1, 2. Ngapi omu o lizuvhu nsene to tura po matokoro?

MATOKORO! Ago kuna kara sininke esi atu tura po nkenye ezuva. Ngapi omu o lizuvhu nsene to tura po matokoro gomanene? Vamwe kwa hara kutokora nkenye eyi pwavelike. Awo kutokomena kutura po matokoro gavene, nokunyoka magano gokutunda kwava wopeke. Nye, vamwe va kara nowoma mokutura po matokoro gomanene. Ano vamwe kuruganesa nobuke ndi vagavi magano ndi kuruganesa yimaliwa yoyinzi mokupapara mavyukiso yipo va vhure kutura po matokoro.

² Ose twa dimburura asi kapi twa kara nononkondo dokutura po matokoro koyininke yimwe ntani kwato eyi natu vhura kurugana ko. Nampili ngoso, ose kuyihafera asi momaruha gomanzi geparu, ose kuvhura kutura po matokoro kuliza neyi twa hara. (Gar. 6:5) Yimo, kapisi matokoro nagenye aga atu tura po mawa.

3. Mavyukiso musinke twa kara nago kuhamena kutura po matokoro, nye maukaro gamwe musinke atu ligwanekere nago?

³ Ngovakareli vaJehova, kuvhura tu hafe kweyi ga tu pa mavyukiso gomawa koyininke yomulyo po meparu. Twa yi diva asi nsene tu kwama mavyukiso ogo, ose ngatu tura po matokoro aga ngaga hafesa Jehova nokugwanena mo uwa. Nye simpe kuvhura tu ligwanekere nomaukaro aga va dira kuvyukilira kutumbura moNonkango daKarunga. Ngapi natu tokora eyi natu rugana? Pasihonena, twa yi diva asi widi udona. (Efe. 4:28) Yisinke wa kwatera mo widi? Awo kwa korera komulyo gosininke esi vana gusa ndi? Ndi kositambo seyi vana si gusire? Ngapi natu tokora moyuma eyi va dira kuvyukilira kutumbura? Yisinke nayi tu vatera?

4. Evyukiso musinke atu gwana apa atu hara kutura po etokoro?

⁴ Apa atu tanta asi tuna hara kutura po etokoro lyomulyo, Mukriste mukwetu kuvhura a uyunge ko asi twa hepa kugazadara ko nawa. Olyo kuna kara epukururo lyewa. Bibeli kutupa erondoro eli asi: “Nsene o rugana yampuku zange pya usimbu, kapi ngo gwana mo eyi yina ku gwanene.” (Yis. 21:5) Ngoso kutanta asi twa hepa tupu kulitulira po siruwo nokugazadara ko nokuruganesa nondunge ndi? Nayinye eyi mulyo, nye yinzi ya hamena mo mokutura po matokoro gomawa.

5. Morwasinke twa dilira kukara nomagazaro gomawa?

⁵ Kwato gumwe gwetu va hampuruka nomagazaro gomawa. Morwasinke? Morwa natuvenye kwa tu hampuruka mononzo ntani kapi twa sikilira mo, eyi yiyo twa dilira kukara nomagazaro gomawa ndi norutu rokusikilira mo. (Epis. 51:5; Rom. 3:23) Ntani hena, sinzi setu magazaro ndi nondunge detu kwa di zonagwire Satana, ntani kapi ngatu limburukwa kwaJehova nokonompango dendi. (2 Kol. 4:4; Tit. 3:3) Nsene tu tura po matokoro kuliza nomu tuna kulizuvha, kuvhura tu likumbagere nyamwetu, nampili tu gazadare ko unene komeho tu ture po etokoro olyo.—Yis. 14:12.

6. Yisinke nayi tu vatera tu kare nomagazaro gomawa?

⁶ Nampili ngomu twa dira kukara nomagazaro gomawa, Jehova age kwa sikilira mo mwanayinye. (Deut. 32:4) Nye Jehova ga yi tu rerupikira tu rundurure magazaro getu. NgoVakriste, twa hepa kugazadara ko nokuteda ko nawa komeho tu rugane yuma. Twa hepa kupangera magazaro nomalizuvho getu nokutemwinina magazaro nomalizuvho gaJehova.

