Yãmb basame tɩ Wẽnnaam tek-y bɩ?
Yãmb basame tɩ Wẽnnaam tek-y bɩ?
“Bɩ y bas tɩ Wẽnnaam tek yãmb yamã n maneg-y zãnga.”—ROM 12:2.
Y TÕE N WILGA A VÕOR BƖ?
Bõe yĩng tɩ kiris-nebã fãa segd n teke?
Bõe la d segd n teke?
Wãn to la d tõe n teke?
1, 2. Wãn to la b sẽn wʋb-d to-to wã, n paas d sẽn vɩ zĩig ningã tõe n tall pãng d zugu?
B SẼN wub tõnd to-to wã, d sẽn vɩ zĩig ningã, d zo-rãmbã la d minimdã wae n kɩtdame tɩ rɩɩb nins tõnd sẽn nongã, fut nins d sẽn yeelgdã, la d manesmã yaa toor-toore.
2 La bũmb kẽer n be tɩ b yõod yɩɩd futã d sẽn yeelgdã, wall rɩɩbã d sẽn dɩtã. Wala makre, d roagdbã zãms-d lame tɩ bũmb kẽer yaa sõma, t’a taab yaa wẽnga. La nebã sẽn tagsd to-to sõma ne wẽngã wɛɛngẽ wã yaa toor-toore. Tõnd sũur-kasetã me wilgd-d-la sore. Biiblã yeelame tɩ baa “bu-zẽmsã sẽn ka tar tõogã,” naoor wʋsgo, b “sakda tõogã sẽn yeel bũmb ninsã.” (Rom 2:14) La yɛl kẽer n be tɩ Wẽnnaam pa kõ noor vẽeneg ye. Yel-kãens taoore, d maanda a wãna? D na n teega d roagdbã sẽn wilg tõnd bũmb ninsã, wall d maan wa tõnd babgẽ wã nebã sẽn minim n maandẽ wã bɩ?
3. Wilg-y bʋʋm a yiib sẽn kɩt tɩ kiris-nebã pa segd n yɩ wa dũniyã rãmba.
3 Bʋʋm wʋsg n kɩt tɩ kiris-nebã pa na n teeg b mens wall neb a taab ye. Ad bãmb b yiibu: Pipi, Biiblã yeelame tɩ “sor n be tɩ neb get-a wa so-tɩrga, la a yaool n dabda kũum zĩigẽ.” (Yel. 16:25) D sẽn yaa neb sẽn pa zems zãnga, d pa tõe n wilg d mens sor tɩ zems ye. (Yel. 20:24; 28:26) Yiib-n-soaba, Biiblã yetame t’a Sʋɩtãan la “dũni-kãngã wẽnnaam.” A belga dũniyã nebã tɩ b tar tagsg sẽn pa zems sõma ne wẽngã wɛɛngẽ, la a kɩtdẽ tɩ b nong bũmb sãnda. (2 Kor. 4:4; 1 Zã 5:19) Rẽnd d sã n dat n ta a Zeova yam n paamd a barkã, d segd n tũu Rom dãmb 12:2 sẽn yetã.—Karm-y-yã.
4. Bõe yell la d na n gom sõs-kãngã pʋgẽ?
4 Sõs-kãngã na n goma Rom dãmb 12:2 yelle. A na n leoka sogsg a tã. 1) Bõe yĩng tɩ d segd n teke? 2) Bõe la d segd n teke? 3) Wãn to la d tõe n teke?
BÕE YĨNG TƖ D SEGD N TEKE?
5. Ãnd dãmb la a Poll sẽn kõ saglgã?
