1, 2. Mang e ma rin’ rogon ni kan chuguliydad nge gin ni gad ma par riy nga rarogodad?

 RA BAGADAD ma rogon. Re n’ey e be yan u rogon ni kan chuguliydad nge gin ni gad ma par riy. Ra bagadad ma rogon e munmad ni ma tay, nge miti ggan ni ma kay, nge rogon e ngongol rok. Mang fan? Reb i fan e bochan e girdi’ u toobdad nge rarogon e par rodad.

² Machane, bay boch ban’en ni kab ga’ fan ko miti ggan ni gad ma kay nge rogon e munmad ni gad ma tay. Bod ni, nap’an nni chuguliydad ma bay boch ban’en ni u nog ngodad nib fel’, ma bay boch ni u nog nib kireb nsusun e dab da rin’ed. Pi n’ey e ba thilthil u wan’dad ya ra bagadad ma rogon ni ma lemnag. Pi n’en ni gad ma mel’eg e ku ma yan u rogon e nangan’ rodad. Be yog e Bible ni piin ‘dariy e re Motochiyel nem rorad; e ngiyal’ ni yad ra ngongliy e tin ni be yog e re Motochiyel nem ni yad e sum u lanin’rad ni ngar ngongliyed, e aram e kar manged ba motochiyel ngorad.’ (Rom. 2:14) Gur, re n’ey e be yip’ fan ni faanra dariy e motochiyel rok Got, ma yug rayog ni ngad folgad ko pi n’en nda ilalgad u fithik’ nge pi n’en ni yima rin’ u toobdad?

3. Mang l’agruw i fan nder ma fol e pi Kristiano ko pi n’en nra ilalgad u fithik’ nge pi n’en ni yima rin’ u toobrad?

³ L’agruw i fan ni gathi aram rogon e piin Kristiano. Bin som’on e be puguran e Bible ngodad ni gaar: “Bay e wo’ ni ma lemnag e girdi’ nib mat’aw machane ba sor ko yam’.” (Prov. 16:25, BT) Bochan ndawor da flontgad ma dabiyog rodad ni ngad gagiyegniged gadad. (Prov. 28:26; Jer. 10:23) Bin migid e, be tamilangnag e Bible ni Satan ni ir e got ko re “fayleng” ney e aram e en ni be gagiyegnag rarogon e par ko re fayleng ney. (2 Kor. 4:4; 1 John 5:19) Ere, faanra gad baadag ni nge tow’athnagdad Jehovah me par nib fel’ e tha’ u thildad, mab t’uf ni ngad folgad ko fare fonow ni bay ko Roma 12:2.​—Mu beeg.

4. Mang e gad ra weliy ko re article ney?

⁴ Bay boch ban’en nib ga’ fan ni ngad fal’eged i lemnag ni bay ko Roma 12:2. (1) Mang fan nib t’uf ni ngad ‘pied gadad  ngak Got nge piliyegdad’? (2) Mang e ba muun ko re n’ey? ma (3) Uw rogon ni ngad rin’ed? Chiney e ngad weliyed e pi deer ney.

5. Fan ngak mini’ fapi thin ni yog Paul ni bay ko Roma 12:2?

⁵ Fapi thin ni yoloy apostal Paul nge yan ngak piyu Roma e gathi fan ko girdi’ u wuru’ e ulung, ya fan ngak e pi Kristiano ni kan dugliyrad. (Rom. 1:7) I pi’ e athamgil nga lanin’rad ni ngar pied yad ngak Got nge piliyegrad ma ‘dab ra folgad ko ngongol ni yibe rin’ u roy u fayleng.’ “Fayleng” e ngiyal’ nem e ba muun ngay e pi n’en ni i lemnag e girdi’ nu Roma nib fel’ nge pi n’en ni ur lemnaged nib kireb, nge yalen rorad, nge rogon e ngongol rorad, nge munmad ni ur ted. I yog Paul ngorad ni ‘dab ra folgad ko ngongol ni yibe rin’’ ni bochan e ka bay boch i yad ni ka be ngongol ni bod rogon e girdi’ nu fayleng e ngiyal’ nem. Ere, mang e ke rin’ e re n’ey ko pi walag e ngiyal’ nem?