7, 8. Simwitira sihorokwa sa likida omu natu vhura kutura po etokoro lyewa nampili momaudigu ndi momakwamakwamo.

⁷ Tu tareni sihonena. Ava ava ya tungu mosirongo sa hana asi sawo kwa kara nonkareso zokutuma vana vawo kekoro lyawo yipo va ka va rere siruwo oso awo va twikire noyirugana. * Mukadi gumwe ogu ga tunga mosirongo sapeke kwa hampurukire mukeke gomumati. Komeho a kare nomukeke, age ga tamekere kulironga Bibeli nokutura po ezokomeho pampepo. Vakaume novanekoro kwa mu kondjesere nage namugara gwendi asi va tume mukeke ogo kozinakuru. Nye melirongo lyendi ga ya dimbwilire asi ngomukurona ga kara nositumbukira kosipara saKarunga sokurera munwendi. (Epis. 127:3; Efe. 6:4) Ga hepere kukwama nkareso ezi va mwene sinzi sovantu asi ngwa ndi? Ndi ga hepere kukwama eyi ga lirongere moBibeli nokulididimikira maswauro govantu noudigu woyimaliwa? Ngano nyove, ngano yisinke wa rugene?

⁸ Apa ga ligwanekerere nomakondjeso aga, yipo ga hundilire kwaJehova mavyukiso mokutura po etokoro lyewa. Konyima zapa ga uyungire nomurongi gwendi goBibeli navamwe womombunga kuhamena udigu owo, yipo ga tamekere kukwata egano mutaro gwaJehova koyuma oyo. Age ga gazadarere ko hena omu ngayi kundama malizuvho govana vendi. Konyima zokuyikonakona kuliza noMatjangwa, yipo ga yi dimbwilire asi kapi ya wapa kutuma munwendi. Mugara gwendi ga mwene omu womombungakriste va kondjere mokumuvatera nomu mukeke ga ya kere gokukanguka goruhafo. Nage  yipo ga tambwire elirongo lyoBibeli nokutameka kuza komapongo namukadendi.

9, 10. Yisinke ayi tanta kuhonena magazaro gaJehova, ntani ngapi natu yi rugana?

⁹ Oso kuna kara tupu sihorokwa simwe, nye eyi kulikida asi apa atu tura po matokoro kapi ya wapa kukwama tupu eyi wa hara ndi eyi ava gazara wopeke. Magazaro nomutjima gwetu gokudira kusikilira mo kuvhura kutupukisa. Nsene tu ga pulisira ga tu vyukise kuvhura kureta siponga sosinene. (Jer. 17:9) Twa hepa kupangera magazaro nomutjima gwetu pokukwama nompango daKarunga.—Resa Jesaya 55:8, 9.

¹⁰ Bibeli kutupukurura asi: “Huguvara HOMPA nomutjima goge nagunye. Wa ha hama konondunge danyamoge. O diworoke HOMPA mwanayinye eyi ono kurugana, makura age ta ku likida nzira zouhunga.” (Yis. 3:5, 6) Koneka ntanto “wa ha hama konondunge danyamoge.” Kwa zi kwama “o diworoke HOMPA.” Age yige gelike ga kara nomagazaro gomawa. Eyi kutanta asi nsene tatu tura po etokoro, twa hepa kutara eyi azi uyunga ko Bibeli kuliza nomu a yi tara Karunga. Makura matokoro getu ga hepa kudemenena kooko. Monkedi zangoso, ose kuna kutokora nawa pokuhonena magazaro gaJehova.

