1, 2. Ia duwen mwomwen atail tikida oh atail wasahn kousoan ar kin kamwakid atail mour?

 MWOMWEN atail tikida, kompoakepatail kan, atail tiahk oh wasa me kitail kousoan ie kin kamwakid laud mwomwen atail mour. Ihme kahrehda mie soangen mwenge kan me kitail iouki, soangen likou kan me kitail kin likawih oh mwomwen atail wiewia weksang ahn ekei.

² Ahpw mie soahng kei me kesempwal sang mwomwen atail likou de dahme kitail kin kang. Karasepe, ni atail kekeirda, kitail kin sukuhlki me mie soahng kan me pwung oh mie soahng kan me sapwung. Ahpw madamadau en aramas kin wekpeseng duwen dahme pwung oh dahme sapwung. Kadeikpen loalatail pil kin kamwakid pilipil kan me kitail wiahda. Paipel mahsanih me aramas akan me “sohte iang ahneki Kosonnedo; . . . kin kapwaiada audepen Kosonnedo sang ni pein nsenarail.” (Rom 2:14) Ahpw ia duwe, met wehwehki me ma sohte kosonned sansal ehu sang rehn Koht, kitail kak idawehnte koasoandi de ahl akan me kitail tikida loale oh me aramas kin kalapw wia?

3. Menlau kihda kahrepe riau Kristian kan sohte kin idawehnte madamadau en sampah wet.

³ Mie kahrepe kesempwal riau me Kristian kan sohte kin wia met. Keieu, Paipel mahsanih: “Ahl me ke lemeleme me iei ahl en pwung, kakete kahluwaiukalahng mehla.” (Lep. Pad. 16:25) Pwehki atail soh unsek, kitail sohte kak pein kaweid kitail ni unsek. (Lep. Pad. 28:26; Ser. 10:23) Keriau, Paipel mahsanih me Sehdan iei “koht suwed en sampah wet.” E kin kakaun tiahk de koasoandi en sampah wet, de madamadau en sampah ong dahme pwung de sapwung oh pil dahme aramas kin mwahuki. (2 Kor. 4:4; 1 Sohn 5:19) Ma kitail men kaperenda Siohwa oh men en ketin kapaikitailda, kitail anahne peikiong dahme kileldi nan Rom 12:2.​—Wadek.

4. Dahme kitail pahn koasoiapene nan iren onop wet?

⁴ Iren onop wet pahn koasoia duwen ire kesempwal siluh me kileldi nan Rom 12:2. Ire pwukat iei: (1) Dahme  kahrehda kitail anahne wiliakapwala de wekila? (2) Dahme kitail anahne wekidala? (3) Ia duwen atail kak wiliakapwala?

5. Ihs me Pohl ntingkiwohng kaweido nan Rom 12:2?

⁵ Ni ahnsou me Pohl ntingihada kisinlikou ong mehn Rom kan nan pahr 56, e sohte ntingihada kisinlikou ehu ong aramas koaros nan Rom. E ntinglahng Kristian keidi kan me koukousoan wasao. (Rom 1:7) E kangoange irail en wiliakapwala oh “dehr kahlemengih wiewia kan en sampah.” “Wiewia kan en sampah” pil pid dahme mehn Rom kan kin medewe ong dahme pwung oh sapwung iangahki arail tiahk, mwomwen arail wiewia oh likou kan. Pohl nda “dehr kahlemengih” pwehki mie Kristian kei ahnsowo me ideidawehnte wiewia oh madamadau en mehn Rom kan. Ia duwen arail kin wia met?

6, 7. Ni mwehin Pohl, dahme kahrehda e apwal en wia Kristian men nan Rom?

⁶ Ni aramas akan ar kin mwemweitla Rom rahnpwukat, re kin kilang mohn imwen sarawi kan, imwen sousou kan oh sansal kan me kokouda sounpar kid kei samwalahro. Soahng pwukat kin sewese kitail en esehla mwahu mwomwen aramas akan ar mour oh arail kaudok nan Rom mahsie. Kitail kak wadek nan pwuhken poadopoad duwen siai en pei nanpwungen aramas riemen de nanpwungen aramas oh mahn lawalo kan nan wasahn mwadong kan, weiren kuruma kan, oh sipai oh koul kan me ekei pak kasalehda tiahk sohte konehng kan. Rom kin wia kahnimw kepwehpwe ehu me aramas kak wiahda mwohni tohto.​—Rom 6:21; 1 Pit. 4:3, 4.

