1, 2. Mɛni blɔ nɔ o guɔ kɛ mwɔɔ o yi mi kpɔ, nɛ kɛ o naa yi mi kpɔhi nɛ o mwɔɔ ɔ ha kɛɛ?

DAA ligbi ɔ, wa mwɔɔ wa yi mi kpɔ ngɛ níhi fuu a he. Ke e he hia kaa o mwɔ o yi mi kpɔ ɔ, kɛ o peeɔ o ní ha kɛɛ? Ni komɛ mwɔɔ mɛ nitsɛmɛ a yi mi kpɔ ngɛ nɔ́ tsuaa nɔ́ nɛ a peeɔ ɔ he. A susuɔ kaa a ngɛ he blɔ nɛ mɛ nitsɛmɛ a mwɔɔ a yi mi kpɔ ngɛ níhi a he, nɛ a sume nɛ nɔ kpa ko nɛ tsɔɔ mɛ nɔ́ nɛ e sa kaa a pee. Se ni komɛ ngɛ nɛ mɛ hu a yeɔ gbeye kaa mɛ nitsɛmɛ a maa mwɔ a yi mi kpɔ ngɛ níhi nɛ a he hia a, a he. Ni komɛ hu hlaa ga womi ngɛ womihi a mi aloo ngɛ ga woli a ngɔ, nɛ eko ɔ, a puɛɔ sika fuu ngɛ enɛ ɔ peemi mi.

² E ngɛ mi kaa níhi fuu ngɛ nɛ wa be he blɔ kaa wɔ nitsɛmɛ wa mwɔɔ wa yi mi kpɔ ngɛ he mohu lɛɛ, se wa ti nihi fuu yɔse kaa níhi fuu hu ngɛ nɛ wɔ nitsɛmɛ wa ma nyɛ maa mwɔ wa yi mi kpɔ ngɛ a he. (Gal. 6:5) Se eko ɔ, wa le kaa tsa pi yi mi kpɔhi tsuo nɛ wa mwɔɔ ɔ nɛ nile ngɛ mi aloo wa náa he se.

3. Mɛni blɔ tsɔɔmihi lɛ a kɛ ha wɔ nɛ wa ma nyɛ maa da nɔ kɛ mwɔ wa yi mi kpɔ, se mɛni heje nɛ pi be tsuaa be nɛ e ngɛ gbɔjɔɔ kaa wa maa mwɔ wa yi mi kpɔ ɔ?

³ Akɛnɛ wa ji Yehowa sɔmɔli heje ɔ, wa bua ma nyɛ maa jɔ kaa Yehowa ha blɔ tsɔɔmihi nɛ a mi tɛ̃ kɛ kɔ níhi fuu nɛ a he hia nɛ e sa kaa waa pee ngɛ wa si himi mi ɔ a he. Wa le kaa ke waa kɛ blɔ tsɔɔmi nɛ ɔmɛ tsu ní ɔ, wa ma nyɛ maa mwɔ wa yi mi kpɔ ngɛ blɔ nɛ maa sa Yehowa hɛ mi nɔ, nɛ wɔ nitsɛmɛ hu wa ma ná he se. Se kɛ̃ ɔ, eko ɔ, si himi komɛ ngɛ nɛ wa ma ya je mi nɛ Baiblo ɔ tsɔɔ we nɔ́ pɔtɛɛ nɛ wa ma nyɛ maa pee ngɛ he. Ke e ba jã a, kɛ o maa mwɔ o yi mi kpɔ ha kɛɛ. Kaa nɔ hyɛmi nɔ́ ɔ, wa le kaa e sɛ nɛ waa ju. (Efe. 4:28) Se mɛni tutuutu nɛ ke nɔ ko pee ɔ, e tsɔɔ kaa e ju? Anɛ nɔ́ nɛ e wo ɔ he jua, aloo yi mi tomi heje nɛ e wo nɔ́ ɔ, aloo nɔ́ kpa ko lɛ tsɔɔ kaa e ju lo? Mɛni blɔ nɔ o guɔ kɛ mwɔɔ o yi mi kpɔ ngɛ níhi nɛ a kɛ blɔ tsɔɔmi pɔtɛɛ ko ha we ngɛ a he ɔ  he? Mɛni ma nyɛ maa ye bua wɔ ngɛ si himi kaa kikɛ ɔ mi?

