1, 2. (a) Ano an epekto sa sato kun iniisip-isip asin ipinapakipag-ulay niyato an manungod sa sarong namumutan? (Hilingon an ritrato sa itaas.) (b) Anong mga hapot an tutukaron niyato?

KUN iniisip-isip asin ipinapakipag-ulay niyato an manungod sa sarong namumutan, mas nagkukusog an satong relasyon sa tawong iyan. Totoo man iyan kun dapit sa satong relasyon ki Jehova Diyos. Dakul na bangging pinagmasdan ni David, bilang sarong pastor, an mabituon na kalangitan asin hinurop-hurop an daing kaagid na Kaglalang kan mga ini. Siya nagsurat: ‘Kun tinitingkalag ko an saimong kalangitan, an gibo nin saimong mga muro, an bulan patin an mga bituon na hinaman mo, ano an tawo ta nagigirumduman mo siya, asin an aki nin tawo ta [inaataman] mo?’ (Sal. 8:3, 4) Asin pagkatapos isip-isipon kun paano nauutob sa pambihirang paagi an katuyuhan ni Jehova mapadapit sa espirituwal na Israel, si apostol Pablo nakapagsabi: ‘O an kahararuman kan mga kayamanan, kadunungan asin kaaraman nin Diyos!’—Roma 11:17-26, 33.

² Mantang nakikikabtang kita sa ministeryo, iniisip asin ipinapakipag-ulay niyato an dapit ki Jehova. Iyan mismo may positibong epekto sa sato. Dakul na naglaog sa bilog na panahon na ministeryo an nakapagsabi na an sarong bendisyon na bunga kan urog nindang pakikikabtang sa ministeryo iyo an pagkaigwa nin mas hararom na pagkamuot sa Diyos. Baga man nasa bilog na panahon na paglilingkod ka na o naghihinguwang abuton an pasuhan na iyan, pag-isipan ini: Paano an bilog na panahon na ministeryo makakapakusog sa saimong relasyon ki Jehova? Kun saro kang payunir, haputon an sadiri, ‘Ano an makakatabang sako para makapagpadagos sa nakakakontentong paglilingkod na ini?’ Kun bako ka pang payunir, haputon an sadiri, ‘Anong mga pagliliwat an puwede kong gibuhon tanganing makapagpayunir?’ Pag-ulayan ta an mga paagi kun paano an bilog na panahon na paglilingkod makakapakusog sa satong relasyon sa Diyos.

3. Ano an epekto sa sato kun ipinapakipag-ulay ta sa ministeryo an manungod sa itataong mga bendisyon kan Kahadian?

³ Kun ipinapakipag-ulay ta sa iba an manungod sa itataong mga bendisyon kan Kahadian, mas nagigin dayupot kita ki Jehova. Anong teksto an gusto mong gamiton pag naghaharong-harong? Paborito mo daw an Salmo 37:10, 11; Daniel 2:44; Juan 5:28, 29; o Kapahayagan 21:3, 4? Kada ipakipag-ulay niyato sa iba an siring na mga panuga, naipapagirumdom kaiyan sa sato na an satong bukas palad na Diyos tunay na iyo an paratao nin ‘gabos na marahay asin sangkap na balaog.’ Mas nagigin dayupot kita sa saiya huli kaiyan.—Sant. 1:17.

4. Taano ta nagrararom an pag-apresyar ta sa karahayan nin Diyos kun nahihiling ta an dukhang kamugtakan sa espirituwal kan mga hinuhulitan ta?

⁴ Kun nahihiling ta an dukhang kamugtakan sa espirituwal kan mga hinuhulitan ta, nagrararom an pag-apresyar ta sa katotoohan. An mga tawo sa kinaban mayo nin masasarigan na giya na matabang sa sainda na magin mapanggana asin maugma. An kadaklan nahahadit manungod sa puturo asin mayo nin paglaom. Hinahanap ninda an tunay na kahulugan nin buhay. Maski an kadaklan sa mga tawong relihiyoso dikiton an kaaraman sa Kasuratan. Kapareho nanggad sinda kan mga tawo kan suanoy na Nineve. (Basahon an Jonas 4:11.) Mantang urog kitang nakikikabtang sa ministeryo, mas nahihiling ta nin malinaw an pagkakalain kan mga hinuhulitan niyato asin kan banwaan ni Jehova kun dapit sa kamugtakan sa espirituwal. (Isa. 65:13) Naipapagirumdom kaiyan sa sato kun gurano karahay si Jehova huling urog pa sa pagtao niya sa sato nin espirituwal na mga pangangaipo an ginigibo niya; inaagda niya an gabos na magkaigwa nin espirituwal na kaginhawahan asin tunay na paglaom.—Kap. 22:17.

