1. (a) Mang e ma rin’ e girdi’ u nap’an ni yira fonownagrad, ma mang fan? (b) Faanra ba tolang e lem rok be’, ma ra uw rogon u wan’ e fonow ni kan pi’ ngak?

 BA THILTHIL rogon ni ma fol e girdi’ ko fonow ara pi n’en ni kan puguran ngorad. Bod ni bay boch e girdi’ ni yad ra fol ko n’en ni ke yog be’ nib ga’ lungun, machane dab ra folgad ko n’en ni ke yog be’ ni yad taab yangar ara be’ nde ga’ lungun u boch ban’en. Ku ra be’ ma rogon ni ma lemnag e fonow ni yima pi’ ngak. Sana be’ e ra kireban’, ma be’ e ra tamra’, ma boch e girdi’ e sana yad ra guy rogon ni ngar thilyeged e lem rorad mi yad guy rogon ni ngkur athamgilgad boch. Mang fan ni aray rogon? Reb i fan e bochan e tolangan’. Faanra ba tolang e lem rok be’, ma nap’an ni yira fonownag me lemnag ndariy rogon ngak, ma aram e dabi fol riy, me yan i aw fare fonow nib m’ay fan.​—Prov. 16:18.

2. Mang nrib ga’ fan u wan’ e tin riyul’ e Kristiano e pi fonow ni kan fek ko Thin rok Got?

² Machane, tin riyul’ e Kristiano e yad ba felfelan’ ko fonow ni yima pi’ ngorad nib ga’ ni faanra kan fek ko Thin rok Got. Pi fonow ara puguran rok Jehovah e ma pi’ e gonop ngodad, maku ma fil boch ban’en ngodad ma ma ayuwegdad u rogon ni ngad siyeged boch ban’en nib kireb ni bod rogon chogowen e chugum, nge ngongol ndarngal, nge falay ni kireb, ara chingaw. (Prov. 20:1; 2 Kor. 7:1; 1 Thess. 4:3-5; 1 Tim. 6:6-11) Maku reb e gad ma “felfelan’” ni bochan e gad ma fol ko pi fonow ara pi puguran rok Got.​—Isa. 65:14, BT.

3. Uw rogon e lem ko en ni yoloy e psalm nib fel’ ni ngad folwokgad riy?

³ Faanra nga i par nib fel’ e tha’ u thildad Jehovah ni ir e Chitamangidad ni bay u tharmiy, ma thingar ud folgad ko pi fonow rok. Rib fel’ ni faanra puluw e lem rodad ko lem rok e en ni yoloy e psalm ni faani gaar: “Thin ni ka mog ni ngan rin’ e bay i par ni ban’en ni fanag ndariy n’umngin nap’an, ma pi’ e felfelan’ nga lan ngorongoreg!” (Ps. 119:111) Aray rogon ni gad ma lemnag e pi motochiyel rok Jehovah, fa gad ma lemnag ni kaygi mo’maw’? Dabi mulan’dad ni faanra bay  yu ngiyal’ nib mo’maw’ ngodad ni ngad folgad riy. Rayog ni ngad athamgilgad ni nge pagan’dad ko pi fonow ara pi puguran rok Got, ya gad manang nra ayuwegdad! Ngad weliyed dalip e kanawo’ nrayog ni ngad rin’ed e re n’ey riy.

4. Mang e i rin’ David ni gubin ngiyal’?

⁴ Boor ban’en ni i buch u lan e yafas rok David ni Pilung ni i felfelan’ ngay, maku boor ban’en ni i buch rok ni i kireban’ ngay. Yugu aram rogon ma gubin ngiyal’ ni i par ni be pagan’ ngak e En ni Ke Sunmiy. I yog ni gaar: “Gu be meybil ngom, i gur Somol; gu be par nib pagan’ug ngom, yi gur e Got rog.” (Ps. 25:1, 2) Ere, mang e ke ayuweg David ni nga i par ni be pagan’ ko Chitamangin ni bay u tharmiy?

5, 6. Mang e be yog e Bible u murung’agen e tha’ u thilin David nge Jehovah?

⁵ Boor e girdi’ e fin yad ra mada’nag e magawon mi yad meybil ku Got. Ra uw rogon u wan’um ni faanra fin ngiyal’ ni ke t’uf e salpiy ara ayuw rok reb e fager rom ara girdi’ rom e fin aram e ngiyal’ nra yib i non ngom? Sana ra munmun ma ga ra lemnag ko ri mang fan ni ma yib i guyem. Machane, gathi aram rogon David. N’umngin nap’an e yafas rok ni i dag nib mich Jehovah u wan’ mab t’uf rok.​—Ps. 40:8.