6, 7. Nap’an Paul ma uw rogon ni ke mo’maw’ e par ko pi Kristiano u Roma ni bochan rarogon e girdi’ nge teliw ko ngiyal’ nem?

⁶ Ngiyal’ ney e girdi’ ni yoor salpiyen ni ma yan nga Roma ni sebal e ba ga’ ni yad ma yan ni ngar guyed yu yang ni ke magey ko pi tempel ni immoy kakrom, nge yu yang ni un k’eyag e yam’ riy, nge yaan boch ban’en ni kan ngongliy ni ke yan boor e chibog. Pi n’ey e be tamilangnag rogon e par nge teliw ko girdi’ u Roma kakrom. Ku rayog ni ngad beeged u boch e babyor ko chep murung’agen ba mit e gosgos ni un tay u Roma kakrom ni aram e yima fek l’agruw ni’ nga bang ni ke muulung e girdi’ ni yoor ngay ni ngar chamgow nge mada’ ko ngiyal’ ni ke yim’ bagayow, nge ku ba mit e gosgos ni yima fanay e karrow riy ni ma girngiy e os, nge boch ban’en ni yima yan u yaan, nge musik nib kireb. Roma e reb e mach nib fel’ rogon ma ba mom ko girdi’ riy ni ngar yagnaged e salpiy.​—Rom. 6:21; 1 Pet. 4:3, 4. 

⁷ Yugu aram rogon ni boor e tempel nge got rorad, ma dar yul’yul’gad ko pi got rorad nem. Yad ma tay ni teliw e kemus ni bogi yalen ni yibe rin’ ni bod rogon e pi n’en ni yima rin’ u nap’an ni kan gargeleg reb e bitir, ngu nap’an e m’agpa’, ngu nap’an ni ke yim’ be’. Ere, dariy e maruwar riy nib mo’maw’ e par ko pi Kristiano u Roma. Boor i yad ni immoy ni aram rogon, ere ba t’uf ni ngar pied yad ngak Got nge piliyegrad ya nge yag nra manged boch e Kristiano. Maku ba t’uf ni ngar ululgad i rin’ e re n’ey u tomuren ni kar uned ko taufe.

8. Uw rogon ni be magawonnag e fayleng e pi Kristiano e ngiyal’ ney?

⁸ Rarogon e par ko fayleng e ngiyal’ ney e ku be magawonnag e piin Kristiano ni bod rogon ni i buch u Roma kakrom. Mang fan? Ya bochan ni boor e kanawo’ ni ma m’ug riy rarogon e lem ko girdi’ ko re fayleng nib kireb ney. (Mu beeg e Efesus 2:2, 3; * 1 John 2:16.) Bochan ni gubin e rran  ni gad ma guy rarogon e lem nge ngongol ko girdi’ ko re fayleng ney, mab mom ni nge af ngodad. Aram fan nib t’uf ni ngad folgad ko fare fonow ni be yog ni ‘dab da folgad ko ngongol ni yibe rin’ u roy u fayleng,’ ma ngad ‘pied gadad ngak Got nge piliyegdad.’ Mang e thingar da rin’ed?

9. Mang boch ban’en ni ke thilyeg boch e girdi’ ko ngongol rorad u m’on ni ngar uned ko taufe?

⁹ Nap’an nra fil be’ e tin riyul’ u Bible me fol riy, ma aram e ngiyal’ nra tabab ni nge mon’og ko tirok Got ban’en. Nap’an nra fal’eg i lemnag rogon e mon’og ni be tay, ma aram me thilyeg boch ban’en ko ngongol rok ni nge puluw ko n’en ni ke fil. Ra chuw ko teliw ni googsur me gay rogon ni nge yag fa bin nib beech e pangin ngak mi i folwok rok Jesus. (Efe. 4:22-24) Gad ma felfelan’ ni gad ma guy bokum biyu’ e girdi’ u gubin e duw ni yad be mon’og ko tin riyul’ mi yad un ko taufe ni aram e pow riy ni kar ognaged yad ngak Jehovah Got. Re n’ey e ma felfelan’nag Jehovah. (Prov. 27:11) Machane, ba fel’ ni ngad lemnaged e re deer ni baaray ni gaar: Kemus e n’en nib t’uf ni ngan thilyeg, fa?

