1, 2. Ki influensia e kriansa ku nos a haña i e ambiente den kua nos a lanta tin riba nos bida?

E KRIANSA ku nos a haña i e ambiente ku nos a lanta aden tin un influensia profundo riba nos. Nos ta bisti i komportá nos mes na un sierto manera i ta gusta sierto kumindanan. Parsialmente, esei ta debí na e influensia di e hendenan rònt di nos i nos sirkunstansianan.

² Pero, tin kosnan muchu mas importante ku kuminda òf e manera ku nos ta bisti. Por ehèmpel, for di chikitu esnan ku ta eduká nos ta siña nos kiko ta bon i aseptabel i kiko ta malu i inaseptabel. Pero hende tin diferente opinion tokante kiko ta bon òf malu. Nos konsenshi tambe ta influensiá e desishonnan ku nos ta tuma. Beibel ta bisa ku hopi bes “hende di e nashonnan, ku no tin lei, ta hasi di naturalesa e kosnan di lei.” (Rom. 2:14) Pero awor, kiko nos mester hasi ora no tin un lei spesífiko di Dios ku ta trata un sierto asuntu? Nos por djis sigui e norma- i balornan ku nan a lanta nos kuné òf ku ta komun den e área kaminda nos ta biba?

3. Menshoná dos motibu pakiko kristiannan no por djis sigui e norma- i balornan di mundu.

³ Wèl, tin por lo ménos dos motibu importante pakiko un kristian lo no djis sigui e norma- i balornan di mundu. Pa di promé, Beibel ta bisa: “Tin un kaminda ku ta parse bon den bista di hende, ma su fin ta e kaminda di morto.” (Pro. 16:25) Sí, debí ku nos ta imperfekto, nos no ta kapas pa dirigí nos pasonan perfektamente. (Pro. 28:26; Yer. 10:23) Di dos, Beibel ta mustra ku ta Satanas, “e dios di e mundu akí,” ta esun ku ta pone norma pa su mundu, esta, loke mundu ta haña ta bon òf malu i loke ta bira popular. (2 Kor. 4:4; 1 Huan 5:19) P’esei, si nos ke e bendishon i aprobashon di Yehova, nos mester sigui e konseho ku nos ta haña na Romanonan 12:2.—Lesa.

4. Ki preguntanan nos lo kontestá den e artíkulo akí?

 ⁴ E artíkulo akí lo kontestá tres pregunta importante relashoná ku e konseho na Romanonan 12:2. Nan ta: (1) Dikon nos mester ser “transformá”? (2) Kiko nos mester transformá? i (3) Kon nos por ser transformá?

5. Pa ken spesialmente Pablo a skirbi e palabranan registrá na Romanonan 12:2?

⁵ E karta ku apòstel Pablo a skirbi na e Romanonan no tabata dirigí na personanan no kreyente òf na e pueblo en general ma na su kompañeronan kristian ungí. (Rom. 1:7) El a urgi nan pa nan transformá nan mes i pa no ‘laga e mundu forma’ nan. Pa e kristiannan di e tempu ei, esta, esnan ku a biba na Roma alrededor di aña 56 di promé siglo, “e mundu” tabata referí na e norma- i kustumbernan, kondukta i e manera di bisti ku tabata komun pa e hendenan na Roma. E echo ku Pablo a usa e palabra “stòp” ta laga nos komprondé ku algun kristian tabata laga e mundu ei influensiá nan. Den ki manera e mundu a influensiá nos rumannan e tempu ei?

6, 7. Dikon bida no tabata fásil pa e kristiannan na Roma den tempu di Pablo?

⁶ Awendia, si bo bishitá Roma, loke bo ta mira generalmente ta ruina di por ehèmpel tèmpel, graf, monumento, arena i teater. Algun di esakinan a ser konstruí den promé siglo. E ruinanan akí ta yuda nos haña un bista di e manera ku e hendenan tabata biba i adorá nan diosnan den Roma di antigwedat. Fuera di esaki, den buki di historia nos por lesa tokante e luchanan violento di nan gladiadónan, nan karedanan di garoshi i tokante nan obranan teatral i musikal di kua algun tabata inmoral. Ademas, Roma tabata un stat komersial próspero ku a brinda hende hopi oportunidat pa gana plaka na abundansia.—Rom. 6:21; 1 Ped. 4:3, 4.