⁶ Mu tay fanam i yan u rogon ni i pining David e sorok nge magar ngak Jehovah. I gaar: “A Somol, ni gur e Somol romad, rogon feni sorom e ka ni guy u gubin yang u fayleng! Rogon feni gilbuguwam e ke yan ka pag e yu thal i tharmiy nga lang.” (Ps. 8:1) Kam nang feni chugur e tha’ u thilin David nge Chitamangin ni bay u tharmiy? Bochan nrib ga’ fan u wan’ David pi fel’ngin Jehovah nrib pag feni fel’, ma aram e n’en ni k’aring ni nga i pining e sorok ngak ni gubin e “rran.”​—Ps. 35:28.

7. Mang angin e meybil ngodad?

⁷ Ba t’uf ni ngaud nonad ngak Jehovah ni gubin ngiyal’, ya nge yag ni pagan’dad ngak ni bod rogon David. Be gaar e Bible: “Mu chugurgad ngak Got, me chugur ngomed.” (Jas. 4:8) Meybil e aram reb e kanawo’ ni gad ma chugur riy ngak Got, maku aram e bin th’abi fel’ e kanawo’ nra yag gelngin Got nib thothup riy ngodad.​—Mu beeg e 1 John 3:22.

8. Mang fan ni susun e ngad guyed rogon ndab ud sulod u daken taab n’en u nap’an ni gad be meybil?

⁸ Nap’an ni ga ra meybil, mab ga’ ni ga ma sul u daken taab bugithin ara taab n’en ko meybil rom, fa? Faanra aram rogon, ma u m’on ni ngam meybil, mag fal’eg i lemnag e n’en ni ga baadag ni ngam weliy u lan e meybil rom. Faanra ud sulod u daken taab bugithin u nap’an ni gad be non ngak reb e fager rodad ara girdi’ rodad, ma gathi ra chalban ngodad? Dabisiy nra tal ndab ki motoyil ngodad. Gad manang ndabiyog ni nge dabi motoyil Jehovah ko meybil rok reb e tapigpig rok nib yul’yul’. Machane, ba fel’ ni ngad guyed rogon ndab ud sulod u daken taab n’en u nap’an ni gad be meybil ngak.

9, 10. (a) Mang e rayog ni ngad uneged ko meybil rodad? (b) Mang e rayog ni nge ayuwegdad ni ngad meybilgad nrogon ni ke yib u gum’ircha’dad?

⁹ Ba tamilang ni dabiyog ni ngad chugurgad ngak Got ni faanra darud meybilgad ngak nrogon ni ke yib u gum’ircha’dad. Faanra ud weliyed lanin’dad ngak Jehovah, ma aram e rayog ni ngad chugurgad ngak me pagan’dad ngak. Ere, mang e pi n’en nrayog ni ngad uneged u lan e meybil rodad? Be yog e Thin rok Got ni gaar: “Faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.” (Fil. 4:6) Bin riyul’ riy, e demtrug ban’en ni bay rogon ko tha’ u thildad Got ma rayog ni ngad uneged u lan e meybil rodad.

¹⁰ Ba fel’ ni ngad fal’eged i lemnag e pi n’en ni i yog boch e pumoon nge ppin kakrom ni yad ba yul’yul’ u lan e meybil rorad ni kan yoloy murung’agen nga lan e Bible. (1 Sam. 1:10, 11; Acts 4:24-31) Pi Tang u lan e Bible e ku aram boch e meybil nge tang ni fan ngak Jehovah. Gubin e pi meybil nge tang ney e be weliy rarogon e lem rok boch e girdi’ nib muun ngay e kireban’ nge felfelan’ ni ur ted. Faanra ud fal’eged i beeg murung’agen e pi meybil ney ni i tay e pi tapigpig nem ni  yad ba yul’yul’, ma rayog ni nge ayuwegdad ni ngaud meybilgad ngak Jehovah nrogon ni ke yib u gum’ircha’dad.

