1, 2. (1) ¿Jameerü pukuwaʼipa nümaa wanee püpüshi jülüjüle maʼin paaʼin nia otta anale pünüiki nüchiki? (Piirakaa sümüin tü ayaakuaakat.) (2) ¿Kasa pütchi wekirajaainjatka anain?

JÜLÜJÜLE maʼin paaʼin wanee püpüshi otta anale pünüiki nüchiki, aleeweechi maʼin pia nümaa. Müle pukuwaʼipa nümaa Jeʼwaa, aleeweechi maʼin pia nümaa. Wanaa sümaa nürüleejapuʼuin David, nünajüin tü shüliwaikalüirua sümaa jülüjüin naaʼin pülashin maʼin chi Maleiwakai. Müshi nia: «Wanaa sümaa teʼrüin tü kasa pukumajakat, maʼaka saaʼin tü aituʼukat, chi kashikai sümaa tü shüliwaikalüirua, ponusü maʼin taaʼin süka jülüjüin paaʼin na wayuukana. Jaʼitainna wayuuin neʼe waya, aaʼinmajünüshii waya putuma» (Sal. 8:3, 4, NM). Süchikijee jülüjüin naaʼin Pablo tü naainjakat Jeʼwaa napüleerua na anoujüshii chainjanakana iipünaa, müshi nia: «Anashii waʼwaajüle chi Maleiwakai. Kekiishaatashi maʼi nia. Nütüjaa aaʼulu kasa süpüshua» (Roma 11:17-27, 33).

² Wanaa sümaa waküjüin pütchi otta jülüjüin waaʼin Jeʼwaa, anasü wakuwaʼipa nutuma. Aishi maʼin Maleiwa napüla na aʼyataakana waneepia nümüin süka kooʼomüin natuma tü naʼyataainkat. Piʼyataale waneepia nümüin Maleiwa jee piʼyataweere waneepia nümüin, jülüjeesü paaʼin pütchikat tüü: ¿Jamüshi aleeweechika maʼin nümaa Maleiwa wanee anoujüshi pürekutsoorüle nia? ¿Kasa paaʼinrajatka süpüla ayatüinjachin pürekutsoolin pia? Isayürüle püchiki pürekutsoolin pia, ¿kasa paaʼinrajatka süpüla puuntüin tia? Wekirajaa sünain tü waaʼinrajatkat süpüla aleewain waya nümaa Maleiwa sutuma waʼyataain waneepia nümüin.

3. ¿Jameerü wakuwaʼipa nümaa Jeʼwaa waküjüle pütchi süchiki tü kasa anasü nüntirajatkat?

³ Waküjüle pütchi süchiki tü kasa anasü nüntirajatkat Jeʼwaa, aleeweena maʼin waya waneepia nümaa. ¿Jarat tü  wersiikuloirua paashajeʼeraka maʼin namüin na wayuukana? Eesü shiale Salmo 37:10, 11; Daniel 2:44; Juan 5:28, 29 jee Alateetkat Mapeena 21:3, 4. Wanaa sümaa waküjüin sümüin wayuu süchiki tü naaʼinrajatkat Jeʼwaa wapüleerua, sotusü waaʼin anain süpüshuaʼa tü nüsülajakat wamüin chi Maleiwakai. Sutuma tia, weʼrüin aleewain maʼin waya nümaa (Sant. 1:17).

4. Püküja jamüin kojutüka wamüin tü shiimainkat sutuma waküjüin pütchi namüin na wayuu nnojoliikana anain anoula.

⁴ Waküjüle pütchi namüin na wayuu nnojoliikana anain anoula, kojuteerü maʼin wamüin tü shiimainkat. Nnojoishii jaraliin ekirajüin na wayuukana süpüla anainjatüin otta talatüinjatüin naaʼin. Mainma na shapaakana aaʼin sutuma nnojoluin natüjaain saaʼu tü alatajatkat mapeena, tü naaʼinrajatkat Maleiwa napüleerua otta tü naaʼinrajatkat süpüla talatüin naaʼin. Akaʼaya na suluʼukana wanee iküleesia, nnojotsü nayaawatüin aaʼu tü sümakat tü Wiwüliakat. Meematsü nakuwaʼipa maʼaka saaʼin nakuwaʼipa na wayuu chajanakana Nínive (paashajeʼera Jonás 4:11 *). Waʼyataale maʼin sünain aküjaa pütchi, weʼrüin anain maʼin nanoula na aʼyataashiikana nümüin Jeʼwaa noulia na waküjakana amüin pütchi (Is. 65:13). Sotusü waaʼin nnojoliin wayain neʼe anain anoula nutuma Maleiwa. Nuunejaain napüshuaʼa na wayuukana süpüla nüküjüinjatüin namüin tü naaʼinrajatkat napüleerua otta anainjatüin nanoula nutuma (Alat. Map. 22:17).

