1, 2. Utuku musue kuangata mapangadika anyi? Utu umvua mushindu kayi bua amue mapangadika audi muangate?

DITUKU dionso tutu anu ne mapangadika a bungi a kuangata. Utu udiumvua mushindu kayi paudi kumpala kua mapangadika kampanda a kuangata? Bamue bantu batu bajinga kudiangatshila mapangadika mu malu onso. Badi bimanyina bikole pa manême adibu nawu a kudiangatshila mapangadika ne babenga too ne lungenyi lua ne: muntu mukuabu udi mua kubangatshila mapangadika. Kadi bakuabu badi batshina bua kuangata mapangadika a mushinga. Banga pabu batu bakeba buludiki mu mikanda anyi kudi bafidi ba mibelu ne pamuapa batula makuta a bungi bua kupeta mibelu idibu bela meji ne: ke idibu nayi dijinga.

² Bantu ba bungi ba kutudi batu ne dielakana. Tudi bamanye ne: mu amue malu katuena mua kuangata mapangadika to, kadi mu malu a bungi a mu nsombelu wetu tudi mua kuangata mapangadika adi atusankisha. (Gal. 6:5) Nansha nanku, tudi bamanye ne: mapangadika onso atutu tuangata kaatu anu a meji ne atupetesha masanka to.

3. Mmalu kayi adi mua kutuambuluisha bua kuangata mapangadika? Bua tshinyi kabitu anu bipepele bua kumanya dipangadika dia kuangata?

³ Bu mutudi batendeledi ba Yehowa tudi mua kuikala ne disanka bua mudiye mutuleje patoke tshia kuenza mu malu a mushinga a mu nsombelu wetu. Tudi bamanye ne: tuetu tulonda malu aa, tudi mua kuangata mapangadika asankisha Yehowa ne atupetesha masanka. Kadi tudi mua kutuilangana ne amue malu ne nsombelu bidi Dîyi dia Nzambi kadiyi dileje patoke tshia kuenza to. Nunku, mmushindu kayi utudi mua kuangata dipangadika dia tshitudi mua kuenza? Tshilejilu, tudi bamanye ne: katuena ne bua kuiba to. (Ef. 4:28) Kadi kuiba kudi kumvuija tshinyi menemene? Kudiku kulondeshila mushinga wa tshintu tshiba, tshidi tshisake muntu bua kuiba peshi bualu bukuabu anyi? Mmunyi mutudi mua kuangata mapangadika a tshia kuenza mu malu adi bamue bamba ne: Bible ki mmuleje patoke tshia kuenza? Ntshinyi tshidi mua kutuludika?

4. Badi mua kutupesha mubelu kayi patudi tujinga kuangata dipangadika?

⁴ Tuetu bambile muena Kristo netu ne: tudi tujinga kuangata dipangadika dia mushinga, udi mua kutuambila ne: mbimpe tudiangate ne meji mimpe. Bushuwa eu ke mubelu muimpe. Bible udi utudimuija bua kubenga kuenza bualu katuyi banji kuela meji bimpe wamba ne: ‘Muntu yonso udi ne lukuluku neapete anu bupele.’ (Nsu. 21:5) Kadi kuangata mapangadika ne meji mimpe kudi kumvuija tshinyi? Kudiku kumvuija patupu ne: tudi ne bua kupitshisha dîba dietu, kuela meji bikole bua bualu kampanda, kuikala ne nkatshinkatshi ne kuteta bua kumvua malu onso kumpala kua kuangata dipangadika anyi? Malu onso aa adi ne mushinga bituikala basue kuangata dipangadika dimpe, kadi kuangata dipangadika ne meji mimpe kudi kulomba kabidi malu makuabu a kuenza.​—Lomo 12:3; 1 Pet. 4:7.

