Servis pionye i ranforsi nou relasyon avek Bondye

“I gou pour sant pour nou Bondye.”​—PS. 147:1.

KESTYON POUR REFLESIR

Ki mannyer servis pionye i ranforsi ou relasyon avek Zeova?

Si ou en pionye, kwa ki kapab ed ou pour kontinyen dan sa servis ki anmenn bon rezilta?

Si ou pa en pionye la konmela, ki azisteman ou bezwen fer pour vin enn?

1, 2. (a) Ki pou arive si nou mazin e koz lo bann dimoun ki nou kontan? (Vwar portre anler.) (b) Ki kestyon nou pou egzaminen?

NOU relasyon avek en dimoun ki nou kontan i kapab ganny ranforsi kan nou mazin li e koz lo li. Nou relasyon avek Zeova osi i parey. Konman en berze, David ti pas laplipar son lannwit pe get dan lesyel ranpli avek zetwal e pe medit lo zot gran Kreater. I ti ekrir: “Kan mon vwar ou lesyel, travay ou ledwa, lalin ek zetwal ki ou’n fer, ki imen i ete ki ou gard li antet, e en senp imen ki ou pran swen avek li?” (Ps. 8:3, 4) Apre ki i ti’n remarke ki plan Zeova konsernan Izrael spirityel ti pe ganny akonplir dan en fason merveye, zapot Pol ti dir: “Larises Bondye i vreman gran, son konnesans ek son lasazes i vreman profon.”​—Rom. 11:17-26, 33.

² Kan nou dan predikasyon, nou mazin e koz lo Zeova. Sa i annan en bon lefe lo nou. Bokou frer ek ser ki partisip dan servis a plen tan in dekouver ki en benediksyon ki zot gannyen se ki zot lanmour pour Bondye i vin pli for. Ki swa la konmela ou dan servis a plen tan ouswa ou pe fer bokou zefor pour konmans sa servis, reflesir lo sa bann kestyon: Ki mannyer servis a plen tan i kapab ranforsi ou relasyon avek Zeova? Si ou en pionye, demann ou lekor, ‘Kwa ki pou ed mwan kontinyen dan sa servis ki anmenn bokou bon rezilta?’ Si ou pa ankor konmans fer pionye, demann ou lekor, ‘Ki bann azisteman mon kapab fer pour konmans fer li?’ Annou egzamin diferan fason ki servis a plen tan i kapab ranforsi nou relasyon avek Bondye.

SERVIS A PLEN TAN EK NOU RELASYON AVEK BONDYE

3. Ler nou koz lo bann benediksyon ki Rwayonm Bondye pou anmennen byento dan predikasyon, ki lefe sa i annan lo nou?

³ Nou vin pli pros avek Zeova kan nou koz avek lezot lo  benediksyon ki Rwayonm Bondye pou anmennen. Ki verse ou kontan servi kan ou pres port an port? Eski se Psonm 37:10, 11; Danyel 2:44; Zan 5:28, 29; oubyen Revelasyon 21:3, 4? Sak fwa ki nou koz lo sa bann promes avek lezot, nou pe rapel nou lekor ki nou Bondye zenere i vreman sa enn ki donn “tou don ekselan, [ek] tou kado parfe.” Dan sa fason, nou vin pli pros avek li.​—Zak 1:17.

4. Akoz nou lapresyasyon pour labonte Bondye i ogmante kan nou vwar povrete spirityel lezot dimoun?

⁴ Nou lapresyasyon pour laverite i ogmante kan nou vwar povrete spirityel bann dimoun ki nou pres avek. Bann dimoun dan lemonn napa sa bon gidans ki zot kapab depan lo la pour ed zot reisi e ere. Laplipar i enkyet pour lavenir e zot napa okenn lespwar. Zot anvi konnen ki bi lavi. Menm si en kantite i vreman relizye, zot pa konn preski nanryen lo Labib. Zot en pe parey bann zabitan Niniv dan letan lontan. (Lir Yona 4:11. *) Kan nou partisip plis dan predikasyon, nou vwar pli klerman sa diferans ki i annan ant kondisyon spirityel pep Zeova ek bann dimoun ki nou pres avek. (Iza. 65:13) Nou kapab rapel labonte Zeova dan sa sans ki i fer plis ki zis pran swen avek nou bann bezwen spirityel. I envit nou tou pour ganny rafresi spirityelman e i donn nou en vre lespwar.​—Rev. 22:17.

