1, 2. a) Ka asuseredubei dan le wasaminarun luagun aban gürigia le hínsiñeti woun ani ayanuha wagía luagu? (Ariha huméi dibuhu le lídanbei lagumeseha arütíkulu.) b) Kaba burí álügüdahani wakutiha?

WASAMINARUN luagu somu gürigia le hínsiñeti woun ani ayanuhan wagía luagu derebugüda lumuti wamadagua luma. Ligiaméme asuseredubei luma wamadagua luma Heowá. Dan meha le hóuniri lubéi mudún Dawidi, sügüti saragu áriebu asaminara luagu Bungiu le adügübalin sielu tuma burí waruguma. Abürühati: “Dan le narihini sielu le badügübei, luma hati hama waruguma ha bíchugubaña ñein, aba nasaminarun núnguarügü; Kátañanu san wügüriña lun basaminaruba lan hawagun? Kátañanu san gürigia lun bebereseduba lan hau?” (Sal. 8:3, 4). Ani lárigiñe lakutihani Pábulu lubuidun lagunfuliruni Heowá lisuuni hawagu kristiánugu anuarirútiña, aba lariñagun: “[Ma] lueirin lareini Bungiu, luma lichú lau!” (Rom. 11:17-26, 33).

² Dan le wapurichihan, saminatiwa luagu Heowá ani ayanuha wagía luagu. Sagatiwa buiti lídangiñe katei le. Saragu apurichihatiña ha lídanbaña dan dayarüti ariha hamaali ábatima lan línsiñedun Bungiu houn dan le haganwoundagüdüni heseriwidun. Dandu anhein heseriwiduña lubéi lidan dan dayarüti o anhein háfaaguña lubéi lun hagumeseruni eseriwiduni le, álügüdagua humá hungua ida liña lan gayara lan labuiduragüdüni eseriwiduni humadagua luma Heowá. Anhein prekursoru hubéi, álügüdagua humá hungua: “Kaba san íderaguana lun nasigirun lidan lubuidun eseriwiduni le? Ka asansiruni gayarabei nadügüni lun neseriwidun lidan dan dayarüti?”. Ariha wamá ida liña lan lídehan eseriwiduni lidan dan dayarüti lun labuiduruntima wamadagua luma Bungiu.

3. Ka lánibei efekütu wawagu wayanuhan luagu abinirúni burí le lunbei lanügüni Larúeihan Bungiu?

³ Yarafagüda lumutiwa lun Heowá wayanuhan luagu abinirúni le lunbei lanügüni Larúeihan. Ka bérusu tídangiñe Bíbülia hínsiñetimabei hun lun hayusuruni dan le hapurichihan? Háfuga Sálumu 37:10, 11; Danieli 2:44; Huan 5:28, 29 o Arufudúni 21:3, 4. Sagü wayanuhan houn amu gürigia luagu füramasei burí le, aba giñe waritaguni lúmagiñe lan Wabungiute le areidabei liabin ani ligía lan íchugubalin “sun buiti le ichugúbei woun” (Sant. 1:17).

4. Ka uagu laganwounda wínsiñehabu luagu lareini Heowá dan le warihini le gádanbaliña gürigia ladüga libidiñe Bungiu houn?

⁴ Warihini sun le gádanbaliña gürigia ha únbaña wapurichiha ladüga libidiñen Bungiu houn adügati lun gebegitima lan inarüni woun. Gürigia ubouagu mibihintiña aban adundehani buiti lun hadarirun ugundani. Wéiriti hadiheri luagu ámuñegü ladüga ibidiñe lan houn kaba lan asusereda ani memenigitiña ni murusun. Áluaha hamuti lisuuni ibagari, gama lumoun íbini ha gánibaña aban relihión maweirinti hasubudin tuagu Bíbülia. Genegeguati hagaburi hama ha awinwandubaña lidan binadu uburugu Níniwe (aliiha huméi Honasi 4:11). Dan le waganwoundagüdüni wapurichihan, ariha wamuti furangu ka lan gádanbaliña gürigia ha únbaña wapurichiha luma le gádanbaliña lumutuniña Heowá (Isa. 65:13). Íderagua lumutiwa lun waritaguni mámarügüñein lan le wemegeirubei lun gamadagua wamá luma líchiga woun, amisuraha lumutiwa giñe súngubei lun wasubudiruni ani ibiha wagíame aban emenigini le inarüniti (Aru. 22:17).

