1, 2. 1) A sasénle ngatsʼi chjota nga je kjoejin jmeni xi sʼín. 2) Jotjín koya jmeni xi jekichjoejin, a koaan kʼoasí jótjín tokuin nga kui kichjoejin.

NGA nyaon nyaon nkjín koya chjoejiaan jmeni xi nʼia nga jngó jngoá. Jósʼe tokuin kʼianga ji bʼakaoli chjoejin jmeni xi nʼiai. Tjínkʼa chjota xi nʼio tsjoake nga toje kosonnile jmeni xi sʼín. Kʼoatso nga tjínle ʼnde nga kʼoasʼin kʼoa likui sasénle tsa ʼya xi kʼoakuitsole jmeni xi sʼin. Tonga kʼoati tjíokʼa chjota xi ñaki tsokjón kʼianga je bʼakaole kjoejin jmeni xi sʼin. Tjín chjota xi nʼio tse tao̱n síkjeya nga básjai kjoafaʼaitsjen xi koasenkao, kʼoa bʼéxkia tsa jme libroni kʼoa básjai je chjota xi tjínle kjoachjine.

² Nkjín mañá xi kʼoasʼin nikjaʼaitsjeen nga nkjín koya tjín xi tsín ñá bʼakaoná chjoejiaan kʼoa xi tsín ma nikʼantjaiyaa, tonga kʼoati ʼyaa nga nkjín koya tjín xi koa̱n chjoéjiaan josʼin nga mená (Gál. 6:5). Tonga, a tsí kjoaixi nga sakʼoa likui nda chjoejiaan jmeni xi nʼia kʼoa likui nda bichótsjoá.

3. 1) Jméni xi kitsjoaná Jeobá xi basenkaoná nga chjoejiaan jmeni xi nʼia. 2) Ánni nga sakʼoa tsín ʼyasíñá jmeni xi chjoejiaan.

³ Ngatsʼiaa xi choʼndale Jeobá maa tsjoa tjíoná nga kitsjoaná Jeobá kjoatéxoma xi basenkaoná jmeni xi nʼia. Kʼiatsa kjuintjenngiaa kjoatéxoma jebi nda sʼe̱le Jeobá jmeni xi chjoéjiaan kʼoa nda kuiyoaa. Tonga tsakui nichxin sakʼoa kui tjínnele chjoéjiaan xi tsínkjoan kʼoatsokixiná ya Énle Niná jmeni xi sʼiaan. Jósʼiaan kʼiatsa kui kjoa kuitjátojiaan. Tobʼelañá, ʼyañá kʼianga chʼaotjín nga niché (Efes. 4:28). Tonga tjínkʼa xi kʼoatso nga likui tongantsjai nga chʼaotjín, kʼoa kui fini tsa choa chjíle tsojmi jebi kʼoa tsa nʼio machjénle je tsojmi xi kasíché. Jósʼiaan kʼianga kui xi ndatjín chjoéjiaan ninga tsín ñaki ʼyaa jmeni xi sʼiaan. Jméni xi koasenkaoná kʼianga kui chjoéjiaan xi kixi tíjna.

4. Kʼiatsa kʼoakʼuínlee jngo ndsʼee nga jngo kjoa tibitjatojiaan kʼoa likui ʼyaa jmeni xi sʼiaan, jmé kjoafaʼaitsjen xi tsakui nichxin tsjoáná.

⁴ Kʼiatsa kʼoakʼuínlee jngo ndsʼee nga jngo kjoa tibitjatojiaan kʼoa likui ʼyaa jmeni xi sʼiaan, tsakui nichxin kʼoakuitsoná  nga ndakjoanla chósonnilee jmeni xi sʼiaan. Je kjoafaʼaitsjen jebi kixi tíjna. Kʼoa je Biblia jngo kjoafaʼaitsjen tsjoáná nga tsín tokjoán kʼoasʼiaan tsa jmeni, itso: “Je xi xitso xiská kʼoasʼín tsa jmeni, tosicha” (Prov. 21:5). Kʼiatsa chóyakaola jmeni xi sʼiaan, tsa ndala si̱kjaʼaitsjeen kʼoa tsa ndala chósonnilee josʼin kuichotsjoá koasenkaoná nga kui chjoéjiaan xi skénndiaaná. Tonga a tokui jebi xi machjén nga sʼiaan kʼianga ñaki nda chjoéjiaan. Mai.

