Modg-y tɩ y yam-yãkr fãa yɩ sõma
Modg-y tɩ y yam-yãkr fãa yɩ sõma
“Teeg Zu-soabã ne f sũur fãa la f ra teeg f meng bãngr ye.”—YEL. 3:5.
Y NA N LEOKAME TƖ BÕE?
D sã n wa rat n yãk yam n maan bũmbu, bõe la d segd n deng n maane?
Wãn to la ned tõe n wa tõog n yãkd yam tɩ zemsdẽ?
Bõe n tõe n sõng tõnd tɩ d tõog n maan bũmb nins d sẽn yãk yam n na n maanã?
1, 2. Yam-yãkrã wɛɛngẽ, y manesem yaa wãna, la y tagsg yaa wãn ne y yam-yãkr kẽere?
BEOOG sẽn vẽeg fãa, yaa tɩlae tɩ d yãk yam n maan bũmbu. Zĩ-kãng wɛɛngẽ, yãmb tagsg yaa wãna? Neb kẽer soo b mens n yãkd yam n maand bũmb nins fãa b sẽn date. B tagsdame tɩ ned a to pa tar sor n na n wilg-b b sẽn segd n maan ye. La sãnda yẽ zoeta yam-yãkre, tɩ kẽer baood sagls sɛb pʋsẽ, wall neb b sẽn get wa bãngdb nengẽ, n yiisd ligd wʋsg rẽ yĩng menga.
2 D wʋsg miime tɩ baa sẽn pa bũmb fãa pʋgẽ la d tar sor n na n yãk d sẽn datã, yɛl wʋsg n be tɩ yaa tõnd ned kam fãa n segd n yãk a sẽn date. (Gal. 6:5) La tõe tɩ d miime me tɩ pa d yam-yãkr fãa n yaa sõma, n nafd-d ye.
3. Bõe n tõe n sõng tõnd yam-yãkrã wɛɛngẽ, la zu-loe-bʋg la d baas n ket n segda?
3 D sẽn yaa a Zeova Kaset rãmbã, d sũy yaa noog a sẽn kõt-d sor-wilgr bũmb wʋsg sẽn tar yõod pʋgẽ wã. D kɩsa sɩd tɩ d sã n tũ a sor-wilgrã, d tõogd n yãka yam n maan sẽn noom-a, la sẽn na n naf-do. La yell ning taoore, d pa tõe n yã noor takɩ Wẽnnaam Gomdã pʋgẽ ye. Sã n wa yaa woto, d maanda wãn n bãng n yãk yam? Wala makre, Biiblã wilgame tɩ d ra zu ye. (Ef. 4:28) La neb kẽer yetame tɩ pa wakat fãa la yaa wẽng tɩ ned rɩk a to bũmb ye. Sã n yaa ne bãmba, bũmbã yõod sã n pa waooge, wall sẽn dɩk-a wã sã n sɩd bee raab pʋgẽ, pa wẽng ye. D sã n wa segd n yãk yam n maan bũmb tɩ neb kẽer yetẽ tɩ pa maneg n yaa wẽnga, d maanda wãna? Bõe n tõe n sõng-d zĩ-kãng wɛɛngẽ?
RENG-Y N TAGS-Y SÕMA
4. D sã n wa rat n yãk yam n maan bũmbu, tõe tɩ sagl-bʋg la b na n kõ-do?
4 Yãmb sã n togs y tẽed-n-taag tɩ y rat n yãka yam n maan bũmb sẽn tar yõod wʋsgo, tõe t’a na n yeel-y lame tɩ y reng n tags sõma. Yaa vẽeneg tɩ yaa sagl-sõngo. Biiblã meng yeelame tɩ “neb nins sẽn yãgd n ka yaasd n tagsdẽ wã paamda naongo.” (Yel. 21:5) Rẽnd d segd n maaga d yĩng n tags yellã zug sõma, n bao n bãng sã n na n naf-d lame bɩ pa na n naf-do. A Poll yeelame tɩ d ‘tags ne gũus-m-menga.’ Woto rat n yeelame tɩ bõe, la wãn to la d tõe n tũ a saglgã?—Rom 12:3; 1 Pɩɛ. 4:7.