5 Tʋm-tʋmd a Poll pa gʋls a lɛtrã n tool Rom nebã fãa ye. Yaa tẽn-kãng kiris-nebã sẽn paam vʋʋsem sõng zaeebã la a tool-yã. (Rom 1:7) A sagl-b lame tɩ b tek la b “ra yɩ wa dũniyã rãmb ye.” Yaa Rom nebã la a Poll sẽn bool ka tɩ ‘dũniyã rãmbã.’ B ra tara b tagsa sõma ne wẽngã wɛɛngẽ, b minimdu, b yel-maandɩ la b fu-yerdi. A sẽn yeel kiris-nebã tɩ b ‘ra yɩ wa dũniyã rãmbã,’ yaa tɩ b sãnda tagsa la b manesem kẽer da ket n wõnda Rom nebã. Bõe n kɩt tɩ ra yaa woto?
6, 7. A Poll wakatẽ wã, zu-loe-bʋs la Rom kiris-nebã ra segda?
6 Rũndã-rũndã, neb nins sẽn kẽnd n kaagd Rom tẽngã tõe n yãa wẽnd-do-kʋda, ya-bɛd la reem zĩis sẽn lʋɩ n kell begse. Yaa pipi kiris-nebã wakat la b me bõn-kãens kẽere. B tõe n sõng-d lame tɩ d bãng Rom nebã sẽn da vɩ to-to, la b tũudmã sẽn da yaa a soaba. Kʋdemdã yɛl-mitb sɛb pʋsẽ me, b gomda Rom nebã sẽn da nong reem ninsã yelle. Wala makre, b ra tara reem sẽn yaa neb n zabd taab wall ne we-rũms tɩ b getẽ, wed-moos sẽn zoet n wagsd taaba, la reem a taab la yɩɩl sẽn mi n naag ne yoob yɛla. Rom da yaa galʋ-tẽng sẽn tar ligdi, tɩ leebgã ra sakdẽ me.—Rom 6:21; 1 Pɩɛ. 4:3, 4.
7 Baa Rom nebã sẽn da tar wẽnd-dot wʋsg la b ra pʋʋsd wẽnnaam-dãmb wʋsgã, b ra pa baood b wẽnnaam-dãmbã zood ye. Ne bãmba, sẽn tar yõod n yɩɩd tũudmã pʋgẽ yaa a yel-maandɩ wã. Wala makre, rogem wakat ra tara a yel-maandɩ, tɩ kãadem kõom la kʋʋr sasa me ra tar b yel-maandɩ. Rom nebã ra getame tɩ yel-kãensã yaa tɩlae ne ned kam fãa. Yaa vẽeneg tɩ woto ra namsda Rom kiris-nebã. Bãmb wʋsg roagdb zãms-b-la bõn-naandsã pʋʋsgo, tɩ yɩ tɩlae tɩ b toeem n yaool n lebg kiris-neba. La baa b lisgã poore, b ra segd n ket n toeemdame.
8. Bõe yĩng tɩ pa nana ne kiris-nebã rũndã-rũndã ?
8 Rũndã-rũndã me, pa nana ne kiris-nebã. Bõe yĩnga? Bala dũniyã sɩɩgã bɩ a yamã bee zĩig zãnga. (Karm-y Efɛɛz rãmb 2:2, 3; 1 Zã 2:16.) Dũniyã rãmb tara b sẽn nonge, b tagsa sõma ne wẽngã wɛɛngẽ, b manesem, la bũmb nins b sẽn get tɩ tara yõodo. D sẽn vɩ ne-b daar fãa wã, d sã n pa gũusi, d tõe n wa rɩka b togs-n-taare. Rẽ n so tɩ d segd n tũ b sẽn sagl-d tɩ d ‘ra yɩ wa dũniyã rãmbã,’ la tɩ d ‘bas tɩ Wẽnnaam tek d yamã.’ Wãn to la d tõe n tũ saglgã?
BÕE LA D SEGD N TEKE?
