1. (a) Kuandu hetan konsellu, ema hatudu hahalok saida deʼit? Tanbasá? (b) Ema neʼebé foti-an hanoin saida kuandu hetan konsellu?

 EMA hatudu hahalok oioin kuandu sira hetan konsellu. Porezemplu, ema balu prontu atu simu konsellu husi ema-boot, maibé sira la simu konsellu husi kolega ka ema neʼebé ladún iha esperiénsia. No mós ema balu neʼebé hetan konsellu sai triste, laran-tun, no sente moe, maibé balu tan sente kontente no prontu atu hadiʼa. Tanbasá mak ema balu simu maibé balu fali lae? Tanba dala ruma ema sai foti-an. Kuandu ema neʼebé foti-an mak hetan konsellu, nia hanoin katak nia la presiza halo tuir, no ikusmai nia la bele hetan buat diʼak ida husi konsellu neʼe.—Provérbios (Amsal) 16:18.

2. Tanbasá mak ema kristaun neʼebé loos hafolin konsellu husi Maromak nia Liafuan?

² Maibé nuʼudar ema kristaun neʼebé loos, ita hafolin konsellu neʼebé ita simu, liuliu kuandu konsellu neʼe mai husi Maromak nia Liafuan. Jeová nia konsellu sira halo ita sai matenek, no ajuda ita atu sees husi hahalok aat oioin, hanesan buka deʼit rikusoin, hahalok la morál, no uza droga ka hemu demais. (Provérbios [Amsal] 20:1; 2 Korinto 7:1; 1 Tesalonika 4:3-5; 1 Timoteo 6:6-11) Liután neʼe, halo tuir Maromak nia konsellu sira sei halo ita haksolok.—Isaías (Yesaya) 65:14.

3. Oinsá mak ita bele halo tuir ezemplu husi ema neʼebé hakerek salmu?

³ Atu nafatin iha relasaun diʼak ho ita-nia Aman Jeová iha lalehan, ita tenke kontinua moris tuir ninia konsellu. Ema neʼebé hakerek salmu ida hatete: “Haʼu simu Ita-nia konsellu sira nuʼudar buat neʼebé haʼu-nian ba nafatin, tanba iha buat sira-neʼe haʼu-nia laran haksolok tebes.” (Salmo [Mazmur] 119:111) Ita  mós kontente atu halo tuir Jeová nia konsellu, ka dala ruma ita sente susar atu halo tuir? Maski ita sente hanesan neʼe, ita lalika rende an. Ita bele hametin ita-nia fiar katak halo tuir Maromak nia matadalan mak sempre lori diʼak mai ita. Maibé oinsá? Mai ita koʼalia kona-ba dalan tolu.

4. Maski Liurai David iha tempu diʼak no tempu susar, maibé nia nafatin halo saida?

⁴ Liurai David nia moris iha tempu susar no tempu diʼak, maibé nia nafatin tau fiar ba ninia Kriadór. Nia hatete: “Oh, Jeová, haʼu halo orasaun ba Ita ho haʼu-nia laran tomak. Oh, haʼu-nia Maromak, haʼu tau haʼu-nia fiar ba Ita.” (Salmo [Mazmur] 25:1, 2) Saida mak ajuda David atu hametin ninia fiar ba ninia Aman iha lalehan?

5, 6. David nia orasaun hatudu saida kona-ba ninia relasaun ho Jeová?

⁵ Ema barak halo orasaun kuandu sira iha susar laran deʼit. Maibé ita sente oinsá se kolega ida neʼebé hakbesik ba ita só nia hakarak deʼit ita-nia osan ka hakarak ita halo buat ruma ba nia? Karik ita komesa duvida katak nia la hadomi ita. Maibé David la halo hanesan neʼe ba Jeová. Nia nafatin halo orasaun iha tempu diʼak no tempu susar, hodi hatudu katak nia loloos hadomi Jeová no tau fiar ba Nia.—Salmo (Mazmur) 40:8.

⁶ Mai ita haree oinsá mak David fó hahiʼi no agradese ba Jeová. Nia dehan: “Oh, Jeová ami-nia Naʼi, Ita-nia naran mak furak iha mundu tomak, no Ita hasaʼe Ita-nia glória toʼo lalehan leten!” (Salmo [Mazmur] 8:1) Liafuan neʼe hatudu duni katak David iha relasaun neʼebé besik liu ho ninia Aman iha lalehan, loos ka lae? David sente hakfodak ho Jeová nia glória no kmanek toʼo hakarak hahiʼi Jeová “iha loron tomak”.—Salmo (Mazmur) 35:28.

