1, 2. a) ¿Tucuicunachu decidinata gushtan? b) Quiquinba decisiongunapi pensarishpaca ¿imatata nipanguiman?

TUCUICUNALLATAMI cada punlla ashtaca decisiongunata japina canchi. Huaquingunaca paicunallata decidinatami gushtan. Chaimandami pipash paicunamanda decidijpica culiranlla. Cutin shujcunaca paicunallata decidinataca manllanmi. Huaquingunacarin ashtaca culquita pagashpami librocunata randin o consejero nishcacunapaman rin imata decidinata nishpa ayudachun.

² Huaquinbica na decidina cashpapash decidinami tucunchi. Ñucanchi causaipipash ashtaca decisiongunatami ruranchi (Gál. 6:​5). Shinapash huaquinbica na tucui decisiongunachu ali cashca.

3. a) ¿Imamandata ali decisiongunata agllai ushanchi? b) Ali decisiongunata agllanaca ¿imamandata huaquinbica shinlli can?

³ Ñucanchi causaipi imata rurana cashcata Jehová Dios yachachishcamandami testigo de Jehovacunaca ali decisiongunata rurai ushanchi. Jehová Diospa consejocunata cazushpaca ñucanchillatami ali causashun, Jehovapa shungutapash cushichishun. Shinapash, Jehová Diosca na tucui cosascunapichu cashnami, chashnami rurana cangui nishpa mandajun. Chaimandami ali decisionda agllanaca shinlli can. Shinaca alita ruranata agllangapaca ¿imatata rurana canchi? Shuj ejemplota ricupashun. Bibliapica ninmi, na shuanachu canguichi nishpa (Efes. 4:28). Shinapash huaquingunaca ninmi, ashagutalla o barato cosascunatalla shuanaca na imapash canllu nishpa. Chashna pensajujpica ¿imata ali decisionda agllachun ayudanga? Huaquin ayudacunata ricupashun.

4. Shuj decisiondami agllangapaj munajuni nijpica ¿ima consejotata shuj huauquica cunman?

⁴ Shuj decisionda agllagrijushpa congregacionbi shuj huauquita ayudahuai nijpica, chai huauquica aliguta pensarishpami decidina cangui ningachari. Chai consejota catinaca alimi can. Bibliapica ninmi: ‘Yapata musparishpa, imatapash ruraj runacunaca imagupash illajmi tucunga’ nishpa (Prov. 21:​5). Shinapash aliguta pensarina nishpaca na ashtaca tiempota pensarinamanda, o ima ali cajta, ima nali cajta pensarinamandallachu parlajun (Rom. 12:3; 1 Ped. 4:​7).

5. ¿Imamandata na siempre aliguta pensarishpa decidita ushapanchi?

⁵ Juchayucuna caimandaca pipash na nita ushanchichu, ñucaca siempremi aliguta pensarishpa decidini nishpa (Sal. 51:5; Rom. 3:23). Ashtahuanbash, ñucanchi pensamientocunata Diablo amsayachijpimi Taita Diosta na rijsishpa, Taita Dios imata mandajtaca na yachashpa causarcanchi (2 Cor. 4:4; Tito 3:​3). Chaimandami ñucapica alimi can nishpa imapash decisionda rurashpaca ñucanchillata pandarijunchiman (Prov. 14:12).

6. Aliguta pensarinata yachajuchunga ¿imata ayudanga?

⁶ Ñucanchicuna juchayucuna cajpipash Jehová Diosca jucha illaj, santomi can (Deut. 32:​4). Paimi ñucanchi pensamientocunata mushujyachichun, aliguta pensarinata yachajuchun ayudan (Efesios 4:​23, liingui). Jesusta catijcunaca tucuicunami aliguta pensarishpa imatapash rurangapaj munanchi. Aliguta pensarinata yachajungapaca, ñucanchi pensamientocunata huashaman saquishpami Jehová imata pensajushcata, imata sintishcata, imata rurashcata catina canchi.

7, 8. Llaquicunapi cashpapash ¿imashinata ali decisionda agllai ushapanchi? Shuj ejemplota nipai.

⁷ Shuj ejemplota ricupashun. Ashtaca gentecunaca shuj llactacunapi trabajangapami rin. Chai llactapi huahuata charishpaca, paicuna trabajangacaman abuelocuna huahuata viñachichun nishpami huahuataca paicunapa llactamanllata cachan. * Shuj huarmiguca shuj llactapi trabajangapaj rishpami shuj jari huahuaguta charirca. Shinapash chai punllacunapica chai huarmiguca ñami Bibliamanda yachajushpa progresajurca. Paipa familiacuna, rijsicunaca huahuataca abuelocuna viñachichun cachai nishpami chai huarmigutapash cusatapash cutin cutin ninajurca. Shinapash Bibliata yachajuimandami chai huarmiguca intindirca, Taita Dios munashca shinaca taitamamacuna huahuacunata viñachina cashcata (Sal. 127:3; Deu. 6:​5-7). Shinaca ¿shujcunapa nishcata uyashpa paicunapa costumbrecunata catircachu? ¿O gentecuna rimajpipash culqui faltana cajpipash Bibliapi nishcatachu catirca? Quiquinga ¿imatashi ruranguiman carca?