10. Mang e ba thil ko ngan mon’og ko tirok Got ban’en nge ngan piliyeg lanin’uy ni polo’?

¹⁰ Bin riyul’ riy e ra ngad pied gadad ngak Got nge piliyegdad ma gathi kemus ni ngad mon’oggad ko tirok ban’en. Be yog reb e dictionary ni fare thin ko Roma 12:2 ni be yog ni ngad ‘pied gadad ngak Got nge piliyegdad’ e ba muun ngay ni ngad thilyeged rarogon e lem rodad u daken gelngin Got nib thothup. Ere, ra nge pi’ reb e Kristiano ir ngak Got nge piliyeg, ma gathi kemus ni nge digey boch ban’en ni ke mecham ngay nib kireb, nge thin nib kireb, nge boch e ngongol nib kireb. Ya bay boch e girdi’ ndar nanged e tin riyul’ u lan e Bible ni ku yad ma gay rogon ni ngar paloggad ko pi ngongol ney. Ere, mang e ba muun ngay ni nge piliyeg reb e Kristiano laniyan’ ni polo’?

11. Mang e yog Paul nib t’uf ni nge rin’ be’ ni faanra nge pi’ ir ngak Got ngan piliyeg?

¹¹ I yoloy Paul ni gaar: “Mpied gimed ngak Got nge piliyegmed, ni aram e kari piliyeg lanin’med ni polo’.” Fare bugithin ni “lanin’med” e be yip’ fan rogon ni gad ma lem. Machane, rogon ni kan fanay u Bible e ba muun ngay e pi n’en ni be gagiyegnag lanin’dad, nge rogon ni gad ma fal’eg i lemnag ban’en. Boch nga tabolngin e gi babyor nem ni yoloy Paul nge yan ngak piyu Roma, miki weliy murung’agen e girdi’ ni “yad be lemnag e tin nib kireb.” Pi girdi’ nem e yad be ngongliy e “tin nde mat’aw, nge tin nib kireb, nge chogow, nge kireb laniyan’; ma yad ba sug ko awan’, ma yad ma thang e pogofan, ma yad ma cham , ma yad ma sasalyeb” nge ku boch e ngongol nib kireb. (Rom. 1:28-31) Ere, rayog ni ngad guyed fan ni ke pi’ Paul e athamgil  nga laniyan’ e piin nra ilalgad u fithik’ e pi ngongol ney ni ngar manged boch e tapigpig rok Got mi yad ‘pied yad ngak nge piliyegrad’ mu kur ‘piliyeged lanin’rad ni polo’.’

12. Mang e kam guy u rogon e lem ni ma tay e girdi’ e ngiyal’ ney, ma uw rogon nra magawonnag e re lem ney e piin Kristiano?

¹² Ba gel e kireban’ riy ya gad be par u fithik’ bogi girdi’ ni bod e piin ni weliy Paul murung’agrad. Pi girdi’ ney e yad ma lemnag ndaki puluw ko par e ngiyal’ ney ni ngad paged be’ ni nge gagiyegnag rogon e par rodad maku dariy be’ ni nge towasariy be’ ni nge fol ko n’en ni be lemnag. Boor e sensey nge gallabthir ni yad ma lemnag nib fel’ e re n’ey ma yad ma yog nra be’ mab puf rogon ni nge rin’ e tin ni baadag. Yad ma lemnag ni dabiyog ni ngad nanged ko mang e ba fel’ nge mang e ba kireb. Mus ko piin ni yad ba m’ing ko teliw ma yad ma lemnag nib puf rogorad ni ngar rin’ed e tin ni yad be lemnag nib fel’ ma dariy rogon ni ngar folgad rok Got nge pi motochiyel rok. (Ps. 14:1) Mit ney e lem e ku rayog ni nge magawonnag e tin riyul’ e Kristiano. Piin dab ra kol ayuwgad e ku rayog ni nge af e mit ney e lem ngorad ni aram e dabi m’agan’rad ngay ni ngar folgad ko yaram u lan e ulung ma nap’an ni yad ra guy ban’en ni kan rin’ ndubrad mi yad gun’gun’. Maku reb e dubrad ni ngar folgad ko pi fonow u murung’agen e pi n’en ni yima chuweg e chalban ngay, nge Internet, nge skul nib tolang.

