1, 2. (a) Bo ta gusta tuma desishon? (b) Bo ta kontentu ku tur e desishonnan ku bo a yega di tuma?

DESISHON i mas desishon! Sí, tur dia, nos tin ku tuma hopi desishon. Abo ta gusta tuma desishon? Tin hende ku semper ta kla pa tuma tur desishon riba nan mes; segun nan, esei ta nan derecho i nan no ta gusta e idea di ku otronan tin ku tuma desishon pa nan. Pero di otro banda, tin hende ku tin miedu di tuma desishon importante. Tin ta konsultá buki- òf konseheronan i kisas ta asta gasta hopi plaka pa haña e konseho ku, segun nan, nan tin mester.

² Hopi di nos ta mas o ménos entre e dos ekstremonan ei: Nos ta konsiente ku tin sierto desishonnan ku nos no tin derecho di tuma, pero nos ta kontentu tambe ku den hopi área di nos bida tin desishonnan ku nos por tuma di akuerdo ku nos gustu personal. (Gal. 6:5) Ma probablemente nos ta atmití ku no ta tur desishon ku nos tuma ta sabí òf benefisioso.

3. Ki instrukshonnan nos tin pa yuda nos tuma bon desishon, pero dikon tin ora ta difísil pa tuma bon desishon?

³ Komo sirbidó di Yehova, nos ta kontentu ku Yehova a duna nos instrukshonnan kla tokante hopi asuntu importante den bida. Nos sa ku si nos sigui e instrukshonnan ei, nos por tuma desishon ku ta agrad’é i ku ta benefisiá nos. Sinembargo, nos por haña nos konfrontá ku problema- òf situashonnan ku e Palabra di Dios no ta trata spesífikamente. Kon nos por sa ki desishon nos tin ku tuma den un kaso asina? Tuma por ehèmpel hòrtamentu. Nos sa ku nos no mag hòrta. (Efe. 4:28) Pero ki ora nos por papia di hòrtamentu? Esaki ta dependé di e balor di loke un hende a kohe, e motivashon tras di e akto òf di algu otro? Kon nos por sa ki desishon pa tuma ora ta trata di asuntunan ku, segun algun hende, no tin instrukshon spesífiko tokante dje? Unda nos por haña yudansa?

4. Ki konseho nos sa haña ora nos tin ku tuma un desishon?

⁴ Si nos papia ku un ruman den fe tokante un desishon importante ku nos tin ku tuma, kisas e ta konsehá nos pa usa nos sano huisio. I esei sigur ta un bon konseho. Beibel tambe ta spièrtá nos pa no kore tuma desishon. E ta bisa: “Tur esnan ku tin purá, siguramente ta resultá den pobresa.” (Pro. 21:5) Pero kiko ke men usa nos sano huisio? Esei ta enserá simplemente ku nos tin ku tuma tempu pa pensa bon riba e asuntu, ser rasonabel i purba di komprondé tur detaye promé ku nos tuma desishon? En bèrdat tur e faktornan akí ta importante pa nos por tuma bon desishon, pero si nos ke usa nos sano huisio nos tin ku hasi mas ku esei.—Rom. 12:3; 1 Ped. 4:7.

5. Dikon nos no tin e kapasidat di desplegá sano huisio na un manera perfekto?

⁵ Nos tin ku atmití ku ningun di nos no a nase ku e kapasidat pa desplegá sano huisio na un manera perfekto. Dikon nò? Komo ku nos tur a nase den piká i ta imperfekto, nos niun no tin salú ni un mente perfekto. (Sal. 51:5; Rom. 3:23) Ademas, tabatin un tempu ku hopi di nos no tabata konosé Yehova ni su normanan hustu pasobra Satanas a “siega” nos mente. (2 Kor. 4:4; Tito 3:3) Pues, si nos ta basa nos desishonnan únikamente riba loke nos ta pensa ta bon i rasonabel, nos por tuma mal desishon maske kon profundo nos a pensa riba un asuntu.—Pro. 14:12.

