1, 2. (a) Ania ti resulta ti panangpampanunot ken panangisarsaritatayo iti maysa a patpatgentayo? (Kitaen ti ladawan iti rugi ti artikulo.) (b) Aniada a saludsod ti usigentayo?

BUMILEG ti relasiontayo iti maysa a patpatgentayo no pampanunoten ken isarsaritatayo ti maipapan kenkuana. Pudno met dayta no maipapan iti relasiontayo ken Jehova a Dios. Kas maysa a pastor, namin-adu a minatmatan ni David ti namituen a langlangit ken minennamennana ti awan kaaspingna a Namarsua kadagita. Insuratna: “No makitak ti langlangitmo, dagiti aramid ti ramramaymo, ti bulan ken dagiti bituen nga insaganam, ania ti mortal a tao tapno sipapanunotka kenkuana, ken ti anak ti naindagaan a tao tapno aywanam?” (Sal. 8:3, 4) Ken idi nagsurat ni apostol Pablo maipapan iti nakaskasdaaw a panangibanag ni Jehova iti panggepna agpaay kadagiti napulotan a Kristiano, inyebkasna: “O nagunegen ti kinabaknang ken sirib ken pannakaammo ti Dios!”—Roma 11:17-26, 33.

² Bayat a mangaskasabatayo, pampanunoten ken isarsaritatayo ti maipapan ken Jehova. Dayta ti mangpabileg iti relasiontayo kenkuana. Adu a payunir ti nakarikna nga immuneg ti panagayatda iti Dios gapu iti ad-adu a panawenda para iti trabaho ti Pagarian. Agdamaka man a payunir wenno ikagkagumaam a ragpaten dayta a kalat, usigem daytoy: Kasano a ti panagpayunir mapabilegna ti relasionmo ken Jehova? No maysaka a payunir, isaludsodmo iti bagim, ‘Ania ti makatulong kaniak nga agtultuloy iti daytoy a makagunggona a kita ti panagserbi?’ No saanka pay a payunir, isaludsodmo, ‘Ania dagiti aramidek a panagbalbaliw tapno makapagpayunirak?’ Usigentayo dagiti pamay-an no kasano a ti panagpayunir pabilgenna ti relasiontayo iti Dios.

3. Ania ti epekto kadatayo ti panangisarsaritatayo kadagiti bendision nga iyegto ti Pagarian?

³ Ti panangisarsarita iti sabsabali maipapan kadagiti bendision nga iyegto ti Pagarian pagbalinennatayo a nasinged ken Jehova. Ania a teksto ti magustuam nga usaren no mapanka mangasaba iti binalaybalay? Ti kadi Salmo 37:10, 11; Daniel 2:44; Juan 5:28, 29; wenno Apocalipsis 21:3, 4? Tunggal ilawlawagtayo iti sabsabali dagita a kari, maipalagip kadatayo a ti naparabur a Diostayo ti gubuayan ti “tunggal naimbag a sagut ken tunggal naan-anay a rangkap,” ket ad-adda a sumingedtayo kenkuana.—Sant. 1:17.

4. Apay nga umuneg ti panangtagipategtayo iti kinaimbag ti Dios no makitatayo ti nakaay-ay-ay a naespirituan a kasasaad ti sabsabali?

⁴ Ti pannakakitatayo iti nakaay-ay-ay a naespirituan a kasasaad dagiti kaskasabaantayo paunegenna ti panangtagipategtayo iti kinapudno. Dagiti tattao iti lubong awananda iti umiso a giya a makatulong iti panagbalinda a naballigi ken naragsak. Kaaduan kadakuada ti madandanagan iti masanguanan ken awanan iti namnama. Birbirokenda ti panggep ti biag. Uray ti kaaduan a relihioso a tattao bassit laeng ti ammoda maipapan iti Biblia. Awan nakaidumaanda kadagiti nagkauna a taga-Nineve. (Basaen ti Jonas 4:11.) No nayonantayo ti tiempotayo iti ministerio, ad-adda a silalawag a makitatayo ti naggidiatan ti naespirituan a kasasaad dagidiay kaskasabaantayo ken dagiti adipen ni Jehova. (Isa. 65:13) Maipalpalagip kadatayo ti kinaimbag ni Jehova ta saanna laeng nga ipapaay dagiti naespirituan a kasapulantayo no di ket yaw-awisna iti isuamin nga awatenda ti naespirituan a pannakabang-ar ken pudpudno a namnama.—Apoc. 22:17.

