1. 1) ¿Tuku max namakgkatsi tiku nastakyawakan chu tuku xlakata? 2) ¿La naʼakxilha tastakyaw chatum lataman komo lanka makgkatsikan?

LATAMANIN tanu tanu tuku tlawakgo akxni wi tuku kalimapakgsikan. Akxni chatum tiku kgalhi limapakgsin masta akgtum tastakyaw tunkun nakgaxmatkan pero akxni atanu tiku masta max ni katitlawanika kuenta. Na pulaklhuwa tuku makgkatsiyaw akxni kinkastakyawakanan: max nalilipuwanaw, nalilakgaputsayaw, nalimaxananaw o natlawa pi akinin tlakg naskujaw. ¿Tuku xlakata pulaklhuwa la nalimakgkatsiyaw? Pulaktum wa pi max lanka kinkamakgkatsikanan. Chuna, akxni wi tiku lanka makgkatsikan max nalakgmakgan tastakyaw chu ni lu xlakaskinka naʼakxilha tuku nawanikan (Prov. 16:18).

2. ¿Tuku xlakata xaxlikana kstalaninanin Cristo xlakaskinka akxilhaw xtastakyaw xTachuwin Dios?

² Xaxlikana kstalaninanin Cristo, lu xlakaskinka akxilhaw nakinkastakyawakanan tlakg chuna akxilhaw akxni kilhtikan xTachuwin Dios. Xtastakyaw Jehová tlawa skgalala nawanaw chu kinkamakgtayayan ni lhuwa tuku nakgalhiputunaw, ni natlawayaw talakgxtumit xalimaxana, ni nawayaw droga chu lhuwa kuchu (Prov. 20:1; 2 Cor. 7:1; 1 Tes. 4:3-5; 1 Tim. 6:6-11). Nachuna, tlan lipaxuwayaw xlakata «tlan natawila [ki]nakujkan» xlakata kgalhakgaxmataw xtastakyaw Dios (Is. 65:14).

3. ¿Tuku tayat xla salmista na tlan chuna natlawayaw?

³ Xlakata putum kilhtamaku tlan natalalinaw kinTlatkan xalak akgapun, talakaskin chuntiya nakgaxmataw xtastakyaw Jehová kkilatamatkan. Talakaskin natlawayaw la salmista tiku tsokgli: «Kimaxkinita milimapakgsin xlakata kanikxniwa kila nawan, wa  snun makgapaxawa kinakuj» (Sal. 119:111). ¿Kinkamakgapaxuwakgoyan xtastakyaw Jehová, o lu tuwa makgkatsiyaw nakgalhakgaxmataw? Komo min kilhtamaku lu tuwa makgkatsiyaw nakgaxmataw akgtum tastakyaw, ni kataxlajwaniw. Tlan lipawanaw pi tuku Jehová kinkawaniyan putum kilhtamaku tlakg tlan kimpalakatakan. Kaʼakxilhwi pulaktutu tuku tlan tlawayaw.

4. ¿Tuku xlakapastaka David natlawa kxlatamat?

⁴ Mapakgsina David makglhuwa tlan chu nitlan xmakgkatsi kxlatamat, pero xla chuntiya xlipawan xtastakyaw xMalakatsukina. Xla wa: «Kintikukan Dios, wata wix nakkilhaniyachan. KiDios, wix klipawanan» (Sal. 25:1, 2). ¿Tuku makgtayalh David lu nalipawan xTlat xalak akgapun?

5, 6. ¿Tuku wan Biblia xlakata la xtalalin David Jehová?

⁵ Lhuwa latamanin kajwatiya tlawanikgo oración Dios akxni titaxtumakgo tuku nitlan. Kalakpuwanti pi mi amigo kajwatiya xtalakatsuwinin akxni maklakaskin tumin o namakgtayakan. Chuna la titaxtu kilhtamaku max natsukuya lakpuwana tuku xlakata talakatsuwiniyan. Pero David ni chuna xwanit. Xla limasiyalh pi xpaxki Jehová chu pi xlipawan, akxni tlan xwi chu akxni xtitaxtuma tuku nitlan (Sal. 40:8).

