1, 2. Biakhiahnak tuah kha na duh maw? Na tuahmi biakhiahnak cheukhat he aa tlaiin zeitindah na ruah?

NIFATE biakhiahnak tampi kan tuah. Biakhiahnak he aa tlaiin zeitindah na ruah? Mi cheukhat cu a zei paohah anmah tein biakhiah an duh. Kanmah tein biakhiahnak nawl kan ngei tiah an ruah i midang nih biakhiahpiak kha an duh lo. Cheukhat cu a biapimi kong ah biakhiahnak tuah kha an ngamh lo. Cheukhat cu ruahnak cheuhnak kha cauk chungah asiloah mifim hna sinah an kawl i bawmhnak hmuh awkah tangka tampi hmanh an dih.

² Mi tampi nih tuahnak nawl kan ngeih lomi biakhiahnak cheukhat a um nain tuahnak nawl kan ngeihmi zong tampi a um ti kha kan hngalh. (Gal. 6:5) Asinain kan tuahmi biakhiahnak cu an ṭha dih lo ti kha kan hngalh men ko lai.

3. Biakhiahnak tuahnak ah zeinihdah a kan bawmh? Biakhiahnak tuah cu a caan ah zeicah a har?

³ Jehovah salle cu kan nunnak ah a biapimi thil tampi he aa tlaiin Jehovah nih a fiangmi lamhruainak a kan pek caah kan i lawm. Mah kha kan zulh ahcun Jehovah lung a lawmhtermi le kan caah a ṭhami biakhiahnak kan tuah khawh lai. Asinain Baibal ah kan tonmi thil sining le buaibainak kip he aa tlaimi lamhruainak tu cu a um lo. Cu bantuk thil kan ton tikah zeitindah bia kan khiah awk a si? Tahchunhnak ah, Baibal nih fir hlah u a kan ti. (Efe. 4:28) Asinain mi cheukhat nih man a ngei lomi le an herh tukmi thil a si ahcun mi ta a si zongah lak cu a zungzal in cun a palh lo tiah an ti. Baibal nih fiang tein a chim lomi kong ah zeitindah biakhiahnak kan tuah lai? Zeinihdah a kan bawmh lai?

4. Biakhiahnak kan tuah tikah zei bantuk ruahnak cheuhnak dah kan hmuh tawn?

⁴ Unau pakhat kha a biapimi biakhiahnak tuah awk kan ngei tiah kan ti tikah na tuah hlanah ṭha tein ruat hmasa tiah a kan ti ko lai. Mah cu a ṭhami ruahnak cheuhnak a si. Baibal nih biakhiahnak rang tuk in tuah lo awkah hitin ruahnak a kan cheuh: “Namchan in thil a timi paoh cu sifahnak an tong hrimhrim ve ko lai.” (Ptb. 21:5) Asinain thil sining kong kha ṭha tein ruah, a tlarimi si le a konglam dihlak hngalh i zuam lawng hin a za maw? Mah hna cu a biapimi an si nain tuah a herhmi a dang a um rih.

5. Zeicah a tlingmi khuaruah khawhnak kan ngeih lo?

⁵ Ahohmanh a tlingmi khuaruah khawhnak kan ngei lo. Kan zapi in misual le mitling lo kan si caah a tlingmi ngandamnak le a tlingmi khuaruah khawhnak kan ngei lo. (Salm 51:5; Rom 3:23) Mi tampi cu Jehovah le a phunglam kong kan cawn hlanah Satan nih kan “lungthin cu muilak ah a chiah.” (2 Kor. 4:4; Titas 3:3) Cucaah mi pakhat nih biakhiahnak a tuah hlanah caan saupi a ruah hmasa hmanhah amah nih a ṭha, aa tlak a timi ningin biakhiahnak a tuah ahcun a palh rih men ko lai.—Ptb. 14:12.

6. Ṭha tein khuaruah khawh awkah zeinihdah a kan bawmh lai?