5. Kun tinatabangan ta an iba sa espirituwal na paagi, ano an nagigin sabuot niyato manungod sa satong personal na mga problema?

⁵ Kun tinatabangan ta an iba sa espirituwal na paagi, nakakatabang ini sa sato na dai pagparaisipon an personal na mga problema. Napatunayan iyan ni Trisha, sarong regular payunir, kan magdiborsiyo an mga magurang niya. Siya nagsabi: “Saro idto sa pinakamakulog sa buot na pangyayari sa buhay ko.” Sarong aldaw, munduon siya asin mayong ganang magluwas sa ministeryo. Pero, nagduman pa man giraray siya sa tinutukduan niya sa Bibliya na tulong aki na maribok an pamilya. Binayaan sinda kan ama ninda, asin minaltrato sinda kan matua nindang tugang na lalaki. An sabi ni Trisha: “Mayo lamang an problema o an kamunduan na inaagihan ko kun ikukumparar sa inaagihan ninda. Mantang nag-aadal kami, nahiling ko an kaugmahan sa saindang mga mata. Balaog hali ki Jehova an mga aking iyan, lalo na kan aldaw na idto.”

6, 7. (a) Paano napapakusog an satong pagtubod kun itinutukdo niyato an mga katotoohan sa Bibliya? (b) Kun nahihiling ta an mga tinutukduan sa Bibliya na nababago an buhay huli sa pag-aplikar kan mga prinsipyong suno sa Kasuratan, ano an nagigin epekto kaini sa satong pag-apresyar sa kadunungan nin Diyos?

⁶ Kun itinutukdo ta an mga katotoohan sa Bibliya, napapakusog an satong pagtubod. Dapit sa nagkapirang Judio kan panahon ni apostol Pablo na dai isinasabuhay an ihinuhulit ninda, si Pablo nagsurat: ‘Ika na nagtutukdo sa iba, dai ka nagtutukdo sa saimo man sana?’ (Roma 2:21) Bako nanggad arog kaiyan an mga payunir ngunyan! Sa pangkagabsan, dakul sindang oportunidad na itukdo an katotoohan sa iba asin magkondukta nin mga pag-adal sa Bibliya. Tanganing magibo iyan nin epektibo, kaipuhan nindang mag-andam para sa kada pag-adal asin mag-research pa ngani para masimbag an mga hapot. An payunir na si Janeen nagsabi: “Kada itinutukdo ko sa iba an katotoohan, namamatian ko na mas naitatadom sa puso asin isip ko an mga katotoohan na ini. Bilang resulta, padagos na nagkukusog an pagtubod ko.”

⁷ Kun nahihiling ta an mga tinutukduan sa Bibliya na nababago an buhay huli sa pag-aplikar kan mga prinsipyo sa Bibliya, minararom an satong pag-apresyar sa kadunungan nin Diyos. (Isa. 48:17, 18) Nakakatabang iyan sa sato na mas magin determinado na padagos na iaplikar an mga prinsipyong iyan sa satong buhay. An saro pang payunir na si Adrianna nagkomento: “An buhay nin mga tawo mapapano nin problema kun mananarig sinda sa sadiri nindang  kadunungan. Pero sa oras na manarig sinda sa kadunungan ni Jehova, makikinabang tulos sinda.” Kaagid kaiyan, si Phil nagsabi: “Mahihiling mo kun paano binabago ni Jehova an mga tawo na dai kayang magbago sa sadiri nindang paghihinguwa.”

