1, 2. (a) Bo ta gusta tuma decision? (b) Bo ta contento cu tur e decisionnan cu bo a yega di tuma?

 DECISION y mas decision! Si, tur dia, nos tin cu tuma hopi decision. Abo ta gusta tuma decision? Tin hende cu semper ta cla pa tuma tur decision riba nan mes; segun nan, esey ta nan derecho y nan no ta gusta e idea cu otronan tin cu tuma decision pa nan. Pero di otro banda, tin hende cu tin miedo di tuma decision importante. Tin ta consulta buki- of conseheronan y kisas ta hasta gasta hopi placa pa haya e conseho cu, segun nan, nan tin mester.

² Hopi di nos ta mas o menos entre e dos extremonan ey: Nos ta consciente cu tin cierto decisionnan cu nos no tin derecho di tuma, pero nos ta contento tambe cu den hopi area di nos bida tin decisionnan cu nos por tuma di acuerdo cu nos gusto personal. (Gal. 6:5) Pero, probablemente nos ta admiti cu no ta tur decision cu nos tuma ta sabi of beneficioso.

3. Ki instruccionnan nos tin pa yuda nos tuma bon decision, pero dicon tin ora ta dificil pa tuma bon decision?

³ Como sirbidor di Jehova, nos ta contento cu Jehova a duna nos instruccionnan cla tocante hopi asunto importante den bida. Nos sa cu si nos sigui e instruccionnan ey, nos por tuma decision cu ta agrad’e y cu ta beneficia nos. Sinembargo, nos por haya nos confronta cu problema- of situacionnan cu e Palabra di Dios no ta trata specificamente. Con nos por sa ki decision nos tin cu tuma den un caso asina? Tuma por ehempel hortamento. Nos sa cu nos no mag di horta. (Efe. 4:28) Pero ki ora nos por papia di hortamento? Esaki ta depende di e balor di loke un hende a coy, e motivacion tras di e acto of e ta depende di algo otro? Con nos por sa ki decision pa tuma ora ta trata di asuntonan cu, segun algun hende, no tin instruccion specifico tocante dje? Unda nos por haya yudansa?

4. Ki conseho nos sa haya ora nos tin cu tuma un decision?

⁴ Si nos papia cu un ruman den fe tocante un decision importante cu nos tin cu tuma, kisas e ta conseha nos pa uza nos sano huicio. Y esey sigur ta un bon conseho. Bijbel tambe ta spierta nos pa no core tuma decision. E ta bisa: “Tur esnan cu tin pura, siguramente ta resulta den pobreza.” (Prov. 21:5) Pero kico kiermen uza nos sano huicio? Esey ta encera simplemente cu nos tin cu tuma tempo pa pensa bon riba e asunto, ser rasonabel y purba di compronde tur detaye prome cu nos tuma decision? En berdad tur e factornan aki ta importante pa nos por tuma bon decision, pero si nos kier uza nos sano huicio nos tin cu haci mas cu esey.—Rom. 12:3; 1 Ped. 4:7.

5. Dicon nos no tin e capacidad di desplega sano huicio na un manera perfecto?

⁵ Nos tin cu admiti cu ningun di nos no a nace cu e capacidad pa desplega sano huicio na un manera perfecto. Dicon no? Como cu nos tur a nace den pica y ta imperfecto, nos niun no tin salud ni un mente perfecto. (Sal. 51:5; Rom. 3:23) Ademas, tabatin un tempo cu hopi di nos no tabata conoce Jehova ni su normanan husto pasobra Satanas a “ciega” nos mente. (2 Cor. 4:4; Tito 3:3) Pues, si nos ta basa nos decisionnan unicamente riba loke nos ta pensa ta bon y rasonabel, nos por tuma mal decision maske con profundo nos a pensa riba un asunto.—Prov. 14:12.