5. Ida liña warihini waturobulin dan le wíderagun amu gürigia asubudirei Heowá?

⁵ Wíderagun amu gürigia asubudirei Bungiu íderagua lumutiwa lun madiheridun wamá luagu waturobulin guánarügü. Aban prekursora hádangiñe ha adügübaña 70 oura luagu hati gíritu Trisha ariha tumuti katei le tungua dan le hígiragunbei tagübürigu. Ariñagatu ligía lan aban lídangiñe katei le hénrengutimabei lidan tibagari. Aban weyu, íbini sandigua tan tungua lau saragu íruni ani busén tan yebe terederun múnada, aba tidin arufudaha tídangiñe Bíbülia houn ǘrüwa irahüñü ha hanarimetimabei haturobulin. Aba meha lígiruniña háguchi, ani aba lóuseruniña hati wuriba. Abahüdaguatu Trisha: “Ni kata meha niturobulin luma nidiheri lumoun haturobulin irahüñü ha. Lidan awanha lan aturiaha, aba ladurangun hagu ani aba héherahan lau ugundani. Aba meha idewesei lúmagiñe Heowá irahüñü hagía nun, lídantima weyu ligía”.

6, 7. a) Ida liña léredun wafiñen dan le warufudahani inarüni le tídanbei Bíbülia houn amu? b) Dan le warihini labuidurun habagari gürigia ha aturiahabarun Bíbülia ladüga hawinwanduni le hafurendeirubei, ka asuseredubei lun ínsiñeni le wasandirubei luagu lichú lau Bungiu?

⁶ Aba léredun wafiñen dan le warufudahani inarüni le tídanbei Bíbülia houn amu. Abürühati apostolu Pábulu hawagu fiú huríu lidan lidaani ha mawinwandunbalin le hapurichihabei: “Anhein lubeiti arufudaha bubéi houn amu, kagia uagu marufudahan bubéi búniwagua?” (Rom. 2:21). Lidan wadaani rútiña prekursorugu amu hénpulu. Libe-agei dan anihein saragu chansi lun harufudahani inarüni houn gürigia luma lun híchugun külase tídangiñeti Bíbülia. Gama lumoun, lun buidu lan hadügüni mégeiwati lun haranserun buidu lun kada külase ani anihein dan lunti háluahan óunabagülei lun burí somu álügüdahani. Afuranguagüdatu aban prekursora gíritu Janeen: “Sagü gachansin nan lun narufudahani inarüni houn amu, sanditina aba lántima lebelurun lidoun nisaminan luma tidoun nanigi. Le resultóubei, aba lan lasigirun nafiñen aganwounda, meredetina lidan aban”.

⁷ Warihini labuidurun habagari gürigia ha aturiahabarun Bíbülia dan le hawinwanduni le hafurendeirubei ábatima laganwoundun ínsiñeni le wasandirubei luagu lichú aau lúmagiñeti Bungiu (Isa. 48:17, 18). Adügati giñe katei le lúntima desidírü wamá wasigirun awinwandei inarüni méiniti le tídanbei Bíbülia lidan wabagari. Ariñagatu Adrianna, to giñe eseriwidunboun kei prekursora:  “Dan le hafiñerun gürigia luagu le hasaminarubei, gayarati ñeinbei lan chagaguaü lidan habagari. Gama lumoun dan le hagumeserun afiñera luagu lichú lau Heowá, fureseti larihín lubuidun resultóu lidan habagari”. Ariñagati giñe Phil: “Arihúati luagu gayara lan lasansiruni Heowá hagaburi gürigia ani luagu siñá lan hadügüni asansiruni le hábuguarügü”.