5. Bua tshinyi katutu ne meji mapuangane?

⁵ Tudi batuishibue ne: kakuena muntu udi muledibue ne meji mapuangane to. Bua tshinyi? Bualu tuetu bonso tudi baledibue mu bubi ne mu dipanga bupuangane, nunku mbikole bua tuetu kuikala ne mubidi ne meji mimpe. (Mus. 51:5; Lomo 3:23) Kabidi, ba bungi ba kutudi bavua kumpala munkatshi mua bantu bavua Satana “mufofomije mêsu,” kabavua bamanye Yehowa ne mikenji yende miakane to. (2 Kol. 4:4; Tito 3:3) Nunku, nansha muntu yeye muele meji bikole kumpala kua kuangata dipangadika didiye wela meji ne: ndimpe ne dia meji, udi anu mua kuangata dipangadika dibi.​—Nsu. 14:12.

6. Tshidi mua kutuambuluisha bua kupeta meji mimpe ntshinyi?

⁶ Nansha mutudi bena mibi, Yehowa Tatuetu wa mu diulu utu yeye mupuangane mu malu onso. (Dut. 32:4) Mmutupeshe bitudi nabi dijinga bua kushintulula mushindu utudi ne bua kuela meji ne bua kudienzeja bua kupeta meji mimpe. (Bala 2 Timote 1:7.) Bu mutudi bena Kristo, tudi basue kuela meji ne kuenza malu mudibi bikengela. Nunku tudi ne bua kulonga bua kukanda lungenyi luetu ne majinga etu ne kuidikija mushindu udi Yehowa wela meji, mutuye umvua ne mutuye wenza malu.

7, 8. Londa bualu budi buleja mudi muntu mua kuangata dipangadika dimpe nansha bobu bamuenzeja malu ku bukole anyi muikale ne lutatu.

⁷ Tuangate tshilejilu. Kudi tshilele kampanda tshitu natshi bantu batu baya bua kusombela ku matunga makuabu. Batu batumina balela babu badi mu ditunga divuabu bana batekete badibu balela bua babalame bua baledi abu batungunuke ne kuenza mudimu ne kukeba makuta. * Mamu kampanda uvua musombele mu ditunga dia bende uvua mulele muana wa balume uvuaye munange bikole. Tshikondo atshi, wakatuadija kulonga Bible ne kuyaye kumpala mu malu a mu nyuma. Balunda ne balela bende bakatuadija kumuenzeja yeye ne bayende bua kutuma muana kudi bakakuende. Kadi mu malu avua mamu eu mulonge, uvua mumone ne: bu mudiye muledi, Nzambi uvua mumupeshe mudimu wa kudikoleshila muanende. (Mus. 127:3; Ef. 6:4) Uvuaku ne bua kulonda tshilele etshi tshivua bantu ba bungi bela meji ne: ntshimpe anyi? Peshi uvua ne bua kulonda malu avuaye mulonge mu Bible, kudipangisha makuta ne kuitaba bua bantu bakuabu bamupepeje? Bu wewe muikale mamu eu, uvua mua kuenza tshinyi?

⁸ Mamu eu wakadiumvua mutondeshibue bualu bantu bakuabu bavua bajinga kumuenzeja malu ku bukole. Nunku wakasambila Yehowa bua kumulomba buludiki. Wakambila mulongeshi wende wa Bible ne bantu bakuabu ba mu tshisumbu bualu ebu ne kutuadijaye kumvua lungenyi ludi nalu Yehowa mu tshilumbu etshi. Wakela kabidi meji muvua baledi bakuabu mua kuikala bakengeshishe bana babu mu lungenyi mu tshikondo tshivuabu babatume bua bakolele kudi balela babu. Panyima pa yeye mumane kukonkonona tshilumbu etshi ku diambuluisha dia Bible, wakamona ne: kabivua bimpe bua yeye kutuma muanende to. Pavua bayende mumone muvua  bena mu tshisumbu badienzeja bua kubambuluisha ne mushindu uvua muana ne disanka ne makanda a mubidi, wakitaba bua kulonga Bible ne kutuadijaye kubuela mu bisangilu pamue ne mukajende.