13. Mang fan ni susun e ngad fal’eged i yaliy e bin riyul’ i rarogodad?

¹³ Faanra nge dabi gagiyegnag e re fayleng ney e lem rodad, mab t’uf ni ngad fal’eged i yaliy rogon ni gad ma lem, nge pi n’en ni gad ma nameg, nge pi n’en nib ga’ fan u wan’dad. Pi n’ey e rayog nder guy e girdi’. Maku rayog ni nge yog boch e girdi’ nib fel’ e n’en ni gad be rin’. Machane, goo gadad e gad manang ko rriyul’ ni gad be pag e pi n’en ni kad filed u lan e Bible ni nge piliyegdad fa danga’.​—Mu beeg e James 1:23-25.

14. Mang e ra ayuwegdad ni ngad nanged e pi n’en nib t’uf ni ngad thilyeged u rarogodad?

¹⁴ Ra nge piliyegdad Got mab t’uf ni ngad thilyeged lanin’dad, ni aram e bin riyul’ i rarogodad. Mang e ra ayuwegdad ni ngad rin’ed e re n’ey? Nap’an ni gad ra fil e n’en nib m’agan’ Jehovah ngay ni ngad rin’ed nib puluw ko n’en nib m’agan’ ngay nrogon ni bay u Bible, ma n’en ni gad ra rin’ e ra m’ug riy e bin riyul’ i rarogodad nge n’en nib t’uf ni ngad rin’ed ya nge puluw e ngongol rodad ko “tin nib m’agan’ Got ngay.”​—Rom. 12:2; Heb. 4:12.

15. Mang e n’en ni ma yal’uweg Jehovah u rarogodad?

¹⁵ Mu beeg e Isaiah 64:8. Gad ra fil ban’en nib ga’ fan ko fare fanathin ni weliy Isaiah ni profet murung’agen. Gad bod e but’ ni yima ngongliy e th’ib riy, me Jehovah e bod e en ni ma ngongliy e th’ib ni but’. Ma yal’uwegdad ni bod rogon e en ni ma ngongliy e th’ib ni but’ ni be fal’eg yaan fare th’ib. Machane, gathi yaadad e ir e be fal’eg, ya be yal’uweg lanin’dad. Nap’an ni gad ra pag ni nge yal’uwegdad, ma aram e gad be pag ni nge thilyeg rogon ni gad ma lem, ma aram e n’en nib t’uf rodad ya nge yag nda togopuluwgad ko pi n’en ni ma magawonnagdad ko re fayleng ney. Ere, uw rogon ni ma yal’uwegdad Got?

16, 17. (a) Mu weliy e n’en ni ma rin’ e en ni ma ngongliy e th’ib ko but’ u m’on ni nge ngongliy yaan ban’en riy. (b) Uw rogon ni ma piliyegdad e Thin rok Got ni ngad fel’gad u wan’?

¹⁶ Ra ngan ngongliy reb e th’ib nrib fel’ yaan, mab t’uf ni ngan fanay e but’ nib fel’. Machane, bay l’agruw ban’en nib t’uf ni ngan rin’. Som’on, e ba t’uf ni ngan chuweg boch ban’en u fithik’ fare but’. Ngemu’, min tay e ran ngay ma aram min tabab i athukuy ya nge dabi thilpar fare th’ib u nap’an ni yibe ngongliy.

