1, 2. Oinsá mak ita-nia família, kolega, no kultura book ita-nia hanoin no hahalok?

 FATIN neʼebé ita sai boot, família, kolega, no kultura, buat sira-neʼe book ita-nia hanoin no hahalok, porezemplu, dalan neʼebé ita hatais, buat neʼebé ita gosta han, no ita-nia toman oioin.

² Maibé, ita-nia família, kolega, no kultura mós book ita iha dalan neʼebé importante liu fali buat neʼebé ita hatais no gosta han. Porezemplu, nuʼudar ita sai boot daudaun, ita aprende atu hatene ida-neʼebé loos no sala. Maibé dala ruma ema ida-idak iha hanoin neʼebé la hanesan kona-ba buat hirak-neʼe, no sira foti desizaun hodi tuir sira-nia hanoin. Bíblia hatete: “Sira neʼebé la hatene ukun-fuan, moris tuir . . . buat neʼebé iha ona sira-nia laran, buat hirak-neʼe mak ukun-fuan ona ba sira.” (Roma 2:14) Entaun, se Maromak nia ukun-fuan la iha lei kona-ba buat ruma, ita bele halo tuir deʼit família no ema seluk ka lae?

3. Tanba razaun rua saida mak ema kristaun labele halo tuir deʼit mundu nia hanoin?

³ Ema kristaun neʼebé loos labele halo hanesan neʼe. Tanbasá? Razaun importante ida mak tanba Bíblia hatete: “Iha dalan ida neʼebé loos iha ema nia haree, maibé dalan neʼe nia rohan mak lori ba mate.” (Provérbios [Amsal] 16:25) Ita ema sala-naʼin la iha matenek atu hili ita-nia dalan rasik. (Provérbios [Amsal] 28:26; Jeremias [Yeremia] 10:23) Razaun segundu mak tanba Bíblia mós hatete katak Satanás mak “maromak mundu neʼe nian”, no nia mak domina mundu nia hanoin kona-ba saida mak loos no saida mak sala. (2 Korinto 4:4; 1 Joao 5:19) Tan neʼe, se ita hakarak halo kontente Jeová no simu bensaun husi nia, ita tenke halo tuir konsellu husi Roma 12:2.—Lee.

4. Iha lisaun neʼe, ita sei koʼalia kona-ba saida?

 ⁴ Iha lisaun neʼe, mai ita buka-hatene kona-ba Roma 12:2 no hetan resposta ba pergunta importante tuirmai neʼe: (1) Tanbasá mak ita presiza “nakfila an”? (2) Atu “nakfila an”, ita presiza hafoun saida? (3) Saida mak bele ajuda ita atu “nakfila an”?

5. Apóstolu Paulo fó konsellu iha Roma 12:2 ba sé?

⁵ Bainhira apóstolu Paulo hakerek karta ba ema Roma iha tinan 56, nia hakerek ida-neʼe ba ema kristaun kose-mina sira neʼebé hela iha sidade Roma, laʼós ba ema Roma hotu neʼebé iha kongregasaun liʼur. (Roma 1:7) Nia fó konsellu ba ema kristaun atu “nakfila an” no labele “halo tuir mundu ohin neʼe nian”. Hodi hatete hanesan neʼe, Paulo fó avizu ba ema kristaun atu labele halo tuir ema Roma nia toman, hahalok, dalan neʼebé sira hatais, no sira-nia hanoin kona-ba ida-neʼebé mak loos no sala. Paulo nia liafuan “Keta halo tuir mundu ohin neʼe nian” hatudu katak ema kristaun balu sei halo tuir mundu nia hahalok no hanoin. Entaun, mundu nia hahalok saida deʼit mak kona sira?

6, 7. Iha apóstolu Paulo nia tempu, saida deʼit mak lori susar ba ema kristaun iha Roma?

⁶ Ohin loron, kuandu ita bá vizita sidade Roma, ita bele haree templu, rate, no estátua antigu oioin. Buat sira-neʼe ajuda ita atu hatene kona-ba ema iha tempu uluk nia moris no sira-nia relijiaun. Matenek-naʼin sira kona-ba sidade Roma antigu nia istória hatete katak ema iha tempu neʼebá halimar ho violénsia no luta malu, no sira mós gosta haree drama neʼebé fó sai hahalok sala-foʼer oioin. Liután neʼe, Roma mak sidade neʼebé nakonu ho oportunidade atu fila liman no buka rikusoin.—Roma 6:21; 1 Pedro 4:3, 4.