4. Mɛni ga nɛ be komɛ nihi woɔ wɔ ke wa suɔ kaa waa mwɔ wa yi mi kpɔ?

⁴ Eko ɔ, ke wa de wa nyɛmi Odasefono ko ke wa suɔ nɛ waa mwɔ wa yi mi kpɔ ngɛ nɔ́ ko he ɔ, e ma de wɔ ke waa kɛ juɛmi nɛ mi tsɔ nɛ pee jã. Enɛ ɔ ji ga womi kpakpa. Baiblo ɔ bɔ wɔ kɔkɔ kaa wa ko ye o ya kɛ mwɔ wa yi mi kpɔ. E de ke: “Se nɔ nɛ esɔ kɛkɛ e heɔ ɔ, e be nɔ́ kpakpa ko náe pe ohia.” (Abɛ 21:5) Se ke a ke waa kɛ juɛmi nɛ mi tsɔ nɛ mwɔ wa yi mi kpɔ ɔ, mɛni e tsɔɔ? Anɛ nɔ́ kɛkɛ nɛ e tsɔɔ ji kaa waa to wa tsui si, nɛ wa susu sane ɔ he saminya loko waa mwɔ wa yi mi kpɔ lo? E he hia nɛ waa pee jã mohu lɛɛ, se ní kpahi hu ngɛ nɛ e sa kaa waa pee kɛ piɛɛ he konɛ wa nyɛ nɛ waa ngɔ juɛmi nɛ mi tsɔ kɛ mwɔ wa yi mi kpɔ.—1 Pet. 4:7.

5. Mɛni heje nɛ wa juɛmi yi mluku ɔ?

⁵ Wɔ tsuo wa juɛmi yi mluku. Mɛni heje? Ejakaa a fɔ wɔ kaa yayami peeli, nɛ wa tɔ fã ngɛ wa nɔmlɔtso aloo wa juɛmi mi. (La 51:5; Rom. 3:23) Jehanɛ se hu ɔ, be ko nɛ be ɔ, Satan “yu” wa ti nihi fuu wa hɛngmɛ; jinɛ wa li Yehowa kɛ e dami mlaa amɛ a he nɔ́ ko nɔ́ ko. (2 Kor. 4:4; Tito 3:3) Enɛ ɔ he ɔ, ke waa kɛ be kɛkɛɛ susu níhi a he po ɔ, eko ɔ, wa yi mi kpɔ mwɔmi ɔ be dae keji wa da nɔ́ nɛ wɔɔ wa susu kaa e da nɛ sisi numi ngɛ he ɔ nɔ kɛ mwɔ wa yi mi kpɔ.—Abɛ 14:12.

6. Mɛni ma nyɛ maa ye bua wɔ konɛ wa ná nile?

⁶ E ngɛ mi kaa wa nɔmlɔtso kɛ wa juɛmi yi mluku mohu lɛɛ, se Yehowa nɛ ji wa hiɔwe Tsɛ ɔ lɛɛ, e ye mluku kɛ pi si. (5 Mose 32:4) Bua jɔmi sane ji kaa e ha wɔ níhi nɛ maa ye bua wɔ nɛ́ wa tsake bɔnɛ wa susuɔ níhi a he ha a konɛ wa juɛmi mi nɛ tsɔ. (Kane 2 Timoteo 1:7. *) Akɛnɛ wa ji Kristofoli heje ɔ, wa suɔ nɛ wa susu níhi a he nɛ waa pee wa ní ngɛ nile mi hulɔ. E sa nɛ wa kudɔ wa susumi kɛ bɔnɛ wa nuɔ he ngɛ níhi a he ha a, nɛ waa kase Yehowa ngɛ bɔnɛ e susuɔ níhi a he, e nuɔ níhi a he, kɛ bɔnɛ e peeɔ e ní ha a.