⁷ Mehn Rom kan ahneki imwen sarawi tohto oh kin kaudokiong soangsoangen koht akan, ahpw pali moron en aramas ako sohte kin song ahneki nanpwungmwahu rehn arail koht ko. Pelien lamalam en mehn Rom kin keieu pid kasarawih kan me duwehte dahme kin wiawi ni ahnsoun ipwidi, kapwopwoud oh mehla. Kasarawih pwukat wia kisehn arail mour ehuehu rahn. E uhdahn apwal ong Kristian kan nan Rom. Tohto irail tikida kaudokiong koht likamw akan kahrehda re anahne wiahda wekidekla kan pwehn wiahla Kristian kan. Pil mwurin arail papidaisla, re anahnehte wiahda wekidekla kan.

8. Dahme kahrehda sampah wia wasa keper ehu ong Kristian kan rahnpwukat?

⁸ Pil duwehte, sampah wia wasa keper ehu ong Kristian kan rahnpwukat. Dahme kahrehda? Pwehki madamadau en sampah kin sansal wasa koaros. (Wadek Episos 2:2, 3; 1 Sohn 2:16.) Sampah kin song en kangoangehki kitail eh ineng, madamadau, koasoandi oh tiahk kan oh kitail kin ahnsou koaros mi nan keper en wiahla kiseh. Eri, kitail uhdahn anahne peikiong kaweid en Paipel en “dehr kahlemengih wiewia kan en sampah wet” oh “kawiliakapwala” kitail. Eri, dahme kitail anahne wia pwehn wiliakapwala?

9. Wekidekla dah kan me aramas tohto wiahda pwe ren kak papidaisla?

⁹ Ni emen eh onopki Paipel oh doadoahngki  dahme e sukuhlki, e tepida karanihala Siohwa. E pedoisang pelien lamalam likamw oh wiahda wekidekla kan nan eh mour. E kin nantihong laud en kakairada irair en aramas kapw oh kahlemengih Sises. (Ep. 4:22-24) Sounpar koaros, kitail kin perenki kilang aramas kid kid kei wia soangen kekeirda wet, inoukihong Siohwa Koht arail mour oh papidaisla. Met kin uhdahn kaperenda Siohwa. (Lep. Pad. 27:11) Ahpw ia duwe, ihte wekidekla pwukat me emen anahne wiahda?

10. Dahme kahrehda en wiliakapwala kin pidada laudsang en ihte kamwahwihala pein kitail?

¹⁰ En wiliakapwala kin pidada laudsang en kekeirda de kamwahwihala pein kitail. Ehu dikseneri en Paipel koasoia me lepin lokaia wet “kawiliakapwala” nan Rom 12:2 kin pidada onohnsapahl de wekidekla en atail madamadau sang sawas en sapwellimen Koht manaman. Eri Kristian men sohte kin wiliakapwala ihte sang eh uhdihsang eh wiewia keper kan, lokaia suwed, de tiahk suwed kan. Ekei aramas me sehse dahme Paipel mahsanih kin song en soikala wiewia suwed pwukat. Eri, dahme kitail en wia pwehn wiliakapwala de wekidala mwomwen atail madamadau oh pepehm nin duwen Kristian kan?

11. Dahme Pohl nda me emen anahne pwehn wiliakapwala?

¹¹ Wahnpoaron Pohl ntingihedi: “Mweidohng Koht en ketin kawiliakapwala loalamwail kan unsek.” Wehwehn “loalamwail” wasaht kin dokedoke atail koahiek en madamadau. Nan Paipel, e pil iangahki dahme kitail kin mwahuki medemedewe, atail pepehm oh atail koahiek en madamadau ni pwung. Ni tepin nah kisinlikowo ong mehn Rom ko, Pohl kawehwehda duwen aramas me ahneki madamadau sapwung pwehki ar “suwed oh mwersuwed koaros, oh pil noahrok oh sempoak. Re kin diren peirin, kamaramas, pei, widing” oh pil soahng suwed teikan. (Rom 1:28-31) Kitail kak wehwehki dahme kahrehda Pohl kihong kaweid Kristian ko me mi nanpwungen soangen aramas ko ren ‘kawiliakapwala loalarail kan unsek.’