5. Ánni nga maskáyajinsínile ngatsʼi chjota josʼin síkjaʼaitsjen.

⁵ Ngatsʼi chjota nga maskáyajinle josʼin síkjaʼaitsjen. Ánni. Kuinga chjotajée maa ngatsʼiaa josaʼnda nga tsiaan kʼoa yaa nroani nga tsín ñaki nda je yao kʼoa kao kjoafaʼaitsjen xi kichʼá (Sal. 51:5; Rom. 3:23). Kʼoa xi ijngosani, je Na̱i “tsakʼéchjoangi kjoafaʼaitsjen[ná]” kʼianga kjesa ʼyajián xi tʼatsʼe Jeobá kʼoa jotso je kjoatéxomale (2 Cor. 4:4; Tito 3:3). Kʼoa ningalani nʼio nda si̱kjaʼaitsjeen jmeni xi mená sʼiaan tochale tochʼa̱nachalee yaoná kʼiatsa tokui kjuinñá jmeni xi ndatjín maná (Prov. 14:12).

6. Jméni xi tjínnele sʼiaan nga ñaki nda si̱kjaʼaitsjeen jmeni xi chjoéjiaan.

⁶ Nijngojinla chjota xi ñaki nda je yaole kʼoa kao kjoafaʼaitsjenle. Tonga je Jeobá, je Nʼainá xi tíjna ngʼajmi, ñaki ndaní kʼoa alikʼia maskáyajinle (Deut. 32:4). Kʼoa jé tíbasenkaoná nga tinikʼantjaiyaa kjoafaʼaitsjenná kʼoa nga tiningalee yaoná nga ñaki nda nikjaʼaitsjeen jmeni xi chjoejiaan. Ngatsʼiaa xi chjotale Cristo maa mená nga nda chósonnilee jmeni xi sʼiaan. Kuinga machjénsíni nga koa̱nná chjoéxkoá kjoafaʼaitsjenná kʼoa jotjín tokoán kʼoa nga je Jeobá chjénngilee josʼin síkjaʼaitsjen, jotjín kon kʼoa josʼín.

7, 8. Jmé kjoa xi jaʼatojin jngo chjoón xi jngo ʼndí kisʼele ya naxinandá jña tísíxá, kʼoa jméni xi kisʼin nga kui kiskoejin xi ndatjín.

⁷ Jngola choa̱ kataʼyaa xi tʼatsʼe jebi. Nʼio nkjín chjota xi xin naxinandá fisixá kʼoa kʼianga ʼndíxti sʼele yaa síkasén ya naxinandále nga je katasíjchá xi xínkjín mani, ánni nga koa̱n tosi tonda sixásíni kʼoa sikinjesíni tao̱n ya naxinandá jñani tjíosíxá. * Jngo chjoón xi tʼaxin naxinandá tísíxá jngo ʼndí kisʼele. Kʼoa me kʼoati kʼia tsakʼétsʼiakao nga kiskotʼaya je Biblia, kʼoa tsakʼénele yaole nga kisitjoson jmeni xi koanjinle. Je miyole kʼoa kao je xi xínkjín mani kʼoakitsole chjoón jebi kʼoa kao xʼinle nga tosa ya naxinandále katasíkasén je ʼndíle ánni nga ya katasíjchásíni je majchále kao pajchále ʼndí jebi. Tonga nga kiskotʼaya Biblia koanchoyale nga je kjinele síjchá je ʼndíle, nga̱ je Niná jé xi xijchá ma bánele nga síjchá je ʼndíxtile (Sal. 127:3; Efes. 6:4). Tikjaʼaitsjenlai jebi: A tjínnele nga kisikasén je ʼndíle chjoón jebi ya naxinandále, tokuini nga ngisa skénndiaale. Axo tjínnele kui sitjoson jotso je Biblia ninga ñʼai koa̱nle tao̱n kʼoa ninga jokuitsole je xínkjín. Jókinʼiai tsa jilani.