11. Mang fan nib t’uf ni ngad fal’eged i lemnag e pi fonow rok Got?

¹¹ I yog David ni gaar: “Motochiyel rok Somol . . . e ba riyul’ ma ma pi’ e gonop ngak e piin ndariy rorad.” (Ps. 19:7) Arrogon, rayog ni nge yag e gonop ngodad ni faan gad ra fol ko pi motochiyel rok Got. Machane, bay boch e fonow u lan e Bible ni faanra nge yib angin ngodad ma thingar da fal’eged i lemnag fan. Re n’ey e ra ayuwegdad ni ngad pared ni gad ba yul’yul’ u nap’an ni kad mada’naged e skeng u skul ara tabon e maruwel, miki ayuwegdad ni ngad folgad ko pi motochiyel rok Got u murung’agen e racha’, ma gad par u mathilin ngongolen e am, miki ayuwegdad ni ngad folgad ko pi kenggin e motochiyel nu Bible ni be weliy rogon yalen e munmad nge rogon yaadad. Faan gad ra nang rogon laniyan’ Got ko pi n’ey ma ra ayuwegdad ni ngad fal’eged rogodad u m’on ni ngad mada’naged boch e magawon ni aray rogon. Ma nap’an ni gad ra mada’nag e pi magawon ney ma gad manang e n’en ni ngad rin’ed. Re n’ey e ra ayuwegdad ni ngad siyeged boch e magawon ni gad ra gafgow riy.​—Prov. 15:28.

12. Mang boch e deer nra ayuwegdad ni ngad folgad ko pi fonow ara puguran rok Got?

¹² Be m’ug ko ngongol rodad ni gad be par ni gad ba od ko tirok Got ban’en u nap’an ni gad be sonnag e ngiyal’ nra lebug e pi n’en ni ke micheg Got, fa? Ke mich u wan’dad ndab ki n’uw nap’an min thang fare Babylon nib Gilbuguwan, fa? Ma uw rogon boch e tow’ath ni kan micheg ni fan ngodad boch nga m’on ni bod rogon e yafas ndariy n’umngin nap’an u paradis u fayleng, kari mich e pi n’ey u wan’dad e chiney ni ke thil nga rogon ko ngiyal’ ni baaram ni kafin da filed e tin riyul’, fa? Gad ba pasig ko machib, fa gad be m’oneg e tin ni gad baadag u lan e yafas rodad? Ma uw rogon e athap ko fas ko yam’, nge ngan tayfan fithingan Jehovah nib thothup, nge mat’awun ko gagiyeg? Faan gad ra fal’eg i lemnag e pi deer ney ma ra ayuwegdad ni ngad folwokgad rok e en ni yoloy e psalm ni faani yog ni ‘tin ni ke yog Got ni ngan rin’ e ‘bay i par ni ban’en ni fen ndariy n’umngin nap’an.’​—Ps. 119:111.

13. Mang fan nda i tamilang boch ban’en u wan’ e pi Kristiano ko bin som’on e chibog? Mu weliy reb e kanawo’.

¹³ Sana bay boch ban’en u lan e Bible ni gathi kari tamilang u wan’dad e chiney ni bochan e dawori taw ko ngiyal’ ni nge tamilangnag Jehovah ngan nang. Boor yay ni i sul Jesus u daken nga i yog ngak e pi apostal rok nthingari gafgow ngemu’ min li’ nge yim’. (Mu beeg e Matthew 12:40; 16:21.) Machane, de nang e pi apostal rok fan e n’en ni i yog. Tomuren ni kan faseg ko yam’ me fanay reb e dowef ni bod downgin e girdi’ me m’ug ngak boch i gachalpen, nge “tamilangnag an’rad ngar nanged fan e pi n’em ni bay u lan e babyor nib thothup.” Fin aram e ngiyal’ ni tamilang u wan’rad e n’en ni i weliy ngorad. (Luke 24:44-46; Acts 1:3) Maku reb e fin ngiyal’ nni puog gelngin Got nib thothup nga daken pi gachalpen Jesus u nap’an e Pentekost ko duw ni 33 C.E., e tamilang u wan’rad ni kan sunmiy Gil’ilungun Got u tharmiy.​—Acts 1:6-8.

14. Nap’an ni tabab e bin 20 e chibog, ma mang e ke rin’ boch e walag nde tamilang boch ban’en u wan’rad u murung’agen e tin tomuren e rran nib fel’ ni ngan folwok riy?

