Fuukulenuñahu Chachiwahi

“Mukuhweleli Yehova namuchima weyi wejima, bayi wushindamena kukashinshi keyeyi awenuku.”—YISH. 3:5.

MUKWAKULA NENUDI?

Indi kuzatisha yitoñojoka yayiwahi hakufuukulahu kwatalisha mudihi?

Tunateli kwikala ñahi nawuswa wakufuukulahu hayuma chachiwahi?

Yumanyi yinateli kutukwasha kwila mutunafuukuli?

1, 2. Komana mwatiyaña kuwaha kufuukulahu, nawa mwatiyaña ñahi hayuma yikwawu yimwafuukulahu dehi?

 IFUKU niifuku twafuukulaña hayuma yayivulu. Mwatiyaña ñahi neyi himukufuukula hayuma yalema nankashi? Antu amakwawu akeñaña kufuukulahu awenawu hayuma yejima. Ashindamenaña hawuswa wukwetuwu wakudifuukwila aweni, akaanaña kuyikwasha kudi akwawu hakufuukulahu. Hela chochu, kudi antu atiyaña woma wakufuukula hayuma yabadika hayelañawu mpinji yejima muchihandilu. Amakwawu atañaña munyikanda hela ayaña kudi akwakufumba nakuyifweta mali amavulu hakwila ayileji mwakwilila.

² Etu amavulu twekala hakachi. Tweluka netu yuma yikwawu yabadika muñovu jetu nawa kwosi chitwatela kwila; ilaña, twelukaña netu muyuma yayivulu yamuchihandilu, tunateli kufuukulahu kwesekeja nayuma yitwakeña. (Ŋal. 6:5) Hela chochu, tweluka netu bayi neyi mwejima mutwafuukulaña mwamaana hela mwafumaña jajiwahuku.

3. Wunlombolinyi wutukweti watela kutukwasha hakufuukulahu, nawa kukalanyi kutukweti?

³ Hakwikala ambuña aYehova, tunateli kuzañalala netu watwinka wunlomboli wawuwahi kutalisha hayuma yayivulu yalema muchihandilu chetu. Tweluka netu neyi tulondelaña iwu wunlomboli, tunateli kufuukula hayuma yinateli kumuzañalesha Yehova nikutuhetesha. Hela chochu, tunateli kumona yuma yabula kushimunawu jiika Mwizu daNzambi. Hanu dinu, tunateli kufuukulahu ñahi hayuma yitwatela kwila? Chakutalilahu, tweluka netu hitwatela kwiyaku. (Efwes. 4:28) Indi kwiya kwatalisha mudihi? Komana kwiya kwashindamenaña hakulema kwachuma chiwunasendi, chaleñela wuchisendi, ntahindi yuma yikwawu? Twatela kufuukulahu ñahi hayuma yabulawu kulumbululawu jiika? Yumanyi yatela kutulombola?

 IKALENU NAWUSWA WAKUTOÑOJOKA CHIWAHI

4. Hampinji yitwakeñeleña kufuukulahu hachuma, atulejeli nawudi?

⁴ Neyi tuhosha netu tunakukeña kufuukula hachuma chalema, mukwetu mukwaKristu nateli kuhosha nindi twatela kutoñojokahu chiwahi henohu kanda tufuukuluhu. Iku hikufumba kwakuwahi. Bayibolu yatufumbaña muniyi njila kutalisha hakufuukula hayuma mukunyakala nawu: “Antu ejima elaña yakulundumukila alonda yowu kubula.” (Yish. 21:5) Komana twatela hohu kwikala nampinji yeneni yakutoñojoka hansañu, kubula kulemenena kukabadi kamu nikufwila kwiluka yikuma yejima henohu kanda tufuukuluhu? Yuma yejimiyi yinateli kutukwasha kufuukulahu chiwahi, ilaña kudi yuma yikwawu yakeñekaña.