⁶ Kaʼakxilhti la David masiyalh pi lu xpaxtikatsini Jehová: «Kintikukan Dios, y Kimapakgsinakan, mililanka y militliwekge ankin kkakxila la litsama ixlitilanka kakilhtamakuj. Talhman nak akgapun masiya laklikaknit lata tu katlawanita» (Sal. 8:1). ¿Akxilha la lu tlan xtalalin xTlat xalak akgapun? Xlakata xakxilha xlilanka Dios malankilh «wakg kilhtamakuj» (Sal. 35:28).

7. ¿La kinkamakgtayayan oración?

⁷ Xtachuna la David putum kilhtamaku katachuwinaw Jehová chu uma nakinkamakgtayayan tlakg nalipawanaw. Biblia kinkawaniyan: «Wa Dios nti nkatalakatsuwinitit, na nakatalakatsuwiniyan» (Sant. 4:8). Oración kinkamalakatsuwiniyan Dios chu na wa tuku talakaskin xlakata tlan nakgalhiyaw xʼespíritu santo (kalikgalhtawakga 1 Juan 3:22).

8. ¿Tuku xlakata ni watiya watiya nawanaw akxni natlawayaw oración?

⁸ ¿Akxni tlawaya oración makglhuwa watiya watiya tuku waniya Dios? Komo chuna tlawaya, kalimaxtu kilhtamaku akxni nina tlawaya mi oración xlakata nalakpuwana tuku nawana. ¿Xlakgatilh chatum amigo pi putum kilhtamaku watiya watiya tuku xwaniw? Max nialh xkinkakgaxmatnin. Xlikana, Jehová putum kilhtamaku kgaxmata tuku wanikgo kskujnin tiku nikxni makgxtakgkgo, pero kuenta kilitlawatkan ni watiya watiya tuku nawaniyaw.

9, 10. 1) ¿Tuku tlan nalichuwinanaw kioracioneskan? 2) ¿Tuku kinkamakgtayayan xlakata tlakg tlan nawankgo kioracioneskan?

⁹ Komo talakatsuwiniputunaw Jehová, ni kaj nawaniyaw tuku ni lu xlakaskinka. Akxni tlakg nawaniyaw tuku makgkatsiyaw kkinakujkan, tlakg natalakatsuwiniyaw chu tlakg nalipawanaw. ¿Tuku tlan nawanaw akxni natlawayaw oración? Biblia kinkawaniyan: «Paks kamasiyutit kxlakatin Dios wa ntu lakaskinatit kmioraciónkan, chu lantla mpala tu nalixakgatlilakapinatit, su naskinatit, na natamastayatit mpaxkatsinit» (Filip. 4:6). Tlan tachuwinanaw Jehová xlakata kilatamatkan chu xlakata la talalinaw.

¹⁰ Lu kinkamakgtayayan naʼakxilhaw xliʼakxilhtit lakchixkuwin chu lakpuskatin tiku xʼoracioneskan katsokgwilika kBiblia (1 Sam. 1:10, 11; Hech. 4:24-31). Salmos tatsokgwilinit lhuwa oraciones chu takilhtlin nema tlawanika Jehová.  Anta tasiya lhuwa tuku makgkatsikan la talilipuwan, chu asta la lhuwa paxuwakan. Akxni likgalhtawakgayaw uma oraciones, nakinkamakgtayayan xlakata natlawaniyaw Jehová tlakg tlan oraciones.

11. ¿Tuku xlakata talakaskin nalilakapastakaw xtastakyaw Dios?

