1, 2. O kuila ua uabhela ku sola? Kiebhi ki u divua ia lungu ni ima i ua solo kiá ku muenhu uê?

IZUUA ioso tuene mu di bhana ni ima iavulu ia ku sola. Kiebhi ki u divua kioso ki ku moneka ima ia bhingi ku sola? Saí athu a uabhela ene ku sola ia mesena ubheka uâ. Ene a banza kuma ene a tokala ku sola o ima iâ, ka uabhela kuila muthu ua solela bhu kididi kiâ. Maji saí iá, ka uabhela ku sola ubheka uâ, bhenge-bhenge se kima kia bhonzo. Saí iá a sota itendelesu mu madivulu mba ku athu, mu kiki a zanga kitadi kiavulu phala ku tambula kikuatekesu kia bhingi phala ku sola.

² Sumbala kuene ima iavulu ki tu tokala etu ku i sola, mukonda k’etu tuala ni kutena kua ku i sola, kuene ué ima iavulu i bhita ku muenhu uetu, etu muene tua tokala ku i sola kala ki tua mesena. (Nga. 6:5) Maji né kiki, tuejiia ué kuila saí ima ki tuene mu i sola ni unjimu mba ki i tu bhekela mbote.

3. Itendelesu iebhi i tena ku tu kuatekesa ku sola, ni mukonda diahi saí ithangana ki bhonza ku sola?

³ Etu tu jiselevende ja Jihova, tu sanguluka mukonda muéne ua tu bhana o itendelesu ia lungu ni maka a dikota a bhita ku muenhu uetu. Tuejiia kuma se tu kaiela o itendelesu íii, tua-nda sola ima ia-nda sangulukisa Jihova, ni ku tu bhekela mabesá. Maji né kiki, nange tu di bhana ni maka kala ni itendelesu mu Mak’â Nzambi. Ihi-phe i tua tokala o ku bhanga? Mu kifika, etu tuejiia kuila ki tu tokala ku nhana. (Efe. 4:28) Maji o ku nhana ihi? O kuila o ku nhana, o ku katula ngó o kima kia valolo ki ki tu tokala, mba o kima ki tu bhangesa ku nhana, inga o ku katula kima kioso kioso, ku nhana ué? Maji kiebhi ki tua tokala o ku sola, se tu di bhana ni maka amba ku athu kuma se-ku kitendelesu? Ihi ia-nda ku tu kuatekesa?

4. Kitendelesu kiebhi ki tu tambula kioso ki ku moneka kimakia ku sola?

⁴ Kioso ki tu tangela phang’etu kuila, saí kima kia  beta-o-kota ki tua tokala o ku sola, nange muéne u tu tendelesa ku sola ni kilunji kiambote. Mu kidi, kiki kitendelesu kiambote. O Bibidia i tu bhana o kitendelesu kiki kia lungu ni ku sola ni lusolo: “Maji o ixinganeku ia mukuá dimuámua ni lusolo luoso di mu xila ngó uadiama.” (Jisa. 21:5) Maji ihi i lombolola ku sola ni kilunji kiambote? O kuila ki lombolola ngó ku xinganeka kiambote mu maka, ku lenduka ni ku bhanga nguzu phala kuijiia kiambote o ima ioso ia lungu ni maka enhá? O ima ioso íii, i kuatekesa o ku sola kiambote, maji phala ku sola ni kilunji kiambote, ku bhinga ku bhanga dingi ima ia mukuá.—Loma 12:3; 1 Phe. 4:7.

5. Mukonda diahi ki tuala ni kilunji kia iuka?

⁵ Tua tokala kuijiia kuila se-ku muthu mu dietu a mu vuala ni kilunji kia iuka. Mukonda diahi? Mukonda etu enioso a tu vuala ni ituxi, ki tuala ni mukutu mba kilunji kia iuka. (Jisá. 51:5; Loma 3:23) Athu avulu mu dietu a bhekele ni “ilunji iâ mua vundu,” mukonda dia Satanaji, ki tu kexile mu bhana valolo ku ijila ia iuka ia Jihova. (2 Kol. 4:4; Tito 3:3) Mu kiki, se tua solele ima, mu ku dielela ngó ku íii i tuejiia kuma iambote, nange tueji di nganala, né muéne se tua katuile kithangana kiavulu phala ku xinganeka mu maka eniá.—Jisa. 14:12.

