1, 2. (a) Oshike tashi ka ningwa po ngeenge otwa kala hatu popi kombinga yaumwe oo tu hole? (Tala efano olo li li pehovelo loshitukulwa.) (b) Omapulo elipi hatu ka kundafana?

OKUDILADILA nokupopya kombinga yaumwe oo tu hole otaku dulu okupameka ekwatafano letu naye. Osho osha faafana yo ngeenge tashi uya pekwatafano letu naJehova Kalunga. Eshi David a li omufita weedi, luhapu oufiku okwa li ha kala ta tale keulu li yadi eenyofi nokudilonga kOmushiti wado mukumwifi. Okwa ti: “Ngenge handi tale keulu, koshilongwa shominwe doye, kohani nokeenyofi, edi wa shita, omunhu omushike, eshi ho mu dimbulukwa, nomona womunhu eshi ho mu file oshisho?” (Eps. 8:4, 5) Eshi omuyapostoli Paulus a konakona nghee elalakano laJehova li na sha naIsrael shopamhepo la li la wanifwa monghedi ikumwifi, okwa ingida ta ti: “Ouule u fike peni woupuna noweendunge nowounongo waKalunga!” — Rom. 11:17-26, 33.

² Ngeenge tu li moukalele, ohatu kala hatu diladila nokupopya kombinga yaJehova. Osho ohashi tu kwafele tu kale tu na oukaume wa kola naye. Vahapu ovo va ninga ovakokolindjila ova mona kutya eshi hava kufa ombinga moilonga yOuhamba efimbo lihapu oshe va kwafela va kale ve hole Kalunga nohole yomoule. Kutya nee ou li moilonga yefimbo li yadi ile ou li pokuhanga elalakano olo, diladila kepulo eli: Ongahelipi oukokolindjila wondjikilile otau dulu okupameka ekwatafano loye laJehova? Ngeenge ou li omukokolindjila, lipula kutya, ‘Oshike tashi dulu okukwafela nge ndi twikile okulonga oilonga ei ye likalekelwa?’ Ngeenge natango ino ninga omukokolindjila, lipula kutya, ‘Omalunduluko elipi nda pumbwa okuninga opo ndi ninge omukokolindjila?’ Natu ka kundafaneni eenghedi omo oilonga yefimbo li yadi tai dulu okupameka ekwatafano letu naKalunga.

3. Okupopya kombinga yomanangeko noupuna Ouhamba omonakwiiwa moukalele ohaku tu kumu ngahelipi?

³ Okukundafana navamwe kombinga yomanangeko noupuna Ouhamba omonakwiiwa ohaku tu ehenifa popepi elela naJehova. Omushangwa ulipi u hole okulongifa ngeenge to udifa eumbo neumbo? Otashi dulika u hole okulongifa Epsalme 37:10, 11; Daniel 2:44; Johannes 5:28, 29; ile Ehololo 21:3, 4. Efimbo keshe hatu kundafana omaudaneko a tya ngaho navamwe, ohashi tu dimbulukifa kutya Kalunga ketu oo ha yandje nehalo liwa oye shili omuyandji ‘wakeshe oshipewa shiwa, nokeshe oshali sha wanenena.’ Osho ohashi tu ehenifa popepi elela naye. — Jak. 1:17.

4. Omolwashike okumona nghee ovanhu ovo hatu udifile ve li monghalo yopamhepo i etifa onghenda haku tu kwafele tu kale tu na olupandu linene li na sha nouwa waKalunga?

⁴ Okumona nghee ovanhu ovo hatu udifile ve li monghalo yopamhepo i etifa onghenda, ohaku tu kwafele tu kale tu na olupandu eshi twa shiiva oshili. Ovanhu mounyuni kave na apa tava hange ewiliko li shii okulineekelwa olo tali va kwafele va pondole nova kale va hafa shili. Ovanhu vahapu otave lipula shi na sha nonakwiiwa nokave na eteelelo la sha. Ohava kongo omauyelele e na sha neityo longhalamwenyo. Nokuli navahapu ovo hava i komalongelokalunga kave shii lela Omishangwa. Ova fa ashike ovanhu vokuNinive shonale. (Lesha Jona 4:11.) Ngeenge otwa kala hatu kufa ombinga moukalele efimbo lihapu, ohatu ka mona eyooloko olo li li pokati konghalo yopamhepo yaavo hatu udifile nosho yo yoshiwana shaJehova. (Jes. 65:13) Ndele Jehova okwa ulika ouwa waye eshi a ninga shihapu shihe fi ashike oku tu fila oshisho pamhepo. Ota shivi ovanhu aveshe ve uye va tulumukifwe pamhepo nova kale ve na eteelelo lashili. — Eh. 22:17.