⁸ Chashna llaquipi cashpami chai joven huarmiguca Jehová Diosta ayudahuai nishpa tucui shunguhuan mañarca. Shinallata Bibliamanda paita yachachijujhuan, congregacionbi shuj huauquicunahuanbash parlashpami Jehová imata rurachun munashcata intindirca. Shinallata, huahuacuna taitamamamanda separado viñashpa sufrijta intindishpa, Bibliapi textocunata ricushpami huahuataca abuelocuna viñachichunga na cachashachu nirca. Congregacionbi  huauquipanicuna ayudajpi huahuagu cushilla, ali viñajujta ricushpaca chai huarmigupa cusapashmi Bibliata yachajui callarirca, tandanajuicunamanbash ri callarirca.

9, 10. a) Jehovapa yuyaita charingapaca ¿imatata rurana capanchi? b) ¿Imashinata Jehovapa pensamientocunata charishun?

⁹ Imashinami ricupanchi, aligutami pensarini nishpaca na ñucanchipilla o shujcunapi ali ricurishcatallachu rurana canchi. Ñucanchi pensamientocunapash shungupash juchayumi can. Imashinami shuj relojoca huaquinbica ñaupan o atrasarin shinallatami ñucanchi pensamientocunapash shungupash can. Ñucanchi pensamientocunapi o shungupi yapata confiashpaca pandarishunmi (Jer. 17:​9). Ama yapata confiarishpa pandaringapaca Jehová Diospa mandashcacunapimi confiana canchi (Isaías 55:​8, 9, liingui).

¹⁰ Bibliaca ninmi: “Mandaj Diostaca, cambaj tucui shunguhuan yariangui. Aligutapacha yarishpami purini yashpaca, ama jariyanguichu. Imata rurangapajpash, Diostara yaringui. Paimi, can purina ñangunapipash aliguta pushanga” nishpa (Prov. 3:​5, 6). Cai textopica ninmi, ‘ama aligutami purijuni yashpaca purijunguichu, Taita Diostarami yarina cangui’ nishpa. Jehová Diosllami imata ruragrijushpapash siempre aliguta pensarinata yachan. Shinaca, ima decisionda agllagrijushpapash Jehová imata pensajujta aliguta intindingapami Jehová Diosca imatashi nin nishpa Bibliapi ayudata mascana canchi.

11. Ali decisiongunata agllangapaca ¿imatata rurana capanchi?

¹¹ Aliguta pensarishpa decisiongunata agllanaca na facilchu can. Huaquingunaca chairalla bautizarishcacunami can o chairami progresai callarinajun. Shinapash, ashtacatami progresai ushan. Shuj uchilla huahuagupi pensaripashunchi. Imashinami shuj huahuaguca ashagu ashagu pasoi callarishpa jipamanga ali puri ushan, shinallatami espiritualmentepash can. Apóstol Pabloca nircami,  ña ali yachajushcacuna o espiritualmente shinllicunaca paicunallatami decidi ushan imami ali cajta imami nali cajta nishpa. Espiritualmente shinlli cangapaca tiempo, esfuerzomi minishtirin. Chaimandami mushujcunaca espiritualmente shinlli cangapaj tiempota esfuerzota minishtin (Hebreos 5:​13, 14, liingui).

12. Ali decisiongunata agllachunga ¿imata ayudanga? Shuj ejemplota nipai.

¹² Imashinami ña ricuparcanchi, tucuicunallatami cada punlla ashtaca decisiongunata japina canchi. Huaquin decisiongunataca costumbremandallami ruranchi. Shuj ejemplota ricupashun. ¿Nachu huaquinbica apurado caimandaca na importantechu can nishpa imapash ropata churajushpa rinchilla? Shinapash pensarinami capanchi, Jehovata sirvijuj cuendachu churajushpa rijuni nishpa (2 Cor. 6:​3, 4). Ropata randigrijushpaca ima modatata catijuni nishpa pensarishpapash, maipash cachunllu vistirigrijuni o yapa valishcatachu randigrijuni nishpa pensarinarami canchi. Cashna uchilla cosascunapipash aliguta agllanata yachajushpaca jatun cosascunapipashmi aliguta agllai ushashun (Luc. 16:10; 1 Cor. 10:31).

13. Ñucanchi agllashca decisiongunata pactachishpa catichunga ¿imata ayudanga?

¹³ Ali decisionda agllashpapash chai decisionda pactachishpa catinaca shinllimi can. Shuj ejemplota ricupashunchi. Tabacota chupadorcunaca tabacotaca ñana chupashachu nishpami decidirishca. Shinapash huaquingunapaca chai decisionda pactachinaca shinllimi can. Shinaca ñucanchi agllashca decisionda pactachishpa catichunga ¿imata ayudanga? Ñucanchi decisionda pactachishpa catichunga Jehovami ayudanga (Filipenses 2:​13, liingui).