9. Toeen-bʋs la wʋsg maan n tõog n deeg lisgu?
9 Ned sẽn zãmsd Biiblã sã n tũud a sẽn zãmsdã, a lebgda a Zeova zoa. A lakda a meng ne ziri tũudmã, la a toeemd a sẽn da vɩ to-to wã. A modgda wʋsg n lebg nin-paalle, la a rɩkd a Zezi togs-n-taare. (Ef. 4:22-24) D sẽn mi tɩ neb tus-kobs n maand woto yʋʋmd fãa, n tõog n dɩk b mens n kõ a Zeova n deeg lisgã noom-d lame. Yaa vẽeneg tɩ woto noogd a Zeova sũur me. (Yel. 27:11) La toeen-kãensã pa sek ye.
10. Bõe yĩng tɩ d tõe n yeel tɩ tekrã pa d sẽn na n toeem nebã nifẽ bala?
10 La tekrã pa d sẽn na n toeem nebã nifẽ bal ye. Wala makre, b tõe n toeema safãnd wʋʋgo, tɩ safãndã yaool n pa toeem ye. Sebr a yembr sẽn wilgd Biiblã gom-biis võor yeelame tɩ Rom dãmb 12:2 sẽn yeel tɩ d tek d yamã, rat n yeelame tɩ d maneg d yamã tɩ lebg paalle, la tɩ d toeem d tagsa wã ne vʋʋsem sõngã maasem. Rẽnd pa ned sẽn na n bas minim-wẽnse, gom-yood la yoob bal la d tõe n yeel t’a tekame ye. Baa neb sẽn pa mi Biiblã meng modgd n zãagda b mens ne bõn-kãense. La bõe la kiris-nebã sẽn segd n toeemã?
11. Bõe la a Poll sẽn yeel tɩ d segd n toeemame wã?
11 Tʋm-tʋmd a Poll yeelame: “Bɩ y bas tɩ Wẽnnaam tek yãmb yamã n maneg-y zãnga.” Ka wã, yamã yaa nedã tagsa wã. La Biiblã sã n gomd ned yam yelle, pa rẽ bal ye. A soabã sẽn nong n tagsd bũmb nins yellã, a sẽn get tɩ bũmb nins sakdame wall pa sakdã me naagame. A Poll lɛtrã sɩngrẽ, a goma neb sẽn tar ‘yam-wẽng’ yelle, n yeel tɩ nin-kãens pida ne “tʋʋm-wẽns buud fãa, yel-beedo, zoe-bõne, pʋ-toogo, sũ-kiiri, nin-kʋʋbo, mo-beedo, belgre.” (Rom 1:28-31) Rẽnd a Poll sẽn sagl Rom kiris-nebã sẽn vɩ ne neb a woto tɩ b ‘bas tɩ Wẽnnaam tek b yamã n maneg-b zãnga,’ a bee bʋʋm.
12. Tags-bʋs la neb wʋsg tara, la bõe yĩng tɩ kiris-nebã segd n yɩ gũusdba?
12 Zu-bʋko, rũndã-rũndã nebã wʋsg tara yam-wẽng wa a Poll sẽn da gomd b rãmb yellã. B tagsdame tɩ Wẽnnaam noyã tũub pa le tar yõodo, la tɩ ned pa segd n modg a to t’a tũ no-kãens ye. Karen-saam-dãmb la roagdb wʋsg basda kambã tɩ b maand b yam. B yetame meng tɩ sõma ne wẽngã wɛɛngẽ, yaa ned kam fãa n segd n yãke. Baa neb sẽn yet tɩ b yaa wẽn-tũudb meng tagsdame tɩ pa tɩlae tɩ b tũ Wẽnnaam noyã ye. (Yɩɩl 14:1) Kiris-ned sã n pa yɩ gũusda, a tõe n wa rɩka nin-kãensã togs-n-taare, n pa le rat n tũ noy nins Wẽnnaam siglgã sẽn kõtã ye. A tõeeme meng n wa minim n yẽgemdẽ, wall a pa rat n sak n deeg sagls nins b sẽn kõt tõnd reemã la pemsmã kokr wɛɛngẽ, ẽntɛrnetã la karem n zãagã wɛɛngẽ wã ye.
