Eski ou’n les ou ganny transformen?

“Transform zot par en sanzman konplet dan zot lentelizans.”​—ROM. 12:2.

ESKI OU KAPAB EKSPLIKE?

Akoz tou Kretyen i bezwen les zot ganny transformen?

Ki transformasyon sak Kretyen i bezwen fer?

Ki mannyer nou kapab reisi fer sa transformasyon ki nou bezwen?

1, 2. Ki mannyer fason ki nou’n grandi oubyen nou lanvironnman i kapab annan en lefe lo nou?

NOU tou nou ganny enfliyanse dan en fason ou en lot atraver lafason nou’n ganny elve ek lanvironnman ki nou’n grandi ladan. Nou sanze e azir dan en serten fason e nou kontan serten kalite manze. Me akoz? En rezon i akoz nou ganny enfliyanse par bann dimoun otour nou e nou sirkonstans dan lavi.

² Annefe, i annan keksoz ki pli enportan ki sa ki nou kontan manze ek kalite lenz ki nou kontan. Par egzanp, lafason nou’n ganny elve i enfliyans sa ki nou konsider konman byen e akseptab oubyen mal e pa akseptab. Me tousala i depan lo sak dimoun e sakenn i annan son pwennvi. Nou bann swa ki nou fer i kapab osi depan lo nou konsyans. Labib i koz lo “bann non-Zwif ki napa lalwa me ki obei sa ki lalwa i ordonnen.” (Rom. 2:14) Me si napa okenn lalwa kler sorti kot Bondye, eski sa i vedir ki nou kapab azir dapre lafason ki nou’n ganny elve e swiv standar nou kominote?

3. Ki sa de rezon ki fer bann Kretyen pa swiv standar ek fason fer sa lemonn?

³ I annan omwen de rezon enportan akoz sa i pa le ka pour bann Kretyen. Premyerman Labib i dir: “I annan en semen ki drwat devan zonm, me apre semen lanmor i son lafen.” (Prov. 16:25) Akoz lenperfeksyon, nou napa sa abilite pour konnen kwa ki vreman neseser pour gid nou parfetman. (Prov. 28:26; Zer. 10:23) Dezyenmman, Labib i montre ki pa lot ki Satan “bondye . . . sa syek” ki pe kontrol bann standar ki egziste dan lemonn. (2 Kor. 4:4; 1 Zan 5:19) Alor si nou anvi ganny beni par Zeova e ganny son laprouvasyon, nou bezwen obeir sa ki ganny dir dan Romen 12:2.​—Lir.

4. Ki nou pou egzaminen dan sa lartik?

 ⁴ Sa lartik pou diskit serten pwen enportan dan Romen 12:2 ki merit nou latansyon. (1) Akoz nou bezwen ganny “transformen”? (2) Ki sa transformasyon i enplike? e (3) Ki mannyer nou ganny transformen? Annou egzamin sa trwa kestyon.

AKOZ NOU BEZWEN LES NOU GANNY TRANSFORMEN?

5. Sa ki Pol ti dir dan Romen 12:2 ti annan en sinifikasyon spesyal pour lekel?

⁵ Parol zapot Pol ki ganny rikorde dan Romen pa ti ganny adrese avek tou dimoun Ronm me avek bann Kretyen swazir. (Rom. 1:7) I ti ankouraz zot pour ganny transformen e pour “pa swiv bann koutim sa monn.” Ver 56 N.L., pour bann Kretyen Ronm sa letan, “sa monn” ti enkli standar, koutim, konportman, ek fason sanze bann Romen. Pol ti servi sa mo “pa swiv” oubyen aret swiv sa lemonn pour montre ki serten parmi zot ti ankor pe ganny enfliyanse avek sa lemonn. Ki kalite lenfliyans sa lemonn ti annan lo nou bann frer ek ser sa letan?

6, 7. Dan letan Pol, ki mannyer lavi sosyal e relizye ti en defi pour bann Kretyen?