7. Halo orasaun beibeik ba Jeová sei ajuda ita oinsá?

⁷ Hanesan ho David, ita mós presiza koʼalia beibeik ba Jeová liuhusi orasaun hodi bele hametin ita-nia fiar ba nia. Bíblia hatete: “Hakbesik ba Maromak, no nia sei hakbesik imi.” (Tiago 4:8) Orasaun ba Jeová ajuda ita atu hakbesik ba nia, no ida-neʼe mak dalan importante atu bele simu espíritu santu.—Lee 1 Joao 3:22.

8. Kuandu ita halo orasaun, tanbasá mak ita presiza kuidadu atu la uza liafuan neʼebé hanesan deʼit?

⁸ Kuandu ita halo orasaun, ita sempre uza liafuan neʼebé hanesan deʼit ka lae? Se nuneʼe, koko toʼok atu foti tempu uitoan antes ita halo orasaun no hanoin kona-ba buat neʼebé ita sei koʼalia. Porezemplu, se ita koʼalia kona-ba buat neʼebé hanesan deʼit ba ita-nia kolega, nia sei gosta atu rona ita ka lae? Karik nia sai baruk atu rona ba ita. Klaru katak Jeová sei simu ninia atan nia orasaun neʼebé hatoʼo ho laran, maibé ita mós presiza kuidadu atu la koʼalia repete liafuan neʼebé hanesan deʼit.

9, 10. (a) Ita bele koʼalia kona-ba saida deʼit iha ita-nia orasaun? (b) Saida mak bele ajuda ita atu halo orasaun iha dalan neʼebé diʼak liután?

⁹ Atu hakbesik liután ba Maromak, koʼalia kona-ba buat neʼebé jerál deʼit, neʼe la toʼo. Kuandu ita fó sai ita-nia hanoin no sentimentu ba Jeová, ita-nia fiar mós sai metin liután. Entaun, ita bele koʼalia kona-ba saida deʼit iha ita-nia orasaun? Maromak nia Liafuan hatete: “Iha buat hotu, harohan no hamulak bá hodi fó-agradese; hatoʼo imi-nia harohan ba Maromak.” (Filipe 4:6) Loos duni, ita bele koʼalia kona-ba buat naran deʼit neʼebé kona ita-nia moris no ita-nia relasaun ho Maromak.

 ¹⁰ Ita bele aprende buat barak husi Maromak nia atan sira-nia orasaun neʼebé hakerek iha Bíblia laran. (1 Samuel 1:10, 11; Apostolu 4:24-31) Porezemplu, iha livru Salmos, ita bele lee orasaun no knananuk barak neʼebé Maromak nia atan sira mak hatoʼo iha tempu haksolok no tempu susar. Hodi estuda didiʼak orasaun no knananuk sira-neʼe sei ajuda ita atu halo orasaun iha dalan neʼebé diʼak liután.

11. Tanbasá mak ita presiza hanoin didiʼak kona-ba Bíblia nia konsellu sira?

¹¹ David hatete: “Jeová nia konsellu mak ita bele fiar, halo ema neʼebé la iha esperiénsia sai matenek.” (Salmo [Mazmur] 19:7) Maski ita ladún iha esperiénsia, ita bele sai matenek hodi halo tuir Maromak nia ukun-fuan sira. Maibé atu hatudu laran-metin nafatin ba Jeová iha situasaun hotu, ita presiza hanoin didiʼak konsellu husi Bíblia. Porezemplu, hodi hanoin didiʼak Bíblia nia matadalan sei ajuda ita atu hamriik metin hasoru tentasaun oioin iha eskola ka serbisu-fatin. Ida-neʼe mós ajuda ita atu halo tuir Maromak nia lei sira hanesan kona-ba raan no buat polítiku nian, no moris tuir matadalan kona-ba hatais. Kuandu ita hanoin didiʼak Maromak nia konsellu, ita bele prepara ita-nia an atu hasoru situasaun oioin no halo desizaun nanis kona-ba buat neʼebé ita sei halo. Ida-neʼe sei ajuda ita atu la monu ba sala neʼebé lori susar ba ita-nia an.—Provérbios (Amsal) 15:28.