8. Ano an epekto sa sato kun nakakaibanan ta an mga tugang sa ministeryo?

⁸ Kun nakakaibanan ta an mga tugang sa ministeryo, mas nagkukusog an satong espirituwalidad. (Tal. 13:20) An kadaklan na payunir naggagamit nin dakul na oras sa ministeryo kaiba an mga kapwa ebanghelisador. Nagtatao ini nin dakul na oportunidad na ‘magparinigunan nin buot.’ (Roma 1:12, NW; basahon  an Talinhaga 27:17.) An payunir na si Lisa nagsabi: “Sa trabaho, yaon pirmi an kompetisyon asin ururihan. Aroaldaw kang makakadangog nin tsismis saka malaswang mga tataramon. Gigibuhon ninda an gabos para magin lamang sa iba. Kun beses, tutuyaon ka dahil sa saimong Kristiyanong paggawi. Pero, an pagluwas sa ministeryo kaiba kan mga tugang tunay na nakakapakusog. Pagkatapos nin maghapon, minapuli akong maugma dawa pagal-pagal ako.”

9. Kun kaibanan ta sa pagpapayunir an satong agom, ano an nagigin epekto kaini sa tinulo-tulong lubid nin pag-aguman?

⁹ Kun kaibanan ta sa pagpapayunir an satong agom, minakusog an tinulo-tulong lubid nin pag-aguman. (Par. 4:12) Si Madeline, na kaiba an agom sa pagpapayunir, nagsabi: “Nagkakaigwa kaming mag-agom nin panahon na mag-ulay dapit sa ministeryo o sa nabasa mi sa Bibliya na puwedeng iaplikar sa ministeryo. Sa kada minaaging taon na magkaibanan kaming nagpapayunir, mas nagigin dayupot kami sa lambang saro.” Sinabi man ni Trisha na napagkauyunan nindang mag-agom na dai magbakal nin mga bagay na masasakitan sindang bayadan. Kaya, dai sinda nagdidiskutiran kun dapit sa kuwarta. Magkaibanan man sinda sa saindang mga dinadalaw liwat asin tinutukduan sa Bibliya.  Nakatabang ini na magin mas makusog an saindang pag-aguman.

10. Kun iniinot niyato an intereses kan Kahadian asin naeeksperyensiyahan an suporta nin Diyos, ano an nagigin epekto kaini sa pagtitiwala ta ki Jehova?

¹⁰ Nagkukusog an tiwala ta ki Jehova mantang iniinot niyato an intereses kan Kahadian, naeeksperyensiyahan an suporta ni Jehova, asin nahihiling na sinisimbag niya an satong mga pamibi. Totoo ini sa gabos na maimbod na Kristiyano. Pero, para sa mga nasa bilog na panahon na paglilingkod, an pagtitiwala ki Jehova nakakatabang sa sainda na magdanay bilang payunir. (Basahon an Mateo 6:30-34.) Si Curt, na sarong payunir asin kasalihid na paraataman nin sirkito, nag-uyon na dalawon an sarong kongregasyon na duwa may kabangang oras an biyahe hali sa saiyang harong. Siya asin an saiyang agom, na payunir man, may lunadan na an kargang gasolina kaidto eksakto sanang makaduman sa dadalawon nindang kongregasyon, asin sarong semana pa bago siya magsuweldo. Sinabi ni Curt, “Nagduwa-duwa ako kun tama an nagin desisyon ko.” Pagkatapos mamibi, nagdesisyon sindang uutubon ninda an asignasyon, na nagtitiwalang itatao nin Diyos an mga pangangaipo ninda. Kan pahali na sinda, sarong sister an nag-apod asin nagsabi na may regalo siya para sa sainda. Tinawan sinda nin kuwarta na an halaga eksakto nanggad para makabalik sinda. Sinabi ni Curt na kun pauruutro tang naeeksperyensiyahan an mga arog kaini, masasabi ta na talagang itinatao sa sato ni Jehova an satong mga pangangaipo.