⁷ Ema Roma mós halo templu barak no adora maromak oioin, maibé sira barak la hanoin atu hametin sira-nia relasaun ho sira-nia maromak. Buat neʼebé importante ba sira mak kostume oioin hanesan loron-moris, kaben, no mate. Ita bele fiar katak buat sira-neʼe hotu lori susar ba ema kristaun sira iha Roma. Sira barak uluk adora maromak falsu oioin no ikusmai sira troka sira-nia hahalok atu sai ema kristaun. Tan neʼe, maski sira hetan batizmu ona, sira nafatin presiza halo mudansa oioin.

8. Tanbasá mak mundu ohin loron nian lori perigu ba ema kristaun?

⁸ Hanesan ho sidade Roma antigu, mundu ohin loron nian mós lori perigu ba ema kristaun. Tanbasá? Tanba mundu neʼe nia espíritu mak iha fatin hotu-hotu. (Lee Efeso 2:2, 3; 1 Joao 2:16.) Mundu neʼe book nafatin ita-nia hanoin, hakarak, no morál, ida-neʼe lori perigu ba ita atu sai hanesan ho mundu  neʼe. Tan neʼe, ita presiza simu konsellu atu labele halo tuir mundu neʼe no “nakfila an”. Maibé atu “nakfila an”, ita presiza halo saida?

9. Ema barak halo mudansa saida deʼit antes atu hetan batizmu?

⁹ Kuandu ema ida estuda Bíblia no halo tuir buat neʼebé nia aprende, nia komesa hakbesik ba Jeová. Nia husik relijiaun falsu no halo mudansa barak iha ninia moris. Nia mós hakaʼas an atu haburas hahalok diʼak oioin no halo tuir Jesus nia ezemplu. (Efeso 4:22-24) Tinan-tinan, ema rihun ba rihun laʼo ba oin iha lia-loos no hetan batizmu hodi hatudu sira-nia dedikasaun ba Maromak Jeová. Ida-neʼe halo ita kontente no mós halo Jeová haksolok duni. (Provérbios [Amsal] 27:11) Maibé, mudansa hanesan neʼe toʼo ona ka lae?

10. Oinsá mak “nakfila an” la hanesan ho halo mudansa balu?

¹⁰ Tuir loloos, “nakfila an” laʼós deʼit katak ita halo mudansa balu. Porezemplu, kuandu ita bá loja, ita hetan sasán ruma neʼebé dehan “Baru” ka “Foun”. Neʼe katak sasán neʼe iha mudansa ruma ka sai diʼak liután. Maibé tuir loloos, sasán neʼe ladún troka ida, ema neʼebé halo sasán neʼe halo mudansa uitoan ka aumenta buat balu deʼit. Tuir disionáriu ida kona-ba Bíblia, liafuan “nakfila an” iha Roma 12:2 hatudu katak ita tenke hafoun ka troka ita-nia laran tomak liuhusi espíritu santu nia ajuda. Tan neʼe, ema kristaun nia mudansa neʼe laʼós deʼit kona-ba husik toman aat ka liafuan aat, ka hahalok neʼebé la tuir morál. Ema neʼebé la hatene Bíblia mós dala ruma hakaʼas an atu husik sira-nia toman aat. Entaun, kuandu ema kristaun ida mak “nakfila an”, ida-neʼe envolve saida?

11. Tuir Paulo nia liafuan, ema tenke “nakfila an” hodi halo saida?

¹¹ Paulo hatete: “Nakfila an hodi hafoun imi-nia hanoin.” Kuandu Bíblia temi liafuan “hanoin”, neʼe mós inklui buat neʼebé ita gosta atu hanoin no ita-nia matenek hodi foti desizaun oioin. Iha karta ba ema kristaun iha sidade Roma, Paulo temi ona kona-ba ema neʼebé iha “hanoin neʼebé nakukun atu halo buat neʼebé laloos” tanba sira “laran aat, karak-teen, laran foʼer: nakonu ho laran-moras, oho ema, hirus malu, bosok malu no hasara malu”. (Roma 1:28-31) Sin, ema ho hahalok hanesan neʼe mak haleʼu ema kristaun iha Roma no tan neʼe mak apóstolu Paulo fó konsellu ba sira atu ‘nakfila an hodi hafoun sira-nia hanoin’.