⁶ Ozordi bann touris ki vizit Ronm i vwar zis restan tanp, latonm, moniman, stad, lasal teat ek bokou lezot keksoz. Serten sa bann keksoz i menm date depi premye syek. Sa bann debri i fer nou konn plis lo lavi sosyal e relizye bann dimoun Ronm sa letan. Dan bann liv listwar, nou kapab osi vwar lenformasyon lo bann lager, lakours saret e teat ek lanmizik lo diferan size, serten ti menm imoral. Ronm ti osi en lavil byen prospere e en landrwa kot bokou komers ti ganny fer, alor dimoun ti annan bokou loportinite pour fer plis larzan.​—Rom. 6:21; 1 Pyer 4:3, 4.

⁷ Malgre tou zot bann tanp ek bondye, bann Romen pa ti annan en relasyon personnel avek sa bann bondye ki zot ti adore. Pour zot, larelizyon ti enplik en ta seremoni pour nesans, maryaz ek lanterman. Ou kapab mazinen ki mannyer sa ti kapab en defi pour bann Kretyen Ronm. Laplipar parmi zot ti ganny elve dan en tel kiltir, alor zot ti pou bezwen ganny transformen pour kapab vin bann vre Kretyen e sa transformasyon pa ti pou arete zour zot batenm.

8. Dan ki sans sa lemonn i en danze pour bann Kretyen ozordi?

⁸ Parey Ronm sa letan, sa lemonn ozordi i en danze pour bann Kretyen batize. Akoz? Parski leta lespri sa lemonn i ganny demontre dan plizyer fason. (Lir Efezyen 2:2, 3; 1 Zan 2:16.) Lefet ki nou kontinyelman ganny ekspoze avek dezir, fason panse, valer ek moralite sa lemonn, i touzour annan sa danze ki nou kapab les nou ganny enfliyanse  par sa lemonn. Pour sa rezon, nou vreman bezwen obei sa konsey pour “pa swiv bann koutim sa monn” e les nou ganny “transformen.” Ki nou devret fer?

KWA KI BEZWEN GANNY TRANSFORMEN?

9. Avan batize, ki sanzman bokou in fer?

⁹ Anmezir ki en dimoun i etidye Labib e aplik li, i konmans fer progre spirityel. Pour montre ki i pe progrese, i fer bann sanzman e viv an armoni avek sa ki i’n aprann. I rezet fo larelizyon ek son fason viv avan e devlop bann kalite Kretyen. (Efe. 4:22-24) I en lazwa pour vwar plizyer milye dimoun sak lannen pe fer progre e kalifye pour ganny batize pour montre zot dedikasyon anver Zeova. San dout sa i fer leker Zeova rezwir. (Prov. 27:11) Me, eski se tou sanzman ki nou bezwen fer?

10. Ki mannyer transformasyon i diferan avek amelyorasyon?

¹⁰ Anfet, ganny transformen i enplik plis ki fer progre oubyen amelyore. I kapab annan piblisite lo en prodwi konmkwa i’n ganny “amelyore,” me i reste menm prodwi. I kapab ki zis en zengredyen ki’n ganny azoute oubyen son kouvertir i pli atiran. Konsernan sa lekspresyon “ganny transformen,” en not dan Vine’s Expository Dictionary i eksplike: “Dan Rom[en] 12:2, viv an konformite avek sa lepok [oubyen sa lemonn] i lekontrer avek les pwisans Lespri Sen transform sa dimoun ki ou ete anndan par sanz ou fason panse.” Alor, sa transformasyon ki en Kretyen i bezwen fer i pa zis vedir aret fer bann move keksoz, dir bann move parol oubyen aret viv en lavi imoral. Serten dimoun ki pa ni menm konn Labib i esey evite fer sa bann keksoz. Me, ki i enplike alor dan sa transformasyon ki en Kretyen i bezwen fer?

11. Dapre Labib, ki mannyer en dimoun i fer sa transformasyon?

¹¹ Pol ti ekrir: “Transform zot par en sanzman konplet dan zot lentelizans.” Nou “lentelizans” i annan pour fer avek nou abilite pour reflesir. Me parey i ganny servi dan Labib, i enplik nou fason panse, latitid ek abilite pour rezonnen. Pli boner dan son let pour bann Romen, Pol ti koz lo bann dimoun ki ti annan en “lespri deregle.” Sa bann dimoun ti ranpli avek “tou sort mesanste, move dezir, vis, malis, zot [ti] ranpli avek zalouzi, krim, dispit, riz” ek lezot move keksoz. (Rom. 1:28-31) Nou kapab vwar akoz Pol ti ankouraz bann serviter Bondye ki ti’n ganny elve dan en tel lanvironnman pour “transformen” e fer “en sanzman konplet dan zot lentelizans.”