12. Dahme aramas tohto kin medewe rahnpwukat? Dahme kahrehda e keper ong Kristian kan ren ahneki soangen madamadau wet?

¹² Aramas tohto nan sampah kin ahneki soangen madamadau me Pohl kawehwehda. Re medewe me tiahk en mahs ehu en doadoahngki koasoandi oh kaweid kan nan atail mour oh emen en dehr idingki meteikan ren doadoahngki kaweid kan nan arail mour. Sounpadahk tohto oh pahpa oh nohno kan kin mweidohng seri kan ren wia sohte lipilipil dahme re men wia. Re pil padahkihong irail me emenemen ahneki saledek en pein pilada dahme pwung de dahme sapwung. Soangen aramas pwukat kin kamehlele me sohte ahl ehu en uhdahn ese dahme pwung oh dahme sapwung. Pil me tohto me dene re kamehlele  Koht sohte kin medewe me re anahne wia dahme Koht ketin mahsanih me pwung. (Mel. 14:1) Soangen madamadau wet me keper ong Kristian kan. Ma kitail sohte kanahieng, kitail kakete sohla idawehn kaweid kan me kitail alehdi sang sapwellimen Koht pwihn oh mwein tepida kaulimki mehkoaros me kitail sohte pwungki. De mwein kitail sohte uhdahn pwungki kaweid en Paipel me kitail ale me pid mehn kamweit, doadoahngki Internet oh ale sukuhl laud.

13. Dahme kahrehda kitail anahne kasawih ni mehlel dahme uhdahn mi loalatail?

¹³ Ma kitail men sohla “kahlemengih wiewia kan en sampah,” me wehwehki, sohte mweidohng sampah en kamwakid mwomwen atail pepehm oh madamadau, kitail anahne kasawih pein kitail ni mehlel. Kitail anahne kasawih atail madamadau oh pepehm loal kan, atail mehn akadei kan oh atail koasoandi ong dahme kesempwal. Ekei ele sohte ese dahme uhdahn mi loalatail oh ele nda me kitail mwahu. Ahpw pein kitail kelehpw me ese ma kitail kin mweidohng dahme kitail sukuhlki sang Paipel en kawiliakapwala kitail oh ma met kin wiewiawihte.​—Wadek Seims 1:23-25.

14. Dahme kak sewese kitail en diarada soangen wekidekla kan me kitail anahne wia?

¹⁴ Pwe kitail en wiliakapwala, kitail anahne wekidala dahme mi nan mohngiongitail, me iei soangen aramas dah kitail. Dahme kak sewese kitail en wiahda soangen wekidekla pwukat? Ni ahnsou me kitail onohnopki Paipel, kitail sukuhlki duwen soangen aramas dah Siohwa ketin kupwurki kitail en wia. Mwomwen atail mwekidki dahme kitail wadek nan Paipel pahn sewese kitail en diarada dahme uhdahn mi nan mohngiongitail. Met pahn sewese kitail en ese soangen wekidekla dah kan kitail anahne wiahda pwe kitail en wia dahme Koht kupwurki me unsek.​—Rom 12:2; Ipru 4:12.

15. Ia duwen atail kin wiliakapwala ni Siohwa eh kin ketin wekidala kitail?

¹⁵ Wadek Aiseia 64:8. Karasaras me soukohp Aiseia doadoahngki kin kihda mehn kasukuhl kesempwal ehu. Kitail rasehng pwehl oh Siohwa iei sounwia sah. Ni ahnsou me e ketin wekidala kitail rasehng sounwia sah men kin doadoahngki pwehl pwehn wiahda sah, Koht sohte ketin wekidala mwomwatail likih. Ahpw e ketin wekidala soangen aramas dah kitail loalatail. Ni atail mweidohng en ketin wekidala kitail, kitail kin mweidohng en ketin kawiliakapwala loalatail me wehwehki e ketin sewese kitail en wekidala mwomwen atail pepehm oh madamadau kan. Kitail kin anahne met pwe kitail en kak pelianda wiewia kan en sampah wet. Eri ia duwen Siohwa eh kin ketin wekidala kitail?

16, 17. (a) Menlau kawehwehda dahme sounwia sah men kin wiahiong pwehlo me e kin doadoahngki pwehn wiahda sah kesempwal ehu. (b) Ia duwen Mahsen en Koht eh kin sewese kitail en wiliakapwala oh wiahla soangen aramas me Siohwa kak ketin doadoahngki?

¹⁶ Ma sounwia sah men men wiahda sah kesempwal ehu, e anahne doadoahngki pwehl me uhdahn mwahu. Ahpw mie soahng riau e anahne wiahiong pwehlo mwohn e pahn doadoahngki. Keieu, pwehlo anahne mwakelekel. Keriau, pwehlo anahne uwen pihl me konehng pwe pwehlo en kak wiawihda ni mwohmwohte me sounwia saho men wiahiong sah ehu.

