Painia Gaukara ese Eda Hetura Karana Dirava Ida Ia Hagoadaia
“Ane dekenai Dirava do ita hanamoa be namo.”—SAL. 147:1.
1, 2. (a) Eda lalokau tauna ta ita laloa bona ena kara ita herevalaia neganai, dahaka do ia vara? (Laulau ginigunana itaia.) (b) Edena henanadai do ita herevalaidia?
EDA lalokau tauna ta ita laloa bona ena kara ita herevalaia neganai, unai ese eda hetura karana ia ida ia hagoadaia. Iseda hetura karana Iehova Dirava ida be unai bamona danu. Davida be mamoe ia naria neganai, hanuaboi momo guba ena hisiu ia raraidia bona idia ia Havaraia Tauna ena siahu ia laloa dobu. Ia gwau: “Oiemu guba lau itaia, oi ese oiemu imana dekenai oi karaia. Hua bona hisiu danu be oi ese oi atoa. Taunimanima be dahaka, oi ese idia oi laloa noho? Taunimanima be maragi herea, dahaka dainai oi ese oi naridia noho?” (Sal. 8:3, 4) Aposetolo Paulo be Iehova ese horoa taudia ia abia hidi dalana ia herevalaia neganai, ia gwau: “Dirava ena taga, ena aonega bona ena diba be dobu momokani!”—Roma 11:17-26, 33.
2 Haroro gaukara ita lao neganai, ita be Iehova ita laloa bona ena kara ita herevalaidia. Unai ese eda hetura karana ia ida ia hagoadaia. Painia momo idia gwau, haroro gaukara idia habadaia neganai, edia lalokau Dirava dekenai ia bada. Bema hari oi painia noho, eiava oi ura do oi painia, namona be sibona oi nanadaia: ‘Edena dala ai painia gaukara ese egu hetura karana Iehova ida do ia hagoadaia?’ Bema oi be painia ta, sibona oi nanadaia: ‘Dahaka ese lau do ia durua lau painia noho totona?’ Bema painia gaukara oi do karaia lasi, sibona oi nanadaia: ‘Lau painia totona egu mauri lalonai dahaka gaudia lau haidaua diba?’ Painia gaukara ese eda hetura karana Dirava ida ia hagoadaia diba daladia haida mani ita herevalaia.
PAINIA GAUKARA BONA EDA HETURA KARANA IEHOVA IDA
3. Vaira negana ai do idia vara Basileia ena hahenamo idauidau ita harorolaia karana ese edena dala ai ita ia durua?
3 Vaira negana ai do idia vara Basileia ena hahenamo idauidau ita harorolaia neganai, Iehova kahirakahira ita lao. Ruma-ta-ruma-ta haroro gaukara ai, edena siri oi gaukaralaidia momo? Reana oi ura henia siridia be Salamo 37:10, 11; Daniela 2:44; Ioane 5:28, 29; eiava Apokalupo 21:3, 4. Unai siri ai idia noho gwauhamata idauidau be ma haida ida ita herevalaia neganai, ita laloatao Iehova be “harihari gaudia namodia ibounai bona harihari gaudia hereadaedia” ia henia Diravana. Unai ese Iehova kahirakahira ita ia veria lao.—Iam. 1:17.
4. Dirava idia diba lasi taudia be hekwakwanai momo idia davaria ita itaia neganai, edena dala ai unai ese ita ia durua?
4 Dirava idia diba lasi taudia be hekwakwanai momo idia davaria ita itaia neganai, unai ese ita ia hagoadaia hereva momokani ita laloa bada totona. Tanobada taudia be ta ese ia durua lasi moale korikorina idia davaria totona. Momo be vaira negana idia lalohekwarahilaia dainai, idia mamia helaro be lasi, bona idia mauri noho ena badina idia tahua. Danu, dubu idia lao taudia be Baibel idia diba namonamo lasi. Idia be Nineva taudia bamona. (Iona 4:11 duahia.) a Ita haroro momo neganai, ita itaia Iehova be iena taunimanima ia naria namonamo. (Isa. 65:13) Unai ese ia hamomokania, Iehova be kara namo Diravana, badina ia ese ita dekenai hereva momokani ia henia, bona dala ia kehoa heduru bona helaro korikorina ita davaria totona.—Apok. 22:17.
5. Edena dala ai ma haida dekenai hereva momokani ita hadibaia karana, ese ita ia durua eda hekwakwanai ita lalodia momo lasi totona?