5. Okukwafela vamwe pamhepo ohaku tu ningifa tu kale tu uditile ngahelipi omaupyakadi etu?

⁵ Okukwafela vamwe pamhepo ohaku tu kwafele tu henuke okukala twa wililwa po komaupyakadi opaumwene. Omukokolindjila wondjikilile wedina Trisha okwa mona oushili woshinima osho eshi ovadali vaye va li va teya ohombo. Okwa ti: “Osho oshimwe shomoiningwanima oyo ya li ya nyemateka nge neenghono monghalamwenyo yange.” Efiku limwe okwa li a nyemata nokwa hala okukala peumbo, ndele nande ongaho, okwa li a ya a ka konakone nounona vatatu ovo va li hava di meumbo mu na omaupyakadi mahapu. Xe younona ovo okwa li e va hauluka, nomumwaina womumati ou a kula okwa li he va hepeke. Trisha okwa ti: “Oupyakadi ile oluhodi keshe olo nda li handi ungaunga nalo kali fi sha oku li yelekanifa nolavo. Eshi hatu konakona, oumesho vavo ova li tava vilima notave limemesha va tunhukwa. Ounona ovo onda li nde va tala ko ve li oshali ya dja kuJehova, naunene tuu mefiku olo.”

6, 7. (a) Ongahelipi eitavelo letu hali pamekwa ngeenge hatu hongo vamwe oshili yOmbibeli? (b) Okumona nghee ovakonakonimbibeli tava xwepopaleke onghalamwenyo yavo omolwokutula moilonga omafinamhango opamishangwa ohaku tu kwafele tu kale twa tala ko ngahelipi ounongo waKalunga?

⁶ Okuhonga vamwe omahongo Ombibeli ohaku pameke eitavelo letu. Omuyapostoli Paulus okwa shanga shi na sha nOvajuda vamwe vopefimbo laye ovo va li va dopa okutula moilonga osho hava hongo vamwe, a ti: “Ongahelipi hano, ove ou ho longo ovanhu, iho lilongo [ove] mwene?” (Rom. 2:21) Ovakokolindjila vokunena inava yooloka ko tuu kOvajuda va tya ngaho! Ohava mono eemhito dihapu dokuhonga vamwe nohava ningi omakonakonombibeli. Ndele opo va pondole, ove na okukala have lilongekidile nawa ekonakonombibeli keshe notashi dulika nokuli va ninge omapekapeko kombinga yomanyamukulo omapulo onhumba. Omukokolindjila wedina Janeen okwa yelifa ta ti: “Efimbo keshe handi mono omhito yokuhonga vamwe oshili, ohandi kala ndi udite oshinima osho handi va hongo sha fa sha findilwa momadiladilo nomomutima wange. Osho ohashi pameke eitavelo lange.”

⁷ Okumona nghee ovakonakonimbibeli tava xwepopaleke onghalamwenyo yavo omolwokutula moilonga omafinamhango Ombibeli ohaku tu kwafele tu kale twa lenga ounongo waKalunga. (Jes. 48:17, 18) Osho ohashi tu kwafele yo tu kale twa tokola toko okutwikila okutula moilonga omafinamhango oo mokukalamwenyo kwetu. Omukokolindjila umwe vali wedina Adrianna okwa ti: “Ovanhu ngeenge ve lineekela  mounongo wavo vene, onghalamwenyo yavo ohai kala ya dundakana. Ashike shimha va hovele okukala ve lineekela ounongo waJehova, ohashi va etele ouwa pefimbo opo tuu opo.” Sha faafana, omukokolindjila umwe wedina Phil okwa ti: “Ohashi kala shitunhula okumona nghee ovanhu tava lundulula okukalamwenyo kwavo kekwafo laJehova, nonande kava li tava pondola sha eshi va li tava kendabala kuvo vene.”