⁸ Je chjoón jebi chan kichobele jmeni xi kitsole je chjota xi ngikʼa. Jméni xi kisʼin. Tsakʼétsʼoale je Jeobá kʼoa kʼoakitsole nga je katabándiaale jmeni xi koa̱n sʼin. Kʼianga tsakʼéyanajmí kʼale ndsʼee ya jinjtín kʼoa kao je tichjaa xi kitsoyale Biblia kʼiaa koanchoyale josʼin síkjaʼaitsjen je Jeobá xi tʼatsʼe kjoa xi tífaʼatojin. Je chjoón jebi kʼoati koanchoyale nga tsín ñaki nda koa̱njchá je ʼndíle kʼiatsa tʼaxin sikasén, nga nʼio sikjáo. Kʼianga jenda kiskosonle kʼoa kisikjaʼaitsjen jotso je Énle Niná tosa likuini kisikasén je ʼndíle ya naxinandále. Je ndsʼee kʼoa kao tichjaa tsakinyakao chjoón jebi. Kʼianga tsabe jebi je xʼinle kʼoa nga ñaki nda kjimajchá je ʼndíle, chan kʼoati koanjyole nga tsakʼinyale Biblia kʼoa kʼoati ki kjoajtín tsanda je.

9, 10. 1) Jósʼin tsoyanile nga nda nikjaʼaitsjeen. 2) Jósʼin chjénngilee kjoafaʼaitsjenle Jeobá.

⁹ Jméni xi bakóyaná choa̱ jebi. Kui bakóyaná nga likui koa̱n tokui koanngínñá  jmeni xi ndatjín maná kʼianga jme xi chjoejiaan kʼoa tsakuije̱ xi kʼoatso chjota nga ngisa skénndiaaná. Mani nga chjotajée maa, je kjoafaʼaitsjenná kʼoa kao ni̱ma̱ná yaa mangóson jngo reloj xi kʼoakji tsjentítjon kʼoa kʼoakji tsjentje̱nngi. Kʼiatsa tokui kjuinñá je kjoafaʼaitsjenná kao ni̱ma̱ná tochale nʼio tse kjoa ska̱jiaan (Jer. 17:9). Kʼoa nga tsín kʼoakatama machjénní nga kui kjoándiaanilee je kjoafaʼaitsjenná kao ni̱ma̱ná je kjoatéxomale Niná (tʼexkiai Isaías 55:8, 9). *

¹⁰ Kuinga i̱ tsosíni je Biblia: “Tinʼiotʼai Jeobá kao ngayeje ni̱ma̱li, kʼoa ali tokuijin ʼmini josʼin machoyali. Jé kuenta tʼiain tojmeni xi sʼiain, kʼoa jesoa sikixiya je ndiaali” (Prov. 3:5, 6). Ndala tikjaʼaitsjain je én xi tso: “Ali tokuijin ʼmini josʼin machoyali”. Xijema itso: “Jé [Jeobá] kuenta tʼiain”. Jmé xi bakóyaná én jebi. Kui xi bakóyaná nga tojéní Jeobá xi ñaki nda je kjoafaʼaitsjenle. Kuinga machjénsíni nga tongini nga kje jme xi nʼiajián, ya kjoanla Biblia kjoásjaijiaan josʼin síkjaʼaitsjen je Jeobá kʼoa ya chʼa̱ngiñá jmeni xi chjoéjiaan. Kʼiatsa kʼoasʼiaan ñaki kuini kjoafaʼaitsjenle Jeobá tichjenngilee.