⁷ Aunke e romanonan tabatin hopi tèmpel i tabata adorá hopi dios, nan no tabata konosí komo hendenan ku tabatin un bon relashon ku nan diosnan. Pa nan, adorashon tabata konsistí prinsipalmente di ritonan religioso relashoná ku susesonan di e bida di tur dia, manera nasementu, kasamentu i entiero. Bo por imaginá bo kon difísil bida lo tabata pa e kristiannan na Roma? Hopi di nan a ser lantá den e ambiente ei, pues ta opvio ku nan mester a ser transformá pa por a bira kristian berdadero. I e transformashon akí mester a sigui asta despues di nan boutismo.

8. Dikon e mundu ta forma un peliger pa kristiannan awe?

⁸ Meskos ku tabata e kaso na Roma di antigwedat, e mundu djawe tambe ta forma un peliger pa kristiannan. Dikon? Pasobra e spiritu di mundu ta manifestá su mes den hopi manera. (Lesa Efesionan 2:2, 3; 1 Huan 2:16.) Konstantemente, nos ta haña nos konfrontá ku mundu su deseonan,  pensamentunan, norma- i balornan. Sí, tur dia nos ta kore rísiko di ser influensiá pa e mundu. P’esei, nos mester hasi kaso di loke Pablo a konsehá nos, esta, pa “stòp di laga e mundu akí forma” nos i pa “transformá” nos mes. Kon nos por logra esei?

9. Ki kambio hopi hende ta hasi pa nan por kualifiká pa boutismo?

⁹ Segun ku un persona ta studia Beibel i apliká loke e ta siña, e ta kuminsá progresá spiritualmente. Su progreso ta bira bisto na e kambionan ku e ta hasi pa biba na armonia ku loke e ta siña. E ta bandoná religion falsu, ta stòp di hasi loke ta malu, bisti e personalidat nobo i imitá Kristu. (Efe. 4:22-24) Nos ta kontentu ku tur aña sientos di míles di persona ta progresá i kualifiká pa batisá komo símbolo di nan dedikashon na Yehova Dios. Esaki sigur ta hasi Yehova su kurason kontentu. (Pro. 27:11) Pero ta bon pa nos pensa riba e pregunta akí: Esakinan ta e úniko kambionan ku un persona mester hasi?

10. Den ki sentido transformashon ta distinto for di mehorashon?

¹⁰ Bon mira, nos transformashon ta enserá mas ku hasi progreso òf mehorá. Por ehèmpel, kisas bo por haña un produkto ku un etikèt ku ta bisa ku “a mehorá” e produkto siendo ku básikamente e produkto a keda meskos. Kisas ta djis un ingrediente nobo nan a añadí na e produkto òf ta djis su empake nan a kambia pa hasié mas atraktivo. E ekspreshon “transformá boso mes” na Romanonan 12:2 ta enserá renobá òf kambia nos manera di pensa mediante poder di spiritu santu. Pues, e transformashon ku un kristian mester hasi no ta simplemente stòp ku mal hábito, abla vulgar i kondukta inmoral. Algun hende ku no tin konosementu di Beibel tambe ta hasi esfuerso pa evitá di hasi e kosnan malu akí. Kiko e transformashon ku kristiannan mester hasi ta enserá anto?