11. Yisinke ya hepa po mokutura po matokoro gomawa?

¹¹ Kulironga kutura po matokoro gomawa nokugasikisa mo kapisi ureru. Eyi kuvhura kukara udigu, unene po kwava wovape mousili ndi kwava vana hara kutura po ezokomeho. Nampili ngoso, vanona owo wopampepo, ngomu azi va tumbura Bibeli, kuvhura yi va tompoke mokutura po ezokomeho. Pasihonena, gazara omu munona a lirongo kugenda. Mokuninka asi yi mu tompoke ga hepa kutwikira kugenda kanunu-kanunu. Ya lifana nava wovape mousili apa ava lirongo kutura po matokoro gomawa. Diworoka asi Paurusa kwa singonona vakurona asi ‘va yika kuruganesa nondunge dawo mokuhangura uwa koudona.’ Nkango ‘kuyika’ kwa tamba kukovekeda kurugana  sininke, ano oyo yiyo va hepa kurugana wovape.—Resa Vahebeli 5:13, 14.

12. Ngapi omu natu tunga po nkareso zokutura po matokoro gomawa?

¹² Ngomu vana yi tumbura nare, nkenye ezuva ose kuhepa kutura po matokoro gomanzi, gomanene naga gomanunu. Kuliza nekonakono limwe, sinzi seyi atu rugana kapi atu yi gazara komeho zosiruwo nye kwa kara ruha ronkareso zetu. Pasihonena, nkenye ngurangura wa hepa kutokora yikoverero eyi no dwara. Kuvhura o yi tare eyi ngwendi yininke yoyinunu tupu ntani kuvhura o tokore wa hana kugazadara ko, unene po nsene kuna kugenderera. Nye ngomukareli gwaJehova, ya kara nomulyo kugazara nsene asi eyi ono kudwara yina ku wapere. (2 Kol. 6:3, 4) Nsene kuna kuranda yikoverero, kuvhura o gazare kuhamena mode nye ngapi kuhamena emoneko nomukoso gwayo? Kuhorowora nawa moyuma yangoso ngayi tu ninkisa tu yikise nondunge detu, edi ngadi tu vatera tu ture po matokoro gomawa mweyi yoyinene.—Ruk. 16:10; 1 Kol. 10:31.

13. Yisinke ya hepa po yipo tu kwame matokoro getu aga tuna tura po?

¹³ Natuvenye twa yi diva asi kutura po etokoro lyouhunga kwa lisiga nokukwaterera ketokoro olyo ntani nokulisikisa mo. Pasihonena, vamwe ava va hara kuhageka kukoka makanya kuvasumpira morwa kudira kukara netumangedo lyokugwanena po. Eyi ya hepa po kuna kara etokomeno lyokukwama etokoro lyawo. Vamwe va yi pura asi etokomeno lyetu kwa lifana norusipa. Moomu ono kururuganesa yimo ngaru pama. Nsene kapi atu ru ruganesa nkenye apa, kapi taru pama. Yisinke nayi tu vatera tu tunge ndi tu nkondopeke etokomeno lyetu lyokukwaterera nokusikisa mo eyi tuna tokora? Kukanderera kwaJehova ngaku tu vatera.—Resa Vafilipi 2:13.

14. Yisinke ya vaterere Paurusa a rugane youhunga?

¹⁴ Paurusa ga yi divire eyi kupitira mosihonena samwene. Sikando simwe, age kwa lilire asi: “Eharo lyokurugana uwa lyeli tupu, yi rugana ko nye, hawe mpaga.” Age ga yi divire eyi ga hepere kurugana, nye poyiruwo yimwe koyili ngayi mu donganesa mokuyisikisa mo. Age ga yi tambwire pokutanta asi: “Komutjima gwange ame Veta zaKarunga kwa zi panda unene. Nye ame kumona hena veta zapeke ezi azi rugana morutu rwange. Veta ozo kurwisa Veta zomomutjima gwange. Azo yizo za tura nge moupika wononzo edi adi pangere morutu rwange.” Kwato eyi ga vhulire kurugana ko ndi? Hawe. Age kwa tente asi: “Ame tani pandwire Karunga mwaJesus Kristusa, Hompa gwetu.” (Rom. 7:18, 22-25) Nye, age kwa tjenge asi: “Ame kuvhura nayinye nononkondo dogu a pameke nge.”—Fil. 4:13.