11. Ano an nagkapira sa mga bendisyon na naeeksperyensiyahan kan mga payunir?

¹¹ Iyo, parating napapatunayan kan mga payunir na mantang ginigibo ninda an saindang pinakamakakaya sa paglilingkod ki Jehova asin pinagmamaigutan na magin dayupot sa saiya, ‘minaabot’ sainda an mga bendisyon na garo daing katapusan. (Deut. 28:2) Pero, may mga kadipisilan man an pagpapayunir. Mayong lingkod nin Diyos an libre sa mga problema na resulta kan pagrebelde ni Adan. Minsan ngani may nagkapirang kinaipuhan ngunang pumundo sa pagpapayunir, sa parati, an mga kadipisilan puwedeng mapangganahan o malikayan pa ngani. Ano an makakatabang sa mga payunir na magpadagos sa saindang pribilehiyo?

12, 13. (a) Ano an maninigong gibuhon nin sarong payunir kun dai siya nakakaabot sa pasuhan na oras? (b) Taano ta importanteng marhay an pag-iskedyul nin pagbasa nin Bibliya aroaldaw, personal na pag-adal, asin paghurop-hurop?

¹² An kadaklan na payunir pano-pano an iskedyul. Puwedeng magin masakit an pagtapos kan gabos na gibuhon, kaya importante an marahay na pag-organisar. (1 Cor. 14:33, 40) Kun an sarong payunir dai nakakaabot sa pasuhan na oras, tibaad kaipuhan niyang siyasaton giraray kun paano niya ginagamit an saiyang panahon. (Efe. 5:15, 16) Puwede niyang ihapot: ‘Gurano kadakul na panahon an ginagamit ko sa pag-aling-aling o paglilibang? Kaipuhan ko daw an urog pang disiplina sa sadiri? Puwede ko daw liwaton an iskedyul ko sa trabaho?’ Aadmitiron nin siisay man na Kristiyano na madali sanang magdagdag nin aktibidad sa iskedyul nin saro; kaya, an mga nasa bilog na panahon na paglilingkod tibaad kaipuhan na regular na siyasaton an mga bagay-bagay asin gumibo nin mga pagliliwat kun kinakaipuhan.

¹³ An pagbasa nin Bibliya aroaldaw, personal na pag-adal, asin paghurop-hurop dapat na kabtang kan iskedyul nin sarong payunir. Huli kaiyan, kaipuhan nin payunir an disiplina sa sadiri tanganing an bakong gayong importanteng mga aktibidad dai makaagaw sa panahon na itinagama niya para sa mahahalagang aktibidad. (Fil. 1:10) Halimbawa, imahinara an sarong payunir na minaabot pa sana sa harong pagkatapos nin maghapon na ministeryo. Plano niyang mag-adal pagkabanggi para sa maabot na pagtiripon. Pero, nagbasa nguna siya nin mga surat. Dangan binuksan niya an kompyuter asin nagbasa saka nagsimbag nin e-mail. Mantang nag-iinternet, nagduman siya sa sarong Web site tanganing hilingon kun nagbaba na an presyo kan gamit na gusto niyang bakalon. Namangnuhan niya na sana na duwang oras na palan an nag-agi, asin dai pa siya nakakapuon sa pag-aadalan niya para sa bangging idto. Taano ta importanteng  pag-isipan iyan? An propesyonal na mga atleta kaipuhan na atamanon an hawak ninda kun gusto nindang maghaloy sa saindang karera. Kaagid kaiyan, kaipuhan kan mga payunir an tamang rutina nin personal na pag-adal tanganing makapagdanay sinda sa bilog na panahon na ministeryo.—1 Tim. 4:16.

14, 15. (a) Taano ta maninigong pagdanayon kan mga payunir na simple an saindang buhay? (b) Kun an sarong payunir makaeksperyensiya nin mga kadipisilan, ano an maninigo niyang gibuhon?

¹⁴ Pinagmamaigutan kan mapangganang mga payunir na pagdanayon na simple an saindang buhay. Inenkaminar ni Jesus an mga disipulo niya na magkaigwa nin simpleng mata. (Mat. 6:22) Pinagdanay niyang simple an saiyang buhay tanganing matapos niya an ministeryo na mayong pang-abala. Sinabi niya: ‘An mga amid may mga irukan, asin an mga gamgam nin langit may mga salagan; alagad an Aki nin tawo dai nin mahihigdaan.’ (Mat. 8:20) Tanganing maarog an halimbawa ni Jesus, marahay na isaisip nin sarong payunir na miyentras na mas dakul an saiyang materyal na bagay, mas dakul man an kaipuhan niyang manteniron, hirahayon, o ribayan.