5 Ma haida dekenai Dirava ena hereva momokani ita hadibaia neganai, unai ese ita ia durua eda hekwakwanai ita lalodia momo lasi totona. Trisha, regula painia taihu ta be ia lalohisihisi badina ena tama sina ese edia headava idia hadokoa. Ia gwau: “Unai nega ai lau lalohisihisi bada.” Dina ta, Trisha ia lalohisihisi dainai, ia laloa do ia lao lasi haroro. To, gabeai ena lalona ia haidaua bona natuna maragidia toi ia stadi henia totona ia lao. Unai natudia toi edia ruma bese lalonai hekwakwanai be momo. Edia tamana ese ia rakatanidia bona edia kakana ese ia kara auka henidia. Trisha ia gwau: “Idia davaria hekwakwanai be bada herea, bona lauegu be maragi. Ai stadi neganai, edia vairana ia diari bona mai moale ida idia kiri. Unai dina ai, Iehova ese unai natudia be harihari gaudia bamona lau dekenai ia henia.”
6, 7. (a) Ma haida dekenai hereva momokani ita hadibaia neganai, edena dala ai unai ese eda abidadama ia hagoadaia? (b) Baibel stiuden taudia be Baibel ena hakaua herevadia idia badinaia bona edia mauri idia haidaua neganai, iseda hemami be edena bamona?
6 Hereva momokani be ma haida dekenai ita hadibaia neganai, iseda abidadama ia goada. Aposetolo edia negai, Iuda taudia haida be idia harorolaia herevadia idia badinaia lasi. Paulo be idia ia herevalaia, ia gwau: “Oi ese ta oi hadibaia, to oi sibona oi hadibaia lasi, a?” (Roma 2:21) To hari, painia taudia be dala idauidau ai hereva momokani idia harorolaia bona ma haida dekenai Baibel stadi idia karaia diba. Unai idia karaia totona, edia Baibel stadi totona idia hegaegae, bona taunimanima edia henanadai idia haerelaia totona tahua gaukara idia karaia. Painia ta ladana Janeen, ia gwau: “Lau be ma haida dekenai hereva momokani lau harorolaia neganai, unai hereva momokani be egu lalona bona kudouna dekenai lau abidadama henia momokani. Unai dainai egu abidadama ia goada ia lao.”
7 Baibel stiuden taudia be Baibel ena hakaua herevadia idia badinaia bona edia mauri idia haidaua ita itaia neganai, unai ese ita ia durua Dirava ena aonega ita laloa bada totona. (Isa. 48:17, 18) Danu, unai ese ita ia hagoadaia eda mauri lalonai unai hakaua herevadia do ita badinaia noho. Adrianna, ia gwau: “Taunimanima be sibona edia aonega dekenai idia tabekau neganai, edia mauri lalonai hekwakwanai momo idia davaria. To, Iehova ena aonega idia badinaia neganai, maoromaoro edia mauri ia namo ia lao.” Painia ma ta ladana Phil ia gwau, ia hoa badina ia itaia Iehova ena heduru dainai, taunimanima be edia mauri idia haidaua.
8. Haroro gaukara ai tadikaka taihu ita bamoa neganai, edena dala ai unai ese ita ia durua?
8 Haroro gaukara ai tadikaka taihu ida ita gaukara neganai, ita idia hagoadaia. (Aon. 13:20) Painia taudia be nega bada idia haorea tadikaka taihu ida idia haroro totona. Unai ese dala ia kehoa idia “hagoadaia heheni” totona. (Roma 1:12; Aonega Herevadia 27:17 duahia.) Painia taihu ta ladana Lisa, ia gwau: “Moni gaukara gabunai nega momo gaukara taudia be idia kara helulu bona idia mama. Dina ta ta ai udu mauri bona hereva mirodia do oi kamonai. Ibounai idia ura ma haida idia hereaia. Nega haida emu Keristani kara namodia dainai, oi do idia kirikirilaia bona gwauraia dika. To, haroro gaukara ai tadikaka taihu oi bamoa neganai, unai ese oi ia hagoadaia bada. Haroro murinai ruma dekenai lau giroa neganai, ena be egu tauanina ia hesiku, to lau moale.”
9. Headava taudia idia painia hebou neganai, edena dala ai unai ese edia headava ia durua?
9 Eda adavana ida ita painia hebou neganai, eda headava ia goada. (Had. 4:12) Ena adavana ida ia painia taihu ta Madeline, ia gwau: “Dina ta ta ai, lau bona egu adavana be haroro gaukara ai ai davaria ekspiriens ai herevalaia, o emai Baibel duahiduahi amo ai davaria point ta be haroro gaukara lalonai ai gaukaralaia diba dalana ai herevalaia. Lagani ta ta ai painia hebou neganai, emai hetura karana ia goada ia lao.” Unai hegeregerena Trisha ia gwau: “Ai ura lasi ai abitorehai, unai dainai ai be moni dainai ai hepapahuahu lasi. Bona sediual tamona ai badinaia dainai, emai stadi bona lou henia ai itadia hebou. Unai ai karaia dainai, emai headava bona hetura karana Iehova ida ia goada noho.”
