1, 2. Thu tlûkna siam chu nuam i ti em? I thu tlûkna siam tawhte chu engtin nge i ngaih?

THU TLUKNA! Nî tin mai hian thu tlûkna siam tûr tam tak kan hmachhawn a. Thu tlûkna siam chu engtin nge i ngaih? Ṭhenkhat chuan mahni tâna thu tlûkna siam chu nuam an tiin an phûr hle a. Mahni tâna thu tlûkna siam tûra dikna an neih chu phût tlatin, tuemawin an tâna thu tlûkna an siamsak chu an duh lo a ni. Amaherawhchu, nuna thu tlûkna kan siam ṭhinte bâka thu tlûkna siam chu ṭhenkhat chuan an hreh ngawih ngawih a. Ṭhenkhat chuan lehkhabu emaw, thurâwn petute emaw an râwn ṭhîn a, a châng phei chuan an mamawh thurâwn hmuh nân sum tam tham tak an sêng a ni.

² Kan zînga tam tak chu a laihâwl vêlah kan awm a. Thil ṭhenkhat chu kan thu neihna piah lam a niin engmah tih theih kan nei lo tih kan hria a; mahse, nuna kawng chi hrang hrangah mahni duhzâwng milin thu tlûkna kan siam thei tih kan hre bawk a ni. (Gal. 6:5) Chutichung pawhin, kan thu tlûkna siamte chu a finthlâkin, a ṭangkai vek lo tih kan pawm ngei a rinawm.

3. Thu tlûkna siamna kawngah eng kaihhruainate nge kan neih a, mahse eng harsatna nge la awm cheu?

³ Jehova chhiahhlawhte kan nih angin, kan nuna thil pawimawh tam takte atâna kaihhruaina chiang tak min pêk avângin kan lâwm thei a. Chutiang kaihhruainate kan zawm chuan, Jehova tilâwmtu thu tlûkna leh kan ṭangkaipui tûr thu tlûkna kan siam thei a ni. Chutichung pawhin, Pathian Thu-a chiang taka sawi lan loh buaina leh dinhmunte chu kan tâwk thei a. Chutiang hunah chuan engtin nge thu tlûkna kan siam? Entîr nân, rûk kan ru tûr a ni lo tih kan hria a ni. (Eph. 4:28) Mahse, rûkrûk hi eng nge a nih chiah? Kan thil lâk hlutna te, kan lâk chhan te, a nih loh leh thil dangte chuan thil kan rûk leh rûk loh a hril em? Kaihhruaina chiang fak a awm loh hunah engtin nge thu kan tihtlûk ang? Engin nge min kaihruai ang?

4. Thu tlûkna kan siam dâwn hunah eng thurâwn nge kan dawn mai theih?

⁴ Thu tlûkna pawimawh tak kan siam dâwn tih kan sawi chhuah hian, Kristian unau tuemaw chuan rilru fîm tak pu chunga siam tûrin min hrilh thei a. Chu chu thurâwn ṭha tak a ni. Bible chuan thil ti nghâl buan buan lo tûrin heti hian min vaukhân si a: “Thil ti rum rum mi chu a hlawhchham ang,” tiin. (Thuf. 21:5, C.L. Re-edited) Mahse, rilru fîm tak hmang tih awmzia chu eng nge ni? Hun la a, thil awm dân chipchiar taka ngaihtuah a, a âwm tâwk hre bawk a, fing taka thu tlûkna siam a ni em? Thu tlûkna ṭha siam tûrin hêng zawng zawngte hi a ṭangkai ngei mai a; mahse, rilru fîm tak putnaah chuan thil dang a tel belh a ni.—Rom 12:3; 1 Pet. 4:7.

5. Engvângin nge rilru fîm kan pianpui loh?

⁵ Tumah hian rilru fîm kan pianpui lo. Engvângin nge? Sual leh ṭhat famkim lohna neia piang kan nih avângin tisa ṭha famkim leh rilru fîm kan nei lo a ni. (Sâm 51:5; Rom 3:23) Chu bâkah, kan zînga tam tak chu tûn hma chuan Setana rilru ‘tihdelsak’ zîngah kan tel a, Jehova leh a tehna felte chu kan hre lo. (2 Kor. 4:4; Tit. 3:3) Chuvângin, kan thu tlûkna siam tûr chu eng ang pawhin ngaihtuah ngun mah ila, ṭha kan tih leh âwm kan tih ṭanchhana kan siam chuan mahni inbum mai kan ni ang.—Thuf. 14:12.