5. Bayat a tultulongantayo ti sabsabali iti naespirituan, ania ti mariknatayo kadagiti personal a parikuttayo?

⁵ Ti panangisuro iti kinapudno iti sabsabali tulongannatayo a di unay maringgoran kadagiti personal a parikuttayo. Ni Trisha, a maysa a regular pioneer, napaneknekanna a pudno daytoy idi nagdiborsio dagiti nagannakna. Kunana: “Dayta ti maysa kadagiti karigatan nga inibturak iti biagko.” Maysa nga aldaw, napalalo ti lidayna ken awan gaganaygayanna a rummuar iti ministerio. Ngem napan latta nangyadal iti Biblia iti tallo nga ubbing nga adda dakkel a problema ti pamiliada. Pinanawan ida ni tatangda, sa rangranggasan ida ni manongda. Kuna ni Trisha: “Awan kaimudingan ti aniaman a problema wenno saem a marikriknak no idilig iti kasasaadda. Bayat ti panagadalmi, yanninaw dagiti matada ti pannakabang-ar ken ragsak. Dagidiay nga ubbing ket sagut manipud ken Jehova, nangnangruna iti daydi nga aldaw.”

6, 7. (a) Kasano a mapabileg ti pammatitayo no isursurotayo dagiti kinapudno iti Biblia? (b) Ania ti mariknatayo no makitkitatayo a sumaysayaat ti biag dagiti yad-adalantayo gapu iti panangyaplikarda kadagiti Nainkasuratan a prinsipio?

⁶ Ti panangisuro kadagiti kinapudno iti Biblia pabilgenna ti pammatitayo. Nagsurat ni apostol Pablo maipapan kadagiti Judio idi kaaldawanna a saan a mangal-alagad iti ikaskasabada: “Sika a mangisursuro iti asinoman, dika aya isuro ta bagim?” (Roma 2:21) Anian a naiduma ita dagiti payunir! Adu ti gundawayda a mangisuro iti kinapudno iti sabsabali ken mangyadal iti Biblia. Tapno agbalinda nga epektibo, masapul a saganaanda ti tunggal panagadal ken nalabit agsukimatda iti sungbat dagiti mayimtuod kadakuada. Kuna ti maysa a payunir nga agnagan Janeen: “Bayat nga isursurok dagiti kinapudno iti sabsabali, ad-adda a mayukuok dagita iti isip ken pusok. Dayta ti agtultuloy a mangpabpabileg iti pammatik.”

⁷ Ti makitkitatayo a panagbalbaliw dagiti yad-adalantayo gapu iti panangyaplikarda kadagiti prinsipio ti Biblia paunegenna ti panangtagipategtayo iti sirib ti Dios. (Isa. 48:17, 18) Dayta met ti mangpabileg iti determinasiontayo a mangyaplikar kadagitoy a prinsipio. Kinuna ti maysa pay a payunir a ni Adrianna: “Awan direksion ti biag dagiti tattao no agpannurayda  iti bukodda a sirib. Ngem no agtalekda iti sirib ni Jehova, dagus a magunggonaanda.” Imbaga met ni Phil: “Makitam no kasano a balbaliwan ni Jehova dagiti tattao a saan a makapagbalbaliw iti bukodda a panagregget.”

