspa catijcunaca huata 33, Pentecostespi espíritu santota chasquishpami, Diospa Reino jahua cielomanda mandai callarinataca intindi usharca (Hech. 1:​6-8).

14. Huata 1914​pi paicunapa yuyashcacuna na pactarijpica ¿imatata Jesusta catijcunaca rurarca?

¹⁴ Tauca huatacuna huashamanga Jesusta ali catijcunaca ‘tucurimui punllacunapi’ ima tucunataca na cabalta yacharcachu (2 Tim. 3:1). Huaquingunaca yarcami, huata 1914​pimi jahua cieloman rishun nishpa. Shinapash chai yuyai na pactarijpimi paicunaca Bibliata cutin aliguta estudiashpa tucui gentecunaman villachina cashcata cuenta japirca  (Mar. 13:10). Chaimandami, huata 1922​pica Cedar Point (Ohio, Estados Unidos) llactapi shuj asamblea internacionalpi huauqui Joseph F. Rutherfordca nirca: “¡Ricuichi Reyca ñami mandajun! Shinaca Reinomanda, Reymandapash villaichi, villaichi, villaichi” nishpa. Chai punllacunamandami Jehovata sirvijcunataca ‘ali villaicunata’ villajcuna nishpa gentecunaca rijsin (Mat. 4:23; 24:14).

15. Jehová Dios paipa sirvijcunata imashina cuidajushcata aliguta pensarinaca ¿imashinata ayudan?

¹⁵ Ñaupa tiempocunapipash cunan tiempocunapipash paipa sirvijcunata Jehová Dios imashina cuidajushcataca aligutami pensarina canchi. Chashna pensarinami ñucanchitaca Diospa shimicuna pactarinata crichun ayudanga. Ashtahuangarin Jehová Diospa tucui nishcacunapi ashtahuan confiachunmi ayudanga.

16. Espiritual cosascunapi ocupado cashpaca ¿ima bendiciondata charishun?

¹⁶ Jehová Diosmanda parlashpaca Bibliapica ninmi, canga ‘ninan ushaita charij Mandaj Diosmi cangui. Canba maquipash shinllipachami. Canba ali lado maquica, alicachi tucushcami’ can nishpa (Sal. 89:​8, 13). Shinaca Jehová Diosca na samajunllu. Ñucanchicunapash tucui shunguhuan paipa Reinota apoyajujpica cushijushpami bendician. Jehovata sirvijcunaca joven cashpapash mayorlla cashpapash ‘na yanga micushpalla causanllu’ (Prov. 31:27). Ashtahuangarin Jehovapa ejemplota catishpami espiritual cosascunapi ocupado can. Shina rurashpami paicunallata ninanda cushijun. Jehovapash cushijushpami villachishpa catichun paicunataca bendician (Salmo 62:​12, liingui).

17, 18. ¿Imamandata ninchi Jehovata cazushpaca, Jehovapimi ashtahuan confianchi nishpa? Shuj ejemplota nipai.

 ¹⁷ Jehová Diosta cazushpaca paipi ashtahuan confiashcatami ricuchinchi. Israelitacunapa ejemplota ricupashun. Paicunaca Jehová cusha nishca alpacunamanmi rinajurca. Chaimandami Jehová Diosca arca del pactota apashpa rinajuj sacerdotecunataca mandarca, Jordán yacumanmi ashata yaicuna canguichi nishpa. Shinapash chai punllacunapica ushashcata tamiajujpimi huaicutaca yacu junda yalijurca. Shinapash paicunaca Jehovapi confiashpami Jehovapa mandashcata cazurca. Paicunaca yacu bajarichun nishpaca na shuyanajurcachu. Bibliapi nishca shinaca, ‘arcata huandushpa rinajuj curacuna Jordán yacupi sarujpica, chai yacuca’ separarircami. Ashtahuangarin ‘Jordán yacu chaquishca chaupipimi shinlli shayanajurca. Paicunaca tucuilla gentecuna chimbangacamanmi shayanajurca’ (Jos. 3:​12-17). Jordán yacu separarijta ricushpaca israelitacunaca ninandami cushijushcanga. Jehovata cazuimandaca ashtahuanmi Jehová Diospi confiashcanga.

¹⁸ Cunan punllacunapica Jehová Diosca ñana shina milagrocunata ruranllu. Shinapash muyundi Alpapi Diospa Reinomanda villachingapaj esforzarijpica paipa espíritu santota cushpami ñucanchitaca ashtahuan villachichun ayudan. Diospa Reinomanda villachichunga Jesusca ayudasha nircami. Chaimandami Jesús causarishpaca nirca: ‘Ñucapa yachajujcuna tucuchunmi cai pachapi gentecunapaman rishpa villana, yachachina canguichi. Ricuichi, ñucami cai pacha tucuri punllacunacaman tucui punllacuna cangunahuan cani’ nishpa (Mat. 28:​19, 20). Ashtaca Testigocunaca shuj gentecunaman villachinataca manllanmi. Shinapash Diospa espíritu santopa ayudahuanmi na rijsishca gentecunaman villachita ushashca (Salmo 119:​46; 2 Corintios 4:​7, liingui).

19. Ungushca cashpa o mayorlla cashpapash ¿imatata yarina capanchi?

¹⁹ Huaquin huauquipanicunaca ungushca caimanda o mayorllagucuna caimandami Jehovapaca na ashtacata rurai ushan. Shinapash ‘ñucanchita ninanda llaquij, tucuipi cushichij Taita Diosca’ tucui chaicunataca alimi ricujun (2 Cor. 1:3). Ñucanchi rurai ushashcataca tucui shunguhuan cushicushpami ricujun. Ama cungapashunchichu, imaguta rurashpapash Jesús ñucanchita salvashcapi feta churashpallami salvarita ushashun (Heb. 10:39).

20, 21. ¿Imashinata Jehová Diospi confiashcata ricuchi ushapanchi?

²⁰ Jehová Diosta aliguta adorangapaj munashpaca ñucanchi tucui tiempohuan, tucui fuerzahuan, ñucanchi tucui charishcacunahuan Jehovata sirvipashunchi. Ñucanchica tucui shunguhuanmi ‘ali villaicunata villashpa puringapaj’ munanchi (2 Tim. 4:5). Gentecunaman ‘na llullashpa villajuj shimita’ yachachishpaca ninandami cushijunchi (1 Tim. 2:4). Jehová Diosta alabashpa, ninanda alicachishpami espiritualmente charij charij sintirinchi (Prov. 10:22). Ashtahuangarin, Jehová Diospi tucui shunguhuan confianatami yachajunchi (Rom. 8:​35-39).

²¹ Imashinami ricupashcanchi Jehová Diospi ashtahuan confiangapaca tarpuj runashnami shinllita esforzarina canchi. Shinaca, Jehová Diosta mañariashunchi, shinallata punda tiempocunapishnallata shamuj punllacunapi Taita Diospa munai pactarinapi aligutapacha pensaripashunchi. Shinallata, Taita Diosta cazupashunchi. Ama cungapanguichu, Jehovapa yarichishcacunaca unai unaicamanmi tianga. Taita Diospa yarichishcacunata cazushpallami ñucanchipash unai unaicaman causashun.