13. Bõe yĩng tɩ d segd n bao n bãng d sẽn sɩd yaa ned ningã?
13 D sã n pa rat n ‘yɩ wa dũniyã rãmba,’ d segd n feesda d mens n get d sẽn nong la d sẽn pa nonge, d magb toor-toorã, la bũmb nins d sẽn get tɩ tara yõodã. D taabã tõeeme n pa mi tõnd sẽn sɩd yaa ned ning ye. B tõe n yetame tɩ d yel-manesmã yaa sõma. La yaa tõnd mengã n tõe n bãng d sã n sɩd basdame tɩ bũmb nins d sẽn zãmsd Biiblã pʋgẽ wã toeemd tõndo.—Karm-y Zak 1:23-25.
WÃN TO LA D TÕE N TEKE?
14. Bõe n tõe n sõng-d tɩ d bãng zĩig ning d sẽn segd n toeemã?
14 Sẽn na yɩl n teke, d segd n toeema sẽn be d sũurẽ wã. Bõe n tõe n sõng-d zĩ-kãng wɛɛngẽ? D sã n wa zãmsd Biiblã, d yãta a Zeova sẽn dat tɩ d yɩ ned ning buudã. D manesem sẽn yaa to-to rẽ poorã sõngd-d lame tɩ d bãng bũmb ning sẽn be d sũurẽ wã. Rẽ masã la d na n bãng zĩig ning d sẽn segd n toeem n tõog n maan Wẽnnaam daabã ‘sẽn zems zãngã.’—Rom 12:2; Heb. 4:12.
15. Wãn to la a Zeova toeemd tõndo?
15 Karm-y Ezai 64:7. Makr ning no-rɛɛs a Ezai sẽn dɩkã zãmsda tõnd bũmb sẽn tar yõod wʋsgo. Wãn to la a Zeova maand wa yagda, tɩ tõnd yaa wa yagd sẽn be a nugẽ? Yaa vẽeneg t’a Zeova pa toeemd tõnd yĩngã tɩ d lebg ra-sãng bɩ pʋg-neer ye. Yaa tõnd sẽn sɩd yaa ned ningã la a toeemda. D sã n sak-a, d basdame t’a toeem d yamã la d tagsa wã. Yaa toeen-kãng bal n tõe n sõng-d tɩ d ra yɩ wa dũniyã rãmb ye. La bõe la a Zeova maand n toeemd tõndo?
16, 17. a) Wãn to la yagd maand n wa tõog n maan yʋʋr tɩ yɩ sõma? b) Wãn to la Wẽnnaam Gomdã sõngd tõnd tɩ d toeem n lebg ned sẽn tat a Zeova yam?
16 Yagd sã n dat n maan yʋʋr tɩ yɩ sõma, a segd n baoa tãnd sẽn yaa sõma wʋsgo. La bũmb a yiib la a segd n maane. A na n yãgsa kugã la bõn-yood a taaba. A na n ninga koomã me tɩ zemse, sẽn na yɩl t’a sã n maan yʋʋrã bɩ yɩ wa a sẽn datã.
17 Yagdã ningda koomã sẽn na yɩl n yãgs kugã la bũmb a taaba, la sẽn na yɩl tɩ tãndã lebg bʋgsg me. Rẽ masã la a tõogd n yag tãndã tɩ lebg bũmb ning a sẽn datã. Wẽnnaam Gomdã maanda wa koomã. D sẽn wa n sɩng Biiblã zãmsgã, a sõng-d lame tɩ d bas dũniyã neb tags-yoodã. Bilf-bilfu, d tekame n lebg ned sẽn tat Wẽnnaam yam. (Ef. 5:26) B sagend-d-la wakat fãa tɩ d karemd Biiblã la d kẽnd tigissã. Bõe yĩnga? Bala, d sã n maand woto, d basdame t’a Zeova toeem-do.—Yɩɩl 1:2; Tʋʋ. 17:11; Heb. 10:24, 25.