¹⁴ Ku aram rogon nu nap’an e bin 20 e chibog ma immoy boch e tin riyul’ e Kristiano nda i tamilang boch ban’en u murung’agen e “tin tomren e rran” u wan’rad. (2 Tim. 3:1) Bod nu nap’an e duw ni 1914 ma immoy boch i yad ni i lemnag ni ke chugur ni bay ni fekrad nga tharmiy. Nap’an nde lebug e n’en ni ur lemnaged, ma aram mi yad sul ngar fal’eged i fil e n’en ni be yog e Bible, ma aram me tamilang u wan’rad ni ka bay fare maruwel ko machib nib t’uf ni ngan mu’nag ko som’on. (Mark 13:10) Ere, nap’an e duw ni 1922, me yog J. F. Rutherford ni ir e i yarmiy rogon e maruwel ko machib ni un rin’ e ngiyal’ nem ngak e piin ni kar muulunggad u nap’an fare international convention nni tay u Cedar Point, Ohio u  Meriken ni gaar: “Am sapgad be gagiyeg fare Pilung! Gimed e pi tamachib rok. Ere ngan machibnag, ngan machibnag, ngan machibnag, murung’agen fare Pilung nge Gil’ilungun.” Ka aram nap’an i yib, ma fare “Thin Nib Fel’ ni murung’agen e gagiyeg rok Got” ni yibe machibnag e aram kenggin e maruwel ko pi tapigpig rok Jehovah.​—Matt. 4:23; 24:14.

15. Mang angin nra yib ngodad ni faan gad ra fal’eg i lemnag rogon ni ke lebguy Jehovah e pi n’en ni ke micheg ko pi tapigpig rok?

¹⁵ Faan gad ra fal’eg i lemnag rogon ni ke lebguy Jehovah e pi n’en ni ke micheg ko pi tapigpig rok kakrom ke yib i mada’ ko chiney, ma rayog ni nge pagan’dad nrayog rok ni ngki rin’ e tin nib m’agan’ ngay ni fan ngodad boch nga m’on. Maku reb e, pi puguran rok Got e ku ma ayuwegdad ni nge dab da paged talin murung’agen e pi n’en ni ke yiiynag ni gad be sonnag ni nge lebug. Rayog ni nge mudugil u wan’dad ni faan gad ra rin’ e re n’ey ma ra ayuwegdad ni nge pagan’dad ko pi n’en ni ke micheg.

16. Mang boch e tow’ath nra yag ngodad ni faan gad ra par ni gad ba pasig ko machib?

¹⁶ Jehovah ni Got rodad e ir ba Got nib gel gelngin ma urngin ban’en nrayog rok. I yog faen ni yoloy e psalm ni gaar: “Somol ni Got ni Gubin ma Rayog Rom, dariy be’ ni bod fanam gel.” Ki ulul ngay ni gaar: “Ri gab gel! Ya gelngim ni ba’ rom e rib gel!” (Ps. 89:8, 13) Bochan e re n’ey, mab ga’ fan u wan’ e athamgil ni gad ma tay ni ngad m’oneged e tirok ban’en maku ma tow’athnagdad riy. Ku be guy ni gubin e pi tapigpig rok ni pumoon nge ppin, nge piin fel’ yangaren nge piin pilibthir e yad gubin ni yad be maruwel ni kari mus rogorad. (Prov. 31:27) Faan gad ra par ni gad ba pasig ko maruwel ni gad be rin’ ni fan ngak e En ni Ke Sunmiydad, ma aram e ku gad be folwok rok. Pigpig ni gad ma tay ngak u polo’ i gum’ircha’dad e ma yibnag e felfelan’ ngodad maku ra tow’athnagdad riy.​—Mu beeg e Psalm 62:12.

17, 18. Mang fan nrayog ni nga dogned nrayog ni nge gel e pagan’ rodad ngak Jehovah ni faan gad ra fol ko pi fonow rok? Mu weliy ban’en ni ke buch.

 ¹⁷ Faan gad ra pigpig ngak Jehovah u fithik’ e yul’yul’ ma uw rogon nra gelnag e pagan’ rodad ngak? Am lemnag e n’en ni buch u nap’an ni be n’en ni nge yan piyu Israel nga lan fare Nam ni Kan Micheg. Ke yog Jehovah ngak e pi prist ni yad be fek fare kiwaren e m’ag nnap’an ni yad ra taw ko fare Lul’ ni Jordan, ma dab ra talgad. Machane, nap’an ni chugur piyu Israel ko fare lul’ mi yad guy ni ke sugubur ya aram e ngiyal’ ni ma aw e n’uw. Ere, mang e yad ra rin’? Gur, yad ra par u tooben e re lul’ nem ngar songad nge mada’ ko ngiyal’ ni ke sop’ling e ran riy? Danga’, ya ke pagan’rad ngak Jehovah ma kar folgad ko n’en ni ke yog. Mang angin ni yib riy? Be gaar e Bible: “Faan ra bad nga marichlen e lul’ ni Jordan mi yad tay e rifrif u ayrad nga fithik’ e ran, me tal e ran ko fare lul’ ndaki yan . . . ma fapi prist ni yad be mat’nag fare kahol ko m’ag rok Somol e ra sak’iygad u daken e but’ ni ke melik’ u lukngun fare lul’ ni Jordan nge yan i mada’ ko ngiyal’ ni baaram ni ke yib urngin e girdi’ nu Israel ra th’abed fare lul’ nga baraba’.” (Josh. 3:12-17) Am lemnag gelngin e felfelan’ ni tay piyu Israel u nap’an nra guyed e ran ko fare lul’ ni ke tal! Arrogon, kari mich Jehovah u wan’rad ni bochan e kar daged ni be pagan’rad ko pi fonow rok.