8. Okulonga moukalele novamwatate novamwameme ohaku tu kumu ngahelipi?

⁸ Okulonga moukalele novamwatate novamwameme ohaku tu tungu pamhepo. (Omayel. 13:20) Ovakokolindjila vahapu ohava longo efimbo lile moukalele pamwe novaudifi vakwao vevaengeli. Osho ohashi tu pe eemhito ‘dokuhekelekafana,’ ile tu tye, dokutwaafana omukumo. (Rom. 1:12; lesha Omayeletumbulo 27:17.) Omukokolindjila umwe wedina Lisa okwa ti: “Koilonga, ovanhu ohava kala ve na omhepo yefiyafanepo nova twilafana ondubo. Efiku keshe oto udu ovanhu tava ambe vakwao notava tukana. Ohava kala va hala okukala va fimana ve dule vakwao, kashi na nee mbudi kutya otashi pula shike. Omafimbo amwe, ohave ku kembaula ile ve ku sheke omolwelihumbato loye lopaKriste. Ndele okulonga moukalele nOvakriste vakweni ohashi tungu shili. Shimha twa mane oukalele, ohandi shuna keumbo ndi udite nda pepelelwa, kashi na nee mbudi kutya onda loloka shi fike peni.”

9. Ongahelipi okukokola ondjila pamwe nakaume koye kopahombo taku dulu oku mu kwafela mohombo yeni?

⁹ Okukokola ondjila nakaume koye kopahombo otaku ka pameka ohombo yeni. (Omuud. 4:12) Madeline, oo ha kokola ondjila nomushamane waye, okwa ti: “Ame nomushamane wange ohatu kala hatu popi kombinga yanghee oukalele wetu wa enda efiku olo ile oshinima shonhumba osho twa lesha mOmbibeli osho hatu dulu okutula moilonga moukalele wetu. Omudo keshe hatu kokola ondjila pamwe, ohashi pameke ekwatafano letu.” Sha faafana, Trisha okwa ti: “Otwa udafana tuha lande oinima meendjo, nomolwaasho ihatu kala hatu tanguna shi na sha noimaliwa. Otwe liunganeka opo tu dule okukala hatu i moukalele pefimbo la faafana,  nomolwaasho luhapu ohatu ningi pamwe omalishuneko nomakonakonombibeli, naasho ohashi tu kwafele tu pameke ohombo yetu.”

10. Okukonga tete Ouhamba nokumona nghee Kalunga te tu yambidida ohaku kumu ngahelipi elineekelo letu muye?

¹⁰ Elineekelo letu muJehova ohali ende tali kolo eshi hatu pitifa komesho oinima yOuhamba, hatu mono nghee Jehova te tu yambidida nosho yo eshi ta nyamukula omailikano etu. Oshoshili kutya Ovakriste aveshe ovadiinini ove lineekela Jehova. Ndele ovakokolindjila ova mona kutya okulineekela Jehova otaku va kwafele va twikile okukokola ondjila. (Lesha Mateus 6:30-34.) Omukokolindjila wedina Curt, noku li yo omupashukilishikandjo wopakafimbo, okwa li a dimina a ka talele po eongalo lonhumba opo hapa shingwa eevili mbali netata okudja peumbo lavo. Ye nomukulukadi waye, oo naye e li omukokolindjila, mohauto yavo omwa li ashike mu na omahooli a wana oku va twala ndele itaa dulu oku va alula, nokwa li ashike ta ka kwata konima yoshivike shimwe. Curt okwa ti: “Onda li nda hovela okulipula ngeenge etokolo olo nda ninga oli li ngoo mondjila.” Konima eshi va ilikana, ova li va tokola okuwanifa po oshinakuwanifwa osho, ve na elineekelo kutya Kalunga ota ka wanifa po eemhumbwe davo. Fimbo vali ve li pokuya, omumwameme umwe okwa li e va dengela noku va lombwela kutya okwa hala oku va pa oshali yonhumba. Okwa li e va pa naanaa oimaliwa oyo va li va pumbwa opo va dule okuya nokwaaluka. Curt okwa ti: “Ngeenge owa ningilwa oshinima sha tya ngaho lwoikando, oshipu okumona kutya Jehova ote ku yambidida neke laye.”