5. Muloñadi chitwakañenyaña kutoñojoka chiwahi mpinji yejima?

⁵ Twatela kwiteja netu kwosi wasemukaña nawuswa wakutoñojoka chiwahi mpinji yejimaku. Muloñadi? Muloña wonsu wetu twavwalikilaña munshidi nawa abula kuwanina nawa hitwatweshaña kwikala namujimba wawanina hela yitoñojokaku. (Mas. 51:5; Rom. 3:23) Kubombelahu, etu amavulu mpinji yimu twadiña hakachi kwawantu ‘aputishiluwu’ mesu ayitoñojoka kudi Satana; nawa twadiña antu akadi kumwiluka Yehova ninshimbi jindi jaloña. (2 Kor. 4:4; Tit. 3:3) Dichi, neyi tufuukulañahu kushindamena hayuma yitweluka netu diyi yayiwahi nawa yatelela, dikwila nawu tunakudidimba etu aweni, hela chakwila twikala nampinji yeneni yakutoñojokahu henohu kanda tufuukuluhu.—Yish. 14:12.

6. Yumanyi yinateli kutukwasha hakwila twikali nawuswa wakutoñojoka chiwahi?

⁶ Hela chakwila twekala awanina wanyi kumujimba nimuyitoñojoka, Yehova, Tata yetu wamwiwulu, wekala wawanina muyuma yejima. (Kuhit. 32:4) Chamuzañalu, watuloñeshelaña yuma yatukwashaña kwikala nayitoñojoka yayiha nikwikala nawuswa wakutoñojoka chiwahi. Hakwikala akwaKristu, twatela kutoñojoka nikwila yuma munjila yayiwahi. Dichi twatela kwiluka chakuyuula yitoñojoka yetu nikwimbujola chatoñojokañayi Yehova, nichelañayi.

7, 8. Shimunenu chakutalilahu chinakumwekesha chitunateli kufuukulahu chiwahi hela chakwila anakutukakeja hela tudi mukukala.

⁷ Toñojokenu hanichi chakutalilahu. Añinza amakwawu ekala nachaaku chakufuntisha anyanawu anavwaliki kudi antaña jawu hakwila akayihembeña kulonda wena atwalekuhu nakuzata nikuchila mali. * Mumbanda washakamaña mwituña dawenyi wavwalili nkemba weyala wamuwahi. Hampinji yavwaliliyi mwana, diyi mpinji yatachikiliyi kudiza Bayibolu nawa wayililuku hambidi kuspiritu. Amabwambu niantaña jindi atachikili kumukanjikija yena nimfumwindi nawu amufuntishi nkemba kwafumawu kudi ankaka jindi. Hela chochu, hamuloña wakudiza mumbanda welukili nindi hakwikala anvwali, wadiña himudimu windi wamwinkawu kudi Nzambi wakulela mwana. (Mas. 127:3; Efwes. 6:4) Komana wadi kulondela tushidikilu twamonañawu antu amavulu nawu twatuwahi? Tahindi wadi kulondela yuma yadizileñayi muBayibolu nakwikala mukukala kwakubula kwikala namali amavulu nikumuhoshola kudi antu amakwawu? Neyi yenu, mwadi kwila ñahi?

⁸ Hamuloña wekakeja nikwakama, iwu kansi wamumbanda walombeli kudi Yehova kulonda yamukwashi. Chahanjekeliyi namuhela wamudizishileña Bayibolu niantu amakwawu muchipompelu hakukala kwamweneñayi, watachikili kwiluka chatoñojokeleñayi Yehova hakuna kukala. Watoñojokeli cheñi hachineñi chekalaña nawanyana neyi akulaña chakadi anvwali jawu. Hanyima yakutoñojoka chikupu hachahosha  Bayibolu hakukala kwadiñayi naku, wafuukwiluhu nindi hichadiña chaloña kumutemesha mwanaku. Nfumwindi wamweni antu amuchipompelu chanyakeluwu kuyikwasha nawa nkemba chamwekeneñayi wamuzañalu nawa wakola kumujimba. Wetejeli kudiza Bayibolu nawa watachikili kuya nakupompa hamu nañodindi.