7, 8. Mo ha nɔ hyɛmi nɔ́ ko nɛ tsɔɔ bɔnɛ ke a nyɛ nɔ ko nɔ loo e kɛ si himi nɛ mi wa kpe po ɔ, e ma nyɛ maa mwɔ e yi mi kpɔ ngɛ nile mi ha.

⁷ Mo susu nɔ hyɛmi nɔ́ ko he nɛ o hyɛ. Ke ni komɛ ngɛ blɔ hiami tso mi nɛ a fɔ ɔ, a pɔɔ a bimɛ ngɔmi kɛ ya haa a wekuli ngɛ a ma mi nɛ́ a hyɛ a nɔ ha mɛ, konɛ a nyɛ nɛ a tsu ní nɛ a ná sika. * Yo ko nɛ e hia blɔ kɛ ho ma se ya a fɔ binyumuyo ko nɛ e he ngɛ fɛu. Jamɛ a be ɔ mi ɔ, e bɔni Baiblo ɔ kasemi nɛ e ngɛ anɔkuale ɔ sisi nue. E huɛmɛ kɛ e wekuli nyɛ e kɛ e huno ɔ a nɔ kaa a ngɔ a bi ɔ kɛ ya ha a fɔli ngɛ a ma mi nɛ a hyɛ e nɔ ha mɛ. Se ngɛ nɔ́ nɛ yo ɔ kase ɔ nya a, e ba yɔse kaa akɛnɛ lɛ nɛ e fɔ bi ɔ heje ɔ, e ji blɔ nya nítsumi nɛ Mawu kɛ wo e dɛ kaa e tsɔse e bi ɔ. (La 127:3; Efe. 6:4) Anɛ e sa kaa e pee e ní kaa bɔnɛ nihi fuu peeɔ a ní nɛ a susuɔ kaa tɔmi ko be he ɔ lo? Aloo e sa nɛ e kɛ nɔ́ nɛ e ngɛ kasee ngɛ Baiblo ɔ mi ɔ nɛ tsu ní konɛ níhi a mi nɛ wa ha lɛ ngɛ sika blɔ fa mi, nɛ́ nihi hu nɛ a muɔ lɛ lo? Ke mo ɔ, kɛ o ko pee o ní ha kɛɛ?

⁸ Yo ɔ hao wawɛɛ, ejakaa nihi ngɛ e nɔ nyɛe konɛ e ngɔ e bi ɔ kɛ ya ha e fɔli. E je e tsui mi nɛ e sɔle kɛ bi blɔ tsɔɔmi ngɛ Yehowa ngɔ. Yo ɔ kɛ nyɛmi nɛ e kɛ lɛ kaseɔ Baiblo ɔ susu sane ɔ he. E kɛ nyɛmimɛ kpahi nɛ a ngɛ asafo ɔ mi ɔ hu susu he. Enɛ ɔ ha nɛ e na Yehowa juɛmi ngɛ sane ɔ he. Jehanɛ se hu ɔ, e susu bɔnɛ ke  a tsɔ jokuɛwi kɛ je a fɔli a he ngɛ a jokuɛwi a si ɔ, e yeɔ mɛ awi ha a he. Benɛ e da Ngmami ɔ nɔ kɛ susu níhi a he ɔ, e na kaa e sɛ nɛ e kɛ jokuɛ ɔ nɛ ya ha e fɔli. E huno ɔ na kaa nihi nɛ a ngɛ asafo ɔ mi ɔ ngɛ mɛ ye buae. E yɔse hu kaa jokuɛ ɔ ngɛ nɔmlɔtso mi he wami kpakpa, enɛ ɔ he ɔ, lɛ hu e kplɛɛ nɛ a kɛ lɛ bɔni Baiblo ɔ kasemi. E kɛ e yo ɔ bɔni asafo mi kpehi yami.

9, 10. Ke a ke wa juɛmi mi nɛ e tsɔ ɔ, mɛni e tsɔɔ, nɛ kɛ wa ma plɛ kɛ pee jã kɛɛ?