6. Kon nos por desaroyá e kapasidat di desplegá sano huisio?

⁶ Sí, nos tur ta imperfekto, pero Yehova, nos Tata selestial, ta perfekto den tur sentido. (Deu. 32:4) Nos ta kontentu ku el a proveé tur loke nos tin mester pa nos por kambia nos manera di pensa i desaroyá e kapasidat di desplegá sano huisio. (Lesa 2 Timoteo 1:7.) Komo kristian, nos mester pensa, rasoná i aktua na un manera sabí. Pa logra esei, nos mester siña kontrolá nos pensamentu- i sintimentunan i imitá Yehova su manera di pensa i di aktua.

7, 8. Konta un eksperensia ku ta mustra kon un persona por tuma bon desishon apesar di preshon òf situashon difísil.

⁷ Laga nos trata un ehèmpel ku ta mustra kon un persona por tuma desishon sabí. Ta asina ku sierto imigrantenan tin e kustumber di manda nan yunan resien nasí na nan pais natal pa nan famianan einan kuida. Asina nan por sigui traha i gana plaka. * Awor, tabatin un señora ku a duna lus na un yu hòmber masha lif durante e tempu ku el a kuminsá studia Beibel i tabata progresá bon den e bèrdat. Su amigu- i famianan a kuminsá preshoná é i su kasá pa nan manda e yu pa e mayornan di e esposo. Pero e esposa su estudio di Beibel a yud’é komprondé ku Yehova a duna é i su kasá e responsabilidat di kria nan yu. (Sal. 127:3; Efe. 6:4) Kiko e mester a hasi? E mester a sigui e kustumber ei djis pasobra hopi hende tabata pensa ku esei ta e mihó kos pa hasi? Òf e mester a hasi loke Beibel ta bisa i kisas bai atras finansieramente i soportá krítika di algun hende? Kiko abo lo a hasi si bo tabata den su situashon?

⁸ Komo ku e señora hóben akí a hañ’é ku hopi preshon i strès, el a deshogá su mes serka Yehova i pidié yudansa. I ora el a papia tokante su situashon ku e ruman ku tabata studia kuné i ku otro rumannan den kongregashon, el a kuminsá komprondé Yehova su punto di bista tokante e asuntu. El a komprondé tambe ku yunan por ser perhudiká emoshonalmente si separá nan for di nan mayornan durante nan infansia. Anto despues di a analisá e  asuntu a base di e Skritura, e señora a yega na e konklushon ku no ta korekto pa manda su bebi pa su suegronan. I ora su esposo a mira kon dispuesto e rumannan den kongregashon tabata pa yuda nan i kon felis i salú nan yu ta, el a aseptá un estudio di Beibel i a kuminsá asistí na e reunionnan huntu ku su kasá.

9, 10. Kiko ke men desplegá sano huisio, i kon nos por hasi esei?

⁹ Esei tabata djis un ehèmpel, pero e ta mustra ku desplegá sano huisio ta enserá mas ku djis hasi loke nos òf otronan ta pensa ku ta rasonabel òf ku ta kumbiní nos mas. Nos por kompará nos mente i kurason imperfekto ku un oloshi ku ta kana muchu lihé òf muchu slo. Si nos bai tras di un oloshi asina, nos por haña nos ku problema serio. (Yer. 17:9) P’esei, pa evitá esaki, nos mester inkulká Dios su normanan konfiabel den nos mente i kurason.—Lesa Isaías 55:8, 9.

¹⁰ Ta ku bon motibu Beibel ta konsehá nos: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” (Pro. 3:5, 6) Ripará ku despues ku e teksto ta bisa pa “no dependé riba bo mes komprondementu,” e ta bisa pa ‘rekonosé Yehova.’ Yehova ta e Persona ku por desplegá sano huisio na e manera perfekto. Esei ta nifiká ku ki ora ku nos tin ku tuma un desishon, nos mester akudí na Beibel pa wak kiko ta Dios su punto di bista tokante e asuntu i tuma un desishon na armonia ku esei. Pues, usa òf desplegá sano huisio ke men imitá Yehova su manera di pensa.