5. ¿Jameerü waaʼin wekirajüle wayuu sünain tü Wiwüliakat mayaapejeʼe sülatüin wamüin kasa mojusü?

⁵ Wekirajüle wayuu sünain tü Wiwüliakat, nnojoleerü shapaain maʼin waaʼin sutuma tü alatakat wamüin. Alatüsü tia sümüin Trisha, wanee pürekutsoot. Ooʼulaajiraashi chi süshikai suulia tü shiikat. Müsü shia: «Shapaasü maʼin taaʼin sutuma tü alatakat tamüin». Mayaapejeʼe shapaain maʼin saaʼin, ojuʼitüsü sünain ekirajaa apünüinshii tepichi. Mojuleesia maʼin tü alatakat namüin na tepichikana. Apütünüshii nutuma chi nashikai otta ataüjaanüshii nutuma chi napayakai. Müsü Trisha: «Alanaʼaleesia tü kasa mojusü alatakat namüin na tepichikana suulia tü alatakat tamüin». Wanaa sümaa shikirajüin na tepichikana, talatüshii maʼin. Süküjüin nükaaliinjüin shia Jeʼwaa nakajee na tepichikana.

6, 7. (1) Wekirajüle wayuu sünain tü Wiwüliakat, ¿jamüsü weʼitaajeetka maʼin waaʼin sünain tü pütchi sümakat? (2) ¿Kaseerü waainjaka weʼrüle anain nakuwaʼipa na wayuu aainjakana tü sümakat tü Wiwüliakat?

⁶ Wekirajüle wayuu sünain tü Wiwüliakat, katchinjeerü wanoula. Müshi Pablo nachiki na judío nnojoliikana aaʼinrüin tü nekirajakalü anain: «Jia ekirajüliikana wayuu, ¿jamüsü nnojotkaʼa jaaʼinrüin tü jikirajakat anain?» (Roma 2:21). Nnojotsü müin nakuwaʼipa na pürekutsootkana. Akatatshii naya kaʼi süpüla nekirajüinjatüin wayuu sünain tü Wiwüliakat. Süpüla anainjatüin maʼin nekirajia, ekirajaashii naya süpülapünaa nekirajüin wayuu otta nekirajaa anainrü tü pütchi asakinnakalü anain naya. Müsü Janeen, wanee pürekutsoot: «Wanaa sümaa tekirajüin wayuu sünain tü Wiwüliakat, sotusü taaʼin waneepia tü sümakat tü Wiwüliakat otta ojutuusü shia suluʼu taaʼin. Sutuma taainjüin tia, kooʼomüinsü maʼin tü tanoulakat».

⁷ Weʼrüle anain maʼin nakuwaʼipa na wayuu aainjakana tü sümakat tü Wiwüliakat, kojuteerü maʼin wamüin tü nümakat Maleiwa (Is. 48:17, 18). Sünainjee tia, achecheraashii waya süchiirua tü nümakat Maleiwa süpüla weʼitaainjatüin suluʼu wakuwaʼipa. Müsü Adrianna, wanee pürekutsoot: «Mojusü nakuwaʼipa na wayuukana naaʼinrüle tü anakat saaʼin namüin. Akatsaʼa anain nakuwaʼipa naaʼinrüle tü nümakat Jeʼwaa». Meematsü tü nümakat Phil, wanee pürekutsoot: «Ponusü maʼin taaʼin süka teʼrüin shiiʼiratüin nakuwaʼipa na wayuukana nutuma Jeʼwaa».

8. ¿Jameerü waaʼin waküjüle pütchi namaa na wawalayuukana?