¹⁷ Sounwia sah men kin doadoahngki pihl kaidehn ihte pwehn kamwakele pwehlo, ahpw e pil kin doadoahngki pwehn doalohki oh kihkihong pwehlo pwe en kak kadoadoahk. Eri ih met me kak mweidohng ih en wiahda soangen sah me e men wiahda, pil iangahki me keh ohla. Duwehte pihlo eh kin wekidala pwehlo, Mahsen en Koht kin wekidala kitail. Ni ahnsou me kitail tepida sukuhlki duwen Koht, Paipel kin sewese kitail en sohla ahneki madamadau en sampah oh tepida ahneki madamadau me pahrekiong sapwellimen Koht. Eri, Koht pahn kak ketin kawiliakapwala kitail ong  aramas me rasehng sah kesempwal ehu me e kak ketin doadoahngki. (Ep. 5:26) Kitail kin ale mehn kataman tohto en wadek Paipel ehuehu rahn oh towehda mihting kan ahnsou koaros. Dahme kahrehda kitail ale mehn kangoang en wia mepwukat? Pwehki ni atail wia mepwukat, kitail kin mwekidki mwahu mwomwen Siohwa eh kin ketin wekidala kitail.​—Mel. 1:2; Wiewia 17:11; Ipru 10:24, 25.

18. (a) Ma kitail men Mahsen en Koht en kawiliakapwala kitail, dahme kahrehda kitail anahne doudouloale? (b) Peidek dahkei kak sewese kitail en wia met?

¹⁸ Ma kitail men Mahsen en Koht en kawiliakapwala kitail, kitail anahne wia laudsang ihte wadek oh sukuhlki. Aramas tohto kin wadek Paipel oh ese dahme e mahsanih. Mwein ke tuhwongehr soangen aramas duwehte met nan kalohk. Ekei pil kak wadlikiala oh nda ire kei nan Paipel. * Ahpw met sohte kin wekidala mwomwen arail madamadau de arail mour. Dahme kahrehda? Pwehki Mahsen en Koht kin kawiliakapwala aramas akan ihte ma re mweidohng ire ko en sair mohngiongirail. Kitail anahne doudouloale dahme kitail wadek sang Paipel. Kitail anahne pein idek rehtail: ‘I kamehlele me met kaidehn ihte padahk en pelien lamalam ehu? I kilangehr mehn kadehde nan ei mour me met uhdahn padahk mehlel? I kin doadoahngki nan ei mour dahme I sukuhlki oh sohte wiahki me I en ihte padahkihong meteikan? I kamehlele me dahme I sukuhlki kin kohsang rehn Siohwa, duwehte e ketin mahmahseniong ie?’ Ma kitail kin doudouloale soangen peidek pwukat, kitail pahn karanihala Siohwa. Ni ahnsou me dahme kitail sukuhlki kin sair mohngiongitail, kitail pahn mwekidki wiahda wekidekla kan nan atail mour me kin kaperenda kupwuren Koht.​—Lep. Pad. 4:23; Luk 6:45.

19, 20. Ia duwen atail kak paiekihda ma kitail doadoahngki kaweid en Paipel?

¹⁹ Ma ahnsou koaros kitail kin wadek Paipel oh doudouloale, met kak sewese kitail en pousehlahte wia dahme Pohl koasoia: “Kumwail pwilikidier mour mering en mahso iangahki eh wiewia kan; oh met kumwail pwuhriongehr nan likoun mour kapw en aramas kapw. Iei aramas kapw me Koht, Sounwiepe, kin ketin onohne sapahl ahnsou koaros.” (Kol. 3:9, 10) Ma kitail uhdahn wehwehki dahme Paipel kin padahngki oh doadoahngki dahme kitail sukuhlki, met pahn kamwakid kitail en pwuhriong ni mour kapw en Kristian me kak perekitail sang ahn Sehdan lidip kan.

²⁰ Wahnpoaron Piter katamankihong kitail: “Kumwail peikiong Koht; soangen ineng kei mie rehmwail ahnsou me kumwail saikinte marainkihla Koht, eri, kumwail dehr mweidohng soangen ineng ko en kaunda amwail mour ahnsou wet. Ahpw kumwail en sarawihla ni mehkoaros me kumwail kin wia.” (1 Pit. 1:14, 15) Iren onop en mwuhr pahn kawehwehda ia duwen Siohwa eh kin ketin kapaikitailda ma kitail kin wia uwen atail kak koaros en wekidala atail madamadau oh pepehm kan.