5. Bõe yĩng tɩ d tagsa wã ne d yamã pa sõma zãnga?
5 La ned kae t’a tagsa wã ne a yamã yaa sõma zãng ye. Bala, d fãa roga ne yel-wẽndã, n pa zems zãng ye. (Yɩɩl 51:7; Rom 3:23) Sẽn paase, nand tɩ d bãng a Zeova n sakd a noyã, a Sʋɩtãan da ‘luda’ d wʋsg yam. (2 Kor. 4:4; Tɩt 3:3) Rẽ n so tɩ baa d sã n tags tɩ bɩ, n yãk yam n maan bũmb d sẽn tẽed tɩ zemsame, tõe n yɩɩ yam-yãkr sẽn pa sõma.—Yel. 14:12.
6. Bõe n tõe n sõng tõnd tɩ d toeem d tagsa wã?
6 Yaa sɩd tɩ tõnd pa zems zãng ye. La a Zeova sẽn yaa tõnd saasẽ Ba wã zemsa zãnga. (Tõo. 32:4) Zu-noogo, a kõta tõnd bũmb ning sẽn yaa tɩlae ne-d sẽn na yɩl tɩ d toeem d tagsa wã. (Karm-y 2 Tɩmote 1:7.) D sẽn yaa kiris-nebã, d tog n talla yam, tɩ d tagsa wã ne d tʋʋm-tʋmdɩ wã zemsdẽ. Woto yĩnga, d segd n gũusda ne d sẽn tagsd to-to wã, la d modgdẽ tɩ d tʋʋm-tʋmdɩ wã ne d tagsa wã tat a Zeova yam.
7, 8. Kiba-bʋg n wilgd tɩ baa sã n pa nana ne-do, d tõe n yãka yam n maan sẽn yaa sõma?
7 D rɩk makre. Neb nins sẽn tɩ be sãand weoog n baood ligdã kẽer sã n dog biiga, b talld-a lame n tɩ bas ne a yaab-rãmbã, sẽn na yɩl n tõog n kell n tʋm n bao ligdi. * Pag a ye sẽn tɩ be sãand weoog n dog bi-ribla. Wakat kãnga, a sɩnga Biiblã zãmsgo, n da tũud bũmb ning a sẽn zãmsdã. A zo-rãmbã ne a roagdbã ra pẽdgda yẽ ne a sɩdã, n dat tɩ b tall biigã n tɩ bas ne a yaab-rãmbã. La Biiblã zãmsg sõnga pagã t’a bãng t’a Zeova ratame tɩ yẽ ne a sɩdã wub biigã. (Yɩɩl 127:3; Ef. 6:4) Woto wã, a maanda wãna? A na n maana bũmb ning neb wʋsg sẽn minim n maandẽ n tẽed tɩ rẽ la sõma wã bɩ? A sã n yãk yam n na n tũ Biiblã sẽn yetã, ligd ning a sẽn paamdã na n boogame, tɩ neb a taabã me wɩd-a. Sã n da yaa yãmba, y maanda wãna?
8 Neb a taabã sẽn pẽdgd pagã yĩnga, a pʋʋsa a Zeova ne a sũur fãa n kos sor-wilgri. A sẽn sõs ne saam-bi-poak ning sẽn zãmsd-a Biiblã la ne tigingã neb a taabã, a bãnga a Zeova sẽn dat t’a maan bũmb ninga. A bãngame me t’a biigã sã n pa be ne bãmb a bɩʋʋngã wakate, tõe n nams-a-la wʋsgo. A sẽn maag a yĩng n tags Biiblã sẽn yetã zugã, a yãka yam n pa na n tall biigã n tɩ bas ne a yaab-rãmbã ye. A sɩdã sẽn yã tigingã neb sẽn sakd n sõngd-bã, n paas biigã sẽn tar laafɩ sõma wã, a sakame n sɩng Biiblã zãmsg la a kẽnd tigissã.
9, 10. Bõe n pa na n sõng-d tɩ d yãk yam tɩ zemse, la bõe n na n sõng-do?