9, 10. Indi kwimbujola yitoñojoka yaYehova chatalisha mudihi, nawa tunateli kwila ñahi mwenimu?

⁹ Ichi hichakutalilahu chimu hohu, ilaña chinakulumbulula nawu neyi hitukufuukulahu hitwatela hohu kulondela mutunamoni hela munakutoñojoka amakwawu nawu mwamuwahuku. Yitoñojoka yetu yabula kuwanina nimuchima yinateli kwikala neyi nkoloku yinakwenda swayi hela yinakwenda chovu nankashi. Neyi yitulombolaña yinateli kutuletela kukala kweneni. (Yere. 17:9) Twatela kuhimpa yitoñojoka yetu nimuchima kuhitila mukuzatisha nshimbi jaNzambi jaloña.—Tañenu Isaya 55:8, 9.

¹⁰ Kudi chuma chachiwahi chaleñela Bayibolu yitukonkomweneña nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.” (Yish. 3:5, 6) Talenu awa mazu akwila nawu “bayi wushindamena kukashinshi keyeyi awenuku.” Halondela mazu akwila nawu “mwitijaña Yehova.” Diyi hohu wekala nayitoñojoka yayiwahi chikupu. Dichi, neyi tunakukeña kufuukulahu, twatela kushinshika muBayibolu kulonda twiluki yitoñojoka yaNzambi. Kuhiñahu twatela kufuukulahu kushindamena hachahosha Bayibolu. Dikwila nawu tukwimbujola yitoñojoka yaYehova.

FUMBENU YITOÑOJOKA YENU

11. Chumanyi chitwatela kudiza hakwila nawu tufuukuleñahu chiwahi?

¹¹ Kudiza kufuukulahu chiwahi nikwilamu hichapelaku. Ichi chinateli kukalila chikupu antu achidi amaha muchalala hela anakutachika kuyilaku hambidi nakupaminaku kuspiritu. Hela chochu, antu achidi anyikeki kuspiritu neyi chayitenañawu muBayibolu anateli kuyilaku chikupu hambidi. Toñojokenu hadi mukeki chadizañayi kwenda chachiwahi chakadi kudimbuka. Mukeki wadizaña kwenda kuhitila mukutachika kutamuna tuyintampu twanyanya kakavulu.  Chochimu nimukeki wakuspiritu neyi nakukeña kufuukulahu chiwahi. Anukenu nenu kapostolu Pawulu walumbulwili antu apama dehi nindi “wowu afumba dehi yitoñojoka yawu, enjilila dehi kwambula yayiwahi nayatama.” Izu dakwila nawu “enjilila dehi” niizu “afumba dehi” ejima atalisha mukutwalekahu kuzata nañovu nikufuntisha funtishahu, nawa dichatela kwilawu antu amaha.—Tañenu Aheberu 5:13, 14.

12. Tunateli kwikala ñahi nawuswa wakufuukulahu chiwahi?

¹² Neyi chitwahoshahu dehi, ifuku niifuku twatela kufuukulahu hayuma yayivulu, kufuukulahu hayuma yanyanya niyamaneni. Kwesekeja nakusandujola kumu, kubadika hamapasenti 40 ayuma yitwafuukulañahu yashindamenaña hayaaku yetu bayi neyi hamuloña wakutoñojokahu chikupuku. Chakutalilahu, ifuku niifuku nantetemena hadaha mwafuukulaña hayakuvwala yimwatela kuvwala. Munateli kutoñojoka nenu ichi hichuma chapela, nawa munateli kufuukulahu chakadi kutoñojokahu chikupu, sweje-e neyi kudi kumunakutemukila. Ilaña chalema kutoñojoka hayuma yimukuvwala neyi yinateli kumwekesha nawu mudi kambuña aYehova. (2 Kor. 6:3, 4) Neyi muya nakulanda yakuvwala, munateli kutoñojoka hanyitapu nimafashoni, indi hakutelela nihawuseya mwatoñojokañahu? Kufuukulahu chachiwahi hayumiyi kunateli kuleñela tufumbi yitoñojoka yetu, yikutukwasha kufuukulahu chiwahi hayuma yalema.—Luka 16:10; 1 Kor. 10:31.