11. Jméni xi tjínnele sʼin jngo chjota nga koa̱nle kui skoéjin xi ndatjín.

¹¹ Alikui choa ñʼai maná nga ñaki kui chjoejiaan xi ndatjín kʼoa nga kʼoanʼia jmeni xi jekachjoejiaan. Kʼoa je xi ngisa ñʼai male jéní je xi chriansʼa kisʼenngindá kʼoa kao je xi tosʼa tjíobʼétsʼiakao nga tjíosítjoson jmeni xi tso je Biblia. Tonga xíngiaa jebi koaan sa nda sa nda sʼin. Je Biblia kʼoatso nga sʼa “ʼndísa” chjota jebi. Ánni. Kuinga ya mangóson jngo ʼndí xi tosʼa kjimale tífaʼá ndso̱ko̱, choa choa kʼoasʼín saʼnda nga ma fi. Kʼoa kʼoakjoánti ma je xíngiaa xi tosʼa kjimale tjíokjoejin jmeni xi koa̱n sʼin. Je pastro Pablo kʼoati kinchja̱ni tʼatsʼe je xi jekoanjchá, kʼoa je xokitsole je “xi nʼio koanngakaole je kjoafaʼaitsjenle nga male faʼájin je xi nda, kʼoa je xi tsʼen”. Jméni xi tsoyanile je én xi tso “nʼio koanngakaole je kjoafaʼaitsjenle”. Kui xi tsonile nga machjénní  nga ntsjaintsjai kʼoénelee yaoná nga si̱ngalee je kjoafaʼaitsjenná nga koa̱nle kui skoéjin xi ndatjín, kʼoa kui jebi xi tjínnele sʼin je xi tosʼa choatsele nga tjíokotʼaya Énle Niná (tʼexkiai Hebreos 5:13, 14).

12. Jngola choa̱ tʼejnai jósʼin koa̱n si̱ngalee kjoafaʼaitsjenná nga koa̱nle skoéjin je xi ndatjín.

¹² Tojoná kabixoán, nga nyaon nyaon nkjín koya jmeni xi chjoejiaan nga jngó jngoá. Tjín xi tse kjoandosin tjínle kʼoa tjín xi mai. Tjíokʼa chjota xi tsakatiotsʼinya xi tʼatsʼe jebi xi kʼoakitso jonʼia kʼianga jme xi chjoejiaan, mexó basen jmeni xi nʼia xi jetokʼoanʼia josʼin jenganá kʼoa nga saʼnda tsín nda nikjaʼaitsjeen. Tobʼelañá, kuila cho̱bayañá jokjoan najño xi chʼakjá nga nyaon nyaon. Tsakui nichxin kʼoasʼin si̱kjaʼaitsjeen nga choa kjoandosin tjínle kʼoa nga tsín machjén nga nʼio si̱kjaʼaitsjeen jokjoan najño xi chʼa̱kjá, kʼoa ngisa tsa xátíná. Tonga nʼio chjíle nga si̱kjaʼaitsjeen tsakui najño kichʼakjá josʼin bakinle jngo xi choʼndale Jeobá ma (2 Cor. 6:3, 4). Kʼianga mangínkindaa najñoná tsakui nichxin kui fiya jkoaa jokjoan najño xi nʼio síchjén chjota ndʼaibi. Tonga a chosonnilee tsa ndasʼin matsen kʼoa jotjín chjíle. Kʼiatsa koa̱nná chjoéjiaan jmeni xi sʼiaan xi tʼatsʼe jebi, tosi tonda si̱ngalee kjoafaʼaitsjenná nga katamale katakjoéjin xi ndatjín kao xi tsín ndatjín, kʼoa kao xi tsesa kjoandosin tjínle (Luc. 16:10; 1 Cor. 10:31).

13. Jméni xi tjínnele sʼiaan kʼianga si̱tjosoán jmeni xi jekachjoejiaan.

¹³ Tonga a tsí kjoaixi nga sakʼoani ñʼai maná nga nitjosoán jmeni xi chjoejiaan. Tobʼelañá, nʼio nkjín chjota xi na̱jno̱ kjen xi tsín timenile nga kui skén, tonga ñʼai male nga tsjiontʼa. Ánni. Kuinga tsín ñaki tjíojngo ni̱ma̱le nga kʼoasʼin. Kʼianga si̱tjosoán jmeni xi jekachjoejiaan, tjínnele nga ñaki kʼoakʼoé ya jinni̱ma̱ná nga kʼoasʼiaan kʼoa nga kʼoénelee yaoná nga si̱tjosoán. Kʼoa je xi koasenkaoná nga kʼoasʼiaan kuinga je Jeobá si̱jélee nganʼio (tʼexkiai Filipenses 2:13).