¹¹ David wa: «Ixtastakyaw Kintikukan Dios snun xlikanaj, y maskgalali chatum ti nitu katsij» (Sal. 19:7). Maski ni lhuwa tuku katsiniyaw, tlan skgalala nawanaw komo kgaxmataw xlimapakgsin Dios. Pero min kilhtamaku talakaskin liwana nalilakapastaknanaw makgapitsi tastakyaw xlakata nakinkamakgtayakgoyan. ¿Tuku xlakata? Xlakata akxni chuna tlawayaw kinkamakgtayayan akxni titaxtuyaw tuku tuwa. Xlakata kinkamakgtayayan natayaniyaw taʼakglhuwit kʼescuela o kkimputaskujutkan, xlakata nakgaxmataw limapakgsin xlakata kgalhni, ni namakgtanuyaw tuku wi kkakilhtamaku chu makgantaxtiyaw tastakyaw xalak Biblia xlakata la lhakgananaw chu la takaxtayayaw. Komo akgatekgsaw tuku lakpuwan Dios xlakata uma temas nakinkamakgtayayan ni nakgalhiyaw taʼakglhuwit chu nakatsiyaw tuku natlawayaw komo natitaxtuyaw. Komo chuna tlawayaw ni nakgalhiyaw lhuwa taʼakglhuwit (Prov. 15:28).

12. ¿Tukuya takgalhskinin nalilakapastakaw xlakata nakgaxmataw xtastakyaw Dios?

¹² Chuna la kgalhkgalhimaw kakgantaxtulh tuku Dios wanit pi natlawa, ¿limasiyayaw pi tliwakga wi kintakanajlakan? Akgtum liʼakxilhtit, ¿xlikana kanajlayaw pi xaLanka Babilonia nialh makgas namasputukan? Xtachuna la pulana, ¿kanajlayaw pi nakgalhiyaw latamat nema nikxni nasputa kʼakgtum paraíso kKatiyatni? ¿Chuntiya lichuwinanaw Dios chu ni mastayaw talakaskin pi tuku lakaskinaw tlakg xlakaskinka naʼakxilhaw? ¿Lu xlakaskinka akxilhaw takgalhkgalhin xla talakastakwanat, natamasantujli xtukuwani Jehová chu nakatsikan pi wa lakgchan namapakgsinan? Komo nalilakapastakaw uma takgalhskinin nakinkamakgtayayan nalakapastakaw xtastakyaw Dios “xlakata kanikxniwa kilakan nawankgo” (Sal. 119:111).

13. ¿Tuku xlakata kstalaninanin Cristo kxapulana siglo wi tuku ni xʼakgatekgskgo? Kawili akgtum liʼakxilhtit.

¹³ Max likgalhtawakgayaw kBiblia tuku ni liwana akgatekgsaw xlakata nina chan kilhtamaku akxni Jehová liwana nakinkamaʼakgatekgsniyan. Jesús makglhuwa kawanilh xʼapóstoles pi xtalakaskin xpatinalh chu xnilh (kalikgalhtawakga Mateo 12:40; 16:21). Pero apóstoles ni akgatekgskgolh tuku xwamputun asta akxni xninita, xlakastakwananita chu katasiyanipa kstalaninanin, «timaxkikgolh ntapuwan lakimpi naʼakgakgatakgskgoy ntatsokgnun» (Luc. 24:44-46; Hech. 1:3). Nachuna, kstalaninanin Cristo ni xʼakgatekgskgonit pi xTamapakgsin Dios xʼama tawila kʼakgapun asta akxni kamaxkika espíritu santo kPentecostés xla kata 33 (Hech. 1:6-8).

14. Akxni xtsukuma siglo XX, ¿tuku lu tlan liʼakxilhtit kinkawilinikgon lhuwa natalanin akxni ni kgantaxtulh tuku xlakpuwankgo xlakata xaʼawatiya kilhtamaku?