⁹ Nɔ hyɛmi nɔ́ kake pɛ ji nɛ ɔ nɛ, se e tsɔɔ kaa juɛmi nɛ mi tsɔ nɛ waa kɛ maa mwɔ yi mi kpɔ ɔ biɔ babauu pe nɛ wa maa pee níhi nɛ wa susu kaa e da, aloo wa maa nyɛɛ nihi a se kɛkɛ. Wa ma nyɛ maa ngɔ wa juɛmi kɛ wa tsui nɛ yi mluku ɔ kɛ to watsi nɛ ngɛ fo tue tsɔ aloo watsi nɛ e kpɛ se he. Ke waa kɛ watsi ko kaa jã tsu ní ɔ, e kɛ haomi maa ba. (Yer. 17:9) E he hia nɛ wa ha nɛ Mawu dami mlaa amɛ nɛ a kudɔ wa juɛmi kɛ wa tsui.—Kane Yesaya 55:8, 9.

¹⁰ Yi mi tomi kpakpa heje nɛ Baiblo ɔ wo wɔ ga nɛ nyɛɛ se nɛ ɔ nɛ. E de ke: ‘Ngɔɔ o hɛ ngɔ fɔ Yehowa nɔ kulaa. Koo ngɔ o hɛ ngɔ fɔ nɔ́ nɛ moo o susu kaa o le ɔ nɔ. Nɔ́ tsuaa nɔ́ mi ɔ, mo kai Yehowa, nɛ e maa tsɔɔ mo blɔ nɛ da.’ (Abɛ 3:5, 6) Mo kadi munyu nɛ ji, “koo ngɔ o hɛ ngɔ fɔ nɔ́ nɛ moo o susu kaa o le ɔ nɔ” ɔ. E de kɛ tsa nɔ ke, ‘mo kai Yehowa.’ Lɛ pɛ ji nɔ nɛ e juɛmi mi tsɔ kɛ pi si. Enɛ ɔ he ɔ, be tsuaa be nɛ wa maa mwɔ wa yi mi kpɔ ngɛ nɔ́ ko he ɔ, e sa nɛ waa kane Baiblo ɔ nɛ waa le Mawu susumi ngɛ jamɛ a nɔ́ ɔ he. Lɔɔ se ɔ, e sa nɛ waa da Mawu susumi ɔ nɔ kɛ mwɔ wa yi mi kpɔ. Enɛ ɔ maa tsɔɔ kaa wa juɛmi mi tsɔ, nɛ wa ngɛ Yehowa kasee.

11. Mɛni ji nɔ́ titli nɛ e maa ye bua wɔ konɛ waa mwɔ wa yi mi kpɔ ngɛ nile mi?

¹¹ E be gbɔjɔɔ kaa wa maa mwɔ wa yi mi kpɔ ngɛ nile mi nɛ wa tsu he ní. Nihi nɛ enɛ ɔ peemi yeɔ ha mɛ titli ji nihi nɛ a ba anɔkuale ɔ mi kɛ we, aloo nihi nɛ kpaako a nane ngɛ si pie ngɛ anɔkuale ɔ mi ɔ. Se jamɛatsɛmɛ ɔmɛ ma nyɛ maa mwɔ a yi mi kpɔ ngɛ nile mi. Baiblo ɔ tsɛɛ mɛ ke bimwɔwi, ejakaa a ngɛ kaa bimwɔwi nɛ a ngɛ nyɛɛmi kasee. Ke  bimwɔyo ko ngɛ nyɛɛmi kasee ɔ, e hiaa e nane kpitikpiti. Jã kɛ̃ nɛ e ji ngɛ nihi nɛ a ji bimwɔwi ngɛ Mawu jami mi ɔ a blɔ fa mi, ke e ba kaa a maa mwɔ a yi mi kpɔ ngɛ nile mi. Mo kai kaa bɔfo Paulo kale nihi nɛ a wa ngɛ Mawu jami mi ɔ kaa a ji nihi nɛ “a tsɔse a juɛmi nɛ a le slɔɔto nɛ ngɛ kpakpa kɛ yayami a kpɛti.” Munyu nɛ ji “tsɔse” ɔ tsɔɔ kaa e sa nɛ a ya nɔ nɛ a bɔ mɔde, nɛ jã ji bɔnɛ e sa kaa ni hehi nɛ a pee.—Kane Hebribi 5:13, 14.