9, 10. Kuikala ne meji mimpe kudi kumvuija tshinyi? Mmunyi mutudi mua kuapeta?

⁹ Etshi ntshilejilu tshimue patupu, kadi tshidi tshileja mudi kuikala ne meji mimpe kakuyi anu kumvuija kuenza malu atudi tuetu anyi bantu bakuabu bamona ne: mmimpe anyi mmapepele to. Meji ne muoyo wetu bipange bupuangane bidi anu bu dîba didi dienda lubilu lukole anyi dikale ne lujoko. Kulonda dîba dia nunku kudi mua kutukebela ntatu ya bungi. (Yel. 17:9) Tudi ne bua kuikala bajadike ne: mikenji ya Nzambi ke idi ilombola meji ne muoyo wetu.​—Bala Yeshaya 55:8, 9.

¹⁰ Bible udi utupesha mubelu wa meji wamba ne: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’ (Nsu. 3:5, 6) Mona ne: mvese eu udi wamba ne: “kueyemenyi dijingulula diebe dia mianda.” Pashishe ulua kuamba ne: ‘umanye Yehowa bimpe.’ Yeye ke Muntu umuepele udi ne meji mimpe menemene. Nunku, bidi ne: dîba dionso ditudi basue kuangata dipangadika, tudi ne bua kuya mu Bible bua kumanya lungenyi lua Yehowa pa bualu abu. Pashishe tudi ne bua kuangata dipangadika bilondeshile lungenyi alu. Tuetu basue kupeta meji mimpe, tudi ne bua kuidikija lungenyi lua buena lua Yehowa.

11. Ntshinyi tshidi muntu ne bua kuenza bua kuangata mapangadika a meji?

¹¹ Ki mbipepele bua kumanya mua kuangata mapangadika a meji ne kuakumbaja to. Bualu ebu budi mua kuikala lutatu nangananga kudi batshidi bapiabapia mu bulelela peshi batshidi batuadijilaku kuya kumpala mu malu a Nzambi. Kadi bantu badi Bible wangata bu bana aba badi mua kuya kumpala mu bulelela. Tukonkonone mutu muana ulonga mua kuenda kayi udishinda. Bua kuendaye bimpe udi ne bua kutuadija ne kuela bidia bîpi ne kuikala ne tshibidilu tshia kuenza nunku. Ke tshidi bantu batshidi bana mu nyuma ne bua kuenza padibu bakeba kuangata mapangadika a meji. Vuluka ne: mupostolo Paulo wakaleja ne: bantu bakole ngaba badi ‘bibidija bukole buabu bua kujingulula nabu malu padibu bakuata nabu mudimu, bua kutapulula tshidi tshimpe ne tshidi tshibi.’  Miaku ‘kukuata mudimu’ ne ‘kuibidija’ idi yonso ilomba kutungunuka ne kudienzeja ku musangu ne ku musangu, ne ke tshidi bapiabapia ne bua kuenza.​—Bala Ebelu 5:13, 14.

12. Mmushindu kayi utudi mua kufika ku dimanya mua kuangata mapangadika a meji?

¹² Anu mutukadi bamone, dituku dionso tudi ne bua kuangata mapangadika a bungi manene ne makese. Bilondeshile makebulula kampanda adibu benze, mbafike ku dimona ne: mu mapangadika 100 atutu tuangata, tutu tuangata mapangadika mapite pa 40 katuyi bele meji bikole to, kadi bilondeshile bibidilu bietu. Tshilejilu, mu dinda dionso tutu pamuapa tuangata dipangadika dia bilamba bitudi ne bua kuvuala. Udi mua kumona bualu ebu bu bukese, ne udi mua kusungula tshia kuvuala kuyi muele meji bikole to, nangananga wewe lukasa. Kadi mbimpe kuela meji bikala tshiudi uvuala tshikumbanyine mudimu uudi nawu wa kuikala mutendeledi wa Yehowa. (2 Kol. 6:3, 4) Paudi usumba bilamba, udi mua kuela meji bua modele kampanda wa tshilamba udi mutangalake bikole, kadi utuku wela meji bikalawu uleja kanemu ne bua bungi bua makuta adi akengela anyi? Kuangata mapangadika mimpe mu tshilumbu etshi nekutuambuluishe bua kuibidija bieledi bietu bia meji bidi mua kutuambuluisha bua kuangata mapangadika mimpe mu malu manene.​—Luka 16:10; 1 Kol. 10:31.