⁶ Kannih cu mitling lo kan si nain vancung kan Pa, Jehovah cu a tlingmi a si. (Deut. 32:4) Jehovah nih kan ruahning thlen awk le a ṭhami khuaruah khawhnak ngeih awkah a kan bawmh. Khrihfa a simi nih aa tlakmi ningin khuaruah, tuaktan le tuah kan duh. Cucaah kan ruahnak le kan intuarmi kha kan i uk a hau i Jehovah ruahnak, intuarnak le tuahsernak kha kan i cawn a hau.

7, 8. Hneknak le harnak ton buin a ṭhami biakhiahnak tuah khawh a si kha zei hmuhtonnak nih dah a langhter?

⁷ Mah tahchunhnak hi ruathmanh. Ramdang ah aa ṭhialmi cheukhat nih fa an ngeih tikah an fale kha an ram i an chungkhat sinah an kuat tawn hna. Cuticun rian an ṭuan kho i tangka an kawl kho. * Ramdang i a ummi nu pakhat cu fapate a ngei. Mah caan hrawngah Baibal a cawng i a cawnmi kha a hun zulh. A hawile le a chungkhat pawl nih an fate kha a pi le a pu sin i kuat awkah an nuva in an forh hna. Asinain Jehovah nih nulepa kha fale zohkhenhnak rian a pek hna ti kha Baibal a cawnmi in a hngalh. (Salm 127:3; Efe. 6:4) Midang nih a hmaan tiah an ruahmi kha mah nu nih a tuah ve lai maw? Asiloah pawcawmnak lei a har le midang nih sual an phawt hmanhah Baibal in a hngalhmi kha a zul lai maw? Mah thil sining kha hei tong ve law zeidah na tuah lai?

⁸ Mah mino nute cu midang nih an hnek caah a lungre a thei ngai. Cucaah Jehovah sinah a intuarmi kha a chim i lamhruainak hmuh awkah thla a cam. Mah kong kha Baibal a cawnpiaktu le unau dang a chimh hna tikah Jehovah hmuhning kha a hun hngalh. A fapa cu nulepa he i ṭhen in hmundang ah a um ahcun lungthinlei ah a chambau kho ti zong a hngalh. A sining kha Baibal hmangin ṭha tein a ruah hnuah a fa kha an ram i kuat lo awkah bia a khiah. A vapa nih unau pawl nih an bawmhmi hna le an fapa a dam i aa nuamhmi a hmuh tikah Baibal a cawng ve i a nupi he aa pum ve.

9, 10. Jehovah ruahning i cawn timi cu zeidah a si? Mah cu zeitindah kan tuah khawh?

 ⁹ Mah cu tahchunhnak pakhat lawng a si nain mah nih biakhiahnak tuah tikah kanmah le midang nih a ṭha tiah kan ruahmi lawngin a za lo ti kha a langhter. A tling lomi kan lungthin le kan ruahnak cu a rang tukmi asiloah a nuar tukmi suimilam he aa lo. Mah kha kan zumh ahcun harnak nganpi kan tong kho. (Jer. 17:9) Cu bantuk harnak ton lo awkah kan lungthin le kan ruahnak cu Pathian phunglam ningin a si a hau.—Isaiah 55:8, 9 rel.

¹⁰ Baibal nih hitin ruahnak a kan cheuh: “BAWIPA kha na lung chung dihlak in i bochan law nangmah fimnak kha i rinh hlah. Na kalnak lam kip ah amah kha hngal law Amah nih na lam kha a tluanter hna lai.” (Ptb. 3:5, 6) “Nangmah fimnak kha i rinh hlah” tiah a timi kha i cinken. Mah hnuah Jehovah kha “hngal” tiah a ti. Jehovah lawng hi a tlingmi khuaruah khawhnak a ngeimi a si. Cucaah biakhiahnak kan tuah fate Pathian ruahning kha hngalh awkah Baibal kan rel a hau. Mah lawngah Jehovah duhning in bia kan khiah khawh lai. A ṭhami khuaruah khawhnak ngeih kan duh ahcun Jehovah ruahning kha kan i cawn a hau.