6. Con nos por desaroya e capacidad di desplega sano huicio?

⁶ Si, nos tur ta imperfecto, pero Jehova, nos Tata celestial, ta perfecto den tur sentido. (Deu. 32:4) Nos ta contento cu el a provee tur loke nos tin mester pa nos por cambia nos manera di pensa y desaroya e capacidad di desplega sano huicio. (Lesa 2 Timoteo 1:7.) Como cristian, nos mester pensa, rasona y actua na un manera sabi. Pa logra esey, nos mester siña controla nos pensamento- y sintimentonan y imita Jehova su manera di pensa y di actua.

7, 8. Conta un experencia cu ta mustra con un persona por tuma bon decision a pesar di presion of situacion dificil.

⁷ Laga nos trata un ehempel cu ta mustra con un persona por tuma decision sabi. Ta asina cu cierto inmigrantenan tin e custumber di manda nan yiunan recien naci na nan pais natal pa nan famianan eynan cuida. Asina nan por sigui traha y gana placa. * Awor, tabatin un señora cu a duna luz na un yiu homber masha cute mes durante e tempo cu el a cuminsa studia Bijbel y tabata progresa bon den e berdad. Su amigo- y famianan a cuminsa presiona e cu su esposo pa nan manda e yiu pa e mayornan di e esposo. Pero e esposa su estudio di Bijbel a yud’e compronde cu Jehova a duna e cu su casa e responsabilidad di cria nan yiu. (Sal. 127:3; Efe. 6:4) Kico e mester a haci? E mester a sigui e custumber ey djis pasobra hopi hende tabata pensa cu esey ta e mihor cos pa haci? Of e mester a haci loke Bijbel ta bisa y kisas bay atras financieramente y soporta critica di algun hende? Kico abo lo a haci si bo tabata den su situacion?

⁸ Como cu e señora hoben aki a hay’e cu hopi presion y stress, el a desahoga su mes cerca Jehova y pidie yudansa. Y ora el a papia tocante su situacion cu e ruman cu tabata studia cu ne y cu otro rumannan den congregacion, el a cuminsa compronde Jehova su punto di bista tocante e asunto. El a compronde tambe cu yiunan por ser perhudica emocionalmente si separa nan for di nan mayornan durante nan infancia. Anto despues di a analisa e asunto  a base di e Scritura, e señora a yega na e conclusion cu no ta corecto pa manda su baby pa su suegronan. Y ora su esposo a mira con dispuesto e rumannan den congregacion tabata pa yuda nan y con feliz y saludabel nan yiu ta, el a acepta un estudio di Bijbel y a cuminsa asisti na e reunionnan hunto cu su esposa.

9, 10. Kico kiermen desplega sano huicio, y con nos por haci esey?

⁹ Esey tabata djis un ehempel, pero e ta mustra cu desplega sano huicio ta encera mas cu djis haci loke nos of otronan ta pensa cu ta rasonabel of cu ta cumbini nos mas. Nos por compara nos mente y curason imperfecto cu un holoshi cu ta cana mucho lihe of mucho slow. Si nos bay tras di un holoshi asina, nos por haya nos cu problema serio. (Jer. 17:9) Pesey, pa evita esaki, nos mester inculca Dios su normanan confiabel den nos mente y curason.—Lesa Isaias 55:8, 9.

¹⁰ Ta cu bon motibo Bijbel ta conseha nos: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” (Prov. 3:5, 6) Ripara cu despues cu e texto ta bisa pa “no depende riba bo mes comprondemento”, e ta bisa pa ‘reconoce Jehova.’ Jehova ta e Persona cu por desplega sano huicio na e manera perfecto. Esey ta nifica cu ki ora cu nos tin cu tuma un decision, nos mester acudi na Bijbel pa wak kico ta Dios su punto di bista tocante e asunto y tuma un decision na harmonia cu esey. Pues, uza of desplega sano huicio kiermen imita Jehova su manera di pensa.