6. Ihi i tena o ku tu kuatekesa ku kala ni kilunji kiambote?

⁶ Sumbala tu akua ituxi, maji Jihova, Tata ietu, ua iuka mu ukexilu uoso. (Mate. 32:4) Mu ku sanguluka kuetumuéne ua tu bhana o kima kia tokala phala ku lungulula o ukexilu uetu ua ku xinganeka ni ku di longa ku kala ni kilunji kiambote. (Tanga 2 Timote 1:7.) Mukonda tu Jikidistá, etu tua mesena ku xinganeka ni ku bhanga o ima mu ukexilu ua ku xinganeka ni ku kala ni kilunji kiambote. Tua tokala ku di longa ku langa o ibanzelu ietu ni ukexilu uetu, ni ku kaiela o ukexilu ua Jihova ua ku banza ni ku bhanga o ima.

7, 8. Bhana kifika kilondekesa kuila o muthu u tena ku sola ni kilunji kiambote né muene se a mu jijidika.

⁷ Xinganeka mu ukexilu iú. Kima kiene mu bhanga o athu ene aia mu jixi jengi, a tumikisa o an’a ku jindandu jâ phala ku a sasa, mu kiki ene a tena ku suluka mu ku kalakala phala ku kala ni kitadi. * Saí muhatu ua tungu ku ixi iengi, ua vuala mona diiala. Mu kithangana kieniókio, muéne ua mateka ku di longa o Bibidia anga u kuata ku kula mu nzumbi. O makamba ni jindandu, a mateka ku jijidika o muhatu, iú ni muadi uê, phala ku tumikisa o mona ku ixi iâ phala o jikuku jê ku mu sasa. Maji kioso kiai ni ku di longa o Bibidia, muéne ua mono kuila, ua tokalele ku sasa o mon’ê, mukonda kiene ki zuela Nzambi. (Jisá. 127:3; Efe. 6:4) O kuila muéne ua tokalele ku kaiela o ukexilu iú uokulu, u mona o athu kuma ukexilu uambote? Mba ua tokala ku kaiela o kima kia di longo mu Bibidia, né muene ni ibhidi ieji kuijila mu ku kamba kitadi ni ku athu eji ku mu zuela kia iibha? Ihi i ueji bhanga se ua kexile mu bhita ni maka enhá?

⁸ Mukonda dia ku mu jijidika kiavulu, o muhatu iú ua jikula o muxima uê kua Jihova mu ku sota o kikuatekesu kiê. Kioso kia zuela ni mulongexi uê ua Bibidia ni jiphange mu kilunga, muéne ua mateka o kuijiia i banza Jihova, ia lungu ni maka enhá. Muéne ua mono ué kuila, o mona kioso kieji kula, keji divua kiambote se u di kexila bhu kaxi ka jitata jê. Mu ku xinganeka kiambote mu ima i zuela o Bibidia ia lungu ni maka enhá, muéne ua mono kuila ki kima kiambote ku tumikisa o mon’ê. O  munim’ê ua mono kiebhi o jiphange mu kilunga kia kuatekesa muhat’ê ni lusolo, iu ua mono ué kuila o mona ua sangulukile ua kexile ni sauidi iambote. Muéne ua xikina ku di longa o Bibidia, anga u mateka kuia mu iônge ni muhatu’ê.

9, 10. Ihi i lombolola ku sola ni kilunji kiambote ni kiebhi ki tu tena ku bhanga kiki?

⁹ Kiki kifika kimoxi ngó, maji kilondekesa kuila, o ku sola ni kilunji kiambote, ki kilombolola ngó ku bhanga o kima ki tu mona etu, mba akuetu, kuma kima kiambote. O kilunji kietu ni muxima uetu ua ituxi, a tena ku ki sokesa ni dikumbi dia ku tala o ji ola, dia mu kalakala ni lusolo mba dia zonda kiavulu. Mu kiki, se tu dielela o dikumbi didi di tena ku tu bhekela maka avulu. (Jel. 17:9) Tua tokala kuehela o ijila ia Nzambi kuendesa o kilunji ni muxima uetu.—Tanga Izaia 55:8, 9.

¹⁰ O Bibidia i tu tendelesa: ‘Dielela kua Jihova ni muxima ué uoso; kana ku dielela ngó o kilunji kiê. Mu suue muene ngó mu mauendelu mê moso, muéne a iukise o njila jê joso.’ (Jisa. 3:5, 6) O Bibidia i zuela ‘kana ku dielela ngó o kilunji kiê.’ Mu ku suluka, i zuela “mu suue muene ngó [Jihova].” Muéne Ngó uala ni kilunji kia iuka. Mu kiki, kioso ki tu mesena ku sola, tua tokala ku tanga o Bibidia phala kuijiia o ibanzelu ia Nzambi, ia lungu ni maka enhá. Mu ku suluka tua tokala ku sola ni kikuatekesu kia Bibidia. Kiki kilombolola ku sola ni kilunji kiambote—o ku kaiela o ukexilu ua Jihova ua ku banza.