11. A ṭhami biakhiahnak tuah awkah zeidah tuah a herh?

¹¹ A ṭhami biakhiahnak tuah le kan biakhiah ningin tuah cu a fawi lo. Mah cu a hleiin tipil a ingkami le thlaraulei a ṭhangcho kami caah a har ko lai. Asinain annih zong an ṭhangcho kho ko. Annih cu lamkal a cawng liomi ngakchia he an i lawh caah Baibal nih “ngakchia” tiah a auh hna. Ngakchia cu tlawmpal tete in a kal lengmangnak thawngin lamkal a cawng. A ṭhami biakhiahnak tuah awkah a cawngmi hna zong nih cutin an tuah. Lamkaltu Paul nih thlaraulei nutling patling timi cu “chia le ṭha thleidan khawhnak a ngei cangmi an si” tiah a ti. Cu bantuk mi si khawh awkah a caan le thazaang  pek a hau. Cucaah mithar pawl zong nih cutin an tuah a hau ve.—Hebru 5:13, 14 rel.

12. A ṭhami biakhiahnak tuah awkah zeitindah kan cawn khawh?

¹² Nifate biakhiahnak tampi tuah kan herh. Mah cu a biapimi le a biapi theng lomi an si men lai. Hlathlaitu cheukhat nih biakhiahnak kan tuahmi a cheu hrawng cu ṭha tein ruahnak cungah si loin kanmah tuah tawnmi phung cungah hrambunh in kan tuahmi a si tiah an ti. Tahchunhnak ah, zing fate zeidah kan i hruk lai tiah bia kan khiah. Mah cu a biapi lomi a si i tampi ruah a hau lo tiah na ruah men lai. Asinain Jehovah salle caah kan thilhrukning hi aa tlak maw ti ruah cu a biapi tukmi a si. (2 Kor. 6:3, 4) Thil naa cawk tikah mi nih an uarmi kha cawk na duh men lai. Asinain mah thil cu zoh aa dawh maw ti le tangka a za in ka ngei maw ti tah na ruat maw? A biapi theng lo tiah kan ruahmi kongah biakhiahnak ṭha tein kan tuahmi nih kan chiaṭha thleidan khawhnak kha a cawnpiak lai. Mah nih a biapi deuhmi thil kongah biakhiahnak ṭha tein tuah awkah a kan bawmh lai.—Luka 16:10; 1 Kor. 10:31.

13. Kan biakhiah ningin tuah awkah zeinihdah a kan bawmh lai?

¹³ A ṭhami biakhiahnak kan tuah hmanhah kan biakhiah ningin tuah awkah a fawi lo caan a um. Tahchunhnak ah, mi cheukhat cu kuak an zukmi kha ngol an duh nain an duhnak cu a ṭhawn lo caah an ngol kho lo. Kan biakhiah ningin tuah duhnak taktak kan ngeih a hau. Kan biakhiah ningin tuah duhnak ngeih chin awkah zeinihdah a kan bawmh lai? Jehovah sinah bawmhnak kan hal a hau.—Filipi 2:13 rel.

14. Paul nih a tuah awk a simi thil kha zeicah a tuah khawh?

¹⁴ Paul nih a hmuhtonnak in a ṭhami thil tuah a har kha a hngalh. Hitin a ti: “Ṭhatnak tuah duhnak kha ka chungah um hmanh sehlaw ṭhatnak cu ka tuah kho lo.” Tuah a duhmi le tuah awk a simi kha a hngalh nain a tuah kho tawn lo. Cucaah hitin a ti: “Ka chunglei mi cu Pathian phung ah khan aa lawm; sihmanhsehlaw ka chung i phung dang a rak um ve kha ka hngalh, cu phung cu ka lung nih a ṭha a timi phung a rak dohtu kha a si. Cu phung nih cun, ka pum chung i rian a ṭuanmi sualnak phung sal ah khan a ka ser.” Asinain Paul cu ruahchannak a ngei lomi cu a si lo. “Pathian lawnglawng nih kan Bawipa Jesuh Khrih thawngin a ka khamh lai. Pathian cu lawm ko u sih” tiah a ti.—Rom 7:18, 22-25.