14. Apóstol Pabloca ¿imamandata alita rurai usharca?

¹⁴ Apóstol Pabloca alita rurangapaj munashpapash huaquinbica na usharcachu. Chaimandami nirca: ‘Imagutapash aliguta rurana munaica, ñucapi tianmi. Ashtahuangarin chai aliguta ruraitami, na ushani. Ñuca shungupica Taita Dios mandashcata rurashpami cushijuni. Shinapash, ñuca cuerpopi nali munaimi, alita rurana’ munaihuan macanajujun. Ñuca cuerpopi nali munaimi ‘ñucataca prezotashna charijun’ nishpa. Chashna jatun llaquipi cashpami apóstol Pabloca nirca, Taita Diostami pagui nini nirca (Rom. 7:​18, 22​-25). Ashtahuangarin “Taita Diosmandami ninan ushaita charinchi” nirca (2 Cor. 4:7).

15. Ali decisionda nali decisionda agllaimandaca ¿imata tucun?

¹⁵ Imashinami ricupanchi, Jehová Diospa ñaupajpi ali ricuringapaca ali decisiongunatami agllana canchi. Profeta Eliasta yaripashunchi. Paica Baal nishca yanga dioscunata adoraj gentecunatapash nali israelitacunatapash cashnami Carmelo nishca urcupica nirca: ‘¿Ima horascamanda cangunaca, cashna ishcai yuyaihuan causagringuichi? Mandaj Dios, Taita Dios cajpica, paita catichi. Ashtahuangarin Baal shuti dios Taita Dios cajpica, paita catishpa richilla’ nishpa (1 Rey. 18:21). Israelitacunaca Jehovata cazuna cashcata yachashpapash ‘ishcai yuyai’ tucushpami Jehovataca na cazungapaj munanajurca. Cutin Josueca shuj ali ejemplota cushpami nirca: ‘Mandaj Diosta sirvishpa causana cangunapi nali ricurijpica, maijan diosta sirvina cashpapash, cangunallata agllaichilla. Ñucahuan, ñuca familiacunahuanga,  Mandaj Diostami sirvishpa causashun’ nishpa (Jos. 24:15). ¿Chashna ali decisionda agllaimandaca Josuepash paipa familiapashmi ‘lechepash, balun mishquipash, ashtacapacha tiaj llactapi’ causarca (Jos. 5:​6).

16, 17. Jehovata sirvinata agllajcunaca ¿ima bendiciongunatata charin? Shuj ejemplota nipai

¹⁶ Cunanga ñucanchi shuj huauquipa ejemplota ricupashunchi. Chai huauquiguca chairallami bautizarirca, cazarashcami can, quimsa huahuagucunatami charin. Shuj punllaca trabajopi shuj cumbaca nircami: ‘Jacu shuj ladopi trabajashun, chaipica alimi pagajun, ayudajunmi’ nishpa. Ñucanchi huauquica aliguta pensarishpami Jehovata ayudahuai nishpa mañarca. Paica pensarircami, trabajopi nali pagajpipash sabadocunata, domingocunataca familiahuan igualmi tandanajuiman rini, villachitapash ushanimi nishpa. Shuj ladopi trabajagrishpaca na shinallata cati ushashachu yarcami. Quiquin chai decisionda agllana cashpaca ¿imatata rurapanguiman carca?

¹⁷ Ñucanchi huauquipaca, familiahuan tandanajuiman rina o villachinami ashtahuan importante carca. Chaimandami shuj ladopi ali pagajujpipash na chai trabajotaca chasquirca. Shinaca quiquinga imatata pensapangui chai decisionda agllashcamandaca ¿chai huauquiguca arripintirircachu? Paica nunca na arripintirircachu. Ashtahuangarin, 10 huatacunata charij ushigu congregacionbi huauquipanicunatapash Jehovatapash juyaimanda bautizaringapaj munanimi nijpica taitamamaca ninandami cushijurca. Taitapa ali ejemplota ricushpami chai cuitsaguca bautizaringapaj munashcanga.

18. ¿Imamandata Jehovapa munaita pundapi churashpa decisiongunataca agllana capanchi?

¹⁸ Imashinami ñaupa tiempocunapi Moisesca isaraelitacunataca chaquishca alpa pambacunata apashpa rirca, shinallatami cunan punllacunapi cai mundota Diablo mandajujpipash, ashtaca huatacunata Jesusca paipa catijcunata ñaupajman pushajushca. Ashtahuangarin, imashinami Josueca Jehová Dios cusha nishca alpacunaman israelitacunataca pushashpa rirca, shinallatami Jesuspash shuj mushuj ali causaiman ñucanchitaca apajun (2 Ped. 3:13). Chaimandami punda costumbrecunata, punda causaita o punda metacunataca huashaman saquishpa Jehová Diospa munaita rurana canchi (Rom. 12:2; 2 Cor. 13:​5). Shinaca, cada punlla ali decisiongunata agllashpa, shamuj punllacunapi bendiciongunata chasquingapaj munajushcata ricuchipashunchi (Hebreos 10:​38, 39, liingui).