11. Ihi ia tokala ku bhanga o muthu phala ku sola ni unjimu?

¹¹ O ku sola ni unjimu o ima iambote ni ku i bhanga, kiene mu bhonza. Kiki ki bhonza bhenge-bhenge phala ió a a batizala kindala, ni ió a mu kula mu nzumbi. Maji né kiki, o an’a mu nzumbi, kala kia exana mu Bibidia, a tena ku kula mu nzumbi. Xinganeka kiebhi o mona kia di longa o kuenda sé ku dibhala. O mona u bhanga kiki mu kuenda bhofele bhofele mu veji javulu. Kiki ki bhita ué ni an’a mu nzumbi, kioso kia di longa ku sola ni kilunji kiambote. O poxolo Phaulu uambe kuma o athu a kulu mu nzumbi ió, “mukonda dia ku  di longa, a sungu kiá kilunji kia kutungula kioso kiauabha, mu kiki kiaiibha.” O izuelu “mukonda dia ku di longa,” ki lombolola ku bhanga nguzu mu ithangana ioso, kiki kiene kia tokala o ku bhanga o athu a a batizala kindala.—Tanga Jihebeleu 5:13, 14.

12. Kiebhi ki tu tena ku di longa ku sola ni unjimu?

¹² Kála ki tua di longo kiá ku dima, mu kizuua ni kizuua, tuene mu sola ima, i kale ia dikota mba iofele. Saí athu a kiebhi o athu kia sola, a mono kuila etu tu sola mu ifua ietu, mu veji dia ku sola mu ixinganeku iambote. Mu kifika, izuua ioso muene mu sola izuatu i ua-nda ku zuata. Nange u mona kuma kima kiofele, mu kiki u sola sé ku xinganeka kiavulu, bhenge-bhenge se uala kiá ni lusolo phala ku tunda. Maji kima kiambote ku mona se o izuatu ia fuama phala o selevende ia Jihova. (2 Kol. 6:3, 4) Kioso ki uia mu sumba izuatu, nange u xinganeka mu ima ia katunda, maji o kuila u xinganeka ué se o izuatu íii iambote phala eie ni kuila se uala ni kitadi phala ku sumba o izuatu íii? O ku sola kiambote o ima íii iofele, kua-nda tu kuatekesa ku longa o kilunji kietu, phala ku sola kiambote kioso ki tua-nda bhita ni maka a dikota.—Luka 16:10; 1 Kol. 10:31.

13. Ihi ia-nda tu kuatekesa ku kumbidila o kima ki tua solo?

¹³ Etu enioso tuijiia kuila o ku sola kima ni unjimu kima kiéngi, maji o ku ki kumbidila kima kiéngi ué. Mu kifika, o athu a mesena kueha o ku buakula, ka ditundu kiambote, mukonda kala ni ngunzu iavulu phala kueha o kifua kiki. Ene a bhingi ku bhanga nguzu phala ku kumbidila o kima kia solo. Saí iá amba kuila o nguzu ia ku bhanga o kima a i sokesa ni ku tungutisa o tuluingi tua mukutu uetu. Kioso ki tu bhangesa o tuluingi ku zangula ima ia neme, o tuluingi tu kala dingi ni nguzu iavulu, maji se ki tu bhangesa o tuluingi ku zangula ima ia neme, ki tu kala ni nguzu, tu zoza. Ihi-phe i tena ku tu kuatekesa o ku bhanga nguzu phala ku kumbidila o kima ki tua solo? Tua tokala ku dielela ku kikuatekesu kia Jihova.—Tanga Filipe 2:13.

14. Mukonda diahi Phaulu ua di suinisa ku bhanga o kima kiejidile kuma kiene kia tokalele o ku bhanga?

¹⁴ Phaulu uejidile, mukonda dia ima ia di bhana naiu. Saí kithangana muéne uambe: ‘Né-mbé o ku tena kua ku bhanga o ima iambote eme na-ku, maji o ku bhanga o ima ia uabha, ki ngala naku.’ Muéne uejidile o kima kia tokalele o ku bhanga, maji saí kima kia kexile ku mu fidisa. Muéne ua di fisala: ‘Ngejiia kuma moxi diami nga sangulukila o Kitumu kia Nzambi. Maji nga mono kuila kuala Kitumu kiengi kia mu tumina mu idiandu iami, kia mu luua ni kitumu kia ngi kala mu kilunji kiami, kiene kí kiala ku ngi kutila mu ubhika ua kitumu kia ituxi kia ngi kala mu idiandu iami.’ O kuila muéne ka kexile dingi ni kidielelu? Muéne uambe: “Nga sakidila-phe Nzambi, kuma sai-ku kubhanduluka mua Jezú Kristu, Ngana ietu!” (Loma 7:18, 22-25) Muéne ua soneka ué: “Ima ioso nga soko na-iu mua Kristu ió mukua ku ngi bhana o kutena.”—Fil. 4:13.