11. Kiko un persona mester hasi pa e por tuma desishon sabí?

¹¹ No ta fásil pa un hende siña tuma bon desishon i aktua na armonia ku esakinan. Esaki por ta difísil spesialmente pa esnan ku a kaba di batisá òf ku a kuminsá progresá pa madurá spiritualmente. No opstante, e personanan akí, ku segun Beibel ta mucha chikitu den sentido spiritual, por hasi berdadero progreso. Pues, nan situashon ta manera esun di un mucha ku ta siña kana: Pa e no kai, e tin ku dal stapnan chikitu. Un persona ku ta mucha den  sentido spiritual ta siña tuma desishonnan sabí na un manera similar. Kòrda ku apòstel Pablo a deskribí personanan madurá komo personanan ‘ku ta usa nan kapasidat di komprondé i asina entrená esaki pa distinguí loke ta bon for di loke ta malu.’ E palabranan “usa” i “entrená” ta duna e idea di hasi esfuerso kontinuo, i esei ta loke personanan resien den e bèrdat mester hasi.—Lesa Hebreonan 5:13, 14.

12. Kon nos por siña tuma desishon sabí?

¹² Manera nos a bisa na komienso di e artíkulo, tur dia nos tin ku tuma hopi desishon, sea ta desishonnan importante òf di ménos importansia. Segun un estudio, mas ku 40 porshento di loke nos ta hasi ta debí na nos kustumbernan i no ta basá riba desishonnan ku nos a tuma tempu pa pensa riba dje. Tuma por ehèmpel skohementu di paña. Kisas, tur mainta bo mester disidí kiko pa bisti. Podisé, pa bo, esei ta un kos chikitu. I bo no ta tuma hopi tempu pa disidí kiko pa bisti, spesialmente ora bo tin purá. Pero ta importante pa bo puntra bo mes si loke bo ta bai bisti ta pas pa un sirbidó di Yehova. (2 Kor. 6:3, 4) Ora bo ta kumpra paña, kisas bo ta enfoká riba estilo òf loke ta na moda. Pero bo ta para ketu i pensa si e paña ta modesto òf si bo tin sufisiente plaka pa kumpr’é? Ora nos ta tuma bon desishon den asuntunan chikitu manera esaki, nos ta entrená nos kapasidat di komprondé. I esaki na su turno lo yuda nos tuma desishonnan sabí ora ta trata di asuntunan muchu mas importante.—Luk. 16:10; 1 Kor. 10:31.

13. Kiko por yuda nos kumpli ku e desishonnan ku nos ta tuma?

¹³ Nos tur sa ku tuma un desishon korekto ta un kos i ku kumpli ku e desishon ei ta kompletamente otro kos. Por ehèmpel, algun hende ta disidí ku nan ta stòp di huma, pero nan ta frakasá pasobra nan no tin un bon motivashon. Pa un hende por kumpli ku loke el a disidí, e mester ta determiná. Algun hende ta kompará nos determinashon pa hasi algu ku múskulo. Mas nos usa òf train un múskulo, mas fuerte e ta bira. Pero si nos no ta us’é regularmente, e ta bira suak. Awor, kiko por yuda nos fortalesé nos determinashon pa pega na un desishon ku nos a tuma i kumpli kuné? Nos tin ku buska Yehova su yudansa.—Lesa Filipensenan 2:13.

14. Unda Pablo a haña forsa pa hasi loke e mester a hasi?

¹⁴ Di eksperensia, Pablo tabata sa ku no ta tur ora ta fásil pa hasi loke ta bon. Na un okashon el a lamentá: “Mi tin e deseo, ma no e kapasidat di hasi loke ta bon.” Pues, Pablo tabata sa kiko e ke òf mester a hasi, pero tin biaha tabatin algu ku a strob’é di hasi esei. El a konfesá: “Realmente, mi tin plaser den e lei di Dios segun e hende ku mi ta di paden, pero mi ta mira den mi kurpa un otro lei ku ta bringa kontra e lei di mi mente. I e lei di piká akí tin mi prezu.” Akaso Pablo tabata den un situashon sin salida? Di ningun manera. El a bisa: ‘Mi ta gradisí Dios pa medio di Hesukristu, nos Señor!’ (Rom. 7:18, 22-25) Na un otro okashon el a skirbi: “Pa tur kos mi tin forsa pa medio di esun ku ta duna mi poder.”—Flp. 4:13.