11. Kico un persona mester haci pa e por tuma decision sabi?

¹¹ No ta facil pa un hende siña tuma bon decision y actua na harmonia cu esakinan. Esaki por ta dificil specialmente pa esnan cu a caba di batisa of cu a cuminsa progresa pa madura spiritualmente. No obstante, e personanan aki, cu segun Bijbel ta mucha chikito den sentido spiritual, por haci berdadero progreso. Pues, nan situacion ta manera esun di un mucha cu ta siña cana: Pa e no cay, e tin cu dal stapnan chikito. Un persona cu ta mucha den  sentido spiritual ta siña tuma decisionnan sabi na un manera similar. Corda cu apostel Pablo a describi personanan madura como personanan ‘cu ta uza nan capacidad di compronde y asina entrena esaki pa distingui loke ta bon for di loke ta malo.’ E palabranan “uza” y “entrena” ta duna e idea di haci esfuerso continuo, y esey ta loke personanan cu recientemente a bin den e berdad mester haci.—Lesa Hebreonan 5:13, 14.

12. Con nos por siña tuma decision sabi?

¹² Manera nos a bisa na comienso di e articulo, tur dia nos tin cu tuma hopi decision, sea ta decisionnan importante of di menos importancia. Segun un estudio, mas cu 40 porciento di loke nos ta haci ta debi na nos custumbernan y no ta basa riba decisionnan cu nos a tuma tempo pa pensa riba dje. Tuma por ehempel scogemento di paña. Kisas, tur mainta bo mester dicidi kico pa bisti. Podise, pa bo, esey ta un cos chikito. Y bo no ta tuma hopi tempo pa dicidi kico pa bisti, specialmente ora bo tin pura. Pero ta importante pa bo puntra bo mes si loke bo ta bay bisti ta pas pa un sirbidor di Jehova. (2 Cor. 6:3, 4) Ora bo ta cumpra paña, kisas bo ta enfoca riba estilo of loke ta na moda. Pero bo ta para keto y pensa si e paña ta modesto of si bo tin suficiente placa pa cumpr’e? Ora nos ta tuma bon decision den asuntonan chikito manera esaki, nos ta entrena nos capacidad di compronde. Y esaki na su turno lo yuda nos tuma decisionnan sabi ora ta trata di asuntonan mucho mas importante.—Luc. 16:10; 1 Cor. 10:31.

13. Kico por yuda nos cumpli cu e decisionnan cu nos ta tuma?

¹³ Nos tur sa cu tuma un decision corecto ta un cos y cu cumpli cu e decision ey ta completamente un otro cos. Por ehempel, algun hende ta dicidi cu nan ta stop di huma, pero nan ta fracasa pasobra nan no tin un bon motivacion. Pa un hende por cumpli cu loke el a dicidi, e mester ta determina. Algun hende ta compara nos determinacion pa haci algo cu musculo. Mas nos uza of train un musculo, mas fuerte e ta bira. Pero si nos no ta uz’e regularmente, e ta bira zwak. Awor, kico por yuda nos fortalece nos determinacion pa pega na un decision cu nos a tuma y cumpli cu ne? Nos tin cu busca Jehova su yudansa.—Lesa Filipensenan 2:13.

14. Unda Pablo a haya forsa pa haci loke e mester a haci?

¹⁴ Di experencia Pablo tabata sa cu no ta tur ora ta facil pa haci loke ta bon. Na un ocasion el a lamenta: “Mi tin e deseo, ma no e capacidad di haci loke ta bon.” Pues, Pablo tabata sa kico e kier of mester a haci, pero tin biaha tabatin algo cu a strob’e di haci esey. El a confesa: “Realmente, mi tin placer den e ley di Dios segun e hende cu mi ta di paden, pero mi ta mira den mi curpa un otro ley cu ta bringa contra e ley di mi mente. Y e ley di pica aki tin mi preso.” Acaso Pablo tabata den un situacion sin salida? Di ningun manera. El a bisa: ‘Mi ta gradici Dios pa medio di Hesucristo, nos Señor!’ (Rom. 7:18, 22-25) Na un otro ocasion el a skirbi: “Pa tur cos mi tin forsa pa medio di esun cu ta duna mi poder.”—Flp. 4:13.