12. Ki fason panse dimoun i annan ozordi e ki mannyer sa i kapab en danze pour bann Kretyen?

¹² Malerezman, nou antoure avek bann dimoun ki Pol ti dekrir. Tre probab  zot panse ki i nepli lepok pour viv dapre bann standar ek prensip, e ki personn pa devret fors lezot pour viv dapre zot. Bokou ansenyan ek paran konmela i les zanfan fer sa ki zot oule e desid pour zot menm kwa ki byen e kwa ki mal. Zot mazinen ki i napa en fason pour konnen kwa ki byen e kwa ki mal. Menm bann ki dir zot relizye i santi ki zot lib pour fer sa ki zot krwar i byen, san okenn lobligasyon pour obei Bondye ek son bann komannman. (Ps. 14:1) Sa latitid i kapab en danze pour bann vre Kretyen. Bann ki pa pridan i kapab devlop sa menm latitid anver bann laranzman teokratik. Zot pa pare pour swiv bann laranzman dan kongregasyon e menm kapab konplent konsernan okenn keksoz ki zot pa dakor avek. Ouswa, i kapab arive osi ki zot pa aksepte serten konsey Labib konsernan divertisman, Internet oubyen letid avanse.

13. Akoz nou bezwen egzamin nou lekor onnetman?

¹³ Alor, pour nou pa swiv oubyen les lemonn moul nou, nou bezwen egzamin nou lekor onnetman enkli nou latitid ek santiman pli profon, lobzektif ek bann standar. Sa bann keksoz dimoun pa vwar, me zis nou ki vwar. Lezot i kapab dir nou ki nou pe byen fer. Me, zis nou ki konnen si nou’n les sa ki nou’n aprann dan Labib transform nou dan sa bann laspe e pe kontinyen fer li.​—Lir Zak 1:23-25.

KI MANNYER SA TRANSFORMASYON I GANNY FER

14. Kwa ki kapab ed nou fer bann sanzman neseser?

¹⁴ Sa transformasyon i enplik sa ki nou ete anndan, alor pour fer sa transformasyon, nou bezwen en keksoz ki kapab egzamin nou pli o profon. Kwa ki kapab ed nou fer sa? Kan nou aprann sa ki Zeova i ekspekte avek nou, an armoni avek son plan dan Labib, nou reaksyon anver sa ki nou lir i revel sa ki dan nou leker e ki azisteman nou bezwen fer pour azir an armoni avek ‘son lavolonte parfe.’​—Rom. 12:2; Ebr. 4:12.

15. Kan Zeova i moul nou ki kalite transformasyon sa i fer?

¹⁵ Lir Izai 64:8. * Sa legzanp ki profet Izai ti servi i ansenny nou en leson pratik. Ki mannyer Zeova, sa Potye i moul nou konman larzil? Byensir, i pa sanz nou laparans fizik par fer nou pli atiran. Zeova i form nou spirityelman, me pa fizikman. Si nou les li moul nou, sa transformasyon pou ganny fer anndan nou oubyen spirityelman e se egzakteman sanmenm ki nou bezwen pour konbat kont bann lenfliyans dan lemonn. Ki mannyer sa prosesis i marse?

16, 17. (a) Dekrir ki en potye i fer avek sa larzil ki i servi pour fer en bon vesel. (b) Ki mannyer Parol Bondye i ed nou transformen pour vin en dimoun ki fer plezir Zeova?

¹⁶ Pour fer en bon vesel, en potye i servi sa pli bon kalite larzil. Anfet, i annan de keksoz i bezwen fer. Premyerman, sa larzil i bezwen ganny lave pour retir okenn salte. Apre, sa larzil i bezwen ganny melanze avek en serten kantite delo, e sa potye i travay li pour ki i gard son laform kan i pe ganny moule.