⁸  Waküjüle pütchi namaa na wawalayuukana, wachechereerü waaʼin sünain anoujaa (Prov. 13:20). Mainma na pürekutsoot alatirakana kaʼi sünain aküjaa pütchi namaa na nawalayuukana. Sutuma tia, akaaliinjiraashii süpüla nachecherüin naaʼin sükajee tü nanoulakat (Roma 1:12; paashajeʼera Proverbios 27:17 *). Müsü Lisa, wanee pürekutsoot: «Chaa taʼyataaleruʼu, ayoujiraasü sümaa süchunjiraain saaʼin wayuu saaʼu wanee kasa. Eperulajüshii naya, yarüttüsü nanüiki otta yaleteeshii naya noulia na waneeinnua. Naapülijüin sümaa nemeeʼerainpalain waya sutuma naatain wakuwaʼipa noulia. Aluʼusaʼa waküjüle pütchi namaa na wawalayuukana, achecheraasü waaʼin sükajee tü nanoulakat. Jaʼitairü mapüsain maʼin taya taleʼejapa tepialuʼu, anasü taya sümaa talatüin taaʼin».

9. ¿Jameerü nukuwaʼipa wanee wayuu sümaa nuʼwayuuse pürekutsoorüle naya?

⁹ Pürekutsoorüle wanee wayuu sümaa nuʼwayuuse, paaʼinwajiraajeena (Ecl. 4:12). Müsü Madeline, wanee pürekutsoot nümaa suʼwayuuse: «Eesü yootule taya nümaa chi taʼwayuusekai süchiki tü waaʼinrakat sünain aküjaa pütchi. Eeshii waashajaale süchiki tü waashajeʼerakat suluʼujee tü Wiwüliakat jee tü anakat süpüla waaʼinrüin sünain aküjaa pütchi. Sutuma pürekutsoolüin waya piamaleʼeya, aleewajiraashii maʼin waya». Meematsü tü sümakat Trisha, müsü shia: «Weʼitaain wapüleerua nnojoliinjanain kojuyaalain waya. Makalaka nnojoliin waʼülüjiraain süchiirua nneerü. Oʼunawaishii waya piamaleʼeya sünain aküjaa pütchi, sünain ekirajaa  wayuu otta wouyantüin wachikuaʼa nanainmüin na ekirajaweekana. Anasü waaʼin otta wanoula sutuma waainjüin tia».

10. ¿Kaseerü waainjaka palajanale watuma Nuluwataaya Maleiwa otta nükaaliinjüle waya?

¹⁰ Weʼitaajeerü maʼin waaʼin nünain Jeʼwaa, palajanale watuma tü Nuluwataayakat, nükaaliinjüle waya otta naapüle wanüiki. Naainjüin tia na anoujüshii nümaakana Jeʼwaa waneepia. Akanasaʼa na aʼyataakana maʼin waneepia nümüin Jeʼwaa, ayatüshii naya pürekutsoolüin süka neʼitaain maʼin naaʼin nünain Jeʼwaa (paashajeʼera Mateo 6:30-32, 34 otta Mateo 6:33 *). Anuu tü alatakat nümüin Curt. Pürekutsootshi sümaa niiʼirakawalin nia chi wawala alapalaakai waaʼu. Oʼunajachi nia sünain alapalawaa naaʼu na wawalayuukana. Eetaasü maʼaka piama oora shiatapünaamüin eemüinjachire nia. Manneetsesai süpüla niyaʼlajüin süsüneʼe tü neʼejenakat nüleʼejapa. Isayülia wanee semaana süpüla nüchekajüin niʼyataain. Müshi Curt: «Nnojotsü tatüjaain aaʼu müleka toʼunüinjachire». Süchikijee nuʼuraajüin, oʼunajachi nia naashin. Niʼitaain naaʼin nünain Jeʼwaa sünain naapeerüin tü choʼujaakat nümüin. Süpülapünaa nuʼunüin sümaa nuʼwayuuse, ayamaajünüshii sutuma wanee wawala. Süküjüin namüin eein wanee kasa süsülajeeka namüin. Tü nneerü süsülajakat tü wawalakat, shiaʼaya maʼin tü choʼujaakat namüin süpüla nayaʼlajüin kosoliina. Müshi Curt: «Sükajee tü alatawaikat tamüin, teʼrüin nükaaliinjüin maʼin taya Jeʼwaa».

11. ¿Jarat tü kasa anasü neʼrakat na pürekutsootkana?