13. Bidi bikengela tshinyi bua tuetu kuikala bajadike ne: tudi tutumikila dipangadika dituvua bangate?

¹³ Tuetu bonso tudi bamanye ne: kuangata dipangadika dimpe mbualu, kadi kushala mudimate ne kuditumikila mbualu bukuabu. Tshilejilu, bamue bantu batu bajinga kulekela dinua dia makanya batu bapangila bualu kabatu ne bukole bukumbane budi mua kubambuluisha bua kulekela to. Bidi bikengela kudienzeja bikole bua kulonda njila utudi basungule. Bamue batu bitaba ne: dijinga dikole ditudi nadi ndifuanangane bikole ne mifungu. Tuetu ne tshibidilu tshia kuyibidija, idi ikolakana. Kadi tuetu tuyibidija ku mpukapuka, idi iteketa. Nunku, ntshinyi tshidi mua kutuambuluisha bua kukolesha dijinga dietu dia kushala balamate dipangadika ditudi bangate ne kudikumbaja? Kueyemena Yehowa kudi mua kutuambuluisha.​—Bala Filipoyi 2:13.

14. Bua tshinyi Paulo uvua mupete bukole bua kuenza tshivuaye mumanye ne: ke tshivua tshikengela kuenza?

¹⁴ Malu avua mafikile Paulo avua mamufikishe ku dimanya bualu ebu. Musangu kampanda wakadilakana wamba ne: “Dijinga didiku, kadi tshiena ne bukole bua kuenza tshidi tshimpe.” Uvua mumanye tshivuaye musue kuenza anyi tshivuaye ne bua kuenza, kadi imue misangu kuvua bualu kampanda buvua bumupangisha bua kutshikumbaja. Wakamba ne: “Ndi nsanka bua mikenji ya Nzambi bilondeshile tshindi munda muanyi, kadi ndi mmona mu mubidi wanyi mukenji mukuabu uluangana ne mukenji wa mu meji anyi, uya nanyi ku bupika bua mukenji wa bubi udi mu bitupa bia mubidi wanyi.” Nansha nanku, uvua ne ditekemena kampanda. Wakamba ne: “Ndi ngela Nzambi tuasakidila ku butuangaji bua Yezu Kristo Mukalenge wetu.” (Lomo 7:18, 22-25) Wakafunda mu mvese mukuabu ne: “Bua malu onso, ndi ne bukole ku diambuluisha dia yeye udi umpesha bukole.”​—Filip. 4:13.

15. Bua tshinyi tudi ne bua kudisuika bua kuenza tshidi tshimpe?

¹⁵ Bidi bimueneka patoke ne: bua kusankisha Nzambi, tudi ne bua kuangata dipangadika dia kuenza tshidi tshimpe ne kudikumbaja. Vuluka mêyi avua Eliya muambile batendeledi ba Bâla ne bena Isalele bavua batontolodi ku mukuna wa Kâmele a ne: ‘Nudi nuenda nuzobela pankatshi pa nseke ibidi musangu bule munyi? Bikala Yehowa Nzambi, numulonde; kadi bikala Bâla Nzambi, numulonde.’ (1 Bak. 18:21) Bena Isalele bavua bamanye tshivuabu ne bua kuenza, kadi bavua ‘bazobela’ bua kuangata dipangadika. Yoshua uvua mushilangane nabu bualu bidimu bia bungi kumpala uvua mushiye tshilejilu tshimpe pakambilaye bena isalele ne: ‘Binuamona ne: kukuatshila Yehowa mudimu kudi kubi, lelu nusungule unudi basue kukuatshila mudimu. Kadi meme ne ba mu  nzubu muanyi netukuatshile Yehowa mudimu.’ (Yosh. 24:15) Mbipeta kayi bivua bipatuke bua tshivuaye mudisuike bua kuenza? Yoshua ne bonso bavua bamulamate bakapeta diakalenga dia kubuela mu Buloba bulaya, ‘buloba buvua buwule tente ne mabele ne buitshi.’​—Yosh. 5:6.