¹⁷ Remarke ki delo i ganny servi pour netway sa larzil e osi pour donn li sa bon tekstir pour kapab form en vesel e menm enn presye. Eski pa sanmenm rol Parol Bondye? I kapab ed nou rezet nou vye fason panse kan nou pa ti ankor konn Bondye e transform nou pour vin en dimoun ki annan valer dan lizye  Bondye. (Efe. 5:26) Esey reflesir lo lakantite fwa ki nou’n ganny ankouraze pour lir Labib tou le zour e pour asiste bann renyon regilyerman kot Parol Bondye i ganny egzaminen. Akoz nou ganny ankouraze pour fer sa bann keksoz? Parski an fezan sa, nou pe les Zeova moul nou.​—Ps. 1:2; Akt 17:11; Ebr. 10:24, 25.

18. (a) Akoz meditasyon i esansyel si nou anvi ki Parol Bondye i enfliyans e transform nou? (b) Ki kestyon ki kapab ed nou?

¹⁸ Si nou oule ki Parol Bondye i transform nou, lir Labib regilyerman e aprann sa ki ladan i zis en konmansman. Bokou dimoun ki lir Labib tanzantan in kapab konpran en pe sa ki zot lir. Anfet, manke ou’n koz avek sa bann kalite dimoun dan predikasyon. Serten i menm kapab sit bann pasaz Labib par ker. * Me, sa napa okenn gran lefe lo zot fason panse oubyen fason viv. Kwa ki manke? Pour Parol Bondye enfliyans e transform en dimoun, i bezwen les Parol Bondye antre dan son leker. (Gal. 6: 6, vwar not dan NW.) Alor, nou bezwen pran letan pour reflesir lo sa ki nou pe aprann. I ti a byen demann nou lekor: ‘Eski mon asire ki sa i pa zis en lansennyman relizye? Eski pa laverite sa? An plis ki sa, eski mon kapab aplik sa ki mon pe aprann e pa vwar li zis konman en keksoz ki mon kapab ansenny lezot? Eski mon santi ki Zeova pe koz avek mwan personnelman?’ Kan nou reflesir e medit lo sa bann kestyon, sa i kapab ranforsi bann santiman ki nou annan pour Zeova. Nou lanmour pour li pou ogmante. Kan nou leker i ganny touse dan sa fason, se la ki nou pou fer bann sanzman pozitif.​—Prov. 4:23; Lik 6:45.

19, 20. Ki konsey Labib nou devret aplike ki kapab donn nou bokou byenfe?

¹⁹ Si nou regilyerman lir Parol Bondye e medit lo la, sa pou motiv nou pour kontinyen fer sa ki nou pe deza fer, setadir, ‘abandonn nou vye natir avek son bann move labitid. E pran natir nouvo: natir zonm nouvo ki tou letan son kreater, Bondye, pe renouvle dan vre konnesans.’ (Kol. 3:9, 10) Si nou vreman konpran sa ki Labib i ansennyen e aplik sa ki nou aprann, sa pou motiv nou pour devlop sa nouvo personnalite Kretyen ki pou ede protez nou kont bann riz Satan.

²⁰ Zapot Pyer ti rapel nou: “Konman bann zanfan obeisan, pa bezwen les zot bann dezir ki zot ti annan . . . kontrol zot,” me “vin sen dan tou zot kondwit.” (1 Pyer 1:14, 15) Si nou fer tou sa ki nou kapab pour evit nou bann fason panse ek latitid lepase e les nou ganny transformen, nou pou ganny bokou benediksyon parey nou pou vwar dan lot lartik.

[Not anba lo paz]

[Kestyon]

[Portre lo paz 17]

[Portre lo paz 18, 19]

Bokou i bezwen sorti dan lemonn Satan e les zot ganny transformen (Vwar paragraf 9)

[Ekstre lo paz 19]

‘Debaras zot avek tou iritasyon, tou lakoler. Fer disparet tou kriye ek lensilt.’​—Efe. 4:31

[Portre lo paz 21]

Kan ou les ou ganny transformen, ou pou kapab regle problenm dan en bon fason (Vwar paragraf 18)