8. Ka lánibei efekütu wawagu wapurichihan hama íbirigu ha derebuguti hafiñen?

⁸ Dan le wáfuridun apurichiha hama íbirigu ha derebuguti hafiñen ruti erei woun (Ari. 13:20). Hibe-agei prekursorugu sügütiña saragu dan lidan ministeriu hama amu apurichihatiña, le adügübei ‘lun giñe híchugun gurasu hóuniwagua’ (Rom. 1:12; aliiha huméi Ariñawagúni 27:17). Ariñagatu aban prekursora gíritu Lisa: “Lidan wadagimanu súnwandan anihein lan ásügüraguni luma gimugaü. Sagü weyu waganbuña achurahani luma dimurei wíyeti. Sun mutu busentiña hibihin aban ubaraü íñutimati meberesenga ka lan lunbei hadügüni lun hibihini. Anihein dan éherehatiña wau ladüga wóuserun kei kristiánugu. Ánheinti dan le wapurichihan úara hama wíbirigu ibihatiwa gurasu. Dan le lásurun wapurichihan, aba nagiribudun múnadoun lau ugundani, íbini dan le buchá lan nuagu”.

9. Dan le heseriwidun maríeitiña kei prekursorugu úara, ka lánibei efekütu lidan gúrudu ǘrüwaguati le óundarubaliña?

⁹ Dan le weseriwidun kei prekursoru úara tuma wani weiriou o luma wani weiriei ábatima léredun gúrudu ǘrüwaguati le óundaragubaliwa (Apur. 4:12). Ariñagatu Madeline to eseriwidunboun kei prekursora úara luma tani weiriei: “Nuguya luma nani weiriei gayarati wásügürün dan ayanuha luagu ida liña lan lidin woun lidan apurichihani o luagu somu katei le wadarirubei lidan waliihanu Bíbülia le gayarabei wayusuruni lidan wani ministeriu. Kada irumu le wásügürübei lidan weseriwidun kei prekursoru yarafaguatimaatiwa wámagua”. Ariñagatu Trisha: “Biángubei wagía  desidírühadiwa lun masagarun wamá dúeiti, masigenehantiwa lubeiti luagu seinsu. Kei le ligiaméme lan lóurate wáfuridun apurichiha, kada aban wádangiñe saminatiwa hawagun gürigia ha wabisidahabaña o ha úmabaña waturiahóun Bíbülia, sun le adügati lun yarafaguatima wamá dandu lidan le wasandirubei kei lidan weseriwidun lun Bungiu”.

10. Ka asuseredubei lun ichouruni le wasandirubei luagu Heowá dan le wíchuguni Larúeihan lidan furumiñeti lúgaaru ani ariha wamuti luagu íderagua lániwa?

¹⁰ Dan le warihini líderaguniwa Heowá ani óunabalei wafurieidun dan le wíchuguni Larúeihan lidan furumiñeti lúgaaru adügati lun laganwoundun wafiñen luagu. Gayarati wariñagun ligiaméme lan asuseredubei houn sun kristiánugu ha úaraguatiña. Gama lumoun, ha eseriwidubaña lidan dan dayarüti ariha hamuti mosu lan hafiñerun luagu Heowá lun gayara lan hasigirun eseriwida kei prekursoru (aliiha huméi Matéu 6:30-34). Curt, le eseriwidubei kei prekursoru ani ídeha ligía kei óunigiruti sirkuitu agunbirahóuati lun lidin abisidaha aban damuriguaü kéiburi bián oura dimí lidise luéi fulasu le ñein lubéi leredera. Kei le prekursoru lubéi úara tuma lani weiriou, murusunrüguñein gasolina tidan hakarün lúnrügü gayara lan hachülürün lidoun fulasu ligía, mama lun hagiribudun, ani mégeigili meha aban dimaasu lun lafayeirúniwa lidan luadigimari. Aba lariñagun machourun lani anhein buidu lubéi le desidírü lubéi. Lárigiñe hafurieidun, aba desidírü hamá houdin, lau hafiñen luagu líchugubei lan Heowá le hemegeirubei houn. Dan le aranseeña lun háfuridun aba tagúarun aban íbiri houn lun tíchugun aban idewesei houn, idewesei ligía, seinsu le hemegeirubei lun hagunfuliruni haweiyasun. Ariñagati Curt lau ichouruni: “Dan le lasuseredun katei le bun saragu wéiyaasu, ménrengunti barihini lídehan Heowá”.