16, 17. Fila tshilejilu tshidi tshileja mudi kuangata mapangadika adi umvuangana ne disua dia Nzambi kupetesha masanka.

¹⁶ Tuangate tshilejilu tshia matuku etu aa. Muanetu wa balume udi ufuma ku ditambula ukadi musele ne badi ne bana basatu, umue wa balume ne babidi ba bakaji. Dimue dituku, muena mudimu wabu wakamuambila bua bumbuke mu kumpanyi uvuabu bua baye kuenza mudimu mu kumpanyi mukuabu uvua ufuta makuta a bungi ne ufila bintu bia bungi. Muanetu wa balume eu wakela meji ne kusambila bua tshilumbu etshi. Uvua musungule mudimu udiye nawu bualu kabavua baya ku mudimu mu Disambombo ne mu Dia lumingu to, nansha muvuabu kabayi bafuta bimpe; bualu ebu buvua bumuambuluisha bua kubuela mu bisangilu ne kuyisha pamue ne bena mu dîku diende. Wakela meji ne kumona ne: yeye muitabe mudimu mupiamupia au, kakuenza kabidi malu aa to. Bu wewe muikale muanetu eu, uvua mua kuikala muenze tshinyi?

¹⁷ Panyima pa yeye mumane kuela meji bua tshivua dipangadika diende mua kuenzela malanda ende ne Yehowa, wakabenga mudimu wa makuta a bungi au. Udiku wela meji ne: uvua munyingalale bua dipangadika diende anyi? Nansha kakese. Wakamona ne: masanka a mu nyuma avuaye mupete avua ne mushinga wa bungi kudiye yeye ne dîku diende kupita difutu dia bungi divuaye mua kupeta. Yeye ne mukajende bavua basanke bikole pavua muanabu wa bakaji wa mukulumpe uvua ne bidimu dikumi mubambile ne: uvua mubanange, munange bena Kristo nende ne munange Yehowa bikole menemene. Wakamba ne: uvua musue kulambula muoyo wende kudi Yehowa ne kutambula. Uvua muanyishe tshilejilu tshimpe tshia muvua tatuende muteke ntendelelu wa Yehowa pa muaba wa kumpala mu nsombelu wende.

18. Bua tshinyi mbimpe bua tuetu kuangata mapangadika etu ne meji dituku dionso?

¹⁸ Kukadi bidimu bia bungi, Yezu Kristo udi Mose munene udi wenda ulombola batendeledi balelela ba Yehowa bua kupita mu tshipela tshia ndongoluelu wa malu wa Satana. Bu mudi Yezu muikale Yoshua munene, mmudiakaje bua kufikisha ndongoluelu mubi eu ku ndekelu wende ne udi ulombola bayidi bende mu bulongolodi bupiabupia budi ne buakane. (2 Pet. 3:13) Nunku, etshi ki ntshikondo tshia tuetu kupingana ku ngelelu yetu ya meji ya kale, ku bilele bituvua nabi kale, ku malu atuvua tuangata ne mushinga ne ku bipatshila bietu bia kale to. Kadi ntshikondo tshia kujingulula bimpe tshidi disua dia Nzambi. (Lomo 12:2; 2 Kol. 13:5) Mapangadika ne malu audi usungula dituku dionso aleje ne: udi muntu udi mukumbane bua Nzambi kukupesha masanka a kashidi.​—Bala Ebelu 10:38, 39.