9 Kiba-kãngã wilgdame tɩ d sã n dat n yãk yam tɩ zemse, pa tõnd mengã wall neb a taabã sẽn tagsd tɩ yaa sõma wall nana wã bal n na n sõng-d ye. D tõe n dɩka d yamã la d sũurã sẽn pa sõma zãngã n mak ne montr sẽn lʋɩt taoor wall sẽn paad poorẽ. D sã n teeg montr a woto buudu, tõe n waa ne zu-loeese. (Zer. 17:9) Woto me, d sã n dat n gil zu-loeese, d segd n modgame tɩ d tagsa wã zemsd ne Wẽnnaam noyã.—Karm-y Ezai 55:8, 9.
10 Biiblã yeta woto: “Teeg Zu-soabã ne f sũur fãa la f ra teeg f meng bãngr ye. Fo sẽn maand bũmb ning fãa, bɩ f tẽeg Zu-soabã yelle, la b na n demsa fo sorã.” (Yel. 3:5, 6) Bõe yĩng tɩ b yeel tɩ d ‘ra teeg d meng bãngre,’ la tɩ d “tẽeg Zu-soabã yelle”? Yaa t’a Zeova zemsa zãnga. Rẽ n so tɩ d sã n wa rat n yãk yam n maan bũmbu, d tog n tɩka Biiblã sẽn yetã zug n bao n bãng sã n nooma Wẽnnaam bɩ pa noom-a. Rẽ la d wilgd tɩ d tara yam.
D SẼN TÕE N BÃNG N YÃK YAM TO-TO TƖ ZEMSE
11. Wãn to la ned tõe n wa tõog n yãkd yam tɩ zemsdẽ?
11 Yɩl n wa tõog n yãkd yam tɩ zemsdẽ, la d maand bũmb nins d sẽn yãk yam n na n maanã pa nana ye. Woto yaa toog ne sẽn nan deeg-b lisgã, la ne sẽn nan sɩng-b Biiblã zãmsgã n yɩɩda. La bãmb me tõe n modgame n wa tõogd n yãkd yam tɩ zemsdẽ. Biiblã yeelame tɩ b yaa wa kom-bõones sẽn nan zãmsd kẽna. Biig sã n zãmsd kẽna, a sɩngda bilf-bilf n wa minim. Yam-yãkrã wɛɛngẽ, nin-paalsã me maanda woto. Tẽeg-y tɩ tʋm-tʋmd a Poll yeelame tɩ ‘neb nins sẽn bɩ wã’ yaa neb ‘sẽn mi sõma ne wẽng n bake.’ Yɩl tɩ nin-paalg wa tõog n lebg ned a woto baooda modgre, la rɩkd sẽk me.—Karm-y Hebre dãmb 5:13, 14.
12. Bõe la d tõe n maan n wa tõog n yãkd yam tɩ zemsdẽ?
12 Wa d sẽn zoe n gomã, beoog sẽn vẽeg fãa, bũmb toor-toor la d yãkd yam n maandẽ. Kẽer tara yõod wʋsgo, tɩ sãnda yõod pa waoog ye. Neb n maan vaeesg n dat n bãng nebã sẽn wae n maand to-to nand tɩ b yãk yam n maan bũmbu. B mikame tɩ tõnd sẽn maand bũmb ninsã pʋɩ-sʋk yaa d sẽn minim n maandẽ, pa d sẽn deng n maag d yĩng n tags yĩng ye. Wala makre, yi-beoog fãa, d yãkda fuug ning d sẽn na n ningi. Tõe tɩ y getame tɩ pa bũmb sẽn tar yõod wʋsg ye. Rẽ n so tɩ y pa rengd n maag y yĩng n tags n yaool n yãke, sẽn yɩɩd fãa, y sã n yãgdẽ. La yɩta sõma tɩ d reng n tags n ges fuug ning d sẽn na n ningã sã n zemsa ne a Zeova Kaset soaba. (2 Kor. 6:3, 4) Y sã n wa rat n sẽ fuugu bɩ n da, sãmbg kae tɩ y na n tagsa fuugã modɛll yelle, la y ges nebã sã n nonga modɛl-kãngã. Sẽn paase, y na n gesa fuugã sã n zemsa ne kiris-neda, la y ligdã me sã n taame. D sã n minim n yãkd yam bũmb nins yõod sẽn pa waoogã wɛɛngẽ tɩ zemsdẽ, na n sõng-d lame tɩ d sã n wa na n yãk yam n maan bũmb sẽn tar yõod wʋsg bɩ zemse.—Luk 16:10; 1 Kor. 10:31.