8. Ania ti epektona kadatayo ti pannakikadua kadagiti kakabsat iti ministerio?

⁸ Ti pannakikadua kadagiti kakabsat iti ministerio pabilgenna ti espiritualidadtayo. (Prov. 13:20) Adu a tiempo ti busbusbosen dagiti payunir iti ministerio a kaduada dagiti kakabsat. Gapu iti dayta, ad-adu met ti gundawayda a ‘makipinnaregta.’ (Roma 1:12; basaen ti Proverbio 27:17.) Napaliiw ti maysa a payunir a ni Lisa: “Nakaro ti kompetision ken innapal iti pagtrabtrabahuak. Inaldaw a makangngegka kadagiti tsismis ken naalas a sasao. Awan bibiang dagiti katrabahuak basta maalada ti kaykayatda. No dadduma, mauy-uyaw wenno malalaiska gapu iti Nakristianuan a kababalinmo. Nupay kasta, naiduma ti agmalem a pannakikadua kadagiti pada a Kristiano iti ministerio ta pudno a makapabileg. No agawidakon, mariknak a nabang-aranak uray no nabambannogak.”

9. No agkadua dagiti agassawa nga agpayunir, ania ti epektona iti singgalutda kas agassawa?

⁹ Ti panagpayuniryo nga agassawa palagdaenna ti relasionyo. (Ecl. 4:12) Kinuna ni Madeline, nga agserserbi a payunir a kadua ni lakayna: “Adu ti panawenmi ken lakayko nga agsarita maipapan iti nagmalem a ministeriomi wenno iti maysa a punto a nabasami iti Biblia a mabalin a yaplikarmi iti ministerio. Sumingsinged ti relasionmi iti tunggal panaglabas ti tawen nga agserserbikami kas payunir.” Kinuna met ni Trisha: “Ikagumaanmi a liklikan ti umutang, isu a saanmi a pagrirririan ti kuarta. Agpada ti iskediul ti panagruarmi, isu a kanayon nga agkaduakami nga agsarungkar ken mangyadal iti Biblia. Dayta  ti mangpatpatibker iti singgalutmi nga agassawa ken iti espiritualidadmi.”

10. Ania ti epektona kadatayo no yun-unatayo ti Pagarian ken makitatayo a supsuportarannatayo ni Jehova?

¹⁰ Tumibker ti panagtalektayo ken Jehova bayat a yun-unatayo dagiti interes ti Pagarian, marikriknatayo ti suportana, ken makitkitatayo a sungsungbatanna dagiti kararagtayo. Pudno dayta iti amin a nasungdo a Kristiano. Ngem napaneknekan dagiti payunir a ti panagtalekda ken Jehova ti nakatulong kadakuada nga agtultuloy iti pribilehioda. (Basaen ti Mateo 6:30-34.) Ni Curt ken ni baketna ket payunir. Agserserbi pay ni Curt kas suno a manangaywan ti sirkito ket naituding a mapan mangbisita iti maysa a kongregasion a mabiahe iti dua ket kagudua nga oras manipud iti pagtaenganda. Ngem agpapan laeng sadiay ti umanayan ti gasolina ti luganda, ket agsueldonto pay laeng iti sumaruno a lawas. Kinuna ni Curt, “Agduaduaak no umiso ti desisionmi a mapan.” Kalpasan nga inkararagda ti situasionda, inkeddengda nga ituloyda ti mapan. Nagtalekda nga ipaay ti Dios dagiti kasapulanda. Pumanawda koman idi adda kabsat a timmawag a nangibaga nga adda sagutna kadakuada. Nangted iti kuarta nga eksakto a paggasolinada nga agawid. Kuna ni Curt, “No masansan a mapadasam ti kastoy, nabatad a makitam nga ipapaay ni Jehova dagiti kasapulantayo.”