Painia gaukara oi karaia neganai, emu mauri do oi moalelaia (Paragraf 9 itaia)
10. Basileia ita atoa guna bona Iehova ena heduru ita mamia neganai, edena dala ai unai ese eda abidadama ia hagoadaia?
10 Basileia ita atoa guna, Iehova ena heduru ita mamia, bona eda guriguri ia haerelaia karana ese eda abidadama ia hagoadaia. Momokani, ita ibounai ese Iehova ita abidadama henia. To, painia taudia idia laloparara Iehova dekenai idia tabekau neganai, edia painia gaukara idia karaia noho diba. (Mataio 6:30-34 duahia.) Curt be painia tadikaka ta bona nega haida sekit gaukara ia karaia. Nega ta ia idia noia kongrigeisen ta do ia vadivadi henia, bona ena daudau be hora rua mai kahana. Curt bona ena adavana (painia ta) edia motuka ena petrol be hegeregere idia lao totona, to do idia giroa mai be hegeregere lasi. Danu, Curt ena pei dinana be wiki vaira ai. Curt ia gwau idia daradara, do idia lao o lasi. To, idia guriguri murinai, edia lalona idia hadaia do idia lao, badina idia diba Dirava ese edia dabu gauna do ia henia. Idia lao gwauraia neganai, taihu ta ia rini bona ia gwau ia ura idia dekenai harihari gauna ta ia henia. Ia henia monina be hegeregere idia giroa mai ena petrol davana idia karaia totona. Curt ia gwau: “Nega momo unai bamona ekspiriens oi davaria neganai, do oi laloparara Iehova be oi ia durua noho.”
11. Painia taudia ese idia moalelaia hahenamo haida be dahaka?
11 Oibe, painia taudia idia itaia edia hesiai gaukara idia habadaia bona edia hetura karana Iehova ida ia goada neganai, hahenamo momo idia davaria. (Deu. 28:2) To, painia gaukara be mai ena hekwarahi danu. Iehova ena hesiai taudia danu be Adamu ena gwau-edeede dainai, hekwakwanai idauidau idia davaria. Ena be nega haida hekwakwanai haida dainai painia taudia haida be nega sisina lalonai edia hesiai gaukara idia rakatania, to idia davaria unai idia hamaoromaoroa eiava hanaia diba. Dahaka ese painia taudia ia durua diba, edia hesiai gaukara namona idia karaia noho totona?
OI PAINIA NOHO DALANA
12, 13. (a) Bema painia ta be ena hora ia hagugurua lasi, dahaka ia karaia diba? (b) Dahaka dainai dina ta ta ai Baibel duahiduahi, sibona ena stadi bona laloa dobu karana be mai anina bada?
12 Painia momo be idia bisi bada. Unai dainai, gau ibounai idia karaia totona, hegaegae namonamo karana be gau badana. (1 Kor. 14:33, 40) Bema painia tauna ta be ena hora ia hagugurua lasi, ena nega ia gaukaralaia dalana ia sekea be namo. (Efe. 5:15, 16) Reana do ia henanadai: ‘Lau be moale karadia dekenai nega bada lau haorea, a? Egu moni gaukara ena sediual lau haidaua diba, a? Lau ese anina lasi gaudia dekenai egu nega bada lau haorea, a?’ Painia taudia ese hanaihanai unai henanadai idia lalodia, bona edia kara idia haidaua be namo.
13 Namona be painia taudia ese dina ta ta ai Baibel idia duahia, sibona edia stadi idia karaia bona idia stadilaia gaudia idia laloa dobu. Danu, edia kara idia biagua be namo, unai amo mai anina bada gaudia karaia totona idia atoa negana do idia gaukaralaia kerere lasi. (Fili. 1:10) Mani inai oi laloa, painia tadikaka ta be dina ibounai ia haroro murinai ena ruma dekenai ia giroa lou. Sediual ia karaia vadaeni unai adorahi ai hebou totona do ia hegaegae. To guna ia ese mobael fon amo ta ia rini henia. Bena TV ia kehoa bona niusi ia itaia. Niusi murinai, muvi namona ta idia halasia dainai, tadikaka be unai muvi ia itaia danu. Gabeai ia laloparara hora rua idia ore vadaeni, bona ia be hebou totona ia do hegaegae lasi. Dahaka dainai unai be hekwakwanai ta? Bema heau helulu tauna ia ura ia kwalimu noho, namona be nega ibounai aniani maorodia ia ania. Unai hegeregerena, namona be painia taudia ese sediual namona idia karaia sibona edia stadi idia karaia totona, unai amo edia abidadama ia goada bona painia gaukara idia karaia noho diba.—1 Tim. 4:16.