¹⁴ Xtachuna la uma, akxni xtsukuma siglo XX xaxlikana kstalaninanin Cristo nitlan tuku xlakpuwankgo xlakata tuku xʼama la «[k]xaʼawatiya kilhtamaku» (2 Tim. 3:1, TNM). Akgtum liʼakxilhtit, kkata 1914 makgapitsi xlakpuwankgo pi nialh makgas xʼamaka kalinkan kʼakgapun. Akxni tuku xkgalhkgalhimakgo ni tunkun kgantaxtulh, liwana likgalhtawakgaparakgolh xTachuwin Dios, akxilhkgolh pi xtalakaskin lhuwa xlichuwinankgolh Dios (Mar. 13:10). Wa xlakata kkata 1922 Joseph F. Rutherford, tiku xpulalin la nalichuwinankan Dios, kawanilh tiku xwilakgo klanka  tamakxtumit niku xtamakxtumikgonit xala lhuwa países kCedar Point, (Ohio, Estados Unidos): «¡Kaʼakxilhtit, Mapakgsina mapakgsinamaja! Wixin tiku namakatsininanatit. Wa xlakata, kalichuwinantit, kalichuwinantit, kalichuwinantit, Mapakgsina chu xtamapakgsin». Lata uma kilhtamaku tlakg kalilakgapaskan kskujnanin Jehová xala uku chuna la lichuwinamakgo «xatlan tamakatsinin xla xtapakgsin Dios» (Mat. 4:23; 24:14).

15. ¿La kinkamakgtayayan nalilakapastakaw tuku Dios tlawanit xpalakata xkachikin?

¹⁵ Akxni lilakapastakaw tuku Jehová tlawanit xpalakata xkachikin lata makgasa chu la uku, tlawa pi nalipawanaw pi xla namakgantaxti xtalakaskin kilhtamaku nema aku mima. Nachuna, xtastakyaw Jehová kinkamakgtayayan chuntiya nalipawanaw pi namakgantaxti tuku wanit chu kinkamakgtayayan tlakg nalipawanaw pi nakgantaxtu tuku malaknunit.

16. ¿Tuku tasikulunalin makglhtinanaw akxni lu liskujaw nalichuwinanaw Dios?

¹⁶ KiDioskan, Jehová, chatum Dios tiku lhuwa tuku tlawa. Salmista kgalhskilh: «¿Tiku kgalhi ixlilanka la wix?». Chu na wa: «Snun tliwekge mimakan, laklikaknit taskujut kalitlawaya mimpakgkanaj» (Sal. 89:8, 13). Jehová lu xlakaskinka akxilha chu sikulunatlawa la akinin lu liskujaw xlakata nalichuwinanaw xTamapakgsin. Xla akxilha pi kskujnanin, lakchixkuwin chu lakpuskatin, tiku linkgoya kata chu tiku nina linkgo kata ni wakgo «kaxtalanchu xla lilhkitit» (Prov. 31:27). Wata tlawakgo chuna la xMalakatsukinakan chu limaxtukgo lhuwa kilhtamaku xlakata xtaskujut Dios. Akxni skujnikgo Jehová xliputum xnakujkan lu tlan limakgkatsikgo, chu Jehová lu paxuwa nasikulunatlawa xtaskujutkan (kalikgalhtawakga Salmo 62:12).

17, 18. ¿Tuku xlakata tlan wanaw pi kkgalhakgaxmatkan Jehová kinkamakgtayayan tlakg nalipawanaw? Kawili akgtum liʼakxilhtit.

 ¹⁷ ¿La tlakg lipawanaw Jehová akxni masiyaniyaw pi kanajlaniyaw? Kalakpuwaw tuku titaxtukgolh israelitas akxni tanukgolh kTiyat nema xKawanikanit pi Nakamaxkikan. Jehová xkawaninit sacerdotes tiku xchaxlinkgo caja xla talakkaxlan pi xtlawankgolh asta akxni xtantunkan xtanukgolh kgalhtuchokgo Jordán. Pero, akxni israelitas chankgolh anta, akxilhkgolh pi sen xla primavera xtlawanit pi lu kstakli kgalhtuchokgo. ¿Tuku tlawakgolh? ¿Tamakgxtakgkgolh xkilhtun kgalhtuchokgo chu kgalhkgalhikgolh makgapitsi semanas asta akxni xunkli chuchut? Ni, xlakan lipawankgolh Jehová chu kgaxmatkgolh tuku xkawaninit. ¿La kakitaxtunilh? Biblia kinkawaniyan: «Akxni xtantunkan sacerdotes tiku xchaxlinkgo caja xla talakkaxlan tanukgolh kchuchut, uma chuchut tsukulh xunka chu [...] sacerdotes [...] tayakgolh kxaskakni tiyat, kxitat Jordán, xlakata putum kachikin Israel xpatakutli kgalhtuchokgo» (Jos. 3:12-17, Nueva Versión Internacional). ¡Max lu kaks lilakawankgolh akxni akxilhkgolh pi lakgtliwakga chuchut tsukukgolh taktakgo! ¡Max lu tatliwakglhli takanajla nema xkgalhinikgo Jehová! Chu chuna lalh xlakata kgaxmatkgolh tuku xkawaninit.