11. Kiko Pablo a bisa ku un hende mester hasi pa e por transformá su mes?

¹¹ Pablo a skirbi: “Transformá boso mes dor di renobá boso mente.” Aunke “mente” ta referí na nos kapasidat di pensa, den Beibel e ta referí tambe na nos aktitut, na nos inklinashon mental i kapasidat di rasoná. Mas promé den su karta na e Romanonan, Pablo a deskribí hende ku ‘un estado mental desaprobá.’ El a bisa ku nan tabata yen di “inhustisia, kos pekaminoso, golosidat, maldat, i tambe yen di envidia, asesinato, pleitu, engaño” i otro kosnan malu. (Rom. 1:28-31) P’esei, ta lógiko ku Pablo a urgi esnan ku a lanta den un ambiente asina i ku despues a bira sirbidó di Dios pa nan ‘transformá nan mes dor di renobá nan mente.’

12. Kiko ta pensamentu di hopi hende awe, i dikon e aktitut akí por ta peligroso pa kristiannan?

¹² Lamentablemente, nos ta rondoná di hende ku e karakterístikanan ku Pablo a  deskribí. Nan ta pensa ku Beibel su norma- i prinsipionan ta muchu ouderwets pa hende sigui awe i ku niun hende no mester obligá otro pa biba segun Beibel. Hopi maestro di skol i mayor ta permití muchanan hasi loke nan ke. Nan ta asta siña nan ku kada persona ta liber pa disidí kiko ta bon òf malu. Segun nan, no tin ningun manera ku hende por haña sa kiko realmente ta bon òf malu. Asta hopi di e hendenan ku ta bisa ku nan ta kere den Dios no ta haña ku nan tin ku hasi loke Dios ta bisa ta bon. (Sal. 14:1) E aktitut akí por ta masha peligroso pa kristiannan berdadero. Pasobra si nan no tene kuidou, nan por adoptá e punto di bista ei i keda sin kumpli ku instrukshonnan ku nos ta risibí di Yehova su organisashon i asta kuminsá kritiká tur kos ku nan no ta di akuerdo kuné. Kisas nan no ta kompletamente di akuerdo ku konseho bíbliko ku nan ta haña tokante entretenimentu, enseñansa superior òf uso di Internet.

13. Dikon nos mester hasi un saminashon onesto di nos mes?

¹³ Si nos no ke pa e mundu akí forma nos, nos mester pensa seriamente riba e persona ku nos ta di paden. Nos mester saminá nos aktitut i sintimentunan i wak kiko ta nos meta- i normanan, kosnan ku hende no por mira. Komo ku otronan kisas no sa realmente ken nos ta di paden, kisas nan ta bisa nos ku nos ta bayendo bon. Pero, bon mirá, ta nos so sa si realmente nos a laga Beibel transformá nos i si nos ta sigui lag’é transformá nos.—Lesa Santiago 1:23-25.

14. Kon nos por haña sa ki kambio nos mester hasi?

¹⁴ Pa nos por transformá nos mes, nos mester kambia nos kurason, esta, e persona ku nos realmente ta di paden. Kiko por yuda nos hasi e kambionan profundo akí? Wèl, Beibel ta siña nos ki klase di persona Yehova ke pa nos ta. Anto e manera ku nos ta reakshoná riba loke nos ta siña den Beibel ta yuda nos mira loke nos tin realmente den nos kurason. Asina nos ta haña sa ki kambio nos tin ku hasi pa nos por kumpli ku e ‘boluntat di Dios ku ta perfekto.’—Rom. 12:2; Heb. 4:12.

15. Ki transformashon ta tuma lugá ora Yehova ta forma nos?

¹⁵ Lesa Isaías 64:8. E ilustrashon ku profeta Isaías a usa ta siña nos un lès importante. Nos ta manera klei i Yehova ta e Alfarero. Ora e ta forma nos, manera un alfarero ta hasi ku klei, e no ta kambia nos físikamente, kisas dunando nos un aparensia mas atraktivo. Nò, Yehova ta forma nos den sentido spiritual i no físikamente. Si nos permitié forma nos, e ta transformá e persona ku nos ta di paden, den sentido spiritual. I e transformashon akí ta presis loke nos tin mester pa nos por resistí e influensianan di mundu. Awor, kon Yehova ta forma nos?

16, 17. (a) Splika kiko un alfarero ta hasi ku un pida klei ku e ke usa pa traha un opheto balioso. (b) Kon e Palabra di Dios ta transformá nos den personanan balioso den bista di Dios?