14, 15. (a) Dahaka dainai painia taudia ese kohu momo lasi maurina idia noholaia be namo? (b) Painia tauna be hekwakwanai ia davaria neganai, dahaka ia karaia be namo?
14 Edia painia gaukara idia moalelaia taudia be kohu momo lasi maurina idia noholaia. Iesu ese ena aposetolo taudia ia hagoadaia unai bamona idia karaia totona. (Mat. 6:22) Iesu danu be kohu momo lasi maurina ia noholaia, unai amo gau ta ese ena hesiai gaukara ia hadikaia lasi. Ia gwau: “Uda sisia be mai edia kohua bona guba manudia be mai edia ruma, to taunimanima ena Natuna ena kwarana ia atoa gabuna be lasi.” (Mat. 8:20) Bema painia ta ia ura Iesu ia tohotohoa, namona be ia laloatao bema ia be kohu momo ia haboua, do ia hekwarahi bada unai kohu ia naria, hanamoa, o matamata ia hoia totona.
15 Painia taudia idia diba idia be hesiai gaukara badana idia karaia, to idia laloa lasi idia ese ma haida idia hereaia. Idia laloparara, edia hesiai gaukara be Iehova ena harihari gauna. Unai dainai, idia painia noho totona, idia ta ta be Iehova dekenai idia tabekau be gau badana. (Fili. 4:13) Oibe, hahetoho bona hekwakwanai do idia davaria. (Sal. 34:19) To, unai ia vara neganai, namona be Iehova ena heduru idia tahua bona idia abia dae. Namo lasi edia hesiai gaukara namona idia rakatania haraga. (Salamo 37:5 duahia.) Idia itaia Iehova be mai hebogahisi ida idia ia durua neganai, edia hetura karana Ia ida ia goada ia lao.—Isa. 41:10.
OI PAINIA DIBA, A?
16. Bema oi ura oi painia, dahaka oi karaia be namo?
16 Bema oi ura painia taudia ese idia moalelaia hahenamo idauidau oi abia, namona be Iehova dekenai unai oi gurigurilaia. (1 Ioa. 5:14, 15) Painia taudia oi hereva henidia. Oi painia totona, tahua gaudia haida oi atoa, bona oi gaukara goada oi hagugurudia totona. Keith bona Erika be unai bamona idia karaia. Idia headava bona daudau lasi murinai, ruma bona motuka matamata ta idia hoia. Idia gwau: “Ai laloa unai gaudia ese emai mauri do idia hanamoa—to unai bamona ia vara lasi.” Keith be ena gaukara ia haboioa neganai, heduru painia gaukara ia hamatamaia. Ia gwau: “Lau painia neganai, haroro gaukara amo ia mai moalena lau mamia.” Keith bona Erika be painia headava tau bona hahine ta idia tura henidia, bona edia heduru amo idia laloparara kohu momo lasi maurina bona painia gaukara ese moale bada idia havaraia. Idia gwau: “Emai tahua gaudia ena lista ta ai karaia bona frisa dekenai ai kapaia, bona tahua gauna ta ai hagugurua neganai, ai makaia.” Gabeai, idia danu be painia gaukara idia karaia.
17. Dahaka dainai emu mauri lalonai gau haida oi haidaua bona oi painia be abia hidi maorona?
17 Oi painia diba, a? Bema hari oi painia diba lasi, namona be emu haroro horadia oi habadaia, unai amo Iehova kahirakahira oi lao diba. Iehova dekenai oi gurigurilaia murinai, reana do oi itaia emu mauri lalonai gau haida oi haidaua be namo, unai amo oi painia diba. Painia gaukara amo oi davaria moalena ese oi rakatania gaudia edia moale ia hereaia. (Mat. 6:33) Ma haida oi durua dainai moale bada do oi davaria. Ma danu, Iehova do oi laloa bona nega momo ma haida dekenai ia oi herevalaia neganai, emu lalokau Iehova totona do ia goada bona ia do oi hamoalea.