5. Ki mannyer nou santi anver nou problenm kan nou ed lezot spirityelman?

⁵ Led spirityel ki nou donn lezot i fer li fasil pour nou pa tro preokip nou avek nou bann problenm personnel. Trisha, en pionye ordiner ti realize ki sa i vre kan son paran ti divorse. I rakonte: “Sa moman ti enn ki ti pli afekte mwan emosyonnelman dan mon lavi.” En zour, i ti vreman tris e anvi reste kot lakour, me kantmenm sa, i ti ale pour fer en letid Labib avek trwa manrmay ki ti annan problenm kot lakour. Zot papa ti’n abandonn zot, e zot pli gran frer ti’n abiz zot. Trisha i dir: “Problenm ek douler ki mon ti annan pa ti nanryen konpare avek sa ki zot ti pe fer fas avek. Anmezir nou ti fer letid, zot pti lizye ti briye e zot ti riye akoz leksitasyon ek lazwa. Sa bann manrmay ti en kado sorti kot Bondye, sirtou sa zour.”

6, 7. (a) Dan ki fason nou lafwa i vin pli for kan nou ansenny lezot laverite dan Labib? (b) Anmezir nou vwar nou bann etidyan pe amelyor zot lavi par aplik bann prensip Labib, ki i arive avek nou lapresyasyon pour lasazes Bondye?

⁶ Ansenny laverite dan Labib i ranforsi nou lafwa. Zapot Pol ti ekrir ki serten Zwif dan son letan pa ti pe fer sa ki zot ti pe dir. I ti ekrir: “Ou ki ansenny lezot, akoz ou pa ansenny ou prop lekor?” (Rom. 2:21) Bann pionye ozordi pa koumsa zot, pa i vre? An zeneral, zot annan en kantite loportinite pour ansenny lezot laverite e kondwir bann letid Labib. Pour arive fer sa, fodre zot prepare pour sak letid e menm fer resers pour kapab reponn bann kestyon ki zot kapab ganny demande. En pionye ki apel Janeen i eksplike: “Sak fwa ki mon annan loportinite pour ansenny lezot laverite, mon santi ki sa bann laverite presye pe ganny ekrir pli o profon dan mon leker ek lespri. An rezilta sa, mon lafwa pa reste parey, me i kontinyen vin pli for.”

⁷ Nou lapresyasyon pour lasazes Bondye i ogmante kan nou vwar nou bann etidyan pe amelyor zot lavi par aplik bann prensip Labib. (Iza. 48:17, 18) An retour, sa i ed nou pour reste pli determinen pour aplik sa bann prensip dan nou lavi nou osi. Adrianna, en lot pionye i fer sa komanter: “Kan bann dimoun i depan lo zot prop lasazes, zot lavi i en katastrof. Me, kan zot konmans depan lo lasazes Zeova, deswit zot konmans  ganny bann byenfe.” Dan menm laliny, Phil i dir: “Ou kapab trouve ki mannyer Zeova i sanz bann dimoun ki pa ti pe reisi sanze kan zot ti pe esey sanz zot lavi lo zot menm.”

8. Dan ki fason pres avek bann bon konpanyon i kapab annan lefe lo nou?

⁸ Nou ganny batir spirityelman kan nou pres ansanm avek bann bon konpanyon. (Prov. 13:20) Laplipar pionye i pas bokou letan dan predikasyon avek lezot evanzelizater. Dan sa fason, zot ganny loportinite pour “benefisye [avek] lankourazman” kanmarad. (Rom. 1:12; lir Proverb 27:17. *) En pionye apele Lisa ti fer sa remark: “Kot travay, i souvan annan en leta lespri konpetisyon ek zalouzi. Tou le zour ou tann bann bavardaz ouswa koleg travay pe koz bann parol obsenn. Zot pare pour fer nenport kwa pour pas premye. Par ler, ou menm ganny ridikilize ouswa sikannen akoz ou kondwit konman Kretyen. Me, travay avek lezot Kretyen dan predikasyon i vreman ankourazan. A lafen en lazournen, mon retourn se mwan byen ankouraze, malgre mon vreman fatige.”

9. Fer pionye ansanm avek nou konzwen i kapab fer kwa avek sa lakord ki’n tres an trwa?

⁹ Sa lakord ki’n tres an trwa i vin pli for kan bann koup i fer pionye ansanm. (Ekle. 4:12) Madeline ki fer pionye ansanm avek son msye i dir: “Nou de mon msye nou kapab pas letan ansanm pour koz lo nou lazournen dan predikasyon ouswa lo en keksoz dan nou lektir Labib ki kapab ed nou dan nou minister. Nou vin pli pros ansanm, sak lannen ki nou’n fer pionye ansanm.” Pareyman, Trisha i dir: “Nou tou  le de nou pa pe mazin rod det pour met lo nou, alor nou pa bezwen lager larzan. Nou progranm predikasyon i parey, alor nou al ansanm lo bann retourn vizit ek letid Labib ki ed nou pour reste kot a kot emosyonnelman e spirityelman.”