14. ʼYáni xi kitsjoale pastro Pablo je nganʼio xi koanchjénle nga kui kʼoakisʼin xi ndatjín.

¹⁴ Je pastro Pablo kʼoati kui kjoa jaʼatojin. Ñandia i̱ kitso: “Tjínna kjoametakon nga kʼoasʼian je xi nda tjín”; tonga kʼoakitso nga ñʼai koanle nga kʼoakisʼin. Ningalani be jmeni xi tjínnele sʼin, sakʼoa ñʼai koanle. Kitso: “Tjínna kjoatsjoa xi tʼatsʼe kjoatéxomale Niná, josʼin tjín ni̱ma̱na. Tonga ʼbe ngijngo kjoatéxoma i̱jin [...] yaona xi kjánkao je kjoatéxoma xi tsʼe kjoafaʼaitsjenna. Jébi xi síkʼéjnatʼanʼiona je kjoatéxoma xi tsʼe jée xi tíjnajin [...] yaona”. Tonga alikui tsa ñaki kisikinroajen kon ningalani nʼio ñʼai koanle, nga̱ i kitso: “Tsjoale kjoanda Niná xi totʼatsʼe Jesucristo Nainá” (Rom. 7:18, 22-25). Je pastro Pablo kʼoati kitso ʼya xi kitsjoale nganʼio nga koanle kʼoakisʼin xi ndatjín, kitso: “Jméni nga jchasínile nga je nganʼio xi nʼio tse tsʼe Niná ní” (2 Cor. 4:7).

15. Ánni nga tsín jao kʼoésíñá tokoán nga kʼoasʼiaan xi ndatjín.

¹⁵ Kʼiatsa mená nga tsjoa kjoáyaa kon Niná tjínnele kui chjoéjiaan xi ndatjín kʼoa nga ñaki kʼoakʼoé ya jinni̱ma̱ná nga kʼoasʼiaan. Si̱kjaʼaitsjenla jmeni xi kitsole je profeta Elías je chjota xi tsakʼétsʼoale je niná xi Baal tsakʼin kʼoa kao je chjota israelita xi yátsʼi̱n tsakinyále Jeobá nichxin kjoatse. Kitsole: “Kʼiáni saʼnda nga jao kʼoáo kjoafaʼaitsjenno. Kʼiatsa je Jeobá xi ñaki Niná, je tangíntjenngilao; tonga tsa jéní je Baal, je tangíntjenngilao” (1 Rey. 18:21). Je chjota israelita jebe jmeni xi tjínnele sʼin, tonga likui kʼoakisʼin nga̱ jao tsakatío kon. Tonga je Josué xi ngisa kjoatse tsakʼejna tikʼoajinni Elías, alikui kʼoakisʼin, tosa jngo choa̱ tsakʼéjna kʼianga i̱ kitsole je chjota israelita: “Tsa tsín kjenndiaano nga Jeobá si̱xálao, chjoéjion ndʼaibi ʼyáni xi meno si̱xálao [...]. Tonga an kʼoa kao yaniʼyana jé Jeobá si̱xálaijin”  (Jos. 24:15). Jósʼin kichotsjoá nga ñaki tjínjngo kon je Josué jmeni xi kisʼin. Je kʼoa kao xi kitsjoanganʼiole koaan jaʼasʼen ya ʼNde jña tsakʼinle nga kʼoaile, “ʼnde jña nga nʼio tjín ndáchiki kao ntsjén” (Jos. 5:6).

16, 17. Jngola choa̱ kʼoasi xi bakó nga tse kjoanichikontʼain tje̱nkao nga kui chjoejiaan xi sasénle Niná.