TƲLG-Y N MAAN-Y SẼN YAA TƖRGA
13. D sã n yãk yam n dat n maan bũmbu, bõe n tõe n sõng-d tɩ d tõoge?
13 Baa d sã n yãka yam n na n maan bũmb sẽn yaa sõma, pa wakat fãa la yaa nana ye. Wala makre, ned sẽn yũud sɩgaar tõe n yãka yam n na n bas n pa tõoge, bala pa ne a sũur fãa ye. Rẽnd d sã n yãk yam n na n maan bũmbu, yaa d sẽn na n dat rẽ ne d sũur fãa la d na n tõoge. La bõe n tõe n sõng-d zĩ-kãng wɛɛngẽ? Yaa d sẽn na n teeg a Zeova.—Karm-y Filip rãmb 2:13.
14. Bõe n sõng a Poll t’a tõog n maan bũmb nins a sẽn da mi t’a segd n maaname wã?
14 A Poll ra miime tɩ tõog n maan bũmb d sẽn yãk yam n na n maan pa nana ye. Bala a yeela woto: “Mam dat n maana neere, la mam ka tar pãng tɩ maan ye.” A ra mi a sẽn dat n maane, wall a sẽn segd n maane. La wakat ninga a pa tõogd ye. A paasame: “Mam nonga Wẽnnaam tõog hal ne m sũur fãa. La mam yãta tõog a to mam yĩngã wilã pʋgẽ sẽn maood ne mam pʋ-tẽer tõogo, la sẽn kẽesd maam yel-wẽnã tõog yembd pʋgẽ sẽn be mam yĩngã wilã pʋsẽ.” La a yellã ra tara tɩɩm. Ad a sẽn yeele: “Bark Wẽnnaam tõnd Zu-soab a Zezi Kirist maasem yĩnga.” (Rom 7:18, 22-25) A yeela woto me: “Mam tõee fãa ne a soab ning sẽn kõt maam pãngã maasem.”—Fil. 4:13, MN.
15. Bõe yĩng tɩ d segd n yãk yam ne d sũur fãa n maand sẽn yaa tɩrga?
15 Sẽn na yɩl n ta a Zeova yam, yaa tɩlae tɩ d yãk yam ne d sũur fãa n maand sẽn yaa tɩrga. Tẽeg-y-yã a Eli goam nins a sẽn yeel Karmell tãngã zugã. A yeela neb nins sẽn da tũud a Baalã, la Israyɛll neb nins sẽn da bas Wẽnnaamã woto: “Yaa wakat a wãn la yãmb na n yeeb ne yam a yiibu? Sã n yaa Zu-soabã n yaa Wẽnnaam, bɩ y tũ bãmba, la sã n yaa Baal la Wẽnnaam, bɩ y tũ-a.” (1 Rĩm 18:21) Israyɛll nebã ra miime tɩ b segd n tũ a Zeova a ye bala. Baasgo, b ra ‘yeebda ne yam a yiibu,’ n dat n tũuda a Zeova ne a Baal me. A Zozue yẽ pa maan woto ye. A yeela Israyɛll nebã yaa: “Yãmb sã n ka rat n tũ Zu-soabã, bɩ y bao y sẽn na n tũ a soab rũndã . . . tɩ maam ne m yir dãmbã yẽ, tõnd na n tũu Zu-soabã.” (Zoz. 24:15) Bark bʋg la yẽ ne neb nins sẽn da be ne-a wã paam-yã? B paam n kẽe kãabg tẽngã pʋgẽ. Ra yaa tẽng sẽn “tar bĩisim ne sɩɩd wʋsgo.”—Zoz. 5:6.
Y SÃ N YÃKD YAM TƖ ZEMSDẼ, Y PAAMDA BARKA
16, 17. Togs-y kibar sẽn wilgd tɩ d sã n yãk yam tɩ zems ne Wẽnnaam daabã, wata ne barka.