10. Kan nou met lentere Rwayonm premye e ganny sipor Bondye, ki lefe sa i annan lo nou konfyans dan Zeova?

¹⁰ Anmezir nou met Rwayonm premye, eksperyans sipor Zeova e vwar konman i reponn nou lapriyer, nou konfyans dan Zeova i ogmante. Ziska en degre, sa i le ka pour tou Kretyen fidel. Me sa bann ki dan servis a plen tan in eksperyanse ki si zot depan lo Zeova, i pou ed zot kontinyen fer pionye. (Lir Matye 6:30-34.) Curt ki en pionye ansanm avek son madanm e en sirveyan rezyonal tanporer ti dakor pour vizit en kongregasyon ki ti de-z-erdtan edmi avek kot i reste. Zot ti annan ase bennzin dan zot loto pour ariv laba me pa ase pour retournen, e nek ankor dan en semenn ki i ti pou ganny peye. Apre ki zot ti’n priye, zot ti aksepte sa privilez, avek konfyans total ki Bondye ti pou pran swen avek zot bezwen. Curt i dir: “Mon ti demann mon lekor si mon ti’n fer en bon desizyon.” Zis avan ki zot ti ale, en ser ti telefonn zot e dir ki i ti annan en kado pour zot. I ti donn zot sanmenm sa sonm larzan ki zot ti bezwen pour zot vwayaz. Curt i dir, “Si tou lazournen ou pe ganny bann leksperyans parey, napa okenn dout ki se lanmen Zeova ki pe azir.”

11. Ki serten benediksyon bann pionye i gannyen?

¹¹ Wi, bann pionye in trouve ki ler zot depans zot lenerzi dan zot servis pour Zeova e devlop en relasyon pli pros avek li, zot ganny bokou plis benediksyon. (Det. 28:2) Kantmenm sa, i pa fasil pour fer pionye. Napa en serviter Zeova ki pa eksperyans problenm ki rebelyon Adan in anmennen. Menm si serten pionye in bezwen aret zot servis pour en serten letan, serten defi i kapab ganny met anba kontrol ouswa menm evite. Kwa ki kapab ed bann pionye pour kontinyen dan zot servis spesyal?

RESTE DAN SERVIS A PLEN TAN

12, 13. (a) Ki en pionye i devret fer si i pa pe arive ganny son erdtan? (b) Akoz en progranm lektir Labib sak zour, letid personnel ek meditasyon i vreman enportan?

¹² Laplipar pionye i annan en progranm byen sarze. I kapab vreman difisil pour fer tou keksoz, alor i vreman enportan pour organiz ou letan. (1 Kor. 14:33, 40) Si en pionye i vwar li difisil pour ganny son erdtan, i kapab vwar li neseser pour revwar ki mannyer i pe servi son letan. (Efe. 5:15, 16) I kapab demande: ‘Ki kantite letan mon pe pase dan detant ek aktivite rekreasyonnel? Eski mon bezwen annan plis kontrol lo mon lekor? Eski mon kapab aziste lakantite letan mon pase dan louvraz?’ En Kretyen ti pou dir fransman ki i fasil pour azout lezot keksoz lo son progranm, alor, sa bann ki antreprann servis a plen tan i bezwen regilyerman revwar zot progranm e fer azisteman kot i neseser.

¹³ Lir Labib tou le zour, letid personnel ek meditasyon i devret form parti progranm en pionye. Anfet, en pionye i bezwen disiplin son lekor pour ki bann aktivite ki pa sitan enportan pa pran plas sa letan ki i met dekote pour sa bann keksoz enportan. (Fili. 1:10, NW) Par egzanp, meton i fek retourn kot li apre en gran lazournen dan predikasyon. I anvi prepar son renyon sa zour. Me avan tou, i lir son bann let. Apre, i ouver son konpiter, i lir e reponn bann imel. Pandan ki i lo Internet, i al lo en sit pour gete si pri en serten marsandiz ki i anvi aste in desann. San menm realize, de-z-erdtan in pase e i pa ni menm ankor konmans etidye. Akoz sa i en problenm? Bann atlet profesyonnel i bezwen  pran swen avek zot lekor si zot anvi kontinyen dan zot karyer. Pareyman, si zot anvi kontinyen dan servis a plen tan, bann pionye i bezwen annan en bon labitid pour fer letid personnel pour ki zot fortifye zot lekor spirityelman.​—1 Tim. 4:16.