15. Dikon nos mester ta desididu pa hasi loke ta korekto i aktua konforme nos desishon?

¹⁵ Ta bisto anto ku pa nos agradá Dios, nos mester ta desididu pa hasi loke ta korekto i aktua konforme nos desishon. Kòrda loke Elías a bisa e adoradónan di Baal i e israelitanan apóstata na Seru Karmelo: “Kuantu tempu mas boso ta keda duda entre dos opinion? Si [“Yehova,” NW] ta Dios, siguié; ma si ta Baal, siguié.” (1 Rei. 18:21) E yunan di Israel tabata sa kiko nan mester a hasi, pero nan tabata indesiso i tabata “duda entre dos opinion.”  Kontrali na e israelitanan akí, Hosue a pone un ekselente ehèmpel añanan mas promé. El a bisa e israelitanan: “Si ta desagradabel den boso bista pa sirbi [“Yehova,” NW], skohe pa boso mes awe kende boso lo sirbi . . . Ma pa loke ta ami i mi kas, nos lo sirbi [Yehova].” (Hos. 24:15) Kon Yehova a bendishoná Hosue pa su determinashon? Hosue i esnan ku tabata kuné por a drenta e Tera Primintí, ‘un tera ku lechi i miel na abundansia.’—Hos. 5:6.

16, 17. Duna un ehèmpel ku ta mustra ki bendishon nos por risibí ora nos ta tuma desishon na armonia ku Dios su boluntat.

¹⁶ Awor, pensa riba e siguiente situashon. Ta trata di un ruman hòmber resien batisá ku ta kasá i tin tres yu chikitu. Un dia, un di su koleganan a bini ku e idea pa nan bai traha na un otro kompania ku ta paga mihó i ku ta ofresé mihó kondishon di trabou. Nos ruman a pensa riba e asuntu i a hinka esaki den orashon. Ta bèrdat ku e pago na su trabou aktual no ta mashá, pero el a aseptá e trabou akí pa e por tin su wikèntnan liber pa e por bai su reunionnan i sirbishi huntu ku su famia. El a realisá ku si e tuma e trabou nobo probablemente pa hopi tempu lo e no ta liber durante wikènt. Kiko abo lo a hasi?

¹⁷ Despues di a pensa riba e benefisionan spiritual ku lo el a pèrdè si e aseptá e trabou ku e salario mas haltu, nos ruman a disidí di legumai e otro trabou. Akaso el a lamentá despues ku el a tuma e desishon ei? Apsolutamente. E tabata sa ku bendishon spiritual lo a benefisiá é ku su famia muchu mas ku un mihó salario. E ku su kasá a keda masha kontentu ora nan yu muhé mayó di dies aña a bisa nan ku e ta stima nan i e rumannan i Yehova masha tantu mes. El a bisa tambe ku e ke dediká su bida na Yehova i batisá. Sin duda, e echo ku e tata a pone adorashon na Yehova na promé lugá den su bida a sirbi komo un bon ehèmpel pa e yu muhé.

18. Dikon ta importante pa tur dia nos tuma desishon sabí?

¹⁸ Pa hopi dékada kaba, Hesukristu, e Moises Mayor, ta yudando adoradónan di Yehova pasa dor di e desierto di e mundu di Satanas. Komo Hosue Mayor, Hesus ta kla pa pone un fin na e mundu korupto akí i pa guia su siguidónan na e mundu nobo primintí kaminda hustisia lo reina. (2 Ped. 3:13) P’esei, awor no ta tempu pa bolbe kuminsá pensa manera ántes ni pa bai bèk na nos kustumbernan, normanan i deseonan di ántes. Al kontrali, ta tempu pa sigui hasi esfuerso pa komprondé mihó kiko ta Dios su boluntat. (Rom. 12:2; 2 Kor. 13:5) Laga e desishonnan ku bo ta tuma i e eskohonan ku bo ta hasi tur dia demostrá ku bo ta e tipo di hende ku meresé e bendishon eterno di Dios.—Lesa Hebreonan 10:38, 39.