11. Ka amu burí abinirúni heresibirubei prekursorugu?

¹¹ Chóuruti saragu lan hádangiñe prekursorugu ha ayusurubalin hadaani eseriwida lun Heowá ani buídugüda haméi hamadagua luma, chóuruti ariha hamani resibi hamá saragu abinirúni (2 Lur. 28:2). Íbini ítara dúnguatiña prekursorugu luma lénrengunga. Úati ni aban lubúein Bungiu lun líbüre lan luéi figóu le wibihibei lúmagiñe Adán. Gama lumoun, íbini añahein lan prekursorugu ígira hamuti heseriwidun luagu murusun dan, libe-agei dan gayarati laransehóun turóbuli o ladügǘn somu katei lun masuseredun lan. Kaba íderaguaña prekursorugu lun hasigirun agundaara lidan lubuidun chansi lánina eseriwiduni le?

12, 13. a) Ka lunbei ladügüni prekursoru le gaturobulinbei lun lagunfuliruni lóurate? b) Ka uagu súdini lubéi wígirun dan lun waliihanu Bíbülia sagü weyu, lun waturiahanu luma lun wasaminarun?

¹² Hibe-agei prekursorugu bereseguheitiña. Gayarati hénrengu lan houn hagunfulirun lau sun hani buligasion, ligía mosu lubéi hadügün aban lubuidun aransehani (1 Ko. 14:33, 40). Anhein gaturobulin lubéi aban prekursoru lun lagunfuliruni lóurate, háfuga lunti lasaminarun ida liña lan layusuruni lidaani (Efe. 5:15, 16). Buídubei lun lálügüdagun lungua: “Átiriñein san dan násügürün lidan isebáhari? Mégeitina san nadügün somu asansiruni? Gayarati san nasansiruni lóurate nuadigimaridun?”. Furumiñeguarügü kristiánu subudi lumuti luagu ménrengun lan letenirúniwa lun katei le masudininbei. Ligíati, buídubei hadüga ha eseriwidubaña lidan dan dayarüti lun hakutihani buidu le gádanbaliña luma lun hadügüni asansiruni le mégeiwabei.

¹³ Mosu hasagarun prekursorugu dan lun haliihanu Bíbülia sagü weyu, lun haturiahanu luma lun hasaminarun tuagu. Ligíati megei habéi hárügüdagun houngua luéi hígirun lun lagidaruni katei burí le maweirinbei lisudinin dan le lunbei hayusuruni lun katei le súdinitimabei (Fili. 1:10). Aban hénpulu, samina wamá luagu aban prekursoru le agiribudubei lúbiñoun lárigiñe lagunfulirun lau lani ministeriu. Saminati laturiahan lubá adamuridaguni. Gama lumoun, furumiñe aba laliihanu gárada to leresibiruboun. Lárigiñe aba lébedunu lani konputadora ani aba laliihani uganu le ounahóubei lun lidan Internet ani óunabalei.  Lidan anihagua lan lidan Internet aba larihin anhein rarihali lubéi lebegi katei le labusenrubei lagañeihan. Lubaragiñebei líchugun fe sügühali kéiburi bián oura ani magumeserungili aturiaha lubá adamuridaguni. Haliañein san turóbuli? Le adügübei ehersísiu lunti leigin buidu lun lóunigiruni lúgubu. Ítarameme, anhein busén lubéi prekursoru lasigirun lidan leseriwidun, mégeiti laturiahan saragu lun léredagüdüni lumadagua luma Bungiu (1 Tim. 4:16).

14, 15. a) Ka uagu lunti lubéi sensiyu lan habagari prekursoguru? b) Ka lunbei ladügüni aban prekursoru anhein gagibugua luma lénrengunga?

¹⁴ Áfaaguatiña prekursoru ha buítiña lun hanügün aban ibagari sensiyuti. Ligía adundehani líchugubei Hesusu houn lani disipulugu (Mat. 6:22). Ligía guánarügü wínwanti aban ibagari sensiyuti lun ua lan eberesehati lidan lani ministeriu. Ligía gayara lubéi lariñagun: “Daritiña gasigamu huyu lun haganóun ñein, gádibutiña giñe dunuru; ánheinti au le Wügüri Garaüwarügüti, madaritina ni halíaba lan nabalachagüdei nichügü” (Mat. 8:20). Prekursoru le busenbei lafurendeirun lídangiñe lani Hesusu hénpulu lunti gabaroun lani eibu lan libe lumegen aban gürigia gíbetimati lunti lóunigiruni, laranseruni o lagañeihani.