11. Ovakokolindjila ohava hafele omanangeko noupuna amwe elipi?

¹¹ Luhapu ovakokolindjila ohava mono kutya eshi tava longo noudiinini moilonga yaJehova nokukendabala okweehena popepi elela naye, ohashi va etele omanangeko noupuna mahapu. (Deut. 28:2) Ashike oukokolindjila ou na omashongo. Kape na omupiya waKalunga a lya olusha lokuhahangwa komaupyakadi oo a etifwa kounashibofa waAdam. Omafimbo amwe, omaupyakadi otashi dulika a ningife ovakokolindjila vamwe va efe po oukokolindjila pakafimbo. Ashike luhapu omaupyakadi otaa dulu okukandulwa po ile nokuli okuhenukwa. Ndele mbela oshike tashi dulu okukwafela ovakokolindjila va twikile okuhafela oilonga yavo youkokolindjila?

12, 13. (a) Omukokolindjila oku na okuninga po shike ngeenge oha mono shidjuu okuwanifa po eevili doukokolindjila? (b) Omolwashike sha fimanenena okukonga efimbo lokulesha Ombibeli efiku keshe, okuninga ekonakono lopaumwene nokudilonga?

¹² Ovakokolindjila vahapu ove lipyakidila neenghono. Ohashi kala shidjuu kuvo okuwanifa po omalipyakidilo avo aeshe, nomolwaasho osha fimana kuvo okuliunganeka nawa. (1 Kor. 14:33, 40) Ngeenge omukokolindjila oha mono shidjuu okuwanifa po eevili odo e na okulonga, otashi dulika a pumbwa okutala kutya oha longifa ngahelipi efimbo laye. (Ef. 5:15, 16) Ota dulu okulipula kutya: ‘Ohandi longifa efimbo li fike peni momalihafifo ile moinima yopaumwene? Mbela onda pumbwa okukulika elipangelo shi dulife nale? Mbela onda pumbwa okuninga po omalunduluko shi na sha noilonga yange yokulikongela omboloto?’ Omukriste keshe ota dimine kutya oshipu okuweda ko komalipyakidilo etu, nomolwaasho, ovo ve li moilonga yefimbo li yadi ova pumbwa okulikonakona efimbo nefimbo nokuninga omalunduluko a pumbiwa.

¹³ Omukokolindjila oku na okukala ha lesha Ombibeli efiku keshe, ha ningi ekonakono lopaumwene nokudilonga. Ndele okwa pumbwa lela elipangelo opo omalipyakidilo oo inaa fimana ehe mu manene po efimbo olo e na okulongifa moinima ei ya fimanenena. (Fil. 1:10) Pashihopaenenwa, kala nee ngeno wa fa u wete omukokolindjila te uya meumbo, a uhala moukalele. Konguloshi efiku olo okwa li a tokola okulilongekidila okwoongala taku landula. Ndele tete, okwa hala okulesha ee-emaila daye. Okwa patulula okombiyuta ndele te di lesha noku di nyamukula. Opo nee, okwa ya vali konhele yonhumba yokointaneta opo a tale ngeenge ondado yoshinima shonhumba osho a hala okulanda oya kuluka. Eshi a ka papala, eevili adishe mbali oda pita nale noina hovela okulilongekidila okwoongala ngaashi a li a diladila. Omolwashike okuninga ngaho ku li oupyakadi? Opo ovatondoki ovanawino va dule okukala hava tondoka oule womido  dihapu, ove na okufila oshisho omalutu avo. Sha faafana, opo ovakokolindjila va dule okutwikila moilonga yefimbo li yadi, ova pumbwa okukala hava ningi ekonakonombibeli lopaumwene pandjikilile opo va pameke oupamhepo wavo. — 1 Tim. 4:16.

14, 15. (a) Omolwashike ovakokolindjila va pumbwa okukaleka onghalamwenyo yavo yanafangwa? (b) Omukokolindjila oku na okuninga po shike ngeenge okwa shakeneke omaudjuu?

¹⁴ Ovakokolindjila ovo hava pondola ohava kendabala okukala nonghalamwenyo yanafangwa. Jesus okwa ladipika ovahongwa vaye va kale ve na eisho li li nawa. (Mat. 6:22) Okwa kala e na onghalamwenyo i li paunafangwa opo a dule okuwanifa po oukalele waye nopehe omapiyaaneko. Okwa ti: “Eembadje odi nomakwena, needila dokeulu odi noihadi, ndele Omona wOmunhu ke na apa ta wilike omutwe waye.” (Mat. 8:20) Omukokolindjila oo a hala okushikula oshihopaenenwa shaJesus oku na okudimbuluka kutya apa ngoo pe fike ouhapu woiniwe yaye, opo ngoo tapa ka kala pe fike oku i fila oshisho, oku i pangela ngeenge ya teka ile oku i pingena po naimwe.