11. Uray no adda problema dagiti payunir, apay a maikunatayo nga adda latta dagiti bendision a sagsagrapenda?

¹¹ Wen, masansan a mapaneknekan dagiti payunir a bayat nga ad-adu ti busbusbosenda a panawen nga agserbi ken Jehova ken sumingsingedda kenkuana, ad-adu met a bendision ti masagrapda. (Deut. 28:2) Ngem adda met dagiti karit a pakaipaspasanguan dagiti payunir. Amin nga adipen ti Dios ket apektado kadagiti parikut a resulta ti panagsukir ni Adan. Nupay kasapulan a sumardeng pay laeng ti dadduma a payunir gapu kadagiti problema, masansan nga adda solusion wenno mabalin pay ketdi a maliklikan dagita. Ania ti makatulong kadagiti payunir a makapagtultuloy iti pribilehioda?

12, 13. (a) Ania ti rumbeng nga aramiden ti maysa a payunir no marigatan a mangragpat iti kalatna nga oras? (b) Apay a nakapatpateg ti panagbasa iti Biblia iti inaldaw, personal a panagadal, ken panagmennamenna?

¹² Kanayon nga okupado ti kaaduan a payunir. Mabalin a marigatanda a mangiringpas kadagiti inyurnosda nga aramiden, isu a kasapulanda ti nasayaat a personal nga iskediul. (1 Cor. 14:33, 40) No marigatan ti maysa a payunir a mangragpat iti kalatna nga oras, nalabit nasayaat no usigenna manen ti pangus-usaranna iti tiempona. (Efe. 5:15, 16) Mabalinna nga isaludsod: ‘Kasano kaadu ti tiempok nga agpalpaliwa wenno agpaspasiar? Kasapulak kadi ti nainget a disiplina iti bagi? Mabalinko kadi a baliwan ti iskediul ti trabahok?’ Bigbigen ti asinoman a Kristiano a nagadu ti kayattay nga aramiden. Isu a kasapulan a kanayon nga usigen dagiti payunir ti iskediulda ket mangaramidda iti panagbalbaliw no kasapulan.

¹³ Regular koma a paset ti iskediul ti maysa a payunir ti panagbasa iti Biblia iti inaldaw, personal a panagadal, ken panagmennamenna. Tapno maaramidanna dayta, masapul a disiplinaanna ti bagina tapno saan nga agawen dagiti di unay nasken nga aktibidad ti tiempona para iti napateg a bambanag. (Fil. 1:10) Kas pagarigan, ipapanmo nga agawiden ti maysa a payunir iti pagtaenganna kalpasan ti nagmalem a ministeriona. Planona iti dayta a rabii ti agsagana para iti gimong. Ngem idi nakasangpet, umuna a binasana dagiti simmangpet a suratna. Kalpasanna, linuktanna ti kompiuter sa binasana dagiti e-mail-na ken sinungbatanna dagita. Bayat nga agin-Internet, linuktanna ti maysa a site tapno kitaenna no limmakan ti bayad ti banag a kayatna a gatangen. Agarup duan nga oras ti nabusbosna idi nadlawna a saanna pay a nairugi ti planona a panagadal iti dayta a rabii. Apay a saan a nasayaat daytoy? Dagiti propesional  nga atleta masapul nga aywananda ti bagida no kayatda ti agpaut kas atleta. Kasta met, masapul nga addaan dagiti payunir iti nasayaat a rutina iti personal a panagadal tapno agbalinda a nakired iti naespirituan ket makapagtultuloyda iti amin-tiempo a ministerio.—1 Tim. 4:16.

14, 15. (a) Apay a nasken a pagtalinaeden dagiti payunir a simple ti biagda? (b) Ania ti masapul nga aramiden ti maysa a payunir no tumaud dagiti pakarigatan?