¹⁶ Jngola choa̱ kataʼyaa jmeni xi faʼatojin xíngiaa ndʼaibi. Jngo ndsʼee xi jetjínle chjoón, chriansʼa kisʼenngindá kʼoa jan mani ʼndíxtile. Jngo chjota xi ñatje̱n síxá ñandia kʼoakitsole tsa mele nga tʼaxin koaisíxá nga jao, jñani ngisa tse koa̱nchjíle kʼoa ngisa tse jmeni xi kʼoaile. Je ndsʼee jebi nʼio nda kisikjaʼaitsjenjin xi tʼatsʼe jebi kʼoa tsakʼétsʼoale Jeobá nga je katabándiaale jmeni xi sʼin. Ya jñani tísíxá me tochoa machjíle, tonga kuinga ya kisixáni nga̱ tjoʼndele nga xoto kao nga taingo nga fi kjoajtín kʼoa nga fitsoyason kao familiale. Kui kisikjaʼaitsjen nga tsín ndi̱to̱n tjóʼnde ijngokʼale nga sikjáya nga xoto kao nga taingo ya jñani koaisíxá. Jméni xi kinʼiai tsa jilani xi kui kjoa kitjatojin.

¹⁷ Kʼianga jenda kisikjaʼaitsjenjin ndsʼee jebi josʼin kʼoéjna ngixko̱n Niná kʼiatsa ya koaisíxá ya jñani ngisa tse koa̱nchjíle, tosani likui ya kisíxá. A skanni kʼoakoanle jmeni xi kiskoejin. Mai. Kʼoasʼin kisikjaʼaitsjen nga ngisa chjíle nga nda koatio ngixko̱n Jeobá, je kʼoa kao familiale, tikʼoajinni tsa ngisa tse tao̱n kuinje̱le. Je ndsʼee jebi kʼoa kao chjoónle nʼio tsjoa koanle kʼianga je tsotiʼndíle xi majchínga, xi sʼa te nóle, nga kʼoakitsole nga nʼio tsjoake, kʼoa nga kʼoati nʼio tsjoake je ndsʼee kʼoa kao Jeobá kʼoa nga mele nga tsjoátʼale yaole kʼoa koaisʼenngindá. Alikui jao tjínná nga je xi tsakasenkao tsotiʼndí jebi kuiní je choa̱ xi tsakʼéjnale je nʼaile, nga kui títjon kisikʼéjna xi tʼatsʼe Jeobá.

18. Ánni nga nʼio chjísínile nga kui chjoejiaan xi ndatjín nga nyaon nyaon.

¹⁸ Josʼin tsakándiaale Moisés je chjota israelita ya ʼndekixí, je Jesús kʼoatisʼin jekjoatse tíbándiaale je naxinandále Niná i Sonʼndele Na̱i. Kʼoa joni tsa Josué nga tsakándiaale je chjota israelita saʼnda nga jaʼasʼen ya ʼNde jña tsakʼinle nga kʼoaile, je Jesús tosi tondala koandiaale je chjotale saʼnda nga kjoaʼasʼen ya sonʼnde chjotse xi tjíokoyale, jña nga sʼe̱ntsjai xi kjoakixi (2 Ped. 3:13). Mani nga jenʼio machrianle nga kʼoakoa̱n, alikuijin ndatjín tsakui chjoéya ijngokʼá je kjoafaʼaitsjen xi kisʼená ngasʼa, jmeni xi jenganá tsakai, jmeni xi ndatjín kʼoa chʼaotjín ʼmilee kʼoa jmeni xi tsangíntjenngiaa tsakai. Je xi ngisa machjén nga kataʼyaa kui josʼin mele Jeobá nga kjuinkoaa yaoná (Rom. 12:2; 2 Cor. 13:5). Kʼiatsa kui chjoéjiaan xi ndatjín nga nyaon nyaon, sʼeená je kjoanichikontʼain xi tsjoále Jeobá je choʼndale ngantsjai nichxin (tʼexkiai Hebreos 10:38, 39).