¹¹ Sutuma naʼyataain maʼin nümüin Jeʼwaa na pürekutsootkana otta narütkaain maʼin nünainmüin, mainma kasa anasü neʼraka sünainjee (Deut. 28:2). Eepajaʼa süpüla sülatüin kasa mojusü namüin na pürekutsootkana. Sutuma nnojoluin lotuin maʼin tü wakuwaʼipakat, alatüsü wamüin kasa mojusü. Müshiijeseʼe eein wawalayuu ooʼulaakana suulia pürekutsoolüin maʼaka jeʼra kashi. Akatsaʼa eein süpüla nanouktüin tü alatakat namüin jee naaʼinmajüin nakuwaʼipa süpüla ayatüin pürekutsoolüin naya. ¿Kasa naaʼinrajatka na wawalayuukana süpüla ayatüinjanain pürekutsoolüin naya?

12, 13. (1) ¿Kasa naaʼinrajatka wanee pürekutsoot nnojorüle nikeraajüin tü oora eʼitaanakat nüpüleerua? (2) ¿Jamüsü naashajeʼerüinjatka weinshi tü Wiwüliakat na pürekutsootkana, nekirajaainjatka sünain otta jülüjüinjatka naaʼin tü sümakat?

¹² Eesü kapüleere namüin na pürekutsootkana nekeraajüin süpüshuaʼa tü kasa naaʼinrajatkat. Makalaka anain nashajüle suluʼu wanee karaloukta tü naaʼinrajatkat süpüla nekeraajüinjatüin shia (1 Cor. 14:33, 40). Nnojorüle nikeraajüin wanee pürekutsoot tü oora eʼitaanakat nüpüleerua, choʼujaasü nunoukteʼerüinjatüin tü kasa nnojotkat nikeraajüin atuma shia (Éf. 5:15, 16, NM). Jülüjüinjatü naaʼin pütchikat tüü: «¿Jeʼrache maʼin oora talatitka sünain ashaittaa? ¿Choʼujaasüche tachecherüin maʼin taaʼin suulia tia? ¿Eesüche süpüla teeʼiratüin tü kaʼi taʼyataakalü oʼu?». Watüjaa aaʼu tü kasa nnojotkat wekeraajüin atuma tü kasa eʼitaanakat wapüleerua. Na wawalayuu aʼyataakana nümüin Jeʼwaa waneepia, jülüjeesü naaʼin jamüin isaka nachiki nekeraajüin tü oora eʼitaanakat napüleerua otta kasain nanoukteʼerüinjatüin sünain nakuwaʼipa.

¹³ Wanee kasa naaʼinrajatka maʼin na pürekutsootkana shia naashajeʼerüinjatüin weinshi tü Wiwüliakat, nekirajaainjatüin sünain otta jülüjüinjatüin naaʼin tü sümakat. Nachecherüinjatü naaʼin suulia naaʼinrüin waneeirua kasa nnojotka anain maʼin (Filip. 1:10). Jülüjataa paaʼin tü naainjakat wanee pürekutsoot süchikijee nüküjüin pütchi. Ekirajaainjachi süpüla yapainjatüin nutuma tü ekirajaanajatkalü anain sünain tü outkajawaakat. Süpülapünaa nikirajaain, aikkalaashi sünain tü computadorkot süpüla naashajeʼerüin otta nuluwataain mensaaje shiʼipajee  tü aluwataanakat nümüin. Sümaʼinruʼu yalain nia sünain tü computadorkot, niʼrajaain suluʼu wanee página süliapala wanee kasa niyaʼlajeeka amüin. Eetaaichi maʼaka piama oora joyotuin sünain tü computadorkot sümaa nnojoyülin nuʼttüin sünain ekirajawaa. ¿Jamüsü mojuka tü naainjakat? Jamüshijaʼa wanee wayuu ayoujiraai, anainjatü niküin süpüla katchinjatüin naaʼin sünain awatawaa. Müinjatia nakuwaʼipa na pürekutsootkana. Ekirajaainjana waneepia süpüla ayatüinjatüin ichein nanoula otta ayatüinjanain pürekutsoolüin naya (1 Tim. 4:16).

14, 15. (1) ¿Jamüsü nnojoluinjatka kachiiruain naaʼin kamaʼanaa mainma kasa na pürekutsootkana? (2) ¿Kasa naaʼinrajatka na pürekutsootkana sülatüle kasa mojusü namüin?