12. Pergunta saida deʼit mak bele ajuda ita atu rai Maromak nia konsellu?

¹² Nuʼudar ita hein ba Maromak nia promesa sira atu sai loos, ita hatudu fiar metin no buka uluk Ninia hakarak ka lae? Porezemplu, ita sei fiar ka lae, katak lakleur tan Babilónia Boot sei lakon mohu? Ita sei fiar metin ba bensaun iha futuru hanesan moris-hiʼas no hela ba nafatin iha mundu foun ka lae? Ita laran-manas nafatin atu haklaken ka lae? Ka, buka uluk ita rasik nia hakarak iha ita-nia moris? No atu Jeová halo ninia naran sai santu no defende ninia direitu atu ukun, ida-neʼe importante nafatin ba ita hanesan uluk ka lae? Hodi hanoin didiʼak pergunta hanesan neʼe ajuda ita atu rai iha ita-nia laran ‘Maromak nia konsellu sira nuʼudar buat neʼebé ita-nian ba nafatin’.—Salmo (Mazmur) 119:111.

13. Tanbasá mak Jesus nia dixípulu sira la komprende kona-ba buat balu? Fó toʼok ezemplu.

¹³ Dala ruma ita la komprende kona-ba buat balu neʼebé hakerek iha Bíblia laran tanba seidauk toʼo tempu ba Jeová atu esplika ho loloos. Iha tempu uluk, maski Jesus hatete beibeik ba ninia apóstolu sira katak nia sei hetan terus no mate, maibé sira la komprende. (Lee Mateus 12:40; 16:21.) Ikusmai, Jesus mate, moris hiʼas, mosu fali ba ninia dixípulu sira, no esplika ho klaru profesia kona-ba Kristu, no hafoin mak sira komprende kona-ba buat neʼebé Jesus hatete. (Lucas 24:44-46; Apostolu 1:3) Hanesan neʼe mós, só kuandu sira hetan espíritu santu iha loron Pentekostes 33 mak sira foin komprende katak Maromak nia Ukun sei harii iha lalehan.—Apostolu 1:6-8.

14. Iha tinan atus ida liubá, ita-nia irmaun-irmán sira hatudu ezemplu diʼak saida?

¹⁴ Nuneʼe mós ho maizumenus tinan atus ida liubá, ema kristaun neʼebé loos iha hanoin sala kona-ba buat neʼebé sei akontese iha “loron ikus sira”. (2 Timoteo 3:1) Porezemplu, sira balu hanoin katak sira sei saʼe ba lalehan iha tinan 1914, maibé ida-neʼe la akontese. Maski nuneʼe, sira nafatin badinas estuda Bíblia no haree katak ulukliu sira tenke halo serbisu haklaken iha mundu tomak. (Marcos  13:10) Iha tinan 1922, iha reuniaun boot internasionál iha Cedar Point, Ohio, Estadus Unidus, irmaun J. F. Rutherford, neʼebé toma konta ba serbisu haklaken, hatete: “Haree bá, Liurai neʼe ukun daudauk ona! Imi mak ninia atan sira neʼebé atu fó sai kona-ba neʼe. Tan neʼe, haklaken, haklaken, haklaken, kona-ba Liurai no ninia ukun.” Husi tempu neʼebá toʼo ohin loron, ema koñese Jeová nia atan sira nuʼudar ema neʼebé “haklaken liafuan diʼak reinu nian”.—Mateus 4:23; 24:14.

15. Tanbasá mak diʼak atu ita hanoin kleʼan kona-ba buat neʼebé Jeová halo ba ninia povu?

¹⁵ Kuandu ita hanoin kleʼan kona-ba buat neʼebé Jeová halo ba ninia povu iha tempu uluk no agora daudaun, ida-neʼe ajuda ita atu tau fiar ba Jeová nia kbiit atu kumpre ninia hakarak iha futuru. No kuandu ita hanoin didiʼak kona-ba Maromak nia promesa sira, ida-neʼe fó laran-manas mai ita tau fiar ba buat neʼebé sei akontese iha aban-bainrua.

16. Kuandu ita hakaʼas an atu halo Maromak nia serbisu, ida-neʼe lori bensaun saida deʼit?

¹⁶ Jeová mak Maromak moris nian neʼebé halo kmanek oioin. Hakerek-naʼin ba salmu ida hatete: “Sé mak forsa makaʼas hanesan Ita, oh Jah?” no hatutan tan: “Ita-nia liman mak makaʼas.” (Salmo [Mazmur] 89:8, 13) Tanba Jeová mak Maromak neʼebé badinas, nia hafolin no fó bensaun ba ita kuandu ita hakaʼas an atu halo ninia serbisu. Nia tau atensaun ba ninia atan sira hotu neʼebé la han “paun baruk-teen nian”. (Provérbios [Amsal] 31:27) Sin, maski ita sei labarik ka ferik-katuas, kuandu ita halo Maromak nia serbisu ho badinas, ita halo tuir ita-nia Kriadór nia ezemplu. Ida-neʼe lori  haksolok ba ita-nia an, no halo kontente Jeová.—Lee Salmo (Mazmur) 62:12. a

17, 18. Tanbasá mak ita-nia fiar sai metin liután nuʼudar ita halo tuir Jeová? Fó toʼok ezemplu.