IKALENU NAMUCHIMA WAKWILA YUMA YALOÑA

13. Chumanyi chakeñekaña hakwila tulondeli mutunafuukuli?

¹³ Wonsu wetu tweluka netu kufuukulahu chachiwahi kwambuka nakutwalekahu kulondela mutwafuukulaña. Chakutalilahu, antu amakwawu akeñaña kuleka kupepa makanya akañanyaña muloña wakubula chipepa chakuyisañumuna eli mwenimu. Chuma chakeñekaña hikudikasa mumuchima kulonda mwili mumunafuukuli. Antu amakwawu akuhwelela nawu kudikasa mumuchima kwadifwana natusafu. Chitwasweja kutuzatisha hela kunyika mujimba, tusafu twaswejaña kukola. Neyi kutuzatishaña nehi, tusafu twazeyaña hela twapompolokaña. Hanu dinu, chumanyi chatela kutukwasha kudikasa mumuchima nikulondela mutunafuukuli? Kushindamena hadi Yehova kunateli kutukwasha.—Tañenu Afwilipi 2:13.

14. Muloñadi Pawulu chekalililiyi nañovu yakwila chuma chateleleli kwilayi?

¹⁴ Yuma yahitilumu Pawulu yamukwashili kwiluka ichi chikuma. Wahosheli nindi: “Muchima wakukeña kwila chachiwahi nidi nawu, ilaña kwilamu kutwesha nehi.” Welukili chuma chakeñeleña kwilayi hela chateleleli kwilayi, ilaña mpinji jikwawu kudi chuma chamukañesheleña kwilamu. Wetejeli nindi: “Muntu wami wamukachi watiyaña kuwaha nanshimbi jaNzambi; ilaña namoni lushimbi lwacheñi muyidi yami lwalwishaña nalushimbi lwayitoñojoka yami, lunakeñi kuñiñija muwuduñu walushimbi lwanshidi lwekala muyidi yami.” Komana kwadiña kwosi wukwashu? Wadiña koku. Wahosheli nindi: ‘Namusakilili Nzambi nami Yesu Kristu Mwanta wetu diyi natweshi.’ (Rom. 7:18, 22-25) Wasonekeli cheñi nindi: “Natweshi kwila yuma yejima mudi Kristu wankoleshaña.”—Fwi. 4:13.

15. Muloñadi chitwatela kudikasila mumuchima kulonda twili mwaloña?

¹⁵ Mwamweni, hakwila tumuzañaleshi Nzambi, twatela kufuukulahu chuma chaloña nikudikasa mumuchima kwila mutunafuukuli. Anukenu mazu aElija alejeliyi akwakudifukula aBayali niaIsarela akwakusekesha haMpidi yaKarameli nindi: “Chimululuta, niniku kumukukundama nehi? Neyi Yehova diyi Nzambi [walala], londenu yena; neyi diyi Bayali, komana londenu yena.” (1 Anya. 18:21) Anyana kaIsarela elukili chateleleli kwilawu, ilaña adiña ‘nakululuta’ hamuloña wakwila akañenyi kufuukulahu.  Yoshuwa wadiña wambukaku chikupu, muyaaka yakunyima wemikili chakutalilahu chachiwahi hakuleja aIsarela nindi: “Neyi enu nenu chatama kumukalakela Yehova, komana tondenu lelu imukukeña kukalakela . . . Ami nimutaña wami tukumukalakela kwetu Yehova.” (Yosh. 24:15) Chumanyi chafumini muchuma chafuukwiliyi? Yoshuwa niantu adiña hamu nindi ayikiswilili kwiñila Mwituña daChikaninu, “ituña datuloña twamayeli nawuchi.”—Yosh. 5:6.