12. Mɛni blɔ nɔ wa ma nyɛ maa gu kɛ mwɔ wa yi mi kpɔ ngɛ nile mi?

¹² Kaa bɔnɛ wa de kɛ sɛ hlami ɔ, daa ligbi ɔ, e sa kaa waa mwɔ wa yi mi kpɔ ngɛ níhi fuu a he, ngɛ ní nguanguahi kɛ ní nyafinyafihi tsuo a mi. Níhi a mi hlami ko tsɔɔ kaa, níhi fuu ngɛ nɛ wa pee hluu nɛ e tlɔ wa he nɛ́ ke wa maa pee ɔ, wa susuu we he hu. Kaa nɔ hyɛmi nɔ́ ɔ, daa mɔtu ɔ, e sa nɛ o mwɔ o yi mi kpɔ ngɛ tade nɛ o maa wo ɔ he. Eko ɔ, o naa enɛ ɔ kaa nɔ́ nyafii ko, lɔɔ he ɔ, o susuu we he tsɔ, titli ke o ngɛ o ya yee. Se e he hia nɛ waa hyɛ kaa níhi nɛ wa woɔ ɔ tsɔɔ kaa wa ji Yehowa sɔmɔli lo. (2 Kor. 6:3, 4) Ke o yaa he tade ɔ, eko ɔ, o susuɔ kaa o ma he tade nɛ ba nɔ. Se anɛ o susuɔ tade nɛ sa he lo? Ke o kɛ nile tsuɔ níhi kaa kikɛ ɔ a he ní ɔ, lɔɔ tsɔɔ kaa o tsɔse o juɛmi ɔ. Enɛ ɔ ma nyɛ maa ye bua mo konɛ o kɛ nile nɛ mwɔ o yi mi kpɔ ngɛ níhi nɛ a he hia a he.—Luka 16:10; 1 Kor. 10:31.

13. Mɛni maa ye bua wɔ konɛ waa pee níhi nɛ wa mwɔ wa yi mi kpɔ kaa wa maa pee ɔ?

¹³ E be gbɔjɔɔ kaa wa maa mwɔ wa yi mi kpɔ ngɛ nile mi, nɛ jã kɛ̃ nɛ e be gbɔjɔɔ kaa wa ma tsu wa yi mi kpɔ nɛ wa mwɔ ɔ he ní. Ni komɛ nɛ a suɔ kaa a kpa sigaleti numi ɔ nyɛ we nɛ a pee jã, ejakaa nɔ́ ko wui mɛ he wami kaa a pee jã. Nɔ́ nɛ he hia ji, nɛ́ wa maa ma wa juɛmi nya si kaa wa maa pee nɔ́ nɛ wa mwɔ wa yi mi kpɔ kaa wa maa pee ɔ. Waa kɛ enɛ ɔ ma nyɛ maa to nɔ ko nɛ ngɛ e he mi kae konɛ e panihi a mi nɛ wa a he. Ke nɔ ɔ kaa e he mi be tsuaa be ɔ, e pani ɔmɛ a mi waa wawɛɛ. Se ke nɔ ko pɔɛ jã peemi ɔ, e panihi a mi wɛ. Lɛɛ mɛni ma nyɛ maa ye bua wɔ konɛ wa ná kã kɛ pee níhi nɛ wa mwɔ wa yi mi kpɔ kaa wa maa pee ɔ mɔ? Ke waa kɛ wa hɛ fɔ Yehowa nɔ ɔ, e maa ye bua wɔ.—Kane Filipibi 2:13.