12. Ema barak ohin loron hanoin saida? Tanbasá hanoin hanesan neʼe mak perigu ba ema kristaun?

¹² Triste tebes katak ema barak iha mundu ohin loron mós iha hanoin neʼebé hanesan ho ema Roma iha tempu uluk. Sira la gosta atu moris tuir morál  ka matadalan ruma hodi hanoin katak ema labele obriga ema seluk atu halo buat ida. Mestre ho inan-aman sira mós husik joven sira atu halo tuir deʼit sira rasik nia hakarak. Sira hanoin katak ema ida-idak iha direitu atu deside rasik kona-ba ida-neʼebé mak loos ka sala. Ema barak dehan sira fiar Maromak, maibé hanoin katak sira lalika halo tuir Maromak nia ukun-fuan. (Salmo [Mazmur] 14:1) Ida-neʼe bele sai perigu ba ema kristaun, tanba se ita la kuidadu, ita mós komesa la halo tuir matadalan husi Maromak nia organizasaun no karik muramura kona-ba buat neʼebé ita la gosta. Karik ita mós komesa kontra hasoru konsellu husi Bíblia kona-ba halimar, uza internét, ka edukasaun.

13. Tanbasá mak ita tenke buka-hatene ita-nia laran?

¹³ Se ita lakohi ‘halo tuir mundu neʼe’, ita tenke hanoin ho laran-moos kona-ba ita ema oinsá loos. Ita presiza buka-hatene ita-nia laran, sentimentu, planu, no hakarak. Tanba ema seluk la hatene ita-nia laran, karik sira gaba ita tuir buat neʼebé sira haree iha liʼur. Maibé só ita rasik deʼit mak hatene se ita nafatin “nakfila an” hodi halo tuir buat neʼebé ita aprende husi Bíblia.—Lee Tiago 1:23-25.

14. Saida mak bele ajuda ita atu hatene kona-ba mudansa sira neʼebé ita presiza halo?

¹⁴ Atu “nakfila an”, ita presiza troka ita-nia laran. Saida mak bele ajuda ita atu halo mudansa hanesan neʼe? Kuandu ita estuda Bíblia, ita aprende kona-ba ema hanesan saida mak monu loos ba Jeová nia laran. Dalan neʼebé ita simu matadalan husi Bíblia sei ajuda ita hatene ho loloos ita mak ema oinsá iha laran, no hodi halo nuneʼe, ita bele haree mudansa saida deʼit mak ita presiza halo atu tuir Maromak nia hakarak.—Roma 12:2; Ebreu 4:12.

15. Kuandu Jeová mak treinu ita, saida mak akontese?

¹⁵ Lee Isaías (Yesaya) 64:8. a Profeta Isaías nia liafuan hatudu lisaun importante ida. Ita mak hanesan rai-mean no Jeová mak hanesan badain sanan-rai ida. Kuandu Jeová mak treinu ita nuʼudar Badain Sanan-Rai, nia la troka buat neʼebé haree husi liʼur, maibé troka ita-nia laran. Bainhira ita simu treinu husi Jeová, ida-neʼe katak ita husik nia atu troka ita-nia hanoin no ita-nia sentimentu. Ida-neʼe mak buat neʼebé importante atu ita bele luta hasoru mundu neʼe nia espíritu. Maibé oinsá mak Jeová halo ida-neʼe?

16, 17. (a) Saida mak badain sanan-rai halo ba rai-mean hodi halo bikan espesiál? (b) Oinsá mak Jeová nia liafuan ajuda ita atu sai buat neʼebé folin-boot ba Maromak?

¹⁶ Kuandu badain sanan-rai ida mak hakarak halo bikan espesiál, nia presiza uza rai-mean neʼebé kualidade diʼak. Maibé nia tenke halo buat rua antes nia halo bikan. Primeiru, nia hasai fatuk ka foʼer husi rai-mean. Depois, nia sei aumenta bee ba rai-mean hodi bele forma ho didiʼak.