¹⁵ Aram nin mga payunir na an pribilehiyo ninda bakong huli sa ano man na espesyal na kakayahan ninda. Imbes, ano man na balaog o pribilehiyo nin paglilingkod na tibaad igwa kita, iyan huli sa dai na kutana maninigong kabuutan nin Diyos. Kaya, tanganing makapagpadagos sa pagpapayunir, an kada saro dapat na magtiwala ki Jehova. (Fil. 4:13) May malataw na mga pagbalo asin kadipisilan. (Sal. 34:19) Kun mag-abot iyan, an mga payunir maninigong maglaom ki Jehova para sa paggiya asin magpatabang saiya, imbes na bayaan tulos an saindang pribilehiyo nin paglilingkod. (Basahon an Salmo 37:5.) Mantang naeeksperyensiyahan ninda an mamumuton na tabang nin Diyos, mas magigin dayupot sinda sa saiya bilang an saindang mapagmakulog na Ama sa langit.—Isa. 41:10.

16. Kun gusto mong magpayunir, ano an maninigo mong gibuhon?

¹⁶ Kun gusto mong maeksperyensiyahan an mga bendisyon na inaako kan mga nasa bilog na panahon na paglilingkod, ipaaram mo an pagmawot mong iyan ki Jehova. (1 Juan 5:14, 15) Makipag-ulay sa mga payunir. Magbugtak nin mga pasuhan na makakatabang sa saimo na magin payunir. Iyan an ginibo ni Keith asin Erika. Bilog na panahon sindang nagtatrabaho kaidto asin, arog kan ibang mag-agom na kaeredad ninda, nagbakal tulos sinda nin harong asin bagong kotse pagkakasal ninda. An sabi ninda: “Paghuna mi matao iyan samo nin pagkakontento—pero dai palan.” Kan mawaran si Keith nin trabaho, nag-auxiliary payunir siya. Natatandaan niya: “An pagpapayunir nagpagirumdom sa samo kun gurano kagaya-gaya an pagigin nasa ministeryo.” Nagin amigo ninda an sarong mag-agom na payunir na nagtabang sa sainda na mahiling an kagayagayahan na resulta nin simpleng pamumuhay asin pagpapayunir. Ano an ginibo ni Keith asin Erika? “Naggibo kami nin listahan kan samong espirituwal na mga pasuhan, idinukot iyan sa repridyeretor, asin minamarkahan an kada pasuhan na naaabot mi.” Pag-abot nin panahon, nakapagpayunir sinda.

17. Taano ta madunong na konsideraron an pagliliwat kan saimong iskedyul o istilo nin pamumuhay tanganing makapagpayunir?

¹⁷ Puwede ka daw magpayunir? Kun sa paghuna mo dai pa iyan posible sa presente, gibuhon an bilog mong makakaya na magin urog na dayupot ki Jehova paagi sa lubos na pakikikabtang sa ministeryo. Pagkatapos nin mapagngayo-ngayong pagsiyasat, tibaad mahiling mo na an paggibo nin mga pagliliwat sa saimong iskedyul o istilo nin pamumuhay makakatabang saimo na magpayunir. Kun makakapagpayunir ka, an kagayagayahan na mamamatian mo magigin urog nanggad kisa sa ano man na isasakripisyo mo. Magkakaigwa ka nin urog na satispaksiyon huli sa pag-inot mo sa intereses kan Kahadian kisa sa saimong sadiri. (Mat. 6:33) Mamamatian mo an urog na kaugmahan huli sa pagtao sa iba. Apuwera kaini, magkakaigwa ka nin mas dakul na oportunidad na isip-isipon asin ipakipag-ulay an dapit ki Jehova, asin huli kaiyan, mapapararom mo an pagkamuot mo sa saiya asin mapapaugma mo siya.