¹⁸ Dakir ngongliy Jehovah e maang’ang ni fan ko pi tapigpig rok e ngiyal’ ney, machane ma tow’athnagrad ko pi n’en ni yad ma rin’ ni ma m’ug riy nib gel e michan’ rorad. Gelngin Got nib thothup e ma pi’ gelngirad ni ngar rin’ed e maruwel rorad ni aram e ngar machibnaged fare thin nib fel’ ni murung’agen Gil’ilungun Got u ga’ngin yang e fayleng. Ke micheg Jesus Kristus ni ir e bin som’on e Mich Rok Jehovah ngak pi gachalpen nra ayuwegrad ko re maruwel ney nrib ga’ fan, ya gaar ngorad: “Mmarod ngak girdien e pi nam u gubin yang ngam pingeged yad ngar manged pi gachalpeg, . . . gu ba’ romed, nge yan i mada’ nga tungun e re m’ag ney.” (Matt. 28:19, 20, NW) Boor e Pi Mich Rok Jehovah ni yad ba tamra’ ara yad ma rus ni ngar nonad ko girdi’ ni ka rogned ni gelngin Got nib thothup e aram e n’en ni ke ayuwegrad ni nge yag nra machibnaged e girdi’.​—Mu beeg e Psalm 119:46; 2 Korinth 4:7.

19. Yugu demtrug rarogodad, ma mang e rayog ni nge pagan’dad ngay?

¹⁹ Boch e walag e bay boch ban’en ndabiyog ni ngar rin’ed ni bochan e m’ar ara bochan ni kar pilibthirgad. Yugu aram rogon ma rayog ni nge pagan’dad ni “Chitamangin e Somol rodad i Jesus Kristus, me ir e Chitamangiy nrib tarunguy e girdi’, ni ir faanem i Got ni urngin mit e ayuw me ir e be yib rok ngodad” e manang rarogodad. (2 Kor. 1:3) Ba ga’ fan u wan’ e pi n’en ni gad be rin’ ni fan ko pigpig ni gad be tay ngak. Susun ndab da paged talin ni athap rodad e be yan u rogon nra mich fare biyul ni pi’ Kristus u wan’dad.​—Heb. 10:39.

20, 21. Mang boch e kanawo’ nrayog ni nge m’ug riy ni be pagan’dad ngak Jehovah?

²⁰ Liyor ni gad ma tay e ba muun ngay ni ngad fanayed e tayim rodad, nge gelngidad, nge pi n’en ni bay rodad u rogon nrayog rodad. Gad baadag ni ngad rin’ed e “maruwel rok e tamachib ko Thin Nib Fel’ ni yib rok Got” u polo’ i gum’ircha’dad. (2 Tim. 4:5) Bin riyul’ riy e ri gad ba felfelan’ ni ngad rin’ed e re maruwel ney ni bochan e ra ayuweg e girdi’ ni ngar “nanged e tin nib riyul’.” (1 Tim. 2:4) Ba tamilang ni faan gad ra tayfan Jehovah ma gad pining e sorok ngak ma boor e flaab nra yag ngodad ko tirok Got ban’en. (Prov. 10:22) Ku ra ayuwegdad ni ngari pagan’dad ko En ni Sunmiydad ndariy n’umngin nap’an.​—Rom. 8:35-39.

²¹ Kad weliyed faram ni bay boch ban’en nib t’uf ni ngad rin’ed ya nge yag ni pagan’dad ngak Jehovah. Ere, mu athamgil ni ngaum taga’ ngak Jehovah u daken e meybil. Mu fal’eg i lemnag rogon ni ke lebguy e tin nib m’agan’ ngay kakrom nge rogon nra lebguy e tin nib m’agan’ ngay boch nga m’on. Mag athamgil ni nga i gel e pagan’ rom ngak ko liyor ni ga be tay ngak. Pi puguran rok Jehovah e ra i par ndariy n’umngin nap’an. Ma faan ga ra fol riy, maku rayog ni ngam par ndariy n’umngin nap’an!