6. Engin nge rilru fîm pu tûrin min ṭanpui thei?

⁶ Taksa ṭha famkim leh rilru fîm nei lo mah ila, kan Pa, vâna mi Jehova chu kawng engkimah a ṭha famkim a. (Deut. 32:4) Lâwmawm takin, ani chuan kan rilru thlâk a, rilru fel tak nei theiin min siam a ni. (2 Timothea 1:7 chhiar rawh.) Kristian kan nih angin finthlâk taka ngaihtuah leh chhût chu kan duh a, chu mi mila thiltih pawh kan duh a ni. Kan ngaihtuahna leh rilru veizâwng chunga thu neiin, Jehova ngaihtuah dân, rilru vei dân, leh thiltih dân chu kan entawn tûr a ni.

7, 8. Nêksâwrna leh harsatna a awm chung pawha rilru fîm taka thu tlûkna siam theih a nihzia târ langtu thiltawn pakhat sawi rawh.

⁷ Entîrna pakhat lo en ta ila. Ram danga pêmte chuan fa an neih hian in lama an chhûngte hnênah an thawn ṭhîn a, chutiang chuan hna an thawk chhunzawm theiin, sum an hmu zêl dâwn a ni. * Ram danga awm nu pakhat chuan mipa naupang duhawm tak mai chu a hring a. Chutih lai vêl chuan, Bible zir ṭanin thlarau lamah hma a sâwn chho va. An ṭhiante leh an chhûngte chuan amah leh a pasal chu a pasala pate hnêna an fapa thawn hawng tûrin an tur ṭan a ni. Amaherawhchu, a bîk takin nu ber chuan nu a nih anga a fa enkawl tûrin Pathian pêk mawhphurhna a nei tih Bible a zirna aṭangin a hre ta a ni. (Sâm 127:3; Eph. 6:4) Mi tam tak tâna thil tihâwm tak chu a ti ve mai ang em? A nih loh leh, Bible aṭanga a thu zir chu zâwmin, sum leh pai lama harsatna emaw, mite sawichhiatna emaw chu a tuar zâwk dâwn em ni? A dinhmunah chuan ding ta la, eng nge i tih ang?

⁸ Nu, la naupang tak chu nêkchêpa a awm a, a chauh êm avângin Jehova hnênah ṭawngṭaiin a kaihhruaina a zawng a. Bible zirpuitu leh kohhrana mi dangte a biakna aṭangin, he mi chungchânga Jehova ngaihtuahna chu a hre ta a ni. Naupang ṭhang chho laiin nu leh pa hnêna a awm loh avânga rilru lama a tawrh theih dânte pawh a ngaihtuah tel a. Pathian Lehkha Thu ṭanchhana a dinhmun a ngaihtuah hnu chuan, a fapa thawnbo chu thil dik a ni lo tiin thu tlûkna a siam ta a ni. A pasal chuan kohhran chhûnga mite’n ṭanpui tûra hma an lâk dân leh a fapa chu hrisêl tak leh hlim tak a ni tih a hmu a. Bible a  zir ṭanin, kohhran inkhâwmah a nupui rualin a inkhâwm ṭan tawh a ni.

9, 10. Rilru fîm hmang tih chu eng tihna nge ni a, chu chu engtin nge kan hman theih ang?

⁹ Hei hi thilthleng pakhat mai a ni a, mahse, hei hian rilru fîm tak hmang tih chu keimahni leh mi dangte’n âwm leh remchâng nia kan ngaih leh kan hriatte tih mai a ni lo tih a târ lang. Kan rilru leh thinlung ṭha famkim lo chu sana kal chak lutuk emaw, kal muang lutuk emaw nêna khaikhin theih a ni a. Chu mi rinchhanna chuan buaina khirh tak min thlen thei a ni. (Jer. 17:9) Kan rilru leh thinlung chu Pathian tehna rin tlâkte hmangin kan siam rem tûr a ni.—Isaia 55:8, 9 chhiar rawh.

¹⁰ Chhan ṭha tak neiin, Bible chuan: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tiin min fuih a ni. (Thuf. 3:5, 6) Heta “nangma hriatnaah innghat suh” tih hi chhinchhiah ang che. Chu chu “amah [Jehova] hre reng la” tih hian a zui a. Ani chu rilru fîm tak Neitu a ni. Chuvângin, thu tlûkna siam tûr kan neih apiangin, Pathian thlîr dân hre tûrin Bible kan râwn zêl tûr a ni a, chu mi ṭanchhanin thu tlûkna kan siam tûr a ni. Chu tak chu a ni, rilru fîm hmanna—Jehova rilru entawnna chu.