15. Ihi ia bhitile ni ió a solo kiambote, ni ió ka solele kiambote?

¹⁵ Kála ki tua mono, phala ku sangulukisa Nzambi, tua tokala ku sola o ku bhanga o ima ia tokala ni ku bhanga di suinisa phala ku i kumbidila. Lembalala kuma Elija uambela o abhezi a Bahale ni akua Izalaiele exile akua ku lungulula o kidi, ku Mulundu ua Karmelo kuila: “Kumbi kuxi i mua-ndu lémbua kutenguina bhu kaxi ka ixinganeku iiadi? O Ngana se muene Nzambi mu kaiedienu! Maji ki ki kala o Bahale mua mu mono kuma muene ua  tokala, mu kaiedienu.” (1 Jis. 18:21) O an’a a Izalaiele ejidile o kima kia tokalele o ku bhanga, maji akexile mu “kutenguina” bhu kaxi ka ixinganeku iiadi. Maji Josuué ka difuile ni athu iá, mukonda mivu ku dima muéne ua xisa phangu iambote kioso kia zuelele ku akua Izalaiele kuila: ‘Se kia mi ibhila ku mesu menu o ku sidivila Jihova, lelu’idi-phe solenu kiá uoso ua fuama o ku mu sidivila . . . Maji eme-phe ni dibhata diami, ngi sidivila Jihova.’ (Josu. 24:15) Mabesá ahi a tambula Josuué ni athu akexile nau? Josuué ni ió a kexile nau, a tambula o dibesá dia ku bokona mu Ixi ia a Kanena, o “ixi i kunguluka lete ni uiki.”—Josu. 5:6.

16, 17. Jimbulula o mbote ijila mu ku sola ima i sangulukisa Nzambi.

¹⁶ Xinganeka mu kifika kiki. O phange ia diiala a mu batizala kindala, muéne ni muhatu uê, ala ni kitatu kia an’a. Saí kizuua o koleka iê ia salu, ua mu bhana ndunge ia kuia mu kalakala ku ditenda diéngi dia kexile mu futa kitadi kiavulu, ni ku bhana ima ia mukuá dingi. O phangi’etu ua xinganeka, ua sambe ia lungu ni maka enhá. Muéne ua solele ku kalakala ku salu iê iokulu, phala ku kala ni kithangana, kia kuia mu iônge ni kuia mu boka ni muiji uê ku di sukilu dia semana. Muéne ua mono kuila keji tena ku bhanga kiki, se ua xikinine o salu ia ubhe. Ihi i ueji bhanga eie?

¹⁷ Mu ku sokesa o mabesá eji tambula, ni kitadi kieji tambula ku salu ia ubhe, o phangi’etu ua ditunu o salu íii, ia ubhe. O kuila muéne ua diela mu kima kia solo? Kana. Muéne ni muhatu’ê a sangulukile kiavulu, kioso mon’ê ua dianga ua muhatu, ua a tangela kuila ua zolele o jitata jê, ua zolele o jiphange, ni kuila ua zolele kiavulu Jihova. Muéne ua zuela kuila, ua mesenene ku di bhakula o muenhu uê kua Jihova, ni ku mu batizala. Muéne ua katula mbote mu phangu ia tat’ê ia ku ta o ubhezelu ua Jihova ku pholo dia muenhu uê!

18. Mukonda diahi kima kiambote phala etu ku sola ni unjimu izuua ioso?

¹⁸ Ku mivu iavulu, Mozé ia Dikota, Jezú Kristu, uene mu kuendesa o abhezi a kidi a Jihova, mu kikangalakata kia mundu ua Satanaji. O Josuué ia Dikota, Jezú, uala polondo phala ku buika o mundu iú ua iibha, ni kuendesa o akaiedi’ê ku mundu uobhe ua iuka ua a kanena. (2 Phe. 3:13) Kiki, ki kithangana phala ku vutuka ku dima mu ibanzelu ietu, mu ukexilu uetu, mu ijila ietu ni mu ima i tua mesena. Kiki kithangana phala kuijiia kiambote ihi ia mesena Nzambi ko kuetu. (Loma 12:2; 2 Kol. 13:5) Ehela o ima i ua solo, ilondekese mu izuua ioso se eie ua tokala o ku tambula mabesá a Nzambi a kalelaku.—Tanga Jihebeleu 10:38, 39.