14. Mɛni wo Paulo he wami nɛ e nyɛ pee nɔ́ nɛ e le kaa e sa kaa e pee ɔ?

¹⁴ Paulo ná enɛ ɔ mi níhi a si kpami. Be ko ɔ, e de ke: “Nɔ́ kpakpa jloɔ mi nɛ ma pee, se i nyɛ we.” E le nɔ́ nɛ e suɔ kaa e maa pee aloo nɔ́ e sa kaa e pee, se be komɛ ɔ, nɔ́ ko tsiɔ e nya nɛ e nyɛ we nɛ e peeɔ. E de ke: “Ngɛ ye tsui mi ɔ, i suɔ Mawu mlaa a saminya. Se i na kaa mlaa muno ko ngɛ ní tsue ngɛ ye nɔmlɔtso ɔ mi. Mlaa nɛ ɔ kɛ nɔ́ nɛ ngɛ ye juɛmi mi ɔ yi kulaa. Nɔ́ nɛ ye juɛmi deɔ mi ke e da nɛ ma pee ɔ, i ya peeɔ nɔ́ kpa kulaa mohu. Yayami su nɛ ngɛ ye mi nɛ ɔ peeɔ mi nyɔguɛ.” Anɛ Paulo be hɛ kɛ nɔ fɔmi ko lo? E ngɛ hɛ kɛ nɔ fɔmi nitsɛnitsɛ. E de ke: “Sina ha Mawu kɛ gu wa Nyɔmtsɛ Yesu Kristo nɔ.” (Rom. 7:18, 22-25) Paulo ngma hu ke: ‘Mawu woɔ mi he wami nɛ e haa nɛ i nyɛɔ peeɔ nɔ́ tsuaa nɔ́.’—Filip. 4:13.

15. Mɛni heje nɛ e he hia kaa waa ma wa juɛmi nya si kaa wa maa pee nɔ́ nɛ da a?

¹⁵ E ngɛ heii kaa ja wa mwɔ wa yi mi kpɔ kaa wa maa pee nɔ́ nɛ da loko wa ma nyɛ maa sa Mawu hɛ mi. Mo kai munyu nɛ Eliya tu Baal jali ɔmɛ kɛ Israelbi nɛ a kua hemi kɛ yemi ɔ ngɛ Karmel Yoku ɔ nɔ ɔ. Eliya de mɛ ke: ‘Kɛ yaa si mɛni be loko nyɛ maa pee nyɛ juɛmi ngɛ nɔ́ nɛ ɔmɛ a he? Ke Yehowa ji Mawu ɔ, nyɛ ja lɛ; ke Baal ji Mawu ɔ, nyɛ ja lɛ.’ (1 Ma. 18:21) Israelbi ɔmɛ le nɔ́ nɛ e sa kaa a pee, se a ‘yi mi’ ngɛ mɛ enyɔɔnyɔ pee.  Se Yoshua pee e ní ngɛ blɔ kpa nɔ. Ngɛ e be ɔ mi ɔ, e de Israelbi ɔmɛ ke: ‘Ke nyɛ sume kaa nyɛ ma sɔmɔ Yehowa a, nyɛ tsɔɔ mwɔnɛ nɛ ɔ nɔ nɛ nyɛ ma sɔmɔ. Se imi kɛ ye we ɔ lɛɛ, wa ma sɔmɔ Yehowa.’ (Yosh. 24:15) Mɛni jɔɔmi nɛ e kɛ nihi nɛ a piɛɛ e he ɔ ná? Yehowa jɔɔ Yoshua kɛ nihi nɛ a piɛɛ e he ɔ, nɛ e ha nɛ a ya su Si Womi Zugba a nɛ ji, “zugba kpakpa nɛ baa ní ɔ” nɔ.—Yosh. 5:6.

16, 17. Mo ha nɔ hyɛmi nɔ́ nɛ tsɔɔ kaa ke nɔ ko mwɔ e yi mi kpɔ nɛ e kɛ Mawu suɔmi nya ní kɔ ɔ, e náa he se.