11. Thu tlûkna finthlâk siam zir dân ber chu eng nge ni?

¹¹ Thu tlûkna finthlâk siam dân zir leh chu mi bawhzui chu thil awlsam a ni lo. A bîk takin thutaka awmna la rei lote leh thlarau lama puitling chho ṭante tân a harsa hle thei a ni. Bible chuan anni chu thlarau lama nausên angin a sawi a, mahse, chutiang mite tân pawh ṭha taka ṭhan chhoh theih a ni. Naupangin tlu lova kal dân a zir dân hi ngaihtuah rawh. A hlawhtlin chhan chu zîm tê têa pêna, a kal fo vâng a ni deuh ber a. Chutiang chu thu tlûkna finthlâk siam chungchângah thlarau lam nausênte tân pawh a dik a ni. Tirhkoh Paula chuan mi puitlingte chu “an hman fo avângin chhia leh ṭha fiah tûrin an hriat theihnate chu an sawizawi tawh,” tiin a sawi tih hre chhuak ang che. Hêng thu mal “hman fo” tih leh “sawizawi” tihte hian ṭan laa tih  rengna a kâwk a, chu tak chu a ni, mi tharte tâna tih ngai chu.—Hebrai 5:13, 14 chhiar rawh.

12. Thu tlûkna finthlâk kan siam theihna chu engtin nge kan sawizawi ang?

¹² Kan sawi tawh angin, nî tin mai hian thu tlûkna tam tak, a lian a tê kan siam a. Zir chianna pakhatin a târ lan dânin, kan thiltih zaa 40 vêl chu ngaihtuah lâwkna awm lo, tih ṭhana kan neih vânga tih a ni. Entîr nân, zîng tinin i thawmhnaw hâk tûr chungchângah thu tlûkna i siam a ngai a. I hmanhmawh phei chuan thil tê tham takah ngaiin, ngaihtuah vak lo pawhin i hâk tûr chu i thlang mai thei a ni. Mahse, i thawmhnaw hâk chu Jehova chhiahhlawh i nihna nên a inchawih em tih ngaihtuah a pawimawh hle. (2 Kor. 6:3, 4) Thawmhnaw lei tûra i bazâr hunah chuan a ṭhui dân leh tûn laia lâr a nih leh nih loh i ngaihtuah mai thei a; mahse, thuam inchawih tâwk a nih leh nih loh leh a man lam i ngaihtuah tel em? Hêng thila duh thlanna dik siamna chuan kan hriat theihna a sawizawi ang a, chu chuan a hnuah thu tlûkna pawimawh zâwkte siam tûrin min ṭanpui thei a ni.—Lk. 16:10; 1 Kor. 10:31.

13. Kan thu tlûkna siamte bawhzui ngei tûrin eng nge ngai?

¹³ Thu tlûkna dik kan siam hian chu mi bawhzui chu a awlsam lo tih kan hria a. Entîr nân, meizial zûk bânsan tumte chuan an tumna a chak tâwk loh avângin an bânsan thei lo va. An mamawh chu an kawng thlan bawhzui tum tlatna a ni. Ṭhenkhat chuan thil kan tih duhna hi kan tihrâwl ang a nih an ring a. Kan hman nasat, a nih loh leh excercise kan lâk nasat poh leh a chak ting mai a ni. Kan hman ngai loh erawh chuan, a chau mai ang. Chuti chu, engin nge kan thu tlûkna siamte bawhzui châkna nei tûr leh chu kan châkna thuam nghet tûrin min ṭanpui thei ang? Jehova lam hawina chuan min ṭanpui thei dâwn a ni.—Philippi 2:13 chhiar rawh.

14. Engvângin nge Paula chuan a tih tûr nia a hriatte ti tûrin chakna a neih?

¹⁴ Paula chuan ama thiltawn ngei aṭangin a hria a. Heti hian ṭumkhat chu a rûm a ni: “Thil ṭha tih duhna chu keimahah a awm na a, thil ṭha tihna erawh chu a awm si lo,” tiin. A tih duh emaw, a tih tûr emaw chu a hria a; mahse, a châng chuan thil engemawin a tihtîr thei lo a ni. Chuvângin, heti hian a inpuang a ni: “Ka rilru tak takin Pathian dân chungah ka lâwm si ṭhîn a; nimahsela ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah mi hruai ṭhîn,” tiin. A dinhmun chu beisei bo a ni em? Ni lo ve. Heti hian a puang chhuak zâwk a ni: “Isua Krista kan Lalpa avângin Pathian hnênah lâwmthu ka sawi a ni,” tiin. (Rom 7:18, 22-25) Hmun dangah pawh: “Mi tichaktuah chuan engkim ka ti thei a ni,” tiin a ziak bawk a ni.—Phil. 4:13.