¹⁷ Badain sanan-rai uza bee laʼós deʼit atu hamoos rai-mean maibé mós atu halo rai sai mamar no fasil atu halo bikan. Depois, nia sei halo bikan ida konforme ninia hakarak, maski neʼe mak bikan ka vazu neʼebé mihis no furak. Maromak nia Liafuan mós hanesan bee. Bíblia ajuda ita atu la hanoin tuir mundu nia hanoin, maibé tuir Maromak  nia hanoin, hodi nuneʼe Jeová bele treinu ita atu sai buat neʼebé folin-boot iha ninia oin. (Efeso 5:26) Dala barak ita hetan konsellu atu lee Bíblia loroloron no mós tuir reuniaun beibeik. Tanbasá? Tanba kuandu ita halo tuir matadalan sira-neʼe, ita sai mamar hodi Jeová bele treinu ita ho didiʼak.—Salmo (Mazmur) 1:2; Apostolu 17:11; Ebreu 10:24, 25.

18. (a) Tanbasá mak ita presiza hanoin didiʼak kona-ba Maromak nia Liafuan hodi ida-neʼe bele ajuda ita “nakfila an”? (b) Ita bele husu ba ita-nia an pergunta saida deʼit?

¹⁸ Se ita hakarak Maromak nia Liafuan ajuda ita atu “nakfila an”, hodi lee no estuda deʼit la toʼo. Ema barak lee no hatene buat neʼebé Bíblia hatete. Ema balu mós bele dekór versíkulu oioin. b Maibé buat neʼebé sira lee la book sira-nia hanoin no dalan neʼebé sira moris. Tanbasá? Tanba Maromak nia liafuan bele halo sira “nakfila an” se sira husik ida-neʼe atu kona no book kleʼan sira-nia laran. Tan neʼe ita presiza hanoin didiʼak kona-ba buat neʼebé Bíblia hanorin ita. Ita bele husu ba ita-nia an: ‘Haʼu simu deʼit buat neʼebé haʼu aprende, ka fiar duni hanorin neʼe nuʼudar buat neʼebé loos? Iha haʼu-nia moris rasik, haʼu haree ona katak ida-neʼe mak lia-loos ka lae? Haʼu halo tuir buat neʼebé haʼu hanorin ba ema seluk ka lae? Haʼu sente katak Jeová hanesan koʼalia kedas mai haʼu ka lae?’ Hodi hanoin kleʼan kona-ba pergunta hirak-neʼe sei ajuda ita atu hakbesik liután ba Jeová no haburas ita-nia domin ba nia. Se buat neʼebé ita aprende kona ita-nia laran, ita sei halo mudansa iha ita-nia moris hodi bele halo Maromak kontente.—Provérbios (Amsal) 4:23; Lucas 6:45.

19, 20. Hodi banati-tuir Maromak nia konsellu sei ajuda ita iha dalan saida?

¹⁹ Bainhira ita lee Maromak nia Liafuan no hanoin kleʼan kona-ba buat neʼebé ita lee, ida-neʼe sei book ita hodi kontinua halo buat neʼebé ita komesa ona atu halo, katak ‘hasai tiha husi imi an rasik ema tuan ho nia hahalok aat sira no tau fali ema foun, neʼebé hafoun an’. (Koloso 3:9, 10) Sin, kuandu ita komprende buat neʼebé Bíblia hanorin no halo tuir, ida-neʼe sei book ita atu hafoun ita-nia hahalok kristaun no proteje ita husi Satanás nia lasu oioin.

²⁰ Apóstolu Pedro hatete: “Nuʼudar oan diʼak, imi keta halo tuir hakarak aat sira neʼebé imi tuir wainhira imi sei beik, maibé . . . hakaʼas an atu sai santu iha imi-nia hahalok tomak.” (1 Pedro 1:14, 15) Lisaun tuirmai sei esplika oinsá mak Jeová fó bensaun ba ita-nia hakaʼas-an atu “nakfila an” iha dalan neʼebé ita hanoin no hatudu hahalok iha ita-nia moris loroloron nian.