¹⁷ Oinsá mak ita-nia fiar sai metin liután nuʼudar ita halo tuir Jeová? Mai ita hanoin kona-ba tempu neʼebé povu Israel atu tama iha rai neʼebé Maromak promete ona. Jeová haruka amlulik sira atu lori arka aliansa nian no tama ba Mota Jordaun nia klaran. Maibé kuandu sira toʼo mota neʼe, sira haree mota boot tun makaʼas tanba tempu udan. Povu Israel sei halo saida? Sira sei hein ba semana balu atu mota bele sai maran ka lae? Lae. Sira tau fiar tomak ba Jeová no halo tuir ninia matadalan. Rezultadu mak saida? Bíblia hatete: “Nuʼudar amlulik sira-nia ain kona bee, . . . mota neʼe para kedas.” Tuirmai, “amlulik sira hamriik iha mota Jordaun nia klaran neʼebé sai maran no ema Israel hotu hakur mota neʼe”. (Josué [Yesua] 3:12-17) Hanoin toʼok oinsá mak ema Israel sai kontente atu haree mota boot la tun tan! Sin, ema Israel nia fiar sai metin liután tanba sira halo tuir Jeová nia matadalan.

¹⁸ Maski ohin loron Jeová la halo milagre hanesan neʼe, maibé nia nafatin haraik bensaun ba ita kuandu ita hatudu fiar no halo tuir ninia matadalan. Maromak nia espíritu fó aten-brani mai ita atu haklaken Maromak nia Ukun iha mundu tomak. Nuʼudar Jeová nia Sasin-Naʼin boot liu, Jesus Kristu promete ba ninia dixípulu sira katak nia sei nafatin apoia sira, hodi dehan: “Neʼe duni, laʼo bá, hanorin nasaun hotu-hotu. . . . Haʼu sei hela nafatin hamutuk ho imi, toʼo mundu nia rohan.” (Mateus 28:19, 20) Testemuña barak neʼebé uluk moedór no lakohi koʼalia ho ema seluk, hatete katak Maromak nia espíritu santu mak fó aten-brani atu bele haklaken ba ema neʼebé la koñese.—Lee Salmo (Mazmur) 119:46; b 2 Korinto 4:7.

19. Maski dala ruma ita la bele halo buat barak iha Jeová nia serbisu, ita bele fiar saida?

¹⁹ Karik ita balu la konsege halo buat barak iha Maromak nia serbisu tanba moras ka ferik-katuas ona. Maibé ita bele fiar katak “Aman laran-diʼak nian no Maromak ksolok hotu nian” sei komprende ninia atan ida-idak nia situasaun. (2 Korinto 1:3) Jeová sei hafolin buat hotu neʼebé ita halo ba nia. Ita labele haluha katak ita-nia fiar ba Kristu nia sakrifísiu mak lori salvasaun ba ita.—Ebreu 10:39.

20, 21. Hodi halo saida deʼit mak ita bele hatudu ita-nia fiar ba Jeová?

²⁰ Ita halaʼo adorasaun ba Maromak hodi uza ita-nia tempu, forsa, no rikusoin ho laran tomak. Ita hakarak halaʼo ho didiʼak ita-nia serbisu haklaken. (2 Timoteo 4:5) Ita kontente atu halo nuneʼe tanba ida-neʼe ajuda ema seluk atu “simu matenek kona-ba lia-loos”. (1 Timoteo 2:4) Klaru katak fó hahiʼi no glória ba Jeová sei halo ita sai riku ho ninia bensaun barak. (Provérbios [Amsal] 10:22) No ida-neʼe mós sei halo ita tau fiar nafatin ba ita-nia Kriadór.—Roma 8:35-39.

²¹ Loos duni, ita presiza hakaʼas an atu hametin ita-nia fiar ba Jeová. Tan neʼe, sadere ba nia liuhusi orasaun. Hanoin didiʼak kona-ba oinsá mak Jeová kumpre ninia promesa iha tempu uluk no oinsá mak nia sei halo hanesan neʼe iha futuru. Hametin nafatin ita-nia fiar ba Jeová hodi halaʼo adorasaun neʼebé loos. Sin, keta haluha, Jeová nia konsellu sira sei hela ba nafatin, nuneʼe mós ho ema neʼebé halo tuir konsellu sira-neʼe!