16 Saam-biig n da reeg lisg paalem, tɩ yẽ ne a pagã ra tar kamb a tãabo. Daar a yembre, a tʋmd-n-taag n yeel-a t’a paama tʋʋmd sẽn yaood sõma zĩig a to, la t’a sã n dat bɩ a wa tɩ b tɩ tʋme. Saam-biigã tagsa yellã zugu, la a pʋʋs a Zeova n kos sor-wilgri. Bũmb ning sẽn da kɩt t’a yãk tʋʋmd ning a sẽn tʋmdã yaa tɩ baa yaoodã sẽn pa waoogã, sibr ne hat fãa ra pa tʋmde, t’a tõe n paam sẽk tɩ yẽ ne a zakã rãmb tũud taab n kẽnd tigissã la b moond koɛɛgã. A bãngame t’a sã n sak tʋʋmd ning a tʋmd-n-taagã sẽn datã, tõe tɩ ra na n kaoosame t’a yaool n paam n pa tʋmd sibr ne hat ye. Sã n da yaa yãmba, y maanda wãna?
17 A yãame t’a sã n sak tʋʋmd ning sẽn yaood wʋsgã, a pa na n le tõog n tũ a Zeova wa a sẽn datã ye. Rẽ n so t’a pa toeem tʋʋmd ye. Yãmb tagsdame t’a wa n maanda a bãngẽ bɩ? Ayo. A pa tags ligd ning a sẽn da na n paamã yell bal ye. Sẽn da pak-a yaa yẽ ne a zakã rãmb sẽn na n kell n tall zood sõma ne a Zeova. Sɩd me, saam-biigã ne a pagã sũur wa n yɩɩ noogo. Bala, daar a yembre, b bi-pugl sẽn tar yʋʋm piig n yeel-b t’a nonga bãmb ne tigingã nebã, la t’a nonga a Zeova wʋsgo. A paasame t’a rat n dɩka a meng n kõ a Zeova n deeg lisgu. Yaa vẽeneg tɩ saam-biigã sẽn yãk yam n lʋɩɩs a Zeova raabã taoorã nafa a bi-puglã.
18. Bõe yĩng tɩ d segd n modg tɩ d yam-yãkr fãa yɩ sõma?
18 Wala a Moiiz sẽn lʋɩ Israyɛll nebã taoor we-raoogẽ wã, na maan yʋʋma, a Zezi Kirist me lʋɩta Wẽnnaam nin-buiidã taoor n wilgd-b sor dũni-kãngã sẽn yaa wẽngã pʋgẽ. La wala a Zozue sẽn tall Israyɛll nebã n kẽ kãabg tẽngẽ wã, ka la bilfu, a Zezi na n sãama dũni-kãngã, la a kẽes kiris-nebã dũni-paalg pʋgẽ tɩrlem sẽn na n zĩndi. (2 Pɩɛ. 3:13) Woto yĩnga, bɩ d ra lebs n dɩk nin-kʋdgã ne a tagsa wã, a manesmã, la a magb toor-toorã ye. D modg n bãngd Wẽnnaam sẽn dat tɩ d vɩɩmd to-to wã n paasdẽ. (Rom 12:2; 2 Kor. 13:5) Bɩ d ned kam fãa modg t’a yam-yãkr fãa yɩ sõma, n paamd a Zeova barkã wakat fãa.—Karm-y Hebre dãmb 10:38, 39.
[Tẽngr note]
^ sull 7 Kẽer me maanda woto sẽn na yɩl tɩ biigã yaab-rãmb tõog n wilgd b zo-rãmbã la b roagdbã tɩ b tara yagenga.
[Zãmsgã sogsgã]
[Foto seb-neng 22]
[Foto seb-neng 24]
D sã n minim n yãkd yam bũmb nins yõod sẽn pa waoogã wɛɛngẽ tɩ zemsdẽ, wãn to la na n naf-do? (Ges-y sull 11)
[Foto seb-neng 26]
D sã n yãkd yam tɩ zemsdẽ, d paamda sũ-noog Wẽnnaam nin-buiidã sʋka (Ges-y sull 18)