15. Engtin nge tawimuang lova chêt lâk emaw, lâk loh emaw chuan mi chu a nghawng theih?

¹⁵ Pathian tilâwm tûr chuan, tawimuang lova chêt lâk a ngai tih a chiang hle. Karmel Tlânga Baala betute leh kal pêng Israelte hnêna zâwlnei Elija thusawi kha hre chhuak rawh: “Tuilairapin eng chen nge in awm dâwn? LALPA chu Pathian a nih chuan, amah chu zui ula; tin, Baala a nih leh, amah chu zui rawh u,” tih hi. (1 Lal. 18:21) Israela fate chuan an tih tûr chu an hria a, mahse thu tlûkna siam thei lovin “tuilairapin” an awm a ni. Chu mi nêna inkalh takin, a hma kum tam takah Josua chuan: “LALPA rawngbâwl hi ṭha lo âwm anga in hriat chuan vawiinah hian tu rawng nge in bâwl dâwn thlang mai rawh u . . . Kei leh ka chhûngte erawh hi  zawngin LALPA rawng a nia kan bâwl dâwn ni,” tia sawiin entawn tûr ṭha tak a hnutchhiah a ni. (Jos. 24:15) He a tum ruhna hian eng nge a rah chhuah? Josua leh amah bêl tlattute chuan Ram Tiam, “hnutetui leh khawizua luang ram” chu an chang ta a ni.—Jos. 5:6.

16, 17. Pathian duhzâwng mila thu tlûkna siam a hlâwkna chu sawi rawh.

¹⁶ Tûn lai dinhmun hi han ngaihtuah teh. Tûn hnai maia baptisma chang thar unaupa chuan nupui leh fa pathum a nei a. Ni khat chu, a hnathawhpui chuan kan unaupa chu amah nêna sum leh thil dang an hmuh tam zâwkna tûr company danga insawn tûrin a sâwm a. Kan unaupa chuan ngaihtuahin, chu mi chungchângah chuan a ṭawngṭai a ni. Atîra tûna a hnathawh lai a thlan chhan chu hlawh pe tam lêm lo mah se, chawlhkâr tâwpah a âwl theiin, inkhâwmnaa a tel theih bâkah, a chhûngkaw ruala rawngbâwlnaa a chhuah theih vâng a ni a. Hna thar chu thawk ta se, a lo berah pawh a thawh tirh lam chuan chutiangin hun a hmang thei dâwn lo tih a ngaihtuah a ni. Chutiang dinhmunah chuan ding ta la, eng nge i tih ang?

¹⁷ Thlarau lama hlâwkna a neihte leh sum tam zâwk hmuhna chu khaikhinin, kan unaupa chuan hna thar chu a hnâwl a ni. A thu tlûkna siam avânga a inchhîr i ring em? A inchhîr miah lo. Ani chuan amah leh a chhûngte tân thlarau lama malsâwmna an dawnte chu hlawh tam zâwk dawn aiin a ṭangkai zâwk niin a hria a ni. An fanu upa ber, kum sâwm miin a nu leh pate a hmangaih thu te, unaute a hmangaih thu te, leh Jehova a hmangaih nasat thute a sawi chuan a nupui nên an lâwm hle a. Tin, an fanu chuan Jehova hnêna inpumpêk a, baptisma chan a duh thu a sawi chuan an lâwm lehzual a ni. An fanu chuan Pathian Jehova biakna dah pawimawh berna kawnga a pa entawn tûr siam ṭha tak chu a va hlut dâwn êm!

18. Engvângin nge nî tina thu tlûkna finthlâk kan siam chu a pawimawh?

¹⁸ Mosia Ropui Zâwk, Isua Krista’n Jehova betu dikte chu Setana khawvêl thlalêr ramah kum sâwmbi tam tak chhûng a lo hruai tawh a. Josua Ropui Zâwk a nih angin, Isua chu he kalhmang suaksual tiborala a hnungzuitute chu thutiam felna khawvêl thara hruai lût tûrin a inrâlring reng tawh a ni. (2 Pet. 3:13) Chuvângin, tûn hi tûn hmaa kan ngaihtuahna te, kan chîn ṭhan te, kan tehna te, leh thiltih te lama kîr leh hun a ni lo. Kan tâna Pathian duhzâwng hriat chian lehzual hun a ni. (Rom 12:2; 2 Kor. 13:5) Nî tina thu tlûkna leh duh thlanna i siamte chuan Pathian chatuan malsâwmna dawng tlâk i nihzia lantîr rawh se.—Hebrai 10:38, 39 chhiar rawh. (w13-E 09/15)