14, 15. (a) Akoz bann pionye i devret annan en lavi senp? (b) Si en pionye i eksperyans difikilte, ki i devret fer?

¹⁴ Bann pionye i fer bokou zefor pour annan en lavi senp. Zezi ti ankouraz son bann disip pour annan en bon lizye oubyen en lizye senp. (Mat. 6:22) Li menm i ti viv en lavi sitan senp pour ki i ti akonplir son minister san okenn distraksyon. I ti kapab dir: “Renar i annan zot trou, zwazo i annan zot nik, me Fis-de-Lonm li napa en landrwa kot i kapab repoz son latet.” (Mat. 8:20) Si en pionye i anvi aprann avek legzanp Zezi, i byen pour li gard antet ki pli i annan keksoz materyel, pli i pou bezwen mentenir, repare ouswa ranplas zot.

¹⁵ Bann pionye i konnen ki zot servis i en privilez, me zot pa mazinen ki zot pli spesyal ki lezot. Plito, nenport don ouswa privilez ki zot annan se gras a labonte ekstraordiner Bondye. Alor, pour ki zot kontinyen konman pionye, zot devret depan lo Zeova. (Fili. 4:13) Zot pou definitivman eksperyans difikilte ek defi. (Ps. 34:19) Me, kan zot fer fas avek difikilte ek defi, zot devret rod gidans avek Zeova e donn li sa loportinite pour ed zot, olye taye pour aret zot servis. (Lir Psonm 37:5. *) Letan ki zot eksperyans led Zeova, zot pou vin pli pros avek zot Papa dan lesyel ki pran swen avek zot.​—Iza. 41:10.

ESKI OU KAPAB VIN EN PIONYE?

16. Si ou ti a voudre vin en pionye, ki ou devret fer?

¹⁶ Si ou ti a voudre ganny bann benediksyon ki bann serviter a plen tan i gannyen, fer Zeova konn ou dezir. (1 Zan 5:14, 15) Koz avek sa bann ki deza pe fer pionye. Etablir bann lobzektif ki pou ed ou pour vin en pionye. Sanmenm ki Keith ek Erika ti fer. Zot tou le de zot ti pe travay, e parey nenport ki koup zot laz, zot ti’n aste en lakaz ek en nouvo loto deswit apre ki zot ti marye. Zot dir: “Enn fwa ki nou ti annan sa bann keksoz, nou ti krwar ki nou ti pou satisfe, me i pa ti le ka.” Kan Keith ti perdi son louvraz, i ti fer pionye asistan. I rapel: “Fer pionye ti fer mwan rapel ki kantite lazwa ou gannyen ler ou partisip dan predikasyon.” Zot ti vin zanmi avek en koup pionye ki ti ed zot pour vwar sa lazwa ki en dimoun i gannyen kan i viv en lavi senp e fer pionye. Ki Keith ek Erika ti fer? Zot dir: “Nou ti fer en lalis bann lobzektif spirityel, met li lo refrizerater e met en tik a sak fwa ki nou akonplir enn sa bann lobzektif.” Avek letan, zot ti arive fer pionye.

17. Akoz i pou byen pour ou aziste ou progranm ouswa fason viv pour ki ou kapab fer pionye?

¹⁷ Eski ou kapab vin en pionye? Si ziska aprezan ou pa vwar ki mannyer sa i posib, fer tou sa ki ou kapab pour vin pli pros avek Zeova par partisip aktivman dan predikasyon. Apre ki ou’n egzamin ou sirkonstans e priy lo la, petet ou pou vwar ki fer serten azisteman dan ou progranm ouswa fason viv pou ed ou fer pionye. Si ou kapab fer pionye, i pou vo lapenn fer bann sakrifis akoz ou pou ganny bokou lazwa. Ou pou ganny plis satisfaksyon kan ou pou’n met lentere Rwayonm avan sa ki pour ou. (Mat. 6:33) Ou pou ganny bokou plis lazwa kan ou fer keksoz pour lezot. Deplis, ou pou annan plis loportinite pour mazin e koz lo Zeova, ki pou ogmant ou lanmour pour li e fer li plezir.

[Not anba lo paz]

[Kestyon]

[Portre lo paz 27]

[Portre lo paz 29]

Ou annan en lavi satisfezan kan ou okipe dan servis a plen tan (Vwar paragraf 9)