¹⁵ Subudi hamuti prekursorugu espechali lan heseriwidun. Gama lumoun, masaminaruntiña luagu buidu hamá hawéi ha híbiri. Lubaragiñe lira, subudi hamuti lúmagiñe lan Heowá liabin chansi le hibihibei lun heseriwidun kei prekursorugu. Ligíati lun hasigirun lidan eseriwiduni le, lunti hafiñerun luagu Heowá (Sal. 121:1, 2). Ñeinbei turóbuli luma lénrengunga (Sal. 34:19). Gama lumoun, danme le lasuseredun, lunti háluahani prekursorugu lídehan Heowá ani ígira hagíame lun líderaguniña lubaragiñe hígiruni heseriwidun (aliiha huméi Sálumu 37:5). Héreti hamadagua luma Heowá ladüga harihini luagu góunigi lániña lau ínsiñeni (Isa. 41:10).

16. Anhein busén hubéi heseriwidun kei prekursoru, ka lunbei hadügüni?

¹⁶ Anhein busén hubéi hasandiruni ida liña lan labiniruniña Heowá lubúeingu ha lídanbaña dan dayarüti ariñaga huméi lun (1 Huan 5:14, 15). Ayanuhan humá hama fiú prekursorugu. Áfaagua humá lun aban humá prekursoru. Ligía hadügübei Keith tuma Erika. Hawadigimariduña meha kei sun maríeitiña ha haseisi, agañeinhaaña meha aban muna tuma aban karü iseri murusun dan lárigiñe hamarieidun. Aba hariñagun: “Saminatiwa meha wagundaaruba lan saragu lau burí katei le, gama lumoun mítaranti.” Dan le leferidiruni Keith luadigimari, aba leseriwidun kei prekursoru ídehati. Abahüdahati: “Haritaguagüda lumutina neseriwidun kei prekursoru weiri lan ugundani le asandirúbei lidan apurichihani”. Aba gamadagua hamá hama aban feru maríeitiña prekursorugu, ha íderagubaliña lun gunda hamá lau aban ibagari sensiyuti luma lidan heseriwidun lidan dan dayarüti. Ka hadügübei Keith tuma Erika? Aba hóunabun: “Aba wadügün aban lísüta lau le wabuserunbei wadügün lidan weseriwidun lun Bungiu, aba wíchugunu luagu tubenari adiliragülei ani aba wagumeserun agidarei le ibiha wamaalibei”. Lau lásügürün dan, aba prekursoru hamá.

17. Ka uagu lunti lubéi hasaminarun lau lichú aau anhein gayara lubéi heseriwidun kei prekursoru?

¹⁷ Gayarati san heseriwidun keisi prekursoru? Anhein samina hubéi luagu siñá lan guentó, adüga huméi sun hiyaraati lun haganwoundagüdüni hani ministeriu. Ábame hayarafadun lun Heowá. Lárigiñe hamuriahan luma lun ladundehanün luma lun hakutihani le gádabalün, háfuga ítararügübei hasubudiruni anhein anihein lubéi somu asansiruni le lunti hadügüni lidan hibagari lun prekursoru humá. Anhein gayara lubéi hadügüni, harihibei gíbetimabei lan ugundani le lunbei hibihini sügǘ lau furumiñeguarügü sákürifisiu. Gúndaabadün ladüga híchuguni Larúeihan Bungiu lidan furumiñeti lúgaaru (Mat. 6:33). Hasandirubei óunwenbu ugundani le ñǘnbuinbei lídangiñe híderawagun amu. Ani gachansinbadün lun hasaminarun luagu Heowá, lun hayanuhan luagu, lun haganwoundagüdüni ínsiñeni le hasandirubei luagu luma lun hagundaaragüdünu lanigi.