¹⁴ Na pürekutsoot anakana atuma sukuwaʼipa naʼyataain nümüin Maleiwa, nnojotsü kachiiruain naaʼin kamaʼanaa mainma kasa. Tia, nüküjüin Jesuu namüin na nikirajüinkana (Mat. 6:22). Süpüla jülüjüinjatüin naaʼin Jesuu tü aʼyatawaakat nümüin Maleiwa, nnojotsü kachiiruain naaʼin mainma kasa. Müshi nia: «Tü walitkalüirua, eesü ishi süpüla eeinjatüle sütunküin. Je tü wuchiikalüirua, kepiasü iipünaa eere sütunküle. Otta tayakai, chi Shipayakai Wayuu, mepiasai» (Mat. 8:20). Chi pürekutsoot ashateekai nukuwaʼipa Jesuu, nnojoluinjatü kachiiruain naaʼin mainma kasa. Süka jamüin, shieerü niʼyataaka maʼin anain aaʼinmajaa, akumajaa otta niiʼiratüin eekai seewaain.

¹⁵ Na pürekutsootkana natüjaa aaʼu nnojoliin pürekutsoolüin naya süka naaʼin namüiwaʼa. Pürekutsootshii naya nutuma Jeʼwaa. Makalaka anain neʼitaale naaʼin nünain Jeʼwaa süpüla ayatüinjanain pürekutsoolüin naya (Filip. 4:13, NM). Eejeerü kasa kapüleesü otta kasa mojusü alatawaijeetka namüin (Sal. 34:19). Sülatapa tia namüin, nnojotsü anain nooʼulaajaale suulia pürekutsoolüü, shia anaka aluʼu nachuntüle kaaliinwaa nümüin Jeʼwaa (paashajeʼera Salmo 37:5 *). Aleeweena maʼin naya nümaa Jeʼwaa shiʼipaʼaya nakaaliinjünüin nutuma (Is. 41:10).

16. ¿Kasa paaʼinrajatka pürekutsooleere pia?

¹⁶ Pürekutsooleere pia, püküja shia nümüin Jeʼwaa (1 Juan 5:14, 15). Paashajaa namaa na pürekutsootkana süpüla pütüjaain saaʼu tü paaʼinrajatkat. Piʼitaa püpüleerua püsaʼwatüin pürekutsoolin pia. Naainjüin tia Keith sümaa Erika. Süchikijee kasaalüin naya, aʼyataashii maʼin, ayaʼlajüshii piichi otta kemion. Müshii naya: «Talatüinjanayaa waya waküjainruʼu sutuma tü kasa wayaʼlajakat». Süchikijee nujutünüin Keith suulia niʼyataain, pürekutsootshi aaʼusiliaat nia. Müshi nia süchiki tia: «Talatüsü maʼin taaʼin süka taküjüin maʼin pütchi waneepia». Niakai sümaa tü nuʼwayuusekat, aleewajiraashii nümaa wanee wawala pürekutsootshi sümaa nuʼwayuuse. Nayaawataka saaʼu talatüin naaʼin wanee wayuu nnojorüle kachiiruain naaʼin mainma kasa otta pürekutsoorüle nia. ¿Kasakaʼa naainjüin Keith sümaa Erika? Müshii naya: «Washajüin sünain karaloukta tü kasa wasaʼwateekat sünain wanoula, weʼitaaka shia sünain tü neweerakat. Wejeettawalin tü eekai wasaʼwatüin». Pürekutsootshii naya mapa.

17. ¿Jamüsü anaka wachajaale sukuwaʼipa süpüla pürekutsoolüin waya?

¹⁷ ¿Eeshi süpüla pürekutsoolin pia? Isayürüle püchiki pürekutsoolin pia, pürütkaa maʼin nünainmüin Maleiwa sükajee piʼyataain maʼin sünain aküjaa pütchi. Süchikijee paashajaain nümaa, eesü süpüla püchajaain sukuwaʼipa süpüla pürekutsoolin pia. Puuntüle pürekutsoolin pia, alanaʼaleejeeria tü talataa eejeetkat pümaʼana suulialeʼeya tü kasa püpütakat süpüleerua. Jee müsia, palajaneerü putuma tü Nuluwataayakat Maleiwa suulialeʼeya tü keeʼireekat paaʼin pümüiwaʼa (Mat. 6:33, NM). Talateerü paaʼin sutuma pükaaliinjüin na wayuukana. Jülüjeechi maʼin paaʼin Jeʼwaa waneepia, aküjeechi pia pütchi nüchiki, aijeechi maʼin nia püpüla otta talateerü naaʼin putuma.