15. A ṭhami thil tuah awkah biakhiah cu zeicah a herh?

¹⁵ Pathian lung lawmhter awkah a ṭhami biakhiahnak tuah le mah ningin nun a hau. Elijah nih Karmel tlang ah Baal a biami hna le zumhpialmi Israel mi hna sin a chimmi bia hi i cinken: “Zei can dah bei lengmang in ruahnak pahnih he nan kal lai? BAWIPA cu Pathian a si a si ahcun, amah cu zul u; sihmanhsehlaw Baal cu Pathian a si ahcun, amah cu zul fawn ko u.” (1 Si. 18:21) Israel mi hna nih Jehovah lawng biak awk a si kha an hngalh ko. Asinain Jehovah he Baal he biak an i zuam caah “ruahnak pahnih” he an um. Joshua tu cu cutin a si lo. Israel mi hna kha hitin a rak ti hna: “BAWIPA biak kha nan duh lo a si ahcun nihin ni ah hin nan biak ding cu i thim u; . . . keimah le ka innchungkhar  tu nih cun BAWIPA kha kan biak ko lai.” (Josh. 24:15) Joshua le amahlei a ṭangmi hna nih zei thluachuah dah an hmuh? “Cawhnuk le khuaihliti in a luangmi,” Biakammi Ram ah luhnak nawl an hmu.—Josh. 5:6.

16, 17. Jehovah duhnak tuah awk bia kan khiah tikah zei ṭhatnak dah kan hmuh?

¹⁶ Tipil a ingkami unaupa pakhat cu fa pathum a ngei. A rian cu a ṭha setsai lo nain zarhte zarhpi ah an chungkhar ningin phungchimnak le pumhnak ah aa tel khawh caah mah rian kha aa thimmi a si. Nikhat cu a rianṭuan hawi pakhat nih lahkhah a ṭhat deuhnak le ṭhatnak dang tamdeuh in hmuh khawhnak company ah i ṭhial awkah a sawm. Unaupa nih mah kong kha thlacam buin ṭha tein a ruah. Rian thar kha ka cohlan ahcun zarhte zarhpi ah kaa dinh khawh nakhnga caan saupi a rau kho men ti kha a hngalh. Mah thil sining kha hei tong ve law zeidah na tuah lai?

¹⁷ Mah rian nih Jehovah he an i pehtlaihnak zeitindah a hnorsuan khawh ti kha unaupa nih ṭha tein a ruah hnuah a cohlang lo. Cutin bia a khiah caah a hnuah aa ngaichih lai tiah na ruat maw? Aa ngaichih lo. Tangka tamdeuh hmuhnak lawng ruat loin a chungkhar ningin Jehovah he an i pehtlaihnak a ṭhat khawhnak tu kha biapi deuh ah a chiah. Kum hra a simi an fanu nih ka nu le ka pa kha ka dawt hna, unau pawl zong ka dawt hna i Jehovah kha ka dawt tuk tiah a ti tikah an nuva in an i nuam tuk. Cun Jehovah sinah i pumpek le tipil in ka duh ti zong in a ti. A pa nih Jehovah biaknak kha pakhatnak ah a chiahmi in a fanu cu ṭhatnak a hmu.

18. Nifate in a ṭhami biakhiahnak tuah cu zeicah a biapit?

¹⁸ Moses nih Israel mi hna kha thetse ram ah lam a hruai hna bantukin Jesuh Khrih zong nih Pathian mi hna kha Satan vawlei ah kum tampi chung lam a hruai ve hna. A rauhhlan ah Satan vawlei cu hrawh a si cang lai. Joshua nih Israel mi hna kha Biakammi Ram ah a hruai hna bantukin Jesuh nih a zultu hna kha dinnak a umnak hmun, biakammi vawlei thar ah a hruai ve hna lai. (2 Pit. 3:13) Mah caan cu a naih tuk cang caah a hlan i kan ruahnak, kan tuah tawnmi le kan i tinhnak leiah kan i mer ṭhan awk a si lo. Pathian nih zeitindah nunter a kan duh ti kha kan hngalhthiam chin a hau. (Rom 12:2; 2 Kor. 13:5) A ṭhami biakhiahnak le thimnak tuahnak thawngin Jehovah nih a zungzal in thluachuah a pek hngami minung si i zuam.—Hebru 10:38, 39 rel.