15. Dicon nos mester ta dicidido pa haci loke ta corecto y actua conforme nos decision?

¹⁵ Ta bisto anto cu pa nos agrada Dios, nos mester ta dicidido pa haci loke ta corecto y actua conforme nos decision. Corda loke Elias a bisa e adoradornan di Baal y e Israelitanan apostata na Sero Carmelo: ‘Cuanto tempo mas boso ta keda duda entre dos opinion? Si Jehova ta Dios, siguie; ma si ta Baal, siguie.’ (1 Rey. 18:21) E yiunan di Israel tabata sa kico nan mester a haci, pero nan tabata indeciso y tabata  “duda entre dos opinion.” Contrario na e Israelitanan aki, Josue a pone un excelente ehempel añanan mas prome. El a bisa e Israelitanan: “Si ta desagradabel den boso bista pa sirbi [“Jehova”, NW], scoge pa boso mes awe kende boso lo sirbi ... Ma pa loke ta ami y mi cas, nos lo sirbi [Jehova].” (Jos. 24:15) Con Jehova a bendiciona Josue pa su determinacion? Josue y esnan cu tabata cu ne por a drenta e Tera Priminti, ‘un tera cu lechi y miel na abundancia.’—Jos. 5:6.

16, 17. Duna un ehempel cu ta mustra ki bendicion nos por ricibi ora nos ta tuma decision na harmonia cu Dios su boluntad.

¹⁶ Awor, pensa riba e siguiente situacion. Ta trata di un ruman homber recien batisa cu ta casa y tin tres yiu chikito. Un dia, un di su coleganan a bin cu e idea pa nan bay traha na un otro compania cu ta paga mihor y cu ta ofrece mihor condicion di trabou. Nos ruman a pensa riba e asunto y a hinca esaki den oracion. Ta berdad cu su trabou actual no ta paga dje bon ey, pero el a acepta e trabou aki pa e por tin su weekendnan liber pa e por bay su reunionnan y sirbishi hunto cu su famia. El a realisa cu si e tuma e trabou nobo probablemente pa hopi tempo lo e no ta liber durante weekend. Kico abo lo a haci?

¹⁷ Despues di a pensa riba e beneficionan spiritual cu lo e perde si e acepta e trabou cu e salario mas halto, nos ruman a dicidi di no tuma e otro trabou. Acaso el a lamenta despues cu el a tuma e decision ey? Absolutamente. E tabata sa cu bendicion spiritual lo a beneficia e cu su famia mucho mas cu un mihor salario. E cu su esposa a keda masha contento ora nan yiu muher mayo di dies aña a bisa nan cu e ta stima nan y e rumannan y Jehova masha hopi mes. El a bisa tambe cu e kier dedica su bida na Jehova y batisa. Sin duda, e echo cu e tata a pone adoracion na Jehova na prome luga den su bida a sirbi como un bon ehempel pa e yiu muher.

18. Dicon ta importante pa tur dia nos tuma decision sabi?

¹⁸ Pa hopi decada caba, Hesucristo, e Moises Mayor, ta yudando adoradornan di Jehova pasa door di e desierto di e mundo di Satanas. Como Josue Mayor, Hesus ta cla pa pone un fin na e mundo corupto aki y pa guia su siguidornan na e mundo nobo priminti caminda husticia lo reina. (2 Ped. 3:13) Pesey, awor no ta tempo pa bolbe cuminsa pensa manera antes ni pa bay bek na nos custumbernan, normanan y deseonan di antes. Al contrario, ta tempo pa sigui haci esfuerso pa compronde mihor kico ta Dios su boluntad. (Rom. 12:2; 2 Cor. 13:5) Laga e decisionnan cu bo ta tuma y e escogencianan cu bo ta haci tur dia demostra cu bo ta e tipo di hende cu merece e bendicion eterno di Dios.—Lesa Hebreonan 10:38, 39.