¹⁵ Ovakokolindjila ove na okudimbuluka kutya, nonande oilonga yavo oye likalekelwa, itashi ti kutya vo ove li xwepo ve dule ovaudifi vakwao. Ndele ponhele yaasho, oshipewa keshe ile oufembanghenda keshe oo tashi dulika tu na, otu u na omolwouwanghenda waKalunga uhe fi kuyelekwa. Onghee hano, opo omunhu a dule okutwikila e li omukokolindjila, oku na okukala e lineekela muJehova. (Fil. 4:13, yelekanifa no-NW.) Ndele ovakokolindjila otashi dulika va shakeneke omashongo nomaudjuu. (Eps. 34:20) Ngeenge osho osha ningwa, ove na okukonga ewiliko laJehova noku mu pitika e va kwafele, ponhele yokweefa po meendelelo oukokolindjila. (Lesha Epsalme 37:5.) Eshi tava mono nghee Kalunga te va yambidida pahole, otava ka ehena popepi elela naye, e li Xe womeulu omunefiloshisho. — Jes. 41:10.

16. Oshike u na okuninga po ngeenge owa hala okuninga omukokolindjila?

¹⁶ Ngeenge owa hala okuhafela omanangeko noupuna ngaashi oo haa hafelwa kwaavo ve li moilonga yefimbo li yadi, owa pumbwa oku shi lombwela Jehova meilikano. (1 Joh. 5:14, 15) Popya yo novakokolindjila. Litulila po omalalakano oo tae ku kwafele u ninge omukokolindjila. Osho osho Keith naErika va li va ninga. Ngaashi ovalihomboli vahapu vepupi lavo, ova kala hava i koilonga yokulikongela omboloto nova li va landa eumbo notuwa ipe diva konima eshi va hombola. Ova ti: “Otwa li hatu diladila kutya oinima oyo otai ke tu kwafela tu kale tu udite twa wanenwa, ndele hasho mboli.” Eshi Keith a kanifa oilonga yaye, okwa kufa oukwafelikokolindjila. Okwa ti: “Oukokolindjila owa dimbulukifa nge ehafo olo hatu mono ngeenge tu li moukalele.” Ova li va panga oukaume novalihomboli ovakokolindjila ovo va li ve va kwafela va mone ehafo olo hali di mokukala nonghalamwenyo i li paunafangwa nokukokola ondjila. Keith naErika ova li va ninga po shike? Ova ti: “Otwa li twa ninga omusholondodo womalalakano etu opamhepo, ndele hatu u nateke kokila yokutalaleka, nohatu didilike elalakano keshe olo twa wanifa po.” Mokweendela ko kwefimbo, ova ka dula okuninga ovakokolindjila.

17. Omolwashike shi li pandunge okutala ngeenge oto dulu okuninga po omalunduluko opo u ninge omukokolindjila?

¹⁷ Mbela ito dulu okuwaimina ovakokolindjila? Ngeenge ou wete kutya pomhito ei ito dulu okuninga omukokolindjila, kendabala ngaashi to dulu u ehene popepi elela naJehova mokukala ho longo noudiinini moukalele. Ngeenge owa ilikana kuJehova nokudiladila moule kombinga yonghalo yoye, oshi na oupu u ka mone kutya ngeenge owa ningi omalunduluko onhumba monghalamwenyo yoye oto dulu okuninga omukokolindjila. Ngeenge owa ningi omukokolindjila, ehafo olo to ka mona itali dulu nande okuyelekwa nomaliyambo oo wa ninga. Oto ka kala u udite wa wanenwa eshi wa pitifa komesho oinima yOuhamba, ponhele yokupitifa komesho omalalakano oye mwene. (Mat. 6:33) Oto ka mona yo ehafo linene olo hali di mokuyandja. Shimwe vali, oto ka kala u na eemhito dihapu dokudiladila nokupopya kombinga yaJehova, naasho otashi ku kwafele u kale u mu hole nohole yomoule notashi ke mu hafifa.