15. Ngapi omu kutura po ndi kudira kutura po etokoro ayi kundama ava ava hamene mo?

¹⁵ Yimo, mokuhafesa Karunga, twa hepa kutura po matokoro. Koneka nonkango daEliya kovakareli vaBara noVaisraeli wovarwanesi pondundu zaKarumeli: “Siruwoke ngomu hageka kuhama kuvali? Nsene asi HOMPA yige Karunga, yige mu kwama po, ano nsene asi Bara yige Karunga, mu kwameni.” (1 Vah. 18:21) Vaisraeli va divire eyi va hepere kurugana, nye kwa ‘heme kuvali’ ndi kudira kutokora. Mokulisiga, Josuwa age kwa tulire po sihonena sosiwa apa ga tanterere Vaisraeli asi: “Nsene kapi muna hara kuruganena HOMPA, tokoreni naina ngesi ogu muna  hara kuruganena. . . . Nye ame ko nepata lyange, ose kuna hara kuruganena HOMPA.” (Jos. 24:15) Yitundwamo musinke ya kere ketokoro lyendi? Josuwa nowo va heme kwendi kwa va tungikire mokukatunga moSirongo sEtumbwidiro, “sirongo sosingawo sevhu lyewa.”—Jos. 5:4-6.

16, 17. Tumbura mauwa aga aga tundu mokutura po matokoro kuliza nompango zaKarunga.

¹⁶ Konakona sihorokwa somomazuva getu. Munazinyetugara gokukwara ogu ga gwene ntaantani ekuho, nage namukadendi kwa kara novanona vatatu. Ezuva limwe, murugani mukwawo kwa tente asi nage namunazinyetu ogo va dirukire koyirugana yapeke eyi ayi futu yimaliwa yoyinzi ntani ya kara nomauwa gomanzi. Munazinyetu kwa gazadarere ko nokutura yuma oyo mekanderero. Yirugana yendi eyi a rugana kapi a gwana mfeto zonzi, yipo a dire kurugana moyikondovike, nokugwana siruwo sokuza komapongo nomoyirugana yokuzuvhisa kumwe nepata lyendi. Age kwa gazadarere ko asi nsene na gusa sirugana sosipe kapi nga kara nosiruwo sokugwanena po. Ngano nyove, ngano yisinke wa rugene?

¹⁷ Pokuhetakanesa mauwa gopampepo nomfeto zokuzeruka, munazinyetu yipo ga nyokere kutambura sirugana sosipe. Omu ono kugazara, ga ya liverere ketokoro lyendi ndi? Hawe. Age kwa lizuvhire asi matungiko gopampepo mulyo unene kwendi nekepata lyendi kupitakana mfeto zokuzeruka. Nage namukadendi kwa hefe unene apa munwawo gomukadona gombeli gonomvhura murongo ga va tantere asi ga va hara ntani ga hara unene Jehova novanavazinyetu. Age kwa tente asi ana hara kuligava kwaJehova nokugwana ekuho. Ee, omu tupu sa mu hafesere sihonena soguhwe sokutura Jehova muhowo meparu lyawo!

18. Morwasinke ya karera nomulyo kutura po matokoro gomawa nkenye ezuva?

¹⁸ Mosesa goMunene, Jesus Kristusa, monomvhura dononzi kwa gendesa vakareli vaJehova wousili mouzuni waSatana ou una kara ngwendi mburundu. NgaJosuwa goMunene, Jesus ngesi ana liwapaikire mokureta uhura kouzuni ou woudona ntani nokupitisira vasikuli vendi mouzuni woupe wouhungami ou va tumbwidira. (2 Pet. 3:13) Yipo nye, esi kapisi siruwo sokutengura komagazaro nokonkareso nokoyitambo yetu yanare. Nye kuna kara siruwo sokukoneka mpango zaKarunga. (Rom. 12:2; 2 Kol. 13:5) Ngano matokoro aga o tura po nkenye ezuva ga likide asi ove muntu ogu ono wapere kukagwana matungiko gaKarunga ganarunye.—Resa Vahebeli 10:38, 39.