FUUKULENUÑAHU CHACHIWAHI KULONDA AYIKISWILEÑA

16, 17. Lumbululenu nkisu yafumaña mukufuukula hayuma kwesekana namwaya muchima waNzambi.

¹⁶ Mana kwetu wapapatisheweli katataka wasumbula, yena niñodindi akweti anyana anyanya asatu. Ifuku dimu, mukwawu muyazatilaña wamulejeli nindi abuuki nakutachika kuzata hakampani hahanañawu nfwetu yeneni niyuma yikwawu yayiwahi. Mana kwetu watoñojokeluhu nikulombelahu haniyi nsañu. Hakusambila watondeli mudimu wunakuzatayi, kwamufwetañawu mali antesha kulonda yanookeña kunsa yamulungu, hakwila yekaleña nampinji yakupompa nikushimwina hamu nachisaka chindi. Welukili nindi chikumukalila kuwana mpinji yakuya kukupompa nikushimwina neyi chakwila yeteja iwu mudimu wawuha. Neyi yenu mwadi kwila ñahi?

¹⁷ Hanyima yakwesekeja maheta akuspiritu namali amavulu, mana kwetu wakaanini iwu mudimu. Komana munakutoñojoka nenu watachikili kuditoñesha chimwahitili mpinji? Kwakulehi. Chatela yatoñojokeña hakwikala namali amavulu, welukili nindi chadiña chalema nankashi yena nichisaka chindi kukundama kwakwihi naYehova. Mana kwetu niñodindi atiyili kuwaha chikupu chayilejeluwu kudi mwanawu wamumbanda wamukulumpi wayaaka yakusemuka ikumi nindi: wayikeña, wakeña amana kwetu niahela nawa wamukeña Yehova nankashi. Wahosheli nindi wakeñeleña kudihana kudi Yehova nikupapatishewa. Chakutalilahu chachiwahi chawatata yindi chakutwamijaku kudifukula kudi Yehova muchihandilu chawu chamukwashili hama!

18. Muloñadi chichalemena nawu tufuukuleñahu chachiwahi ifuku niifuku?

¹⁸ Yesu Kristu, Mosi Muneni, nalomboli akwakudifuukula alala aYehova hadi yaaka yayivulu muchinkalampata chakaayi kaSatana. Hamu neyi Yoshuwa Muneni, Yesu wudi kwakwihi nakujilumuna kanu kaayi katama nakulombola atumbanji twindi mwituña dachikaninu dadiha dakuloña. (2 Pet. 3:13) Dichi, ayinu bayi neyi himpinji yakufuntila kuyitoñojoka yanjila jetu jajikulu, yaaku yayikulu, yuma yitwalemesheli niyitwafwilileñaku. Yinu himpinji yakwiluka chikupu mwaya muchima waNzambi. (Rom. 12:2; 2 Kor. 13:5) Yuma yitwafuukulañahu nikutonda ifuku niifuku yatela kumwekesha nawu tudi antu atelela kutambwila nkisu jaNzambi jahaya nyaka.—Tañenu Aheberu 10:38, 39.

[Tumazu twaheshina]

[Malwihu aKuzatisha haKudiza]

[Mwevulu wudi hefu 24]

Neyi tufuukulaña chachiwahi hayuma yitwamonaña ifuku niifuku, dikwila nawu tunakufumba yitoñojoka yetu (Talenu parakalafu 11)

[Mwevulu wudi hefu 26]

Fuukulenuñahu chachiwahi kulonda mwikali namuzañalu hakachi kawantu jaNzambi (Talenu parakalafu 18)