¹⁶ Mo susu si fɔfɔɛ ko nɛ e ba lingmi nɛ ɔ he nɛ o hyɛ. Nyɛminyumu ko nɛ a baptisi lɛ kɛ we kɛ e yo ngɛ bimɛ etɛ nɛ a wɛ. Ligbi ko ɔ, nɔ ko nɛ e kɛ lɛ tsuɔ ní ɔ wo lɛ ga ke, a je kɛ ho nítsumi kpa mi ya. Nɔ ɔ de lɛ kaa a woɔ nɔ hiɔ saminya, nɛ a keɔ nɔ nɔ́ ngɛ lejɛ ɔ. Wa nyɛminyumu ɔ susu sane ɔ he nɛ e sɔle ngɛ he. E ngɛ mi kaa nítsumi nɛ e ngɛ tsue ɔ hiɔwo pi mohu lɛɛ, se e kplɛɛ nítsumi ɔ nɔ, ejakaa e ma nyɛ ma ná Hɔ kɛ Hɔgba konɛ e kɛ e weku ɔ nɛ a ya fiɛɛmi kɛ asafo mi kpehi. E susu he nɛ e na kaa nítsumi ehe ɔ be lɛ deka hae nɛ e kɛ pee jã. Ke mo ɔ, kɛ o ko pee o ní ha kɛ?

¹⁷ Benɛ nyɛminyumu ɔ susu bɔnɛ nítsumi ehe ɔ maa sa huɛ bɔmi nɛ ngɛ e kɛ Yehowa a kpɛti ɔ he ɔ, e kplɛ we nɔ. Anɛ o susu kaa e pia e he ngɛ yi mi kpɔ nɛ e mwɔ ɔ he lo? Dɛbi, e pia we e he. E yɔse kaa ke huɛ bɔmi kpakpa ngɛ e weku ɔ kɛ Yehowa a kpɛti ɔ, jɔɔmi nɛ a ma ná a he hia kulaa pe hiɔwo ngua nɛ e ma ná. E kɛ e yo ɔ a bua jɔ wawɛɛ benɛ a biyo nɔkɔtɔma nɛ e ye jeha nyɔngma a de mɛ ke e suɔ mɛ, nɛ e suɔ nyɛmimɛ ɔmɛ, nɛ e suɔ Yehowa hu wawɛɛ ɔ. E de mɛ ke e suɔ nɛ e jɔɔ e he nɔ kɛ ha Yehowa nɛ a baptisi lɛ. E papaa ngɔ Mawu jami kɛ pee nɔ́ titli ngɛ e si himi mi. Atsinyɛ jemi ko be he kaa e ná nɔ hyɛmi nɔ́ kpakpa nɛ e papaa pee ɔ he se!

18. Mɛni heje nɛ e he hia kaa waa mwɔ wa yi mi kpɔ ngɛ nile mi ɔ?

¹⁸ Yesu Kristo ngɛ anɔkuale jali a hɛ mi nyɛe ngɛ Satan je nɛ ɔ mi kaa bɔnɛ Mose nyɛɛ Israelbi ɔmɛ a hɛ mi ngɛ nga a nɔ ɔ. Nɛ kaa bɔnɛ Yoshua nyɛɛ Israelbi ɔmɛ a hɛ mi kɛ ya su Si Womi Zugba a nɔ ɔ, Yesu hu maa nyɛɛ e se nyɛɛli ɔmɛ a hɛ mi kɛ ya zugba ehe nɛ a yeɔ dami sane ngɛ mi ɔ nɔ. (2 Pet. 3:13) Akɛnɛ je ehe ɔ su si ta heje ɔ, nile be mi kaa wa ma susu níhi a he, aloo wa maa ba wa je mi kaa bɔnɛ wa peeɔ sa a. Be nɛ ɔ ji be nɛ e sa kaa wa yɔse níhi nɛ Yehowa suɔ kaa waa pee. (Rom. 12:2; 2 Kor. 13:5) Moo mwɔ o yi mi kpɔ ngɛ nile mi, nɛ o pee ní kpakpahi konɛ Yehowa bua nɛ jɔ o he nɛ o ná neneene wami.—Kane Hebribi 10:38, 39.