18. a) D sã n dat tɩ Wẽnnaam Gomdã toeem-do, bõe yĩng tɩ bʋgsgã yaa tɩlae? b) Sogs-bʋs la d tõe n sok d mens tɩ naf-do?
18 La d sã n dat tɩ Wẽnnaam Gomdã toeem-do, a kareng la a zãmsg bal pa sek ye. Neb wʋsg karemda Biiblã, n mi a kibay sãnda. Tõe tɩ koe-moonegã sasa, y zoe n sega nin-bãmb buudã. Kẽer meng tõe n togsa Biiblã vɛrse-rãmb sãnda goam ne zugu. * La b bãngrã pa toeemd b tagsa wã la b manesmã woto ye. Bõe yĩnga? Bala, yaa ned sẽn na n bas tɩ Wẽnnaam Gomdã kẽ a sũurã bal la a na n tõog n toeeme. Rẽ n so tɩ d segd n bʋgsd bũmb ning d sẽn zãmsd Biiblã pʋgẽ wã zugu. Yɩta sõma tɩ d sok d meng woto: ‘Mam kɩsa sɩd tɩ pa tũudum yɛl bal bɩ? Mam nee kaset sẽn wilgd tɩ yaa sɩd bɩ? M tũudã bũmb nins mam sẽn zãmsdã bɩ, bɩ m tagsdame tɩ yaa bũmb m sẽn segd n wilg neb a taabã bala? Mam neeme tɩ yaa a Zeova n gomd ne-m bɩ?’ D sã n bʋgsd sogs-kãensã buud zugu, bũmb nins d sẽn zãmsdã na n kẽ d sũurã. Rẽ la d na n maneg n nong a Zeova, n dat n toeeme, n noog a sũuri.—Yel. 4:23; Luk 6:45.
19, 20. D sã n tũud Biiblã saglsã, wãn to la na n naf-do?
19 D sã n karemd Wẽnnaam Gomdã la d bʋgsd a zugu, na n sõng-d lame tɩ d kell n maan wa a Poll sẽn yeelã, n ‘bas nin-kʋdgã ne a tʋʋmã n lebg nin-paals sẽn paam yam manegre.’ (Kol. 3:9, 10) D sã n wʋmd Biiblã goam võor sõma la d tũudẽ, d na n lebgda nin-paalga, tɩ kogend tõnd ne a Sʋɩtãan bẽdsã.
20 Tʋm-tʋmd a Pɩɛɛr me sagl-d lame tɩ d ‘yɩ kom-sakdse, n da sak wẽng ratem d sẽn da sak d zɩɩlem wakatã ye.’ La tɩ d ‘zĩnd pʋ-peelem ne d yel-manesem fãa.’ (1 Pɩɛ. 1:14, 15) D sã n maan d sẽn tõe tɛk n da le tall tags-wẽns la manesem-wẽnse, n bas tɩ Wẽnnaam toeem-do, d na n paama bark wʋsgo. Sõsg ning sẽn pʋgdã na n goma rẽ yelle.
[Tẽngr note]
^ sull 18 Ges-y yʋʋmd 1994 wao-fugdg kiuug pipi daar Gũusg Gasgã seb-neng a 9, sull a 7.
[Zãmsgã sogsgã]
[Foto seb-neng 17]
[Foto seb-neng 18]
Neb wʋsg segd n laka b mens ne dũniyã, n bas tɩ Wẽnnaam toeem-ba (Ges-y sull a 9)
[Foto seb-neng 19]
“Bɩ y bas sũ-toog ne kisgri, la sũ-yikri, la no-koɛɛma.”—Ef. 4:31
[Foto seb-neng 21]
Y sã n bas tɩ Wẽnnaam toeem-yã, y na n bãnga y sẽn tõe n welg y zu-loeesã sõma to-to (Ges-y sull 18)