¹⁴ Ikagkagumaan dagiti naballigi a payunir a pagtalinaeden a simple ti biagda. Imparegta ni Jesus kadagiti adalanna a maaddaanda koma iti simple a mata. (Mat. 6:22) Pinagtalinaedna a simple ti biagna tapno awan ti pakasingaan ti ministeriona, isu a naikunana: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan pangisaadanna iti ulona.” (Mat. 8:20) Ti payunir a mangikagkagumaan a mangsurot iti ulidan ni Jesus laglagipenna a no ad-adu ti material a sanikuana, ad-adu met ti manteneren, tarimaanen, wenno sukatanna.

¹⁵ Bigbigen dagiti payunir a naisangsangayan ti pribilehioda, ngem saanda nga ipapan a nasaysayaatda ngem iti sabsabali. Imbes ketdi, ammoda a ti aniaman a sagut wenno pribilehiotayo ket gapu iti di kaikarian a kinamanangngaasi ti Dios. Isu a tapno makapagtultuloy ti maysa kas payunir, masapul nga agtalek ken Jehova. (Fil. 4:13) Siempre, adda latta dagiti tumaud a pakarigatan. (Sal. 34:19) No dumteng dagita, agpaiwanwan koma ken Jehova dagiti payunir ket palubosanda a tumulong, imbes nga ibbatanda a dagus ti pribilehioda. (Basaen ti Salmo 37:5.) Bayat a mapaspasaranda ti naayat a tulong ti Dios, sumingedda kenkuana kas naayat a nailangitan nga Ama.—Isa. 41:10.

16. Ania ti masapul nga aramidem no kayatmo ti agpayunir?

¹⁶ No kayatmo a mapadasan dagiti bendision a tagtagiragsaken dagiti adda iti amin-tiempo a panagserbi, ikararagmo ken Jehova ti tarigagaymo. (1 Juan 5:14, 15) Makisaritaka kadagiti payunir. Mangiplanoka kadagiti progresibo a kalat a tumulong kenka nga agbalin a payunir. Kasta ti inaramid da Keith ken Erika. Agpadada nga addaan iti amin-tiempo a trabaho ken, kas iti adu a kaedadda a pagassawaan, gimmatangda iti balay ken baro a lugan kalpasan unay ti panagkasarda. Kunada: “Impagarupmi a naragsakkamin no magun-odmi dagita—ngem saan gayam.” Idi naikkat ni Keith iti trabahona, nagserbi kas auxiliary pioneer. Imbagana: “Ti panagpayunir impalagipna kaniak a nakaad-adu ti rag-o nga iyeg ti ministerio.” Nagayyemda ti maysa a pagassawaan a payunir a nakatulong kadakuada a makarikna iti rag-o nga ibunga ti simple a panagbiag ken panagpayunir. Ania ti inaramid da Keith ken Erika? “Inlistami dagiti naespirituan a kalatmi, impaskilmi dagita iti refrigerator, sa markaanmi dagiti kalat a maragpatmi.” Idi agangay, nabaelandan ti agpayunir.

17. Apay a nainsiriban nga usigem no mabaliwam ti iskediulmo wenno ti estilo ti panagbiagmo tapno makapagpayunirka?

¹⁷ Kabaelam kadi ti agpayunir? No saan pay a posible ita, aramidem ti amin a kabaelam a suminged ken Jehova babaen ti naan-anay a pannakiramanmo iti ministerio. Nasayaat nga ikararagmo ken usigem a naimbag ti kasasaadmo, ket mabalin a makitam a makapagpayunirka no mangaramidka iti sumagmamano a panagbalbaliw iti iskediul wenno estilo ti panagbiagmo. No irugim ti agpayunir, makitamto a ti rag-o a masagrapmo lab-awanna ti aniaman a panagsakripisiom. Naragragsakka met gapu iti panangyun-unam kadagiti interes ti Pagarian ken gapu ta tultulongam ti sabsabali. (Mat. 6:33) Kanayonanna, ad-adunto ti gundawaymo a mangpanunot ken mangisarsarita iti maipapan ken Jehova, ket daytoy ti mangpauneg iti ayatmo kenkuana ken mangparagsak iti pusona.