¹⁶ Si un alfarero ke traha un opheto di klei di bon kalidat, e ta usa klei di bon kalidat. Pero, tin dos kos ku e mester hasi promé. Promé, e mester laba e klei bon pa kita tur impuresa. Despues, e mester meskla e klei ku e kantidat eksakto di awa pa e opheto ku e traha por mantené su forma.

¹⁷ Ripará ku e alfarero ta usa awa pa e hasi e klei limpi i tambe pa e hasi esaki mas fásil pa traha kuné. Asina ei, e por traha un opheto balioso ku e klei. Bo ta mira e efekto similar ku e Palabra di  Dios tin riba nos bida? E Palabra di Dios por yuda nos stòp di pensa manera ántes, tempu ku nos no tabata konosé Dios, i transformá nos den personanan balioso den bista di Dios. (Efe. 5:26) Pensa riba tur e biahanan ku nos a ser animá pa lesa Beibel tur dia i pa asistí regularmente na nos reunionnan. Dikon nos ta ser animá pa hasi e kosnan akí? Pasobra ora nos ta hasi nan, nos ta permití Yehova forma nos.—Sal. 1:2; Echo. 17:11; Heb. 10:24, 25.

18. (a) Dikon ta importante pa nos meditá riba e Palabra di Dios si nos ke pa esaki transformá nos? (b) Ki preguntanan por yuda nos den esaki?

¹⁸ Si nos ke pa e Palabra di Dios transformá nos, nos mester hasi mas ku djis les’é i siña for di dje regularmente. Hopi hende ta lesa Beibel i sa hopi kos ku Beibel ta bisa. Kisas bo a yega di topa hende asina den sirbishi. Algun di nan asta por menshoná algun teksto di Beibel for di kabes. * Pero, esaki no tin masha efekto riba nan manera di pensa i biba. Dikon nò? Pasobra pa e Palabra di Dios transformá un persona, e persona akí tin ku permití loke e ta lesa baha den su kurason. Pues, nos mester saka tempu pa meditá riba loke nos ta siña di Beibel. Nos tin ku puntra nos mes: ‘Mi ta konvensí ku esaki ta mas ku djis siñansa religioso? Mi no a eksperensiá personalmente ku esaki ta e bèrdat? Mi mes ta apliká loke mi ta siña otro hende, òf ta djis siña so mi ta siña otro hende? Mi ta sinti ku Yehova ta papiando ku mi personalmente?’ Ora nos ta meditá riba preguntanan asina, nos amor pa Yehova lo oumentá. Esei, na su turno, lo motivá nos pa hasi kambio ku ta hasi Dios kontentu.—Pro. 4:23; Luk. 6:45.

19, 20. Kon nos ta benefisiá ora nos ta apliká konseho bíbliko?

¹⁹ Si nos ta lesa e Palabra di Dios regularmente i ta meditá riba loke nos ta lesa, esaki ta motivá nos pa sigui hasi loke Pablo a bisa, esta, pa ‘kita e personalidat bieu ku su práktikanan i bisti e personalidat nobo, ku pa medio di konosementu eksakto ta ser renobá.’ (Kol. 3:9, 10) Sí, si nos ta komprondé loke Beibel ta siña i ta sigui apliká loke nos ta siña, esaki lo motivá nos pa sigui bisti e personalidat nobo. I esaki na su turno lo sirbi komo un protekshon kontra e trampanan di Satanas.

²⁰ Apòstel Pedro ta rekordá nos lo siguiente: “Komo yu obediente, no laga e deseonan ku boso tabatin tempu ku boso no tabata konosé Dios forma boso mas. Mas bien, di akuerdo ku Esun Santu ku a yama boso, bira santu den tur boso kondukta.” (1 Ped. 1:14, 15) I si nos ta hasi esfuerso pa permití Yehova transformá nos manera di pensa i nos aktitut, lo e bendishoná nos sigur, manera e siguiente artíkulo lo mustra.