¹⁸ Xlikana Jehová la uku nialh tlawa milagros xlakata nakinkamakgtayayan, pero kasikulunatlawa tuku tlawayaw. Xpalakata xlitliwakga Dios kinkamasiyaniyan lu tlan nalichuwinanaw xTamapakgsin xlikalanka kakilhtamaku. Jesucristo xapulana xtatayana Jehová, kawanilh kstalaninanin pi xʼama kamakgtaya kʼuma lu xlakaskinka taskujut. Akxni xlakastakwanita kawanilh: «Kapitit, na kamasiyunikgotit xlipaks akgmakgat chixkuwin [...]. Na kakatsitit mpi xaliankgalhin nakkatalatamayan nchali chali, asta nasputa» kakilhtamaku (Mat. 28:19, 20). Lhuwa xtatayananin Jehová tiku maxanankgo o ni lu chuwinankgo akxilhkgonit pi xʼespíritu santo Dios kamatliwakglhnit xlakata nakatachuwinankgo tiku ni lakgapaskgo akxni lichuwinankgo Dios (kalikgalhtawakga Salmo 119:46 chu 2 Corintios 4:7).

19. ¿Maski wi tuku nila tlawayaw tuku liwana kililakapastakatkan?

¹⁹ Makgapitsi natalan lakchixkuwin chu lakpuskatin nila lhuwa tuku tlawakgo xlakata tatatlakgo o linkgoya kata. Pero tlan lipawankgo pi «xmakilhtsukina talakgalhaman, chu xmastana xlipaks ntakgtsiyajni» akgatekgsa tuku titaxtumakgo (2 Cor. 1:3). Xla lu xlakaskinka akxilha putum tuku tlawayaw xlakata naskujniyaw. Kililakapastakatkan pi nalakgtaxtuyaw komo kanajlaniyaw xtamakamastan Cristo chu tlawayaw putum tuku matlaniyaw (Heb. 10:39).

20, 21. ¿La tlan limasiyayaw pi lipawanaw Jehová?

²⁰ Nakakninaniyaw Jehová kilhchani, liwana nalimaklakaskinaw kilhtamaku, namastayaw kilitliwakgakan chu tuku xtapalh kgalhiyaw. Xlikana, xliputum kinakujkan “makgantaxtiputunaw wa yuma ntaskujut” (2 Tim. 4:5). Lu lipaxuwayaw xlakata kamakgtayayaw amakgapitsin «nalakgapaskgoy wa ntalulokgtat» (1 Tim. 2:4). Akxni kakninaniyaw chu malankiyaw Jehová matliwakglha kintakanajlakan (Prov. 10:22). Chu kinkamakgtayayan lu nalipawanaw kiMalakatsukinakan (Rom. 8:35-39).

²¹ Chuna la akxilhnitaw, ni kaj xalan lipawanaw xliskgalala Jehová. Wa xlakata, katlawa oración xlakata tlakg nalipawana Dios, chu kalakapastakti tuku tlawanit makgasa chu tuku aku natlawa, chu katlawa tuku xla wan. Komo kgalhakgaxmataw xtastakyaw Jehová, xla «kanikxniwa [mi]la nawan» xlakata wix tlan putum kilhtamaku nalatamayaw.