¹⁷ Faen ni ma ngongliy e th’ib ko but’ e ma fanay e ran ni nge chuweg boch ban’en u fithik’ fare but’ me mom rogon ni nge maruwel ngay. Faanra aray rogon ma demtrug e miti th’ib nrayog ni nge ngongliy, ni ki mada’ ko th’ib nib  gilgith. Thin rok Got e rayog ni nge ayuwegdad ngad thilgad ni bod rogon fare ran ni ma chuweg boch ban’en nib kireb u fithik’ fare but’. Nap’an ni kad filed e tin riyul’ u murung’agen Got, ma kad paged ni nge piliyegdad ngad fel’gad u wan’ ni aram e kad digeyed rogon ni ud lemgad kafram. (Efe. 5:26) Am lemnag urngin yay ni kan pi’ e athamgil nga lanin’dad ni ngad beeged e Bible rodad ni gubin e rran, ma gad un ko muulung ni gubin ngiyal’ ya aram e gin ni gad ma fil e Thin rok Got riy. Mang fan ni kan pi’ e athamgil nga lanin’dad ni ngad rin’ed e pi n’ey? Bochan ni faan gad ra rin’ ni aray rogon, ma aram e gad be pag Jehovah ni nge yal’uwegdad.​—Ps. 1:2; Acts 17:11; Heb. 10:24, 25.

18. (a) Faanra gad baadag ni nge piliyegdad e Thin rok Got, ma mang nib ga’ fan ni ngaud fal’eged i lemnag? (b) Mang boch e deer nrayog ni nge ayuwegdad?

¹⁸ Faanra gad ma beeg e Bible ni gubin e rran ma rayog ni nge piliyegdad. Boor e girdi’ ni yad ma beeg e Bible ma kar nanged boch ban’en ni bay riy. Dabisiy ni kam mada’nag boch i yad u nap’an e machib. Bay boch i yad nrayog ni ngar weliyed e thin nu Bible ni ke mit ngorad. Machane dariy angin ko lem nge ngongol rorad. Mang fan? Faanra nge piliyeg e Thin rok Got laniyan’ be’ ma thingari gay rogon ni nge taw e thin riy nga gum’irchaen. Ere, ba t’uf ni ngad ted ba ngiyal’ ni ngad fal’eged i lemnag e pi n’en ni gad be fil. Ba fel’ ni ngad fithed gadad ni nge lungudad: ‘Ke mich u wan’ug nre n’ey ni gu be fil e gathi kemus nreb e machib ko teliw, fa? Ke tamilang u wan’ug ni ireray e tin riyul’, fa? Gu be gay rogon ni nggu fol ko n’en ni kug fil ma gathi kemus ni gu be lemnag ni nggu fil ngak boch e girdi’, fa? Gu be lemnag ni be non Jehovah ngog u daken e re n’ey, fa?’ Faan gad ra fal’eg i lemnag e pi deer ney ma ra ayuwegdad ni nge gel e tha’ u thildad Jehovah ma ra t’uf rodad. Faanra taw e thin rok Got nga fithik’ i lanin’dad ma ra yib angin ngodad.​—Prov. 4:23; Luke 6:45.

19, 20. Mang fonow u lan e Bible e rayog ni nge yib angin ngodad ni faan gad ra fol riy?

¹⁹ Faanra ud beeged e Thin rok Got ni gubin e rran ma gad be fal’eg i lemnag ma ra k’aringdad ni ngad ululgad i rin’ e n’en ni gad be rin’ ni aram e: ‘Bin kakrom i gadad nge tin ni kad mechamgad ngay e kad n’iged, ma bin nib beech i gadad e ka don’ed nga dakended. Erera’ e bin nib beech i gadad, ni Got ni ir e sunumiy e yugu be beechnagdad i yan.’ (Kol. 3:9, 10) Arrogon, rayog ni ngad rin’ed e re n’ey ni faan gad ra fil e Bible ma gad fol ko pi n’en ni gad be fil riy. Bin nib beech i gadad e ra ayuwegdad ni ngad gelgad ko pi ban rok Satan.

²⁰ Ke puguran apostal Peter ngodad ni ngaud ‘folgad rok Got, ma tin nib kireb ni ud m’ad ni bochan ko ngiyal’ ndawor da nanged Kristus riy e dab kud paged nge mang ir e gagiyegnag pangidad,’ machane ‘ngad pired ni gadad ba thothup u fithik’ urngin e tin ni gad be rin’, ni bod rogon Got nib thothup ni ir e ke piningdad.’ (1 Pet. 1:14, 15) Faan gad ra athamgil ni ngad digeyed rogon e lem nge ngongol ni ud ted kafram, ma gad pag Got ni nge piliyegdad, ma ra tow’athnagdad. Ireray e n’en ni gad ra weliy ko bin migid e article.